1924—Tikolen Miharateng ko Simoˈot Miheca

TIMOLOAY MITANAM TO FAELOHAY A HAPAKAYRAAN: PATIRENG TO PAˈESELAN TO LACIW A LOMAˈ

Toha sapatirengaw to paˈeselan to laciw a lomaˈ (WBBR) i Sotaten Potipot i Niwyok, i Pitilay a salikaka cecayay a miheca misaday tonini mipatirengay a tayal. Masapayto no salikaka ko sera i, isaˈayaway patireng to pilafinan no matayalay salikaka, roma i, patirengay to pitelian to lalosidan a soko. Malahcito konini a demak i, satapangayto cangra mipalaliting to lalosidan, misadayto to papaˈesel to laciw. Kawra, isalakatenho nangra miremo ko pina pasangaray. 

Mahapinangay no salikaka, mipatireng to antina tada pasangarayto. 91 kongce ko ˈakawang a antina paketingen i 61 kongce ko ˈakawang i tosa a tektek. Sakinacecay cowa ka laˈosi cangra. Ikor, pakayni pitadiˈec to sapadama ni Yihofa, malaˈosiayto ko pidemak no salikaka. O mirienangay tonini tayal a salikaka ci Kalfin Porosa sanay: “Sakinacecay ita ano malaˈosi i, maedeng mamalikoen alatek, o tadamaanayto ko niyah wa saan.” Itiya i, panokayan no salikaka ci Yihofaan ko kihcod a narorayan. Kawra iraayho ko pina pasangaray demak to sasaysayen nangra.

Itiya i, satapang sanayho a lomowad ko paˈeselay to laciw a demak, pasangaray a micakay to sakadademaken a lalosidan. Oranto i, micakayan no salikaka ko matelangayto a sapaˈesel a lalosidan, 500 aca a watt ko ˈicel a paˈesel. Cowa ka picakay cangra to faelohay mayko, tano tingwaan a mayko ko sakadademakan. Isaka 2 folad to cecay dadaya, mitanaman no salikaka konini a kantangay a lalosidan. Paˈeselan no salikaka ko romadiway to Hongti Kitakit a radiw mitanam tonini a lalosidan. Maharateng no salikaka ci Ayniste Lo koya demak i, tada katawaan sanay ko sowal ningra, sanay milomal cingra, ta lipahak a romadiw ko salikaka i, talifahal sanay ira ko tingwa no hankang ci Rosofo.b ˈArawhan matengilay ningra i laciw konini mipaˈeselan a radiw i 25 kongli ko raay a Prokelin.

Sanay ko salikaka ci Rosofo: “Akato ka romadiw, hato milekalay a posi kamo a tengilen!” Mangodoan nanay ko salikaka, tangsolan mipadeng koya sapaˈesel a kikay, nikawrira mafanaˈayto cangra to ngangaˈayto mipaˈesel to kamok.

Isaka 1924 miheca saka 2 folad 24 romiˈad, salikaka ci Rosofo itini sakinacecay pipaˈesel to kamok sanay ko sowal, onini a pipaˈeselan wa “milasil to ngaˈayay lihaf no Hongti Kitakit ni Misiya.” Sanay cingra, o araaw nonini a sapipaˈesel i, “o sapipadamaaw to romaroma pidoyongan mihapinang to sapasifanaˈ no Fangcalay Cudad, itiniay kita i mikiriwiˈay a lintad maˈorip.”

Sakinacecay pipaˈesel to kamok tada malaˈosiayto. Dotoc a 33 mamihecaan, WBBR a pipaˈeselan kamayan o misakadademakan no likakawa no Kawas a sapitosil a lalosidan konini.

TIMOLOAY A MIRIKEC TO MISASINGSIAY ATO FOKOSI

Isaka 1924 miheca saka 7 folad, o Mikakingkiway to Fangcalay Cudad a Tamdaw itiniay i Ohayo Kelompo misikay to taykay. O mirienangay a salikaka naitiniay icowacowa a pala no hekal, tano adihayay masasiromaay a sowal ko sapikimad, mahawpay ko Arapiya, Padaka, Frans, Towic, Krisiya, Siyungyali, Itali, Litawan, Polan, Rowasiya, Okeran, Skantinawiya a pala a sowal. O pinapina kamok no taykay pakaynian i pipaˈeselan a pasadak. Milimasmasay ko salikaka, itini Sinfon no Ohayo pasadakan ko kalingad no taykay to romiˈamiˈad.

Saka 7 folad 24 romiˈad Pisepatan, mataˈlifay ko 5,000 a tamdaw mirienangay to mitosilay a tayal. Mapalilamay nangra ko 3 ˈofad a cudad, telocto masacaˈolay a tamdaw misatapangay mikingkiw to Fangcalay Cudad. O “salipahakay a romiˈad no taykay” konini hananay no Mikecolay.

Saka 7 folad 25 romiˈad Pilimaan o masakalipahakan a romiˈad. Itiya miˈosian no salikaka ci Rosofo ko cecay a misetekan a salasil, timoloay a mirikec to misasingsiay ato fokosi. Onini a misetekan a salasil tano holican a pakayraan a mitilid, mipakokot to mirikecay no sifo, kalodoyongan ato ˈaˈideman no misasingdiay, “micongeday cangra to tamdaw mafanaˈ to milimasmasan no Kawas to sakalidongaw no ˈorip no tamdamdaw.” Cowa koninian aca, onini misetekan a salasil mitoroˈay cangranan “midopoay to Makakadepay a Kitakit, misao ‘saki sera no Hongti Kitakit no Kawas a mirikecay’” hananay. Mipatenak to mahaenay a lihaf, tada timoloay ko Mikakingkiway to Fangcalay Cudad a Tamdaw a mihaen to demak.

Pakayni tonini a taykay, mikomoday ko Mikecolay a somowal: “Mahererek mirienang to Kelompo a taykay ikor, matongalayto ko pakasoˈlin nonini cowa ka ˈaloman a sofitay no Tapang . . . , cowa ka talaw cangra to ˈada, macoˈayay nangra ko kihcod cinamalay a panaˈ no ˈada.” Salikaka ci Layaw Kelawse na mirienangay tonini a taykay, sanay a milomal: “Itiya tada makowaday ko harateng niyam, sapipalilamaw tonini misetekan a salasil i kilac.”

Ikor, o Mikakingkiway to Fangcalay Cudad a Tamdaw miinsacan nangra ko mihadakan no salikaka ci Rosofo misetekan a salasil malo tancang, lalangian i, O Sapakokot to Misasingsiay ato Fokosi (no Padaka). Toya mihecaan Kamoetepan Folad, pinaay caˈol ˈofad a tancang mipalilaman nangra. Itini Ekelahema Kelifelan a niyaroˈ, salikaka ci Folanke Yohansin itini kilac maherek a palilam to tancang i, 20 efon ko halafin ngaˈ malalitemoh to romaroma salikaka. Cowa ka ngaˈay cingra itini maˈaraway no tamdaw a kitiraan mitala, samanen i niyaroˈay a tamdaw maˈosi koniya tancang tada mangolaway, mikilimay cingranan. Milimekay ko salikaka ci Yohansin i cecay kiyokay. Awaay ko tamdaw ilalomaˈ no kiyokay, mitelian ningra ko tancang i Fangcalay Cudad no fokosi, mitelianho ningra i kahacecay kamaroˈan no kiyokay, ikor tangsolay cingra miliyas. Samanen iraayho ko miming a toki, tayraayho cingra i roma tosa kiyokay, itira adihayay ko miterekan ningra a tancang.

Ci Yohansin tayraay i ngata no kalalitemohan to salikaka a kitiraan. Itiraay i lalikor no pipasimalan to tosiya cingra a milimek, sacingacinga sanay minengneng to iraay mitoor koya milepelay cingraanan a tamdaw hokira. Pakatosiyaay koya tamdaw mitaˈlif cowa pakaˈaraw cingraanan. Mitaˈlifto cangra i, o mitosilay i ngata a salikaka pakatosiyaay tayni, pakalic cingraanan.

Sanay a milomal ko cecay salikaka: “Miliyasto kami toya niyaroˈ mitaˈlifay toya tolo a kiyokay, maˈaraway ko tamdaw tomireng i fawahan no kiyokay, saˈalomanay i, 50 ko tamdaw. O romaroma nangra miˈosiay toya tancang, iraay ko tamdaw to pafeliay toya tancang i fokosi. Ngaˈay yaca kalikiay kami miliyas, ano eca i, wa ira ko fangafang niyam! Akoˈiday ci Yihofaan midipot tamiyanan, paira to taneng niyam milowid to ˈada.”

O MIKAKINGKIWAY TO FANGCALAY CUDAD A TAMDAW ITINI I ROMA KITIRAAN TIMOLOAY MITOSIL

Itini roma kitakit, timoloay ko Mikakingkiway to Fangcalay Cudad a misawacay. Itini kaˈamisan no Frans, salikaka ci Yosif Krete mitosilay to misikitangay a tamdaw, o naitiniay i Polan cangra a malinah tayni. Mihalakaay ci Krete mihadak to “Mamalaˈosito a Patikol Maˈorip ko Mapatayay” sanay a kimad. Ikor no palilam to sapitahidang to i niyaroˈay a tamdaw, o misasingsiay no kiyokay tora niyaroˈ palimoˈotay to mihakelongay a tamdaw aka pirienang sanay, ora pilalang ningra ˈarawhan cowa ka laˈosi. Toya romiˈad, mataˈlifay ko 5,000 a tamdaw mitengilay toniya kimad, ano oyato misasingsiay a tamdaw mirienangay cingra! Tahidangan ni Krete koya misasingsiay paˈading to pihakelongan ningra, minaˈayay cingra. Maˈaraw ko ˈalomanay a tamdaw maolahay to Kimad no Kawas, maeminay ni Krete palilam ko polong a cudad ningra.—Amos 8:11.

Itini i Afrika, o salikaka ci Klawte Polang patenakay to ngaˈayay lihaf i Kana. Mikimaday cingra halo palilam to cudad, itini i ˈapotoay a tatokian ˈalomanayto ko mipadamaan ningra a tamdaw mafanaˈ to soˈlinay kimad. Itiya i, o salikaka ci Yohani Polanksen itiniay i no isingan a picudadan minanam, mamalo no sapaiyo a ising. Matengil ningra ko kimad no salikaka ci Polang, tangsolay misaˈosi to mahelaayto no niyah ko soˈlinay kimad. Sanay cingra milomal: “O soˈlinay kimad palipahakay takowanan, tangsolay kako a paladaˈ i picudadan to soˈlinay kimad.”

Nohatini, ci Yohani Polanksen ihkalay a mafanaˈ to cowa pisalalangi to Fangcalay Cudad ko Toloay Cecayay ko Tireng sanay a sasowalen. Cecay romiˈad, tayra cingra i kiyokay miliclic to fokosi, papitadtad cingranan o hatiniay a sapasifanaˈ iraay ko maanan a wacay. Tada mangolaway koya fokosi, mapoˈiay milaplap cingranan, sanay miceliˈ: “Cowa ko Krisciyang kiso, ci Akoma ko miocoray tisowanan, ka piliyas!”

Minokayto cingra i, patikamian ni Yohani ko fokosi, mitahidang cingranan tayra i kaˈalomanan mitadtad to Toloay Cecayay ko Tireng sanay a sasowalen. Macada nora fokosi ko tikami i, ocoran ningra ci Yohani tayra i picudadan masasoˈaraw to cecay ˈakawangay ko saaroˈan a singsi. Licayen no singsi ci Yohani, soˈlinay cingra patikami to fokosi hokira.

Pacaˈof ci Yohani: “Hayi, singsi.”

Papipatikamian no singsi ci Yohani miliˈay to fokosi, oranto i, mihaenan ni Yohani mitilid ko tikami:

“Fokosiaw, papitiliday ko singsi ako tisowanan a miliˈay. Makahiay kako mihaen a mitilid, kawra isaˈayawho kiso a mihayda to mararaway ko sapasifanaˈ iso a kimad wangaˈ.”

Fahkaˈan nanay a milicay koya singsi: “Polanksen, sasoˈlin kiso mihaen a mitilid han?”

“Hayi, singsi, o mamihaen kako a mitilid.”

“O fokosi no kiyokay no kitakit cingra i, mana ngaˈay kiso mihaen paketer cingranan aki? Ano padadotoc kiso mihaen i, cowato ka ngaˈay kiso a materek i picudadan.”

“Kawra singsiaw, . . . ya pasifanaˈ kiso, ano ira ko kafokilan niyam i, ngaˈayay mihadak to salicay sa kiso kiya, cowa saw?”

“Hayi, mana eca ka ngaˈay.”

“Singsiaw, coko mahecaday konini han? Pasifanaˈ koya fokosi takowanan to Fangcalay Cudad i, mihaenan ako milicay. Ano cowa ka mapacaˈof ningra ko salicay no mako, mimaan miliˈay kako cingraanan saw?”

Telocto i, cowa ka mafalah no picudadan ci Polanksen, cowa ka patikamien ningra koya fokosi a miliˈay.

MITAPAL TO NOIKORAN

Tikolen a minengneng koya 1924 mamihecaan a demak, sanay ko sowal no Mikecolay: “Soˈlinay, malecaday ko harateng ita ci Tafitian, sanay pasowal cingra ci Yihofaan, ‘o papafelien Iso kako to ˈicel a milood.’ (ˈOlic 18:39) Itini tonini mamihecaan, macadaay ita ko taˈangayay a pipakalalok, samanen maˈaraway ko nika padama no Tapang ita itini mitosilay a demak. Polong patafangay to tireng i Tapang a tamdaw lipahakay a misawacay.”

To hererekan nonini a mamihecaan, misahalakaay ko salikaka micowat a misataˈangay to paˈeselay to laciw a misawacay. Misatapangay cangra itini i ngata no Cikaku patireng to cecay pipaˈeselan to laciw. O WORD (tatodong i, o SOWAL), hananay pangangan konini faelohay a pipaˈeselan to laciw, lalangian i, tatanonini faelohay pipaˈeselan to laciw a patenak to Sowal no Kawas. Onini a pipaˈeselan tatano 5,000 watt ko kaciˈicel a mipaˈesel, ngaˈayto mapatenak ko lihaf no Hongti Kitakit tangasa i mara:ayay a pala, tangasa i kakaˈamisan no Kanata.

Tangasato i 1925 miheca, papairaento ni Yihofa ko adihayay likat no soˈlinay kimad, padama to Mikakingkiway to Fangcalay Cudad a Tamdaw matongal ko nika cipinang to Paˈarawan saka 12 fedengan a kimad. Pakayni to faelohay a noka cipinang, iraay ko papinapina tamdaw sawad sanay midoko ci Yihofaan. Nikawrira, matongalay ko kaˈaloman no micadaay tonini faelohay a kacipinang, samanen o likat no soˈlinay kimad padamaay cangranan ihkal ko nika fanaˈ to maanan ko mafekaday itini kakarayan, onini a demak pakayni to i fafekangay no sera a finawlan no Kawas iraay ko maanan a noka laliting saw.