LALENGOEN LALAKAW 51
RADIW 3 Tadiˈecen ko Kawas, O Nonoˈ, O ˈIcel
Maharatengay ni Yihofa ko Losaˈ Iso
‘Nanay paroen Iso ko losaˈ ako i tafolod Iso. Oniya kihcod coko maˈoningay i powa Iso han?’—ˈOLIC 56:8.
KALIMLAAN NO LALAKAW
Cipinangay ci Yihofa to roray no mita, wa mihinom kitanan.
1-2. Alatek i masamaanay a pakayraan ita a cilosaˈ sa hani?
TOMANGICAY cilosaˈ kita kahacecay. I kahemekan a tatokian anca i masakalimlaan no kaˈorip ita, alatek wa cilosaˈ kita a mahemek. Na ˈafofo sa kiso to mihofocan a wawa i, masasoˈaraw to halafinay cowa ka ˈaraw a widang i, anca miharateng kiso to isaˈayaway a demak, alatek wa cilosaˈ kita.
2 Kawra, maceriday kita taharoray a cilosaˈ. Alatek iraay ko pakatoleday kitanan a madokaˈen, alatek nohatini i, tahalifaay kita to adada a maroray, anca mapatay ko kaolahan ita a salawina. I mahaenay a tatokian, mahecad kita to pairasolay ci Yirimiyaan ko harateng. Na malowid no Papilon ko Yirusalim niyaroˈ i, sanay ci Yirimiya: ‘O losaˈ ako . . . sano nemnem sanay a mipowar. Cowa ka tomerep ko losaˈ ako.’—Radiw no mararomay 3:48, 49.
3. Maˈaraway ni Yihofa ko tahalifaay ita a pades i, samaanay ko harateng Ningra hani? (Isaya 63:9)
3 Ano adihayayto ko losaˈ ita a madokaˈen maroray ko falocoˈ, cipinangay ci Yihofa. Sanay ko Fangcalay Cudad, maˈaraway ni Yihofa ko tahasiˈayaway ita a roray, matengilay ko picangacang ita a miowaw. (ˈOlic 34:15) Kawra cowa aca ko karorayan ita ko maˈaraway mategnilay ni Yihofa. O cisidaˈitay a Wama ita Cingra, mansa ano pakaˈaraw Cingra to losaˈ ita i, mararoman nanay Cingra, sapipadamaaw Cingra kitanan.—ˈOsien ko Isaya 63:9.
4. Wa minengneng kita to nima a nalifetan no Fangcalay Cudad a tamdaw? Pakayni ci Yihofaan, wa mananam ita ko manan?
4 Maˈoningay ko Fangcalay Cudad, ano cilosaˈ ko madimadiay sikawdan ni Yihofa i, wa samaan ko harateng Ningra. Nengnengen ita ko nalifetan ni Hana, Tafiti aci Hicikiya. O manan ko pakacilosaˈay cangranan hani? Samaanay pacaˈof ci Yihofa padama cangranan hani? O roma sa i, ano makesem kita, matoled mararom a cilosaˈ i, wa ngaˈay mikitini i nalifetan nangra milifok to manan a sahinom?
MAKESEM A CILOSAˈ
5. O nalifetan ni Hana samaanay ko harateng ningra hani?
5 Adihayay ko masiˈayaway ni Hana a pasangar, maceriday cingra makesem a cilosaˈ. Iraayho cecay fafahi no faˈinay ni Hana, ci Pinina. Mapiliˈay ci Pinina ci Hanaan, a sapiˈafasaw to olah no faˈinay. Kaadayayan i, awaay ko wawa ni Hana, ci Pinina ˈalomanayto ko wawa. (1 Samuil 1:1, 2) Tano ninian ci Pinina a milikaf ci Hanaan. Ano ci Hana kiso i, wa samaan ko harateng hani? Sowal no Fangcalay Cudad, ‘makesemay a cilosaˈ ci Hana, cowa ka komaen’ sanay. Tada marorayay ko falocoˈ ningra.—1 Samuil 1:6, 7, 10.
6. Sapilifokaw to sahinom, samaanay ko demak ni Hana?
6 Sapilifokaw to sahinom, samaanay ko demak ni Hana? Tayraay cingra i fangcalay kopang ni Yihofa. Alatek, itiniay i papotal no fangcalay kopang a fawahan cingra, ‘mitolonay ci Yihofaan, cowa ka tomerep a tomangic.’ Hananay ningra ci Yihofa: ‘Nengnengen Iso ko roray no sikawdan, nanay haratengen Iso kako.’ (1 Samuil 1:10, 11) I satolonay ci Hana a mifanaˈ ci Yihofaan to nafalocoˈan no niyah. Maˈaraw ko kaolahan a wawa no Niyah a mararom a tomangic, tada adadaan ko falocoˈ ni Yihofa!
7. Mifanaˈan ni Hana ko nafalocoˈan ci Yihofa ikor, malifokay ko manan a sahinom?
7 I satolonay ci Hana a mihadak to nafalocoˈan ci Yihofaan, malifokay ningra ko sapakalalok no Taˈangayay Saysi ci Ili. Ikor, masamaanay ko harateng ni Hana? Sowal no Fangcalay Cudad ‘minokayayto cingra a komaen, awaayto ko makesemay i pising ningra.’ (1 Samuil 1:17, 18) Soˈlin cowaho ka falic ko pakayraan ni Hana, kawra malifokayto ningra ko rihaday no falocoˈ. Karetengay ko ˈinorong no falocoˈ ningra patorodanto ci Yihofa. Maˈaraway ni Yihofa ko roray, matengilho ko picangacang ningra. Ikor palemedan cingra, irato ko wawa ningra.—1 Samuil 1:19, 20; 2:21.
8-9. Mikitini Hipray 10:24, 25, misamaanay hano misaˈicel kita mirienang to saˈopo no Krisciyang? (Nengnengen ko coka.)
8 O manan ko mananamay ita? Nohatini tahalifaay kiso to pasangar, a makesemen a cilosaˈ han? Alatek mapatay ko salawina pakararomay tisowanan. Itini toniya tatokian, cecay kako awa ko miafaday sanay kiso. Kawra aka matawal, tayra ci Hana i fangcalay kopang, itiraay milifok to sahinom ato sapakalalok. Mahecaday, mirienang kita to saˈopo no Krisciyang, wa milifok to sahinom ato sapakalalok. Soˈlin mihaen cowa ko madoloay, kawra wa mihaen ita ko demak. (ˈOsien ko Hipray 10:24, 25.) I kasaˈopoan, matengil ita ko mihinomay to falocoˈ a sinael, oniya lalakaw padamaay kitanan padadotoc a tawlik, cato ka samacay sa ko matoleday no falocoˈ a demak. Soˈlin cowa ka tangsol sa a mafalic ko pakayraan, kawra wa irato ko rihaday dipayal no falocoˈ ita.
9 I pisaˈopoan, malifok ita ko sahinom ato sapakalalok no salikaka, ciharateng cangra ato olah wa padama kitanan a tawlik. (1 Tisalonika 5:11, 14) O cecay mikiriwiˈay misakafahay faˈinayan salikaka, mapatay ko fafahi ningra i, tada mararomay ko falocoˈ, sanay cingra: “Miharatengayho kako to fafahi ako, nolatekay tangic sanay kako cowa ka tomerep, kawra mirienang to saˈopo pakalalokay takowanan. O sapacaˈof no salikaka, ato sowal nangra mihinomay takowanan. ˈAyaw no saˈopo ano samaanto ko cariraw rarom no falocoˈ, kawra tayra i kasaˈopoan i, sangaˈay sanayto kako.” Hayi, mirienang kita to saˈopo, wa ngaˈay milifok to pakaynian ni Yihofa i salikaka a padama kitanan.
Wa ngaˈay kita mikitini i salikaka milifok to sahinom (Nengnengen ko saka 8-9 fatac)
10. Ano makefeng i mararomay pakayraan i, wa ngaˈay samaan mitodong ci Hanaan?
10 Macada ni Hana ko sahinom a roma pakayraan i, pasayra ci Yihofaan a mihadak to nafalocoˈan. Mahecaday, wa ngaˈay kiso ‘patorod to kihcod a cariraw to Kawas,’ pakasoˈlinho to papacaˈof Cingra. (1 Pitiro 5:7) O cecay fafahiyan salikaka na mapatay no tohoy ko faˈinay ningra, sanay cingra mitikol a miharateng: “Itiya hato mafolfolay ko falocoˈ no niyah, o mahaenay a dokaˈ cowa ko mamaadah tahadaˈoc sa kako. Kawra, ano mitolon kako i kanonoˈan a kakarayan Wama i, malifokayto ko sahinom ato sapakalalok. Nolatekay cowato ka fanaˈ kako sasamaan pasowal to nafalocoˈan, kawra cipinangay Cingra. Ano cato ka tomeseng kako i, wa micangacang a mitolon kako Cingranan padama takowanan rihaday ko falocoˈ, ikor dipayalayto ko falocoˈ, ngaˈayayto ko lingad no demak toya romiˈad.” Ano tangic sa kiso micangacang ci Yihofaan, wa matemer mararom ko falocoˈ Ningra, cipinangay Cingra to kihcod a roray iso. Soˈlin kamayan ira ko pasangar, wa hinomen ni Yihofa tisowanan, ho malifok iso ko rihaday no falocoˈ. (ˈOlic 94:19; Filipi 4:6, 7) I pasangaray a pakayraan kiso padadotoc mitiˈer Cingranan, wa palifonen Ningra kiso.—Hipray 11:6.
MATOLEDAY A LOSAˈ
11. Madokaˈ no tao ci Tafiti i, samaanay ko harateng ningra hani?
11 I hakelong no ˈorip ni Tafiti a nalifetan, pakararom cingranan. Kaˈintehan no tao cingra, hanaca misafelitan no pakasoˈlinan ningra a tamdaw. (1 Samuil 19:10, 11; 2 Samuil 15:10-14, 30) Na ‘macariraway’ no tao sanay ci Tafiti, samaanay ko harateng ningra hani? Sanay cingra: ‘Cedaˈahay kako a maroray, salafii sanay a tomangic, sano ˈalo sanay ko losaˈ, cepaˈ sanayto ko takal.’ (ˈOlic 6:6, 7) Pakayniay madokaˈ no tao ci Tafiti, makesem matoled ko falocoˈ. Maharateng koniya demak i, tangic sanay cowa ka tomerep ko losaˈ ningra.
12. Mikitini ˈOlic 56:8, o manan ko pakasoˈlinan ni Tafiti hani?
12 Itini i pasangaray a noka ˈorip ni Tafiti, kamayan pakasoˈlin to maolahay ci Yihofa cingranan. Sanay cingra: ‘Matengilay ni Yihofa ko tangic no mako.’ (ˈOlic 6:8) Kinacecayay, masowalay ni Tafiti i ˈOlic 56:8 (ˈosien.) ko mitemeray to falocoˈ a sowal, oniya sowal mahapinang ita, tada ciharatengay ci Yihofa kitanan. Hato miparoan ni Yihofa ko losaˈ ningra i tafolod sanay ci Tafiti, mahecad miˈoningan ko losaˈ i powa. Pakasoˈlinay ci Tafiti to ciolahay a kakarayan Wama ci Yihofa mafanaˈay to malifaay ningra, mafanaˈayho to samaanay mifiyor koniya demak ci Tafitian.
13. Ano matoleden kiso to tamdaw i, haratengen ko manan a demak? (Nengnengen ko coka.)
13 O manan ko mananamay ita? Pakayniay kiso i tamdaw a matoled anca masafelit no pakasoˈlinan iso a tamdaw a makesem han? Alatek miliyas ko hakaolahan iso a tamdaw, anca miliyasan no raramod kiso, hanaca oya kanonoˈan iso a tamdaw miliyasay ci Yihofaan. O cecay faˈinayan salikaka, maˈodangay ko fafahi ningra a miliyas cingranan. Sanay koniya faˈinayan salikaka: “Fahkaˈay kako cowa ka pakasoˈlin toniya demak. Mararomay kako a maketer, hato awaayto ko kapo ako.” Ano masafelit no tao kiso anca matoleden to tamdaw, pakasoˈlinen ci Yihofa cowa ko fafalahen Ningra kiso. Sanayho koniya faˈinayan salikaka: “Mahapinangay ako, cowa ko tatiˈeren ko tamdaw, kawra ci Yihofa o ˈOngcoy no mita, o sangaˈayay tatiˈeren ita. Ano mafekad ko manan a demakan i, wa i tatihi ita Cingra, cowa ko mamiliyas Cingra to madimadiay finawlan no Niyah.” (ˈOlic 37:28) Haratengen, edengan ci Yihofa ko samaolahay tisowanan. Soˈlin masamsam no tao kiso, awaayto ko kapo no niyah sanay kiso i, cowa ko mamaˈesal ko olah ni Yihofa tisowanan. I pinengneng Ningra, sano odoˈay a misalimla tisowanan. (Loma 8:38, 39) Aka mapawan, ano samaanto ko tao tisowanan, o olah no kakarayan Wama ci Yihofa tisowanan cowa ko mamafalic tahadaˈoc.
O sowal no ˈOlic pakasoˈlinay kita to mamiingid ci Yihofa to makesemay mararomay ko falocoˈ a tamdaw (Nengnengen ko saka 13 fatac)
14. O ˈOlic 34:18 hano mamihinom kitanan hani?
14 Ano masafelit no tao i, o sowal no ˈOlic 34:18 mamihinom kitanan. (ˈOsien.) O cecay cudad sanay ko sowal, ‘o madokaˈay ko falocoˈ’ a tatodong i, o awaay ko hatokel no kaˈorip sanay. Ano malecad ko harateng ita i, sasamaan padama ci Yihofa kitanan hani? Ano mararom ko wawa i, mitakecan no wama wina ko wawa, damsayay a mihinom cingranan. Malecaday, na masafelit no tao a mararom a makesem kita i, wa ‘ingiden’ ni Yihofa kita, o tatodong i, wa siniˈada Cingra kitanan, milayaˈ to kamay sapipadamaaw kitanan. Sapiadahaw ci Yihofa to madokaˈay matoleday a falocoˈ ita. Pafelian Ningra kita to makapahay hatokel, ho ira ko hatokel ita miemem to masiˈayaway a pasangar.—Isaya 65:17.
PAKIDEMAY KO RAROM A LOSAˈ
15. Hano tangic sanay mararom ci Hicikiya hani?
15 O Hongti no Yuta ci Hicikiya 39 ko mihecaan pakidemay ko adada. Itiya, pakaynian ni Yihofa to pairasolay ci Isaya pasowal cingranan, wa kalikito cingra mapatay. (2 Hongti 20:1) Pasangaray micada cingra to sowal ni Isaya, tangic sanay cingra a mararom. Hato awaayto ko hatokel ningra. Tada makasemay ko falocoˈ ningra, mihaenay micangacangan ningra ko sapadama ni Yihofa.—2 Hongti 20:2, 3.
16. Samaanay ci Yihofa pacaˈof to satolon ni Hicikiya?
16 Maˈaraway ni Yihofa tomangic a mitolon ci Hicikiya i, siniˈadaay a sidaˈit cingranan, pakaynian ci Isayaan a pasowal cingra: ‘Matengilayto no Mako ko satolon iso, maˈarawayto ko losaˈ iso, wa adahen Ako kiso.’ Mikiˈokay ci Yihofa maminayar to ˈorip ni Hicikiya, wa midipotho to Yirusalim, cowa ko mamalowid no Asiriya tamdaw.—2 Hongti 20:4-6.
17. Pakidem ko adada ita i, sasamaan ci Yihofa midama kitanan hani? (ˈOlic 41:3) (Nengnengen ko coka.)
17 O manan ko mananamay ita? Pakidem ko adada iso matoleday a makesem han? Ano mahaenay i, mikifalocoˈ a micangacang ci Yihofaan. Ngaˈayay cilosaˈ kiso hadaken ko kihcod nafalocoˈan no niyah, wa mihadidi ci Yihofa a mitengil. Sanay ko Fangcalay Cudad, ci Yihofa o ‘siniˈadaay to tamdaw a Wama, pafeliay to kihcod sahinom a Kawas,’ ano o mananto ko malifaay ita a sapalifet, wa mihinom Cingra kitanan. (2 Korinto 1:3, 4) Anini, soˈlin cowa ka tangsol palahdaw ci Yihofa to pasangar ita, kawra wa midama Cingra kitanan. (ˈOsien ko ˈOlic 41:3.) Pakayni i fangcalay saocor, wa pafeli ci Yihofa kitanan to ˈicel, taneng ato rihaday no falocoˈ, ho pakaemem kita tahatolas. (Taneng 18:14; Filipi 4:13) Pakayni i Fangcalay Cudad, tano makapahay a hatokel ci Yihofa a mihinom kitanan, oniya hatokel o cowato ko caciadada ko tamdamdaw no ikor.—Isaya 33:24.
Wa pacaˈofen ni Yihofa ko satolon ita, pafeli kitanan to ˈicel, taneng ato rihaday no falocoˈ (Nengnengen ko saka 17 fatac)
18. Misiˈayaw kiso to pakidemay a sapalifet i, o manan a sinael ko mihinomay tisowanan hani? (Nengnengen ko sapatongal lalakaw “Wa Misisit to Losaˈ, Mihinomay to Falocoˈ no Tamdaw a Sinael.”)
18 O sowal ni Yihofa na mihinomay ci Hicikiyaan, anini mahecaday mamihinom kitanan. Tahalifa kita to pasangar i, miˈoningan ni Yihofa ko mihinomay to falocoˈ no tamdaw a sowal i Fangcalay Cudad wa patanoktok kitanan. (Loma 15:4) I Kaetipan no Afrika fafahiyan salikaka na mafanaˈ to ciekangay adada ko niyah i maceriday a tomangic, sanay cingra: “Isaya 26:3 a sowal tada taˈangayayto ko pihinom takowanan. Soˈlin i kalo a pakayraan, cowa ko mamafanaˈ kita to sasamaan ko niyah, kawra oniya sinael pakasoˈlinay kako to papafeli ci Yihofa to rihaday no falocoˈ, ho mafanaˈ miˈimer to falocoˈ no niyah a misiˈayaw to pasangar.” Misiˈayaw kiso to pakidemay a sapalifet, hato awaayto ko hatokel no ikor sa i, o manan a sinael ko mihinomay tisowanan hani?
19. Wa ira ko masamaanay a makapahay a hanoikor hatokel no mita hani?
19 Mangataayto ko kahererekan noniya hekal, wa adihay adihay ko kakeseman kararoman a demak. Kawra o nalifetan ni Hana, Tafiti aci Hicikiyaan parihadayay kitanan, makesem mararom kita i, maˈaraway ni Yihofa, hanaca siniˈadaay Cingra. Cowa ko mamatawal Ningra ko losaˈ ita. Mansa, masiˈayaw ko pasangar i, fanaˈen ita ko kihcod a nafalocoˈan no niyah ci Yihofaan. Ceriden ita macacawmaˈ to salikaka, micada to sapakalalok nangra. Padadotoc kita mikitini i Kimad no Kawas micangacang to sahinom. Ano padadotoc kita madimadi, miemem, pakasoˈlin kita to papalifonen ni Yihofa kita. Mikiˈokan Ningra kita, ano makesem, matoled ato pakidem ko raroom a tomangic kita i, wa sisiten Ningra ko losaˈ ita. (Paˈarawan 21:4) Itiyato i, ano cilosaˈ kita, oyato a mahemekay rihadayay a losaˈ.
RADIW 4 Pakaenay Ako ci Yihofa