LALENGOEN LALAKAW 30
RADIW 36 Dipoten ko Falocoˈ Ita
Mikitini to Hongti no Israil o Manan ko Mamananam Ita?
‘Wa miliyaw kamo mahapinang ko moecelay ato mariˈangay a tamdaw, o midokoay to Kawas ato cowa pidoko to Kawas a tamdaw iraay ko maanan a kasasiroma.’—MALAKI 3:18.
KALIMLAAN NO LALAKAW
Cipinang kita ci Yihofa misamaan a minengneng to hongti no Israil, ho mafanaˈ kita misamaan ko demak ngaˈ micada to pihayda ni Yihofa.
1-2. Pakayni to romaroma a hongti no Israil, mansanay ko sowal no Fangcalay Cudad?
SEPATAY poloˈ ko masowalay no Fangcalay Cudad a hongti no Israil,a halo misongilaˈay miˈoning to na demakan no hongti. Oha sasinanoten i, o roma a ngaˈayay hongti na midemakay to tatiihay a demak, mahaenay a Hongti ci Tafiti. Pakayra cingranan, sanay ci Yihofa: ‘O sikawdan ako ci Tafiti . . . misarocoday mikotod Takowanan, o matatodongay aca ko midemakan ningra.’ (1 Hongti 14:8) Kawra, ci Tafiti na miˈodangayto cifaˈinayay a fafahiyan, misahalakaayho mipatay to faˈinay ningra.—2 Samuil 11:4, 14, 15.
2 O roma i, iraay ko tatiihay a hongti na midemakay to ngaˈayay a demak, mahaenay a hongi ci Rihopoam. I pinengneng ni Yihofa, o ‘mariˈangay ko waywayan’ ningra. (2 Rayray 12:14) Kawra, na midofdofay ci Rihopoam to sakayat ni Yihofa, papiliyas to mamoetep a ngangasawan to pikowan ningra. Paˈicelanho ningra ko adihayay ko lowil no niyaroˈ, ho madipot ko finawlan no Kawas.—1 Hongti 12:21-24; 2 Rayray 11:5-12.
3. (1) O manan ko kalimlaan a salicay, o haharatengen ita hani? (2) Oniya lalakaw mamilengo to manan?
3 Mikidatay koni to masakalimlaan a salicay: Soˈlin ˈalomanay ko hongti no Israil na midemakay to ngaˈayay ato tatiihay demak, mihaenay o manan ko misalalangian ni Yihofa mihapinang to madimadiay a hongti hokira? Mafanaˈ kita toniya sapacaˈof wa cipinangto, to o manan ko saali ni Yihofa kitanan. Oniya lalakaw mamilengo, o nika madimadi no cecay hongti, toloay ko misinanotan ni Yihofa a lalangian: Saka 1, misarocoday ko falocoˈ koniya hongti midoko ci Yihofaan han; saka 2, ano mararaw cingra i, nai falocoˈ a pasasiyor han; saka 3, tanoktokay cingra midopo to matatodongay pidoko han.
MISAROCODAY KO FALOCOˈ NANGRA MIDOKO CI YIHOFAAN
4. O madimadiay hongti ato cowa ka madimadi a hongti o manan ko kasasiroma hani?
4 Mihaydaan ni Yihofa a hongti sahtoay o misarocoday ko falocoˈ midoko Cingranan.b Sanay ko Fangcalay Cudad, citanengay hongti ci Yihosafat ‘misarocoday ko falocoˈ midoko ci Yihofaan.’ (2 Rayray 22:9) Pakayni i hongti ci Yosiya, sanay ko Fangcalay Cudad: ‘ˈAyawho ningra a hongti, awaay ko mahaenay cingranan misarocod midoko ci Yihofaan.’ (2 Hongti 23:25) O roma i, ilalikor to kala hongti ni Solomon cato ka madimadi, mansanay ko Fangcalay Cudad? ‘Cowa ka hecad cingra to wama ci Tafitian, misarocod madimadi to Kawas ningra ci Yihofaan.’ (1 Hongti 11:4) Oya cowa ka madimadi a hongti ci Apiya, sanay ko Fangcalay Cudad ‘cowa ka pisarocod madimadi to Kawas ningra ci Yihofaan.’—1 Hongti 15:3.
5. Misarocoday ko falocoˈ midoko ci Yihofaan o manan ko tatodong hani?
5 Misarocoday ko falocoˈ midoko ci Yihofaan o manan ko tatodong hani? Misarocoday ko falocoˈ midoko ci Yihofaan a tamdaw, wa maolah ato mikangodo ci Yihofaan, hanaca i hakelong no ˈorip ningra wa mihaen ko waywayan. Cowa ko nanaman aca o nai falocoˈay cingra midoko to Kawas.
6. Samaan ko demak ita ngaˈ, ngaˈay padadotoc a misarocod midoko ci Yihofaan hani? (Taneng 4:23; Matay 5:29, 30)
6 Samaan ko demak ita ngaˈ mahecad to madimadiay a hongti no Israil, padadotoc misarocod midoko ci Yihofaan hani? Liyasen ita ko kihcod miconaay to midokoay ci Yihofaan a demak, tinakoen tatiihay a lawla, o pifiyor no tatiihay a widang ato misakaretengay to dafong a waywayan. Ano mahapinang ita mafasaway ko olah no niyah ci Yihofaan i, wa kalikien a misaka dademak mifalah to kihcod tatiihay a nanaman.—ˈOsien ko Taneng 4:23; Matay 5:29, 30.
7. Hano liyasen ko tatiihay nanaman o masakalimlaan hani?
7 Wa songilaˈen ita a misinanot, aka a papiconaen ko maamaan a demak to pisarocod midoko ci Yihofaan. Ano caka pisinanot i, wa masakaniw ko niyah: “Ano o tawlik kako mirienang to midokoay a demak, cowato ko sapiliyasaw to tatiihay a demak.” Soˈlinay mahaen han? Tinakoen, i sienaway a romiˈad, tahalomaˈ kiso i, tangsolay mifohat to faedetay a fali, ano caka ˈedefen iso ko fawahan i, wa samaan hani? Wa kaliki a micomod ko liˈetecay a fali. O manan ko kalimlaan hani? Sakaecaaw kafasaw no olah ita ci Yihofaan i, piˈosi aca to Fangcalay Cudad ato mitepangan cowaho ka edeng, oniya liˈetecay a “fali” no hekal ˈetengen i papotal ngaˈ, tatodong i, o tatiihay waywayan noniya hekal, aka papilingaten ko falocoˈ ita, ho eca ka picona to pisarocod ita mihopo ci Yihofaan.—Ifiso 2:2 ato roma pihongyak.
MARARAWAY CANGRA IKOR I, NAI FALOCOˈAY A PASASIYOR
8-9. Na marikec ko Hongti ci Tafiti aci Hicikiya i, samanay ko harateng nangra hani? (Nengnengen ko coka.)
8 I milengoan isaˈayaw a fatac, na pakidemay ko raraw ni Tafiti, kawra pairasolay ci Natan pasowal to raraw ningra i, tangsolay misapoener a mihayi to raraw ningra. (2 Samuil 12:13) I ˈOlic 51 fedengan mahapinang, nai falocoˈay ni Tafiti a pasasiyor, cowa ko makaniway ko pasasiyor ningra a sapiliyasaw to sapitefoc, anca pisakaniw ci Natanan.—ˈOlic 51:3, 4, 17 ato lalangian a sowal.
9 Na mararaway ko hongti ci Hicikiya, pakararaway ci Yihofaan. Saan ko Fangcalay Cudad: ‘Misatakaraway cingra, mansa pasayra ko Kawas to Yuta ato Yirusalim aci Hicikiya a mangolaw.’ (2 Rayray 32:25) Hano misatakarawto ci Hicikiya hani? Alatek pakayniay i noka adihay no hafay ningra, pakalowidayho to Asiriya a tamdaw, anca na midemakan no Kawas ko kasapaan miadah ko adada ningra. Alatek o pakayniay i noka pisatakaraw ningra, mansa pasayniay ci Hicikiya to Papilon a tamdaw a pasengi to hafay no niyah. Telocto i, marikecay no pairasolay ci Isaya cingra. (2 Hongti 20:12-18) Mahecaday ci Tafitian cingra, misapoeneray mihayda to raraw no niyah, nai falocoˈay a pasasiyor. (2 Rayray 32:26) Salikorto i, samaanay ko pinengneng ni Yihofa ci Hicikiya hani? O madimadiay a hongti ko pinengneng ni Yihofa, o padadotocay a midemakay to matatodongay a demak sanay ci Yihofa.—2 Hongti 18:3.
Na marikec ko Hongti ci Tafiti aci Hicikiya, misapoeneray mihayi to raraw, nai falocoˈ a pasasiyor (Nengnengen ko saka 8-9 fatac)
10. Na marikec ko Hongti ci Amaciya i, samanay ko harateng ningra hani?
10 Cowa ka hecad ko Hongti no Yuta ci Amaciya, soˈlin midemakay to matatodongay a demak ningra, ‘kawra cowa ka pisarocod a midemak.’ (2 Rayray 25:2) O manan ko raraw ningra hani? Padamaan ni Yihofa cingra pakalowid to Itom a tamdaw ikor, ˈarawhan i, mitaˈongay cingra to kawas no Itom.c Ikor, o pairasolay ni Yihofa misalof cingranan i, cowa ka tengilen ningra, mangolawayho a milaplap to pairasolay.—2 Rayray 25:14-16.
11. Mikitini 2 Korinto 7:9, 11, sasamaan ko demak ita ngaˈ wa macada ko sasodod no Kawas? (Nengnengen ko coka.)
11 Mikitini toniya hontingti a tinakoan o manan ko mananamay ita? Ano mararaw kita i, nai falocoˈ a pasasiyor, misaˈicel a caka piliyaw a mararaw. Ano patalipaˈelal ko malohemay malitengay to cecay a demak kitanan i, oniya demak cowa ka samaan saan kita alatek, hato padetengay ko malohemay malitengay miafad takowanan, anca cowato ka olah ci Yihofaan, aka saan ko harateng, samanen ano o madimadiay a hongti no Israil misaaliayho to sarikec ato sapisalofaw. (Hipray 12:6) Ano salofen no tao kita i, (1) misapoener a micada, (2) talaˈayaw a misalof to niyah, (3) padadotoc misarocod midoko ci Yihofaan. Ano nai falocoˈ kita pasasiyor wa sododen ni Yihofa kita.—ˈOsien ko 2 Korinto 7:9, 11.
Ano salofen no tao kita i, (1) misapoener a micada, (2) talaˈayaw a misalof to niyah, (3) padadotoc misarocod midoko ci Yihofaan (Nengnengen ko saka 11 fatac)f
MIDOPOAY CANGRA TO MATATODONGAY PIDOKO
12. Madimadiay a hongti ato cowa ka madimadi a hongti o manan ko kasasiroma?
12 I pinengneng ni Yihofa oya madimadiay hongti midopoay to matatodongay a noka pidoko. Pakalalokayho to finawlan a mihaen to demak. Masowalay isaˈayaway a fatac, mararaway ko demak nangra. Kawra misarocoday cangra maolah ci Yihofaan, misongilaˈ a mifahkol mifalah to samiyay.d
13. I pinengneng ni Yihofa i, hano cowa ko madimadiay a Hongti ci Ahap?
13 Oya cowa ka madimadi a hongti samaanay ko pinengneng ni Yihofa hani? Cowa ka sahto sa cangra midemak to tatiihay. Tinakoen, mariˈangay a hongti ci Ahap na pakayniay i sakapatay ni Napot a demak, paihkalay to misapoeneray ato pasasiyor, kawra cowa ko nafalocoˈan. (1 Hongti 21:27-29) Pakayniho cingra to Israil a patireng to niyaroˈ, mipadik to ˈada. (1 Hongti 20:21, 29; 22:39) Kawra mafiyorayho no tatiihay a fafahi ningra ci Ahap, itini Israil micowat to mararaway pihakelongan. Itini toniya demak i, tahira i kapatayan cowaho ka pasasiyor cingra.—1 Hongti 21:25, 26.
14. (1) Misamaanay hano cowa ka madimadiay ci Rihopoam saan ci Yihofa hani? (2) Cowa ka madimadi a hongti iraay ko manan a kahecadan nangra?
14 Nengnengenho ko roma cowa ka madimadi a Hongti ci Rihopoam. Masowalay isaˈayaw a fatac, i pikowan ningra i, adihayay ko midemakan ningra to ngaˈayay demak, kawra tanoktokto ko pikowan ningra ikor, cowa ka pidofdof to sarikec ni Yihofa, satapangayto midoko to makaniway a kawas. (2 Rayray 12:1) Ikor, coko ci Yihofa aca ko midokoan, midokoayho to makaniway kawas. (1 Hongti 14:21-24) Coko ci Rihopoam aci Ahap aca ko misafelitay to matatodongay pidoko, ˈalomanay a hongti midemakay to mahecaday a raraw. Soˈlinay i, ˈalomanay cowa ka madimadi a hongti na midama to mararaway noka pidoko. Mihaenay, pafafidaˈ ci Yihofa to ngaˈayay anca tatiihay a hongti i, misalalangiay to midopoay to matatodongay noka pidoko hokira.
15. Hano misakareteng ci Yihofa to tamdaw, midopo to matatodongay noka pidoko hani?
15 Misamaanay hano misakareteng ci Yihofa to midopoay no Israil a hongti to matatodongay noka pidoko hani? O cecay a lalangian i, iraay ko ˈinorong nangra mikerid to finawlan tano matatodongay a pakayraan midoko to Kawas. O roma a lalangian i, ano midoko ko tamdaw to makaniway a kawas, mamidemakho to romaroma pakidemay a raraw, mamikariˈangho to tao. (Hosiya 4:1, 2) O roma i, hongti no Israil to finawlan nao patafangayto to tireng ci Yihofaan a tamdaw, mihaenay saan ko Fangcalay Cudad, mirienangay cangra to mararaway noka pidoko mahecaday to maˈodangay. (Yirimiya 3:8, 9) Ano maˈodang ko tamdaw i, mahecaday to mitowakangay to raramod, o mahaenay a waywayan pakasomaday to falocoˈ no raramod. Mahecaday toni, o patafangayto ci Yihofaan a tamdaw ano midoko to makaniway a kawas, o mitowakangayto ci Yihofaan, pakasomaday to falocoˈ Ningra.e—Limoˈot 4:23, 24.
16. I pinengneng ni Yihofa i, o masamaanay a tamdaw ko ngaˈayay ato tatiihay hani?
16 O manan ko mananamay ita hani? Liyasen ita ko milingatay to mararaway pihakelongan a demak. Cowa konini aca, mamidopoho kita to matatodongay noka pidoko, halo tawlik a padadotoc matayal saki ci Yihofaan. Ci Malaki a pairasolay ihkalay ko pitadtad, i pinengneng ni Yihofa i, o masamaanay a tamdaw ko ngaˈayay ato tatiihay, sanay cingra: ‘Wa miliyaw kamo mahapinang ko moecelay ato mariˈangay a tamdaw, o midokoay to Kawas ato cowa pidoko to Kawas a tamdaw iraay ko maanan a kasasiroma.’ (Malaki 3:18) Makalimay kita itini kaˈayaw ni Yihofa malo moecelay a tamdaw, mansa hamaan a papiconaen ko maamaan a demak to sapidokoaw ci Yihofaan. Soˈlinto pakayni i karonayan anca na mararaway ita a demak a maˈisang, kamayan padadotocen a midoko Cingra. Haratengen, ano paterep pahanhan midoko ci Yihofaan i, o pakidemay a raraw koni.
17. Hano mamisinanot kita mipiliˈ to hararamod hani?
17 Ano sakaciraramodaw kiso i, mahapinang iso ko sowal ni Malaki ato pipiliˈ iso to raramod, misamaanay a milingat hani? Alatek iraay ko ngaˈayay capeling ningra, kawra ano cowa ka pidoko cingra ci Yihofaan, mihaen i, itini pinengneng ni Yihofa o moecelay a tamdaw cingra han? (2 Korinto 6:14) Ano mararamod kiso cingranan i, wa padama tisowanan miingid ci Yihofaan han? Harateratengen hena, Hongti ci Solomon ilalomaˈ nora cowa ka pidoko to Kawas a fafahi i, alatek iraay ko ngaˈayay a capeling nangra. Kawra cowa ka pidoko cangra ci Yihofaan. Telocto i, makayhiday nangra ci Solomon, palidlid sato miliyas to Kawas, midoko to makaniway a kawas.—1 Hongti 11:1, 4.
18. O wama wina o manan ko papakafanaˈen to wawa?
18 Malo wama winaay, ngaˈayay sakadademaken namo ko pakayniay to hongti no Israil a miˈoningan pakafanaˈ to wawa, ho nai falocoˈay cangra a midoko ci Yihofaan. Padamaen ko wawa pakacipinang, itini pinengneng ni Yihofa, o ngaˈayay a hongti sahtoay fanekfekay a midoko Cingranan, pakalalokho to tao mihaen to demak. Patirengen ko ngaˈayay taˈarawan, mahapinang no wawa mitosil, miˈosi to Fangcalay Cudad, mirienang to saˈopo ato romaroma midokoay a demak, itini nokaˈorip ita o masakalimlaan konini a demak. (Matay 6:33) Ano caka pihaen ko wama wina to demak i, alatek mala Misawacayay Tamdaw ni Yihofa, o nanaman aca no paro no lomaˈ koni sa ko wawa. Halafinto i, midoko to Kawas cowa ko masakalimlaan wa saan cangra, salikorto i, mamiliyasto to matatodongay noka pidoko.
19. Mihawadayto midoko ci Yihofaan a tamdaw, iraayho ko maanan a hatokel hani? (Nengnengen ko sapatongal lalakaw “Wa Ngaˈay Kiso Minokay Tayni i Katihi ni Yihofa!”)
19 O cecay tamdaw ano cato ka pidoko ci Yihofaan i, awaayto ko hatokel han? Cowa. Wa ngaˈay cingra pasasiyor, miliyaw a midoko ci Yihofaan. Sapinokayaw tayni i katihi ni Yihofa i, paihkal cingra to misapoeneray ngaˈ, micada to sapadama no malohemay malitengay. (Yakop 5:14) Mihaen to demak alatek cowa ko madoloay, kawra ano sapiliyawaw micada to pihayda ni Yihofa i, ano samaanto ko pisaˈicel iso i, o tada ciepocay koni!
20. Ano todongen ita ko madimadiay hongti i, samaanay ko pinengneng ci Yihofa kitaanan hani?
20 Mikitini kita to hongti no Israil, o manan ko mananamay ita? Ngaˈayay todongen ita ko madimadiay a hongti, padadotoc a misarocod midoko ci Yihofaan. Ano mararaw i, wa ngaˈay kita mikitini a minanam, nai falocoˈan a pasasiyor, halo pisalof to waywayan. Haratengenho ita, midopo to matatodongay a pidoko o masakalimlaan. Ano misarocod kiso midoko toniya tada cecayay a Kawas ci Yihofa i, o moecelay tamdaw han Ningra kiso a minengneng!
RADIW 45 Midotiman no Falocoˈ
a Itini toniya lalakaw, oya “hongti no Israil” hananay o mikowanay to finawlan no Kawas a hongti. Mahawpay ko mikowanay to tatosa ngangasaw no Yuta kitakit, mamoetep ngangasaw no Israil a kitakit, ato emin ngangasaw a Israil.
b SAPITADTAD A SOWAL: I Fangcalay Cudad, o “falocoˈ” hananay a tilid, tatodong i o ikemoday no falocoˈ a waywayan, mahawpay ko kalim no falocoˈ, harateng, capeling, waywayan, inaneng, araaw ato patosokan.
c I lintadho no Fangcalay Cudad, hongti no ˈalafang iraay ko cecay nanaman, milowid to roma kitakit ikor i, wa mitaˈong to kawas nangra.
d Na pakidemay ko raraw no hongti ci Asa. (2 Rayray 16:7, 10) Kawra, pakayra cingranan kasemeran ko masowalay no Fangcalay Cudad. Soˈlin isaˈayaw cowa ka picada ci Asa to pisalof, alatek i, pasasirorayto cingra. Mihaenay i, i pinengneng ni Yihofa, ora makapahay a capeling ikakaay to raraw ningra. Samanen misarocoday ci Asa midoko ci Yihofaan, hanaca misongilaˈay a mifahkol mifalah to samiyay.—1 Hongti 15:11-13; 2 Rayray 14:2-5.
e Oha sasinanoten a demak i, o saka 1 ato 2 a Sarikec ni Mosi, o Israil tamdaw edengan ci Yihofa ko hadadokoen, cowa ka ngaˈay midoko to roma a kawas, tamdaw anca o dafong.—Kasadakan 20:1-6.
f TATODONG NO COKA: Oniya kapah a malohemay malitengay patalipaˈelalay to cecay salikaka, misinanot to miˈinapay to epah a nanaman. Misapoeneay koniya salikaka micada to sarikec a misalof to niyah, padadotoc a madimadi midoko ci Yihofaan.