LALENGOEN LALAKAW 15
RADIW 30 Ci Yihofa, O Wama ato Widang Ako
Miingid to Kawas Tada Ciepocay Kitanan!
Kako saan i, miingid to Kawas tada ciepocay takowanan.—ˈOLIC 73:28.
KALIMLAAN NO LALAKAW
Sasamaan kita miingid ci Yihofaan, mihaen to demak wa paira to manan a epoc kitanan.
1-2. (1) Sasamaan kita palahad to makakedecay kalawidang to tao? (2) Oniya lalakaw mamilengo to manan?
IRAAY ko ngaˈayay a widang iso han? Samaanay kamo a mala widang? Itiya mapalakay ko toki iso kalacafay cingranan, cipinang to nalifetan ningra a maˈorip, mafanaˈayho to o manan ko kaolahan ningra ato kapiliˈan. O makapahay a capeling ningra to hatatodongen no miso. Ikor, maolah maolahay kiso toniya widang.
2 Malangaˈay to widang misaaliay to hapapalaken a toki ato ˈicel, malawidang to Kawas malecadayto. Oniya lalakaw mamilengo to miingid to Kawas samaan ciepoc kitanan, dotoc wa milengoho sasamaan kita miingid Cingranan.
3. Hano macerid misinanot misimsim kita, miingid ci Yihofaan o sakaciepoc no mita hani? Tano tinakoen a mitadtad.
3 Misinanot a misimsim to miingid ci Yihofaan o manan ko epoc, tada kalimlaan koni. (ˈOlic 63:6-8) Misamaanay hani? Tinakoen, mafanaˈay kita komaen to sakatanoktok a kakaenen, macerid a mionto, ngaˈay ko fotiˈ, minanom, sakatanoktok no mita, kawra cowa ka pisinanot ko ˈalomanay tamdaw tonini, telocto mapalakayto ko tireng. Kawra, ano macerid kita miharateng midemak toni wa paira to manan a epoc, madoloayto a mananam toniya pakayraan. Malecadayto, mafanaˈay kita miingid ci Yihofaan o sakaciepoc no mita, kawra macerid a misinanot mihaen to demak iraay ko manan a epoc, wa makalim to padadotoc miingid ci Yihofaan.—ˈOlic 119:27-30.
4. Miˈoningay to ˈOlic 73:28 a tamdaw samaanay paihkal to nafalocoˈan?
4 ˈOsien ko ˈOlic 73:28. O miˈoningay to ˈOlic 73 fedengan o Lifi a tamdaw, manilnilay cingra moradiw i fangcalay sefi ato midatok. Alatek halafinayto cingra midoko ci Yihofaan, kawra, sapatalipaˈelalaw cingra to niyah ato tao, miingid ci Yihofaan tada ciepocay. O manan ko epoc hani?
MIINGID CI YIHOFAAN PAIRAAY TO HEMEK ITA
5. (1) Hano miingid ci Yihofaan wa paira to hemek no mita hani? (2) O taneng ni Yihofa samaanay padama ato midipot tisowanan, tadtaden hena. (Taneng 2:6-16)
5 Miingid kita ci Yihofaan, wa mangalef ko hemek. (ˈOlic 65:4 ato roma pihongyak.) Misamaanay hani? Adihayay ko lalangian, o cecay i, misakadademak to safalod no Fangcalay Cudad kita, wa malifok ko taneng. Irato koniya taneng i, mafanaˈayto kita miliyas to tatiihay a pifiyor, wa ecato ka mararaw to pakidemay. (ˈOsien ko Taneng 2:6-16.) Mihaenay, sowal no Fangcalay Cudad: ‘Makilim no tamdaw ko taneng, wa cipinangto to demak, mamahemekto.’—Taneng 3:13 ato roma pihongyak.
6. O miˈoningay to ˈOlic a tamdaw hano malahdaw ko hemek hani?
6 Kawra, soˈlin o widang ni Yihofa, mararomay nolatekay. Miˈoningay to ˈOlic 73 fedengan a tamdaw na matoleday ko harateng a malahdaw ko hemek. I pinengneng ningra, oya cowa pikihar, cowa ka pidofdof to palinian no Kawas a tamdaw, rihadayay ko kaˈorip, telocto maketeray ko falocoˈ a maˈinap cangranan. O harateng ningra, cihafayay ko kaˈorip no mariˈangay ato malitaˈangay a tamdaw, tanoktokay ko tireng, cowa ka roray ko kaˈorip. (ˈOlic 73:3-7, 12) Oniya miˈoningay a tamdaw cowa ka dafdaf sanay ko piharateng, mansa cisasaayto midoko ci Yihofaan iraay ko epoc hokira. Mararomay cingra a pasowal: ‘Makorac ko falocoˈ ako, tada o horac sanay; minanaw kako to kamay paihkal to makoracay, awaay ko kapo.’—ˈOlic 73:13.
7. Ano mararomen kita i, sasamaan ko demak hani? (Nengnengen ko coka.)
7 Kawra o miˈoningay to ˈOlic a tamdaw cowa ka padadotoc sa matoleden ko falocoˈ. Talaˈayaway cingra, ‘micomod i tadamaanay fangcalay sefi no Kawas,’ itira padamaan ni Yihofa cingra misalof to harateng. (ˈOlic 73:17-19) Tada ngaˈayay a widang ita ci Yihofa, ano mararomen kita i, mafanaˈayto Cingra. Ano mitolon micangacang to sakayat Ningra i, mitengil to sapaini Ningra i Fangcalay Cudad, micadaho to sapadama no salikaka, wa macadato ita ko ˈicel, soˈlin matoleden, kamayan padadotoc matayal saki Cingranan. Soˈlin matoled a malonay kita, wa hinomen ni Yihofa a parihaday kita.—ˈOlic 94:19.a
O miˈoningay to ˈOlic 73 fedengan a tamdaw tomirengay i kaˈayaw no ‘tadamaanay fangcalay sefi no Kawas’ (Nengnengen ko saka 7 fatac)
MIINGID TO KAWAS PAIRAAY TO EPOC ATO TOKEL I NOKAˈORIP
8. Miingid to Kawas pairaay to manan a epocan i kitanan?
8 Miingid to Kawas iraayho ko tosa a epoc kitanan. Saka 1, pairaay to epoc i nokaˈorip no mita. Saka 2, pairaay to tanektekay a tokel noikoran. (Yirimiya 29:11) Dotoc, hapinangen ita minengneng koniya tosa a epoc.
9. Miingid to Kawas hano paira to epoc i hakelong no ˈorip no mita hani?
9 Miingid to Kawas pairaay to epoc i hakelong no ˈorip no mita. Anini ˈalomanay tamdaw cowa pakasoˈlin to iraay ko Kawas, cowa ka fanaˈ cangra to manan ko epoc i kaˈorip, wa malahdaw ko emin a tamdaw noikor sanay cangra. Kawra, pakayni minanam to Fangcalay Cudad, pakasoˈlinayto kita to iraay ko Kawas, pakasoˈlinayho to ‘papalifonen Ningra ko micangacangay Cingranan a tamdaw,’ mansa cowa ko mamarahorac ko midemakan ita i Cingranan. (Hipray 11:6) Roma i, o pisangaˈ ni Yihofa kitanan, hofoc han iraayto ko midokoay Cingranan a saali, tada mahemekay kita nohatini, samanen marenecayto ko midokoay a saali no mita.—Limoˈot 10:12, 13.
10. Mikitini ˈOlic 37:29, misarocoday a mitala ci Yihofaan a tamdaw iraay ko manan hatokel?
10 Pakayni i ˈalomanay tamdaw, o pietan aca to payci a matayal, ciraramod ciwawa, misaday to hanolitengan. Cowa ka fanaˈ cangra to mikiˈokan no Kawas to samaanay ko hanoikoran no tamdaw, mansa nohatini aca ko maharatengay nangra. Kawra o finawlan ni Yihofa cowa ka lecad, misaˈicel kita miingid ci Yihofaan, mitiˈer Cingranan. (ˈOlic 25:3-5; 1 Timoti 6:17) Pakasoˈlin kita toniya Widang, pakasoˈlinho to mamalaˈosi ko mikiˈokan Ningra. Adihayay ko hinatalaan no mita to noikoran, tahadaˈoc midoko ci Yihofaan i lakoing.—ˈOsien ko ˈOlic 37:29.
11. Miingid kita ci Yihofaan, wa samaan ko harateng Ningra hani? Wa milifok kita to manan a epoc hani?
11 Miingid to Kawas adihayayho ko haepoc. Tinakoen, mikiˈokan ni Yihofa, ano mikifalocoˈ kita a pasasiyor, wa sododen Ningra kita. (Isaya 1:18) Mihaen, wa rihadayento kita to nano raraw isaˈayaw. (ˈOlic 32:1-5) Roma i, pakahemek kita ci Yihofaan, pakahemekay to niyah. (Taneng 23:15) Wa maharateng iso ko roma a epoc. Dotoc, nengnengen ita sasamaan padadotoc miingid to Kawas.
SASAMAAN PADADOTOC MIINGID TO KAWAS
12. Sapiingidaw to Kawas, o manan ko mademakay iso?
12 ˈAyaw no micada to paputisem malo Krisciyang i, sapiingidaw to Kawas misaˈicelay kita. Mafanaˈayto kita to adihayay a soˈlinay kimad no Kawas ci Yihofa aci Yis Kristo, mikifalocoˈ a pasasiyor to nano raraw isaˈayaw, paihkal to tanektekay a pakasoˈlinay falocoˈ to Kawas, misaˈicelayho midofdof to araaw no Kawas. Kawra, sakatongalaw noka piingid to Kawas i, papadadotoc kita mihaen to demak.—Kolosay 2:6.
13. Sapadadotocaw miingid to Kawas, sasamaan ko demak no mita hani?
13 Sapadadotocaw miingid to Kawas, sasamaan ko demak no mita hani? (1) Padadotoc kita miˈosi to Fangcalay Cudad. Ano miˈosi i, o patosokan ita cowa ko sakacipinangaw aca no mita to taenengan a soˈlinay kimad no Kawas, oha cacipinang to araaw ni Yihofa kitanan, misakadademak to safalod no Fangcalay Cudad i nokaˈorip. (Ifiso 5:15-17) (2) Maolah ci Yihofa kitanan adihayay ko wacay, macerid kita midotim tonini a wacay, paˈicel to pakasoˈlinay falocoˈ Cingranan. (3) Padadotoc kita ˈinteh to kaˈintehan ni Yihofa a demak, miliyas to midemakay to mahaenay mararaway demak a tamdaw.—ˈOlic 1:1; 101:3.
14. Mikitini 1 Korinto 10:31, sasamaan ko demak ita i nokaˈorip a pakahemek ci Yihofaan hani? (Nengnengen ko coka.)
14 ˈOsien ko 1 Korinto 10:31. Tawlik kita midemak to kaolahan ni Yihofa a demak, oniya demak coko pitosil ato saˈopo aca, mahawpay ko nademakan i nokaˈorip. Tinakoen, makalim a paladaˈ, i kihcod nokaˈorip cowa ka kaniw, wa pakahemek ci Yihofaan. (2 Korinto 8:21; 9:7) Roma i, makalimayho ci Yihofa kitanan misakareteng minengneng to ˈorip. Padadotoc kita to ngaˈayay a pinangan i kakaenen, i roma a pakayraan misaˈicel midimokos to tireng no niyah, mihaen i, wa makakedec ko piingid to pafeliay to ˈorip a Yihofa. Maˈaraw i mimingay a demakan misaˈicel pakahemek Cingranan, wa mangalef ko olah ni Yihofa kitanan.—Luka 16:10.
Dipayal ko pipaonting, hinapaladaˈ to tamdaw, pakaynien i miwicawic to tireng ato ngaˈayay a kakaenen a midimokos to niyah, ho ngaˈay pakahemek to Kawas (Nengnengen ko saka 14 fatac)
15. Makalimay ci Yihofa to sasamaan kita micada to tao hani?
15 Ano o moecelayto anca cowa ka moecel a tamdaw, sidaˈitan ni Yihofa cangra a micada. (Matay 5:45) Makalimay Cingra kitanan mitodong to taˈarawan Ningra, tano sidaˈit siniˈada to tao. Tinakoen, palimoˈotay Cingra kitanan: ‘Aka midokaˈ to tao, aka maolah to malacongisay. Makahi a pacaˈi, damsay a micada to tamdamdaw.’ (Titus 3:2) Mihaenay, ano cowa ka lecad ko pihakelongan nangra kitanan, cowa ko mamisakakinih kita cangranan. (2 Timoti 2:23-25) Misaˈicel kita sidaˈit to tao, wa mangalef ko piingid ci Yihofaan.
SOˈLIN MALONAY, WA NGAˈAY MIINGID TO KAWAS
16. ˈOlic 73 fedengan a miˈoningay na iraay ko masamaanay a nafalocoˈan?
16 Nolatekay awaay ko tatodong ako micada to olah ni Yihofa sanay ko harateng, cowato ko ngangaˈay miingid Cingranan han? Ano mahaenay ko harateng iso i, haratengen ko ˈOlic 73 fedengan a miˈoningay iraay ko mahaenay a nafalocoˈan. Mararomay cingra a pasowal: ‘Nimanayto miliyas to matatodongay lalan ko ooˈ ako, hato mamatahoriyac mapolin kako.’ (ˈOlic 73:2) ‘Mararomay ko falocoˈ’ ‘awaayto ko matatodongay a harateng’ sanay cingra, i kaˈayaw ni Yihofa ‘hato o awaay ko taneng a pinaˈorip.’ (ˈOlic 73:21, 22) I harateng ningra ano malonay i, awaayto ko kapo no niyah, awaayto ko hatatodong tahacada to olah Yihofa han?
17. (1) Itini kararoman i, samaanay ko demak no miˈoningay to ˈOlic a tamdaw? (2) Mikitini to nalifetan ningra o manan ko mananamay ita? (Nengnengen ko coka.)
17 Ano soˈlinay mifalahan ni Yihofa sanay ko harateng no miˈoningay to ˈOlic a tamdaw i, o hatiniay a harateng, o cecayay aca a liyad. I katoledan ningra a tatokian i, mahapinangho o niyah oha padadotoc a miingid to Kawas. Sanay cingra: ‘Kawra nohatini, wa padadotoc malacafay kako [ci Yihofaan]; mitengtengan Iso ko kawanan a kamay padama takowanan. Palimoˈotan Iso a mikayat kako, ikor wa pacomoden kako i ˈdil.’ (ˈOlic 73:23, 24) Ano malonay matoled kita i, wa mahaen a mitala ci Yihofaan, o ˈongcoy han ita ko pinengneng Cingranan. (ˈOlic 73:26; 94:18) Soˈlin mararaw kita, wa ngaˈay patatikol i katihi ni Yihofa. Pakasoˈlinay kita ‘mahemekay Cingra a misodod to tamdaw.’ (ˈOlic 86:5) Haratengen, itini kararoman no mita i, wa mangalef ko piingid to Kawas kita.—ˈOlic 103:13, 14.
Ano malonay ko pakasoˈlinay falocoˈ ita i, mangalefay ko sapiingidaw ci Yihofaan, tawlik a mirienang to midokoay a demak (Nengnengen ko saka 17 fatac)
MIINGID TO KAWAS TAHADAˈOC
18. Misamaanay hano padadotoc miingid kita to Kawas?
18 Sowal no Fangcalay Cudad, o lalan, taneng ato sifanaˈ no Kawas, cowa ka emin ita a misolap. Mansa, padadotocen ita mafanaˈ to Kawas, padadotocho miingid Cingranan tahadaˈoc.—Loma 11:33.
19. Mikitini i ˈOlic manan ko mananamay ita?
19 ˈOlic 79:13 sanay: ‘O finawlan Iso kami, o pakaenan Iso a siri, tahadaˈoc kami a miakoˈid Tisowanan, padadotoc pakahemek Tisowanan.’ Ano padadotoc kiso miingid to Kawas, wa pakasoˈlin to niyah a milifok to tahadaˈocay a sapalemed, hanaca wa matomes ko pakasoˈlinay falocoˈ a pasowal: ‘O Kawas itiniay i falocoˈ ako a ˈongcoy, o tahadaˈocay no mako a hafay.—ˈOlic 73:26.
RADIW 32 Dopoen ci Yihofa
a O cecay tamdaw ano halafinto a matoled mararom, alatek kilimen ko mafanaˈay to hatiniay demak a tamdaw a sapadama. Sakacipinangaw to adihayay, nengnengen ko Mikecolay Sakiˈalomanay Saka 1 Liyad, 2023.