Todongen ci Yis Fanekfek ko Falocoˈ Mitosil

1. O Misawacayay Tamdaw ni Yihofa ato misao Krisciyangay a tamdaw icowaay ko cowa ka hecad?

O MISAWACAYAY Tamdaw ni Yihofa fanekfekay ko falocoˈ mitosil, oniya demak pakayra cangranan tora misao Krisciyangay a tamdaw cowa ka hecad. (Titus 2:14) Nolatekay, alatek kiso to mitosilay a demak awaay ko saloingaw. Mahecaday kiso to cecay malohemay malitengay alatek, soˈlin malalok cingra matayal ci Yihofaan, kawra sanay ko sowal ningra: “Nolatekay cowa sakalingadaw kako mitosil.”

2. Misamaanay itini pitosilan a demak fanekfek ko falocoˈ cowa ko madoloay?

² Palalinien to mitosilay a demak i, alatek tada maolah kita to roma a kadademakan. Tinakoen mirienang tono likakawa no Kawas a patirengay ato mitomadaway a tayal, midama ato pakalalok to tahapadesay a salikaka. Misamaanay hani? Samanen mirienang toniya tayal i, alatek tangsol maˈaraw ita ko minaroˈan, milifok to lipahak. O roma i, masemeray kita malacafay to salikaka a matayal, o hatiraay makakedecay ciolahay a pakayraan, mafanaˈayho kita miakoˈid ko salikaka to pisaˈicel no mita. Kawra o mitosilay a demak samaanay aki? Alatek kinapinapinaayto kita to cecay kilac a mitosil to pina miheca, kawra ˈalomanay a tamdaw awaay ko misikolay, cowa ka ngaˈay ko roma tamdaw kitanan. Roma i, maraodto ko salikoray a romiˈad, o mitosilay ita a demak alatek mangalef mangalef ko picoli no tao, mafanaˈ tonini alatek wa pasangaren kita a midemak. (Matay 10:22) Mihaenay i, misamaan kita ngaˈ eca ka lahdaw ko tawlikay ita, hanaca mangalef ko nika fanekfek hani?

3. Pakayni to waywayan ni Yis to mitosilay a tayal, mikitini i Luka 13:6-9 a sapatinako o manan ko mananamay ita?

³ Saharateratengen ko taˈarawan ni Yis, ngaˈay padama kitanan itini mitosilay a demak padadotoc a fanekfek. Mitosil ci Yis i fafekangho no sera i, cowa ka fasaw ko fanekfekay ningra to mitosilay a demak. Soˈlinay i, mataˈlifto ko toki i, mangalefay ko nika fanekfek ningra. (ˈOsien ko Luka 13:6-9.) Itira to cecay a sapatinako sanay ci Yis, iraay ko maomahay no fadisosoˈ toloay a miheca misongilaˈ a midimokos to cecay sokon a kilang, kawra awaay ko malidongay a minaroˈan. Mahecaday toni, toloay a miheca mitosil ci Yis to Yutaya a tamdaw, kawra ˈalomanay a tamdaw cowa ka mala nisawawaan ningra. Soˈlin mahaen, cowa ka sawaden ni Yis cangra a mitosil, mahecad to maomahay no fadisosoˈ cowa ka pisawad tora sokon a kilang. Soˈlinay i, mangalefay ko nika fanekfek ni Yis mitosil to Yutaya a tamdaw mipatemer to falocoˈ nangra.

4. Wa icowa a sepat pakayraan minanam kita ci Yisan?

⁴ Oniya lalakaw wa milengo, ci Yis itini fafekang no sera a salikoray enem a folad samaanay fanekfek a mitosil. (Nengnengen ko 《精讀本》注釋: “Ikor nora demak” no Luka 10:1.) Mitooran ita ko sapakafanaˈ ni Yis a kimad ato patirengay ningra a taˈarawan midemak, ngangaˈay padadotoc fanekfek mitosil. Dotoc nengnengen ita, itini i sepat pakayraan patirengan ni Yis a taˈarawan: (1) Misamacay cingra to araaw ni Yihofa. (2) Misinanotay cingra to sapairasol no Fangcalay Cudad. (3) Mitiˈeran ningra ko sapadama ni Yihofa. (4) Padadotocay cingra a tawlik, pakasoˈlin to wa ira ko micadaay to soˈlinay kimad a tamdaw.

MISAMACAYAY CI YIS TO ARAAW NI YIHOFA

5. Hano mafanaˈ kita to misamacayay ci Yis to araaw no Kawas?

⁵ Fanekfekay ci Yis milasil to ‘Kitakit no Kawas a ngaˈayay lihaf,’ samanen mafanaˈay cingra o sacorcor ni Yihofa cingranan konini a demak. (Luka 4:43) Paisalakatan ni Yis ko mitosilay a tayal i nokaˈorip ningra, soˈlin salikorayto a pina a folad i fafekang no sera cingra, kamayan cingra a malalok, ‘pakaniyaroyaroˈ a pakafanaˈ to tamdaw. (Luka 13:22) O roma i, pahatatanaman ningra ko adihayay nisawawaan malacafay cingranan milasil to ngaˈayay a lihaf.—Luka 10:1.

6. Makalimay ci Yihofa samaanay ita ko pinengneng to mitosilay demak? O romaroma fangcalay a tayal, samaanay milingat to mitosilay demak? (Nengnengen ko coka.)

⁶ Anini, papidemakan ni Yihofa aci Yis kita a masakalimlaan a tayal o mitosilay. (Matay 24:14; 28:19, 20) O romaroma fangcalay a tayal sahtoay o midamaay to mitosilay. Tinakoen, patireng kita to Kasaˈopoan, o papadama to mitosilan ita a tamdaw kalacafay kitanan itira midoko ci Yihofaan. Itini kita i Pitil matayal, o midamaay to saali no kilac. Roma i, mirienang kita to padamaay to tahapadesay a tayal, ho ngaˈay macada no salikaka ko sakaˈorip a dafong, wa padama cangranan patatikol ko mitosilay ato roma midokoay a demak. Itiniay i Siyungyali a malohemay malitangay ci Anos, sanay cingra: “O romaroma fangcalay a tayal, cowa ko mamikotay to mitosilay a tayal, samanen o mitosilay o sapafeli ni Yihofa kitanan a masakalimlaan a ˈinorong.” Haratengen, o masakalimlaan ko mitosilay a demak sanay ci Yihofa, wa pakalalok kitanan micerid milasil to ngaˈayay lihaf to tamdaw.

7. Hano halamham ci Yihofa kitanan padadotoc mitosil hani? (1 Timoti 2:3, 4)

⁷ Ano pahecad kita ci Yihofaan ciharateng to tao, wa fanekfek a mitosil. Halamhamay ci Yihofa to ˈalomanay tamdaw pakatengil a micada to ngaˈayay lihaf. (ˈOsien ko 1 Timoti 2:3, 4.) Mihaenay, pahatatanamay Cingra kitanan tano ciepocay a pakayraan paladaˈ toniya ngaˈayay a lihaf. Tinakoen, o likakawa ni Yihofa mitepangay to Tano Olah Padama to Tamdaw Malo Krisciyang, oniya kihpicay casi mihadakay to adihayay ciepocay a sapaini, padama kitanan mafanaˈ sasamaan misatapang malalengo to tamdaw, ano mihaen i, matengil no tamdaw ko ngaˈayay lihaf ikor, alatek mamakahi minanam to Fangcalay Cudad, salikorto i malo Krisciyang. Soˈlin, cowa ka kahi ko tamdaw micada to ngaˈayay lihaf nohatini, kawra ˈayaw no hererek no taˈangayay padiing i, iraho ko hatoki nangra mafalic. Anoikor, alatek maharatengay nangra ko sowal ita, makahi a midoko ci Yihofaan. Kawra haratengen, edengan padadotoc kita mitosil, ngaˈ alatek mamifekad toniya demak.

MISINANOTAY CI YIS TO SAPAIRASOL NO FANGCALAY CUDAD

8. Mafanaˈay ci Yis to manamanan a sapairasol a misaˈicel misakadademak to toki?

⁸ Cipinangay ci Yis to sapairasol no Fangcalay Cudad wa misamaan a malaˈosi. Tinakoen, mafanaˈay cingra itini fafekang no sera o pitosil ningra toloay aca miheca ira ko kalitosa, mafanaˈayho to mamicada cingra to pisamsam a mapatay. (Taniil 9:26, 27; Luka 18:31-34) Mihaenay, itira tora citolasay a tatokian milahci to sapatorod ni Yihofa a ˈinorong, misakadademakan ningra ko toki, tada fanekfekay cingra mitosil.

9. Cipinang to sapairasol no Fangcalay Cudad hano pakalalok kitanan fanekfek a mitosil hani?

⁹ Mikitini kita i sapairasol no Fangcalay Cudad a mihapinang, cowato ka hakowa ko toki noniya hekal, pakalalokay koni kitanan fanekfek a mitosil. Mikitini to aniniay mifekaday a demak ato waywayan no tamdaw, mahapinangayto ita pakayni i salikoray romiˈad a sapairasol no Fangcalay Cudad malaˈosiayto. Mikitini Ikok ato Padaka Tada Ciˈicelay a Kitakit no Hekal ato Rowasiya makakadepay a kasasongtol, mahapinang ita pakayniay i katimol ato kaˈamis a hongti a sapairasol itini toniya ‘salikorayto a lintad’ malaˈosito. (Taniil 11:40) O roma i, mafanaˈay kita to masowalay no Taniil 2:43-45 a ooˈ no taˈangayay faco, o Ikok ato Padaka Tada Ciˈicelay Kitakit no Hekal. Pakasoˈlinay kita toniya sapairasol, o Kitakit no Kawas wa tangsol sa palaˈafo to kihcod a sifo no hekal. Oniya sapairasol paihkalay to kaˈoripan ita a lintad nohatini, pakalalok kitanan koni tawlik a fanekfek ko falocoˈ a mitosil.

10. Sasamaanho kita mikitini i sapairasol no Fangcalay Cudad mapakalalok, padadotoc fanekfek a mitosil?

¹⁰ O sapairasol no Fangcalay Cudad a makapahay hatokel pakalalokayho kitanan mangalef fanekfek a mitosil. Matayalay i Tominika a salikaka ci Kari sanay ko sowal: “Maharateng ako ko sakiˈok ni Yihofa to hadademaken anoikor, oha sapaladaˈaw to tamdaw kako. Maˈaraw ako ko kaˈorip no tamdaw nohatini tada marorayay, cipinangayto kako to misaaliay cangra mafanaˈ to makapahay mikiˈokan ni Yihofa.” Roma i, o sapairasol no Fangcalay Cudad pakafanaˈay kitanan, mamidama ci Yihofa to pitosil ita, mansa cowa ko mamisawad kita, ao padadotoc misaˈicel milasil to ngaˈayay lihaf. Itiniay i Siyungyali a Layla sanay: “Mikitini Isaya 11:6-9 mananamay ako, iraay ko sapadama ni Yihofa, o cimato a tamdaw ngaˈayay mifalic. Mihaenay, o roma tamdaw nengneng han alatek cowa ko mamicada to soˈlinay kimad, kamayan kako misaˈicel mitosil cangranan.” Naitiniay i Campia a Kristofo sanay: “Mahecad to sapairasol no Marko 13:10, o ngaˈayay lihaf mapatenakayto itini i kasakitakit ato kasangasaw. Ngaˈayay midama toniya sapairasol malaˈosi, tada kalikoan ako koni.” Iraayho ko manan a sapairasol no Fangcalay Cudad pakalalok tisowanan fanekfek a mitosil hani?

MITIˈERAY CI YIS TO SAPADAMA NI YIHOFA

11. Hano tiˈeren ni Yis ko sapadama ni Yihofa ngaˈ, padadotoc fanekfek a mitosil? (Luka 12:49, 53)

¹¹ Mitiˈeray ci Yis to sapadama ni Yihofa, padadotoc fanekfek a mitosil. Soˈlin matatodong ko sowal ni Yis, kawra mafanaˈay cingra tora mitosilan ningra a lihaf, mamikidat to taˈangayay a lacongis, ato pakidemay a pisafelit. (ˈOsien ko Luka 12:49, 53.) Teliˈiay ko ˈaˈideman no pihakelongan to mitosilay tayal ni Yis, kinapinaay sapipatayaw cingranan. (Yohani 8:59; 10:31, 39) Kawra, cowa ka hawaden ni Yis ko pitosil, samanen mafanaˈay cingra kalacafayen ni Yihofa cingra. Sanay ko sowal ni Yis: ‘Micorcoray takowanan a Wama kalacafayay takowanan. Cowa ka falahen Ningra kako, cowa pakateked han kako, samanen ihacowato a toki midemakay kako to kahemekan Ningra.’—Yohani 8:29.

12. Misamaanan ni Yis padama ko nisawawaan misongilaˈ a misaday, soˈlin tahalifa to saconged i padadotocay a mitosil?

¹² Patalipaˈelalay ci Yis to nisawawaan, ano hacowato a toki mamitiˈer to sapadama ni Yihofa. Saliyaliyaway ci Yis a mikiˈok to nisawawaan, soˈlin tahasiˈayaw cangra to saroero i, papadamaen ni Yihofa cangra. (Matay 10:18-20; Luka 12:11, 12) Mafanaˈay ci Yis mamisafelit ko ˈalomanay to nisawawaan, mansa pakafanaˈan cangra to hamamisinanot. (Matay 10:16; Luka 10:3) Pasowal ci Yis to nisawawaan, ano cowa ka kahi mitengil ko tamdaw to ngaˈayay lihaf i, hamaan a paciecien ko tao. (Luka 10:10, 11) Pakafanaˈayho cingra cangranan, ano icowa tahalifa to hakokay i, liyasen kora pala sanay. (Matay 10:23) Mihaenay ko demak ni Yis, soˈlin fanekfekay ko falocoˈ ningra, mitiˈeray ci Yihofaan, kawra, tahalifa cingra to katalawan i, miliyasay cingra.—Yohani 11:53, 54.

13. Misamaanay hano pakasoˈlin to papadamaen ni Yihofa kiso hani?

¹³ Anini, misaaliay kita to sapadama ni Yihofa, ho tahalifa to saroero i, padadotoc fanekfek a mitosil. (Paˈarawan 12:17) Hano pakasoˈlin to hapapadamaen ni Yihofa kiso hani? Nengnengen itini Yohani saka 17 fedengan a satolon ni Yis. Micangacangan ni Yis ci Yihofa midimokos to tarokos ningra, pacaˈofan ni Yihofa koniya satolon. Maˈoningay itini Dmak samaanay ci Yihofa padama to nisawawaan tahalifa to saroero i padadotoc a mitosil. Roma, itini satolon i, mingitangitayho ci Yis ci Yihofaan midimokos to roma ˈopo a tadmaw, oya pakayniay to pitenak no tarokos a ngaˈayay lihaf paihkal to pakasoˈlinay falocoˈ a tamdaw, mahawpay kiso. Padadotocay ci Yihofa pacaˈof to satolon ni Yis, wa padamaen Ningra kiso, mahecad to pipadama Ningra to tarokos.—Yohani 17:11, 15, 20.

14. Hano papakasoˈlinen ita, soˈlin misiˈayaw to pasangar i, wa ngaˈay fanekfek a mitosil hani? (Nengnengen ko coka.)

¹⁴ Mangata mangatato ko salikoray a romiˈad i, itini pitosilan alatek wa mangalef ko mamacada ita a pasangar, kawra mikiˈokay ci Yis kitanan, mamilifok kita to sapadama. (Luka 21:12-15) Nohatini, itini makecengay pitosilan a kilac, kamayan ko salikaka fanekfek a milasil to ngaˈayay lihaf, samanen mitiˈeray cangra ci Yihofaan, cowa ko niyah a ˈicel ko mitiˈeran. Isaka 1 hahekalan, pafelian ni Yihofa ko sikawdan Ningra to ˈicel, aninito pafelienho Ningra to ˈicel kita, ho ‘masongilaˈ malahci ko mitosilay a tayal’ ita, tahira i karahekeran Ningra. (2 Timoti 4:17) O roma i, ano mitiˈer kita ci Yihofaan i, mamitodongho ci Yisan ato nisawawaan ningra. Papisaˈosian ita ko tao to mamicada to ngaˈayay lihaf hokira, cowa ko mamalacongis kita to tao. Papakasoˈlinen iso, ano mitiˈer kiso ci Yihofaan, wa ngaˈay fanekfek a mitosil.

PADADOTOCAY CI YIS A TAWLIK

15. Hano mafanaˈ kita pakayni to mitosilay a demak padadotocay ci Yis a tawlik hani?

¹⁵ Pakayni to mitosilay a demak padadotocay ci Yis a tawlik, onini padamaay cingranan fanekfek a mitosil. Tinakoen, hererek no Kongyen 30 miheca, mahapinangay ni Yis ko ˈalomanay tamdaw makahi mitengil to ngaˈayay lihaf, patinakoan cangra to o hangangaˈayto a panayen. (Yohani 4:35) Maedeng ikor no cecay miheca, pasowalan ni Yis ko nisawawaan: ‘Adihayayho konini a papanayen.’ (Matay 9:37, 38) Ikor, miliyaway ci Yis a pasowal: ‘Adihayayho konini a papanayen, . . . mingitangiten namo ko tawki no omah, miocor to maomahay a milidong to panay ningra.’ (Luka 10:2) Pakasoˈlinay ci Yis to wa ira ko tamdaw micada to ngaˈayay lihaf, maˈaraw ko tamdaw mihaen to demak i, mahemekay cingra.—Luka 10:21.

16. Samaanan ni Yis pakayni sapatinako a mitadtad, o nisawawaan ningra pakayni i mitosilay a tayal papairaen ko tawlikay a waywayan hani? (Luka 13:18-21) (Nengnengen ko coka.)

¹⁶ Pakafanaˈay ci Yis to nisawawaan, pakayni to mitenakan nangra a lihaf pairaen ko tawlikay a waywayan, samanen wa mapakalalok cangranan padadotoc fanekfek a mitosil. Nengnengen ko tosa a sapatinako ni Yis. (ˈOsien ko Luka 13:18-21.) Tano sapaloma no kolang ko sapatinako ni Yis pasifanaˈ to nisawawaan, micadaay to lihaf no Kitakit a tamdaw wa ira ko kafahkaˈ a nikacakat, awaay ko mamiconged toniya demak. Tano tamodan ningra a sapatinako a mitadtad, o ngaˈayay lihaf no Kitakit wa mapatenak tahira i ra:ayay a pala, hanaca mafalicay ko tamdaw, alatek o mahaenay a kafalic, isalakat cowa ka hapinang. Pakayni toniya tosa a sapatinako mikiˈokan ni Yis ko nisawawaan, o mitenakan nangra a lihaf o papadama to ˈalomanay a tamdaw.

17. Hano tawliken ita itini i pitosilan a demak hani?

¹⁷ Ano misongilaˈ kita miharateng to itini paro no kakarayan mitosilay a tayal taˈangayay ko minaroˈan, macadaay ita ko sapakalalok padadotoc fanekfek a mitosil. Mihecahecaan, pinaay soˈot a efang ko maolahay to Fangcalay Cudad a tamdaw mirienang to Piharatengan to Kinafalah ni Yis a Saˈopo, malacafayay kitanan minanam to Fangcalay Cudad. O roma i, mihecahecaan ˈalomanay ko mipaputisemay a tadmaw, halo malacafay kitanan a mitosil. Soˈlin cowa ka fanaˈ kita hakowaho ko tamdaw mamicada to mitenakan ita a lihaf, kawra mafanaˈay kita palisopsopan ni Yihofa ko ˈalomanay ˈopo a tamdaw, oniya tamdaw wa maˈorip pakataˈlif to taˈangayay padiing i noikor. (Paˈarawan 7:9, 14) Nohatini, papipanayay a tawki kamayan a pakasoˈlin wa ˈalomanho ko mamicada to soˈlinay kimad, mansa, matomesay ko halalangian ita padadotoc mitosil.

18. Ciharatengay kita to sakacipinangaw no tao to manan hani?

¹⁸ Soˈliˈlinay nisawawaan ni Yis padadotocay fanekfek milasil to ngaˈayay lihaf no Kitakit. Mihaenay, maˈaraw no tamdaw ko tarokos patodicek a mitosil i, tangsolay ‘mahapinang nangra oniya tatosa a tamdaw na mikotoday ci Yisan.’ (Dmak 4:13) Anini, makalimay kita padadotoc mitodong ci Yisan, fanekfek a mitosil. Mihaen i, alatek mahapinang no tamdaw, soˈliˈlinay mikotod ci Yisan kita.