1922​—Tikolen Miharateng Ko Simoˈot Miheca

‘KAFAHKAˈAN NO TAMDAW A HARATENG’

Padadotocay macowat ko mitosilay a tayal, o saali no salikaka pakayni i cudad matongal matongalay. Itiya, itiniay i Prokelin Pitil a salikaka maherekayto o niyah Prokelin sa miinsac to casi, kawra o miinsacan a cudad misaaliay to sapadama no lekakawa no misasingdiay. Pinaay folad tatokian, lekakawa no misasingdiay cowa ka ngaˈay miinsac to maedengay ka adihay no cudad, macaraayto ko mitosilay a tayal. Orato mikilimay ko salikaka ci Rosofo to kantok no kosi ci Ropote Martin a salikaka, milicay cingraanan itini i Pitil wa ngaˈay o niyah sa miinsac to cudad hokira.

Mitikol miharateng ko salikaka ci Martin to mifekaday a demak itiya, sowal sa: “O kafahkaˈan no tamdaw a harateng konini, samanen tatodong i o papatireng kita to cecay faelohay piinsacan, ngaˈay misilsil to tilid, tano tingki miinsac ato mitesel o polong a kadadoedo no tayal konini.” O salikaka itiniay i Prokelin Kankete 18 a fanko miesoyay to cecay kitiraan, micakayayho to sakadademak a kikay.

Kawra cowa ko mamalaˈosi sanay ko pinengneng no roma tamdaw to kacowat nonini a demak. Iraay ko cecay kosi padamaay tamiyanan miinsac to cudad, maharek minengneng ko tawki noniya kosi to faelohay piinsacan niyam ikor sanay pasowal: “Iraay ko idahiyay sapiinsac namo a kikay sanay, kawra awaay ko mafanaˈay namo mionting a tamdaw. Ikor no enem folad, oniya kikay maedeng o mamala hadecto sanay.”

Sowal no salikaka ci Martin: “Tengilen ko sowal ningra hato matatodongay, kawra malawaay ningra ko cecay demak, padadotocay mikalacafay ko Tapang tamiyanan.” Matatodongay ko sowal no salikaka ci Martin. Caka halafin ikor, onini faelohay piinsacan to romiˈamiˈad ngaˈayayto miinsac to 2,000 cacudadan.

PAKAYNI I LACIW A MILASIL TO NGAˈAYAY LIHAF

Coko niyah aca miinsac to cudad, misatapangay misaka dademak ko finawlan ni Yihofa to cecay faelohay pakayraan milasil to ngaˈayay lihaf, pakaynian i laciw pasadak. Itini 1922 miheca saka 2 folad 26 romiˈad herek no lahok no pilipayan, o salikaka ci Rosofo itiniay i Padaka Kalefoniya Losanki KOG tingtay mihadakay to kimad, lalangian i “Anini Maˈoripayho Masacaˈolay Emang a Tamdaw wa Tahadaˈoc Caka Patay.” Onini o sakinacecay no salikaka ci Rosofo pakayni i laciw mihadak to kimad.

Maedeng 25,000 ko tamdaw mitengilay tonini a kamok, ilalomaˈ o romaroma tamdaw patikamiay miakoˈid. O cecay patikamiay a tamdaw ci Wilate Asefote, itiniay i Padaka Kalefoniya Seanna ko aroˈ ningra. Pakahemekay cingra to salikaka ci Rosofoan, kasemeranto ko kimad no salikaka ci Rosofo sanay. Somowalayho cingra: “I paro no lomaˈ niyam tatoloay ko adadaay, ano cowa ko pakayniay i laciw pasadak, soˈlinto i sakafiyaw a kilac misadak to kimad, awaay ko hapakayraan niyam a mitengil.”

Dotocto pina a lipay, adihayay ko pasadakan niyam a kamok. Sanay ko safanaˈ no Mikecolay, hererekan noya miheca, saˈosien maedeng 30 emang ko tamdaw to pakatengilay to ngaˈayay lihaf pakaynian i laciw pasadak.

Maˈaraw no Micekiway to Fangcalay Cudad ngaˈayay ko harateng no mitengilay, micadaayto sapakalalok, orato misaˈosiay itini Setatentaw patirengay to niyah a tingtay WBBR, cowa ka piraˈay to Pitil no Prokelin. Ikor no pinapina miheca i, o Micekiway to Fangcalay Cudad pakaynian tonini a tingtay milasil to ngaˈayay lihaf no Hongti Kitakit.

“ADV”

Mikecolay (no Padaka) Saka 6 Folad, 15, 1922 sanay milasil, mamisikay to taykay i Ohayo Sansuciyaw, romiˈad i saka 9 folad 5-13 romiˈad. Ikor, o Micekiway to Fangcalay Cudad masaˈopoay tayra i Sansuciyaw, tada mahemekay cangra.

O salikaka ci Rosofo itini saka cecay kimad ningra sanay somowal to mitengilay: “Pakasoˈlinay kako, papalemeden no Tapang konini a taykay, hanaca mamisatapang kami itini polong no cikiw to cecay awaayho i salakat a misawacayay tayal.” Toya taykay kasasiroma a mikimaday misaliyaliyaway pakalalok to salikaka fanekfek mirienang to mitosilay a tayal.

Saka 9 folad 8 romiˈad, Pilimaan, maedeng 8,000 tamdaw micomoday i pitaykayan, fanekfekay cangra halamham to salikaka ci Rosofoan mihadak to cecay kimad, makalimay cingranan mitadtad to miinsacan i sapitahidang a “ADV” o manan ko tatodong. Maroˈto mapolong ikor, o roma tamdaw maedeng mahapinangay i fafekang no pikimadan macaˈitay ko maloloday a kanpang. Salikaka ci Yase Kelawse nai Padaka Ekelahema Taesa tayni mirienang to taykay, itiya pitaykayan awaay ko laepa, sapisongilaˈaw cingra mitengil to kamok, halafinay ngaˈ mahelaay ko cecay ngaˈayay kamaroˈan.

Milasilay ko tatiyakan no taykay, itini pikimadan a tatokian no salikaka ci Rosofo, maosoyay a tamdaw cowato ka ngaˈay micomod i pitaykayan, ho eca ka pikalisanga. Papacem 9:30, salikaka ci Rosofo satapang no kimad sakadademakay to sowal ni Yis i Matay 4:17, sanay: “Mangataayto ko kakarayan a Hongti Kitakit.” Itini pilengo to sasamaan ko tamdaw pakatengil to ngaˈayay lihaf no Hongti Kitakit i, sanay cingra: “Mifanaˈay ci Yis kairaan a tatokian ningra wa misaˈopo to nisawawaan ningra. Tora tatokian, mamisaˈopo cingra to polong madimadiay cingranan soˈlinay ko falocoˈ mihakelong cingranan a tamdaw.”

Salikaka ci Kelawse maroˈay i pitaykayan, sanay cingra mitikol miharateng: “O kahacecay a tilid no kimad cowa ka sapilawaaw kami.” Kawra fahal sa tatiih ko tireng ningra, mamiliyas to pitaykayan. Cowa ka sapiliyasaw cingra, samanen mafanaˈay cingra masadakho ikor caay to kangaˈay patikol micomod mitengil to kimad no salikaka ci Rosofo.

Pina ehon idahiay to miming cingra. Sanay cingra mamicomod pitaykayan ko niyah i, matengilay ko sano kakeleng sanay a mipaepaay a honi, palipahakay cingranan konini. Misetekay ko falocoˈ ningra milahci mitengil tonini kasemeran a kimad, soˈlin macokacok i fadahong, makahiay cingra mitanam. Itiya o kapahho ko salikaka ci Kelawse 23 ko mihecaan, mikilimay cingra to hapakayraan macokacok i fadahong, itira mafohatay ko i fafekangay a sasingaran. Mingata cingra to sasingaran i, mahapinang itira tada ngaˈayay masongilaˈ mitengil to kimad.

Mahapinangay no salikaka ci Kelawse i fadahong cowa ko cingra aca cecay, iraayho ko papina a widang ningra, o cecay i ci Folanke Yohashi. Comikayay ci Folanke miraod cingranan a milicay: “I tireng iso iraay ko mipedikan a poˈot han?”

“Iraay, iraay ko mako.”

Pasowalan ni Folanke: “Pakaynian no Kawas tisowanan pacaˈof ko satolon no mita. Maˈaraway iso konini taˈangayay maloloday a kanpang han? Onini mihifalatan a kanpang, misoˈotan tora pacek. Misongilaˈ kiso mitengil to sowal no hankang.a Ano pasowal cingra to ‘ka pilasil, pilasil’ a tatokian, mamiketon kiso toniya sepat a sasoˈot.”

Orato mitatiway to poˈot ko salikaka ci Kelawse, malacafay to tao mitala to lihaf a masadak. Kalikiay o kimad no salikaka ci Rosofo tahira i sapihererek. Cowato pakaˈemet to falocoˈ cingra, fanekfekay ko harateng taˈangayay ko ngiha pasowal: “Ka pakayni i Tapang malo madimadiay, soˈliˈlinay a misawacayay. Itini kalalood katimolo talaˈayaw, tahira kasongilaˈ a malahorac ko Papilon. Ka pilasil tonini a lihaf. Oha mamafanaˈ ko polong no hekal o Kawas ci Yihofa, o hongti no Hongti ci Yis Kristo, o tapang no Tapang. O kasapaan a romiˈad konini. Nengnengen, mikowanayto ko Hongti! O patadoay kamo cingranan pasayra i polong no hekal a milasil. Mihaenay ka pilasil, pilasil, pilasil to Hongti ato Hongti Kitakit Ningra!”

Sowal no salikaka ci Kelawse, cingra ato papina salikaka miketon to sasoˈot ikor, mafohatay to koya mihifalatay a kanpang, matiliday i fafekang “Milasil to Hongti ato Hongti Kitakit.” Orato cipinangayto ko ˈalomanay o manan ko tatodong no ADV. (O ADV mitaypiyaway to no Padaka Advertise a sowal, tatodong noniya sowal i “milasil.”)

CECAY KALIMLAAN A TAYAL

O taykay i Sansuciyaw padamaay to salikaka misamacay milasil to Hongti Kitakit, polong makahiay tamdaw mahemekay mihadak to ˈicel pakayni tonini a kalimlaan a tayal. Mikitiniay Ekelahema no Padaka cecay misakafahay sanay: “O pitosilan niyam a kilac o misarirekay a kilac, o itiraay a tamdaw sahtoay o manikaway.” Sanay cingra to cerid matengil no tamdaw ko lihaf no casi Ekim a Lalintadan, hadak sanay ko losaˈ no mata. Sanay cingra: “Ngaˈay pafeli to sahinom cangranan, tada o taˈangayay a sapalemed.”

Itini Luka 10:2 sanay ci Yis: ‘Adihay ko papanayen, nikawrira caay ka ˈaloman ko matayalay.’ O Micekiway to Fangcalay Cudad iraay ko malecaday macalohay a harateng. Tiya mamaherek koya mihecaan i, mikikakaay cangra to salakatay misetek to falocoˈ milasil to ngaˈayay lihaf no Hongti Kitakit i paro no kakarayan.