Maaingid to Salikaka, Sakaciepoc no Mita!

1-2. O manan ko misakaretengan ni Yihofa a minengneng? Makalimay Cingra to sasamaanen ita ko demak?

MISAKARETENGAY ci Yihofa minengneng to samaanay kita micada to tao. Palimoˈotay ko kanonoˈan a Wawa Ningra ci Yis kitanan, kaolahen ko tamdaw mahecad maolah to niyah. (Matay 22:37-39) Tatodong i, wa sangaˈayen ita micada ko cowa ka lecad ko pihakelongan a tamdaw. Mihaen ko demak ita o mitodongay ci Yihofaan, samanen ‘pacidalan no Kawas ko ngaˈayay a tamdaw, pacidalan ko mariˈangay a tamdaw, paˈoradan ko moecelay a tamdaw, paˈoradan ko cowa ko moecelay a tamdaw.—Matay 5:45.

² Soˈlin maolahay ci Yihofa to tamdamdaw, kawra tada mikiriwiˈay ko olah to midofdofay to palinian Ningra maˈorip a tamdaw. (Yohani 14:21) Makalimay Cingra mitodong kita Cingranan, pakalalokayho kitanan tawlik a maolah to salikaka, halo damsayen a micada cangra. (1 Pitiro 4:8; Loma 12:10) O hatiniay a olah ato damsayay a harateng, mahecaday to picada ita to salawina anca widang a tangongolay a olah.

3. Pakayni i olah, o manan ko haharatengen ita?

³ Tarokos ci Pawlo palimoˈotay to Krisciyang sanay: ‘Padadotoc kamo paihkal to olah i salikaka.’ (Hipray 13:1) Paihkalay koni makalimay ci Yihofa kitanan padadotoc palahad to olah i salikaka, samanen o olah mahecaday to mipalomaˈan a hana, padadotoc a midimokos ngaˈ ngaˈay ko lahad. Oniya lalakaw mamilengo, hano palahaden ita ko tangongolay a olah to salikaka, ato sasamaan ko demak ita ngaˈ padadotoc matongal konini a olah.

HANO PALAHADEN ITA KO TANGONGOLAY A OLAH TO SALIKAKA HANI?

4. Samaanen ita ko demak ngaˈ eca ka tawal ko kangaˈay no salikaka hani? (ˈOlic 133:1) (Nengnengen ko coka.)

⁴ ˈOsien ko ˈOlic 133:1. Oniya miˈoningay sanay, ngaˈay malawidang to maolahay ci Yihofaan a tamdaw, ‘tada o ngaˈayay, kahemekanto!’ Mihaiyay kita to sowal ningra. Kawra maceriday kita malalitemoh to salikaka, alatek kinapinapinaay to cecay a lipay, halafin sato i, matawalayto ita ko kangaˈay no salikaka. Mahecad maˈaraw ita ko taˈangayay a kilang to romiˈamiˈad, mansa mananam sato i, cowato ka masemeren to ˈakawang taˈangay nonini a kilang. Nikawrira, samanen ita ko demak ngaˈ eca ka tawal ko kangaˈay no salikaka hani? Ano sinanoten ita a miharateng ko kahacecay no kasakopang a tamdaw ato masakalimlaan i kitanan, o olah ita cangranan wa padadotoc a matongal.

5. Masasiolah kita to salikaka, alatek misamaan a milingat to tao hani?

⁵ Sanay ci Yis: ‘Ano masasiolah kamo, pakayni toninian mafanaˈ ko polong a tamdaw to nisawawaan ako kamo.’ (Yohani 13:35) O roma tamdaw sakinacecay mirienang to saˈopo ita masemerayto cangra, samanen mahapinangay nangra to masasiolahay kita. Onini aca pakasoˈlinayto cangra, makilimayto no niyah ko soˈlinay kimad. Nengnengen ita ko nalifetan ni Citala, o kaemangayho cingra, mihatatanam to Fangcalay Cudad i, matahidangay cingra mirienang to kasakilac taykay. Mirienang to sakacecay romiˈad taykay ikor, hananay ningra kora pakingkiway: “O wama wina ako cowaho ka pitakec takowanan, kawra itini toniya pitaykayan namo ˈalomanay ko mitakecay takowanan, 52 ko mitakecay takowanan. Hatiniay masasiolahay taˈangayay a paro no lomaˈ tada matanamay ako ko olah ni Yihofa, ciharatengay kako mala taˈangayay paro no lomaˈ ko niyah.” Padadotocay macakat ci Citala, itini 2024 miheca micada to paputisem. Itini toniya nalifetan mahapinang ita, maˈaraw no tao ko ngaˈayay waywayan ita, mahawpay ko kasasiolah no mita, alatek wa matemer ko falocoˈ, ciharateng to sapidokoaw ci Yihofaan.—Matay 5:16.

6. Tangongolay a olah ita to salikaka sasamaan midipot kitanan hani?

⁶ Tangongolay a olah ita to salikaka ngaˈayayho midipot kitanan. Palimoˈotay ci Pawlo to salikaka: ‘Kamo . . . malapakalalok to romiˈamiˈad, ho eca ka masakaniw no raraw, a ˈatekak ko falocoˈ.’ (Hipray 3:13) Ano matoleden kita, pasangaran midemak to matatodongay, alatek o cecay salikaka mahapinang ningra ko cowa ka tatodong no mita, alatek o sapadama ni Yihofa koniya widang padama pakalalok kitanan. (ˈOlic 73:2, 17, 23) O sakaciepoc ita ko mahaenay a sapakalalok.

7. O olah ato makakedecay misamaanay malaliting? (Kolosay 3:13, 14)

⁷ O mikiriwiˈay a kapot kita, ilalomaˈay noniya kapot a tamdaw masasiolahay, mansa kadofahay ko macadaay ita a sapalemed. (1 Yohani 4:11) Tinakoen, o mahaenay a olah pakalalokay kitanan ‘padadotoc a macacaˈi,’ mihaen a macacaˈi matongalay makakedec ko salikaka. (ˈOsien ko Kolosay 3:13, 14; Ifiso 4:2-6) Mansa, mahemek kita i kasaˈopoan, awaay maˈaraw icowacowa a masakapotay ko mahaenay a hemek.

MAKAKANGODO

8. Misamaanan ni Yihofa palacecay kita a makakedec hani?

⁸ O Misawacayay Tamdaw ni Yihofa a masakapotay i paro no kakarayan a salikaka, tada o kasapaan koni, samanen soˈlin sahtoay cowa ka lefot kita, kawra palacecayan ni Yihofa kita. (1 Korinto 12:24, 25) Sowal no Fangcalay Cudad: ‘Pakafanaˈanto ni Yihofa to masasiolah kamo sanay.’ (1 Tisalonika 4:9) Samaanan ni Yihofa pakafanaˈ kita hani? Pakaynian i sowal Ningra a Fangcalay Cudad mifanaˈ kitanan to sasamaanen a midemak. Mihaenay, sinanoten ita miˈosi ko Fangcalay Cudad, o micadaay kita to sapakafanaˈ no Kawas, telocto i, maaingidayto kita to salikaka. (Hipray 4:12; Yakop 1:25) Onini tada misaˈicelan no masakapotay i paro no kakarayan a salikaka a midemak.

9. Pakayni to makakangodo, mikitini i Loma 12:9-13 mananamay ita ko manan?

⁹ Pakaynian no Kawas i Fangcalay Cudad pakafanaˈ kita sasamaan ko demak? Nengnengen ko sowal ni Pawlo i Loma 12:9-13. (ˈOsien.) Sinanoten, sowal ni Pawlo ‘talaˈayaw a makakangodo.’ O manan ko tatodong no sowal ningra? O tatodong ningra i, wa talaˈayaw kita mikilim to pakayraan, tano masakenaay a pakayraan paihkal to damsayay i salikaka. Tinakoen, misaˈicel kita misodod to raraw no tao, ngaˈayay paihkalho to hinapaladaˈay a waywayan. (Ifiso 4:32) Hamaan tala sa to salikaka mikilim kitanan kalawidang, ao talaˈayaw kita kalawidang cangranan. Ano mihaen i, wa milifet kita to sowal ni Yis to matatodongay, sowal ningra: ‘O paladaˈay ikakaay ko hemek to milayapay.’—Dmak 20:35.

10. Pakayni i “makakangodo,” sasamaan kita malo o malalokay a tamdaw aki? (Nengnengen ko coka.)

¹⁰ O sasinanoten ita i, maharek ko sowal ni Pawlo to talaˈayaw makakangodo ikor, tangsolay pakalalok kitanan ‘ka malalok, aka a matoka.’ Mansa o sowal itini to malalok ato talaˈayaw makakangodo malalitingay koni. O malalokay a tamdaw fanekfekay ko falocoˈ, malalok a milahci to dademaken. Pakalalokay ko Taneng 3:27, 28 kitanan: ‘Ano ira ko ˈicel iso a paladaˈ, aka a maˈidi, padamaen ko papadamaen a tamdaw. Ano ngaˈay kiso padama cingranan, aka pasowal to: “Kalingadto, nocila sato tayni! Itiya sato kako padama tisowanan.”’ Mansa, maˈaraw ko papadamaen a tamdaw i, ano o malalokay a tamdaw kita i, wa misaˈicel a padama, cowa ko maminayar, wa ira ko tao padama tora tamdaw aka saan ko harateng, mansa cowato ko mamidemak to manan.—1 Yohani 3:17, 18.

11. Sasamaanen ita ko demak ngaˈ maaingid kita to salikaka?

¹¹ Kalikien a misodod ko pakararaway kitanan a tamdaw, o mikangodoay to tao konini a pakayraan. Ifiso 4:26 sanay: ‘Aka tahira picoreman no cidal kamayanho a maketer.’ Misamaanay hani? 27 sinael sanay, samanen ‘pairaay to hatoki ni Akoma.’ Mihaenay, ci Yihofa misaliyaliyaw sanay itini Fangcalay Cudad mifanaˈ kitanan toha masasodod. Tinakoen, palimoˈotay i Kolosay 3:13 kitanan ‘ka padadotoc . . . mikifalocoˈ a masasisodod.’ Ciharatengay kita paira to tangongolay a olah to salikaka, misodod to raraw nangra o masakalimlaan koni. Mihaen ko demak ita i, ‘pakayniay rihadayay a makakedec,’ ‘misarocod a mitadiˈec i fangcalay saocor a malacecay.’ (Ifiso 4:3) Tatodong i, misododay hananay pairaay to sakakedec a malacecay no mita.

12. Samaanay ci Yihofa padama kitanan misodod to pakararaway kitanan a tamdaw?

¹² Misodod to pakararaway kitanan a tamdaw cowa ko madoloay a demak, kawra tiˈeren ko sapadama no fangcalay saocor, wa malaˈosi a midemak. Mahererek ko sowal to ‘maladamsayay a macacada’ ato ‘malalokay’ ikor, pakalalokayho ko Fangcalay Cudad kitanan ‘tiˈeren ko fangcalay saocor fanekfek ko falocoˈ.’ (Loma 12:11) Mikitini toniya sinael, tiˈeren ko fangcalay saocor wa fanekfek midemak to matatodongay. Mihaenay, cangacangen ci Yihofa pafeli kitanan to fangcalay saocor, ho misodod to pakararaway kitanan a tamdaw, tano damsayay a micada cangranan.—Luka 11:13.

“AKA MALACINOWAS”

13. O manan a lalangian alatek palacinowas kitanan i kasakopang?

¹³ O kasakopang ita nano o ‘masasiromaay’ a tamdaw a masakapot, cowa ka hecad ko kalomahadan no kahacecay. (1 Timoti 2:3, 4) Mihaenay, i lafa, pipaising a pakayraan anca o lawla, cowa ka hecad ko kaolahan no kahacecay. Ano cowa ka pisinanot kita i, onini a kasasiroma alatek wa palacinowas kitanan. (Loma 14:4; 1 Korinto 1:10) Samanen pakafanaˈan no Kawas kita toha masasiolah, mansa o mamisinanot kita, aka pacieci to tao micada to mipiliˈan no mita.—Filipi 2:3.

14. Misamaan kita padadotoc a midemak? Misamaanay aki?

¹⁴ Ano makakedec kita, saka ecaaw malacinowas i, padadotoc pakalalok to tao, ho dihko ko falocoˈ nangra. (1 Tisalonika 5:11) Toniya liyad, ˈalomanay cowato ka mitosil a tamdaw anca na mapadengay ko ngangan i kasakopang a patikolayto. Mahemekay kita patikol cangra! (2 Korinto 2:8) O cecay fafahiyan salikaka 10 miheca cowato ka mitosil, sakinacecay patikol mirienang to saˈopo i, mahemekay ko salikaka militemoh cingranan, mitatiw to kamay ningra. (Dmak 3:19) Hatiniay a waywayan samaanay ko harateng ningra? Sowal ningra: “Mahecaday to mikitingan ni Yihofa ko kamay ako, miliyaw a lipahak.” Misaˈicel kita pakalalok to emin a tamdaw, kanonoˈan a Wawa no Kawas wa pakayni kitanan padihko to ‘marorayay, karetengay ko ˈinorong a tamdaw.’—Matay 11:28, 29.

15. O pakakedecay a pakayraan o manan? (Nengnengen ko coka.)

¹⁵ Sinanoten ko sasowalen ita, pakakedecay koni. Tinakoen, o cecay ngaˈayay misacongpoay mitanamay to mitangtangan, ano ngaˈay ngaˈ patahkaan. Malecad toni, ˈayaw no papasowal kita i, songilaˈen a miharateng. (ˈOlic 141:3) Wa misinanot to sasowalen no niyah ngaˈay pakalalok to tao, ‘ho ciepoc ko mitengilay a tamdaw,’ ikor ngaˈ pasowalen.—Ifiso 4:29.

16. O cimacima ko papasowal to pakalalokay to tamdaw a sowal?

¹⁶ O malo faˈinay ato wama wina, mikiriwiˈ a misinanot ko sasowalen no niyah wa ngaˈay pakalalok to tao. (Kolosay 3:19, 21; Titus 2:4) O malohemay malitengay wa misongilaˈ a pakaen to siri no Kawas, ho macada no siri ko sahinom a dihkoen. (Isaya 32:1, 2; Kalatiya 6:1) Haratengen, sowal no Taneng: ‘Ano matatodong ko sowal iso i, tada makapahay!’—Taneng 15:23.

O OLAH “PAIHKALEN I WAYWAYAN”

17. Sasamaan kita ngaˈ mikifalocoˈ a maolah to salikaka?

¹⁷ Sowal no tarokos ci Yohani: ‘O olah ita, aka tano ngoyos aca ko sasowalen, pairaen ko soˈlinay a waywayan.’ (1 Yohani 3:18) Makalimay kita mikifalocoˈ a maolah to salikaka, makalimayho tangongol tangongol ko olah, mihaen wa palaken ita ko toki kalacafay cangranan. Mikilim kita to kangaˈayan a micawmaˈ cangra, tinakoen kalacafay cangranan mitosil, masasowal i ˈayaw ato herek no saˈopo. Ano kaloto a tatokian i, ngaˈayay masasoˈaraw cangranan. Mihaen ko demak ita paihkalayto micadaay to sapakafanaˈ ni Yihofa ko niyah, minanam ‘masasiolah.’ (1 Tisalonika 4:9) Wa malifet ita ko ‘makakedec malacafay makakapot ko salikaka, tada o ngaˈayay, kahemekanto!’—ˈOlic 133:1.