O Wama Wina—Padamaen ko Wawa Paˈicel to Pakasoˈlinay Falocoˈ

1-2. Ano cisasaay ko wawa to pihakelongan a milicay i, sasamaan ko pinengneng no wama wina toniya demak hani?

MAFANAˈAY kita palahad ato pakafanaˈ to wawa cowa ko madoloay a demak. Ano iraay ko wawa iso i, wa misaˈicel kiso padama cingranan palahad to pakasoˈlinay falocoˈ to Kawas. (Limoˈot 6:6, 7) Kawra palidlid sanay lomahad ko wawa i, alatek wa milicay cingra to pakayniay i pihakelongan a demak, tinakoen: Hano caka olah ci Yihofa kitanan midemak to romaroma a demak hani?

² Ano tahatengil kiso to mahaenay a salicay no wawa i, wa calemcem kiso alatek, hato mafokilayho ko wawa, maˈesalayto ko pakasoˈlinay falocoˈ ningra to Kawas. Kawra, soˈlinay haw i, sapipatirengaw to tanoktokay pakasoˈlinay falocoˈ no wawa i, o matatodongay ko hatiniay a salicay no wawa. (1 Korinto 13:11) Mihaen i, aka pakidemen a cariraw. Ano cisasaay ko wawa a milicay i, o matatodongay a tatokian pahatatanam cingranan sasamaan a cipinang to demak a miharateng.

3. Oniya lalakaw mamilengo to manan hani?

³ Oniya lalakaw wa milengo, sasamaan ko wama wina padama to wawa (1) patirengen ko pakasoˈlinay falocoˈ no niyah, (2) nai falocoˈen a maolah to palinian no Fangcalay Cudad, (3) minanamho sasamaan a malalengo i tao to pihakelongan. Ano malalengo toniya lalakaw, wa cipinang to o pilicay no wawa a demak tada o ciepocay. O roma i, mamilengoho kita ano malacafay ko wama wina to wawa i, ngaˈayay midemak to maanan hongaˈ masasowal to pihakelongan no niyah.

PADAMA TO WAWA PATIRENG TO PAKASOˈLINAY FALOCOˈ NO NIYAH

4. Alatek mamilicay ko wawa to masamaanay a salicay? Misamaanay hani?

⁴ Cipinangay ko wama wina, cowa ka ngaˈay rocoken ko pakasoˈlinay falocoˈ. Cowa ka hofoc han kiso pakasoˈlinayto ci Yihofaan, mahecadayto ko wawa iso. Kawra palidlid sa cangra lomahad, alatek ira ko kacarirawan nangra a salicay, tinakoen: “Sasamaan kako mafanaˈ to soˈlinayto iraay ko Kawas han? Wa ngaˈay kako pakasoˈlin to Fangcalay Cudad han?” Ira ko hatiniay a sasa cowa ko tatiihay a demak, samanen pakalalokay ko Fangcalay Cudad kitanan, sakadademaken ko ‘miharatengay a inaneng,’ ‘hapinangen a mikinsa ko maamaan a demak’ sanay. (Loma 12:1 ato roma pihongyak; 1 Tisalonika 5:21) Mihaen i, sasamaan kiso padama to wawa patireng to pakasoˈlinay falocoˈ no niyah hani?

5. O wama wina sasamaanen padama ko wawa patongal to pakasoˈlinay falocoˈ to Fangcalay Cudad hani? (Loma 12:2)

⁵ Pakalaloken ko wawa mikilim to hawacay, ho cipinang to o soˈlinay ko Fangcalay Cudad. (ˈOsien ko Loma 12:2.) Ano milicay ko wawa i, ngaˈayay pakafanaˈen cingra to sasamaanen tano sapikilim a lalosidan a mikilim to sapacaˈof, tinakoen tano Pirorodan to Mitepangan Cudad no Mikecolay ato Pirorodan to Mitepangan Cudad no Misawacayay Tamdaw ni Yihofa. Itini i Pirorodan to Mitepangan Cudad, salakat papikilimen ko wawa to “Fangcalay Cudad,” ikor mikilim to “O Mipatemeran no Kawas a Kimad.” Mihaen i, wa maˈaraw ningra ko adihayay a wacay, paihkal to cowa kono tamdaw a harateng ko Fangcalay Cudad, ao ‘Kimad no Kawas.’ (1 Tisalonika 2:13) Nengnengen hena ko cecay soˈlinay a demak. Ngaˈay kilimen no wawa ko pakayniay i lalitengan a niyaroˈ o Ninifi a lalakaw. Iti:yaho, o sowal no roma mikakingkiway to Fangcalay Cudad a tamdaw, awaay a materek koniya niyaroˈ sanay. Kawra, itini i saka 19 hahekalan, mikakingkiway to lalitengan a tamdaw mikadkaday cangra toniya matelangay a niyaroˈ, misawacayayto o soˈlinay ko maˈoningay no Fangcalay Cudad. (Cifaniya 2:13-15) O roma i, ngaˈayay ˈosien no wawa ko Mikecolay 2021 miheca 11 folad “Mafanaˈay Kiso Han?” sanay a lalakaw, cipinang to oya sapalaˈafoaw to Ninifi a niyaroˈ samaanay malaˈosi ko sapairasol no Fangcalay Cudad. Ano mikitini i mitepangan ita a lalakaw a minanam ko wawa, palalinienho ko roma hakacudad ato cifadangalan a cudad i, oha papakasoˈlin cingra to Fangcalay Cudad.

6. Sasamaanen no wama wina mikidat ko miharatengay a inaneng no wawa hani? Patinakoen hena. (Nengnengen ko coka.)

⁶ Mikidat to miharatengay a inaneng no wawa. Ngaˈay itini i cowa ka hecad a pakayraan malacafay to wama wina ko wawa, malalengo to Fangcalay Cudad ato Kawas, padama cangranan paˈicel to pakasoˈlinay falocoˈ. Ngaˈayay keriden ko wawa minengneng to no nai itiyaayho lalitengan dafong a kitiraan, tayra i cipinalomaay cihanaay a kitiraan, anoca tayra i fenpo no Misawacayay Tamdaw ni Yihofa a minengneng. Ano minengneng tono itiyaayho lalitengan a dafong i, wa ngaˈay padama to wawa mihapinang to cecay nolalitengan a dafong ato nolikisi a demak, milingatay to manan no maˈoningay i Fangcalay Cudad. Tinakoen, mafanaˈay ko wawa iso to ngangan no Kawas matoˈtoˈay i ˈayaw no 3,000 miheca cecay a fakeloh han? Oniya fakeloh i o “Moap a fakeloh,” itiniay i Lofukong no Frans a pitepengan to lalitengan a dafong a kitiraan. Ano tayra kiso i Niwyok Worwik Congpo no Misawacayay Tamdaw ni Yihofa, wa ngaˈay kiso itini i “Fangcalay Cudad ato Ngangan no Kawas” sanay a sapakaˈaraw, minengneng toniya miliyawan misangaˈ a Moap a Fakeloh. Itini toniya matiliday a fakeloh mahadakay ko Hongti no Moap ci Misa na misafelitay to hongti no Israil, mahecaday to maˈoningay i Fangcalay Cudad koni. (2 Hongti 3:4, 5) Ano maˈaraw no wawa iso ko hatiniay a wacay, ho matongal ko pakasoˈlin to maˈoningay no Fangcalay Cudad.—Nengnengen ko 2 Rayray 9:6.

7-8. (1) Mikitini makapahay a coka no masangaˈay a dafong, o manan ko mananamay ita? Patinakoen hena. (Nengnengen ko coka.) (2) Ngaˈayay licayen ita ko wawa to manan a salicay, padama cingranan mitongal to pakasoˈlinay falocoˈ to misangaˈay a Tatapangan?

⁷ Mikayat to wawa misinanot to kasapaan a masangaˈay a maamaan. Ano malacafay kiso to wawa paloma to kilang ato hanahana i, anca romakat itini i papotal, wa ngaˈay pakalalok to wawa misinanot to masangaˈay a dafong a coka. Mihaen to demak wa padama to wawa mihapinang toniya masangaˈay a dafong a coka, iraay ko matomesay ko taneng a misafacoay. Tinakoen, mikaliyonay a pakayraan. Halafinay ko kakakosiya mikakingkiw toniya mikaliyonay a pakayraan. O cecay ci Nikela Fimili a mikakingkiway sanay, ano saˈosien iso ko masangaˈay a dafong no mikaliyonay a coka i, wa mahapinang to madadoedoay koniya coka, o Fiponaci sanay panganganen koniya madadoedoay a pakayraan. O mahaenay a mikaliyonay a pakayraan maceriday maˈaraw itini i masangaˈay a dafong. Ano songilaˈen minengneng i, wa maˈaraw iso itini i cekiw, o tenok no cidal a hana, o roma a papah no pinaloma, ato kapot no foˈifoˈis iraay ko hatiniay a mikaliyonay a pakayraan.a

⁸ Itini i picudadan i, alatak o wawa iso wa mananam ningra, adihayay masangaˈay a dafong mamidofdof to roma a safalod. Tinakoen, o kahacecacecay a soeda, iraay ko masasiromaay a caˈang. Soˈlin oya cicaˈangay a pakayraan, ano icowa i maˈarawayto. Ngaˈay kayaten iso ko wawa misaharaterateng: “Oniya makapahay a coka a safalod o cima ko misaˈosiay hani?” Ano macerid ko wawa miharateng to hatiniay a demak i, oha ngangaˈay ko wawa pakasoˈlin toniya kihcod a dafong o Kawas ko misangaˈay. (Hipray 3:4) I matatodongay a tatokian, ngaˈayay licayen iso ko wawa: “Ano misangaˈan no Kawas kita, coko ihkalay mafanaˈ Cingra to misamaan ko kaˈorip ita ngaˈ ira ko lipahak han?” Ikor ngaˈayay pasowalen ko wawa, pafelianto no Kawas kita to Fangcalay Cudad ato ˈakawangay a palinian, oha sapikayataw kitanan to hasaka lipahakaw no nikaˈorip.

NASA, ESA, and the Hubble Heritage (STScl/AURA)-ESA/Hubble Collaboration

PADAMA TO WAWA MIKIFALOCOˈ MAOLAH TO PALINIAN NO FANGCALAY CUDAD

9. Ano milicay ko wawa to palinian no Fangcalay Cudad, alatek o manan ko lalangian hani?

⁹ Ano milicay ko wawa tisowanan to milingatay to palinian no Fangcalay Cudad, wa tanamen iso mikilim ko lalangian ningra. O cowa ka micada cingra to masowalay a palinian no Fangcalay Cudad han? Anca cowa ka fanaˈ cingra to sasamaan mitadtad to pihakelongan no niyah han? Ano o mananto ko lalangian i, wa ngaˈay kiso tano Layapen ko Midaˈocay ˈOrip!b a cudad padama cingranan.

10. Misamaan kiso mikidat to miharatengay a inaneng no wawa, padama cingranan misalimla to kalawidang aci Yihofaan hani?

¹⁰ Pakalalok to wawa misalimla to kalawidang aci Yihofaan. Malacafay to wawa minanam to Fangcalay Cudad i, ngaˈayay sakadademaken koya Layapen ko Midaˈocay ˈOrip! cudad a coka, sapatinako ato salicay a cipinang to harateng no wawa. (Taneng 20:5) Tinakoen, i saka 8 fedengan patinakoan ci Yihofa to ciharatengay kitanan a widang. Patalipaˈelalan Ningra kita, o araaw i midipotay kitanan, ho milifok kita to epoc. Maherekto milengo to 1 Yohani 5:3, ikor ngaˈayay licayen ko wawa: “Ano o tada ngaˈayay a widang ci Yihofa, sasamaan ko pinengneng iso to sapalimoˈot Ningra hani?” Hato madoloay koniya salicay, kawra oha ngangaˈay mahapinang no wawa ko sapatalipaˈelal no Kawas, o pakayniay i olah Ningra kitanan.—Isaya 48:17, 18.

11. Sasamaan ko demak iso padama to wawa, cipinang to misakadademak to safalod no Fangcalay Cudad tada ciepocay hani? (Taneng 2:10, 11)

¹¹ Lengoen ko misakadademak to safalod no Fangcalay Cudad a epoc. Kalacafay kiso to wawa miˈosi to Fangcalay Cudad anca pakaromiˈaday a sinael i, ngaˈayay malalengo to paro no lomaˈ misakadademak to safalod no Fangcalay Cudad macadaayto ko manan a epoc. Tinakoen, padamaen iso ko wawa cipinang to malalok matayal, makapah ko waywayan hano o ngaˈayay hani? (Hipray 13:18) Paˈicelenho iso sakadademaken ko safalod no Fangcalay Cudad samaan padama to sakatanoktok no tireng. (Taneng 14:29, 30) O mahaenay a malalengo wa padama to wawa makalim midofdof to sapalimoˈot no Fangcalay Cudad.—ˈOsien ko Taneng 2:10, 11.

12. Ci Setifo ato fafahi samaanay padama to wawa mikifalocoˈ micada to palinian no Fangcalay Cudad?

¹² Itini i Frans a Setifo ato fafahi misaˈicelay padama to moetepayho ko mihecaan a faˈinayan wawa ci Isang, cipinang to sarikec ni Yihofa sahtoay tano olah Ningra. Sanay cingra: “Milicayan niyam ko wawa to pina salicay, tinakoen: Misamaanay hano misaali ci Yihofa kitanan midofdof toniya safalod a midemak hani? Onini samaanay paihkal to maolahay Cingra kitanan hani? Ano caka haenen iso ko demak, wa samaanto ko teloc hani? Lengoen ko mahaenay a salicay, padamaay ci Isangan mikifalocoˈ micada to palinian ni Yihofa.” Sanayho ci Setifo: “O araaw niyam i, padama ci Isangan cipinang to taneng no Fangcalay Cudad ikakaay tono tamdaw a taneng.”

13. O wama wina sasamaan padama to wawa misakadademak to safalod no Fangcalay Cudad? Patinakoen hena.

¹³ Padamaen ko wawa misakadademak to safalod no Fangcalay Cudad. I picudadan alatek wa misaali ko singsi to wawa iso miˈosi to roma a cudad. I cudaday masowalay a tamdaw alatek mariˈangay anca maˈodangay ko waywayan, kawra o mahaenay a tamdaw o kaolahan mitooran no ˈalomanay a tamdaw. Malitemoh ko mahaenay a demak i, ngaˈayay pakalaloken iso ko wawa, misakadademak to safalod no Fangcalay Cudad, folfolen ko i cudaday a tamdaw a waywayan o ngaˈayay han? Mihaen ko demak no wawa wa pakacipinang to mitengilay to sowal ni Yihofa hano o citanengay. (Taneng 22:24, 25; 1 Korinto 15:33; Filipi 4:8) Alatek milengo i picudadan i, oha ngaˈay cingra misawacay to singsi ato cafacafay!

PAKAFANAˈEN KO WAWA MALALENGO TO TAO TO PIHAKELONGAN

14. O manan a milengoan i picudadan o karawrawan no wawa? Misamaanay hani?

¹⁴ Nolatekay, o wawa itini picudadan alatek cowa ka timolo milengo to pakasoˈlinan no niyah. Tinakoen, milengo to sinkalon i, alatek marawraway cingra. Misamaanay? Samanen alatek o singsi patodicek sa pasowal, o pinaˈorip palidlid sa ira sanay. Mihaenay, sasamaan kiso padama to wawa tanoktok ko pakasoˈlinay falocoˈ, ho ngaˈay mitadtad to pihakelongan no niyah hani?

15. O wama wina sasamaan padama to wawa patongal to pakasoˈlinay falocoˈ hani?

¹⁵ Padama to wawa paˈicel to pakasoˈlinay falocoˈ. Ngaˈayay pakafanaˈen iso ko wawa cipinang, hamaan pakayni i pakasoˈlin to iraay ko Misangaˈay a Tatapangan a cinangodoen. (2 Timoti 1:8) Soˈlinay i, ˈalomanay a kakakosiya pakasoˈlinay cowa ka fahal sa ira ko ˈorip. Mahapinangay nangra kasapaan ko ˈorip, iraayto ko cecay citanengay a misafacoay. Mihaenay i, adihayay picudadan pakafanaˈay to sinkalon, kawra oniya kakakosiya cowa pihai toniya sowal. O roma i, o wawa iso wa ngaˈay cipinang, o masamaanay a wacay pakasoˈlin ko salikaka to ˈorip nao misangaˈan. Mihaen, wa tanoktokto ko pakasoˈlinay falocoˈ no wawa to Misangaˈay a Tatapangan.c

16. O wama wina misamaan padama to wawa misongilaˈ misaday, mitadtad pasowal to tao hano pakasoˈlin ko niyah to iraay ko Misangaˈay a Tatapangan hani? (1 Pitiro 3:15) (Nengnengen ko coka.)

¹⁶ Padama to wawa misongilaˈ misaday, mitadtad pasowal to tao hano pakasoˈlin cingra to iraay ko Misangaˈay a Tatapangan. (ˈOsien ko 1 Pitiro 3:15.) Ngaˈayay kalacafayen iso ko wawa minengneng to jw.org wangcan a “Salicay no Kapah—Misangaˈan anca Sinkalon?” a madadoedoay lalakaw. Ikor, salalicayen ko wawa, o manan a lalakaw sangaˈayay padama to tamdaw mihapinang to iraay ko Misangaˈay a Tatapangan hani? Ngaˈayay kalacafayen ko wawa mihatatanam sasamaan pasowal. Fanaˈen ko wawa ano malalengo to cafay micudad toniya salicay, hamaan a malacongis. Ano ira ko tamdaw makahiay milengo toniya salicay i, tano madoloay a pakayraan mitadtad. Tinakoen, alatek saan ko cafay: “Maˈaraway aca a dafong ko pakasoˈlinay ako, na cowaho pakaˈaraw kako to Kawas, mansa cowa ka pakasoˈlin kako.” O wawa iso ngaˈayay sanay a mitadtad: “Ano itira kiso i kohkoh maˈaraw tano fakelohan a misangaˈ a tefon, oniya tefon fahal sanay ira wa saan kiso han? O tefon ano iraay ko misangaˈay, mangalef koniya dohaw han?”

17. O wama wina misamaan pakalalok to wawa paira to hatoki paladaˈ to kimad no Fangcalay Cudad? Patinakoen hena.

¹⁷ Pakalaloken ko wawa paira to hatoki paladaˈ to kimad no Fangcalay Cudad. (Loma 10:10) Mihatatanam paladaˈ to kimad no Fangcalay Cudad mahecaday to minanamay to midatokay. Satapang minanam to midatokay i, tano madoloay a radiw a mihatatanam, kawra wa palidlid sato a mafanaˈ kiso. Mahecaday toni, satapang ko wawa o madoloay a pakayraan paladaˈ to kimad no Fangcalay Cudad. Tinakoen, ngaˈayay salalicayen ko cafay micudad: “Mafanaˈay kiso han? O misangaˈan no kakakosiya tocerid mitodongay to na masangaˈayto a dafong. Panengnengen ako kiso to ngaˈayay a ika.” Kalacafayen ko wawa to cafay micudad a minengneng to Iraay ko Misangaˈay Han? madadoedoay a ika, ikor licayen cingra: “O kakakosiya mitodongay to na masangaˈayto a dafong, kasemeran no ˈalomanay, o cima ko misangaˈay toniya dafong hani? Coko aadihay ko mamasemer toniya misafacoay han?” Oniya madoloay a mitadtad alatek wa mikidat to sakafanaˈaw no cafay micudad, mitongal to sakacipinangaw.

PADADOTOC PADAMA TO WAWA PAˈICEL KO PAKASOˈLINAY FALOCOˈ

18. O wama wina misamaan padama to wawa mitongal to pakasoˈlinay falocoˈ to Kawas?

¹⁸ I lintad no mita, itini toniya hekal a tamdaw sahtoay cowa pakasoˈlin ci Yihofaan. (2 Pitiro 3:3) Mihaenay, o wama wina wa padamaen ko wawa misalimla to Kimad no Kawas ato ilalomaˈay a palinian. Malalengo to wawa to Fangcalay Cudad i, pakalaloken ko wawa minengneng to mahaenay a lalakaw. Kayaten ko wawa misinanot to kasapaan a masangaˈay, mikidat to miharatengay a inaneng ningra, padamaenho ko wawa mihapinang to sapairasol no Fangcalay Cudad sasamaan kasapaan a matatodong. Masakalimlaan i, micerid patado to wawa a mitolon, miceridho malacafay mitolon. Misaˈicelay kiso malalok padama to wawa paˈicel to pakasoˈlinay falocoˈ, wa palifonen ni Yihofa kiso!—2 Rayray 15:7.