Samaan a Maenep to Faelohay Kasakopang?

O masiˈayaway ni Nikolas aci Salina a pasangaray demak cowa ka hecad, macadaay nangra ko sanilnil no Frans a fenpo, malinah tayra i faelohay a kasakopang. Sanay ko sowal nangra: “Satapangho mahemekay kami, ikorto cowa ko madoloay, samanen maˈilolay kami to saˈayaway a widang. Roma i, itini faelohay a kasakopang awaayho mahela ko ngaˈayay a widang.”a Malinah to faelohay kasakopang cowa ko madoloay. Sasamaan kiso maenep to faelohay kasakopang hani? Sasamaan padama ko roma tamdaw tisowanan hani? Malinah i faelohay kasakopang samaan kiso milifok to sapalemed, hanaca pakalalok to kasakopangay a salikaka hani?

PAPADAMA TISOWANAN MIREMO TO PASANGARAY A SEPAT SAFALOD

1. Tiˈeren ci Yihofa. (ˈOlic 37:5) O i Dipongay fafahiyan salikaka ci Kacomi 20 mihecaan i cecay a kasakopang, ikor tona mafalicay ko katayalan no faˈinay hato malinahay tayra i faelohay kasakopang. Samaanay cingra ‘mitiˈer ci Yihofaan’ hani? Sanay cingra: “Ano matoˈol cariraw ko falocoˈ ako i, patorodan ako ko kihcod ci Yihofaan, mihaeminan ako a pasowal to nafalocoˈan ako. Maherek kako mitolon i, hato paˈicelay takowanan.”

Samaan ngaˈ matongal ko pitadiˈec ci Yihofaan hani? Malecad o pinaloma misaaliay to nanom ato sapahaled ngaˈ padadotoc a lomahad, o pakasoˈlinay falocoˈ ita o papahaleden ngaˈ padadotoc a tanoktok. Malecad to salikaka ci Nikolasan, midotim to taˈarawan ni Apraham ni Yis ni Pawlo, ikor matongalay ko pakasoˈlin papadama ci Yihofa cingranan. Oya madimadiay sikawdan to sapidofdofaw to araaw no Kawas adihayay ko mikinafalahan nangra, midotim to ngaˈayay taˈarawan nangra padamaay ci Nikolasan. Malecaday, kiso ano micerid miˈosi to Fangcalay Cudad, mamadoloto a mifalic. Roma i, ngangaˈayto i faelohay kasakopang paladaˈ to makingkiway iso, pakalalok to salikaka.

2. Aka palalini to tao. (Patnakay 7:10) O faˈinayan salikaka ci Conges naitiniay i Pining malinah tayra i Padaka, mahapinangay ningra to taˈangayay ko kasasiroma, pasangaran nanay maenep. Sanay cingra milomal: “Satapang aca o pinengneng ako to itiniay a tamdaw, ano mafanaˈ kako to cecay tamdaw i, haemin hanto a mikitoh to kihcod a nalifetan sanay kako.” Taˈangay ko kasasiroma to kananaman ningra a serangawan, oranto satapangayto a miliyas to salikaka cingra. Kawrira, ikor matongalto ko kafanaˈ ningra to salikaka i, mafalicayto ko piharateng. Sanay ko sowal ningra: “Ano icowaayto a tamdaw malecadayto, edengan aca masasiromaay ko pakayraan. Micada to caka lecad to niyah a tamdaw o masakalimlaan.” Mihaenay, aka palalinien to aniniay a kasakopang ato isaˈayaway a kasakopang. O cecay fafahiyan misakafahay a salikaka ci Anilis ko ngangan, ngaˈayay a nanamen ko waywayan ningra, sanay ko sowal ningra: “Malinah kako o sapitanamaw to faelohay nokaˈorip, caay ka ciharateng a oyanan sa ko kaˈorip.”

Ano o malohemay malitengay kiso, aka a palalinien to aniniay a kasakopang ato isaˈayaway a kasakopang. Samanen o pakayraan no malohemay malitengay a dademak cowa ka hecahecad, nikawrira o mararaway cangra cowa ka saan. Ano pasowal to sapaini i, isalakatho miharateng to samaanay ko pakayraan no itiniay kasakopang, mihaen ko demak ngaˈ o citanengay. (Patnakay 3:1, 7b) Aka pacieci to salikaka micada to harateng no niyah, kao taˈarawan no niyah ko sapakalalok cangranan.—2 Korinto 1:24.

3. Ka tawlik mirienang to demak no faelohay a kasakopang. (Filipi 1:27) Soˈlin marorayay a malinah, kawra mirienang to saˈopo no faelohay a kasakopang tada masakalimlaan konini. Ano ngangaˈay i, tayra i Kasaˈopoan mirienang. Haratengen hena, ano cowa ka rarid maˈaraw no salikaka kiso, hanaca cowaho pakaˈaraw tisowanan, sasamaan cangra padama tisowanan hani? Cecay fafahiyan salikaka ci Losinta miˈorongay to tatosaay fafahiyan wawa malinahay tayra i taˈangayay niyaroˈ no Nanfi. Sanay cingra a milomal: “Pasowalay ko widang takowanan, ka rarid mirienang to demak no faelohay kasakopang sanay, malacafay to salikaka mitosil, mararid pacaˈof to salicay no saˈopo. Roma i, pasowalanho ako ko salikaka to ngangaˈay masaˈopo i lomaˈ niyam to ˈayaw no pitosil.”

Ano tawlik kiso mirienang to demak no faelohay kasakopang i, kalacafay to salikaka ‘milasil to ngaˈayay lihaf,’ ngaˈayto makakowakowad. Ci Anilis pakalalokan no malohemay malitengay cingra mikalacafay to kahacecay a salikaka mitosil, samaanayto ko teloc hani? Sowal ningra: “Kahnayay mahapinang ako, ngaˈayay pakayraan koni maenep to faelohay kasakopang.” Roma i, talaˈayaw kiso a dademak, tinakoen miasik ato mitomadaw to Kasaˈopoan, paihkalayto kiso to masalalomaˈay no faelohay a kasakopang ko niyah. Ano tawlik kiso mirienang to demak no kasakopang i, wa kaliki ko salikaka mahemek micada tisowanan.

4. Masasifanaˈ to faelohay a widang. (2 Korinto 6:11-13) Ano sakafanaˈaw to faelohay a widang, o sangaˈayay a pakayraan i, talaˈayaw ciharateng to tao. Pairaen ko toki ˈayaw ato herek no saˈopo a militemoh to widang a mafanaˈ to salikaka, masasowal cangranan. Talaˈayaw kiso milicay to ngangan nangra. Ano paiharatengen iso ko ngangan no tao, iraho ko damsayay a waywayan, mamasolotto iso cangra, makahi mala widang tisowanan.

Aka calemcemen to cowa ko mamicada ko salikaka tisowanan. Pairaen iso ko hatoki nangra mafanaˈ tisowanan. Ngaˈayay todongen ita ci Losinta, sanay cingra: “Tona talaˈayaway kami mitahidang cangranan tayni i lomaˈ misalafang, mansa iraayto ko ngaˈayay widang niyam.”

‘MALOKA MICADACADA’

O romaroma salikaka, comod sa i Kasaˈopoan, sahtoay o kafahalan kafokilan a salikaka, marawraway ko falocoˈ. Sasamaan a padama rihadayen ko falocoˈ nangra hani? Sowal no tarokos ci Pawlo: ‘Mahaen to picada ni Kristo tamowanan, hahaenen namo micada ko salikaka.’ (Loma 15:7) Ano misaˈicel ko malohemay malitengay mitodong ci Kristoan i, maenepento ko faelohay malinah tayni a salikaka. (Nengnengen ko sapatongal lalakaw “Sasamaan Mangaˈay ko Kalinah i Faelohay Kasakopang.”) Kawrira, polong no salikaka ato wawa, o ngangaˈay mihadak to ˈicel mihamham to tayniay malinah a salikaka.

Ano ciharatengay kiso mihamham to faelohay salikaka, cowa ko mitahidang aca cangranan misalafang, hadakenho ko ciepocay a sapadama. Tinakoen, cecay fafahiyan salikaka mitaawan ningra ko cecay faelohay salikaka tayra i maci a misarakarakat, pasifanaˈ cingranan sasamaan midakaw to faso. Mihaen ko salikaka midemak dihekoan nanay ko falocoˈ noya faelohay a salikaka, padama cingranan maenepen to faelohay a kasakopang.

KA LOMAHAD A MACAKAT

Sakinacecay no ciwciw a ˈayam maefer ciˈangian nanay, kawra mamiremo cira to ˈangi, palidlid sato mafanaˈ a maefer, ˈakawang ˈakawangto ko kaefer. Malecaday, tayni kiso i faelohay a kasakopang i, saˈicelen miremo ko ˈangi no falocoˈ, ho ngaˈayto adihay ko tayal ci Yihofaan. Sanay ko sowal ni Nikolas aci Salina: “Malinah i faelohay kasakopang tada o ngaˈayay a pihatatanaman. Toha sakananamaw to faelohay kasakopang mafanaˈ to faelohay widang i, palahaden ita ko pina a capeling wangaˈ.” Ci Langsiyae somowalay to malifokay no paro no lomaˈ a epoc, sowal ningra: “Malinahto kami i faelohay kasakopang i, matenesayto ko wawa ako, matongalayho ko nika piingid ci Yihofaan. Caho pakaala to pina folad i, fafahiyan wawa mirienangayto to pihatatanaman mikimad i kasaˈopoan, o faˈinayan wawa i, satapangayto a malo caayho ka pipaputisem a mitosilay.”

Ano caay ka ngaˈay malinah kiso tayra i taˈangayay ko saali a kasakopang i, sasamaanto ko demak hani? Nohatini o faelohay a kasakopang han ko pinengneng, sakadademaken kora misowalan isawni a sapaini a pakayraan. Tiˈeren ci Yihofa, hanaca kiemel mirienang to demak no kasakopang. Tinakoen, ataen ko masasiromaay a salikaka mitosil, mafanaˈ to faelohay widang, matongalho ko kalawidang to kafanaˈan a tamdaw. Ngaˈayho kiso mipadang to faelohay malinahay a salikaka ato iraay ko saali a salikaka. Samanen halamhamay ci Yihofa to Krisciyang palahad to ciolahay a capeling, mihaenay haw i, ano patalahkalen iso ko olah i salikaka i, mamatongal ko kalawidang iso ci Yihofaan. (Yohani 13:35) O papakasoˈlinen iso ‘o kaolahan ni Yihofa a sapatoˈaya konini.’—Hipray 13:16.

Soˈlin malinah tayra i faelohay a kasakopang cowa ko madoloay, kawra o ˈalomanay salikaka maenepayto to faelohay a kasakopang. Aka calemcem, mamadangar iso! Sanay ko sowal ni Anilis: “Malinah to faelohay kasakopang adihayayto ko kafanaˈan a widang.” Malinah to faelohay kasakopang ci Kacomi salikaka i, tanektekayto ko pakasoˈlin no falocoˈ ci Yihofaan, sanay cingra: “Mamatinakoto iso ko masasiromaromaay a sapadama ni Yihofa tisowanan, o hatiniay a nalifetan awaayho a malifa iso isalakat.” Samaanay ko piharateng ni Conges hani? Sanay cingra: “Itini faelohay kasakopang mafanaˈto kako to salikaka i, cowato ko masapapotalay ko niyah, ao paroto no lomaˈ nangra kako. Ano papiliyasen toniya kasakopang i, tatangoˈolen kako.”