Tooren ko Sapalimoˈot ni Yihofa Palemeday Takowanan

ISAKA 1923 miheca, itiniay Himoos i Yokosiya no Ingkelan a hofocen kako. Iraay ko cecay kaka ci Papu ko ngangan. O wama ako, maacekay to makaniway pihakelongan, maedeng 9 ko mihecaan ako i, maalaay no wama ko mifarikowatay to mararaway pihakelongan a cudad, masemeray cingra to lalomaˈay a lalakaw nora cudad. Ikor no pina a miheca, ci Papu Atkinsen tayraay i lomaˈ niyam mitosil, tano cikongki a pasadak to kimad no salikaka ci Rosofo. Mahapinangay niyam oniya milokoingay toni kimad malecaday toya mitepangay toya cudad a kasacefang. Pohayan no wama wina ko salikaka ci Atkinsen malafi to romiˈamiˈad, pacaˈof to salicay niyam to Fangcalay Cudad. Miataan ningra kami mirienang to saˈopo. Kalikiay kami micada to kimad, ikor iraayto ko mimingay a kasakopang i Himoos. Irato ko mitaliyokay sikawdan (kasakilac kantok) pakafotiˈan niyam i lomaˈ, mitahidangan ko ingataay a misakafahay tayra lomaˈ komaen. Micawmaˈ cangranan tada taˈangayay ko pifiyor takowanan.

ˈAyaw noni iraay ko singdi niyam, kawra, hananay no wama ko kaka pasowal: “Ano miharatengay kiso mala misakafahay i, sawaden ita ko singdi ita wangaˈ.” Mihaiyay ko kaka, tiya 21 ko mihecaan miliyasay to lomaˈ a mala misakafahay. Ikor to tosa miheca, tiya 16 ko mihecaan ako, misatapangay kako misakafah. Ano mitosil kako i, tano cikongki ato misawacayay a kato a mitosil, tohatiniay cecayay kako mitosil, dengan saka enem ato pilipayan ngaˈ cicafayay kako. Nikawrira, pafelian ni Yihofa kako to macakatay a mipacekiwan, o paro no lomaˈ ningra, ˈalomanay micadaay to kimad. To cila a miheca, mapanilnilay kako malo mikiriwiˈay a misakafahay, mala cafay aci Miko. Patayraan kami i awaay ko mitosilay a kilac.

Saka Tosa Lalood no Hekal, miocoray ko mikowanay to fafahiyan midama to lalood. O harateng niyam, o mikiriwiˈay misakafahay kami, o ngangaˈay matira o misasingsiay no kalodoyongan a masawad a malo sofitay. ˈArawhan, mipalitan kako to 31 a romiˈad. Ya 19 ko mihecaan ako i, pakayniay i tingalaway falocoˈ ako a caka kahi a midama to lalood, saka, kina tosaay a mapatayra kako i hoing, kawra malakisaway kora demak. Naitini toni malifetay ako, ci Yihofa mitatoyay to kamay ako, pakayni i fangcalay saocor a padama takowanan, paˈicel takowanan.​—Isaya 41:10, 13.

FAELOHAY CAFAY

Masasoˈaraway kako aci Aser Masiw, isaka 1946 miheca. Pakayniay i tingalaway falocoˈ a caka kahi cingra malo sofitay, teloc mapalitay to 3 folad. Malaheci ko palit ningra i, tayraay i Himoos, mala mikiriwiˈay misakafahay ato safa ningra ci Tanis. Nano kaemangho pasifanaˈanto no wama to kimad, pakarongayho micadaayto to inoˈ. Maocoray ci Tanis tayra i Aielan, cecayayto ci Aser i Himoos. Maolahay ko wama wina ako ci Aseran, malalokay a kapah cingra, pohay hananay cingra malinah tayra i lomaˈ. Ano minokay kako milisoˈ to wama wina i, mifanaway to kaysing kako aci Aser. Ikor, malo patikamiay kami. Isaka 1948 miheca, miliyaway haca mapalit ci Aser to 3 folad. Ikor, isaka 1949 miheca saka 1 folad mararamoday kami, maolahay kami padadotoc a misakafah. Misongilaˈan niyam misaˈosi ko payci, ano pahanhanan patadoay kami militod to losay mietan to sakaˈorip, pakayni i sapadama ni Yihofa, ngaˈayay padadotoc kami misakafah.

Ikor no cecay miheca mapanilnilay kami tayra i Kaˈamis a Aielan, saˈayaw tayniay i Arema, ikor tayra i Niwly, oni tosa kilac sahetoay o Tingsokiw. O itiraay tamdaw pakidemay ko pisakakinih to cowa ka lecad a pihakelongan. Mankora, misanaˈonaˈonay ko demak niyam, ano caciyaw to tamdaw misinanotay kami. Itiniay i lomaˈ no cecay mararamoday ko saˈopo niyam, 16 kongli ko raay nora lomaˈ, fafaloay ko mirienangay tamdaw. Nolatekay papilafinay tamiyanan, itiniay i paenan mafotiˈ kami, to cila papacem kadofahay ko sakaranam niyam. Nohatini matongalay ko Misawacayay Tamdaw ni Yihofa itira, mahemekay ko falocoˈ niyam.

“MAKALIMAY KAMI TAYRA!”

Itiya o kaka ako ato fafahi ningra ci Loty, itiraayto i Kaˈamis a Aielan mala mikiriwiˈay a misakafahay. Isaka 1952 miheca, kami sasepat mirienangay to kasapala taykay i Pelefast. Iraay ko cecay mangangahay faˈinayan salikaka, micada tamiyanan atoya sikawdan no fenpo no Ingkelan ci Polays Hiws. To cecay dadaya, malalengoay kami to faelohay a kihepicay cudad Lalan no Kawas O Olah (no Padaka), o saki Aielan tamdaw ko sapitilid toni cudad. O sowal no salikaka ci Hiws, ano milisoˈ to Tingsokiw tamdaw tada pasangaray sanay, miowingan no simpo ko finawlan papilaplap to salikaka, mikariˈang a misetiˈ cangranan. O sowal no salikaka ci Hiws: “Misaaliay kami to papina mararamoday mirienang to mikiriwiˈay a mitosilay demak, parakat to paliding tayra i polong no kitakit a palilam to kihepicay cudad.”a Tangsolay pacaˈof kami: “Makalimay kami tayra!” Oya nisowalan ako isaˈayaw a sowal koni.

Ano itira kami i Tuplin i, itiniay i lomaˈ no fafahiyan salikaka ci Ma Rutlan milafin, pinaayto miheca midoko to Kawas a madimadiay Krisciyang cingra. Cowa ka halafin kami itira, ikor paliwalan niyam ko maamaan, mikalic kami maemin to otofay ato mikafitan i tatihi a paliding ni Papu, mikilim to matatodongay a tosiya. Mahelaay niyam ko telang a paliding, papipatayraan koya paliwalay to paliding i tamiyanan, samanen awaay ko mafanaˈay niyam parakat to tosiya. Toya dadaya, itiniay i takar ci Aser, mihatatanam parakat to paliding. To cila papacem, tiya sapipasadakaw ci Aser toya tosiya nai soko i, ci Mileter Wilet (ikor cifaˈinayay ci Yohani Paeran) ya milakowitay to riyar a misakafahay tayraay itiya. Mafanaˈay cingra miparakat to tosiya! Mihatatanam kami to kina pina i lalan ikor, malingadayto kami!

Dotoc, mikilimay kami to pilafinan. Iraay ko pasowalay, aka pilafin i mitarohan no paliding a lomaˈ sanay, samanen micoliay tamiyanan a tamdaw, alatek mitodoh tora paliding. Kawra, awaay ko mahelaay a pilafinan, toya dadaya, itira sanay kami sasepat mafotiˈ i paliding. To cila, iraay mahela ko tosaay ko kafotiˈan a mitarohan no paliding a lomaˈ. Malo pikilomaˈanto niyam kora. Kafahekaan niyam i, ano tangasa kami i kilac, iraayto ko ngaˈayay a maomahay tamdaw, makahiyay papipateli tamiyan tora mitarohan no paliding a lomaˈ i sera nangra, hato ngangaˈayto kami mitaliyok to 16 tahira 24 kongli a kakilacan a mitosil. Ano tayrato i faelohay kilac kami i, mitikoran niyam koya malitemohay i saˈayaway kilac a tamdaw.

Micorokan niyam ko kahacecay a lomaˈ i kakatimolan no Aielan. Mataˈlifay ko 2 ˈofad a cudad to mapalilamay, o ngangan no maolahay to Fangcalay Cudad a tamdaw, patayraan i katayalan no fenpo no Ingkelan. Anini, pinaayto patek ko Misawacayay Tamdaw ni Yihofa itira, palemedan ni Yihofa ko mitosilay demak niyam!

PATIKOR I INGKELAN, TAYRA I SUKOLAN

Ikor mapanilnilay kami tayra i kakatimolan no Lonton. Caho ka halafin, macadaay ni Aser ko tingwa no fenpo no Ingkelan, papisatapang to kasakilac kantok a demak! Cecay lipay a pahatatanam cingranan, malingadto kami tayra i Sukolan. Awaay ko romiˈad ni Aser a misaday to kimad, kawra, makalimay cingra matayal ci Yihofaan, micada tora ˈinorong, tada mikowaday koni i takowanan. Maolahay kami toni demak. Milisoˈan niyam koya tayniay i cowaho ka manilnil a kakilacan a salikaka to pina a miheca, tada kalipahakan niyam mikapot ko itiraay salikaka.

Isaka 1962 miheca, matahidangay ci Aser tayra i Kiliyat Picudadan micada to 10 folad a pipahatatanam, tada tahasiˈayaway kami to sasaˈosien. Malalengoto kami, micadaay ci Aser toni satahidang, soˈliˈlin oha mamalaliyas kami to cecay liyad. Kawra pakayni ci Aseran, tada o ngaˈayay a sapahatatanam. Tayrato i Kiliyat ci Aser i, patikoray kako tayra i Himoos mala mikiriwiˈay a misakafahay. Ikor no cecay miheca minokayto ci Aser, misatapangayto kami to milisoˈay a demak, mahawpay ko Sukolan, kakaˈamisan no Ingkelan ato Kaˈamis a Aielan.

FAELOHAY SAPANILNIL ITINI I AIELAN

Isaka 1964 miheca, macadaay ni Aser ko faelohay tayal, tayni i fenpo no Aielan mala sikawdan no fenpo. Maolahayay kami to milisoˈay to kasakopang a demak, mansa saˈayaw tahacada toni lihaf i, calemcemay to sasamaan misiˈayaw tora noka falic. Nikawrira, tikoren a miharateng kora demak, tada mahemekay kako to nika itira i Pitil a matayal. Pakasoˈlinay kako ano makahi a midemak, ano, o cowato ko kaolahan a tayal, o papalemeden ni Yihofa kita. O tayal ako to romiˈamiˈad, misolimetay to katayalan, mitafoay to cudad, mirahekaday ato miasikay. Nolatekay, milisoˈay kami to kasapala a demak, hato iraay ko toki mafanaˈ to icowacowaay a salikaka. Maˈaraw ko nika cakat noˈadingoan no micekiway tamdaw, hanaca mapatireng ko tangongolay noka lawidang ato salikaka, tada o fangcalay a demak!

O NOKA COWAT NOˈADINGOAN I AIELAN

Isaka 1965 miheca, saka cecay a koksay taykay i Aielan, itiniay i Tuplin a misikay.b Soˈlin tahasiˈayaway to adihayay a saconged, malaˈosiay kora taykay. Komodan 3,948 ko mirienangay tora taykay, 65 ko micadaay to inoˈ. O naitiniay i roma kitakit a salikaka 3,500 ko kaˈaloman, mipalafinan no salikaka i lomaˈ nangra, ikor macadaay no palafinay a salikaka ko miakoˈiday a tikami nangra. Mahemekay cangra to nika fangcal no waywayan no salikaka. Oniniya taykay tada ngaˈayay ko nika pisawacay.

Mikitini isaka 1966 miheca, kakaˈamisan Aielan ato kakatimolan Aielan pakakadepan, o Tuplin a fenpo ko mikowanay, tada taˈangayay ko kasasiroma to maforiforay a mirikecay ato pidoyongan no Aielan. Maˈaraw ko ˈalomanay nano Tingsokiw ato Kristokiyo a tamdaw, mala Misawacayay Tamdaw ni Yihofa, makakapotto cangra matayal saki Kawas, tada kalipahakan a demak!

MAFALICAY KO DEMAK

Isaka 2011 miheca, taˈangayay ko nika falic no demak. Tona makakadepay ko fenpo no Ingkelan ato Aielan, tayraay kami i Pitil no Lonton. Itiyaay tatiih ko tireng ni Aser, ciadadaay cingra to Pakinson adada. Itiniay i 2015 miheca, saka 5 folad 20 romiˈad mapatay ci Aser, 66 miheca mararamod kami.

Toni pina miheca, marariday kako masomad matoled ko falocoˈ. Tada maˈiwilay kako toya kalacafayan niyam aci Aser! Kawra noka patay no raramod paˈicelay to kalalaˈed aci Yihofa. Macadaay ako ko adihayay tikami nai Aielan, Ingkelan ato Padaka, mafanaˈ to ˈalomanay ko maolahay ci Aseran masayaray ko falocoˈ. O roma i, o safa ni Aser ci Tanis ato fafahi ningra ci Mawis marariday mipakalalok takowanan, o fafahiyan wawa no kaka ci Rucu aci Ciwty, mipadangay takowanan.

O sinael i Isaya 30:18 taˈangayay ko pikowad takowanan, sanay kora sinael: “Nikawrira, mangalay [ci Yihofa] a siniˈada i tamowanan, mangalay Cingra a adayay i tamowanan, nawhani o moecelay ko demak [ni Yihofa]. Saka, o mitiˈeray [Cingranan] i, o malemeday.” Mafanaˈ to mihadidiay ci Yihofa a mitala to sapisaysayaw to kihecod a pasangar no tamdamdaw, hanaca o papafeli Cingra to adihayay ciepocay a tayal i faelohay a hekal, tada masayaray ko falocoˈ ako.

Tikoren a minengneng ko nokaˈorip ako, mahapinangay ako to samaanay palemed ci Yihofa to mitosilay demak i Aielan! Mahemekay kako ira ko fadangalan ako pasadak to ˈicel itini toniya demak. Awaay ko sasa, tooren ko sapalimoˈot ni Yihofa, pairaay to sakalemed no mita.