Ka Picangacang to Tahadaˈocay Materek a Niyaroˈ

1. Pairasolay ci Yis to o manan ko mamifekad a demak i Yirusalim?

ˈAYAW no patay ni Yis to pina romiˈad pairasolay to nisawawaan to mamifekad a demak, wa ‘mialikot ko sofitay i taliyok no Yirusalim.’ (Luka 21:20) Fanaˈan ningra ko nisawawaan, maˈaraw nangra koniya demak mifekad, kalikien miliyas to Yutaya pala.—Luka 21:21, 22.

2. O manan ko sapatalipaˈelal no tarokos ci Pawlo to Yutaya ato Yirusalimay a Krisciyang?

² Ikor, mialikotanto no sofitay no Loma ko Yirusalim. ˈAyaw no mamifekad koniya demak to pina miheca, mitiliday ko tarokos ci Pawlo to pakalalokay a tikami to Yutaya ato Yirusalimay a Krisciyang, oniya tikami i, o Hipray a cudad. Itini toniya tikami, palimoˈotan ni Pawlo to kalimlaan a sapatalipaˈelal, padama cangranan misongilaˈ a misaday, misiˈayaw to hamamifekad a demak. O manan a demak hani? O sakalaˈafoaw no Yirusalim. Ano sakaˈoripaw ko itiraay a Krisciyang i, wa hayi sa cangra misawad to lomaˈ ato singdi. Mihaenay, patalipaˈelalay ci Pawlo cangranan: ‘Itini awaay ko tahadaˈocay materek a niyaroˈ no mita, o micangacangan ita oya hanoikoran a niyaroˈ.’—Hipray 13:14.

3. O manan ko ‘soˈlinay ira ko taenengan a niyaroˈ?’ Hano micangacang kita toniya niyaroˈ?

³ Oya mamiliyas to Yirusalim ato Yutaya a Krisciyang alatek wa mapeles a malikaf, kawra oniya saˈosi milidongay to ˈorip nangra. Anini, mahecaday kita malikaf no tao, samanen cowa pakasoˈlin kita to tatiˈeren ko ˈicel no tamdaw wa misaysay to pasangar noniya hekal, cowa ka picangacang kita itini hekal ni Satan to sinowayay a nokaˈorip. Hano mahaen ko pipiliˈ ita hani? Samanen mafanaˈay kita, oniya hekal cowato ko hahalafin a materek, o micangacangan ita o ‘soˈlinay ira ko taenengan a niyaroˈ,’ ‘hanoikoran a niyaroˈ,’ o Kitakit no Kawas.a (Hipray 11:10; Matay 6:33) Oniya lalakaw a kahacecay a lalangian, wa manengneng ita, o sapaini ni Pawlo misamaan a padama to saka 1 hahekalan a Krisciyang padadotoc micangacang to ‘hanoikoran a niyaroˈ,’ samaanay ci Pawlo padama cangranan misaday to hasasiˈayawen a pades, ato o manan ko mamananam ita to sapalimoˈot ni Pawlo.

PAKASOˈLIN CI YIHOFAAN, COWA KO MAMILIYAS CINGRA TISOWANAN

4. O Yirusalim pakayni saka 1 hahekalan a Krisciyang hano o masakalimlaan han hani?

⁴ Pakayni i saka 1 hahekalan a Krisciyang, tada kalimlaan ko Yirusalim. O sakacecay a kasakopang no Krisciyang itiraay a mapatireng, ano oyato mikayatay a kasacefang no malohemay malitengay itiraay cangra. Roma i, ˈalomanay i Yirusalimay a salikaka iraay ko no niyah a lomaˈ, adihayay ko mahopeday a hafay. Kawra kamayan patalipaˈelal ci Yis to itiraay a Krisciyang, ano ikor, oha mamiliyas cangra to Yirusalim, hanaca mamiliyas to Yutaya.—Matay 24:16.

5. Samaanay ci Pawlo padama to itiyaay a Krisciyang a misaday, misiˈayaw to hamamifeked a demak?

⁵ Itiyaay a Krisciyang ano sapisongilaˈaw misaday to hamamifekad a demak i, oha mamitengil to sapalimoˈot ni Pawlo, tano ni Yihofa a harateng a minengneng to Yirusalim. Patalipaˈelalay ci Pawlo cangranan, cowato ka pihayi ci Yihofa to fangcalay sefi no Yirusalim, sapatoˈaya ato likakawa no saysi. (Hipray 8:13) Roma i, o i niyaroˈay a tamdaw cowa ka pihayi ci Yisan to ci Misiya. Mansa, o fangcalay sefi no Yirusalim cowato ko matatodongay noka pidoko a kitiraan, hanaca wa mapalaˈafo koniya fangcalay sefi.—Luka 13:34, 35.

6. Misamaanay o itiyaay a Krisciyang misaaliay to sapatalipaˈelal ato mikiˈokan no Hipray 13:5, 6?

⁶ Miˈoning ci Pawlo to Hipray a cudad i, cihafayay a niyaroˈ ko Yirusalim. Itiyaay a lintad mitatiliday no Loma sanay, “i kakawalian o cinganganay a niyaroˈ” ko Yirusalim. To mihecahecaan ˈalomanay ko nai cowacowaay a Yutaya tamdaw tayni i Yirusalim a misalisin, pacakatay to hafay no niyaroˈ, o roma Krisciyang i, adihayay ko maetanay a payci. Alatek onini ko pirikec ni Pawlo cangranan: ‘O waywayan namo, hamaan a maˈanof to hafay, marenecen to iraay a dafong.’ Dotoc, sakadademakan ni Pawlo ko mikiˈokan ni Yihofa i Fangcalay Cudad: ‘Cowa ko mamifalah ato mamiliyas Kako tisowanan.’ (ˈOsien ko Hipray 13:5, 6; Limoˈot 31:6; ˈOlic 118:6) Onini sakiˈok, o mihadakan ni Yihofa to kahacecay madimadiay sikawdan Ningra. Pakayra tora i Yirusalimay ato Yutaya a Krisciyang, masakalimlaan koniya sakiˈok. Misamaanay? Samanen macada nangra ko tikami ni Pawlo ikor no pina miheca, wa sawadento ko lomaˈ, singdi ato hafay no niyah, hanaca wa tayrato i kafahalan a kitiraan a maˈorip.

7. Misamaanay hano aniniho kita mitongal to pakasoˈlin a mitiˈer ci Yihofaan hani?

⁷ O manan ko mananamay ita? Wa kalikito mamifekadto ko taˈangayay padiing, mamisongilaˈ a mapalaˈafo koniya mariˈangay a hekal. (Matay 24:21) Mahecaday kita to saka 1 hahekalan a Krisciyang, padadotoc a patalipaˈelal, misongilaˈ a misaday. (Luka 21:34-36) Itini toniya taˈangayay padiing i, alatek wa sawaden ita ko roma hafay, anca o emin a hafay. Itiyato i, pakasoˈlinen ita a mitiˈer ci Yihofa, pakasoˈlinho cowa ko fafalahen Ningra kita. Soˈlin, nohatiniho ira ko toki ita paihkal to pakasoˈlinay a mitiˈer ci Yihofaan. Ngaˈayay salalicayen iso ko niyah: “O misaˈosian ato patosokan no kaˈorip ako, o hafay ko mitiˈeran han? Anoca ci Yihofa han?” (1 Timoti 6:17) Wa ngaˈay kita mikitini i mifekaday i saka 1 hahekalan a demak adihay ko mamananam ita, kawra hamamifekad a taˈangayay a padiing, ato mamasiˈayaw ita a sapalifet na cowaho ka mifekad isaˈayaw, itiyato i, samaan kita a mafanaˈ to sasamaan ko demak hani?

DOFDOFEN KOYA MIKERIDAY A TAMDAW

8. Palimoˈotan ni Yis ko nisawawaan ningra misamaan ko demak?

⁸ Miˈoning ci Pawlo to Hipray a cudad ikor no pina miheca, o sofitay no Loma mialikotay to Yirusalim. O itiraay maˈorip a Krisciyang mafanaˈay to mamilaliw ko niyah, samanen wa kalikito mapalaˈafo ko Yirusalim. (Matay 24:3; Luka 21:20, 24) Kawra o sowal ni Yis: ‘O i Yutayaay wa tayra i lotok a milaliw.’ (Luka 21:21) O lotolotokan itira, pasicowa cangra milaliw hani?

9. O itiyaay a Krisciyang hano mamiharateng to pasicowa a milaliw? (Nengnengen ko wito.)

⁹ Haratengen hena ko itiyaay a Krisciyang, wa pasicowa cangra milaliw. Tinakoen, ngangaˈay cangra tayra i Hirmon lotok, Samariya lotok, Kalili lotok, Lipanon lotok anca i kawali no Yortan ˈAlo a lotok. (Nengnengen ko wito.) Itini toniya lotok i, o roma a niyaroˈ nengnengen hato dipayalay. Tinakoen, Kamola niyaroˈ itiraay i katalawan ˈakawangay a lotok, pasangaray tayra tora lotok, mansa o pinengneng no roma Yutaya tamdaw, orira niyaroˈ o matatodongay a pikidihingan. Kawra, ikor mifolawan no Loma ko Kamola a palaˈafo koniya niyaroˈ, ˈalomanay ko mapatayay tamdaw no niyaroˈ.b

10-11. (1) Samaanay ko Kawas mihadak to sakayat? (Hipray 13:7, 17) (2) Itiyaay a Krisciyang midofdofay to mikeriday a tamdaw o manan ko epoc? (Nengnengen ko coka.)

¹⁰ Pakaynian ni Yihofa i mikeriday to kasakopang a faˈinayan salikaka, mikayat to itiyaay a Krisciyang matatodong ko pidemak. Mikakingkiway to likisi ci Yusipius i tilid ningra masowalay koniya likisi, saan ko sowal ningra, mipatemeran no Kawas ko mikeriday i kasakopang a tamdaw, ho ngaˈay cangra palimoˈot to itiyaay a Krisciyang miliyas to Yirusalim, milaliw tayra i Pila niyaroˈ no Piria. Ano nengnengen i, matatodongay ko pipiliˈ to Pila niyaroˈ, samanen oniya niyaroˈ mangataay no Yirusalim, cowa ka pasangar milaliw ko Krisciyang a tayra. Roma i, o kalalaˈis no Yutaya tamdaw ato Loma a tamdaw cowa ko mamifiyor toniya niyaroˈ, samanen i niyaroˈay a finawlan cowa ko Yutaya a tamdaw, mihaenay sapitowakangaw to Loma a tamdaw cowa ka taˈangay ko pilingat toniya niyaroˈ.—Nengnengen ko wito.

¹¹ O itiyaay a Krisciyang mitooray to sapatalipaˈelal ni Pawlo, midofdofay toya mikeriday cangranan a tamdaw, milaliw tayra i Pila niyaroˈ. Mihaenay, materekayto cangra a maˈorip. (ˈOsien ko Hipray 13:7, 17.) Cowa ka liyasen no Kawas koniya Krisciyang, samanen ‘mitalaay cangra toya soˈlinay ira ko taenengan a niyaroˈ,’ oya Kitakit no Kawas.—Hipray 11:10.

12-13. Samaanay ci Yihofa itini karawrawan a tatokian mikerid to finawlan Ningra?

¹² O manan ko mananamay ita? Pakaynian ni Yihofa i mikeriday a tamdaw a mihadak to ihkalay a sakayat to finawlan Ningra. Maceriday maˈosiay i Fangcalay Cudad, kinapinapinaay ci Yihofa i karawrawan a tatokian, misakadademak to madimadiay a tamdaw a mikerid to finawlan Ningra. (Limoˈot 31:23; ˈOlic 77:20) Aninito i, mahapinangay ita, kamayan ci Yihofa pakayni i mikeriday a tamdaw a mikayat to finawlan Ningra.

¹³ Tinakoen, mifekad ko 2019 a lifong i, mikeriday to finawlan no Kawas a tamdaw milasil to sakayat i kasakopang, mifanaˈ to malohemay malitengay samaanay mikerid to salikaka padadotoc malacafay midoko ci Yihofaan. Mifekad ko lifong caka halafin, iraay ko mikiriwiˈay a kasapala taykay, oniya taykay 500 kasasiroma no sasowalen, mirienangay a tamdaw ngaˈay pakayni to wanglo, tilifi anca laciw mitengil to kamok no taykay. I kalifongan i, padadotocay macada no salikaka ko cihaleday to pakasoˈlinay falocoˈ a kakaenen, mansa ngaˈayay makakedec. Pakasoˈlin kita, ano tahalifa to manan a sapalifet noikor, padamaen ni Yihofa ko mikeriday a faˈinayan salikaka citaneng ko pisaˈosi, pafeli kitanan to ihkalay a sakayat. Mitiˈer kita ci Yihofaan ato midofdof to mikeriday a faˈinayan salikaka ngaˈ, itini i taˈangayay padiing citaneng ko pidemak. Kawra, sapisiˈayawaw toniya pasangaray a lintad, palahadenho ita ko masamaanay a capeling hani?

PAIHKAL TO OLAH TO SALIKAKA ATO HINAPALADAˈAY

14. Mikitini Hipray 13:1-3, ˈayaw no mapalaˈafo ko Yirusalim to pina miheca, wa paihkal ko Krisciyang to manan a capeling hani?

¹⁴ Saharateratengen, itiyaay i Yirusalim ato Yutaya a Krisciyang a pakayraan. Padadotocay cangra a masasiolah. (Hipray 10:32-34) Kawra ˈayaw no mapalaˈafo ko Yirusalim to pina miheca, wa mangalef cangra paihkal to ‘olah to salikaka’c ato hinapaladaˈay. (ˈOsien ko Hipray 13:1-3.) Mahecaday, mifekad ko taˈangayay padiing i, wa mihaen kita to demak.

15. Miliyas ko itiyaay a Krisciyang to Yirusalim ikor, misamaanay hano padadotoc paihkal to olah to salikaka ato hinapaladaˈay?

¹⁵ Maalikot no sofitay no Loma ko Yirusalim caka halafin, fahal sanay a miliyas ko sofitay, pairaay to toki no itiraay a Krisciyang a milaliw. Kawra cowa ka adihay ko hahawikiden nangra a dafong. (Matay 24:17, 18) Mansa, itini i pilaliw nangra wa malapadama cangra ngaˈ. Tahirato i Pila niyaroˈ misafaeloh to kaˈorip ikor, padadotocho madadama cangra. Itiyaay a Krisciyang cangoˈotay ko kakaenen, rikoˈ, ato pikilomaˈan. Onini ‘macalohay a saali,’ pairaay to toki no Krisciyang paihkal to soˈlinay olah to salikaka ato hinapaladaˈay, paladaˈ to dafong no niyah.—Titus 3:14.

16. Misamaan kita paihkal to olah to cisaaliay a salikaka? (Nengnengen ko coka.)

¹⁶ O manan ko mananamay ita? Maolahay kita to salikaka, ano misaali cangra to sapadama i, makahiay kita a padama cangranan. Tinakoen, o roma Krisciyang itini kafolawan anca tahapadesay a malo mapadesay a tamdaw, ˈalomanay ko salikaka makalimay padama cangranan, ho madipot cangra itini kaˈorip ato pidokoan a saali. Itiniay i Okeran a fafahiyan salikaka pakayni i folaw miliyasay to lomaˈ no niyah, sanay cingra: “Matinakoay niyam padadotocay mikayat ci Yihofa tamiyanan, pakayniayho i salikaka padama tamiyanan. Ano itiniayto kami i Okeran, Siyungyali anca i Towic, sahtoay macadaay niyam ko pilitemoh ato sadipot no salikaka.” Paihkalay kita to hinapaladaˈay to salikaka, midimokos to saali nangra, o kalacafayay ci Yihofaan a matayal.—Taneng 19:17; 2 Korinto 1:3, 4.

17. Misamaanay hano hatiniho palahad to olah to salikaka, paihkal to hinapaladaˈay?

¹⁷ Itini taˈangayay padiing a tatokian, wa mikikaka kita to isaˈayaway a madadama, samanen wa maroray ko kaˈorip itiya. (Hapakuk 3:16-18) Nohatini pahatatanamayto ci Yihofa kitanan, padama kitanan palahad to olah to salikaka, paihkal to hinapaladaˈay. O mahaenay a capeling i taˈangayay a padiing o masakalimlaan koni.

SONGILAˈEN A MISADAY, MISIˈAYAW TO NOIKORAN

18. Sasamaan kita mitodong toya miliyasay milaliw to Yirusalim a Krisciyang hani?

¹⁸ Paihkalay ko likisi, na mapalaˈafo ko Yirusalim i, oya midofdofay to sapalimoˈot a milaliw tayra i lotok a Krisciyang materekay maˈorip. Soˈlin sawad hananay nangra ko lomaˈ no niyah, kawra cowa ka sawaden ni Yihofa cangra. Mananamay ita ko manan hani? Pakayni noikoran mamifekad a demak, adihayayho ko cowa ko kafanaˈan no mita. Kawra mafanaˈay kita to sapalimoˈot ni Yis, oha tatalaˈayaw a misaday. (Luka 12:40) Mafanaˈayho kita, o sapalimoˈot ni Pawlo i Hipray cudad oha mamadipot kita, mahecad to pidipot ningra i saka 1 hahekalan a Krisciyang. Roma i, mikiˈokay ci Yihofa kitanan, cowa ko mamifalah Cingra kitanan. (Hipray 13:5, 6) Nanay fanekfek kita micangacang toya tahadaˈocay materek a niyaroˈ, oya Kitakit no Kawas, mihaen wa macada ita ko sapalemed no Hongti Kitakit, tahira i daˈoc.—Matay 25:34.