ˈAyaw no Patay ni Yakop a Sapairasol o Manan ko Mananamay Ita—Saka 1

1-2. ˈAyaw no patay ni Yakop i, o manan ko midemakan, misamaanay? (Nengnengen ko coka.)

MADIMADIAY a sikawdan no Kawas ci Yakop, mikeridan ko paro no lomaˈ ningra nai Kanan malinah tayra i Icip, padadotocay cingra itira maˈorip to 17 ko mihecaan. (Satapangan 47:28) Ngaˈay miliyaw a malacafay to kaolahan ningra a wawa ci Yosif, ato emin a wawa ningra a malacecay a maˈorip, maedeng rahekeran nanay cingra. Kawra nohatini, mafanaˈayto cingra mamapatayto ko niyah, mansa tahidangan ningra ko wawa misaˈopo.—Satapangan 49:28.

² I nolitengan, o tawki no lomaˈ itiya toha mamapatay i, tahidangan ko paro no lomaˈ, mipatorod to hanoikoran a demak. (Isaya 38:1) Alatek fanaˈen ningra ko paro no lomaˈ, mapatay cingra ikor cima ko hamamikotay mikerid to paro no lomaˈ.

3. Mikitini i Satapangan 49:1, 2, o sapaikor a sowal ni Yakop hano o mikiriwiˈay hani?

³ ˈOsien ko Satapangan 49:1, 2. Kawra, o kasaˈopo no paro no lomaˈ ni Yakop mikiriwiˈay, samanen misowalan ni Yakop itiya, cowa ko sapaikor a sowal aca ningra, o sapairasolho. Itini sakayat ni Yihofa, sapairasol ni Yakop o mamafekad ko taˈangayay a demak, onini a demak malalitingay to wawa ningra ato fofofofo maemin. Mansa, oniya sowal ni Yakop nolatekay o ˈayaw no patay ni Yakop a sapairasol hananay.

4. ˈAyaw no patay ni Yakop a sapairasol milingatay to cimaanan? Mikitini i sapairasol ningra o manan ko mamananam ita? (Nengnengen ko sapatongal lalakaw “O Paro no Lomaˈ ni Yakop.”)

⁴ Mahecad to masowalay isawni, o sowal ni Yakop cowa ko milingatay aca to wawa ningra, mahawpay ko fofofofo maemin. Oniya teloc ikor malo o Israil hananay a kitakit. Mihaenay, oniya lalakaw ato dotoc lalakaw oha mamifolfol to misowalan ni Yakop to kahacecay a wawa ningra, oha mamilengoho to likisi no Israil. Mihaen, wa mafanaˈ kita to sapairasol ni Yakop samaanay a malaˈosi. Mikitini i sowal ni Yakop wa mananam ita ko kalimlaan a kimad, mafanaˈ to samaan ko demak no mita ngaˈ pakahemek ci Yihofaan. Oniya lalakaw salakat wa milengo to sowal ni Yakop to sasepat a wawa, mahawpay ci Riupin, Simiyong, Lifi aci Yuta. Dotoc a lalakaw mamilengo to sowal ningra to fafalo a wawa.

RIUPIN

5. Alatek ci Riupin hinatalaay to mamilifok to manan?

⁵ Salakat pasowalan ni Yakop ci Riupin: ‘O sakakaay a wawa ako kiso.’ (Satapangan 49:3) O sakacecay a wawa ni Yakop ci Riupin, mansa i harateng ningra wa tosa ko mamaala a todong a hafay no niyah. Alatek i harateng ni Riupin, ano mapatay ci Yakop ikor mamikerid cingra to paro no lomaˈ, hanaca o teloteloc ningra ko mamidotoc toniya fadangalan.

6. Hano caka tahacada ci Riupin to fadangalan no sakakaay a wawa hani? (Satapangan 49:3, 4)

⁶ Kawra, cowa ka tahacada ci Riupin to todong ningra a dafong. (1 Rayray 5:1) Misamaanay hani? Mapatay ci Rakil ikor, midiˈiyan ni Riupin ko roma a fafahi ni Yakop ci Pilha. (Satapangan 35:19, 22) Hano mahaen ko demak ni Riupin? Samanen ci Pilha o nano koli no fafahi ni Yakop ci Rakil, ci Riupin o wawa no roma fafahi ni Yakop ci Liya. Alatek o harateng ni Riupin, midiˈi ko niyah ci Pilhaan i, ho mapiliˈ ci Yakop ci Pilhaan, ho caka lahdaw ko saaroˈan no wina no niyah. Anca alatek maolahay ci Riupin ci Pilhaan, cowa ka miˈimer to coos no harateng no niyah, telocto i, pakidemayto ko raraw ningra. Ano o mananto a lalangian i, o waywayan ni Riupin, tada pakaketeray ci Yihofaan aci Yakopan.—ˈOsien ko Satapangan 49:3, 4.

7. Ci Riupin ato teloteloc ningra ikor samaanayto hani? (Nengnengen ko sapatongal lalakaw “ˈAyaw no Patay ni Yakop a Sapairasol.”)

⁷ Saan ci Yakop ‘cowa ko mamikikaka ci Riupin to ˈalomanay a tamdaw.’ O sowal ningra i, soˈlinayto a malaˈosi, samanen i Fangcalay Cudad cowa ka masowal ko teloteloc ni Riupin to iraay ko mala hongtiay, saysi, anoca o pairasolay. Kawra ci Yakop papidotocan ci Riupin to hafay ningra, teloteloc ni Riupin mala ngangasaw tono Israil. (Yosuwa 12:6) O roma i, misalofan ni Riupin ko mararaway no niyah, cowato ka pisaliyaliyaw a mararaw, i roma a pakayraan, paihkal to makapahay a capeling ningra.—Satapangan 37:20-22; 42:37.

8. Mikitini tinakoan ni Riupin o manan ko mananamay ita?

⁸ O manan ko mananamay ita? Oha mamicoˈay kita to mararaway a coos, miconged to kihcod maˈodangay a waywayan. Ano masiˈayaw ita ko maˈodangay a sakayhid i, saharateratengen, ano midemak i, wa makesem ci Yihofa, madokaˈ ko paro no lomaˈ ato romaroma a tamdaw, haratengenho, ‘o manan ko palomaan no tamdaw, o manan ko milidongan.’ (Kalatiya 6:7) O roma i, mikitini tinakoan ni Riupin mananamay ita, tada sidaˈitay ci Yihofa to tamdaw. Soˈlin papiˈinorong ci Yihofa kitanan to teloc no raraw no niyah, kawra ano mikifalocoˈ kita pasasiyor, misaˈicel midemak to matatodongay, oha mamisodod Cingra kitanan, halo palemed kitanan.

SIMIYONG ACI LIFI

9. O manan ko midemakan ni Simiyong aci Lifi a patateker ci Yakopan hani? (Satapangan 49:5-7)

⁹ ˈOsien ko Satapangan 49:5-7. Dotoc a sowal ni Yakop pakayniay ci Simiyongan aci Lifian. Oniya sowal paihkalay, o midemakan ni Simiyong aci Lifi tada pakaketeray ci Yakopan. Na itiniho i Kanan ko paro no lomaˈ ni Yakop i, o fafahiyan a wawa ni Yakop ci Tina, miˈodangan no i Kananay a tamdaw ci Sikim hananay. Mifekad ko mahaenay a demak i, o kaka ato safa ningra tada mangolaway. Misakaniway cangra ci Sikiman, pasowal to ano micada cingra ato i niyaroˈay a faˈinayan maemin to kerit, o paro no lomaˈ ni Yakop wa makahito ciraramod cangranan, mala dipayalto. Hayi sanay ci Sikim ato i niyaroˈay faˈinayan to saali nangra, micada to kerit. Kawra na adadaho cangra i, ci Simiyong aci Lifi ‘cifonosay a micomod to niyaroˈ, na cowaho ka piciwiˈ ko niyaroˈay a tamdaw, patayan ko emin a faˈinayan.’—Satapangan 34:25-29.

10. O sowal ni Yakop ci Simiyongan aci Lifian samaanay a malaˈosi hani? (Nengnengen ko sapatongal lalakaw “ˈAyaw no Patay ni Yakop a Sapairasol.”)

¹⁰ Pakidemay ko mariˈangay a demak ni Simiyong aci Lifi, tada mangolaway ci Yakop. Pairasolay cingra cangranan wa malifosak ko hafay nangra icowacowa, ikor no 200 miheca, malaˈosiayto koniya sapairasol. Micomodto ko Israil tayra to mikiˈokan no Kawas a pala ikor, o hafay ni Simiyong a ngangasaw, malifosakay i ngangasawan no Yuta a pala, o patatodongan ngangasaw no Lifi a 48 a niyaroˈ malifosakay icowacowa a pala no Israil.—Yosuwa 19:1; 21:41.

11. O ngangasaw no Simiyong ato Lifi i, samaanay madimadi ci Yihofaan?

¹¹ Soˈlin mararaw ci Simiyong aci Lifi, kawra o teloteloc nangra cowa ka piliyaw a mararaw. Madimadiay ko ngangasaw no Lifi a midopo to matatodongay a pidoko. Itini i Sinay Lotok ci Mosi micada to sarikec ni Yihofa i, ˈalomanay a Israil tamdaw midokoay to ekim a kolong. Itiya o Lifi a ngangasaw a tamdaw i, cowa ka pirienang to mitaˈongay to samiyay, padamaayho ci Mosian mipatay to cowa ka madimadi a tamdaw. (Kasadakan 32:26-29) Ikor mipiliˈan ni Yihofa ko Lifi a ngangasaw, pafeli cangranan to mikiriwiˈay a tayal, halo pafeli to Lifi a tamdaw mala saysiay a ˈinorong. (Kasadakan 40:12-15; Saˈosi 3:11, 12) O ngangasaw no Simiyong masamaanayto hani? Padamaay cangra to Yuta a ngangasaw miˈodis to Kanan a tamdaw, miˈafas to pala no ˈada. O midemakan nangra mapalemeday ni Yihofa.—Kakitaan 1:3, 17.

12. Mikitini kita ci Simiyongan, Lifian, ato teloteloc nangra o manan ko mananamay?

¹² O manan ko mananamay ita? Wa miˈimer kita to ngolaw, aka i kangolawan a macaloh midemak. Ano madokaˈ ko niyah ato kaolahan no mita i, mangolaw kita o matatodongayto. (ˈOlic 4:4) Kawra haratengen, ano mangolaw a midokaˈ to tamdaw i, anca midokaˈ to tao ko sasowalen, cowa ko mamihayda ci Yihofa. (Yakop 1:20) O midokaˈay kitanan a tamdaw ano cowa ko midokoay ci Yihofaan i, wa dofdofen ita ko sarikec no Fangcalay Cudad a misaysay, ano mihaen cowato ko mamidemak kita to pakaketeray to Kawas a demak. (Loma 12:17, 19; 1 Pitiro 3:9) O roma i, ano midemak ko wama wina iso to cowa ko kahemekan ni Yihofa a demak, cowato pihayda ci Yihofa tisowanan aka ka saan. Aka papifiyoren cangra tisowanan, halo padadotoc midemak to matatodongay a demak i pinengneng ni Yihofa. Maˈaraw Ningra ko pisaˈicel iso, wa palifonen Ningra kiso, padama tisowanan a malaˈosi.

YUTA

13. Na pasowal ci Yakop ci Yutaan i, hano marawraw ci Yuta hani?

¹³ Dotoc o ci Yutato. Pakatengil to sowal no wama ci Yakop to tatolo a kaka ikor, alatek marawraway ci Yuta, samanen iraay ko pakidemay kararawan ningra. Tinakoen, mapatay ni Simiyong aci Lifi ci Sikim ato niyaroˈay a tamdaw ikor, alatek malacafayay ci Yuta miˈafas tora niyaroˈ. (Satapangan 34:27) Ikor malacafayay ci Yuta ato salikaka paˈaca to safa ci Yosif malo koli a misakaniw to wama. (Satapangan 37:31-33) Cowa konini aca, madadiˈiyay ci Yuta ato sano pacopiyaway ko lafa a kadafo ci Tamar.—Satapangan 38:15-18.

14. Na midemakay ci Yuta to manan a mapakahemekay a demak hani? (Satapangan 49:8, 9)

¹⁴ Kawra itini i sakayat no Kawas ci Yakop, sapasowal ci Yutaan sahtoay o sapalemed ato sapakahemek. (ˈOsien ko Satapangan 49:8, 9.) ˈAyaw nonini, o waywayan ato sasowalen ni Yuta paihkalay to ciharatengay cingra to harateng no wama. Roma i, tada midipotan ningra ko sasafaay a safa ci Pinyamin.—Satapangan 44:18, 30-34.

15. Sapairasol ni Yakop ci Yutaan samaanay a malaˈosi hani?

¹⁵ Pairasolay ci Yakop, wa itini salikaka ningra malo o kakeridan ci Yuta, kawra ikor no 200 miheca ngaˈ malaˈosiay koniya sapairasol. Itiya, liyas sanayho ko Israil tamdaw i Icip, mitaˈlif to kohkoh tayra tora mikiˈokan no Kawas a pala, saˈayaway romakatay i 12 ngangasaw no Israil, o ngangasaw no Yuta. (Saˈosi 10:14) Ikor no pina poloˈ miheca milimasmasay ko Israil tamdaw miˈodis to Kanan tamdaw, miocoran ni Yihofa ko ngangasaw no Yuta talaˈayaw. (Kakitaan 1:1, 2) Roma i, mikitini ci Tafitian misatapang, ngangasaw no Yuta iraay ko padadotocay mala hongti, mikowan to finawlan no Kawas. Kawra, malaˈosi koniya sapairasol cowa konini aca.

16. O sapairasol i Satapangan 49:10 samaanay a malaˈosi? (Nengnengen ko sapatongal lalakaw “ˈAyaw no Patay ni Yakop a Sapairasol.”)

¹⁶ O sowal ni Yakop, o teloteloc ni Yuta iraay ko cecay tamdaw wa tahadaˈoc a mala Hongti, mikowan to tamdamdaw. (ˈOsien ko Satapangan 49:10.) Oniya Hongti o ci Yis Kristo. Pakayni ci Yisan, o cecay a coyoh saan: ‘O lalitengan ningra ci Tafiti a saaroˈan wa pafelien ni Yihofa a Kawas cingra.’ (Luka 1:32, 33) Roma i, ‘o layong no ngangasaw no Yuta’ hananay no Fangcalay Cudad ci Yis a pangangan. (Paˈarawan 5:5) Mahapinangayto, ci “Silo” hananay ni Yakop o ci Yis Kristo.

17. Pakayni pinengneng to salikaka, sasamaan kita minanam ci Yihofaan?

¹⁷ O manan ko mananamay ita? O salikaka ni Yuta matengil ko sapalemed ni Yihofa ci Yutaan, makalioratay ko falocoˈ nangra han? Samanen iraay ko midemakan ni Yuta a mararaway a demak. Soˈlin cowa ka fanaˈ kita to iraay ko mahaenay harateng nangra, kawra mafanaˈay kita o kangaˈayan ni Yuta ko manengnengay ni Yihofa, mihaenay a palifonan cingra. Sasamaan kita minanam ci Yihofaan hani? Alatek o dangoc no salikaka ko maˈaraway no mita, mansa ano macada nangra ko roma a ˈinorong i, satapang alatek makalioratay kita. Kawra ngaˈayay haratengen ita, ci Yihofa i, masemeray to kangaˈayan nangra. Ci Yihofa maceriday mikilim to kangaˈayan no finawlan Ningra, wa misaˈicel kita mihaen to demak.

18. Hano misaali kita to mihadidiay hani?

¹⁸ Mikitini tinakoan ni Yuta wa minanamho kita to mihadidiay. Wa midoedo ci Yihofa to sakiˈok Ningra, kawra alatek cowa ka tatodong to hinatalaan ita a tatokian, anca pakayraan a palaˈosi to mikiˈokan no Niyah. Saharateratengen, pairasolay ci Yihofa o ngangasawan no Yuta wa mikerid to finawlan Ningra, kawra salakat manilnil no Kawas mikerid to Israil tamdaw cowa ko ngangasaw no Yuta, tinakoen o ngangasawan no Lifi ci Mosi, ngangasaw no Ifraim ci Yosuwa ato ngangasaw no Pinyamin ci Sawlo. Soˈlin mahaen, ngangasaw no Yuta a tamdaw kamayan a madimadi midama to limasmas ni Yihofa. Malecadayto, wa mihadidi kita mitala ci Yihofaan palaˈosi to mikiˈokan Ningra, ato madimadi a midama to minilnilan ni Yihofa a mikerid kitanan a tamdaw.—Hipray 6:12.

19. Pakayni ci Yihofaan, mikitini toniya lalakaw o manan ko mananamay ita?

¹⁹ Mihaenay i, mikitini ˈayaw no patay ni Yakop a sapairasol mananamay ita ko manan? Ihkalay koni, ‘cowa ka hecad ko tamdaw to Kawas, o papotalay ko minengnengan no tamdaw, o falocoˈ ko minengnengan ni Yihofa.’ (1 Samuil 16:7) Mihadidiay ci Yihofa to tamdaw, halo mahemek a misodod to tamdaw. Cowa ko pasalat han Ningra ko mariˈangay demak, kawra cowa ka pisaali to midokoay Cingranan a tamdaw a malefot. Soˈlin pakidem ko raraw no cecay tamdaw, ano nai falocoˈ a pasasiyor, halo misaˈicel a midemak to matatodongay i, wa palemeden ni Yihofa cingra. Dotoc a lalakaw mamilengo to sowal ni Yakop toya fafaloay a wawa ningra.