LALENGOEN LALAKAW 38
Kaemangay Tamdaw, Makalimay Kiso Ira ko Masamaanay a Hatokel?
‘Mamasimaw no taneng kiso.’—TANENG 2:11.
RADIW 89 Ci Yihofa Damsayay a Misaali: “Wawa Ako, Ka Citaneng.”
KALIMLAAN NO LALAKAWa
1. Ci Yoas, Uciya aci Yosiya misiˈayaway to maanan pasangaray a pakayraan hani?
HARATENGEN hena, kaemangho anca moetepho ira ko pina ko mihecaan iso malo hongtito, mamikayat to finawlan no Kawas, wa samaan ko harateng iso hani? Mamisamaan kiso misaka dademak to fadangalan iso hani? Masowalay no Fangcalay Cudad, iraay ko papina tamdaw kaemangho malo hongtiayto no Yuta. Tinakoen, ci Yoas 7 ko mihecaan, ci Uciya 16 ko mihecaan, ci Yosiya sa i 8 ko mihecaan mala hongtiayto. Taˈangayay ko masiˈayaway nangra a saroero! Soˈlin pasangaray ko pakayraan, kawra pakayni i sapadama ni Yihofa ato romaroma tamdaw, maremoay nangra ko masakenakenaay a pasangaray, malaˈosiay ko demak.
2. Hano maminanam kita to pakayniay ci Yoasan, Uciyaan aci Yosiyaan a maˈoningay hani?
2 Soˈliˈlin cowa ko hongti kita, kawra ngangaˈay kita mikitini toniya tatoloay a tamdaw i Fangcalay Cudad minanam to kalimlaan a sapasifanaˈ. Na midemakay cangra to ngaˈayay a pisaˈosi, kawra iraay ko mararaway a misaˈosian. Ngaˈay kita mikitini cangranan minanam, hano mamipiliˈ kita to ngaˈayay a widang, padadotoc misapoener, ato padadotoc micangacang ci Yihofaan.
MIPILIˈ TO NGAˈAYAY A WIDANG
Ngaˈayay kiso minanam to taˈarawan ni Yoas, micada to sapaini no ngaˈayay widang (Nengnengen ko saka 3, 7 fatac)c
3. O sapasifanaˈ ni Yihoyata pairaay to maanan a sapadama ci Yoasan hani?
3 Mitodong ci Yoasan, citaneng ko misaˈosian. Kaemangho ci Yoas awaayto ko wama, kawra madimadiay a Sakakaay Saysi ci Yihoyata midimokosay cingranan, malecad o wawa no niyah, pasifanaˈ cingranan midoko ci Yihofaan. Mitengilay ci Yoas to sapasifanaˈ ni Yihoyata, mansa citaneng ko misaˈosian, mikayat to finawlan midoko ci Yihofaan, mitomadawayho to fangcalay sefi ni Yihofa.—2 Rayray 24:1, 2, 4, 13, 14.
4. Misalimla kita to sarikec ni Yihofa mamilifok to maanan a epoc hani? (Taneng 2:1, 10-12)
4 Ano pasifanaˈ ko wama wina anca matoˈasay tisowanan maolah ci Yihofaan ato midofdof to palinian Ningra, o micadaay kiso to cecay kalimlaan a sapatelong. (ˈOsien ko Taneng 2:1, 10-12.) Adihayay ko pakayraan no wama wina pasifanaˈ to wawa. Nengnengen ko wama no fafahiyan salikaka ci Kaciya samaanay padama cingranan citaneng ko misaˈosian. To romiˈamiˈad o wama ningra ano patayra cingranan i picudadan i, malalengoay cingranan to pakaromiˈaday sinael. Sanay cingra: “Mihaen to demak ko wama, toya romiˈad ano tahalifa kako to pasangaray i, mafanaˈayto sasamaan midemak to matatodongay.” Roma i, o wama wina mikitini Fangcalay Cudad pafeli tisowanan to pina sakayat, mikecengay cangra to pasalat saan kiso miharateng alatek. O maanan ko papadama tisowanan micada to sapasifanaˈ nangra hani? O salikaka ci Anastasiya sanay, o wama wina ningra mitadtaday cingranan hano misaˈosi cangra to pina rikec, onini padamaay cingranan. Sanay cingra: “Mahapinangay ako, pafeli cangra toniya rikec takowanan, cowa ko sapiˈimeraw takowanan, ao pakayniay kaolah nangra takowanan, sapidipotaw takowanan. Mansa micadaayto kako toniya rikec.”
5. O misaˈosian iso sasamaan mifiyor to wama wina iso aci Yihofaan hani? (Taneng 22:6; 23:15, 24, 25)
5 Ano mitengil kiso to mikitiniay i Fangcalay Cudad mihadakan a sapaini no wama wina, o mamahemek cangra. Kalimlaan i, papakahemek kiso to Kawas, patireng to tahadaˈocay tanektekay a kalawidang Cingranan. (ˈOsien ko Taneng 22:6; 23:15, 24, 25.) Maharateng konini, makalimay kiso sapitodongaw to kaemangayho a Yoasan han?
6. Mapatayto ci Yihoyata ikor, pakasoˈlinay ci Yoas to nima a sowal hani? Samaanay ko teloc hani? (2 Rayray 24:17, 18)
6 Minanam to sapasifanaˈ ni Yoas, cowato ko mamararaw ko misaˈosian. Mapatay ci Yihoyata ikor, micawmaˈay ci Yoas to tatiihay widang. (ˈOsien ko 2 Rayray 24:17, 18.) O roma cowa ka olah to Kawas a ˈaˈideman no Yuta mihadakay to sapaini. Miharateng kiso i, o laliyasen ningra ko tatiihay a widang ngaˈ ngaˈay. (Taneng 1:10) Kawra, mitengilay cingra to sowal noya ˈaˈideman no Yuta. Tiya sapirikecaw ko salikaka ningra ci Cikariya cingranan i, mipatayan ningra ci Cikariya. (2 Rayray 24:20, 21; Matay 23:35) Mihaen ko demak ningra tada mariˈangay, tada maapaayto! Kaemangho ngaˈayay ko demak ni Yoas, kaadayayan i, ikor mitowakangay cingra ci Yihofaan, mipatayayho to tamdaw. Telocto mipatayan no sikawdan ningra cingra. (2 Rayray 24:22-25) Ano padadotoc cingra mitengil to sowal ni Yihofa, mitengilho to sapaini no roma maolahay ci Yihofaan a tamdaw, maedeng cowa ko mamahaen ko teloc. Ngaˈay kiso mikitini tinakoan ningra minanam to maanan a sapasifanaˈ hani?
7. O cima ko papiliˈen iso malo widang hani? (Nengnengen ko coka.)
7 Mikitini ci Yoasan mananamay ita a cecay sapasifanaˈ i, mamalawidang kita to maolahay ci Yihofaan, pakahemekay Cingranan a tamdaw, samanen tawlikay ko pifiyor nangra kitaanan. Cowa ko sahto sa malecaday ko mihecaan a tamdaw ko hawidang ita, haratengen o mihecaan ni Yihoyata ikakaay ko taˈangay ci Yoasan, kawra o sangaˈayay a widang cangra. Itini pipiliˈ to widang i, ngaˈayay licayen ko niyah: ‘Ngaˈay cangra padama takowanan paˈicel to pakasoˈlin ci Yihofaan han? Pakalalokay cangra takowanan midofdof to palinian ni Yihofa han? Maolahay cangra milengo to pakayniay ci Yihofaan ato soˈlinay kimad a demak han? Mikangodoay cangra to palinian no Kawas han? Edengan o kaolahan ako mitengil a sowal ko sowal nangra, anca itini matatodongay a tatokian misalof takowanan han?’ (Taneng 27:5, 6, 17) Soˈlinay i, ano cowa ka olah ko widang iso ci Yihofaan, o cowato ko misaalian iso a widang cangra. Kawra ano maolahay ci Yihofaan ko widang iso, o sasalimlaen ko hatiniay a widang, o papadama cangra tisowanan!—Taneng 13:20.
8. Ano misaka dademak kiso to sapicawmaˈ to widang a wangcan, mamisinanot to maanan?
8 O sapicawmaˈ to widang a wangcan ngaˈayay mirinnak to paro no lomaˈ ato widang. Kawra, ˈalomanay tamdaw mihadakay to sasing ato ika i sapicawmaˈ to widang a wangcan, pakafanaˈ to ˈalomanay tamdaw to micakayay ko niyah to maanan ato midemakay to maanan, o araaw i, o pahiyoay to tamdaw. Ano makalimay kiso mihadak to pina lalakaw i sapicawmaˈ to widang a wangcan, licayen ko niyah: ‘O araaw ako i, o pahiyoay to tao han? Sapakalalokaw kako to tao, anca papiharateng to tao tada idahiyay kako han? Micadaay kako to tatiihay a pifiyor no sapicawmaˈ to widang a wangcan, o harateng ato waywayan ako palidlid sanay malecad cangranan han? Sowal no mapatayayto a Malohemay Malitengay i Congpo salikaka ci Nisen Nolo sanay: “Aka pakahemek to tamdaw, samanen pakahemekay to tamdaw i, salikor awaay ko kangaˈayan. Ka pakaolahen ci Yihofa tisowanan, ano mihaen o polong maolahay ci Yihofaan a tamdaw mamaolah tisowanan.”
KA PADADOTOC MISAPOENER
9. Padamaay ci Yihofa ci Uciyaan midemak to maanan? (2 Rayray 26:1-5)
9 Mitodong ci Uciyaan, citaneng ko misaˈosian. Kaemangho ci Uciya tada misapoeneray, ‘mikangodoay to Kawas.’ O kaˈorip ningra 68 ko mihecaan, itini hakelong no kaˈorip ningra, padadotocay ci Yihofa palemed cingranan. (ˈOsien ko 2 Rayray 26:1-5.) Malowiday ni Uciya ko ˈalomanay a ˈada, mipaˈicelay to sapaˈading a demak no Yirusalim. (2 Rayray 26:6-15) Padamaan ni Yihofa cingra malaˈosi ko adihayay a demak, maedeng tada lipahakay cingra.—Patnakay 3:12, 13.
10. Ikor samaanay ko teloc ni Uciya hani?
10 Minanam to sapasifanaˈ ni Uciya, cowato ko mamararaw ko misaˈosian. O Hongti ci Uciya, somowal cingra to maanan, mamitoor ko tao midemak. Oranto i, ano sapidemakaw cingra to maanan haratengay sato midemak saan cingra miharateng hokira? Cecay romiˈad micomoday cingra i fangcalay sefi ni Yihofa, itini patoˈayaan a cadada mipaexiw. Mihaen ko demak ningra misafelitay to sapalimoˈot no Kawas, o mitaˈlifay to fadangalan ko demak. (2 Rayray 26:16-18) O Sakakaay Saysi ci Acariya sapicongedaw cingranan, kawra ‘mangolaway’ cingra, telocto misayfangan ni Yihofa cingra, palonoˈan cingra. Adihayay mihecaan, padadotocay ci Uciya madimadi ci Yihofaan, kaadayayan i, cowa ka padadotoc cingra tahatolas. (2 Rayray 26:19-21) Ano padadotoc misapoener cingra, maedeng cowa ko mamahecad ko teloc!
Cowa ko papasengi kita to malaˈosiay no niyah ko maanan a demak, ao papanokay to narorayan ci Yihofaan (Nengnengen ko saka 11 fatac)d
11. Sasamaan ko pidemak ita paihkal to iraay ko misapoeneray a waywayan no niyah hani? (Nengnengen ko coka.)
11 Taˈangayto ko ˈicel ikor, mapawanay ci Uciya o paˈicelay cingranan o ci Yihofa. Mananamay ita ko manan a sapasifanaˈ hani? Mamicerid kita patalipaˈelal to niyah, o kihcod a sapalemed ato tayal ita sahtoay o sapafeli ni Yihofa. Aka pasengi to nano demak no niyah, ao panokayen ko narorayan ci Yihofaan.b (1 Korinto 4:7) Mamisapoener kita, mihayi to cowa ko malefotay ko niyah, mamicada to sarikec nolatekay. O cecay 60 mihecaan a faˈinayan salikaka sanay: “Mananamay ako aka pakidem ko pinengneng to niyah. Latekay, pakayni i pina maapaay a raraw micadaay kako to sarikec, kawra misaˈicelay kako miliyaw a talifak, padadotoc talaˈayaw.” Ano mikangodo kita ci Yihofaan, padadotoc misapoener minengneng to niyah, wa ira ko lipahakay a nokaˈorip.—Taneng 22:4.
PADADOTOC MICANGACANG CI YIHOFAAN
12. Kaemangho ci Yosiya i, samaanay micangacang ci Yihofaan? (2 Rayray 34:1-3)
12 Mitodong ci Yosiyaan, citaneng ko misaˈosian. Misatapang ci Yosiya micangacang ci Yihofaan i, o kaemangayho cingra. Makalimay cingra sapitongalaw to kafanaˈ ci Yihofaan, mitoor to araaw ni Yihofa a midemak. Kawrira, oniya kaemangay a hongti misiˈayaway to pasangaray a pakayraan, itiya ˈalomanay tamdaw no kitakit midokoay to makaniway a kawas, o aira ko taˈangayay a timolo ningra ngaˈ midopo to matatodongay a pidoko. Soˈlinay patalahkal cingra to timolo, caka 20 ko mihecaan mapalahdawayto ko mararaway a pihakelongan.—ˈOsien ko 2 Rayray 34:1-3.
13. Patafang to tireng kiso ci Yihofaan ikor i, wa ira ko manan kafalic no kaˈorip hani?
13 Soˈlinto kaemangayho ko mihecaan iso, ngangaˈay mitodong ci Yosiyaan micangacang ci Yihofaan, micalep ko kafanaˈ to makapahay capeling Ningra. Ano mihaen ko demak iso, mamatongal ko kalim sapatafangaw to tireng ci Yihofaan. Ano patafang to tireng iso ci Yihofaan ikor i, wa ira ko manan a kafalic nokaˈorip hani? 14 ko mihecaan no salikaka ci Luke micadaay to paputisem, sanay cingra: “Misatapang nohatini, paisalakaten ako ci Yihofa i nokaˈorip, misaˈicelho pakahemek Cingranan.” (Marko 12:30) Ano makalimay kiso mihaen to demak, mamalifok ko adihayay a sapalemed.
14. Hadaken ko tinakoan mitadtad, o romaroma kaemangay samaanay mitodong to Hongti ci Yosiyaan.
14 O midokoay ci Yihofaan a kaemangay alatek mamisiˈayaw to manan a sapalifet hani? 12 ko mihecaan micadaay to paputisem ci Yohani, somowalay cingra miroeroay ko cafay micudad cingranan, papitamako cingranan. Sapicoˈayaw to mahaenay a saroero, miceriday patalipaˈelal to niyah ci Yohani, mitamako cowa ko pipalak aca to tireng, mamipalakho to kalalaˈed ningra ci Yihofaan. 14 ko mihecaan micadaay to paputisem ci Laycie, somowalay cingra samaanay miremo ko niyah to pasangar i picudadan, sanay: “O maˈaraway ato matengilay ako, palalitingan to soˈlinay kimad aci Yihofaan, tinakoen palalitingan ako ko cecay likisi a lalakaw to cecay maˈoningay no Fangcalay Cudad anca sapairasol. Ano masasowal to tao i, miharatengay kako ngaˈay paladaˈ cangranan to manan a sinael.” O malifaay iso a sapalifet cowa ka lecad to Hongti ci Yosiyaan alatek, kawra ngangaˈay kiso malecad cingranan malo citanengay ato madimadiay ci Yihofaan a tamdaw. Itini kaemangho i, minanam kiso miremo to sapalifet, wa ngaˈayto maharek a misaday, misiˈayaw to noikoran a sapalifet.
15. Hano ngaˈay madimadi midoko ci Yihofaan ci Yosiya hani? (2 Rayray 34:14, 18-21)
15 Matoˈasto i, misatapangay ko Hongti ci Yosiya mitomadaw to fangcalay sefi ni Yihofa. Toniya tatokian, mahelaay no tamdaw ko ‘nipafelian no Kawas ci Mosian a Rikec a cudad.’ Matengil ni Yosiya miˈosi ko tamdaw to sarikec ikor i, matemeray ko falocoˈ, tangsol mitoor to sarikec a midemak. (ˈOsien ko 2 Rayray 34:14, 18-21.) Sapitanamaw kiso miasip to Fangcalay Cudad to romiˈamiˈad han? Ano mihaenayto kiso a midemak, samaanay ko pidemak iso hani? Mitiliday kiso to sapadama to niyah a sinael han? Masowalay i fafekangay a lalakaw ci Luke, mitilidan ningra ko mahelaay a odoˈ no sinael i cecay ciwmin. Tanamen iso ko malecaday a pakayraan, mamadoloto maharateng ko kaolahan iso a sinael anca kalimlaan. Matongal ko kafanaˈ iso to Fangcalay Cudad, matongal ko olah micekiw to Kimad no Kawas, mamatongal ko kalim matayal saki Yihofaan. Malecad to Hongti ci Yosiyaan, ngangaˈay kiso mapakalalok no Kimad no Kawas, matatodong ko pidemak.
16. Hano taˈangay ko raraw ni Yosiya hani? Mananamay ita ko manan?
16 Minanam to sapasifanaˈ ni Yosiya, cowato ko mamararaw ko misaˈosian. Maedeng 39 ko mihecaan ni Yosiya i, taˈangayay ko raraw, telocto malahdaway ko ˈorip no niyah. Mitiˈeray cingra to niyah, cowa pasayra ci Yihofaan micangacang to sakayat. (2 Rayray 35:20-25) Mananamay ita ko manan? Ano hakowato ko mihecaan ita, hakowa ko halafin a minanam to Fangcalay Cudad, padadotoc kita micangacang ci Yihofaan. Tatodong i, mamicerid micangacang ci Yihofaan pafeli kitanan to sakayat, mamiceridho micekiw to Kimad Ningra, hanaca micada to sapaini no matenesay a Krisciyang. Mihaen ko demak ngaˈay padama kitanan maliyas ko sakararawaw, o lalipahakto ko kaˈorip ita.—Yakop 1:25.
KAEMANGAY TAMDAW, WA IRA KO ˈODINGARAY HATOKEL ISO!
17. Mikitini tatoloay a hongti no Yuta a maˈoningay mananamay ita ko manan?
17 Kaemangho i, ngaˈay midemak kiso to adihayay ciepocay a demak. O pakayniay ci Yoasan, Uciyaan aci Yosiyaan a maˈoningay paihkalay, ngangaˈay citaneng ko misaˈosian no kaemangay tamdaw, pakahemek ci Yihofaan, kawra pakayni i mararaw ko misaˈosian, papaira to tatiihay a teloc alatek. Ngangaˈay kiso minanam to ngaˈayay demak no tatoloay hongti no Yuta, hanaca misaˈicel a miliyas to malecaday a raraw nangra, mihaen i, aira ko ˈodingaray hatokel iso.
Kaemangay a Tafiti miingiday ci Yihofaan, telocto milifokay to pihayda ni Yihofa, ciepocay ko hakelong nokaˈorip (Nengnengen ko saka 18 fatac)
18. O manan a tinakoan i Fangcalay Cudad paihkalay, ngangaˈay ciepoc ko kaˈorip iso hani? (Nengnengen ko coka.)
18 Maˈoningayho no Fangcalay Cudad ko romaroma nalifetan no kaemangay, miingiday cangra ci Yihofaan, milifokay to pihayda ni Yihofa, marenecen ko hakelong no kaˈorip. O ngaˈayay a tinakoan ci Tafiti, kaemangho cingra i, midokoayto ci Yihofaan, ikor malo ngaˈayay a hongti, padotoc madimadi to Kawas. Soˈlin mararaway cingra to pina raraw, kamayan o madimadiay a tamdaw cingra sanay ko harateng no Kawas. (1 Hongti 3:6; 9:4, 5; 14:8) Micekiw kiso to nalifetan ni Tafiti, mamicada to sapakalalok malecad cingranan madimadi matayal saki Kawas. O roma i, ngaˈay kiso misongilaˈ a micekiw to maˈoningay i Marko anca Timoti. Mamananam iso mikitini kaemangho cangra i, midokoayto ci Yihofaan, hanaca madimadi Cingranan i hakelong no kaˈorip. O mipiliˈan nangra cowa pakahemek aca ci Yihofaan, ciepocayho ko kaˈorip no niyah.
19. Ngangaˈay kiso ira ko masamaanay a nokaˈorip hani?
19 Wa ira ko masamaanay a hatokel iso, o kalimlaan i, mipiliˈan iso nohatini ko samaanay a nokaˈorip. Ano mitadiˈec kiso ci Yihofaan, eca ko inaneng no niyah ko mitiˈeran, papadama Cingra tisowanan citaneng ko misaˈosian. (Taneng 20:24) Caciepoc ko kaˈorip iso, marenec ko kaˈorip. Haratengen misaaretengay ci Yihofa to nano demak iso Cingranan. Misaka dademak kiso to hakelong no kaˈorip matayal i sidaˈitay Wama ci Yihofaan, awaay ko mikikakaay tonini ko kangaˈay!
RADIW 24 Pamoteken Minengneng ko Lifon!
a Kaemangay tamdaw, mafanaˈay ci Yihofa to tatahalifa kiso to pina sapalifet, sapadotocaw ngaˈay ko kalawidang iso Cingranan cowa ko madoloay. Sasamaan kiso citaneng ko misaˈosian, pakahemek to kakarayan Wama hani? Iraay ko tatoloay hongti no Yuta kaemangho malo hongtiayto. Oniya lalakaw mamilengo to tinakoan nangra. Nengnengen mikitini misaˈosian nangra ngaˈay mananam iso ko maanan.
b Nengnengen ko jw.org wangcan, nengnengen ko “Cingangan I Wangcan Soˈlinay Kalimlaan Han?” o sapatongal nonini a lalakaw “Aka ‘o Papotal ko Misapoeneray, ˈArawahan o Pasengiay.’”
c TATODONG NO COKA: Cecay matenesay fafahiyan salikaka pafeliay to ngaˈayay sapaini i cecay kaemangay fafahiyan salikaka.
d TATODONG NO COKA: Cecay fafahiyan salikaka iraay ko toki mirienang to kamok no taykay, mitadiˈecay cingra ci Yihofaan, hanaca panokay to sapakahemek Cingranan.