LALENGOEN LALAKAW 45
RADIW 138 O Makapahay Tamohong ko ˈOfad
Miterekan no Tatoloay Madimadiay Sikawdan Kitanan a Sowal
‘O makakaayto ko mihecaan a tamdaw coko citanengay han? O matoˈasay a tamdaw coko iraay ko cipinangay a harateng han?’—YOPU 12:12.
KALIMLAAN NO LALAKAW
Ano midofdof kita to Kawas ci Yihofaan, coko anini aca ira ko sapalemed, anoikor wa micada to tahadaˈocay a ˈorip.
1. Misamaanay hano pasayra kita i matoˈasay a minanam?
KITA maemin ano sapisaˈosiaw to masakalimlaan a demak i, misaaliay to sakayat. O malohemay malitengay ato matenesay a Krisciyang itini toniya pakayraan wa taˈangay ko sapadama kitanan. Ano ikakaay ko mihecaan nangra kitanan, hamaan a tangsol sa miharateng to awaay ko kapo no sapaini nangra. Makalimay ci Yihofa kitanan pasayra i matoˈasay a minanam, samanen ikakaay ko nalifetan ato taneng nangra.—Yopu 12:12.
2. Oniya lalakaw mamilengo to manan?
2 I lintad no Fangcalay Cudad, minilnilan ni Yihofa ko malitengay madimadiay a sikawdan pakalalok mikerid to finawlan Ningra, ilalomaˈ no tatolo mahawpay ci Mosi, Tafiti ato tarokos ci Yohani. Cowa ka hecahecad a lintad ko kaˈorip nangra, cowa ka hecad ko kitiraan. ˈAyaw no mamapatay i, mihadakay cangra to sapalimoˈot to kaemangay a tamdaw, oniya sowal nangra mahecaday paˈicelay to masakalimlaan ko midofdofay to Kawas. Miˈoninganto ni Yihofa ko sowal nangra i Fangcalay Cudad, materek tahanini. Ano matoˈasayto kaemangayto, wa mikitini kita to sapalimoˈot nangra a milifok to haepoc. (Loma 15:4; 2 Timoti 3:16) Oniya lalakaw wa misongilaˈ a mifolfol to sowal nangra, minengneng to o manan ko mamananam no mita.
WA NGAˈAY TAHACELEM KO PIKILOMAˈ
3. Samaanay ko nalifetan no hakelong no ˈorip ni Mosi?
3 Hakelong no ˈorip ni Mosi misaˈicelay matayal saki ci Yihofaan. O pairasolayho cingra, misawkitay, kakeridan, mikakingkiway to likisi, adihayay ko nalifetan i nokaˈorip. Mikeriday cingra to Israil tamdaw miliyas to mala koli no kaˈorip i Icip, maˈarawayto ningra ko midemakan ni Yihofa a kasapaan. Miocoran ni Yihofa cingra miˈoning to saˈayaway limaay tatilidan no Fangcalay Cudad, ato ˈOlic saka 90 fedengan, alatek miˈoningayho cingra to ˈOlic saka 91 fedengan ato Yopu a cudad.
4. ˈAyaw no mamapatay ci Mosi sapakalalokaw cimaanan, misamaanay?
4 Ci Mosi 120 ko mihecaan a maˈorip. ˈAyaw no mamapatay cingra i misaˈopoay to Israil tamdaw, padama cangranan mitikol miharateng to na demakan ni Yihofa cangranan. Tahatengilay to sowal ningra a tamdaw, ilalomaˈ iraay ko pakaˈaraway to midemakan ni Yihofa a kasapaan, maˈarawayho ko pitefoc Ningra to Icip a tamdaw. (Kasadakan 7:3, 4) Ikor palacinowasan ni Yihofa ko Kahngangay a Riyar, romakatay cangra i riyar, maˈaraway nangra ko misamaanan ni Yihofa palaˈafo ko sofitay no Icip. (Kasadakan 14:29-31) I kohkohan, matinakoay nangra to misamaanan ni Yihofa midipot midimokos cangra. (Limoˈot 8:3, 4) Nohatini, wa kalikito cangra micomod to Mikiˈokan ni Yihofa a Pala, ˈayaw no mamapatay ci Mosi, sapimetmetaw cingra to toki pakalalok cangranan.a
5. Mikitini Limoˈot 30:19, 20, ˈayaw no mamapatay ci Mosi misamaanay mikiˈok to Israil tamdaw?
5 O manan ko sowal ni Mosi? (ˈOsien ko Limoˈot 30:19, 20 ato roma pihongyak.) Pasowalan ni Mosi ko Israil tamdaw, wa ira ko makapahay hanoikor nangra, palemedenho ni Yihofa cangra, wa tahacelem cangra a maˈorip itini i sapafeli no Kawas a pala. Makapahay ko kaitiraan, kadofahay ko pinaloma. Saan ci Mosi: ‘Itira iraay ko fangcalay a taˈangayay niyaroˈ, cowa ko miso a patirengan; matomesay ko masakenakenaay makapahay a dafong tora lomaˈ, cowa ko narorayan iso; iraay ko fanaw, cowa ko miso mikorkoran; iraay ko fadisosoˈ ato olif a omah, cowa ko miso a mipalomaan.’—Limoˈot 6:10, 11.
6. O Israil tamdaw misamaanay hano malaplap toniya pala hani?
6 Patalipaˈelalanho ni Mosi ko Israil tamdaw: Ano sapadadotocaw a maˈorip toninian a sera i, oha mamidofdof to sapalimoˈot ni Yihofa. Pakalalokan ni Mosi cangra mipiliˈ to ˈorip, mitengil to sowal ni Yihofa, madimadi Cingranan. Kawra i, o Israil tamdaw cowa ka midofdof to sowal ni Yihofa, mansa cowato ka dipoten ni Yihofa cangra. Ikor no pina miheca i, miˈodisan no Asiriya ato Papilon a tamdaw cangra, milaplapanho cangra toniya pala.—2 Hongti 17:6-8, 13, 14; 2 Rayray 36:15-17, 20.
7. Mikitini i sowal ni Mosi o manan ko mananamay ita? (Nengnengen ko coka.)
7 O manan ko mananamay ita hani? Dofdofen ko Kawas ngaˈ tahadaˈoc a maˈorip. Itiyaay a Israil tamdaw tahiraayto i ngata no Kanan, nohatini mamicomod kita to faelohay a hekal, itiyato i, oha mamala lakoingto konini a cikiw. (Isaya 35:1; Luka 23:43) Itira awato ci Akoma ato mariˈangay coyoh, awato ko mikalioratay a mararaway pihakelongan, awato ko hamamiroero a sifo, awato ko midemakay to mariˈangay. (ˈOlic 37:10, 11; Paˈarawan 17:16; 19:19, 20; 20:2, 3) Kihcod a tamdaw wa midofdof to moecelay palinian ni Yihofa, malacecay makakedec ko falocoˈ, dipayal malacafay. Masasiolah a pakasoˈlin. (Isaya 11:9) O hatiniay a kaˈorip coko hinatalaan han! Cowa konini aca, ano midofdof kita ci Yihofaan i, wa tatahadaˈoc a micada to makapahay a nikaˈorip.—ˈOlic 37:29; Yohani 3:16.
Ano midofdof kita ci Yihofaan, wa itini i lakoing milayap to makapahay nokaˈorip tahadaˈoc (Nengnengen ko saka 7 fatac)
8. Haratengen ko tahadaˈocay maˈorip a hatokel, paˈicelay to mikiriwiˈay manilnilay a mitosilay misamaan ko demak? (Yuta 20, 21)
8 O mananto ko malifaay a pasangar, ano haratengen ita ko tahadaˈocay makapahay a hatokel, wa padadotoc misaˈicel midofdof ci Yihofaan. (ˈOsien ko Yuta 20, 21.) Oniya hatokel pairaay to ˈicel ita miremo to kadangocan no niyah. Cecay faˈinayan salikaka itiniay i Afrika pinaayto a miheca mala mikiriwiˈay manilnilay a mitosilay, mafanaˈay cingra to cowa ko kaolahan no Kawas a demak, ˈarawhan iraayho ko mararaway a harateng ningra. O manan ko padamaay cingranan hani? Sanay cingra: “Cipinangayto kako, ano caka pidofdof ci Yihofaan i, cowa ko tatahacada to midaˈocay a ˈorip. Paˈicelay konini takowanan padadotoc midemak to matatodongay, fanekfek a mitolon ci Yihofaan. Itini i sapadama no Kawas, pakaremoayto kako toniya kadangocan.”
ANO O MANANTO KO DEMAK MALAˈOSIAYTO
9. O manan ko malifaay ni Tafiti a pasangar?
9 Ci Tafiti o citanengay a hongti, midatokay, miˈolicay, milooday ato pairasolay. I hakelong no ˈorip ningra milifetay to adihayay a pasangar. ˈAyaw no mala hongti ci Tafiti kaˈintehan ni Sawlo cingra, sapipatayaw cingranan to pina miheca. Mala hongti ikor, sapiˈafasaw to saaroˈan mala hongti ko wawa ningra ci Apsalom, mansa sapilaliwawho cingra. Soˈlin malifaay ni Tafiti ko adihayay a pasangar, na pakidem ko raraw ningra, kawra i hakelong no ˈorip ningra madimadiay ci Yihofaan, sanay ci Yihofa, mihaydaan Ningra ci Tafiti. O sapalimoˈot ni Tafiti oha sasinanoten no mita.—Dmak 13:22; 1 Hongti 15:5.
10. Misamaanay hano painien ni Tafiti ci Solomon hani?
10 Nengnengen ita ko sapalimoˈot ni Tafiti to wawa ningra ci Solomon. O mipiliˈan ni Yihofa ci Solomon to mamidotoc a mala Hongti. Papipatirenganho ni Yihofa cingra to fangcalay sefi, micowat to matatodongay pidoko. (1 Rayray 22:5) Kawra sapilahciaw cingra toniya demak cowa ko madoloay, mihaenay o manan ko sapaini ni Tafiti ci Solomonan hani?
11. Mikitini 1 Hongti 2:2, 3, o manan ko sarikec ni Tafiti ci Solomonan? Hano o matatodongay han koniya sowal? (Nengnengen ko coka.)
11 O manan ko sowal ni Tafiti? (ˈOsien ko 1 Hongti 2:2, 3.) Pasowalan ni Tafiti ci Solomon, ano midofdof ci Yihofaan wa malaˈosi ko kaˈorip. Ikor no cecay liyad, malaˈosiayto ko demak ni Solomon. (1 Rayray 29:23-25) Patirengay cingra to kasapaan a fangcalay sefi, miˈoningayho to pina maloloday Fangcalay Cudad, o masowalay ningra maˈoningayho i Fangcalay Cudad. O taneng ato hafay ningra ko sakacingangan. (1 Hongti 4:34) Kawra mahaen tora sowal ni Tafiti, sakalaˈosiaw ni Solomon, salakat i, mamidofdof ci Yihofaan. Kaadayayan i, malitengto ci Solomon midokoay to samiyay. Cowa ka hemek ci Yihofa, cowato ka pafelien ci Solomon to taneng, awaayto ko sapadama ni Yihofa, cowato ka ngaˈay cingra tano masadafdafay sidaˈitay a mikowan tonini a kitakit.—1 Hongti 11:9, 10; 12:4.
ˈAyaw no mamapatay ci Tafiti a pasowalan ningra ko wawa mahapinang ita: Ano midofdof kita ci Yihofaan i, wa pafelien Ningra kita to taneng, ho citaneng ko pisaˈosi no mita (Nengnengen ko saka 11-12 fatac)b
12. Mikitini to sowal ni Tafiti o manan ko mananamay ita?
12 O manan ko mananamay ita hani? Edengan midofdof ngaˈ malaˈosiay. (ˈOlic 1:1-3) Manaokaniw, cowa ka mikiˈok ci Yihofa kitanan malecadto ni Solomon pafeli to hafay ato ˈdil. Kawra ano dofdofen ita Cingra i, oha papafelien Ningra kita to taneng a misaˈosi. (Taneng 2:6, 7; Yakop 1:5) O safalod Ningra itini katayalan, sapakafanaˈ, lawla ato hafay a mikayat kitanan. Ano tooren ita a dademak i, wa madipot ko ngaˈayay kalalaˈed no niyah aci Yihofa, makilimho ko soˈlinay a widang, iraho ko sakaraheker no paro no lomaˈ.—Taneng 2:10, 11.
13. Ci Kamen misamaanay a makilim ko tada ngaˈayay a nokaˈorip?
13 Itini Mosanpike ci Kamen, nao harateng ningra o ˈakawangay pitakcian ngaˈayay padama to tamdaw malaˈosi ko demak, mansa mitakciay to taykak cingra minanam to patirengay to lomaˈ a demak. Mahemekay cingra toniya mitakcian ningra, sanay cingra: “Adihayay ko mapalakay ako a toki ato ˈicel itini toniya picudadan, to romiˈamiˈad papacem pito ko kalitosa no toki tahira i dadaya enem ko toki itiniay i picudadan, mihaenay pasangaray mirienang to saˈopo, maraayayto ko kalalaˈed aci Yihofa. Mahapinang to ‘mala koliay no tosaay a tawki’ kako.” (Matay 6:24) Pakayni toniya demak mitolonay to Kawas cingra, mikilimayho to mitepangan a lalakaw. Sanay cingra: “Ikor malohemay malitengay ato wina pafeliay takowanan to ngaˈayay a sapaini, mansa misaˈosiayto kako mihawad a micudad, miemin to toki a mala dademakay ni Yihofa. Onini itini hakelong no ˈorip o citanengay a pisaˈosi ako, cowa ka talalikor ko harateng ako!”
14. Ci Mosi aci Tafiti miterekan nangra a sowal icowaay ko kahecadan?
14 Ci Mosi aci Tafiti tada maolahay ci Yihofaan, mafanaˈayho midofdof ci Yihofaan o masakalimlaan. Mansa ˈayaw no mamapatay cangra pakalalokay to teloteloc, mahecad cangranan madimadi ci Yihofaan. Sanay cangra a mirikec, ano eca ka madimadi ko tamdaw to Kawas, wa malahdawto ko kalawidang Cingranan, cowa ko mamilayap to sapalifon. Ora sowal nangra, pakayni to aniniay a lintad no mita tada ciepocay konini. Ikor no 1,000 miheca, roma madimadiay sikawdan no Kawas paˈicelay to sakamadimadiaw to Kawas a kalimlaan.
AWAAY KO MAANAN TO AIKAKA KO NIKA HEMEK TONINIAN
15. Tarokos ci Yohani i hakelong no ˈorip o manan ko malifetay ningra?
15 Ci Yohani o kaolahan ni Yis a nisawawaan. (Matay 10:2; Yohani 19:26) Malacafayay cingra aci Yis mitosil, manengnengayho ko nidemakan ni Yis a kasapaan. Itiya i pasangaray a tatokian i, patihian ningra ci Yis. Maˈaraway ningra misamaanay ko pipatay ci Yisan, maˈarawayho ningra ko pipatikol maˈorip ni Yis. Misawacayayho cingra to sakacakat no kasakopang no saka 1 hahekalan a Krisciyang: Satapang i, mimingayho a ˈopo, ikor maedefayto ko ngaˈayay lihaf i liholihoc a mapatenak, ‘mafanaˈayto ko ˈalomanay a tamdaw.’—Kolosay 1:23.
16. O tikami ni Yohani pakalalokayho to cimacima a tamdaw?
16 Itini katoˈasanto, iraay ko tatodong ni Yohani miˈoning to Fangcalay Cudad, ilalomaˈ iraay ko kasemeran a maloloday a tilid naitiniay ‘ci Yis Kristoan a mipaˈarawan.’ (Paˈarawan 1:1) Miˈoningayho cingra to cecay Ratoh a Cudad ato toloay a tikami, ilalomaˈ no saka tolo a tikami sapatilid to madimadiay Krisciyang ci Kayusan. Tada maolahay ci Yohani ci Kayusan, o pinengneng ningra ci Kayus mahecadayto o wawa ningra. (3 Yohani 1) Cowa aca ci Kayus, ˈalomanayho ko mapadamaay ni Yohani. Mitilidan ni Yohani ci Kayusan a sowal pakalalokay to itiyaayho a nisawawaan, mapakalalokayho kita.
17. Pakayni 3 Yohani 4, o manan ko palipahakay ci Yohanian?
17 O manan ko sowal ni Yohani? (ˈOsien ko 3 Yohani 4.) Sanay ci Yohani, maˈaraway ningra ko salikaka midofdof to Kawas tada kahemekanto. Itiya, o roma tamdaw miyakayakay to mararaway a kimad, palacongisay to tamdaw. Kawra iraayho ko tamdaw midopoay to soˈlinay kimad, midofdofay cangra ci Yihofaan, ‘mitoor to masakenakenaay a sapirikec Ningra a midemak.’ (2 Yohani 4, 6) Oniya madimadiay a Krisciyang palipahakay ci Yohanian aci Yihofaan.—Taneng 27:11.
18. Mikitini to sowal ni Yohani o manan ko mananamay ita?
18 O manan ko mananamay ita hani? Madimadiay pairaay to lipahak. (1 Yohani 5:3) Maˈaraw ni Yihofa kita micoˈay to sakayhid, micada to soˈlinay kimad, tada mahemekay Cingra. (Taneng 23:15) Maˈaraw ita mahemek ci Yihofa i, mahemekay ko niyah. Mahaenay ko coyoh a mahemek pakayni kitanan. (Luka 15:10) O roma i, o salikaka itini sapalifet ato sakayhid mitawmecay to madimadiay, ano kitato mahemekay. (2 Tisalonika 1:4) Mapalaˈafo ko lekakawa ni Satan i, wa pakayni kita to mipiliˈan midoko ci Yihofaan a mahemek!
19. Pakayni paladaˈ to soˈlinay kimad, samaanay ko harateng ni Rowiciw? (Nengnengen ko coka.)
19 Paladaˈ to soˈlinay kimad to tamdaw mangalefay ko nika hemek no mita. Ci Rowiciw itiniay i Tominika a mikilomaˈ, o harateng ningra, padama to tamdaw mafanaˈ ci Yihofaan tada o kalikoan koni. Masowal ningra ko mipakingkiwan no niyah, sanay: “Maˈaraw ako ko pakingkiwan palidlid sa miingid ci Yihofaan, mafanaˈ mitiˈer Cingranan, makahi mifalic to nokaˈorip, awaayto ko sasowalen to mahaenay a lipahak. Pakayni to kinafalah no niyah a misaˈicel pakafanaˈ cangranan o ciepocay koni!”
Pakafanaˈ kita to tamdaw ci Yihofaan, midofdof to sapirikec Ningra, wa mahemek ko niyah (Nengnengen ko saka 19 fatac)
O MITEREKAN NANGRA A SOWAL TADA CIEPOCAY
20. Ci Mosi, Tafiti aci Yohani o manan ko mahecaday kitanan hani?
20 Soˈlin, ci Mosi, Tafiti aci Yohani o kaˈorip a lintad ato kitiraan cowa ka hecadto no mita, kawra kamayan adihayay ko kahecadan. Mahecaday kita cangranan midokoay to tada cecayay a soˈlinay Kawas, mitolon a micangacang to sapadama ato sakayat Ningra. Pakasoˈlinayho kita ci Yihofaan wa palemeden ko midofdofay Cingranan a tamdaw.
21. Ano misinanot kita to sowal no tatoloay a madimadiay sikawdan, o manan ko mamacada a lifon hani?
21 Mansa papisinanotay kitanan to sapalimoˈot nangra, midofdof ci Yihofaan. Mihaen i, ano o mananto ko midemakan ita, wa malaˈosi maemin, micadaho to midaˈocay a ˈorip, tahacelem a mikilomaˈ. (Limoˈot 30:20) Pakahemekenho ita ci Yihofa lipahakay kita. O sapalifon Ningra wa ikaka to micangacangan miharatengan no mita a kihcod.—Ifiso 3:20.
RADIW 129 Nanay Mihadidi Tahadaˈoc
a ˈAlomanay pakanengnengay to kasapaan no Kahngangay a Riyar a tamdaw, cowa ka picomod to Mikiˈokan no Kawas a Pala, samanen sanay ko sowal ni Yihofa, o emin mataˈlifay ko 20 mihecaan matingkiay ko ngangan a tamdaw sahto mamapatay i kohkoh. (Saˈosi 14:22, 23, 29) Kawra ci Yosuwa aci Kalip, Lifi a tamdaw ato kaemangay no Israil a tamdaw sahto mitaˈlifay to Yortan ˈAlo micomod i Kanan a pala, maˈaraw ko palaˈosi ni Yihofa to mikiˈokan Ningra.—Limoˈot 1:24-40.
b TATODONG NO COKA: Kawili a Coka: ˈAyaw no mamapatay ci Tafiti palimoˈotay to wawa ningra ci Solomonan. Kawanan a Coka: Mirienangay ko salikaka to Sapahatatanam to Misakafahay, minanam to taneng ni Yihofa.