Mikitini i Tosa Tikami ni Pitiro Mananamay Ita ko Manan Hani?

1. ˈAyaw no mamapatay ko tarokos ci Pitiro, mikayatan no Kawas cingra midemak to maanan?

MAFANAˈAY ko tarokos ci Pitiro cowato ko hahalafin ko ˈorip ningra i hekal. Tonini mataˈlifay a pina poloˈ miheca, padadotocay cingra madimadi midoko ci Yihofaan. Na mikalacafayay ci Yisan a mitosil, milasil to ngaˈayay lihaf i ˈAlafang a tamdaw. O mikayatay a kasacefang no malohemay malitengay cingra. Soˈliˈlin mangataayto tahatolas ko ˈorip ningra, kawra o tayal ningra cowaho ka hererek. Maedeng itini Kongyen 62-64 miheca, papitilidan no Kawas ci Pitiro tonini tosa tikami, onini a saka 1 Pitiro ato saka 2 Pitiro a cudad. Makalimay ci Pitiro ikor no mapatay cingra, onini a tikami ngaˈay padadotoc pakalalok to salikaka.—2 Pitiro 1:12-15.

2. Ora tosa tikami ni Pitiro hano tada matatodongay ko tatokian hani?

² Tiya mitilid ci Pitiro tonini tosa tikami i, o salikaka pakayniay i ‘masakenakenaay a sapalifet’ a ‘masomaden.’ (1 Pitiro 1:6) Itiya, o mariˈangay tamdaw sapipacomodaw to mararaway a kimad i kasakopang, halo mikayhid to tamdaw midemak to caay ka korac a demak. (2 Pitiro 2:1, 2, 14) Itiniay i Yirusalim a Krisciyang mamisiˈayaw to ‘pihererekan no maamaan,’ o sofitay no Loma mamipalaˈafo to Yirusalim ato polong a lekakawa no Yutaya. (1 Pitiro 4:7) Awaay ko hasasa, onini tosa tikami ni Pitiro papadama to salikaka to mamisamaan a miremo to i ˈaˈayaway a sapalifet, misongilaˈ a misaday to aira a sapalifet noikor.b

3. Hano mamisongilaˈ kita micekiw tora tosa tikami ni Pitiro hani?

³ Soˈliˈlin onini a tikami ni Pitiro o saki saka 1 hahekalan a Krisciyang a tiliden, kawra pasalalomaˈan ni Yihofa i Fangcalay Cudad konini tosa tikami. Mankora, ano cekiwen ita konini tosa tikami i, o mamilifok to haepoc. (Loma 15:4) Itiniay kita maˈorip tonini matomesay ko masakenakenaay cowa ka korac a demak a hekalan, pasangaran nanay kita madimadi midoko ci Yihofaan. Roma i, kakalikito a misiˈayaw kita to padiing, onini a padiing mikikakaay ko nika taˈangay to saka 1 hahekalan a malifaay no Yutaya tamdaw. Onini tosa tikami ni Pitiro mahawpay ko masakalimlaan a sapatalipaˈelal, ano misinanot kita tonini sapatalipaˈelal i, o hahalamham kita mitala tonini taˈangayay romiˈad ni Yihofa, miremo to ciˈangiay a falocoˈ, hanaca faedet ko falocoˈ maolah to salikaka. Ano misinanot ko malohemay malitengay tonini sapatalipaˈelal i, cacipinang to sasamaan misongilaˈ a midimokos to saali no siri.

HALAMHAM A MITALA

4. Mikitini 2 Pitiro 3:3, 4, o maanan a demak ko mamingiyangi to pakasoˈlinay a falocoˈ ita alatek?

⁴ I tatihiay ita ˈalomanay tamdaw cowa pakasoˈlin to sapairasol no Fangcalay Cudad. Samanen halafinayto kita mitala to sakahererekaw nonini hekal, milokesayto ko misafelitay tamdaw kitanan. O romaroma milikafay tamdaw cowa ko aira ko pihererekan sanay. (ˈOsien ko 2 Pitiro 3:3, 4.) Ano matengil ita ko hatiniay a sowal no cafay matayal, paro no lomaˈ anca mitosilan a tamdaw i, alatek mamangiyangi ko pakasoˈlin no falocoˈ ita. Nengnengen ko sowal ni Pitiro sasamaan paˈicel to pakasoˈlin no falocoˈ ita.

5. Pakayni to hererekan nonini a hekal, haharatengen ita ko maanan, ngaˈ ira ko matatodongay a pinengneng hani? (2 Pitiro 3:8, 9)

⁵ O romaroma tamdaw miharateng tada minayaray ci Yihofa, tahanini cowaho palaˈafo tonini mariˈangay hekal sanay. O sowal ni Pitiro patalipaˈelalay kitanan, o pinengneng ni Yihofa to toki cowa ka lecad kitanan. Pakaynien ko sowal ci Yihofaan, 1,000 miheca malecaday o cecayay a romiˈad. Ano haratengen konini papadama kitanan ira ko matatodongay a noka pinengneng to demak. (ˈOsien ko 2 Pitiro 3:8, 9.) O roma i, tada mihadidiay ci Yihofa, cowa ka ciharateng malaˈafo ko cecacecay tamdaw. Kawra ano irato ko taˈangayay romiˈad Ningra i, o mamatekopto konini hekal. Mihaenay i, sangaˈayen ita misaka dademak ko maˈosaway a toki, misawacay to kasakitakit kasafinacadan a tamdaw.

6. Sasamaan kita ‘paifalocoˈen’ ko taˈangayay romiˈad ni Yihofa hani? (2 Pitiro 3:11, 12)

⁶ Mirikecay ci Pitiro kitanan ‘paifalocoˈen’ ko taˈangayay romiˈad ni Yihofa sanay. (ˈOsien ko 2 Pitiro 3:11, 12.) Sasamaan ko pidemak hani? Sangaˈayay to romiˈamiˈad haratengen ko kasemeran a sapalemed i faelohay a hekal. Haratengen mamihelip to fangsisay a fali kiso, komaen to sakatanoktok no tireng a kakaenen, militemoh to patikolay maˈorip a salawina widang, ato pasowal to nolitengan a tamdaw to samaanay malaˈosi ko sapairasol no Fangcalay Cudad. Ano micerid miharateng tonini demak, papadama kitanan halamham a hinatala to noikoran, hanaca paifalocoˈen to mangataayto mahererek konini a hekal. Ano ‘isalakat kita mafanaˈ’ to mamafekad a demak noikor i, cowato ko ‘mamasaˈfit’ no mararaway a kimad no tamdaw.—2 Pitiro 3:17.

MIREMO TO CIˈANGIAY TO TAMDAW A FALOCOˈ

7. Ciˈangiay to tamdaw a falocoˈ sasamaan a mifiyor kitanan alatek?

⁷ Ano paifalocoˈen ko romiˈad ni Yihofa i, o mamakalim kita sapipaladaˈaw to ngaˈayay lihaf i tao. Kawrira latekay, tona maˈangiay kita to tamdaw hato cowa ka timolo a pasowal. Iraay ko mahaenay a nalifetan ni Pitiro. Ta masawkit ci Yis toya dadaya i, matalaway ci Pitiro mihayi to o nisawawaan ni Yis ko niyah, kinatoloay mihakeno to mafanaˈay cingra ci Yisan. (Matay 26:69-75) Nikawrira, ikor no pi:na miheca fanekfekayto ko falocoˈ ni Pitiro, sanay cingra: “Aka ka talaw kamo to pipatalaw no nimanima. Aka ka rawraw ko falocoˈ namo.” (1 Pitiro 3:14) Onini sowal ni Pitiro pakasoˈlinen ita, to ngangaˈay kita miremo to ciˈangiay to tamdaw a falocoˈ.

8. Sasamaan ko pidemak ita ngaˈ madoloto miremo to ciˈangiay to tamdaw a falocoˈ hani? (1 Pitiro 3:15)

⁸ Sapiremoaw to ciˈangiay to tamdaw a falocoˈ, sasamaan ko pidemak hani? Sanay ci Pitiro: ‘Kifalocoˈen a mihayi to fangcalay ci Kristo, o Tapang namo.’ (ˈOsien ko 1 Pitiro 3:15.) Sakadangaraw tonini i, haratengen ko saaroˈan ato fadangalan no Hongti ato Tapang ita ci Yis Kristo. Ano ira ko toki iso paladaˈ to ngaˈayay lihaf i tamdaw, marawrawen anca matalaw i, haratengen ko Hongti ita. Itiniayto ci Yis i kakarayan a mikowan, i tatihi ningra iraay ko masawalwalay a coyoh. Haratengen pafelianto cingra to ‘fadangalan i kakarayan ato i seraay,’ ‘itini tonini kihcod a romiˈad, tahira i salikoray noninian a lekakawa,’ mamikapot cingra kitanan. (Matay 28:18-20) Palimoˈotay ci Pitiro ‘ano hacowato, ka pisaday’ paˈading to pihakelongan no niyah. Ciharatengay kiso itini picudadan, katayalan anca romaroma kitiraan paladaˈ to ngaˈayay lihaf i tamdaw han? Ka paˈayaw a miharateng, wa ngaˈay kiso ihacowa ato o maanan ko hasowal. Tolonen micangacang ci Yihofaan pafeli tisowanan to timolo, hanaca pakasoˈlinen Cingra to papadama tisowanan miremo to ciˈangiay to tamdaw a falocoˈ.—Dmak 4:29.

‘FAEDET KO FALOCOˈ MASASIOLAH’

9. Kinacecayay cowa patalahkal ci Pitiro to olah i salikaka, tadtaden ko mafekaday a demak itiya. (Nengnengen ko coka.)

⁹ Mananamayto ni Pitiro to sasamaan patalahkal to olah. Na matengilay ningra pasowal ci Yis: ‘Pafelien ako kamo to cecay faelohay limoˈot, ka masasiolah kamo. Samaanay ko nika olah ako tamowanan, haenen namo a masasiolah.’ (Yohani 13:34) Soˈliˈlin hatira, kinacecayay ci Pitiro tona matalaway to Yutaya Krisciyang, caayto ka timolo kalacafay to ˈAlafang salikaka a komaen. Sowal no tarokos ci Pawlo, mihaen ci Pitiro o ‘misamangahay,’ makaniway sanay. (Kalatiya 2:11-14) Micadaan ni Pitiro ko pisalof, mananamayto ningra ko sapasifanaˈ. Ikor itini tosa tikami ningra misaˈicelay a pasowal, o olah ita to salikaka cowa ko i haratengay aca, ao patalahkalen i waywayan.

10. Sasamaan ko pidemak ita ngaˈ ‘awa ko makaniway a olah to salikaka’? Tadtaden. (1 Pitiro 1:22)

¹⁰ O sowal ni Pitiro, pairaen ko ‘awa ko makaniway a olah to salikaka’ sanay. (ˈOsien ko 1 Pitiro 1:22 ato roma pihongyak.) Ano ‘dofdofen ita ko soˈlinay kimad’ i, o mamahaen a maolah to salikaka, ora cecay a dadofdofen ita a kimad i, ‘cowa pisakakinih ko Kawas.’ (Dmak 10:34, 35) Ano o papinapina aca salikaka i kasakopang ko kaolahan ita, eca ka olah to romaroma salikaka i, cowa ito pidofdof kita to pakayniay olah a sapalimoˈot ni Yis. Manaokaniw, matira ci Yisan, makedecay ko kalalaˈed ita to cimaanan a salikaka saan miharateng alatek. (Yohani 13:23; 20:2) Kawra patalipaˈelalay ci Pitiro, papasayra kita to polong a salikaka patalahkal to ‘olah,’ o mitoroˈan nonini i, o dihkoay sano paroay no lomaˈ a noka aolah to polong a salikaka.—1 Pitiro 2:17.

11. ‘Faedeten ko falocoˈ’ maolah to tao sa i, o maanan ko tatodong hani?

¹¹ Palimoˈotay ci Pitiro kitanan ‘faedeten ko falocoˈ a masasiolah.’ ‘Faedeten ko falocoˈ’ maolah to salikaka tatodong i, soˈlinto cowa ka dolo patalahkal to olah i cimaanan i, kamayanho misaˈicel maolah cingranan. Tinakoen, o cecay salikaka ano pakararaway anca mikariˈangay kitanan, latek sapiˈodisaw kita, cowa ko sapipatalahkalaw to olah i cingranan. Mananamay ni Pitiro ci Yisan i, o miˈodisay a waywayan cowa ka hemek ko Kawas. (Yohani 18:10, 11) Sanay ci Pitiro: ‘Ano makariˈang no tao i, aka pacoˈay a mikariˈang. Ano malokes no tao i, aka pilokes a pacoˈay, ao palemeden cingra.’ (1 Pitiro 3:9) Edengan ano faedetay ko falocoˈ iso a maolah to salikaka, soˈlinto makariˈang no salikaka kiso, o ngangaˈayho kiso padadotoc sidaˈit cangranan.

12. (1) Faedet ko falocoˈ ita maolah to salikaka i, mamakahi misamaan ko pidemak hani? (2) Maˈaraw iso ko Micangacang to Dipayal, Makakedec a Malacecay oniya ika ikor, mamisaˈicel kiso samaan ko pidemak hani?

¹² Itini saka 1 tikami ni Pitiro, somowalay to ‘faedet ko falocoˈ masasiolah’ kita sanay. O mahaenay a olah ngangaˈay mitahepo to cowa ko pinapina aca a raraw, ao ‘adihayay raraw’ sanay. (1 Pitiro 4:8) Tiya mitilid ci Pitiro tonini sowal i, latek maharatengay ningra ko sapasifanaˈ ni Yis cingranan pakayni to misododay a kimad. Itiya i, somowalay ci Pitiro wa ‘kinapito’ cingra misodod to salikaka, latek miharateng cingra tadamaanayto kako sanay, ˈarawhan pasifanaˈen ni Yis cingra to mamisodod to salikaka ‘tangasa kina 77’ sanay. Ora sowal ni Yis mipasowalay kitanan, wa kinapinapina kita misodod to salikaka. (Matay 18:21, 22) Ano cowa ka dolo tooren ko sowal ni Yis i, aka a matoled! Cowa ko malefotay tamdaw kita, nolatekay soˈlinay cowa ka dolo misodod to tao. Ora dademaken iso i, misarocod a misaˈicel misodod to salikaka, miliyaw a malakangaˈay cingranan.c

O MALOHEMAY MALITENGAY, KA PISIMAW TO SIRI NO KAWAS

13. Misimaw ko malohemay malitengay to salikaka hano cowa ko madoloay alatek?

¹³ Maedeng cowa ka tawal ni Pitiro ko nano sowal ni Yis ikor no patikol maˈorip cingra: ‘Ka pisimaw kiso to siri ako.’ (Yohani 21:16) Ano o malohemay malitengay kiso i, cacipinang tora sowal ni Yis o kiso ko misowalan. Kawra, milimasmas to toki ngaˈay ko pidemak tonini kalimlaan a tayal i, latek cowa ko madoloay. O aisalakaten no malohemay malitengay paririˈ ko paro no lomaˈ, ato nofalocoˈan ato noˈadingoan a saali nangra. O mamikeridho cangra to mitosilay a demak. O roma i, mamilimasmas to toki misongilaˈ cangra misaday to kamok no saˈopo ato taykay. O romaroma malohemay malitengay ciˈinorongay to Mirinnakay to Ising a Iing anca Mipatirengay a Tayal. Tada ˈifowaay ko tayal no malohemay malitengay!

14. Haharatengen no malohemay malitengay ko maanan, mamakalim a misimaw to salikaka hani? (1 Pitiro 5:1-4)

¹⁴ Palimoˈotay ci Pitiro to malohemay malitengay, sowal sa: ‘Simawen a midimokos ko sapatorod no Kawas tamowanan a siri.’ (ˈOsien ko 1 Pitiro 5:1-4.) Ano o malohemay malitengay kiso, mafanaˈay kami to maolahay kiso to salikaka, ciharatengay to sapisimawaw cangranan, kawrira, nolatekay tada ˈifowaay kako malotayayto, cowa pakafilo kako mitamorong tonini ˈinorong, wa saan kiso miharateng alatek. Ano mahaenay i, sasamaanto kiso hani? Pasowalen ci Yihofa to cariraw no falocoˈ iso. Sanay ci Pitiro: ‘O matayalay i, ka pitiˈer to sapafeli no Kawas a ˈicel a matayal.’ (1 Pitiro 4:11) O malifaay no salikaka a pasangar latek cowa ko mamasaysay itini tonini a hekal, kawra haratengen, oya ‘sakakaay a misimaway’ a Yis Kristo ngangaˈay padama cangranan, hanaca aikaka ko madangaray ningra. Cowa ko anini aca, itini faelohay a hekal o mamisongilaˈ cingra midimokos to salikaka. O saali no Kawas to malohemay malitengay i, maolah to salikaka, misimaw ato ciharateng cangranan, ‘malo taˈarawan no siri.’

15. Cecay malohemay malitengay samaanay misimaw to salikaka? (Nengnengen ko coka.)

¹⁵ Faˈinayan salikaka ci Wiliam halafinayto mihecaan malo malohemay malitengay, mafanaˈay cingra misimaway a tayal tada masakalimlaan. Mifekad ko 2019 lifong i, cingra ato romaroma malohemay malitengay misaˈosiay to lipalipay mirinnak to kasakapot a kahacecay salikaka. Sanay cingra: “O ˈalomanay salikaka cecayay aca i lomaˈ, halikiay a masofaw ko harateng nangra.” Ano pasangaren ko cima salikaka i, mihadidiay a mitengil ci Wiliam, cipinang to o maanan ko saali, o maanan ko kacarirawan nangra, dotoc mikilimay cingra i wangcan to ika ato matatodongay a lalakaw mipakalalok cangranan. Sanay cingra: “Nohatini o salikaka mangalefay ko pisaali to pisimaw cangranan. Ano misaˈicelay kita padama to tao mafanaˈ ci Yihofaan i, o mamihaen kita misaˈicel misimaw to siri no Kawas, padama cangranan materek i soˈlinay kimad.”

PAPILAHCIEN CI YIHOFA TO PIPAHATATANAM TISOWANAN

16. Sasamaan kita misaka dademak to kalimlaan no tikami ni Pitiro hani?

¹⁶ Onini lalakaw milengoay to pina kalimlaan no tikami ni Pitiro. Mahapinangay iso alatek to papadadotoc kiso macakat itini i maanan a demak. Tinakoen, sapiraridaw kiso misimsim to maanan a sapalemed i faelohay hekal han? Sapipatirengaw kiso to patosokan, itini picudadan, katayalan anca romaroma kitiraan mitosil to tamdaw han? Mahapinangay iso mamisamaan kiso patalahkal to ikakaay ko fanekfek iso to salakatay a maolah to salikaka han? Ano o malohemay malitengay kiso i, misetekay kiso to falocoˈ makalim, faedet ko falocoˈ misimaw to siri no Kawas han? Ano sasoˈlinen iso a misinanot ko niyah i, mamahapinang iso ko pina dangoc alatek. Kawra aka a matoled, o sidaˈitay ko Tapang ita, papadamaen Ningra ikaka ko kangaˈay no pidemak iso. (1 Pitiro 2:3) Pakalalokay ci Pitiro kitanan: ‘Papilahcien ko Kawas . . . to pipahatatanam tamowanan. Papatanoktoken Ningra kamo, ciˈicel kamo, tanektek a tomireng.’—1 Pitiro 5:10.

17. Ano kodait a tahatolas kita, papilahcien ci Yihofa to pipahatatanam kitanan, mamilifok to maanan a sapalifon?

¹⁷ Ci Pitiro na awaay ko hatatodong ako malacafay to Wawa no Kawas sanay. (Luka 5:8) Tona cowa piliyas ci Yihofa aci Yis ci Pitiroan, padadotocay padama cingranan, hato kodaitayto mikotod ci Yisan. Salikor, mihaydaanto ci Pitiro, ‘micomod i Hongti Kitakit no midaˈocay Tapang ato Milidongay a Yis Kristoan.’ (2 Pitiro 1:11) Tada taˈangayay a sapalifon konini! Ano hatiraay kiso ci Pitiroan kodait a tahatolas, hanaca papilahcien ci Yihofa to pipahatatanam tisowanan i, o mamalifok iso ko tahadaˈocay a ˈorip malo sapalifon. O ‘mamalaˈosi ko patosokan no nika pakasoˈlin no falocoˈ, a malidong ko ˈorip.’—1 Pitiro 1:9.