Malo Faˈinay, Mikangodo to Fafahi Iso

1. Patireng ci Yihofa to raramod, o manan ko araaw hani?

CI YIHOFA o ‘lipahakay a Kawas.’ (1 Timoti 1:11) Makalimay Cingra lipahak kita, mansa pafelian Ningra to adihayay a kalimlaan a sapatelong, o cecay i, o raramod. (Yakop 1:17) I pipakaetiman a romiˈad, miketonay ko mararamoday to sowal, mikiˈokay to mamaolah to raramod a mikangodo. Ano ikor no mararamod padadotoc matongal ko olah to raramod, wa raheker a lipahak ko nokaˈorip.—Taneng 5:18.

2. Anini o ˈalomanay a raramod iraay ko manan a pasangar?

² Kaadayayan i, ˈalomanay a tamdaw matawalayto nangra ko miketonan no niyah i raramod a sowal, telocto i, cowato ka raheker ko raramod. O safanaˈ no mikakingkiway to sakangaˈay no tireng ato mikoracay a likakawa (WHO), ˈalomanay malo faˈinay a tamdaw itini i tireng, sasowalen ato nafalocoˈan mikariˈangay to fafahi no niyah. I kaˈayaw no roma tamdaw cangra hato ngaˈayay a faˈinay, i lomaˈ sato i, o romato a tamdaw cangra. Cowa konini aca, ˈalomanay a faˈinay minengnengay to kaacekan maˈodangay a lalakaw, o mamipalak to raramod a lalangian konini.

3. Misamaanay o roma faˈinay hano mikariˈang to fafahi no niyah?

³ Misamaanay o roma faˈinay hano mikariˈang to fafahi no niyah hani? Alatek na kaemangho maˈaraway nangra ko pikariˈang no wama to wina, mansa o mahaenay a waywayan o matatodongayto sanay a minengneng. O roma a tamdaw mafiyoray no lalengawan a pinangan, malo o ‘soˈlinay a faˈinayan,’ tano sakemo a pakafanaˈ to fafahi o cima ko tawki no lomaˈ. O roma tamdaw cowa ka fanaˈ miˈimer to harateng no niyah, ano maketer i, sapikariˈangaw to tamdaw. Roma i, maceriday ko roma tamdaw minengneng to kaacekan maˈodangay a lalakaw, telocto i, mararawayto ko pinengneng to madadiˈiyay a demak ato fafahiyan. Oha sasinanoten i, adihayay a safanaˈ sanay ko sowal, i 2019 kalifongan a mihecaan, ˈaloman ˈalomanay ko faˈinay mikariˈangay to fafahi no niyah. Kawra, ya masowalay isawni a demak, cowa ka ngaˈay malo sapikariˈang no faˈinay to fafahi a lalangian.

4. Ciraramodayto a faˈinayan salikaka o icowaay a pakayraan ko sasinanoten? Misamaanay?

⁴ O ciraramodayto a faˈinayan a Krisciyang oha mamisinanot, aka tano mararaway a harateng ko pinengneng to fafahiyan.a Misamaanay? Samanen mararaway a harateng pairaay to mararaway a waywayan. Tarokos ci Pawlo na patalipaˈelalay to Loma a Krisciyang: ‘Aka papifiyoren ko pinangan no hekal tamowanan.’ (Loma 12:1, 2) Soˈlin halafinayto ko toki a mapatireng ko Loma a kasakopang, kawra ilalomaˈ no kasakopang iraayho ko mafiyoray no hekal ato nolitengan a harateng ko roma a tamdaw. Mansa, palimoˈotan ni Pawlo cangra to hamamifalic to harateng ato waywayan. O sapalimoˈot ni Pawlo kamayan a ciepoc to aniniay ciraramoday a faˈinayan Krisciyang. Kaadayayan i, o roma ciraramoday a faˈinayan salikaka mafiyoray noniya hekal ko harateng, hanaca mikariˈangay misamsam to fafahi.b Nikawrira, samaanay ko saali ni Yihofa to malo faˈinay a micada to fafahi hani? Mikitini i lalangian a sinael noniya lalakaw wa mahela ita ko caˈof.

5. Mikitini 1 Pitiro 3:7, o faˈinay sasamaan a micada to fafahi hani?

⁵ ˈOsien ko 1 Pitiro 3:7. Palimoˈotan ni Yihofa ko faˈinay mikangodo to fafahi, oha tatano olah, sidaˈitay a pakayraan micada to fafahi. Oniya lalakaw mamilengo, malo faˈinay sasamaan paihkal to mikangodoay to fafahi. Isalakat, nengnengen ita malo faˈinay o masamaanay a waywayan ko fafalahen.

FALAHEN KO COWA PIKANGODO TO FAFAHI A WAYWAYAN

6. Samaanay ko pinengneng ni Yihofa to mikariˈangay to fafahi a tamdaw? (Kolosay 3:19)

⁶ Midokaˈay to tireng. Ciˈintehay ci Yihofa to maolahay to mikariˈangay a tamdaw. (ˈOlic 11:5) Mirikecan Ningra koya mikariˈangay to fafahi a faˈinay. (Malaki 2:16; ˈosien ko Kolosay 3:19 ato roma pihongyak.) Mikitini i lalangian sinael noniya lalakaw saka 1 Pitiro 3:7, ano mikariˈang ko faˈinay to fafahi wa mapalak ko kalalaˈed aci Yihofa, o satolon ningra cowato ko mamitengil ci Yihofa.

7. Mikitini Ifiso 4:31, 32, malo faˈinay mamifalah to manan a sasowalen to fafahi? (Nengnengen ko “Sapitadtad a Sowal.”)

⁷ Midokaˈay ko sasowalen. O roma faˈinay midokaˈay ko sasowalen, mangalefay midokaˈay to fafahi ko sowal. Kawra, ciˈintehay ci Yihofa to ‘mangolaway, ˈintehay, micaceliˈay, midokaˈay to tamdaw a sowal.’c (ˈOsien ko Ifiso 4:31, 32.) O kahacecay a sowal ita matengilayto ni Yihofa, ano o tekedan no faˈinay ato fafahi a sowal, kamayan a misinanot ci Yihofa. Ano padeteng sa ko faˈinay midokaˈ to sasowalen i fafahi, wa mapalak ko kararamod, malahdawho ko pihayda no Kawas.—Yakop 1:26.

8. O kaacekan maˈodangay a lalakaw samaanay ko pinengneng ni Yihofa? Misamaanay?

⁸ Minengneng to kaacekan maˈodangay a lalakaw. Ciˈintehay ci Yihofa to kaacekan maˈodangay a lalakaw. Malo faˈinay ano minengneng to hatiniay cowa ka korac a ika, wa mapalak ko kalalaˈed no niyah aci Yihofa. Mihaen to demak cowa ka mikangodo to fafahi.d Makalimay ci Yihofa i waywayan ato harateng madimadi ko faˈinay to fafahi. Sanay ko sowal ni Yis, o cima ano haharateng sa to mararaway a minengneng to fafahiyan, i ‘falocoˈ’ ningra maˈaˈodangayto toya fafahiyan.e—Matay 5:28, 29.

9. O roma faˈinay madadiˈi to fafahi i, pacieciay to cowa ko kaolahan no fafahi a demak, hano ciˈinteh ci Yihofa to mahaenay a waywayan?

⁹ Mamidokaˈ to falocoˈ no fafahi a madadiˈiyay a waywayan. O roma a faˈinay madadiˈi i, mipacieci to fafahi midemak to cowa ko kaolahan ningra a demak, o mahaenay a demak midokaˈay to falocoˈ ningra alatek, cowa ka korac ko niyah sanay miharateng, anca masakahmaway ko niyah sanay a minengneng. Ciˈintehay ci Yihofa to sano niyahay awaay ko olah a waywayan. Misaalian ni Yihofa ko malo faˈinayay tano olah a midipot to fafahi, mikangodo to harateng ningra. (Ifiso 5:28, 29) O ciraramoday a faˈinayan salikaka, ano iraayto ko mikariˈangay to fafahi, anca minengnengay to kaacekan maˈodangay lalakaw a nanaman, sasamaan cingra mifalic to harateng ato waywayan hani?

SASAMAANEN MIFALAH KO COWA PIKANGODO TO FAFAHI A WAYWAYAN?

10. Malo faˈinay sasamaan mitodong to taˈarawan ni Yis?

¹⁰ Sapifalahaw to mikariˈangay to fafahi a waywayan, sasamaan ko demak no faˈinay hani? Oha mamisaˈicel mitodong ci Yisan. Soˈlin cowa ka ciraramod ci Yis, kamayan o makapahay taˈarawan no ciraramodayto a faˈinayan salikaka. Malo faˈinay ngaˈayay mitodong ci Yisan samaanay micada to kasakopang a pakayraan a micada to fafahi no niyah. (Ifiso 5:25) Dotoc nengnengen ita, samaanay ci Yis micada to nisawawaan, ato samaanay masasowal cangranan.

11. Samaanay ci Yis micada to tarokos hani?

¹¹ Kalacafay ci Yis to nisawawaan i, sidaˈitay mikangodo cangranan. Cowa ka maˈidi sano niyahay ci Yis. Soˈlin o Tapang nangra cingra, kawra cowa ka tano fadangalan a miroero cangranan, paihkal to saaroˈan no niyah. Ao tano o misapoeneray a micada to nisawawaan. (Yohani 13:12-17) Pasowalan ni Yis ko nisawawaan: ‘Todongen namo kako, samanen lopayˈay ko falocoˈ, misapoeneray kako. Mihaen, wa sinowayen kamo.’ (Matay 11:28-30) Sinanoten, lopayˈay ko falocoˈ ni Yis. O lopayˈay i, cowa ko malonayay a waywayan, lopayˈay ko falocoˈ a tamdaw tanektekay ko nafalocoˈan nangra, mafanaˈay miˈimer to niyah. Soˈlin mapakararaw no tao, kamayan cingra cowa ka marawraw a maketer.

12. I sasowalen o manan ko materekay ni Yis a taˈarawan?

¹² Maceriday ci Yis tano sasowalen pakalalok a mihinom to tao. Cowa ko midokaˈay pakararomay to tamdaw ko sasowalen. (Luka 8:47, 48) Soˈlin misamsam ko misafelitay a tamdaw cingranan, sapakaketeraw cingranan, kawra cowa ka picoˈay ci Yis cangranan. (1 Pitiro 2:21-23 ato roma pihongyak.) Nolatekay, terep sanay cingra, cowa ka tano midokaˈay a sasowalen a pacaˈof. (Matay 27:12-14) Tada o ngaˈayay taˈarawan no faˈinay ci Yis!

13. Sasamaan ko demak no faˈinay ngaˈ, ngaˈay ‘tahadaˈoc kalacafay to fafahi’? (Matay 19:4-6) (Nengnengen ko coka.)

¹³ Pakafanaˈay ci Yis to faˈinay a madimadi to fafahi. Misakadademak cingra to sowal no kakarayan Wama a pasowal, o faˈinay ‘tahadaˈocen kalacafay to fafahi.’ (ˈOsien ko Matay 19:4-6.) ‘Tahadaˈoc kalacafay’ no Krisiya sowal a tatodong i, o “makaketingay” sanay. Mansa, mamalacafay ko mararamoday, mahecad makaketingay no ˈadeteng. O mahaenay a kalalaˈed ano mapalak i, wa madokaˈ ko mararamoday tatosa. Ano misetek to falocoˈ ko faˈinay tahadaˈoc kalacafay to fafahi, o cowato ko maminengneng to kaacekan maˈodangay a lalakaw. Ano ira ko sakayhid i, wa tangsol cingra miliyas, ‘cowa ka minengneng to awaay ko epoc a demak.’ (ˈOlic 119:37) Mahecad to mikiˈokay cingra to mata no niyah, cowa ka pamotek sa minengneng to roma fafahiyan a mikidat to mararaway harateng.—Yopu 31:1.

14. Ano ira ko mikariˈangay to fafahi a pinangan no faˈinay, o manan a pakayraan ko sasalofen ningra, ho malakangaˈay ko kalalaˈed aci Yihofaan ato fafahi?

¹⁴ Masowalay isawni a lalakaw, oya itini i tireng ato sasowalen a mikariˈangay to fafahi a tamdaw, iraayho ko sasalofen nangra a demak, malakangaˈay ko kalalaˈed aci Yihofaan ato fafahi. O manan ko hapakayraan hani? Saka cecay, mamihayi ko niyah to iraay ko pakidemay a dangoc. Haratengen, maˈaraway ni Yihofa ko kahacecay midemakan no mita, matengilayho ko sowal no mita. (ˈOlic 44:21; Patnakay 12:14; Hipray 4:13) Saka tosa, falahen ko mikariˈangay to fafahi a waywayan, halo misatapang a mafalic. (Taneng 28:13) Saka tolo, pasowalen ko fafahi aci Yihofa to raraw no niyah a miliˈay, micangacang to sasodod nangra. (Dmak 3:19) Tolonen ci Yihofa, micangacang to sapadama Ningra a makahi mifalic to niyah, aira ko ˈicel miˈimer to harateng, sasowalen ato waywayan. (ˈOlic 51:10-12; 2 Korinto 10:5; Filipi 2:13) Saka sepat, doedoen ko satolon no niyah a midemak, malalok minanam ciˈinteh to kihcod a mikariˈangay. (ˈOlic 97:10) Saka lima, tangsolen mikilim ko malohemay malitengay no kasakopang to sapadama. (Yakop 5:14-16) Saka enem, misaˈosi to patosokan, ho eca ka miliyaw a mararaw. Oya minengnengay to kaacekan maˈodangay a lalakaw a faˈinay, oha mamidoedo to masowalay isawni a enemay a pakayraan. Misaˈicel ko faˈinay a mifalic, oha mamilifok to sapalemed ni Yihofa. (ˈOlic 37:5) Kawra o pifalah aca to cowa pikangodo to fafahi a waywayan cowaho ka edeng, oha maminanamho ko faˈinay paihkal to olah ato mikangodoay to fafahi. Sasamaan ko demak hani?

SASAMAAN MACADA NO FAFAHI KO OLAH ATO MIKANGODOAY?

15. Sasamaan ko faˈinay a paihkal to olah to fafahi hani?

¹⁵ Paihkal to olah. ˈAlomanay rahekeray ko kaˈorip a ciraramoday a faˈinayan salikaka, iraay ko ngaˈayay pinangan, to romiˈamiˈad midemakay to pina demak a paihkal to olah to fafahi. (1 Yohani 3:18) Ano mimingayto a demak wa macada no fafahi ko olah, tinakoen, mikiting to kamay ningra anca mitakec cingranan. Ngaˈayayho pakayni i soci a palihaf, pasowal to “maˈilolay kako tisowanan,” anca licayen: “Samaanay kiso anini a romiˈad?” Nolatekay, palaken ko toki misangaˈ to kato a pakahemek to fafahi. Ano mihaen ko demak no faˈinay, wa macada no fafahi ko olah ato mikangodoay, o raramod wa makakedecto.

16. Hano pakahemeken no faˈinay ko fafahi hani?

¹⁶ Paihkal to miakoˈiday. O ngaˈayay faˈinay maceriday pakalalok to fafahi, ho mafanaˈ ko fafahi to misakaretengay ko niyah cingranan. Aka a mapawan no faˈinay a miakoˈid to midemakay no fafahi a kihcod. (Kolosay 3:15) Ano mikifalocoˈ a pakahemek ko faˈinay to fafahi, wa dihkoen ko falocoˈ no fafahi to misakaretengan no faˈinay ko niyah a dipayalen ko falocoˈ.—Taneng 31:28.

17. Sasamaan ko faˈinay mikangodo to nafalocoˈan no fafahi hani?

¹⁷ Sinanoten ko nafalocoˈan no fafahi ato kasenengan ningra. Ano maolahay ko faˈinay to fafahi, wa misalimla cingranan, hato nao sapatelong ni Yihofa cingra to niyah. (Taneng 18:22; 31:10) Mihaen ko falocoˈ no faˈinay, wa mikangodo to fafahi, sidaˈit a micada cingranan, ano o notekedanto a demak i, kamayan mihaen. I madadiˈiyay a demak i, cowa ko mamipacieci to fafahi, ecato ka rihaday ko falocoˈ ningra, hato masakahmaway ko niyah saan a miharateng.f Wa misaˈicel ko faˈinay i kaˈayaw ni Yihofa mitawmec to makoracay a makapahay falocoˈ.—Dmak 24:16.

18. Sasamaan ko faˈinay misetek to falocoˈ a midemak? (Nengnengen ko sapatongal lalakaw “Macada no Fafahi ko Mikangodoay a Sepatay Kalimlaan a Pakayraan.”)

¹⁸ Malo faˈinay, misaˈicel kiso i kalo a demakan no kaˈorip mikangodo to fafahi, maˈaraw ni Yihofa wa mahemek Cingra. Seteken ko falocoˈ eca ka pidokaˈ to fafahi, sidaˈiten a micada ko fafahi. Mihaen ko demak iso o paihkalay to maolahay to fafahi, misalimla cingranan. Masakalimlaan i, mikangodo kiso to fafahi, wa madipot ko sangaˈayay kalawidang aci Yihofaan.—ˈOlic 25:14.