Cowa ko Mamatoˈol Kita

1-2. (1) Misamaanay hano tahasiˈayaw to pasangar i, cowa ka awa ko papadama kitanan hani? (2) Oniya lalakaw mamilengo to manan?

TAHALIFA to pakidemay a sapalifet i, hato maroˈay i mimingay a tamina a miˈiwas, i taˈangayay ko tapelik a riyar. Kawra, cowa ko cecayay to awaay ko papadama kitanan. Cisidaˈitay a kakarayan Wama pakaˈaraw to pasangar no mita, mikiˈokay to papadama kitanan miremo to sapalifet. Mikiˈokan ni Yihofa ko madimadiay sikawdan Ningra: ‘Wa padamaen Ako kiso.’—Isaya 41:10.

² Oniya lalakaw mamilengo wa misamaan ci Yihofa (1) mikayat kitanan, (2) midimokos kitanan, (3) midipot kitanan, (4) mihinom kitanan. Mikiˈokay ci Yihofa kitanan, ano o mananto ko malifaay ita a pasangar, cowa ko mamifalah Cingra kitanan. Mihaenay i, cowa ko mamatoˈol kita.

MIKAYATAN NI YIHOFA KITA

3-4. Samaanay ci Yihofa mikayat kitanan? (ˈOlic 48:14)

³ ˈOsien ko ˈOlic 48:14. Mafanaˈay ci Yihofa, cowa ka ngaˈay kita mikayat to niyah, misaaliay to sakayat Ningra ngaˈ marenec mahemek ko kaˈorip. Anini, samaanay ci Yihofa mikayat to madimadiay midoko Cingranan a tamdaw hani? O cecay pakayraan pakaynian Ningra i Fangcalay Cudad a Kimad. (ˈOlic 119:105) Fangcalay Cudad padamaay kitanan citaneng ko saˈosi, wa padamaho kitanan palahad to makapahay capeling. Doedoen ita ko Fangcalay Cudad a midemak, nohatinito i, iraayto ko ngaˈayay a nokaˈorip, noikor tahacada to tahadaˈocay a ˈorip.a Sapakafanaˈ ni Yihofa kitanan a demak mahawpay ko: Falahen ko ˈinteh; itini kihcod a demak cowa ka misakaniw; nai falocoˈen a ciharateng a maolah to tao. (ˈOlic 37:8; Hipray 13:18; 1 Pitiro 1:22) Mihaen ko demak no mita i, wa malo ngaˈayay a wama wina, raramod ato widang.

⁴ Roma i, miˈoningan ni Yihofa itini Fangcalay Cudad ko nalifetan no ˈalomanay tamdaw, cangra ato kita iraay ko mahecaday a sapalifet ato harateng. (1 Korinto 10:13; Yakop 5:17) Maˈosi ita koniya soˈlinay a miˈoningan, sakadademaken koniya mananamay itini nokaˈorip, wa tosa ko mamalifok ita a ngaˈayay epoc. O cecay i, wa mahapinang ita cowa ko matoˈolay ko niyah, samanen malifetay no tao ko mahecaday to niyah a roray. Mitiˈeran nangra ci Yihofa, malaˈosiay miremo to pasangar. (1 Pitiro 5:9) O roma i, wa mananam ita sasamaan misiˈayaw to sapalifet no niyah.—Loma 15:4.

5. Pakaynian ni Yihofa to cimaanan a mikayat kitanan hani?

⁵ Pakaynianho ni Yihofa to midokoay Cingranan a tamdaw mikayat kita.b Tinakoen, o pilisoˈ no kasakilac kantok to kasakopang, pakalalokay kitanan. O kimad nangra paˈicelayto pakasoˈlinay falocoˈ no mita, padama kitanan makakedec. (Dmak 15:40–16:5) O malohemay malitengay i kasakopang mikifalocoˈay ciharateng to kahacecay salikaka, padama kitanan tanektek ko kalalaˈed aci Yihofa. (1 Pitiro 5:2, 3) O wama wina wa pakafanaˈ to wawa maolah ci Yihofaan, padama cangranan palahad to ngaˈayay nanaman ato miharatengay a ˈicel. (Taneng 22:6) O matenesay a fafahiyan salikaka wa malo ngaˈayay taˈarawan no kaemangay fafahiyan salikaka, pafeli cangranan to matatodongay a sapaini, damsay a pakalalok cangranan.—Titus 2:3-5.

6. Tano olah ci Yihofa mikayat kitanan, samaanen ita ko demak ngaˈ milifok to epoc?

⁶ Adihayay ko pakayraan ni Yihofa mikayat kitanan. Samaanen ita ko demak, ngaˈ paihkal kita to miakoˈiday Cingranan hani? Taneng 3:5, 6 sanay: ‘Sarocoden namo ko falocoˈ mitiˈer pakasoˈlin ci Yihofaan, hamaan ko niyah a inaneng ko tiˈeren.’ Ano dofodofen ita ko sakayat ni Yihofa i, ‘salofen’ Ningra ko lalan ita. Sakora sowal i, wa padamaen Ningra kita micaˈi to pasangar, ira ko lipahak no kaˈorip. Tano olah ni Yihofa, midofdof to saali ita a patalipaˈelal, tada aakoˈiden ita Cingra!—ˈOlic 32:8.

MIDIMOKOSAY CI YIHOFA KITANAN

7. Wa misamaan ci Yihofa midimokos kitanan hani? (Filipi 4:19)

⁷ ˈOsien ko Filipi 4:19. Cowa ko pikayat aca Ningra kitanan, dimokosay ci Yihofa to pakadafongay i nokaˈorip no mita. Pakayni sakaˈorip malalok a matayal, wa palemeden ni Yihofa kita, ho ira ko kakaenen, rikoˈ ato pikilomaˈan. (Matay 6:33; 2 Tisalonika 3:12) Nolatekay macariraway kita to sasamaan ko nikaˈorip, matatodongay a harateng konini, kawra pakalalokay ci Yihofa kitanan hamaan pakidem ko nika caciraw. (Nengnengen ko 精讀本注釋: Matay 6:25.) Misamaanay hani? Samanen i kakarayan a Wama wa midimokos to madimadiay midoko Cingranan a tamdaw, cowa ko mamifalah kitanan. (Matay 6:8; Hipray 13:5) Mikiˈokan ni Yihofa mihaen ko demak, mansa ngaˈayay pakasoˈlinen ita Cingra.

8. Pakayni ci Tafitian, samaanay ko demak ni Yihofa?

⁸ Nengnengen samaanay ci Yihofa padama ci Tafitian. I pilaliwan karorayan a tatokian ni Tafiti, kamayan midimokos ci Yihofa cingranan ato mikotoday cingranan a tamdaw, tahacada to misaalian nangra a dafong, padadotoc a maˈorip. Mitikolay miharateng ci Tafiti to kapidimokos ni Yihofa cingranan, sanay: ‘Nano kaemang ako tahira i katoˈas i, cowaho ka maˈaraw ako ko moecelay a tamdaw a mafalah, cowaho ka ˈaraw ako ko teloc Ningra misaali to kakaenen.’ (ˈOlic 37:25) Malecad ci Tafitian, malifetay iso ko samaanay ci Yihofa midimokos tisowanan, anca samaanay ci Yihofa padama to salikaka miremo to pasangar.

9. Anini mifekad ko pades i, samaanan ni Yihofa midimokos ko finawlan Ningra? (Nengnengen ko coka.)

⁹ Mifekad ko paedes i, midimokosan ni Yihofa ko finawlan Ningra. Saka 1 hahekalan, icowacowaay a Krisciyang na pakiyahoay to sakaˈorip a dafong, pafeli to tahakedalay a salikaka. (Dmak 11:27-30; Loma 15:25, 26) Anini, malecaday ko finawlan ni Yihofa paihkal to hinapaladaˈay a harateng. Ikor no pades i, kasakopang no Krisciyang pakiyahoay to tahapadesay a tamdaw to masakenakenaay a dafong, mahawpay ko kakenen, nanom, rikoˈ ato sapaising a dafong. Patirengay a kapot padamaay mitomadaw to mapalakay a lomaˈ ato kasakopang. Roma i, sikawdan no Kawas kalikiay a mihinom to malahdaway ko salawina ato lomaˈ a tamdaw, pakaynian i Fangcalay Cudad paˈicel cangranan.c

10-11. I nalifetan ni Pawlis mananamay iso ko manan?

¹⁰ Hinapaladaˈay ci Yihofa, midimokosay Cingra toya cowaho ka pidoko Cingranan a tamdaw. Malecaday kita, pairaen ko toki a mipadama to cowaho pakasoˈlin to Kawas a tamdaw. (Kalatiya 6:10) Mihaen kita to demak i, pairaay to ngaˈayay a pisawacay. Nengnengen ko cecay nalifetan, o kociw no pitakcian no Okeran ci Pawlis, soˈlin cowa ko Misawacayay Tamdaw ni Yihofa cingra, kawra sidaˈitay to mitakciay no Misawacayay Tamdaw ni Yihofa, mikangodoay to pihakelongan nangra. Itini kalaloodan i, sapiliyasaw a tayra cingra i dipayalay a kitiraan, padamaan no salikaka cingra. Ikor, mirienangay cingra to Piharatengan to Kinafalah ni Yis a Saˈopo. Tikolen a miharateng ko nalifetan no niyah i, sanay cingra: “Ciharatengay ko Misawacayay Tamdaw ni Yihofa takowanan, ngaˈayay ko pidipot takowanan. Tada miakoˈiday kako cangranan.”

¹¹ Makalimay kita mitodong to sidaˈitay to tamdaw a kakarayan Wama, paihkal to olah i misaaliay to sapadamaaw a tamdaw. Ano cato ka hecad ko pihakelongan, kamayan midemak kita. (Luka 6:31, 36) O ngaˈayay waywayan ita sapisolotaw cangranan malo nisawawaan ni Kristo. (1 Pitiro 2:12) Kawra, soˈlin ecato ka pipiliˈ to sapidokoaw to Kawas cangra, kamayan marenecen kita, samanen ‘o paladaˈay ikakaay ko hemek to milayapay.’—Dmak 20:35.

MIDIPOTAN NI YIHOFA KITA

12. Mikiˈokay ci Yihofa wa misamaan midipot to finawlan Ningra? (ˈOlic 91:1, 2, 14)

¹² ˈOsien ko ˈOlic 91:1, 2, 14. Mikiˈokay ci Yihofa wa midipot to kalawidang ita Cingranan. Sapicongedaw ci Satan to matatodongay pidoko no mita, kawra cowa ko papalaˈosien ni Yihofa ko harateng ningra. (Yohani 17:15) Pakasoˈlinen ita, itini ‘taˈangayay a padiing’ i, palaˈosien ni Yihofa ko sakiˈok Ningra, wa padamaho kitanan ira ko tanektekay a pakasoˈlinay falocoˈ, wa milidong kitanan.—Paˈarawan 7:9, 14.

13. Samaanan ni Yihofa midipot ko kahacecacecay tamdaw hani?

¹³ Samaanan ni Yihofa midipot ko kahacecacecay tamdaw hani? Pakaynian Ningra i Fangcalay Cudad a midipot kita, padama kitanan pafafidaˈ to ngaˈayay tatiihay. (Hipray 5:14) Dofdofen ita ko safalod no Fangcalay Cudad a maˈorip, wa madipot ko kalalaˈed ita aci Yihofa, maliyasho ko midokaˈay kitanan a demak. (ˈOlic 91:4) Roma i, pakaynianho ni Yihofa i kasakopang a midipot kita. (Isaya 32:1, 2) Ano macerid kita malacafay to maolahay to Kawas, misaˈicelay midofdof Cingranan a salikaka, mapakalalokay kita, ira ko ˈicel micoˈay to tatiihay milingatan no hekal.—Taneng 13:20.

14. (1) Hano cowa ka emin han ni Yihofa palahdaw ko sapalifet no mita hani? (2) ˈOlic 9:10 samaanay mikiˈok kitanan hani? (Nengnengen ko ilaenoay safanaˈ.)

¹⁴ Na padamaan ni Yihofa ko madimadiay sikawdan Ningra ho eca ka dokaˈ ko tireng nangra, kawra cowa ka macerid mihaen ko demak Ningra, midokoay to Kawas a tamdaw alatek wa ‘tahalifa to cowa ka harateng a pakayraan’ a tahapades. (Patnakay 9:11) Roma i, sapisawacayaw to pisamangah ni Satan, na mihayian ni Yihofa ko nolitengan madimadiay sikawdan tahalifa to pades a mapatay. (Yopu 2:4-6; Matay 23:34) Ano aniniayto i, mahecadayto. Soˈlin cowa ka emin han ni Yihofa palahdaw ko sapalifet ita, kawra ngaˈayay kita pakasoˈlin, cowa ko mamiliyas Cingra to maolahay Cingranan a tamdaw.d—ˈOlic 9:10.

MIHINOMAN NI YIHOFA KITA

15. Mitolon kita to Kawas, miˈosi to Fangcalay Cudad ato mirienang to saˈopo samaanay mihinom kitanan? (2 Korinto 1:3, 4)

¹⁵ ˈOsien ko 2 Korinto 1:3, 4. Nolatekay, makesemay matoleday ko falocoˈ ita. Mahaenay kiso alatek. Tada malonayen matoˈol ko kaˈorip iso han? Iraay ko mafanaˈay to harateng iso han? Iraayto, mafanaˈay ci Yihofa to roray ita. Cowa konini aca, sowal no Fangcalay Cudad: ‘Tahalifa kita to masakenakenaay a sapalifet i, mihinoman no Kawas kita.’ Itini satolon fanaˈen ko Kawas to nafalocoˈ ita, ‘papafeli Cingra to mataˈlifay no maharatengay no tamdaw a rihaday.’ (Filipi 4:6, 7) Itini Fangcalay Cudad maˈosiay ita ko sapasowal ni Yihofa kitanan, macada ita ko sahinom. Pakayni i Fangcalay Cudad, pafelian ni Yihofa kita to taneng ato hatokel, mifanaˈ to maolahay Cingra kitanan. Roma i, mirienang kita to saˈopo macadaay ita ko sahinom, samanen iraay ko maolahay kitanan a salikaka kalacafay, matengilayho ita ko sapakalalok no Fangcalay Cudad.

16. Mikitini kiso to nalifetan ni Nisen aci Polisila o manan ko mananamay?

¹⁶ O nalifetan ni Nisen aci Polisila paihkalayto pakaynian ni Yihofa i Fangcalay Cudad mihinom ato pakalalok ko tamdaw. I Padakaay koniya mararamoday. ˈAyaw no pina miheca, misaˈosiay cangra tayra i cisaaliay a kilac a matayal. Saan ci Nisen: “Itiya pakasoˈlinay kami, pakayni toniya pisaˈosi palemeden ni Yihofa kami.” Kawra tahira tora faelohay a kilac, adadaayto ko tireng nangra, cangoˈotayto ko payci, mansa i, miliyasay cangra tora kilac. Minokay cangra i nalacolan i, kamayan cangoˈot ko payci. Saan ci Nisen: “Itiya miharatengay kako, hano caka pihaen ko Kawas padama tamiyanan? Cisasaay kako to mararaway ko demak no niyah.” Ikor mahapinang ni Nisen aci Polisila, ci Yihofa cowa ka piliyas cangranan. Saan ci Nisen: “Itini toniya pasangaray a lintad i, o Fangcalay Cudad mahecaday to citanengay a widang, padadotocay pakalalok a mikayat tamiyanan.” Sanayho ko sowal: “Itiya misaˈicelay kami misaharaterateng ci Yihofaan samaanay padama tamiyanan mihadidi, cowa ka saromiˈad sa miharateng to pasangar no niyah. Pakasoˈlinay kami, ano ikor wa padamaen ni Yihofa kami mihadidi to pasangar.”

17. Oniya fafahiyan salikaka ci Hayeciya samaanay tahacada to sahinom? (Nengnengen ko coka.)

¹⁷ Pakaynian ni Yihofa i salikaka a mihinom kita. Nengnengen ko nalifetan no fafahiyan salikaka ci Hayeciya. I Siyungyaliay ko kitiraan ningra, pinaay poloˈ a miheca, padadotocay cingra misiˈayaw to adihayay a pasangar, maceriday a malonayen, hato awaay ko kapo no niyah sanay miharateng. Tikolen ningra a miharateng, mahapinangay ni Hayeciya to pakaynian ni Yihofa i salikaka a mihinom cingranan. Sanay cingra: “Sapietanaw a matayal, midipot to adadaay a wawa, misiˈayawho to sapalifet, maceriday kako malonayto ko tireng, kawra padamaay ci Yihofa takowanan. Toniya 30 miheca, kamayan ci Yihofa palaˈosi to mikiˈokan Ningra, a mihinom takowanan. Maceriday pakayni i salikaka a mitongal to ˈicel no mako. I kalonayan no mako i, macadaay ako ko dihkoay a lihaf anca o kato, tahatengil to kasemer ato sapakalalok no salikaka.”

18. Samaanen ita mihinom ko tao?

¹⁸ Iraay ko kalikoan ita mitodong ci Yihofaan, mihinom to tao. Samaanen ita ko demak hani? Mihadidi kita mitengil to sowal nangra, o cisidaˈitay a sasowalen, ato padama cangranan. (Taneng 3:27) Misaˈicel kita mihinom to tahapadesay a tamdaw, mahawpayho koya cowa ka pidoko to Kawas a tamdaw. Ano mafanaˈto i katihiay a tamdaw adadaay, makesemay anca tahalifaay to kararoman a demak, ngaˈayay tayra kita milisoˈ, tengilen ko sowal nangra, tano Fangcalay Cudad pakalalok cangranan. Todongen ita ko ‘pafeliay to kihcod sahinom a Kawas,’ wa padama to tahapadesay a salikaka a papihadidi, alatek wa patemer toya cowaho ka pihakelong a tamdaw, misolot cangranan patatikol to matatodongay noka pidoko.—Matay 5:16.

WA ITINI KATIHI ISO CI YIHOFA

19. Samaanay ci Yihofa ciharateng kitanan? Samaanen ita a mitodong Cingra?

¹⁹ Tada ciharatengay ci Yihofa to maolahay Cingranan a tamdaw, tahacada kita to pasangar i, cowa ko mamiliyas kitanan. Mahecad to wama wina ciharateng to wawa, ci Yihofa misongilaˈay midimokos to madimadiay midoko Cingranan a tamdaw, mikayatay Cingra, midimokos, midipot, mihinom kitanan. Ngaˈayay todongen ita ko sidaˈitay a kakarayan Wama, pakalalok mihinom to tahapadesay a tamdaw. Manaokaniw, kamayan ira ko pasangar, kawra aka a calemcem, wa padadotoc i katihi ita ci Yihofa. Sanay a mikiˈok Cingra: ‘Hamaan a matalaw, samanen kalacafayen Ako kiso.’ (Isaya 41:10) Oniya mikiˈokan tada pakalalokay to falocoˈ no mita. I katihiay ita ci Yihofa, cowa ko mamatoˈol kita!