Nalifetan

Patalahkal to Siniˈadaay Falocoˈ i Polong a Tamdaw

Cecay romiˈad, itiniay Niwsilan fafahiyan salikaka minengnengay to “Pairaen ko Siniˈadaay Falocoˈ” amotoˈay a ika. Masowalay i ika, cowa ko kasiniˈada aca ni Yihofa to tamdaw, pakayniayho i demak patalahkal to siniˈadaay falocoˈ i tamdaw. (Isaya 63:7-9) Misaˈosiay ko fafahiyan salikaka misaka dademak to mananamay, sapikilimaw cingra to toki mihadak to ciepocay a sapadama i tao. Toya romiˈad, masadak cingra micakay to dafong i, malitemohay ningra ko cecay awaay ko pinokayan a fafahiyan. Talaˈayaway cingra pasowal to mamicakay to kakaenen pafeli tora fafahiyan, mihayiay koya fafahiyan. Oranto micakayay ko fafahiyan salikaka to kakaenen, tano Wa Ira ko Tolas no Roray Han? a tancang misawacay toya fafahiyan.

Caay ka harateng tomangicay koya fafahiyan. Sowal ningra kaemangho ko niyah na minanamayto to Fangcalay Cudad, ikor malo Misawacayay Tamdaw ni Yihofa, kawra halafinayto a mihecaan miliyas to soˈlinay kimad. Caka halafin satapangay cingra mitolon ci Yihofaan, makalimay sapatikolaw i tatihi ni Yihofa. Oranto i, pafelian no salikaka koya fafahiyan to cecay Fangcalay Cudad, hanaca milimasmas to kalalengo to Fangcalay Cudad.a

Ngaˈayay todongen ita ci Yihofa, pasayra i salawina, widang ato salikaka i kasakopang patalahkal to siniˈadaay falocoˈ. Wa ngaˈayho kita mikilim to toki misawacay, pasayra i roma tamdaw patalahkal to siniˈadaay falocoˈ.