Hano Kakangodoen ci Yihofa?

1-2. Mikitini ˈOlic 25:14, sakalawidangaw ci Yihofaan i, sasamaan ko pidemak ita hani?

HARATENG iso sapadadotocaw tangongol ko kalawidang to tao sasamaan ko pidemak hani? Caciharateng ato padama to tao wa saan ko sowal iso alatek, cowa ka harateng iso to mamikangodo cingranan. Kawrira, o lalangian a sinael nonini a lalakaw somowalay, sakalawidangaw ci Yihofaan, oha ‘mamikangodo Cingranan.’—ˈOsien ko ˈOlic 25:14.

² Ano hakowaayto ko halafin ita midoko ci Yihofaan, oha papadotoc kita mikangodo Cingranan. O maanan ko tatodong no mikangodo ci Yihofaan hani? Sasamaan kita palahad to mikangodoay ci Yihofaan a falocoˈ hani? Pakayni mikangodoay, ngaˈay kita mikitini i mikowanay to lomaˈ no hongti ci Opatiyaan, Sakakaay Saysi ci Yihoyataan ato Hongti no Yuta ci Yoasan mamananam ko maanan?

MIKANGODO TO KAWAS O MAANAN KO TATODONG?

3. Tadtaden o matalaway a harateng o papaira to maanan a haepoc kitanan.

³ Tatodong no mikangodoay to Kawas i, matalaway pakayni pidemak to maanan a demak eca ka hemek Cingra. Soˈlin tocerid cowa ka olah kita to matalaway a harateng, kawra ira ko mahaenay a harateng nolatekay iraay ko epoc kitanan, ngaˈay padama kitanan mataneng ko pisaˈosi. Tinakoen, matalaway kita matefad i ngapad, caayto ko mamiingid to lilis no ngapad. Matalaw kita a madokaˈ, oha mamiliyas to katalawan. Matalaw mangelaˈ ko kalawidang, cowato ko sasomowal to tatiihay a sowal, ato pakasomaday to widang a demak.

4. Mihalakaay ci Satan ira ko masamaanay a harateng ita pakayni ci Yihofaan?

⁴ Mihalakaay ci Satan matalaw ko tamdaw ci Yihofaan. Papiharatengay kitanan to malecaday ci Yihofa to nisowalan ni Ilifac, o ranikayay a maketer, sahtoay sapisayfangaw kitanan, tahadaˈoc cowa ka ngaˈay pakahemeken. (Yopu 4:18, 19) Mihalakaay ci Satan pakayni kaciˈangi ci Yihofaan cato ka pidoko Cingranan. Caay ka sakarefongaw kita i talakal ni Satan, palahaden ita ko matatodongay a waywayan, cowa ko nika ciˈangi ci Yihofaan a midoko Cingranan.

5. Mikangodo to Kawas o maanan ko tatodong hani?

⁵ Mikangodoay to Kawas a tamdaw tangongolay ko olah to Kawas, caay ka sapipalakaw to kalalaˈed ato Cingranan. O mahaenay ci Yis. Sanay ko Fangcalay Cudad, ‘mikangodoay cingra to Kawas.’ (Hipray 5:7) Ci Yis cowa ka kaciˈangi ci Yihofaan. (Isaya 11:2, 3) Tangongolay ko olah ni Yis ci Yihofaan, makalimay a midofdof Cingranan. (Yohani 14:21, 31) Malecad ci Yisan, o tatangongol ko pikangodo ita ci Yihofaan, samanen matomesay ko olah ato taneng Ningra, masadafdafay cowa pisateked, mikiriwiˈay ko ˈicel. Mafanaˈay kita tangongolay ko olah ni Yihofa kitanan, misakaretengay minengneng to samaanay ko waywayan ita to sakayat Ningra. Alatek mipiliˈan ita papakahemek ci Yihofaan, anca papakasomad to falocoˈ Ningra.—ˈOlic 78:41; Taneng 27:11.

PALAHAD TO MIKANGODOAY A FALOCOˈ CI YIHOFAAN

6. Sapalahadaw to mikangodoay a falocoˈ ci Yihofaan, o cecay pakayraan o maanan? (ˈOlic 34:11)

⁶ O mikangodoay ci Yihofaan a falocoˈ cowa ka hofoc han iraayto, misaaliay to papalahaden no mita. (ˈOsien ko ˈOlic 34:11.) Sasamaan a mipalahad hani? Cecay pakayraan i, mihapinang to nisangaˈan Ningra a maamaan. Mikitini ‘nisangaˈan a maamaan’ mahapinangay ita, citanengay ato ciˈicelay Cingra, tangongolay ko olah kitanan. Mamatongal ko pikangodo ato kaolah Cingranan. (Loma 1:20) Fafahiyan salikaka ci Ataliana sanay: “Mikitini masangaˈay a maamaan mahapinangay ako, tada citanengay ci Yihofa, fahkaˈan nanay kako. Cipinangayho to mafanaˈay Cingra o maanan ko sangaˈayay takowanan.” Marariday ci Ataliana midotim tonini, sanay cingra: “O ˈorip ako ano ci Yihofa ko pafeliay i, caay ka ciharateng kako midemak to maanan a mipalak to kalalaˈed ato Cingranan.” Ngaˈay kiso toniya lipay milimasmas to toki mihapinang to cecay masangaˈay a dafong, misongilaˈ a midotim han? Mihaen ko demak iso mamatongal ko pikangodo ato kaolah ci Yihofaan.—ˈOlic 111:2, 3.

7. O satolon sasamaan padama kitanan palahad to mikangodoay ci Yihofaan a falocoˈ?

⁷ Micerid mitolon wa ngaˈay padama kitanan palahad to mikangodoay ci Yihofaan a falocoˈ. Ano adihayay ko pitolon ita, mamatongal ko kafanaˈ ci Yihofaan. O kahacecay a pingitangit to Kawas paˈicel kitanan miemem to sapalifet i, o patalipaˈelalay to niyahan, awaay ko tolas no ˈicel no Kawas. O kahacecay a piakoˈid ci Yihofaan pafeli to kanonoˈan a Wawa i, o patalipaˈelalay to niyahan, tangongolay ko olah ni Yihofa. O kahacecay a pingitangit ci Yihofaan padama kitanan misiˈayaw to pasangaray i, o patalipaˈelalay to niyahan, mikiriwiˈay ko taneng ni Yihofa. O mahaenay a pitolon papadama kitanan matongal ko pikangodo ci Yihofaan, matongal ko pisetek no falocoˈ, cato pidemak to mamipalak to kalawidang Cingranan a demak.

8. Sasamaan ko pidemak ita wa ngaˈayto padadotoc mikangodo ci Yihofaan hani?

⁸ Sapadadotocaw mikangodo ci Yihofaan, mamisongilaˈ a micekiw to Fangcalay Cudad, folfolen ko ngaˈayay ato tatiihay a tinakoan, nengnengen o maanan ko mamananam no mita. Dotoc, mamilengo to tatosaay madimadiay sikawdan ni Yihofa—o mikowanay to lomaˈ no Hongti ci Opatiya ato Sakakaay Saysi ci Yihoyata. Ikor nengnengen ko tinakoan no Hongti no Yuta ci Yoas. Soˈliˈlin satapang aca mikangodoay cingra ci Yihofaan, kawra ikor miliyasay ci Yihofaan. Mamilengo kita mikitini i cingranan mamananam ko maanan a sapasifanaˈ.

KA MATIYA TO MANGODOAY TO KAWAS A OPATIYAAN A TIMOLO

9. Tona mikangodoay ci Yihofaan, malo masamaanay a tamdaw ci Opatiya hani? (1 Hongti 18:3, 12)

⁹ Sakinacecay masowal no Fangcalay Cudad ci Opatiyab i, sanay ko sowal: ‘Tada mikangodoay ci Opatiya ci Yihofaan.’ (ˈOsien ko 1 Hongti 18:3, 12.) Tona mikangodoay ci Yihofaan, malo masamaanay a tamdaw ci Opatiya hani? O soˈliˈlinay ko waywayan ngaˈayay tiˈeren cingra, mansa nilnilen no hongti cingra mikowan to lomaˈ no hongti. (Nengnengen ko Nihimiya 7:2.) Tona mikangodoay ci Opatiya to Kawas, iraay ko mikiriwiˈay a timolo, tada kalimlaan ningra konini a capeling. Itiya i, ci Ahap ko Hongti, ‘midemakay to kapiliˈan ni Yihofa a demak cingra, ikakaay ko nika tatiih to iˈayaway a hongti.’ (1 Hongti 16:30) Roma i, o fafahi ci Yicipil mitaˈongay ci Paalan, tada ˈintehay ci Yihofaan, sapipalahdawaw to matatodongay a pidoko. Mipatay to ˈalomanay pairasolay ni Yihofa. (1 Hongti 18:4) Ci Opatiya itini mahaenay a pakayraan tada pasangaray midoko ci Yihofaan.

10. Ci Opatiya samaanay patalahkal to timolo hani?

¹⁰ Ci Opatiya samaanay patalahkal to timolo hani? Tiya sapipatayaw ci Yicipil to pairasolay ni Yihofa i, milidongan ni Opatiya ko 100 a pairasolay ni Yihofa, ‘o cecay kapot 50 papilimeken i dihidihifan cangra, pafeli cangranan to epang ato nanom.’ (1 Hongti 18:13, 14) Ano maletep i, maedeng o papatayen ci Opatiya. Manaokaniw, o kalo a tamdaw cingra, cowa ka sakapatayaw. Kawra palinien to ˈorip no niyah, ikakaay ko olah ningra ci Yihofaan ato romaroma midokoay ci Yihofaan a tamdaw.

11. Anini ˈalomanay salikaka samaanay mitodong to taˈarawan ni Opatiya hani? (Nengnengen ko coka.)

¹¹ Anini, ˈalomanay salikaka itiniay i makecengay ko mitosilay a tayal a kilac maˈorip. Soˈliˈlin mikangodoay cangra to sifo, kawra malecaday cangra ci Opatiyaan kiemel misamacay a mihodop ci Yihofaan. (Matay 22:21) Mikangodoay cangra to Kawas, midofdof Cingranan eca ko tamdaw ko dofdofen. (Dmak 5:29) Padotocay cangra milasil to ngaˈayay lihaf, hanaca minaˈonay a misikay to saˈopo. (Matay 10:16, 28) Ciharatengayho cangra to saali no salikaka, mansa misaˈicelay padama to salikaka milifok to sapahaled to pakasoˈlinay falocoˈ a kakaenen. Nengnengen ko nalifetan ni Enli. Itiniay cingra i Afrika, iraay ko cecay liyad makecengay ko mitosilay tayal i kilac ningra. Toya tatokian, talaˈayaway ci Enli pangangan palilam to mitepangan a cudad i salikaka. Sanay cingra: “O hinatalaway a tamdaw kako. Ano cowa ko pakayniay i pikangodo ci Yihofaan, wa awa ko mahaenay a timolo ako.” Makalimay kiso malecad ci Enlian a timolo han? Ano palahaden iso ko mangodoay to Kawas a falocoˈ, o mamadangarto iso.

KA MATIYA TO MANGODOAY TO KAWAS A YIHOYATAAN A MADIMADI

12. Ci Yihoyata ato fafahi samaanay madimadi ci Yihofaan?

¹² Sakakaay Saysi ci Yihoyata tada mangodoay ci Yihofaan, mansa misetekay to falocoˈ madimadi ci Yihofaan, misaˈicel miˈading to matatodongay a pidoko. Itiya, ci Ataliya mihalakaay miˈafas to saaroˈan no hongti, tada matalaway ko finawlan no Yuta. O wawa ni Yicipil, maˈanofay cingra, sapipatayaw to cifadangalay midotoc to saaroˈan no hongti. O fofo ningra cangra! (2 Rayray 22:10, 11) Kawra cecay a wawa ci Yoas materekay a maˈorip, samanen o fafahi ni Yihoyata ci Yihosipa mipaˈoripay cingranan. Cangra mararamod mipalimekay tonini a wawa, misongilaˈ a midimokos cingranan, mihaen o teloc ni Tafiti iraay ko mamidotoc to saaroˈan no hongti. Soˈliˈlin misiˈayaw to katalawan no ˈorip, kawra ci Yihoyata madimadiay to Kawas, cowa ka talaw toya mariˈangay a Ataliyaan.—Taneng 29:25.

13. Pito ko mihecaan ni Yoas i, samaanay ci Yihoyata miliyaw paihkal to madimadiay ko niyah ci Yihofaan?

¹³ Pito ko mihecaan ni Yoas i, miliyaway ci Yihoyata paihkal to madimadi ci Yihofaan. Milimasmasay ci Yihoyata, ano malaˈosi i, o ngangaˈayto ci Yoas maroˈ i kamaroˈan no hongti ni Tafiti, ano caka laˈosi i, o mamapatay ci Yihoyata. Palemedan ni Yihofa cingra, malaˈosiay konini demak. Midamaan no ˈaˈideman ato ngasaw no Lifi ci Yihoyata, midopoay cangra ci Yoasan mala hongti, mipatayanto ci Ataliya. (2 Rayray 23:1-5, 11, 12, 15; 24:1) Dotocto i, ci Yihoyata ‘papitatelekan ko hongti ato finawlan aci Yihofaan, padama cangranan padadotoc malo finawlan ni Yihofa.’ (2 Hongti 11:17) Ci Yihoyata ‘miocoray to mihimaway to fawahan a tamdaw tomireng i kahacecay a fawahan no fangcalay sefi, ano o mananto a demakan ko sakaeca ka korac no tamdaw, cowa ko ngangaˈay micomod.’—2 Rayray 23:19.

14. Tona mikangodoay ci Yihoyata ci Yihofaan, samaanay makangodo cingra hani?

¹⁴ Na somowalay ci Yihofa: ‘Mikangodoay Takowanan i, o kakangodoen Ako cingra.’ Soˈlinay pafelian ni Yihofa ci Yihoyata to mikiriwiˈay a pikangodo. (1 Samuil 2:30) Tinakoen, itini i Fangcalay Cudad miˈoningan ni Yihofa ko nano demak ni Yihoyata, ho ngaˈay mananam ita. (Loma 15:4) Mapatay ci Yihoyata ikor milifokay to mikiriwiˈay a sapalemed, ‘mitademan i Niyaroˈ ni Tafiti, malacafay to hongti a tademen i malecaday a kitiraan, samanen makapahay ko nidemakan ningra i Israil ato fangcalay sefi no Kawas.’—2 Rayray 24:15, 16.

15. Mikitini ci Yihoyataan mamananam ita ko maanan? (Nengnengen ko coka.)

¹⁵ Minanam ci Yihoyataan papadama kitaanan palahad to mikangodoay ci Yihofaan a falocoˈ. O malohemay malitengay a Krisciyang wa ngaˈay mitodong ci Yihoyataan, madimadi to ˈinorong, micerid misinanot to saali no salikaka, midipot cangranan. (Dmak 20:28) O matoˈasay a salikaka wa ngaˈay mikitini ci Yihoyataan minanam, ano mikangodoay ci Yihofaan, padadotoc madimadi, o sakadademaken ni Yihofa cangra palaˈosi to araaw Ningra, cowa ko mamifalah cangranan. O kaemangay a Krisciyang wa ngaˈay misinanot to pikangaˈay ni Yihofa ci Yihoyataan, mitodong ci Yihofaan mikangodo to matoˈasay a Krisciyang, mangalef oya halafinayto madimadi matayal saki Yihofaan a salikaka. (Taneng 16:31) Cowa konini aca, polong a tamdaw wa ngaˈay mitodong toya midamaay ci Yihoyataan a ˈaˈideman ato ngasaw no Lifi, midofdof to ‘mikayatay a tamdaw’ i lalomaˈ no mita, madimadi a midama cangranan.—Hipray 13:17.

MIKITINI TINAKOAN NO HONGTI CI YOAS MICADA TO SAPASIFANAˈ

16. Sasamaan mahapinang ita madoloay makayhid ko Hongti ci Yoas?

¹⁶ Micadaay to ngaˈayay a pifiyor ni Yihoyata ko Hongti ci Yoas. (2 Hongti 12:2) Mihaenay, kaemangho cingra makalimay sapidemakaw to kaolahan ni Yihofa a demak. Nikawrira, mapatay ci Yihoyata ikor, pakasoˈlinay ci Yoas to mitowakangay a sasowalen no papina ˈaˈideman, telocto cingra ato finawlan ‘misatapangay mitaˈong to samiyay.’ (2 Rayray 24:4, 17, 18) Tada masomaday ci Yihofa, ‘padotocay miocor to pairasolay tayra cangranan, sapikeridaw cangranan minokay i ci Yihofaan . . . , kawra caay ka kahi cangra mitengil.’ Ano o sowalto no wawa ni Yihoyata ci Cikariya caay ka pitengil cangra. Ci Cikariya cowa ko saysi aca ato pairasolay ni Yihofa, o pasadakanho a salikaka ni Yoas cingra! Ci Yoas cowa ka pisikol to pilidong no paro no lomaˈ ni Cikariya cingranan, silikor sanay to sidaˈit no tao, mipatay ci Cikariyaan.—2 Rayray 22:11; 24:19-22.

17. Samaanay ko teloc ni Yoas hani?

¹⁷ Ci Yoas cowa ka padadotoc mikangodo ci Yihofaan, tada kaadayayan ko teloc. Na somowalay ci Yihofa: ‘Misakahmaway minengneng Takowanan i, o mamasakahmaw.’ (1 Samuil 2:30) Cowa ka ˈaloman a sofitay no Siriya micomod i kitakit no Yuta i, soˈliˈlin mikeriday ci Yoas to taˈangayay a sofitay a mifolaw, kawra mapadikay cingra, ‘pakidemayho ko dokaˈ.’ Miliyas ko tamdaw no Siriya ikor, o sikawdan ni Yoas samanen na mipatayay cingra ci Cikariyaan, mihalakaay mipatay cingranan. Cowa ka tademen ci Yoas i ‘patademan no hongtingti,’ samanen awaay ko tatodong nonini tatiihay hongti sanay ko harateng no ˈalomanay.—2 Rayray 24:23-25; nengnengen ko “Sapicekiw a Fangcalay Cudad” i Matay 23:35 a pitadtad “wawa ni Pirakiya ci Cikariya.”

18. Mikitini Yirimiya 17:7, 8, sasamaan ko pidemak ngaˈ ho eca ka pitoor kita to pasaripaˈan ni Yoas hani?

¹⁸ Mikitini ci Yoasan mananam ita ko maanan hani? O cecay kilang ano panta ko lamit i, o mamitiˈer to sacoker ngaˈ moecel ko katomireng. Ano paliyasen ko sacoker i, ira ko taˈangayay fali o mamaterep konini a kilang. Malecaday ci Yoas tonini a kilang. Oya midamaay cingranan a Yihoyata mapatay ikor, mafiyoray no mitowakangay a sasowalen cingra, cowato ka tanektek a tomireng, miliyasay ci Yihofaan. Onini a tinakoan mitadtaday, cowa ka ngaˈay kita ira ko sadama no paro no lomaˈ ato salikaka ngaˈ mangodo ci Yihofaan. Sapitafoaw to tanektekay a pakasoˈlin, o mamicerid kita micekiw, midotim ato mitolon, paˈicel to olah ato mangodoay ci Yihofaan a falocoˈ.—ˈOsien ko Yirimiya 17:7, 8; Kolosay 2:6, 7.

19. O maanan ko saali ni Yihofa kitaanan hani?

¹⁹ Cowa ka pakidem ko saali ni Yihofa kitaanan. Patnakay 12:13 ano tolasen ko saali ni Yihofa, saan ko sowal: ‘Kangodoen ko Kawas, midoedo to limoˈot Ningra. Onini ko lalahcien no tamdamdaw a demak.’ Mikangodo kita to Kawas, o ngangaˈayto misiˈayaw to sapalifet noikor, ngaˈayho malecad ci Opatiyaan aci Yihoyataan tanektek caka ngiyangi. Ano padadotoc kita mikangodo ci Yihofaan, awaayto ko maan mamipalak to kalawidang ita i Cingranan!