Sasamaan Palahdaw to Sasa no Falocoˈ

1-2. (1) O sikawdan ni Yihofa alatek wa ira ko masamaanay cisasaay a falocoˈ? (2) Onini a lalakaw mamilengo to manan?

ANO o cimato a tamdaw, alatek iraayto ko sasa no falocoˈ.a Tinakoen, o cecay kaemangay alatek cisasaay to ciharatengay ci Yihofa cingranan hokira, mansa samisiay ko harateng sapicadaaw to paputisem. Haratengen ko cecay faˈinayan salikaka. Kaemangaho cingra i, paisalakataw micangacang to Kitakit no Kawas, misawad to sakacihayaw a tayal. Soˈlin ngaˈay ko pipaririˈ to paro no lomaˈ, kawra cowa ka cihafay. Mansa cisasaay cingra alatek, toya pisaˈosi ningra isaˈayaw o matatodongay hokira. Haratengen ko matoˈasay malonayay a fafahiyan salikaka. Samanen cowato ka ngaˈay pahecad to isaˈayaway adihay ko kadademakan, cisasaay cingra alatek, iraayho ko epoc no niyah i pinengneng ni Yihofa han? Mahaenay ko harateng iso: “O ciharatengay ci Yihofa takowanan hokira? O kinafalah ako i ci Yihofaan o ciepocay han? I pinengneng ni Yihofa takowanan, iraay ko kapo han?”

² Ano cowa ka pikihar kita to mahaenay a demak, alatek wa malahdaw ko pakasoˈlinay falocoˈ ci Yihofaan, dengkini sawad sato midoko Cingranan. Onini a lalakaw mamilengo to sasamaan padama ko Fangcalay Cudad kitanan palahdaw to sasa no falocoˈ: (1) Cisasa to ciharatengay ci Yihofa takowanan, (2) cisasa to isaˈayaway a pisaˈosi matatodongay hokira, (3) cisasa to iraay ko kapo no niyah i pinengneng ni Yihofa.

O MANAN KO PAPADAMA KITANAN PALAHDAW TO CISASAAY A FALOCOˈ

3. Sapipalahdaw to cisasaay a falocoˈ, sasamaan ko demak ita?

³ Ano ira ko cisasaay a falocoˈ, aitini i Kimad no Kawas kita mikilim to caˈof. Mihaen, wa paˈicel to pakasoˈlinay falocoˈ ci Yihofaan, makakedec ko kalawidang Cingranan. Telocto i, wa ciˈicelto a ‘tanektek i pihakelongan.’—1 Korinto 16:13.

4. Sasamaan kita ‘mihapinang’ to harateng no niyah? (1 Tisalonika 5:21)

⁴ ˈOsien ko 1 Tisalonika 5:21. Pakalalokay ko sinael kitanan ‘hapinangen ko maamaan a demak.’ Sasamaan mihapinang hani? Oha sapipalalini to niyah a falocoˈ mahecaday to pinengneng no Fangcalay Cudad hokira. Haratengen ko masowalay isawni a kaemangay, cisasaay cingra to ciharatengay ci Yihofa cingranan. O matatodongay ko piharateng ningra han? Cowa, songilaˈen ningra ‘mihapinang’ ngaˈ, nengnengenho ko Fangcalay Cudad to misamaanay minengneng ci Yihofa cingranan.

5. Ano ira ko cisasaay a falocoˈ ita, samaan ko demak ngaˈ pakatengil to sapacaˈof ni Yihofa hani?

⁵ Miˈosi kita to Fangcalay Cudad o “mitengilay” to sowal ni Yihofa kitanan, kawra ano sakafanaˈaw to samaanay ko pinengneng Ningra to demak i, wa misaˈicelho kita. Ano ira ko micariraway kitanan a pasangar, wa pakayni kita toniya pasangar misaˈicel a mikingkiw. O likakawa ni Yihofa adihayay ko kakingkiwen a lalosidan, mamisarocod kita a misakadademak. (Taneng 2:3-6) ˈAyaw no mikingkiw ngaˈayay mitolon kita, micangacang ci Yihofaan mikayat pakakilim to misaalian ita a lalakaw, padama cipinang to pinengneng Ningra to kapasangaran ita a demak. Ikor, pakayni i pakayraan no niyah, mikilim to milingatay a safalod no Fangcalay Cudad ato ngaˈayay a sapaini. Roma i, saharateratengen ita, masowalay no Fangcalay Cudad a tamdaw to cima ko mahecaday to nalifetan ita, miˈosi to mahaenay a maˈoningay wa ciepocay kitanan.

6. Mirienang to saˈopo sasamaan palahdaw to cisasaay a falocoˈ ita hani?

⁶ Micerid mirienang to saˈopo oha caciepoc, samanen i kasaˈopoan “matengilay” ita ko sowal ni Yihofa. Pakayni i kimad ato sapacaˈof no salikaka, alatek matatodongay to saali no cisasaan ita a demak. (Taneng 27:17) Dotoc wa mifolfol kita, sasamaan palahdaw to masowalay isawni a tolo a kacisasaan a demak.

CISASAAY TO CIHARATENGAY CI YIHOFA TISOWANAN

7. O roma tamdaw alatek iraay ko manan a cisasaay a falocoˈ hani?

⁷ Na maharatengay iso: “O ciharatengay ci Yihofa takowanan hokira?” Ano cowa ka samaan ko niyah sa kiso i, alatek pasangaran nanay malawidang to misangaˈay to paro no kakarayan a Tatapangan. Alatek na mahaenay ko harateng no Hongti ci Tafiti. Mansa, na mahapinang ningra to ciharatengay ci Yihofa to tamdaw, masemeran nanay, sanay: ‘Yihofaaw, cowa ka samaan ko tamdaw, hano sikolen Iso cingra? O kalo a tamdaw cowa ka samaan, hano dipoten Iso cingra?’ (ˈOlic 144:3) Mihaenay, sasamaan pakahapinang kiso to ciharatengay ci Yihofa tisowanan hani?

8. Mikitini 1 Samuil 16:6, 7, 10-12, o pinengneng ni Yihofa to tamdaw o manan mihapinang Ningra hani?

⁸ Mikitini Fangcalay Cudad mananamay ita, i pinengneng no tao cowa ka samaan a tamdaw, ciharatengay ci Yihofa. Kinacecayay, miocoran ni Yihofa ci Samuil tayra i lomaˈ ni Yisi, oha maminilnil to cecay a wawa ningra malo hongti no Israil noikor. Faloay ko wawa ni Yisi, pitoay ko mitahidangan ningra paˈaraw ci Samuil, cowa ka tahidang ko sasafaay a wawa ci Tafiti.b Kawra, o mipiliˈan ni Yihofa o ci Tafiti. (ˈOsien ko 1 Samuil 16:6, 7, 10-12.) Mihapinangan ni Yihofa ko soˈlinay a masa tamdaway a waywayan ni Tafiti, mafanaˈ toniya kaemangay to o maolahay ci Yihofaan.

9. Hano pakasoˈlin kiso to ciharatengay ci Yihofa tisowanan? (Nengnengen ko coka.)

⁹ Haratengen iraay ko manan a wacay, paihkal to ciharatengay ci Yihofa tisowanan. Pakayni i saali iso a pafeli to matatodongay a sapaini. (ˈOlic 32:8) Ano cowa ka cipinang Cingra tisowanan i, samaan madangar Ningra koniya demak hani? (ˈOlic 139:1) Ano doedoen iso ko sakayat Ningra a midemak, hanaca malifetay to o padamaan Ningra kiso, wa pakasoˈlinto to ciharatengay Cingra tisowanan. (1 Rayray 28:9; Dmak 17:26, 27) Cowa ko pisaˈicel aca iso ko maˈaraway ni Yihofa, oyaho a makapahay capeling iso ko mahapinangay Ningra, mansa makalimay malo widang Ningra kiso. (Yirimiya 17:10) Ano makalimay kiso malo widang Ningra, wa samaan sato ko hemek no Kawas!—1 Yohani 4:19.

CISASA TO ISAˈAYAWAY A PISAˈOSI MATATODONGAY HOKIRA

10. Tikolen miharateng koya misaˈosian isaˈayaw, o roma tamdaw alatek wa ira ko masamaanay a harateng?

¹⁰ O roma tamdaw mitikolay a minengneng to misaˈosian isaˈayaw, alatek cisasaay to matatodongay ko pisaˈosi isaˈayaw. Sakangaˈayaw malo dademakay ni Yihofa, alatek misawadan nangra ko sakacihafayaw anca mietan to adihayay a payci, kawra i taliyokay nangra a tamdaw cowa ka mahecad ko pisaˈosi. Halafinto ko mihecaan ikor, maˈaraw nangra koya tamdaw cihafayayto, marenecen ko kaˈorip, wa saan miharateng: “Pakayni ci Yihofaan ko kinafalah ako, o matatodongay hokira? Ano o roma ko saˈosi ako isaˈayaw i, wa ikaka ko kangaˈay to nohatini ako hokira?”

11. O miˈoningay to ˈOlic saka 73 fedengan o manan ko kacarirawan ningra hani?

¹¹ Ano ira ko mahecaday a cariraw no miso i, nengnengen ko miˈoningay to ˈOlic saka 73 fedengan a masamaanay a nalifetan ningra. Maˈaraw ningra ko cowa ka pidoko to Kawas a tamdaw tanoktokay ko tireng, kadofahay ko kaˈorip, hato awaay kacarirawan. (ˈOlic 73:3-5, 12) Telocto, i harateng ningra, misarocod midoko ci Yihofaan awaay ko kapo. Mahaenay a matoleday a harateng tada pakacarirawan ningra, mansa ‘tocerid no romiˈad tahalifaay kako to roray’ sanay cingra. (ˈOlic 73:13, 14) Sasamaan cingra misaysay to hatiniay a matoleday a harateng hani?

12. Mikitini ˈOlic 73:16-18, o miˈoningay to ˈOlic samaanay palahdawto ko sasa no falocoˈ hani?

¹² ˈOsien ko ˈOlic 73:16-18. Ikor oniya miˈoningay to ˈOlic tayraay i fangcalay sefi ni Yihofa. Itira, rihadayay ko kemod no falocoˈ, wa ngaˈay cingra miharateng. Mahapinangay ningra, soˈlin marenecen ko kaˈorip noya tamdaw, kawra awaay ko hanoikoran. Cipinang tonini ikor, patatikolayto ko rihaday no falocoˈ ningra. Cipinangayto cingra, misarocod midoko ci Yihofaan o matatodongay ko pisaˈosi. Mansa miliyaway cingra misetek to falocoˈ, padadotoc miingid ci Yihofaan, misaˈicel malo dademakay ni Yihofa.—ˈOlic 73:23-28.

13. Ano cisasa to matatodongay ko pisaˈosi no niyah isaˈayaw i, sasamaan milifok to sakarihadayaw no falocoˈ? (Nengnengen ko coka.)

¹³ Mehecad to miˈoningay to ˈOlic, wa ngaˈay kiso palahdaw to cisasaay a falocoˈ, milifok to sakarihadayaw no falocoˈ. Sasamaan ko demak? Oha mamisongilaˈ a miharateng to sapafeli ni Yihofa a kihcod, mahawpay ko kakarayan a hafay, o kalimlaan kora, ikor palalinienho toya cowa pidoko ci Yihofaan a tamdaw o manan ko macadaay, o nano hekal a milifokan nangra a kihcod sahto o horac. Soˈlin cihafay kadofah ko kaˈorip nangra, kawra awaay ko hanoikoran a hatokel, mansa nohatiniay a kaˈorip aca ko tokel nangra. O pakayraan iso cowa ka hecad, o mikiˈokan ni Yihofa a sapalemed kadofahay, mataˈlifay to miharatengan iso. (ˈOlic 145:16) Roma i, saharateratengen, ano cowa ka hecad ko saˈosi iso to isaˈayaway i, wa marenecen kiso to kaˈorip nohatini han? Cowa ko kafanaˈan. Kawra wa mihayi kiso to cecay a demak: Ano o saˈosi ita o maolahay to Kawas ato tao i, mihaen wa kadofah ko malifokay ita a soˈlinay a hafay.

CISASA TO IRAAY KO KAPO NO NIYAH I PINENGNENG NI YIHOFA

14. O roma tamdaw tahasiˈayaway to manan pasangar? Samaanay ko cisasa no harateng nangra hani?

¹⁴ O roma salikaka makalimay mitongal to tayal saki ci Yihofaan, kawra matongalayto ko mihecaan, pakidem ko adada, anca iraay ko samoˈ no tireng ato nofalocoˈan, mansa awaay ko saloˈingaw. Alatek cisasaay cangra to sakaciepoc no niyah i ci Yihofaan, sanay ko miharatengay: “I pinengneng ni Yihofa, o ciepocay kako han?”

15. Miˈoningay to ˈOlic saka 71 fedengan a tamdaw pakasoˈlinay to manan?

¹⁵ O miˈoningay to ˈOlic saka 71 fedengan a tamdaw mahecaday cicariraw, tolonan ningra ci Yihofa sanay: ‘Ya malonay kako i, nanay hamaan liyasen kako.’ (ˈOlic 71:9, 18) Kawra kamayan cingra tanoktok ko pakasoˈlinay falocoˈ ci Yihofaan, ano padadotoc madimadi matayal saki ci Yihofaan, wa mikayat ci Yihofa midama cingranan. Mafanaˈay cingra, soˈlin coka hakowa ko midemakan, kawra ano misongilaˈ a misaˈicel i, wa pakahemek ci Yihofaan.—ˈOlic 37:23-25.

16. Malitengay a salikaka sasamaan pakaciepoc to tao aci Yihofaan? (ˈOlic 92:12-15)

¹⁶ Malitengay salikaka, haratengen samaanay ko pinengneng ni Yihofa tisowanan. Soˈlin palidlid sa malonay ko tireng iso, kawra padamaen Ningra kiso fanekfek i pihakelongan mahecad to kaemangay. (ˈOsien ko ˈOlic 92:12-15.) Aka haharateng sato cowa ka dangar no niyah a demak, oya madangaray no niyah ko haratengen. Padadotoc kiso madimadi ci Yihofaan, ciharateng to i taliyokay a tamdaw, wa mapakalalok to salikaka maemin. Ngaˈayay kiso malalengo to tao, o hakelong no ˈorip iso samaanay midama ci Yihofa tisowanan, fanaˈenho ko tao, hinatalaay kiso to manan a sapalemed i lakoing. O roma i, ceriden patado ko tao mitolon. Aka a tawalen, naifalocoˈay iso a satolon tada ciepocay. (1 Pitiro 3:12) Ano masamaanto ko pakayraan ita, wa ngaˈay pakaciepoc to tao aci Yihofaan.

17. Hano caka ngaˈay palalini ko niyah ato tao?

¹⁷ Ano pakayni citolasay ko madangaray no niyah a tayal i ci Yihofaan a matoleden kiso i, haratengen, misalimlaan ni Yihofa koya madangaray iso a demak. Maceriday kita palalini ko niyah ato tao, kawra o cacongeden ita ko mahaenay a harateng, samanen cowa ka haen ci Yihofa a palalini. (Kalatiya 6:4) Saharateratengen, na pafeliay ci Mariya ci Yisan to pasangaray a fangsisay a simal. (Yohani 12:3-5) Oya manikaway a maponengay i fangcalay sefi tosaay aca a tangloy ko sapakiyaho. (Luka 21:1-4) Soˈlin cowa ka hecad ko sapatelong nangra, kawra i pinengneng ni Yis mahecaday ko tanoktokay pakasoˈlinay falocoˈ nangra. Malefotay ko pitodong ni Yis to kakarayan Wama ci Yihofaan, mansa ngaˈayay kiso pakasoˈlin, mahaenay ko pinengneng no kakarayan Wama tisowanan. Soˈlin miming ko madangaray no niyah sa kiso, kawra i pinengneng ni Yihofa i, o pakasoˈlinay iso a ciolah a matayal tada o masakalimlaan sanay!

18. O manan ko papadama kitanan palahdaw to cisasaay a falocoˈ? (Nengnengen ko sapatongal lalakaw “O Kimad ni Yihofa wa Padama Tisowanan Palahdaw to Cisasaay a Falocoˈ.”)

¹⁸ Nolatekay iraay ko sasa no harateng ita. Kawra mikitini toniya lalakaw mananamay ita, tadiˈecen ko Kimad no Kawas, wa malahdaw ko kihcod cisasaay a falocoˈ ita. Ano o manan ko micariraway tisownan a pasangar, saˈicelen mikilim ko hacaˈof no salicay, mihaen wa malahdaw ko sasa no falocoˈ, patanoktok to pakasoˈlinay falocoˈ. Tada ciharatengay ci Yihofa tisowanan, misalimla to kinafalah iso matayal Cingranan, makalimayho palifon tisowanan. Itini pinengneng Ningra, kahacecacecay madimadiay midoko Cingranan a tamdaw o masakalimlaan, misaodoˈan Ningra a midipot. Nanay hamaan a cisasa to olah Ningra kitanan tahadaˈoc!