LALENGOEN LALAKAW 40
RADIW 30 Ci Yihofa, o Wama ato Widang Ako
Ci Yihofa ‘Miadahay to Mararomay ko Falocoˈ a Tamdaw’
‘Miadahay Cingra to mararomay ko falocoˈ a tamdaw, mitafo to madokaˈay nangra.’—ˈOLIC 147:3.
KALIMLAAN NO LALAKAW
Tada ciharatengay ci Yihofa to madokaˈay ko falocoˈ a tamdaw. Oniya lalakaw wa milengo to sasamaan Cingra miˈesal to rarom no mita, halo padama kitanan mihinom to tao.
1. Samaanay ci Yihofa minengneng to sikawdan Ningra?
MISINANOTAY ci Yihofa to malifetay no sikawdan Ningra i fafekang no sera. Mahemek kita anca mararom, mafanaˈayto Cingra. (ˈOlic 37:18) Nolatekay mararomay ko falocoˈ ita, kawra misinanotay Cingra i mahaenay a pakayraan kamayan kita misaˈicel a midoko Cingranan i, tada mahemekay ko falocoˈ Ningra! Cowa konini aca, makalimayho Cingra a midama mihinom kitanan.
2. (1) Samaanay ci Yihofa padama to mararomay ko falocoˈ a tamdaw? (2) Misamaan kita ngaˈ tahacada to sapadama Ningra hani?
2 ˈOlic 147:3 sanay, ‘mitafoan’ ni Yihofa ko mararomay ko falocoˈ a tamdaw. Oniya sinael mitadtaday to lopayˈay a midimokos ci Yihofa to makesemay a tamdaw. Makahiay ci Yihofa midimokos kitanan, kawra samaanen ko demak ita hani? Patinakoen, o cecay tada mafanaˈay a ising adihayay ko hapakayraan a miadah to madokaˈay a tamdaw, kawra oniya tamdaw mamidoedo to sakayat no ising a midemak wangaˈ. Oniya lalakaw wa milengo, samaanay ci Yihofa pakayni i Fangcalay Cudad mihinom to madokaˈay ko falocoˈ a tamdaw, ato misamaan kita midofdof to Kimad Ningra a midemak.
MAKALIMAY CI YIHOFA KITANAN PAKASOˈLIN TO O MASAKALIMLAAN KO NIYAH
3. Misamaanay hano awaay ko kapo no niyah sa ko roma tamdaw hani?
3 Maˈoripay kita itini i awaay ko olah a hekal, o nalifetan no ˈalomanay tamdaw papiharatengay cangranan to awaay ko kapo no niyah sanay. Saan ko sowal ni Haylona salikaka: “Nano kaemangho kako i, cowa ka dihko ko paro no lomaˈ. Mariˈangay ko wama ako, misetiˈayho tamiyanan, mapoˈiay to romiˈamiˈad, awaay ko kapo namo sanay.” Alatek mahecaday kiso to nalifetan ni Haylon, maceriday a malikaf, hanaca mikariˈanganho no tao kiso, telocto i, tada awaayto ko kapo no niyah sanay ko harateng. Ano mahaenay i, alatek pasangaray kiso pakasoˈlin to iraay ko soˈlinay ciharatengay tisowanan a tamdaw.
4. I ˈOlic 34:18, samaanay ko sakiˈok ni Yihofa kitanan?
4 Soˈlin madokaˈayto no tao kiso, kamayan pakasoˈlin to maolahay ci Yihofa tisowanan, misakaretengay a minengneng tisowanan. ‘Miingiday to mararomay ko falocoˈ a tamdaw’ Cingra. (ˈOsien ko ˈOlic 34:18.) Ano ‘madokaˈ ko falocoˈ’ iso i, haratengen, manengnengay ni Yihofa ko makapahay capeling iso, halo misolot tisowanan tayra i tatihi Ningra. (Yohani 6:44) Wa macerid Cingra padama tisowanan, samanen o masakalimlaan kiso sanay ko pinengneng Ningra.
5. Mikitini picada ni Yis to tamdaw, o manan ko kacipinangan ita hani?
5 Nengnengen ita ko taˈarawan ni Yis, wa cipinang to samaanay ko pinengneng ni Yihofa tisowanan. I fafekangho no sera ci Yis mitosil i, ciharatengay toya masakahmaway no tao a tamdaw, halo sidaˈitay ko falocoˈ a micada cangranan. (Matay 9:9-12) Kinacecayay, o cecay pakidemay ko adadaay a fafahiyan sakaadahaw ko niyah, mansa tefing sanay to rikoˈ ni Yis. Mafanaˈto ci Yis ikor mihinomay cingranan, masemerho to pakasoˈlinay falocoˈ ningra. (Marko 5:25-34) Malefotay ko pitodong ni Yis to makapahay capeling no Wama ningra, ho pakahapinang kita misamaanay ko pinengneng ni Yihofa kitanan. (Yohani 14:9) Mihaenay, ngaˈay pakasoˈlin kiso to misalimlaay ci Yihofa tisowanan, wa misinanotho toya makapahay capeling iso, mahawpay ko pakasoˈlinay falocoˈ iso ato olah Cingranan.
6. Ano cisasaho kiso to epoc no niyah i, samaanen iso ko demak hani?
6 Ano cisasaho kiso to epoc no niyah i, samaanen iso ko demak hani? Ngaˈayay ˈosien halo midotim to misayaray to falocoˈ a sinael, oniya sinael mamatongal ko pakasoˈlinay falocoˈ iso to misakaretengay ci Yihofa tisowanan.b (ˈOlic 94:19) Alatek pakayni cowa ka malaˈosi ko patosokan iso a matoled, anca cowa ka hecad tono tao adihay ko midemakan a makesem. Ano mahaen i, haratengen, hamaan pakidemen ko saali to niyah, cowaho ka pakidem ko pisaali ni Yihofa tisowanan. (ˈOlic 103:13, 14) Alatek tahalifaay kiso to pikariˈang a masamsam no tao. Ano mahaenay i, haratengen, cowa ko mamahaen ko mamacada iso! Hamaan pakayni to pisamsam no tao a miroroh to niyah. Sasayfangen ni Yihofa ko mariˈangay tamdaw, cowa ko masamsamay a tamdaw. (1 Pitiro 3:12) Fafahiyan salikaka ci Santela kaemangho masamsamay no tao, sanay cingra: “Maceriday kako mingitangit ci Yihofaan patatodongen ko pinengneng to niyah, oha tano Ningra a harateng ko pinengneng to niyah.”
7. Mala dademakay ni Yihofa i, o nalifetan no mita samaanay padama kitanan hani?
7 Maocoray ni Yihofa kiso padama to tao, aka a cisasa tonini. Patorodan Ningra ko mitosilay tayal tisowanan, ho malikoen kiso kalacafay Cingranan a matayal. (1 Korinto 3:9) Isaˈayaway a nalifetan alatek pairaay to siniˈadaay a falocoˈ no miso, wa mafanaˈ to harateng no tao. Mansa itini pitosilan pakafanaˈ to tamdaw i, wa taˈangay ko sapadama iso to tao. Ya masowalay isaˈayaw ci Haylon salikaka, iraay ko mahaenay malifetay, na macadaay ningra ko sapadama no tao, mansa mangalefayto ko nika fanaˈ ningra a pacoˈay to tao. Sanay cingra: “Isaˈayaw, awaayto ko kapo no niyah sanay kako. Kawra, salofan ni Yihofa kako, cowa ko matinakoay aca ako to olah, maocorayho kako a padama to tao.” O miceriday misakafahay ci Haylon nohatini, tada mahemekayto ko kaˈorip ningra.
MAKALIMAY CI YIHOFA KITANAN PAKASOˈLIN TO MISODODANTO NINGRA KITA
8. O sowal ni Yihofa i Isaya 1:18, misamaanay hano parihadayay to falocoˈ ita hani?
8 O roma sikawdan ni Yihofa haharateng sanay to ˈayaw anca ikor no mipaputisem a raraw, telocto i, makesemay ko falocoˈ. Kawra, haratengen ita, tangongolay ko olah ni Yihofa kitanan, pakayni kitanan milimasmas to sapatefoc, makalimay Cingra micada kita toniya masakalimlaan a sapatelong. Saan ci Yihofa, ano ‘masaysayayto ko kalalaˈed ita Cingranan a pasangar,’c cowato ko mamitikol to nano raraw ita. (ˈOsien ko Isaya 1:18.) Cowa ko mamatawal Ningra ko makapahay na midemakan no mita, kawra misaˈosian Ningra cowato ka piharateng to na midemakan a raraw ita, tada o ciolahay Cingra!—ˈOlic 103:9, 12; Hipray 6:10.
9. Misamaanay hano walawalen ita ko isaˈayaway a demak, misaˈicel pamotek to aniniay ato noikor?
9 Ano haharateng han iso ko isaˈayaway a raraw a miroroh ko niyah, oha mamisaˈicel a miwalawal to isaˈayaway a demak, pamotek minengneng to aniniay ato noikor. Haratengen ko taˈarawan no tarokos ci Pawlo. Makesemay cingra to na pakidemay ko hakokay to Krisciyang, kawra mafanaˈay to misododanto ni Yihofa cingra. (1 Timoti 1:12-15) Ano mahaenay i, haharateng sanay cingra to isaˈayaway a raraw han? Cowa. Misawadanto ningra ko isaˈayaway midemakan a raraw, mahecad to isaˈayaway misongilaˈay a misawad cingra tono Farisay a saaroˈan. (Filipi 3:4-8, 13-15) Fanekfekay cingra midemak to ˈinorong no Krisciyang, halo mitapal to hanoikor. Mahecad ci Pawloan, cowa ko mamafalic iso ko mafekaday a demak. Kawra, ngangaˈay metmeten iso ko toki, misaˈicel a pakahemek ci Yihofaan, midemak to kaolahan Ningra, halo saharateratengen ko mikiˈokan ni Yihofa a makapahay to hanoikor.
10. Ano na madokaˈay ita ko tao, sasamaan ko demak hani?
10 Alatek na midokaˈay kiso to tamdaw, tahaniniay a miroroh to niyah. Ano mahaenay i, samaanto ko demak hani? Saˈicelen iso a misalof ko raraw no niyah, mahawpay ko nafalocoˈan iso a miliˈay. (2 Korinto 7:11) Ngaˈayay ngitangiten iso ci Yihofa midama to na madokaˈay iso a tamdaw. Papadamaen ni Yihofa kamo padadotoc a midoko Cingranan, halo patikolenho ko sakarihaday no falocoˈ namo.
11. Mikitini i taˈarawan no pairasolay ci Yonaan, o manan ko mananamay ita? (Nengnengen ko coka.)
11 Mikitini i mararaway minanam to sapakafanaˈ, halo mahemek a micada to sapafeli ni Yihofa tisowanan a tayal. Haratengen ko nalifetan no pairasolay ci Yona. Miocoran ni Yihofa ci Yona tayra i Ninifi, kawra misafelitan ningra ko lalan a milaliw. Ikor, mirikecan ni Yihofa cingra, micadaay cingra to sapisalof, minanam to sapakafanaˈ. (Yona 1:1-4, 15-17; 2:7-10) Cowa ka sawaden ni Yihofa ci Yona, miliyaw a micorcor cingranan patayra i Ninifi. Haenan ni Yona a midofdof. Soˈlin makesemay nanay cingra caka pitengil to sowal ni Yihofa isaˈayaw, kawra, cowa ka pakayni toniya demak, eca ka picada to sacorcor ni Yihofa.—Yona 3:1-3.
O pairasolay ci Yona mahadakay nai tiyad no taˈangayay a foting ikor, miliyawan ni Yihofa miocor cingra tayra i Ninifi, milasil to lihaf ni Yihofa. (Nengnengen ko 11 fatac)
PAFELIAN NI YIHOFA TO FANGCALAY SAOCOR A MIHINOM KITANAN
12. Ano mapatay ko salawina ita anca milifetayho to kararoman a demak i, samaanen ni Yihofa pafeli to sakarihaday kita hani? (Filipi 4:6, 7)
12 Ano malahdaw ko salawina ita anca milifet to kararoman a demak, pafelien ni Yihofa ko fangcalay saocor a mihinom kitanan. Nengnengen ko milifetan ni Ron aci Karol. Kinasoˈotay ko wawa nangra, tada pakidemay ko somad nangra. Sanay cangra: “Na milifetay kami to adihayay a pasangar, kawra tada o sapasangaray koni. Kinapinaay a lafii, cowa ka ala ko fafotiˈen niyam, kawra mitolonay kami ci Yihofaan ikor, malifetay niyam ko misowalan no Filipi 4:6, 7 a rihaday.” (ˈOsien.) Ano pakidemay ko rarom iso i, ngaˈayay fanaˈen to nafalocoˈan iso ci Yihofa, ano macerid anca halafin sa ko satolon iso i, ngaˈayayto. (ˈOlic 86:3; 88:1) Padadotocen micangacang ko fangcalay saocor ni Yihofa, wa tengilen Ningra, padamaho tisowanan.—Luka 11:9-13.
13. O fangcalay saocor samaanay padama kitanan padadotoc a madimadi midoko ci Yihofaan? (Ifiso 3:16)
13 Macada iso ko pakidemay a pasangar, awaayto ko saloˈingaw a midemak han? O fangcalay saocor wa patanoktok tisowanan, padadotoc madimadi midoko ci Yihofaan. (ˈOsien ko Ifiso 3:16.) Nengnengen ko nalifetan ni Folora. Malacafay to faˈinay ningra mala mikiriwiˈay manilnil a mitosilay i, maˈodangay ko faˈinay. Ikor, malalikongayto cangra. Sanay ci Folora: “Haharateng sanay to maˈodangay a demak ningra, mihaen mipalak to raramod tada pakidemayto ko somad ako, cowa ka walawal ako koniya demak. Mingitangitan ako ci Yihofa to fangcalay saocor, ho pakahadidi kako. Isalakat, hato cowa ko ngangaˈay maadah kako. Kawra, iraay ko sapadama ni Yihofa, sakatanoktokayto kako.” Matinakoay ni Folora ko sapadama ni Yihofa, tanoktokayto ko pakasoˈlinay falocoˈ ningra. Pakasoˈlinay cingra anoikor tahasiˈayaw to masakenakenaay a sapalifet, wa damaen ni Yihofa cingra. Sanay ci Folora: “O harateng ako mahecaday to ˈOlic 119:32 a sowal: ‘Tawlikay kako midofdof to sarikec Iso, samanen mifowahan Iso ko falocoˈ ako.’”
14. Samaanen ita ko demak, ho ngaˈay papisakadademak ko fangcalay saocor i kitaanan hani?
14 Mitolon kiso micangacang ci Yihofaan to fangcalay saocor, ikor samaanenho ko pidemak hani? Talaˈayawen ko demak iso, ho ngaˈay papisakadademak ko fangcalay saocor i tisowanan. Tinakoen, mirienang to saˈopo ato mitosilay. To romiˈamiˈad miˈosi to Fangcalay Cudad, tomesen ko harateng no Kawas i ponoˈ iso. (Filipi 4:8, 9) Miˈosi to Fangcalay Cudad i, sinanoten ko maˈoningay i Fangcalay Cudad tahalifaay to sapalifet a tamdaw, halo misinanot samaanan ni Yihofa padama cangra miemem to sapalifet. Ya masowalay isaˈayaw ci Santela, tahalifaay to padadotocay a pasangar, sanay cingra: “O nalifetan ni Yosif tada mitemeray i takowanan. Cowa ka sadafdaf ko malitemohay ningra ato romaroma a sapalifet, kawra cowa ka papipalaken koniya demak to kalalaˈed ningra aci Yihofaan.”—Satapangan 39:21-23.
PAKAYNIAN NI YIHOFA TO SALIKAKA MIHINOM KITA
15. Cima ko mamihinom kitanan hani? Misamaan cangra padama kitanan? (Nengnengen ko coka.)
15 Tahalifa kita to pasangar i, ‘taˈangayay ko sahinom’ no salikaka kitanan. (Kolosay 4:11) O wacay koni to kaolahan ni Yihofa kita. Samaanen no salikaka kita midama mihinom hani? Alatek pacafay kitanan i tatihi, iraay ko siniˈadaay ko falocoˈ a mitengil to nafalocoˈan ita, malacafay mitolon, anca panengnengen nangra kita to pakalalokay a sinael.d (Loma 15:4) Nolatekay, masowalay no salikaka ko pinengneng ni Yihofa, padama kitanan patikol ko sakarihaday no falocoˈ. O roma i, alatek padama ko salikaka itini nokaˈorip ita, tinakoen pafeli to kakaenen.
O matenesay ngaˈayay tiˈeren a widang, wa pafeli to sahinom ato sadama tisowanan (Nengnengen ko saka 15 fatac)
16. Ano sapicadaaw to sapadama no tao, samaanen ko demak ita hani?
16 Ano sapicadaaw to sapadama no tao i, alatek talaˈayaway kita mikilim to sapadama. Maolahay maemin ko salikaka kitanan, mahemekayho padama kitanan. (Taneng 17:17) Kawra, alatek cowa ka fanaˈ cangra to harateng, anoca o saali no mita. (Taneng 14:10) Ngaˈayay fanaˈen ko matenesay a widang to nafalocoˈan iso, pasowalen to kacarirawan, ho mafanaˈ cangra to saali no miso. Ngaˈayay kilimen ko kananaman iso a malohemay malitengay a milengo. O roma fafahiyan salikaka, malalengo to matenesay a fafahiyan salikaka tada ciepocay sanay.
17. O masamaanay a harateng alatek misatekeday to niyah? Samaanen micoˈay ko mahaenay a harateng?
17 Aka a pisateked to niyah. Ano masomad i, sapilimekaw kiso, caka picawmaˈ to tao. Calemcemho kiso, mararaw ko pinengneng no salikaka tisowanan anca pasowal to midokaˈay a sasowalen. (Yakop 3:2) Kawra hamaan pakayni tonini a demak eca ka micawmaˈ to salikaka. Haratengen, pakaynian ni Yihofa cangranan a pakalalok kiso. Salikaka ci Kafin o malohemay malitengay, matoleday ko adada ningra, sanay cingra: “Malarinnak to widang cowa ko kaolahan ako.” Kawra, misaˈicelay ci Kafin, mirinnak to widang. Mihaen cingra to demak ikor, sangaˈay sanayto ko harateng ningra. Salikaka ci Imi sanay: “Pakayni to isaˈayaway a nalifetan, pasangaray kako pakasoˈlin to tao. Kawra misaˈicelay kako mitodong ci Yihofaan maolah to salikaka, pakasoˈlin cangranan. Mahaen ko demak ako tada mahemekay ci Yihofa, maharateng koni lipahakay ko falocoˈ ako.”
MIKITINI TO MIKIˈOKAN NI YIHOFA MILIFOK TO SAHINOM
18. O manan ko hinatalaan ita to noikor? Nohatini samaanen ita ko demak hani?
18 Tanekteken ita ko pakasoˈlinay falocoˈ a mitapal to hanoikor, pakasoˈlinen ci Yihofa wa miadah tono tireng ato nafalocoˈan a adada no mita. (Paˈarawan 21:3, 4) Itiyato i, o masomaday a demak cowato ko ‘mamatikol a maharateng.’ (Isaya 65:17) Nohatini, ‘mitafoanto’ ni Yihofa ko dokaˈ ita. Pakaynian Ningra i masakenakenaay a pakayraan a mihinom kita, nanay cadaen ita ko sapadama Ningra, aka matawal to ciharatengay Cingra kitanan, hamaan a cisasa to olah Ningra!—1 Pitiro 5:7.
RADIW 7 Ci Yihofa O ˈIcel no Mita
a Mifalican ko ngangan no tamdaw itini toni lalakaw.
b Nengnengen ko sapatongal lalakaw “Misalimlaan ni Yihofa Kiso.”
c Ano ‘sapisaysayaw to kalalaˈed ita aci Yihofaan a pasangar,’ paihkalen ita ko naifalocoˈay a pasasiyor. Itinien i satolon mihayi ko raraw no mita, cangacangen ko sasodod ni Yihofa, misalofho to waywayan no niyah. Ano pakidemay ko midemakan a raraw i, kilimenho ko sapadama no malohemay malitengay.—Yakop 5:14, 15.
d Tinakoen, i Sakayat i Kaˈorip no Krisciyang, ilalomaˈ no “Sahinom” ato “Cariraw” a lalangian a sinael.