Matira ci Pitiroan, Ngangaˈay Kiso Kodait Tahatolas

1. Midemakay ci Yis to kafahkaˈan padama ci Pitiroan adihay ko matafokoday a foting, samaanay ko piharateng ni Pitiro itiya?

SALAFII sanay ci Pitiro a mifoting, ˈarawhan awaay ko maamaan a maalaay, pasowal hananay ni Yis cingra: “ˈIwasen ko tamina a patayra i talolongay. Tefaden ko salil namo a mifoting.” (Luka 5:4) Cowa pakasoˈlin ci Pitiro to mamatafokod ko foting, kawra toor hananay ningra ko sowal ni Yis. ˈArawhan, adihayay ko matafokoday a foting, mangata macicih ko salil. Maˈaraw ni Pitiro ato kapot ningra konini a kasapaan i, ‘fahkaˈan nanay cangra.’ Sato ko sowal ni Pitiro: ‘Tapangaw, ka piliyas takowanan, o ciraraway a tamdaw kako.’ (Luka 5:6-9) Awaay ko tatodong no mako mikalacafay ci Yisan saan ko piharateng ni Pitiro to niyahan.

2. Ano micekiw kita to pakayniay ci Pitiroan a demak i, hano mapakalalok kita hani?

² Matatodongay ko sowal ni Pitiro, soˈlinay o ‘ciraraway a tamdaw’ cingra. Maˈaraway ita i Fangcalay Cudad nolatekay mararaway ko sowal, mararaway ko pidemak, makesemay ko falocoˈ ni Pitiro. Malecaday kiso ci Pitiroan mahaen ko harateng han? Misaˈicelay kiso miremo to maan a dangoc, anca padadotocay miˈodot to maan mararaway harateng han? Ano maˈosiay iso ko pakayniay ci Pitiroan a demak i, mamakowad kiso. Misamaanay hani? Haratengen hena, soˈlin ngangaˈay ci Yihofa eca ka papiˈoning to raraw ni Pitiro i Fangcalay Cudad, kawra papitiliden Ningra ko tamdaw tonini a demak, mihaen o ngangaˈayto kita mikitini mananam ko masakalimlaan a demak. (2 Timoti 3:16, 17) Iraay ko kalecadan ita ci Pitiroan, mihaenay ano micekiw kita to pakayniay cingranan a demak i, mamahapinang cowa ka pisaali ci Yihofa malefot ko pidemak no mita, edengan aca aka pisawad midoko Cingranan to nika dangoc, kao padadotoc misaˈicel kodait tahatolas sanay Cingra.

3. Misamaanay hano ka kodait kita padadotoc misaˈicel hani?

³ Misamaanay hano ka kodait kita misaˈicel hani? Patinakoen ita ko sowal: O midatokay a tamdaw hala:fin a mihatatanam ngaˈ makapah ko pidatok. Itini tonini a tatokian, kinapinapinaay cingra mararaw, kawra ano padadotoc cingra mihatatanam i, salikor mamacakatto. Soˈlin matanengayto cingra midatok, mararawayho nolatekay, kawra cowa ko mamisawad cingra, papadadotoc pacakat to inaneng no niyah. Malecaday, soˈlinto maremoayto no niyah ko maanan a kadangocan ano sa i, kakamayanho mararaw cingra to malecaday a raraw, kawra papadadotoc kita misaˈicel. Marariday kita mararaw ko sowal mararaw ko demak, telocto i, makesemay ko falocoˈ, kawra ano caka pisawad kita, papadamaen ni Yihofa padotoc macakat kita. (1 Pitiro 5:10) Dotoc, lengoen ita ko kodaitay a ngaˈayay taˈarawan ni Pitiro. Nengnengen ita samaanay ci Yis sidaˈit toya saliyaliyaw sanay mararaw a Pitiroan i, o mapakalalok kita, misetek to falocoˈ padadotoc midoko ci Yihofaan.

MISAˈICELAY CI PITIRO MAPALEMEDAY

4. Mikitini Luka 5:5-10, somowalay ci Pitiro to o masamaanay a tamdaw ko niyah? Samaanay ci Yis mihinom cingranan hani?

⁴ Cowa ka pasowal ko Fangcalay Cudad hano o ‘ciraraway a tamdaw’ kako sa ci Pitiro, cowa pasowal to maanan ko maharatengay ningra a raraw no niyah. (ˈOsien ko Luka 5:5-10.) Alatek iraay ko maanan taˈangayay a raraw ningra iˈayaw. Kawra maˈaraway ni Yis ko talaw ni Pitiro to nika caka ngaˈay no niyah. Mafanaˈay ci Yis to ngangaˈay madimadi tahatolas ci Pitiro. Mansa, hinoman ni Yis ci Pitiro ‘aka matalaw.’ O nika pakasoˈlin ni Yis ci Pitiroan taˈangayay ko pifiyor cingranan. Ikor, ci Pitiro ato salikaka ningra ci Antiri misawaday a mifoting, misarocoday ko falocoˈ mikotod ci Misiyaan. Onini a saˈosi pairaay to caay ka harateng nangra a sapalemed.—Marko 1:16-18.

5. Maremoay ni Pitiro ko ˈangi, mikotod ci Yisan ikor, milifokay cingra to maanan a sapalemed?

⁵ Malo nisawawaan ni Kristo ci Pitiro ikor, adihayay ko kafahkaˈan a nalifetan ningra. Manengnengay ningra ko piadah ni Yis to adadaay, milaplap to kaloykoy, paˈorip to mapatayay a tamdaw.b (Matay 8:14-17; Marko 5:37, 41, 42) Itini i mapolosi maˈaraway ni Pitiro ko ˈdil ni Yis mala Hongti i Hongti Kitakit no Kawas, cowa ko mamapawan ningra konini. (Marko 9:1-8; 2 Pitiro 1:16-18) Adihayay ko manengnengay ni Pitiro a caay ka harateng a demak. Satapang aca, ano pakayniay i kasofaw no falocoˈ a misawad ci Pitiro mikotod ci Yisan i, o mamalawa konini a masakalimlaan a sapalemed. Maedeng mahemekay cingra cowa ka pihaen ko niyah to demak!

6. Kalikiay ci Pitiro miremo to dangoc no niyah han? Tadtaden.

⁶ Soˈliˈlin adihayay ko maˈaraway, matengilay ni Pitiro, kawra kamayan cingra miˈodot to adihayay a dangoc. Nengnengen ko pina tinakoan. Pasowalan ni Yis ko nisawawaan, sapilahciaw to sapairasol no Fangcalay cudad, o mamisemsem cingra patayen no tamdaw, ˈarawhan milalangan ni Pitiro cingra. (Marko 8:31-33) Ci Pitiro ato romaroma tarokos kinapinapinaay a malacongis to cima ko sakakaay. (Marko 9:33, 34) ˈAyaw no mamapatay ci Yis toya dadaya, felot sanay ci Pitiro a mikerit to tangila no cecay tamdaw. (Yohani 18:10) Toya dadaya, tona matalaway to tamdaw ci Pitiro, kinatoloay a mihakeno ci Yisan. (Marko 14:66-72) Oranto i, tada masomaday ci Pitiro, ongong sanayto tomangic cingra.—Matay 26:75.

7. Patikol maˈorip ci Yis ikor pafelian ci Pitiro to maanan a ˈinorong?

⁷ Kawrira, cowa ka sawaden ni Yis konini matoleday a tarokos. Patikol maˈorip ci Yis ikor, papipatalahkalan ci Pitiro to olah ningra ci Yisan. Papidimokosan ni Yis ci Pitiro to siri ningra, misapoener a matayal saki salikaka. (Yohani 21:15-17) Mahemekay ci Pitiro micada tonini kalimlaan a ˈinorong. Itini Kocinsic a romiˈad, ci Pitiro ato romaroma salikaka malisopsop i Yirusalim i, tahacadaay to sapanilnil no fangcalay saocor, cangra i, o saˈayaway milayap tonini masakalimlaan a sapalemed a tamdaw.

8. Itini Antiok ci Pitiro pakidemay a mararaw to maanan?

⁸ Mapanilnilto no fangcalay saocor ikor, padadotocayho ci Pitiro miˈodot to dangoc no niyah. Kongyen 36 miheca, maˈaraway ni Pitiro ko cowaho picada to kerit a ˈAlafang tamdaw ci Kornilius mapanilnil no fangcalay saocor, onini ihkalay mahapinang to ‘cowa pisakakinih ko Kawas,’ o ˈAlafang tamdaw ngaˈayto micomod i kasakopang no Krisciyang. (Dmak 10:34, 44, 45) Ikor, sangaˈayen sanay ci Pitiro a malacafay to ˈAlafang tamdaw a komaen, o mahaenay demak cowa ko mamihaen cingra isaˈayaw. (Kalatiya 2:12) Kawrira, o piharateng no romaroma Yutaya Krisciyang, cowa ka ngaˈay ko Yutaya tamdaw malacafay to ˈAlafang tamdaw komaen. Tangasa i Antiok ko mahaenay ko pinengneng a tamdaw, matalaway ci Pitiro pakararaw cangranan alatek, sawad sanayto malacafay to ˈAlafang salikaka a komaen. Misakaniway ko demak ni Pitiro sanay ci Pawlo, rikec hananay ni Pawlo cingra i kaˈayaw no ˈalomanay. (Kalatiya 2:13, 14) Soˈlin mararaw haca ci Pitiro, kamayan eca ka pisawad cingra. O maanan ko padamaay cingranan kodait a padadotoc hani?

MISAMAANAY HANO PADADOTOC KODAIT CI PITIRO HANI?

9. Mikitini Yohani 6:68, 69, hano mafanaˈ kita to madimadiay ci Pitiro hani?

⁹ Tada madimadiay ci Pitiro, ano o mananto ko mafekaday a demak i, cowa ka pisawad mikotod ci Yisan. Kinacecayay somowalay ci Yis to kafokilan no nisawawaan a sowal. Itiya i, cowa pitala ko ˈalomanay to pitadtad ni Yis, anca misaali to sapitadtad ni Yis, sawad sanayto mikotod ci Yisan. Kawra ci Pitiro cowa pisawad cowa piliyas ci Yisan, edengan ci Yis ‘iraay ko midaˈocay a kimad’ sanay.—ˈOsien ko Yohani 6:68, 69.

10. Samaanay patalahkal ci Yis to nika pakasoˈlin ci Pitiroan? (Nengnengen ko coka.)

¹⁰ Cowa pisawad ci Yis ci Pitiroan. ˈAyaw no mamapatay to saikoray a dadaya, mafanaˈay ci Yis to mamiliyas ci Pitiro ato romaroma tarokos cingranan. Kawrira, patalahkalay ci Yis to pakasoˈlin ningra ci Pitiroan, ka tanektek sanay pasowal ci Pitiroan, papipadadotoc madimadi a mikotod cingranan. (Luka 22:31, 32) Mafanaˈay ci Yis to tarokos, ‘soˈlin faedetay . . . ko falocoˈ, rarimaay ko tireng’ sanay. (Marko 14:38) Mankora, soˈliˈlin mihakeno ci Pitiro ci Yisan, cowa ka sawaden ni Yis cingra. Patikolto maˈorip ci Yis, tiya cecay ci Pitiro i, paˈarawan ni Yis cingra. (Marko 16:7; Luka 24:34; 1 Korinto 15:5) Oniya demak maedeng taˈangayay ko pikowad ato pihinom tonini masomaday a Pitiroan!

11. Samaanay ci Yis padama ci Pitiroan pakasoˈlin to dadamaen ni Yihofa cingra?

¹¹ Mikiˈokan ni Yis ci Pitiro to papadamaen ni Yihofa cingra. Patikolto maˈorip ci Yis midemakay to kafahkaˈan, padama ci Pitiroan ato mikapotay cingranan a tarokos mitafokod to adihayay foting. (Yohani 21:4-6) Onini kafahkaˈan maedeng padamaay ci Pitiroan pakasoˈlin, iraay ko ˈicel ni Yihofa midimokos to saali nangra i kaˈorip. Itiya maharatengay ni Pitiro alatek ko nano sowal ni Yis, o tamdaw ano ‘padadotoc a micangacang to Hongti Kitakit,’ o dadimokosen ni Yihofa cangra. (Matay 6:33) Oranto i, paisalakatan ni Pitiro i kaˈorip ko mitosilay tayal, cowato pisamacay a mifoting. Kongyen 33 miheca to Kocinsic, timoloay ci Pitiro a misawacay, padama to pinaay caˈol a tamdaw micada to ngaˈayay lihaf. (Dmak 2:14, 37-41) Ikor, padamaayho cingra to Samariya ato ˈAlafang tamdaw mikotod ci Kristoan. (Dmak 8:14-17; 10:44-48) Awaay ko hasasa, misakaretengan ni Yihofa misaka dademak ci Pitiro, padama to masakenakenaay a tamdaw micomod i kasakopang no Krisciyang.

O MANAN KO MANANAMAY ITA?

12. Ano miremoay kita to halafinayto a dangoc i, miharateng to tinakoan ni Pitiro sasamaan padama kitanan hani?

¹² Padamaay ci Yihofa kitanan kodait tahatolas. Kawrira, padadotoc mikotod ci Yisan cowa ko madoloay, mangalefay ano hamamiremo to halafinayto a dangoc i, tada mamahaen. Palalinien ci Pitiroan i, o dangoc no mita alatek ikakaay ko pasangar a remoen, kawra papafelien ni Yihofa kita to ˈicel, padama kitanan padadotoc a kodait. (ˈOlic 94:17-19) Tinakoen, cecay faˈinayan salikaka na halafinayto mihecaan makakaolah to faˈinayanto, kawra mafanaˈto cingra to kimad i, misetekayto a mafalic, caayto pidemak to malafoay a demak. Kawrira, nolatekay mamiˈodotho cingra to mararaway harateng. O maanan ko padamaay cingranan padadotoc misaˈicel eca ka pisawad hani? Sanay cingra: “Pafelian ni Yihofa kako to ˈicel . . . , i sapadama no fangcalay saocor ni Yihofa, o ngangaˈay kako padadotoc mitoor to kimad maˈorip . . . Makahiay ci Yihofa misaka dademak takowanan. Soˈlinto adihayay ko dangoc no mako, kamayan Cingra midama takowanan, cowa ka pisawad takowanan.”

13. Maˈoningay itini Dmak 4:13, 29, 31 a ngaˈayay taˈarawan ni Pitiro, sasamaan kita mitodong cingranan? (Nengnengen ko coka.)

¹³ Ci Pitiro cowa ka kinacecay aca mararaw to nika ciˈangi to tamdaw, kawra mitolonay cingra micangacang ci Yihofaan patimolo cingranan, hato timoloayto cingra midemak to matatodongay demak. (ˈOsien ko Dmak 4:13, 29, 31.) Kita i, o ngangaˈay miremo to ˈangi. Nengnengen ko tinakoan no faˈinayan salikaka ci Hosto, kaemangho cingra i, itiniay i pikowan no Naci no Towic a maˈorip. Itini picudadan, kinapinapinaay a masawi no saroero, milekal to “Milidongay ci Sitele!” sanay. Kawra, o wama wina ningra cowa ka mapoˈi cingranan, malacafayay cingranan mitolon, micangacang ci Yihofaan patimolo cingranan. Samanen padamaan no wama wina cingra mitadiˈec ci Yihofaan, salikor malifokayto ni Hosto ko ˈicel, padadotocto fanekfek i pihakelongan. Salikor sanay cingra: “Cowa ka pisawad ci Yihofa takowanan.”c

14. Sidaˈitay a misimaway kantok sasamaan mihinom to matoleday ko falocoˈ a salikaka?

¹⁴ Ci Yihofa aci Yis cowa ko mamisawad kitanan. Mihakenoto ci Pitiro ci Yisan i, awaayto ko pinang samaan ko kaˈorip. Papadadotoc cingra malo nisawawaan ni Kristo ha, anca misawad ha? Iˈayaw na micangacangay ci Yis ci Yihofaan padama ci Pitiroan, ho caka malahdaw ko nika pakasoˈlin ni Pitiro. Pasowalan ni Yis ci Pitiro to mihaenay cingra patado ci Pitiroan mitolon, pasifanaˈ ci Pitiroan, pakasoˈlinay cingra to papadama ci Pitiro to romaroma salikaka tanektek. (Luka 22:31, 32) Tikolen ni Pitiro miharateng ko nano sowal ni Yis i, maedeng masayaray ko falocoˈ ningra! I nokaˈorip ano awaayto ko pinang ita i, kakalasaka dademaken ni Yihofa ko sidaˈitay a misimaway kantok mihinom kitanan, padama kitanan padadotoc a madimadi. (Ifiso 4:8, 11) O cecay ci Pawlo hananay faˈinayan salikaka, halafinay mihecaan a malohemay malitengay, marariday cingra misayar to matoleday, sapisawadaw a salikaka. Papiharatengan ningra cangra isalakat samaanay ci Yihofa misolot cangranan mafanaˈ to kimad, ikor pasowalan ningra cangra, iraay ko madimadiay a olah ni Yihofa, cowa ko hamamisawad cangranan. Sanay ci Pawlo: “Maˈaraway ako ko ˈalomanay matoleday a salikaka pakayni pitiˈer ci Yihofaan padadotocay a kodait.”

15. Tinakoan ni Pitiro aci Hosto samaanay paihkal to soˈlinay ko sowal no Matay 6:33?

¹⁵ Na midimokosan ni Yihofa ko sakaˈorip ni Pitiro ato romaroma tarokos. Ano paisalakaten ita ko mitosilay tayal i, o dadimokosen ni Yihofa ko saali ita. (Matay 6:33) Mahererek ko Saka Tosa Lalood no Hekal, ciharatengay ci Hosto mala misakafahay, kawra manikaway cingra, awaay ko pinang to mamaetan ko sakaˈorip hokira, padadotoc a misakafah. Samaanay ko pidemak ningra hani? Milifetay cingra ci Yihofaan, itini pilisoˈ no kasakilac kantok a lalipayan, mitosilay cingra to romiˈamiˈad. Malahcito ko pilisoˈ i, cowa ka harateng to pafelian no kasakilac kantok cingra to mipaloan to payci a kalidokap a tafolod, maedengay sakaˈorip ningra to pi:na folad a misakafah, kawra cowa pasowalen no kasakilac kantok to cima ko pafeliay tora payci. Pakayni ci Hostoan, macada konini a sapakaolah malecaday to pikiˈok ni Yihofa to dadimokosen cingra. Ikor no pi:na mihecaan, padadotocay ci Hosto paisalakat to Hongti Kitakit no Kawas i nokaˈorip.—Malaki 3:10.

16. Hano mamisinanot kita to taˈarawan ni Pitiro ato nitilidan ningra a tikami?

¹⁶ Na papiliyasan ni Pitiro ci Yis cingranan, kawra maedeng miakoˈiday cingra cowa ka pihaen ci Yis to demak! Padadotocan ni Yis pahatatanam ci Pitiro, telocto i, ngaˈayayto ci Pitiro malo madimadiay a tarokos, hanaca patireng to ngaˈayay taˈarawan no romaroma Krisciyang. Kita maemin ngangaˈay mikitini i pipahatatanam ni Yis ci Pitiroan adihay ko mananamay. Tiya patikami ci Pitiro to saka 1 hahekalan a kasakopang i, itira i tosa tikami ningra paladaˈay tonini kalimlaan a sowal. O saka 1 Pitiro ato saka 2 Pitiro konini tosa tikami, ilaenoay lalakaw mamilengo to pinapina sapatalipaˈelal, ato sasamaanen ita a misaka dademak.