1921—Tikoren Ko Simoˈot Miheca

MIKECOLAY 1921 miheca 1 folad 1 romiˈad (Padaka) mihadakay to cecay salicay: “Toniya mihecaan, o kacalohan ita a demak o maanan?” Dotoc misaka dademakay to Isaya 61:1, 2 patalipaˈelal to miˈosiay miocoran ni Yihofa cangra milasil to ngaˈayay lihaf, sanay ko sinael: ‘Tano simal ci Yihofa pasimal takowanan, miocor takowanan milasil to ngaˈayay lihaf i misapoeneray ko falocoˈ a tamdaw . . . , mifanaˈ to sidaˈitay mihecaan ni Yihofa, ato piˈodisan no Kawas ita a romiˈad.’

TIMOLOAY COWA KA TALAW A MITOSILAY

Sapidemakaw to mitosilay a tayal ko Micekiway to Fangcalay Cudad a Tamdaw misaaliay to timolo. Wa pasayra cangra i misapoeneray ko falocoˈ a tamdaw milasil to ngaˈayay lihaf, papasayraho i tatiihay tamdaw milasil to “piˈodisan a romiˈad” no Kawas.

Salikaka ci Hoscin itiniay i Kanata, tahalifa to pisafelit i, kamayan timolo caka talaw a mitosil. 1921 miheca kacanglahan, malitemohay ningra ko cecay fokosi no kiyokay. Satapang aca pasowalan no salikaka ci Hoscin koya fokosi: “Ngaˈay kita lipahak masasowal to Fangcalay Cudad, soˈlin caka lecad ko harateng cowa ko mamaketer, ngaˈay itini i rihadayay a pakayraan milahci to sowal.” Kawra cowa ka lecad ko demak to miharatengan. Sanay ko salikaka ci Hoscin: “Pinaay a ehon ko kasasowal niyam, [pong] sanay ko fawahan miˈedefan no fokosi, marasrasayto ko dadingoan no fawahan sanay kako miharateng.”

Celiˈ sanay ko fokosi: “O cowa pihakelong to tapang a tamdaw ko kakilimen iso!” Awaay ko adeses no salikaka ci Hoscin miliyas, kawra saan ko falocoˈ ningra miharateng: “Miharateng kako o cowa pakasoˈlin to Tapang a tamdaw ko sakasasowal ako i sawni!”

Saka 2 romiˈad, mikimad konini a fokosi padotocay miˈodis to salikaka ci Hoscinan. Sanay ko sowal no salikaka ci Hoscin: “Mirikecay cingra to mihakelongay miliyas takowanan, awaayho ko malecaday takowanan milalipalaway a tamdaw tayni toniya niyaroˈ saan ko sowal, somowalayho o kakowangen mipatay kako.” Nikawrira cowa ka ciˈangi ko salikaka ci Hoscin, padadotocay timolo mitosil cingra, malifokayho ko ngaˈayay a minaroˈan. Sanay cingra: “O salipahakay a milifetan ako mitosil konini! Sowal no romaroma tamdaw ‘mafanaˈay kako o sikawdan no Kawas kiso,’ pasowalho to papafeli to dafong takowanan.”

ONO TEKEDAN ATO PARO NO LOMAˈ SAPICEKIW A LALOSIDAN

Sapadamaaw to maolahay a tamdaw macakat, o Micekiway to Fangcalay Cudad a Tamdaw itini Ekim a Lalintadana mitepangay to sapadama to miˈosiay minanam to Fangcalay Cudad a lalakaw, o cecay i “O Picekiw no Kapah to Fangcalay Cudad.” I lalomaˈ iraay ko sakalalengo no wama wina to wawa a salicay, dotoc padama to wawa itini Fangcalay Cudad makilim ko caˈof. O roma a salicay padamaay to wawa minanam to pakayniay taˈeneran a sifanaˈ no Fangcalay Cudad, tinakoen: “Komodan no Fangcalay Cudad hakowaay ko maloloday cudad?” O roma salicay padamaay to wawa malo timoloay a mitosilay, tinakoen: “O kahacecay Krisciyang o mamisaday misiˈayaw to sapalak han?”

Ekim a Lalintadan patadoayho to iraay ko sifanaˈ to Fangcalay Cudad a tamdaw misafaco to malalicayay a lalakaw, misalalangiay ko lalakaw to saka 1 lolod no Sapicekiw to Fangcalay Cudad. Oniya lalakaw maolahay ko miˈosiay, kawra Ekim a Lalintadan 1921 miheca 12 folad 21 romiˈad, milasilay cowa to papadotoc mitepang tonini lalakaw. Misamanay hani?

CECAY FAELOHAY CUDAD

*Onkak no Kawas*

Matiliday ko aasipen lalakaw a kato

Mimingay a pisiking

Mahapinangay no mikeriday a salikaka, o faelohay pacekiwan mamitoor to lalangian palidlid sa cipinang to taˈeneran a kimad no Fangcalay Cudad, orato itini 1921 miheca 11 folad mitepangay to Onkak no Kawas. Micada ko maolahay a tamdaw tonini cudad i, mirienangay to niyahan a pinanam to lalakaw, oniya lalakaw padamaay cangranan mihapinang to araaw no Kawas tatahadaˈoc maˈorip ko tamdaw. Sasamaan ko pinanam hani?

Micada ko cilomaˈay tonini cudad i, macadaay ko cecay kaemingay a kato, mitoroˈ to hakowa ko aasipen ningra a lalakaw. Roma lipay macadaho ningra ko roma a kato, i fafekang iraay ko milingatay a salicay to miasipan ningra a lalakaw i ˈayaw. Salikor mitadtaday ko kato dotoc a lipay o aasipen a lalakaw.

Padadotoc to 12 lipay, to lipalipay macadaay no pacekiwan ko parakatan no kasakopang a kato. O parakatay toniya kato i, tocerid o matoˈasay anca o cowa kangaˈay ko tireng pakalomalomaˈ mitosil a salikaka.

Fafahiyan salikaka ci Anna Ciyatena maroˈay cikalilengay a kamaroˈan

O TAYAL I KAˈAYAW

Pinsifaniya i Padaka ci Anna Ciyatena fafahiyan salikaka sanay: “Fafahiyan kaka ako ci Taye caka ngaˈay romakat, kawra ikor no mitepang to Onkak no Kawas, miceriday cingra parakat to kato i cilomaˈay, ngaˈayayto mirienang to adihayay mitosilay a tayal.” Mahererek ko pinanam i, miocoray ko kasakopang to tamdaw milisoˈ to cilomaˈay, padama cangranan padadotoc minanam to Fangcalay Cudad.

Timoloay Cowa ka Talaw a Soˈlinay Widang

Micekiway to Fangcalay Cudad a Tamdaw matomesay ko olah no salikaka, makahiay madadama. Timoloay cowa ka talaw cangra, ‘malacafay misiˈayaw to pades’ ko soˈlinay a widang, ilaenoay nalifetan ngangaˈay mitadtad tonini.—Taneng 17:17.

1921 miheca, itini Padaka Ekelahema Taesa cecay kohetingay faˈinayan miˈodisay to cecay kohecalay fafahiyan hato malepelay. Ikor itini 5 folad 31 romiˈad pitosaan, iraay ko 1,000 kohecalay tamdaw ato mimingay ˈopo kohetingay tamdaw pakidemay ko kasasongtol. Kalikiay, o kasasongtol miedefay i Kelinote a niyaroˈ no kohetingay tamdaw, telocto matalifay ko 1,400 lomaˈ ato pisasingdian maˈafasay ato mitodohan. Saˈosien no mirikecay 36 ko mapatayay tamdaw, kawra soˈlinen misaˈosi pinaay soˈot ko mapatayay alatek. Oniya kasasongtol ikor panganganan to mapapatayay ko ˈaˈirangan no Taesa.

Ci Licate Sie itiniay i Kelinote a Micekiway to Fangcalay Cudad a Kohetingay Tamdaw. Sanay cingra milomal to demak itiya: “Toya kasasongtolan a dadaya malecad kami to nanaman mirienang to saˈopo. Ikor no mahererek, matengilay niyam ko honi no kowang i niyaroˈ, tahiraay i lafii ko honi no kowang.” Tahini to 6 folad 1 romiˈad pitoloan papacem, matongalay ko katatiih no demak. Sanay ko salikaka ci Sie: “Iraay ko roma tamdaw pasowalay takowanan kalikien tayra i lomaˈ no mirikecay, ano eca i o mamapatay.” Orato i, miˈorongay cingra to fafahi ato 5 wawa milaliw tayra i kasaˈopoan no Taesa, itira masaˈopoayto ko 3,000 kohetingay a tamdaw, miocorayho ko mirikecay to sofitay mihimaw ato midipot cangranan.

Itiya, cecay kohecalay salikaka ci Yase Kelaws midemakay to timoloay a pisaˈosi. Sanay cingra: “Matengilay ako ˈalomanay mariˈangay a tamdaw patelas sanay mipatay miˈafas i Kelinote, misaˈosiay minengneng to samaanay ko pakayraan no ngaˈayay widang salikaka ci Sie.”

Salikaka ci Ase Kelaws tano Onkak no Kawas pasifanaˈ to 14 a wawa minanam to Fangcalay Cudad

Ci Yase tahira i lomaˈ no salikaka ci Siean i, maˈaraway ko cecay kohecalay tamdaw mitatiway to kowang. Onini a fiyaw nao ngaˈayay widang no salikaka ci Sie, harateng ningra o mamiˈafas ci Yase sanay, celiˈ sanay pasowal: “Nimaan kiso tayni aki?.”

Sanay ci Yase: “O caˈof ako ano cowa ko kaolahan ningra, o papatayen ningra kako. Pasowalan ako cingra o widang no salikaka ci Sie kako, hanaca kinapinaay tayni i lomaˈ ningra.” Itini pidipot ni Yase ato ninian a fiyaw, o lomaˈ no salikaka ci Sie cowa ka maˈafas no mariˈangay tamdaw.

Ikor maˈaraway ni Yase itiniay i taˈangayay kasaˈopoan ko paro no lomaˈ no salikaka ci Sie, iraay ko pasowalay cingranan, o kohetingay a tamdaw ira ko mitilidan no ˈaˈideman a limoˈot ngaˈ ngaˈay miliyas itira. Sanay ci Yase: “Pasangaray ngaˈ maˈaraway ako ko ˈaˈideman, pasowalan ako cingra, wa ˈorongen ako ko paro no lomaˈ nangra miliyas toniya kasaˈopoan. Milicayay cingra takowanan: ‘Dadipoten iso koniya paro no lomaˈ, misongilaˈ midimokos cangranan han?’ Tangsolay kako pasowal to mamihaen ko demak ako.”

Maala ni Yase ko lalakaw tangsolay tayra i kasaˈopoan, maˈaraw no sofitay konini lalakaw macekiday pasowal: “Wata, o ˈaˈideman ko mitiliday! Mafanaˈay kiso han? O saka cecay kiso anini mikitini a miˈorong to tamdaw.” Kalikiay, mahela ni Yase ko paro no lomaˈ no salikaka ci Sie, coeco sanay cangra mapolong i tosiya ni Yase, dotoc minokayayto cangra.

Cowa pisikol ci Yase to katalawan no niyah midipot to paro no lomaˈ no salikaka ci Sie, o timolo ato olah no salikaka ningra mitemeray to falocoˈ no romaroma tamdaw. Sanay ci Yase: “O fiyaw no salikaka ci Sie mikikakaay to ˈayaway a mikangodo to Micekiway to Fangcalay Cudad a Tamdaw. Maˈaraw no ˈalomanay tamdaw masadafdafay ko finawlan no Kawas, awaay ko masakakinihay no ˈaˈirangan, misatapangay ciharateng to saka cipinangaw to ngaˈayay lihaf no Hongti Kitakit.”

a Ekim a Lalintadan i 1937 miheca mafalicay ko ngangan o Mihinomay a Lihaf, ikor i 1946 miheca mafalicay ko ngangan o Katalipaˈelal!