Cowa ka Pisawad Kako Minanam

Isaka 1927 miheca hofocen kako i Padaka i ngata no Ilinoi Cikake a mimingay niyaroˈ. Lalimaay ko wawa no wama wina—ci Lota, Tam ato kako, ci Kae aci Cioyi. Misetekay ko falocoˈ niyam mapolong a misarocod midoko ci Yihofaan. Isaka 1943 miheca, ci Lota tayraay i saka tosa liyad no Kiliyat picudadan, ci Tam, Kae aci Cioyi itiniay 1944, 1947, 1951 miheca tayra i Niwyok Prokelin a Pitil matayal. Cangra ato wama wina patirengay to ngaˈayay taˈarawan no mako.

MALACAFAY TO PARO NO LOMAˈ MINANAM TO SOˈLINAY KIMAD

O wama wina ako maolahay miasip to Fangcalay Cudad. Maolahay cangra to Kawas, pasifanaˈay to wawa maolah to Kawas. Itini Saka Cecay Lalood no Hekal, matahidangay ko wama tayra i Iwropa milood. Tora tatokian, malahdawayto ko pakasoˈlin no falocoˈ ningra to kiyokay. Maˈaraw no wina maˈoripho ko wama minokay, tada miakoˈiday to Kawas, hananay ningra ko wama: “Kae, tayra kita i kiyokay, malecad to isaˈayaway.” Pacaˈofan no wama: “Ngaˈayay pacafayen ako kiso tayra a romakat, kawra cowa ko mamicomod kako.” Licayan no wina: “Misamaanay?” Sanay cingra: “Malalood kami i, malalaˈisay a fokosi tatosa, soˈlin malecaday ko pihakelongan, maka micangacangay to Kawas a palemed to sofitay ato sapilood a lalosidan. Mamakahi ko Kawas a maka midama tonini malalaˈisay a tatosa han?”

Naikoran no wina tayra i kiyokay i, tatosaay Misawacayay Tamdaw ni Yihofa mikongkongay to fawahan niyam. Misiwkayan nangra ko wama to sapikingkiw to Fangcalay Cudad a tosa tilid, o Likat (no Padaka) hananay kora tilid. Tosaay a maloloday a tilid konini, sapikingkiw to Paˈarawan cudad. Mahemekay ko wama miˈosi, oranto milayapan ningra konini tosa tilid. Tahalomaˈto ko wina maˈaraw ningra konini tilid, ala hananay ningra miˈosi. To cecay romiˈad manengnengay no wina ko sinfon, iraay ko cecay ˈopo a tamdaw tano Likat hananay a tilid minanam to Fangcalay Cudad sanay, halo mitahidangay to tamdaw milengo. Sakatayraaw ko wina mitengil. Tahirato ko wina i, iraay ko cecay fafahiyan mifohat to fawahan. Paˈaraw hananay no wina tora mitatiwan a tilid, milicay: “Oninian ko minanaman namo a tilid han?” “Hayi, ka picomod!” sanay cingra. Dotoc a cecay lipay, ˈorongan no wina kami papina wawa a tayra. Ikorto i, tayraay:to kami to lipalipay a minanam.

To cecay a saˈopo, papiˈosiay ko misikayay takowanan to ˈOlic 144:15, o midokoay ci Yihofaan a tamdaw lipahakay sanay koniya sinael. Mitemeray i falocoˈ ako konini sinael. O roma tosa sinael maolahay kako, sowal no 1 Timoti 1:11, o ‘lipahakay a Kawas’ ci Yihofa sanay, itini Ifiso 5:1 pakalalokay kitaanan ‘mitodong to Kawas.’ Mahapinangay ako to mamaliko kako midoko to Misangaˈay a Tatapangan, halo miakoˈid Cingranan. Paira to hatoki ako matayal saki Cingranan. To nika fanaˈ tonini kimad halafinay ko pifiyor i takowanan.

Ingataay no lomaˈ niyam a kasakopang itiniay i Cikake, maedeng 32 kongli ko karaay, kawrira kamayan kami a mirienang to saˈopo. O mananamay ako a sifanaˈ no Fangcalay Cudad matongal matongalayto. Kinacecayay papipacaˈofan no misikayay ci Lota to salicay. Matengil ko pipacaˈof ningra, miharateng kako: “Mafanaˈay kako tora caˈof, ngangaˈay pakamay kako isawni!” Ikor misongilaˈayto kako a misaday to papacaˈof i kasaˈopoan. Palidlid sanayto kako malecad to salikaka ako, tangongol tangongolayto ko pakasoˈlin ako ci Yihofaan. Itiniay kako isaka 1941 miheca micada to paputisem.

ITINI PITAYKAYAN MICADA TO SAPASIFANAˈ NI YIHOFA

Isaka 1942 miheca, itini Ohayo Kelifolan misikayan a taykay cowa ka pawan no mako. I Padaka mataˈlifay ko 50 a niyaroˈ a salikaka pakayni i tingwa mitengil to kamok no taykay. Pitaykayan a tatokian i, kami paro no lomaˈ ato romaroma salikaka i ngata no pitaykayan pataloˈanay kami a milafin. Itiya i, Saka Tosa Lalood no Hekal tada pakidemay, o macadaay no Misawacayay Tamdaw ni Yihofa a pisafelit matongalay ko pakidem. To dadaya, maˈaraway ako ko ˈalomanay faˈinayan salikaka patokoan ko citosiya i papotal no pataloˈanan, pasipapotalan ko fongoh no citosiya. Malalengoay cangra to dadaya kahacecay paliding ira ko mihimaway, ano ira sato ko mifekaday a demak i, milikatan no salikaka ko tinghoy no citosiya, paˈeceng to mata no ˈada, hanaca mikeniˈ to laepa, itiya i, tangsol sa tayni ko ˈalomanay a mipadang. Miharateng kako: “Maherekayto ko finawlan no Kawas talaˈayaw a misaday!” Rihadayan nanayto kako, mansa maeholayto ko fotiˈ. Tora pina romiˈad rihadayay kami awaay ko maanan mafekaday.

Ikor no pi:na miheca, tikolen miharateng ko itiyaay a taykay, mahapinangay ako cowa ka cariraw a matalaw ko wina. Misarocoday mitadiˈec ci Yihofaan ato likakawa Ningra, tahadaˈocto co:wa ko mamapawan kako to ngaˈayay taˈarawan ningra.

ˈAyaw no taykay caka halafin satapangay ko wina malo misakafahay. Mansa, itini pitaykayan misamacayay cingra mitengil to pakayniay misakafahay a kimad. Itini pinokayan a lalan, sanay cingra: “Makalimay kako sapadadotocaw malo misakafahay, nikawrira awaay ko pakayraan ako misakafah ko demak matayalho to demak no paro no lomaˈ.” Dotoc milicayay tamiyanan mamakahi a mipadang hokira, makahiay kami hananay niyam pasowal, milimasmasayto cingra tamiyanan makamiasik to cecay tosa rawang. ˈAyaw no maranam maherekayto kami miasik, malingadto kami tayra i picudadan, mikinsaan ningra ngaˈayay ko piasik niyam hokira, ikor malingadayto mitosil. ˈIfowaay cingra to romiˈamiˈad, kawra caay pisakahmaw tamiyanan. Minokay kami to kalahokan komaen anca minokay i picudadan kalacafayayto cingra tamiyanan. Latekay minokay kami picudadan i, malacafayay cingranan malingad mitosil, pahapinangay koni tamiyanan samaanay ko kaˈorip no misakafahay.

SATAPANG A MIEMIN TO TOKI MISAKAFAH

16 ko mihecaan ako misatapang mala misakafahay. Itiya cowaho ko Misawacayay Tamdaw ni Yihofa ko wama ako, kawra ciharatengay cingra to mitosilay tayal ako. To cecay dadaya, pasowalan ako cingra, soˈliˈlin misaˈicelay kako mitosil, kawra awaayho ko cecacecay a pakingkiwan. Licay han ako cingra: “Makahi kiso pakingkiwen ako han?” Saharaterateng sa ko wama: “Hato awaay ko lalangian minaˈay tisowanan.” Mankora saka cecay pakingkiwan i, o wama ako. Tada mikiriwiˈay takowanan konini.

O sakalalengo niyam i, o“Papasalaten no Soˈlinay Kimad Kiso” (no Padaka) sanay a cudad. Ikor no cecay liyad mahapinangay ako, malalengo ato wama to Fangcalay Cudad, padamaay takowanan itini i pikingkiw to Fangcalay Cudad ato pasifanaˈ to sito a demakan tada macakatayto. Tinakoen, to cecay dadaya malahci niyam miˈosi ko cecay fatac i, sanay ko wama: “Mafanaˈay kako mihaenay ko sowal no cudad. Kawra hano mafanaˈ kiso o sowal no cudad o matatodongay hani?” Cowa ka harateng ako to mamihaen cingra milicay takowanan, pacaˈof han ako: “Hatini cowa ko ngangaˈay kako misawacay to matatodongay ko misowalan no cudad, kawra miliyaw sato minanam kita i, wa ngaˈayto kako pacaˈof tisowanan.” Ikor matoorayto ako, makilimayto ako ko pina sinael midama to misowalan no cudad. Mikitiya i, misaˈicelay kako minanam samaan mikilim to lalakaw, mihaen i, ngaˈayto kako pakayni i kalalengo to Fangcalay Cudad a misaday. Palidlid sato, o pakasoˈlin no falocoˈ ako ato wama matongalay ko tanektek. Salikor, itini i 1952 miheca mipaputisemayto ko wama.

ITINI I PITIL PADADOTOC A MINANAM

17 ko mihecaan ako miliyasay to lomaˈ. Maedeng itini toniya tatokian, ci Lutaa malo mikiriwiˈay manilnil mitosilay, ci Tam tayraay i Pitil matayal. Itini katayalan nangra lipahakan nanay cangra, taˈangayay ko sapakalalok takowanan. Oranto i, misingsiay kako tayra i Pitil ato Kiliyat picudadan, ikor mamitala to tatalacowaen ni Yihofa kako. Telocto, itini 1946 miheca matahidangay kako tayra i Pitil matayal.

75 mihecaan matayal kako i Pitil. Itini toniya laliyadan masasiromaromaay ko tayal ako, mikitini adihayay ko mananamay. Tinakoen, mafanaˈayto kako samaan mitepang misangaˈ to cudad, mananamayho tono payci a demak ato pacomoday ato pasadakay to cudad i roma kitakit. O tada kaolahan ako a demak i, itini Pitil mitengil to nodafak a pidoko ato misalalangiay to Fangcalay Cudad a kimad, padamaay konini takowanan itini pihakelongan padadotoc a macakat.

Mikitini i safaan ci Kae adihayay ko mananamay ako. Itini 1947 miheca matayal cingra i Pitil. Marariday cingra micalep mikingkiw to Fangcalay Cudad, itini pasifanaˈay a demakan tada inanengay. Kinacecayay mamikimad kako, oranto i, misalalicayay ci Kaean, pasowal cingranan adihayay ko makilimay ako a lalakaw, kawra cowa ka fanaˈ sasamaanen a misakadademak. Sapasifanaˈaw takowanan sasamaan ko pidemak, milicayay cingra takowanan: “Ciyalaw, o manan ko lalangian iso?” Talipaˈelal sanay kako, mafanaˈayto oyaan aca milingatay to lalangian a lalakaw ko sakadademaken, o cowa pilingat i, sawad hanto. Onini a pakayraan taˈangayay ko epoc takowanan.

Toha sakalipahakaw a matayal i Pitil i, mamisaˈicel a mirienang to mitosilay demak wangaˈ. Ano mihaen to demak kita i, aadihay ko makapahay a nalifetan. Maharatengayho ako to cecay pisakalafian a tatokian malacafayay kako to cecay faˈinayan salikaka tayra i Polankes no Niwyok a mitosil. Tayraay kami milisoˈ to cecay na milayapay to Mikecolay ato Katalipaˈelal! a fafahiyan. Mifohat cingra to fawahan i, hananay niyam a pasowal: “Tayni kami anini, o sapaladaˈaw tisowanan to padamaay to tamdaw a sifanaˈ no Fangcalay Cudad.” Sanay cingra: “Ano pasifanaˈay kamo to Fangcalay Cudad i, ka picomod.” Malalengoay kami to pina pakayniay i Kitakit no Kawas ato faelohay hekal a sinael. Mahapinangayto mahemekay cingra, samanen dotoc no cecay a lipay itini pilisoˈ niyam i, mitahidangan ningra ko papina widang mirienang to kalalengo niyam. Ikorto i, cingra ato faˈinay ningra padadotocay madimadi a midoko ci Yihofaan.

MIKITINI I FAFAHI AKO A MINANAM

Ikor sakaciraramodaw kako, ikor no 10 miheca mahelaayto ko hatatodong ako a raramod. O manan ko padamaay takowanan pakahela to ngaˈayay fafahi hani? Pasayra ci Yihofaan mitolon, misarocod miharateng to ikor no ciraramod, mamalacafay kako to fafahi micangacang to masamaanay a patosokan.

Maherek mirienang to taykay i 1953 miheca itini Yanki Ontociw ikor, makakafanaˈay kako to fafahiyan salikaka ci Mali Aniolan. O cafay no kaka ako ci Lota cingra micudad i Kiliyat, maocoray cangra tayra i malecaday a kitiraan malo mikiriwiˈay manilnil mitosilay. Pasowalay cingra takowanan, itiniho cingra mitosil i Kalepiya a kilac mifekaday a demak, ato nalifetan ningra padama to pakingkiwan i adihayay a mihecaan. Milengo cingra tonini a demak i, fanekfekay ko harateng. Matongalayto ko noka sasifanaˈ niyam, mahapinangay to malecaday ko patosokan niyam, makalimay sapadadotocaw misakafah matayal ci Yihofaan. Mataˈlifto ko toki, matongalay ko tangongol no olah niyam, itini 1955 miheca 4 folad mararamodayto kami. Mikitini adihayay a demakan, o sapatelong ni Yihofa takowanan ci Mali, o ngaˈayay todongen ako a taˈarawan. Ano o mananto ko macadaay a katayalan, lipahakay cingra a midemak. Caay ka talaw cingra maroray, mikifalocoˈay a ciharateng to tao, hanaca paisalakatan no kaˈorip ko Kitakit no Kawas. (Matay 6:33) Ikor no mararamod, toloay miheca kami matayal to milisoˈay a tayal, ikor itini 1958 miheca matahidangay tayni Pitil matayal.

Adihayay ko mananamay ako mikitini ci Malian. Tinakoen raramod saho kami i, misetekay to falocoˈ to mamalacafay miasip to Fangcalay Cudad. To kinacecay a piˈosi maedeng 15 ko miˈosian a sinael, maherek a miˈosi tora sinael i, mafafalicay kami to nafalocoˈan pakayra tora sinael, malalengo to sasamaan misakadademak to safalod nora sinael itini nokaˈorip niyam. Marariday ci Mali paladaˈ to mananamay ningra itini Kiliyat picudadan ato malo mikiriwiˈay manilnil a mitosilay. O mahaenay a kalalengo adihayay ko pitemer to falocoˈ ako, padama takowanan macakat itini mikimaday, padamaayho takowanan samaan a mipakalalok to fafahiyan salikaka.—Taneng 25:11.

Itini 2013 miheca mapatay ko kaolahan ako a Malian, tada makalimay kako itini i faelohay hekal miliyaw pakaˈaraw cingranan. ˈAyaw no hakairaan nora romiˈad, misetekay kako to falocoˈ padadotoc micada to sapasifanaˈ ni Yihofa, miemin to falocoˈ mitadiˈec Cingranan. (Taneng 3:5, 6) Maharateng ko kaˈorip no finawlan ni Yihofa itini faelohay hekal i, mahinomay a lipahak kako. Itini faelohay hekal, papadadotoc kita micada to sapasifanaˈ no Tadamaanay Singsi ci Yihofa, mamananam ko adihayay pakayniay Cingranan a sifanaˈ. Toniya halafinay a mihecaan, o pasifanaˈan Ningra i takowanan a demak, ato patalahkalan a sidaˈit, cowa ka maemin a sowalen, tada miakoˈiday kako Cingranan.