“Piliˈen ko Hahodopen Namo”

1. Sapilifokaw to soˈlinay a lipahak i, samaanen ita ko demak hani? Misamaanay? (Isaya 48:17, 18)

MAOLAHAY ko ikakarayanan a Wama kitanan, ano hatinito ano ikorto nanay ira ko rahekeray nokaˈorip. (Patnakay 3:12, 13) Pafelian Ningra kita to inaneng, ho ngaˈay midemak kita to tadamaanay a demak, kawra cowa pafelien Ningra kita to inaneng a mikowan to niyah, ato misaˈosi to ngaˈayay tatiihay a palinian. (Patnakay 8:9; Yirimiya 10:23) Mafanaˈay Cingra to hadadokoen no mita Cingra, halo midoedo to palinian Ningra a maˈorip, ngaˈ milifok kita to soˈlinay a lipahak.—ˈOsien ko Isaya 48:17, 18.

2. Papiharatengan ni Satan kita pakasoˈlin to maanan? Samaanay ko demak ni Yihofa?

² Papiharatengan ni Satan kita wa ngaˈay mikowan to niyah sanay, ano awa ko Kawas mamahemek ko kaˈorip sanay. (Satapangan 3:4, 5) Sapisawacayaw to misamangahay ci Satan, papikowanan ni Yihofa ko tamdaw to cecay liyad. ˈArawhan i, mikowan no tamdaw pairaay to adihayay roray, tada mapasokiyaway koni. Kawra ano ˈosien ita ko Fangcalay Cudad wa mafanaˈto, ˈalomanay tamdaw midoko ci Yihofaan ira ko mahemekay rahekeray nokaˈorip, o sangaˈayay a taˈarawan ci Yis Kristo. Oniya lalakaw mamilengo, hano ci Yihofa ko hadadopoen ni Yis, ikor mamilengo hano citatodongay ci Yihofa to dadokoen no mita. Saikoray nengnengen ita mipiliˈ kita midoko ci Yihofaan a lalangian.

HANO MIPILIˈ CI YIS MIHODOP CI YIHOFAAN

3. Samaanay ci Satan mikayhid ci Yisan? Samaanay ko pipiliˈ ni Yis hani?

³ I fafekangho no sera ci Yis i, papaira to mipiliˈay, misaˈosi to o cima ko hahodopen no niyah. Micada ci Yis to paputisem ikor caka halafin, mikayhidan ni Satan ci Yis, kinacecay aca ci Yis mipitoros midoko cingranan, wa malifok ningra ko polong no hekal sanay. Pacaˈof ci Yis: ‘Satan, ka piliyas! Samanen sanay ko maˈoningay i Fangcalay Cudad: “Ka pidoko ci Yihofaan o Kawas iso, edengan Cingra ko dadokoen.”’ (Matay 4:8-10) Misamaanay hano o mahaenay ko pipiliˈ ni Yis hani? Nengnengen ita ko pina lalangian.

4-5. Mipiliˈan ni Yis midoko ci Yihofaan a roma lalangian o manan hani?

⁴ Mipiliˈan ni Yis midoko ci Yihofa sakakaay lalangian i, o olah. Tangongolay ko olah ningra to kakarayan Wama. (Yohani 14:31) Roma i, mipiliˈan ni Yis to midoko ci Yihofaan, o matatodongay a demak koni. (Yohani 8:28, 29; Paˈarawan 4:11) Mafanaˈay cingra ci Yihofa ko Pipowaran no ˈorip, soˈlinay ngaˈayay tiˈeren, hinalafangay hinapaladaˈay. (ˈOlic 33:4; 36:9; Yakop 1:17) Sahtoay o soˈlinay ko sowal ni Yihofa ci Yisan, o kihcod ni Yis sahtoay o sapafeli ni Yihofa. (Yohani 1:14) Kawra ci Satan aci Yihofa cowa ka hecad, cingra ko pairaay to patay ato raraw no tamdaw. Maˈanofay cingra a maˈidi, o pipowaran no kihcod a mangah cingra. (Yohani 8:44) Tangongolay ko kafanaˈ ni Yis ci Yihofaan, mafanaˈay cingra to kihcod ni Satan, mansa cowa ka piharateng cingra mahecad ci Satanan a mitowakang ci Yihofaan.—Filipi 2:5-8.

⁵ Mipiliˈ ci Yis midoko ci Yihofaan a roma lalangian i, mihaen cingra to demak pairaay to ngaˈayay a minaroˈan. (Hipray 12:2) Mafanaˈay cingra ano tahacerem ko nika madimadi i, papatalahkal to fangcalay ngangan no kakarayan Wama, mamisongilaˈ mapalahdaw ko pairaan ni Satan a kihcod a roray ato pades.

HANO CITATODONGAY CI YIHOFA TO DADOKOEN NO MITA

6-7. Anini misamaanay hano ˈaloman ko tamdaw cowa ka pidoko ci Yihofaan? Hano edengan ci Yihofa ko citatodongay dadokoen no mita?

⁶ Anini, ˈalomanay tamdaw cowa pidoko ci Yihofaan, samanen cowa ka fanaˈ cangra to makapahay capeling ni Yihofa, cowa ka fanaˈ cangra to o manan ko nidemakan no Kawas cangranan. O pakayraan nangra mahecaday to mitosilan ni Pawlo itini i Atin a tamdaw.—Dmak 17:19, 20, 30, 34.

⁷ Pasowalan ni Pawlo ko Atin a tamdaw, ‘o ˈorip, saselaˈan kihcod sahtoay sapafeli’ no Kawas. Sanayho ko sowal ni Pawlo: ‘Ira ko ˈorip ita i, ngaˈay dademak, taterek, sahtoay mitiˈer Cingranan.’ O Misangaˈay a Tatapangan ci Yihofa, ‘mikitini cecay a tamdaw ko masangaˈay to kasakitakit kasafinacadan,’ mansa edengan Cingra citatodongay to hadadokoen no mita.—Dmak 17:25, 26, 28.

8. Cowa ko mamidemak ci Yihofa to manan? Tadtaden hena.

⁸ Misangaˈay a Tatapangan ci Yihofa, Saˈakawangay a Tatapangan no dohaw, oha ngangaˈay Cingra pacieci to tamdaw midoko Cingranan, kawra cowa pihaen ko demak Ningra. Halamhamay Cingra to tamdaw citaneng a mipiliˈ, mansa pairaen Ningra ko wacay padama kitanan pahapinang soˈlinay materek Cingra, hanaca maolahay Cingra kitanan to kahacecay tamdaw. Pairaen Ningra ko toki tahadaˈoc mala widang Ningra, hanaca o mahaenay a tamdaw ˈaloman ˈaloman ngaˈ ngaˈay. (1 Timoti 2:3, 4) Mihaenay, ci Yihofa pahatatanamay kitanan pakafanaˈ to tao, pakafanaˈ to tamdaw o manan ko araaw Ningra, ato hanoikor o manan ko hasapalemed Ningra to tamdaw. (Matay 10:11-13; 28:19, 20) Palikakawaan ni Yihofa ko midokoay Cingranan a tamdaw malo kasakopang, ho ngaˈay kita malacafay to salikaka mihodop Cingranan, halo micada to ciharatengay ato pidimokos no malohemay malitengay.—Dmak 20:28.

9. Misamaan pakahapinang kita to olah ni Yihofa awaay ko pakafiloay?

⁹ Saharateratengen ita misamaanay ci Yihofa micada to cowa pakasoˈlin to iraay materek Cingranan a tamdaw, wa mahapinangto ita o olah Ningra awaay ko pakafiloay. Pinato caˈol miheca i, ˈalomanay tamdaw mipiliˈay to mitoor to no niyah a harateng maˈorip, kawra kamayan ci Yihofa sidaˈit cangranan, ho ngaˈay cangra padadotoc maˈorip padadotoc mahemek maˈorip. (Matay 5:44, 45; Dmak 14:16, 17) Ho ngaˈay cangra ira ko olah no salawina ato widang, mahofoc to teloteloc, milifok to nika lalok no pitayalan a mahemek. (ˈOlic 127:3; Patnakay 2:24) Oniya wacay paihkalay, tada maolahay ci Yihofa to tamdaw. (Kasadakan 34:6) Dotoc tikolen ita miharateng, mipiliˈ kita midoko ci Yihofaan a lalangian, ato sapafeli Ningra kitanan to manan a sapalemed.

HANO MIPILIˈ KITA MIHODOP CI YIHOFAAN

10. (1) Mipiliˈ kita mihodop ci Yihofaan o sakakaay lalangian, o manan hani? (Matay 22:37) (2) Mafanaˈay kita sapisododaw ci Yihofa tisowanan, samaan ko harateng iso hani? (ˈOlic 103:13, 14)

¹⁰ Mahecad ci Yisan, mipiliˈan ita mihodop ci Yihofa, sakakaay lalangian i, maolahay kita Cingranan. (ˈOsien ko Matay 22:37.) Mangalef ko nika fanaˈ kita to adihayay makapahay capeling ni Yihofa, sapiingidaw Cingranan. Tinakoen, makahiay ci Yihofa misodod to tamdaw. Haratengen hena, soˈlin misafelit ko Israil tamdaw Cingranan, misalopayˈay Cingra mirikec cangranan: ‘Ka patatikol kamo! Liyasen ko mararaway waywayan.’ (Yirimiya 18:11) Maharatengay ci Yihofa to o nano sera kita, cowa ko malefotay a mararaway tamdaw. (ˈOsien ko ˈOlic 103:13, 14.) Haratengen kinapinaay ci Yihofa misodod tisowanan, samaanay paihkal to makapahay capeling Ningra, tada mitemeray tisowanan toha tahadaˈoc mihodop Cingranan han?

11. Mipiliˈ kita midoko ci Yihofaan iraayho ko manan lalangian?

¹¹ Mipiliˈ kita midoko ci Yihofaan, samanen o matatodongay a demak koni. (Matay 4:10) O roma i, mafanaˈay kita ano madimadi ci Yihofaan ko niyah, wa paira to makapahay a minaroˈan. Wa palosiyang kita to fangcalay ngangan ni Yihofa, misawacay to o makaniway ci Satan, wa ngaˈayho pakahemek ci Yihofaan. Cowa konini aca, nohatini kita mipiliˈ midoko ci Yihofaan, ira ko makapahay a hanoikor, ira ko toki ita tahadaˈoc midoko Cingranan.—Yohani 17:3.

12-13. Mikitini nalifetan ni Cemni aci Pamei o manan ko mananamay ita?

¹² Mimingho kita ngaˈayayto palahad to olah ci Yihofaan, hanaca taˈlif ko toki o hatiniay a olah ngaˈayay matongal. Nengnengen ita ko nalifetan no malikakaay ci Cemni aci Pamei.a Satapang cangra minanam to Fangcalay Cudad i, ci Cemni 11 ko mihecaan, ci Pamei 10 ko mihecaan. O wama wina nangra cowa ka olah minanam to Fangcalay Cudad, kawra makahiay minanam cangra ato Misawacayay Tamdaw ni Yihofa, kawra padadotocay cangra malacafay to paro no lomaˈ tayra i kiyokay. Sanay ci Cemni: “Samanen itini Misawacayay Tamdaw ni Yihofa mananamay ko soˈlinay kimad, mansa miremoay kako to saroero no cafacafay, cowa ka pahecad to cafay micudad, miselip to etok anca maˈodangay waywayan.”

¹³ Ikor no pina miheca, mala mitosilayho cangra. Ikor, midimokosay cangra to matoˈasayto a wama wina, mala misakafahayho cangra. Mitikol to nalifetan no niyah, sanay ci Cemni: “Matinakoay ako to samaanay ci Yihofa midomokos takowanan. Cowa ka pisawad Cingra to widang no Niyah, mahecad tora sowal itini 2 Timoti 2:19: ‘Mafanaˈay ci Yihofa to nano Ningra a tamdaw.’” Awaay ko hasasa, ciharatengay ci Yihofa midimokos toya pakayniay i maolahay Cingranan mihodop Cingranan a tamdaw.

14. Samaan kita misaˈicel, tano waywayan mikorac to mapakangodoay a makapahay ngangan ni Yihofa? (Nengnengen ko coka.)

¹⁴ Nanay misaˈicel kita mikorac to pakangodoay to ngangan ni Yihofa. Haratengen hena, iraay ko ngaˈayay widang iso, cisidaˈitay hinapaladaˈ, makahiay misodod to tamdaw. Kawra cecay romiˈad, matengil iso ko sowal no tamdaw milikafay to widang iso, cowa ka cisidaˈit misamangahay sanay. Samaan ko demak iso hani? Mamidopo kiso to ngangan no widang. Mahecaday, maˈaraw ko demak ni Satan ato mifiyoran ningra a tamdaw miyakayakay to mangah ni Yihofa, mipalak to ngangan ni Yihofa, sapifanaˈaw kita to tamdaw pakayni i Kimad ni Yihofa, o niyah a waywayan ato sowal midopo to ngangan Ningra. (ˈOlic 34:1; Isaya 43:10) Mihaen kita to demak paihkalay to maolahay ci Yihofaan, o misarocoday midoko Cingranan a tamdaw.

15. Tarokos ci Pawlo misalofay cingra to hakelong no ˈorip a patosokan, samaanay ko ngaˈayay minaroˈan hani? (Filipi 3:7, 8)

¹⁵ Mahemekay kita mitongal to sakatayal saki ci Yihofaan, pakahemekho to falocoˈ Ningra, mansa makahiay misalof to patosokan no hakelong no ˈorip no niyah. Tarokos ci Pawlo o ngaˈayay a tinakoan. Sapikotodaw ci Kristoan, midoko ci Yihofaan, mipiliˈay cingra mihawad to saaroˈan itini i Yutaya tamdaw. (Kalatiya 1:14) Telocto i, ciepocay ko hakelong no ˈorip ningra, iraay ko tatodong ningra malacafay ci Kristoan i kakarayan mala hongti. Cowa ka talalikor cingra to mipiliˈ midoko ci Yihofaan, mahecaday kita!—ˈOsien ko Filipi 3:7, 8.

16. Mikitini kita to nalifetan ni Coliya o manan ko mananamay ita hani? (Nengnengen ko coka.)

¹⁶ Masakalimlaan itini nokaˈorip ita i, o midokoay ci Yihofaan, ano aninito, ano ikor no kaˈorip ita i, wa tada ciepoc sanay! Nengnengen ita ko nalifetan ni Coliya. Kaemangho cingra itiniay i kiyokay miraradiway, iraay ko cecay singsi no miraradiway mahapinangay ko inaneng ningra, mansa pahatatanamanto cingra. Kalikiayto, pakayniay toniya kafanaˈ ningra to onkak malo kafanaˈan no ˈalomanay, kaemangho cingra i, itira sangaˈayay a miraradiwan a kitiraan romadiw. Ikor i, tayraay cingra i tadamaanay picudadan no onkak, iraay ko cafay ningra pasowal to pakayniay i no Kawas a lihaf, halo pifanaˈ cingranan o ngangan no Kawas ci Yihofa sanay. Cato ka halafin i, to lipalipayan kinatosaayto ci Coliya minanam to Fangcalay Cudad. Salikorto i, misaˈosiayto misamacay midoko ci Yihofaan, cato ka picangacang tono onkak a demak. Mihaen cingra misaˈosi cowa ko madoloay, sanay ko sowal ningra: “ˈAlomanay tamdaw miharateng misaloyaay kiso to niyah a inaneng sanay, kawra o sakadademakaw ako to sakaˈorip no mako, misarocod ko harateng a maladademakay ni Yihofa.” Pakayni toya ˈayaw no 30 miheca a saˈosi i, samaanayto ko pinengneng ni Coliya hani? Sanay cingra: “Mahemekay kako matatodongay ko pisaˈosi ako, pakasoˈlinay kako ci Yihofa itini noikoran paparenecen Ningra kako to harateng ako.”—ˈOlic 145:16.

KA PADADOTOC MIHODOP CI YIHOFAAN

17. Kacalohan ko toki nohatini, pakayni to cowaho pidoko ci Yihofaan a tamdaw o manan ko tatodong? Pakayni to midokoay ci Yihofaan a tamdaw o manan ko tatodong?

¹⁷ Kacalohanto a toki nohatini! Sanay ko tarokos ci Pawlo: ‘“Ano honito wa ira a tayni, oya tatayni,” cowa ko mamanayar.’ (Hipray 10:37) O manan ko tatodong hani? Pakayni toniya cowa pihodop ci Yihofaan a tamdaw, cowato ka hakowa ko toki to pipiliˈ nangra, mansa kakaliki cangra misakadademak. (1 Korinto 7:29) Pakayni to maherekayto matatodongay ko pipiliˈ a tamdaw, mafanaˈay cangra, soˈlin mamihadidi ko niyah to sapalifet, kawra ‘ano honi’ aca, cowa ka halafin.

18. Makalimay ci Yihofa aci Yis mamisamaan ko demak ita?

¹⁸ Ci Yis cowa aca pakalalok to tamdaw mikotod cingranan, pakalalokay cangranan mala nisawawaan ikor padadotoc mihaen to demak. (Matay 16:24) Mala nisawawaan ni Yis, soˈlin halafinayto kita midoko to Kawas, seteken ko falocoˈ aka a pisawad. Makalimay ci Yihofa to pisaˈicel no mita, padadotoc midoedo to miketonan no patafang to tireng no niyah. Mihaen to demak cowa ko madoloay, kawra ano mihaen to demak kita i, nohatini wa kadofah ko macadaay ita a sapalemed, wa marenec ko falocoˈ.—ˈOlic 35:27.

19. Mikitini to nalifetan ni Cien o manan ko mananamay ita hani?

¹⁹ O harateng no roma tamdaw, mipiliˈ midoko ci Yihofaan adihayay ko kakinafalahen a demak sanay. Ano kiso o kaemangay, mipiliˈ kiso midoko ci Yihofaan mamalahdaw ko lipahak iso han? Cecay faˈinayan salikaka ci Cien sanay: “Isaˈayaw saan ko harateng ako, malo Misawacayay Tamdaw ni Yihofa adihayay ko miˈimeran. O cafacafay ako ˈalomanay mirienangay to maˈacangay a lawla, misalama to mariˈangay a salama, kawra malingad kako mitosil mirienang to saˈopo.” Hatiniay a harateng samaanay mifiyor ci Cienan hani? Sanay ko sowal ningra: “Padeteng sanay kako misakahmaw to Kimad no Fangcalay Cudad, takaw sanay midemak to midemakan no roma kapah a demak. Cecayto a liyad i, mahemekay kako, kawra o hatiniay a lipahak kahnayay a malahdaw. Oranto i, misatapangay kako misimsim to minanam to soˈlinay kimad a ngaˈayay epoc, ikorto ngaˈ misaˈosiay kako misarocod a midoko ci Yihofaan. Mikitiya i, pacaˈofanto ni Yihofa ko kahacecacecay satolon no mako.”

20. Wa misetek kita to falocoˈ misamaan ko demak?

²⁰ Miˈoningay to ˈOlic a tamdaw mikifalocoˈ pasowal ci Yihofaan: ‘O mipiliˈan Iso a tamdaw ngangaˈay miingid Tisowanan, o maroˈay i potal no lomaˈ Iso i, tada malemeday!’ (ˈOlic 65:4) Nanay misetek kita to falocoˈ padadotoc midoko ci Yihofaan, mahecad ci Yosuwaan sanay: ‘Kako ato paro no lomaˈ ako, mamidoko kami ci Yihofaan.’—Yosuwa 24:15.