ˈAyaw no Patay ni Yakop a Sapairasol o Manan ko Mananamay Ita—Saka 2

1. Oniya lalakaw mamilengo to manan hani?

I ISAˈAYAWAY a lalakaw masowalay, o wawa ni Yakop masaˈopoay i tatihi ningra, misinanot a mitengil to sowal ningra to kahacecay a wawa. Matengilay ko sowal ni Yakop ci Riupinan, Simiyong, Lifi aci Yutaan ikor, alatek tada fahkaˈan nanay ko wawa ni Yakop maemin. Sakafanaˈaw cangra to dotoc a sowal ni Yakop to fafalo a wawa. Oniya fafalo a wawa ci Cipulun, Isakar, Tan, Kat, Asir, Naftali, Yosif aci Pinyamin.a Dotoc kahacecacecayen ita a minengneng, mikitini i sowal ni Yakop cangranan mamananam ita ko manan kalimlaan a kimad.

CIPULUN

2. O manan ko sowal ni Yakop ci Cipulunan? O sowal ningra samaanay malaˈosi hani? (Satapangan 49:13) (Nengnengen ko sapatongal lalakaw.)

² ˈOsien ko Satapangan 49:13. Pairasolay ci Yakop, o teloc ni Cipulun wa mikilomaˈ i ngata no lawac no riyar. Ikor no 200 miheca, o sapairasol ni Yakop malaˈosiayto, o ngangasaw no Cipulun malilamay a pala itiniay i kalalaˈed no Kalili Riyar ato Tenokay a Riyar. Oniya pala ngaˈayay pisasingdian, alatek pakayni toniya lalangian, sanay ci Mosi: ‘Cipulunaw, nanay lipahak kiso i papotal.’ (Limoˈot 33:18) O Cipulun ngangasaw soˈlinay iraay ko lalangian nangra a mahemek.

3. Sasamaan ko demak ita ngaˈ lipahak a marenec?

³ O manan ko mananamay ita? Ka pisinanot kita to iraay a sapalemed no niyah, mihaen i, ano icowato kita mikilomaˈ, i masamaanay a pakayraan, kamayan ira ko lalangian a lipahak. (Kalatiya 6:4) Ano caciharateng kita to awaay no niyah a dafong i, wa madolo kita malonay a matoled. Kawra ano pairaen ita ko marenecay a harateng, wa mahela ita ko sakalipahak a lalangian.—ˈOlic 16:6; 24:5

ISAKAR

4. O manan ko sapairasol ni Yakop ci Isakaran hani? Samaanay malaˈosi ko sowal ningra hani? (Satapangan 49:14, 15) (Nengnengen ko sapatongal lalakaw.)

⁴ ˈOsien ko Satapangan 49:14, 15. Pakahemekay ci Yakop ci Isakaran malalokay a marorayen, mahecad to tanoktokay ko ˈokak a lofa, ngaˈay mitamorong to karetengay a ˈinorong. Sanayho ci Yakop, wa tahacada ci Isakar to makapahay a pala. O sowal ni Yakop soˈlinay a malaˈosi, o malilamay no teloteloc ni Isakar a pala itiniay i tatihi no Yortan ˈAlo, makapahay ko sera kadofahay ko pinaloma. (Yosuwa 19:22) O ngangasaw no Isakar malalokay mikaomah to niyah a omah, hanaca misaˈicelay a padama to tao. (1 Hongti 4:7, 17) Ira ko katalawan no kitakit i, o ngangasaw no Isakar makalimay a midipot to salikaka. Tinakoen, kakitaan ci Parak ato fafahiyan pairasolay ci Tipora misaˈopo to Israil tamdaw a micoˈay to ˈada i, o ngangasaw no Isakar kalikiay a talaˈayaw mirienang.—Kakitaan 5:15.

5. Sasamaan kita mitodong to ngangasaw no Isakar? Hano mihaen kita to demak hani?

⁵ O manan ko mananamay ita? Malalok kita matayal saki ci Yihofaan, misakaretengan ni Yihofa a minengneng, mahecad to misakaretengay Cingra minengneng to ngangasaw no Isakar a tayal. (Patnakay 2:24) Haratengen i kasakopang malalokay matayal to ˈalomanay salikaka a faˈinayan salikaka. (1 Timoti 3:1) Soˈlin cowa ka malalood cangra, kawra mamisaˈicel cangra a midipot to salikaka, ho caka mapalak ko kalalaˈed no salikaka aci Yihofa. (1 Korinto 5:1, 5; Yuta 17-23) O roma i, misarocoday cangra misaday ato mikimad, mipaˈicel to pakasoˈlinay falocoˈ no salikaka.—1 Timoti 5:17.

TAN

6. O ngangasaw no Tan o manan ko ˈinorong nangra? (Satapangan 49:17, 18) (Nengnengen ko sapatongal lalakaw.)

⁶ ˈOsien ko Satapangan 49:17, 18. Patinakoen ni Yakop ci Tan mahecad to ˈoner, timoloay miˈodis to ikakaay to tireng no niyah a ˈada, tinakoen o ˈefa ato mikalicay to ˈefa a tamdaw. Oniya sapairasol samaanay a malaˈosi hani? O ngangasaw no Tan timoloay a mifolaw, malingad ko Israil tayra i Kanan a lalan i, o ngangasaw no Tan ‘salikoray a romakat a midipot to emin a tamdaw.’ (Saˈosi 10:25) Soˈlin o roma ngangasaw no Israil cowa pakaˈaraw to midemakan no ngangasaw no Tan, kawra o ˈinorong nangra kamayan a masakalimlaan.

7. Ano o mananto ko tayal ita i likakawa no Kawas, o manan ko haharatengen hani?

⁷ O manan ko mananamay ita? Alatek itini kiso i likakawa no Kawas, na midemakay to cowa ka samaan a tayal, tinakoen miasik ato mitomadaw to Kasaˈopoan, pangangan to dademakay i pitaykayan. Soˈlinay makapahay ko demak iso! Haratengen, ano o mananto ko midemakan iso saki ci Yihofaan i, maˈaraway a misalimla Cingra. Tano soˈlinay a olah dademak saki ci Yihofaan, cowa ka pisaali to sapakahemek no tao, tada masemeray Cingra tisowanan!—Matay 6:1-4.

KAT

8. O ngangasaw no Kat, hano madoloay maˈodis no ˈada? (Satapangan 49:19) (Nengnengen ko sapatongal lalakaw.)

⁸ ˈOsien ko Satapangan 49:19. Pairasolay ci Yakop, wa maˈodis no ˈada ci Kat. Ikor no 200 miheca, o ngangasaw no Kat maˈafasay nangra ko kawali no Yortan ˈAlo a pala. Maloelohay ko rengos nora pala, matatodongay pipakaenan to pinaˈorip. Kawra, oniya pala malalitingay to roma a kitakit, madoloay maˈodis no ˈada. (Saˈosi 32:1, 5) Kawra o ngangasaw no Kat timoloay, o masakalimlaan i, pakasoˈlinay cangra to Kawas ci Yihofaan, papadamaen cangra midipot to pala nangra. Micorcoran nangra ko sofitay, padama to roma a ngangasaw, milowid to kaetip no Yortan ˈAlo a pala. (Saˈosi 32:16-19) I pifolawan a pina mihecaan i, pakasoˈlinay cangra ci Yihofaan to hamamidipot to i lomaˈay nangra a fafahi ato wawa. Paihkalay cangra to timolo ato kinafalahay to niyah a waywayan, tada masemeran ci Yihofa cangranan.—Yosuwa 22:1-4.

9. Ano pakasoˈlin kita a mitiˈer ci Yihofaan, o manan ko papiliˈen hani?

⁹ O manan ko mananamay ita? Papakasoˈlinen ita ci Yihofa. Mihaen, ano o mananto ko malifaay a pasangar, wa kamayan kita padadotoc matayal Cingranan. (ˈOlic 37:3) Anini, ˈalomanay salikaka mirienang to patirengay a tayal, tayra i cisaaliay to mitosilay a pala, anca i likakawa no Kawas a romaroma a kadademakan a matayal. Soˈlin i katayalan nolatekay tatahalifa to pasangar, kawra ˈalomanay salikaka kamayan makalim patafang to niyah, samanen pakasoˈlinay cangra ci Yihofaan to hamamidimokos cangranan.—ˈOlic 23:1.

ASIR

10. O sowal ni Yakop ci Asiran a sapairasol samaanay a malaˈosi? Kawra o ngangasaw no Asir cowa ka pidemak to manan? (Satapangan 49:20) (Nengnengen ko sapatongal lalakaw.)

¹⁰ ˈOsien ko Satapangan 49:20. Pairasolay ci Yakop, wa cihafay ko ngangasaw no Asir. Malaˈosiayto ko sowal ningra. Ngangasaw no Asir malilamay to kadofahay a pala. (Limoˈot 33:24) O roma i, oniya sera itini katihiay i Tenokay a Riyar, hanaca mahawpayho ko Siton, cihafayay a minato a niyaroˈ. Kawra, ngangasaw no Asir cowa ka emin sa milaplap to Kanan a tamdaw. (Kakitaan 1:31, 32) Mafiyoray no tatiihay a waywayan no Kanan a tamdaw cangra, mansa misakaretengay cangra to pakadafongay a demak, cowato ka fanekfek a midoko ci Yihofaan. Tinakoen kakitaan ci Pala misaˈopoay to Israil tamdaw micoˈay to makakadepay a sofitay no Kanan i, ngangasaw no Asir cowa ka pipadama. Telocto, cowa ka ˈaraw nangra ko midemakan ni Yihofa a kafahkaˈan a pakalowid ko Israil to ˈada. Milowid ko Israil ikor, ci Parak aci Tipora romadiway, ilalomaˈ no radiw sanay a pasowal, o ngangasaw no Asir ‘awaay ko demak aroˈ sanay i lawac no riyar,’ tahatengil ko ngangasaw no Asir toniya radiw, maedeng mangodoay cangra.—Kakitaan 5:17, 19-21.

11. Hano pairaen ko matatodongay noka pinengneng to hafay hani?

¹¹ O manan ko mananamay ita? Makalimay kita patafang to sangaˈayay no niyah ci Yihofaan. Sapalaˈosiaw toniya patosokan, laliyasen ita ko misakaretengay tono dafongan a pinangan. (Taneng 18:11) Mamisaˈicel kita ngaˈ, ira ko matatodongay noka pinengneng to hafay. (Patnakay 7:12; Hipray 13:5) Cowa ko mipalakay kita to toki ato ˈicel a micangacang to pakadafongay, ao palaken ko toki ato ˈicel a matayal saki ci Yihofaan. Mafanaˈay kita, ano mitawmec to madimadiay, wa palifonen ni Yihofa kita, paira to soˈlinay a dipayal rihaday a maˈorip i noikoran.—ˈOlic 4:8.

NAFTALI

12. O sowal ni Yakop ci Naftalian a sapairasol, milingatay to manan hani? (Satapangan 49:21) (Nengnengen ko sapatongal lalakaw.)

¹² ˈOsien ko Satapangan 49:21. Wa pasowal ci Naftali to ‘lopayˈay a sowal’ sanay ci Yakop, oniya sapairasol milingatay to pitosil ni Yis a tayal. Mafanaˈay kita, o sapakafanaˈ ni Yis tada mitemeray to falocoˈ no tamdaw, hanaca o mitosilay a tayal ni Yis milingatay to Kapirnaum. Oniya niyaroˈ itiniay ilalomaˈ no Naftali a pala, o ‘niyaroˈ ni Yis’ hananay a pangangan, halafinay itira a maˈorip ci Yis. (Matay 4:13; 9:1; Yohani 7:46) Na masowalay ni Isaya to pakayni ci Yisan a sapairasol, o sowal ni Isaya o Cipulun ato Naftali a tamdaw wa pakaˈaraw to ‘tadengalay a likat.’ (Isaya 9:1, 2) O sapakafanaˈ ni Yis patemeray to falocoˈ no tamdaw, o ‘patediay to ˈalomanay tamdaw a soˈlinay likat’ cingra.—Yohani 1:9.

13. Sasamaan ko sasowalen ita wa pakahemek ci Yihofaan hani?

¹³ O manan ko mananamay ita? Misinanotay ci Yihofa to sasowalen ita ato waywayan. Sasamaan kita pasowal to ‘lopayˈay a sowal’ a pakahemek ci Yihofaan hani? O soˈlinay ko sasowalen ita. (ˈOlic 15:1, 2) Mamiceridho kita pakahemek ato pakalalok to tamdaw, aka milikaf a ngaliwngiw to tao. (Ifiso 4:29) Roma i, ngangaˈay minanam kita tano matatodongay a pakayraan masasowal to tamdaw, halo mikilim to toki a misawacay to tamdaw.

YOSIF

14. O sapairasol ci Yosifan, samaanay malaˈosi hani? (Satapangan 49:22, 26) (Nengnengen ko sapatongal lalakaw.)

¹⁴ ˈOsien ko Satapangan 49:22, 26. Ci Yosif o kaolahan a fafahi ni Yakop ci Rakil sakinacecay mihofocan a wawa. Tada malikoan nanay ci Yakop ci Yosifan. Somowalay cingra ci Yosifan o ‘caˈang no makaheciay a kilang,’ o cingra koya kilang, ci Yosif i, o caˈang noniya kilang. Somowalayho cingra, ci Yosif o ‘mipiliˈan itini lalomaˈ no salikaka ningra.’ O roma i, na pasowalay ci Yakop to mamikotay ci Yosif ci Riupinan, midotoc to sakakaay wawa a tosaay a hafay. (Satapangan 48:5, 6; 1 Rayray 5:1, 2) Ikor, malaˈosiayto ko sapairasol ni Yakop. O tatosa a wawa ni Yosif ci Ifraim aci Manasi, o teloc nangra malo o tatosa ngangasaw no Israil, hanaca mililamay to kahacecay a hafay.—Satapangan 49:25; Yosuwa 14:4.

15. Misiˈayaw to cowa ka sadafdaf i, samaanay ko demak ni Yosif hani?

¹⁵ Masowalayho ni Yakop, o mipanaˈay a tamdaw ‘pasayraay [ci Yosifan] a mipanaˈ, misaˈadaayho cingranan.’ (Satapangan 49:23) Tatodong i, maˈinapay ko kakakaka ni Yosif cingranan, telocto i, tahalifaay ci Yosif to adihayay cowa ka sadafdaf a demak, halafinay a taharoray. Kawra cowa ka ciˈinteh ci Yosif to kaka ningra, cowa ka piroroh ci Yihofaan. Itini sapalifet tanoktokay cingra, padadotoc mitiˈer ci Yihofaan, mahecad to sowal ni Yakop: ‘O panaˈ ni [Yosif] kamayan misongilaˈ a misaday, o kamay ningra kamayan ciˈicelay’. (Satapangan 49:24) Misododanto ni Yosif ko kakakaka ningra, mikangaˈay a midimokos cangranan. (Satapangan 47:11, 12) Misiˈayaw to sapalifet, padadotocay ci Yosif mihadidi, ho malo ngaˈayay a tamdaw ko niyah. (ˈOlic 105:17-19) Telocto i, maocoray ni Yihofa cingra, palaˈosi to adihayay a demak.

16. Tahalifa to sapalifet i, sasamaan kita mitodong ci Yosifan hani?

¹⁶ O manan ko mananamay ita? Ano tahalifa to sapalifet i, aka a miliyas ci Yihofaan ato salikaka. Haratengen, ano tahalifa kita to sapalifet, wa malo sapahatatanam ni Yihofa kitanan. (Hipray 12:7, ato roma pihongyak.) O mahaenay a sapahatatanam papadama kitanan palahad ato misalof to capeling no Krisciyang, tinakoen o siniˈadaay a falocoˈ ato makalimay misodod a harateng. (Hipray 12:11) Ano padadotoc kita a mihadidi i, papalifonen ni Yihofa kita, mahecad palifon Cingra ci Yosifan.

PINYAMIN

17. O sapairasol ni Yakop ci Pinyaminan, samaanay a malaˈosi hani? (Satapangan 49:27) (Nengnengen ko sapatongal lalakaw.)

¹⁷ ˈOsien ko Satapangan 49:27. Pairasolay ci Yakop, o ngangasaw no Pinyamin wa mahecad to oles a timolo a mifolaw. (Kakitaan 20:15, 16; 1 Rayray 12:2) “Papacem” o isalakatay no Israil a kitakit, o saka cecay hongti ci Sawlo, naitiniay i Pinyaminan a ngangasaw. O timoloay cingra a mifolaway, mikeriday micoˈay to Filistin a tamdaw. (1 Samuil 9:15-17, 21) “Dadaya” o awaayto ko hongti no Israil ikor, itiniay i Pirsiya a kitakit malo fafahi no hongti ci Istir ato malo sakakaay a ˈaˈideman ci Mortikay sahtoay naitiniay i ngangasaw no Pinyamin. Midipotay cangra to Israil a tamdaw, ho caka mapalaˈafo no ˈada ko Israil.—Istir 2:5-7; 8:3; 10:3.

18. Sasamaan kita mitodong to madimadiay a taˈarawan no ngangasaw no Pinyamin?

¹⁸ O manan ko mananamay ita? Maˈaraway ko ngangasaw no Pinyamin to finawlan no niyah malo hongti no Israil, maedeng malikoan nanay. Kawra ikorto, pafelian ni Yihofa ko fadangalan no hongti to ngangasaw no Yuta ci Tafiti. Soˈlin mahaen, o ngangasaw no Pinyamin kamayan a midama to saˈosi ni Yihofa. (2 Samuil 3:17-19) Ikor no halafinto a mihecaan, soˈlin 10 a ngangasaw misafelitay to paro no lomaˈ ni Tafiti, kawra o ngangasaw no Pinyamin kamayan malacafay to ngangasaw no Yuta, madimadiay a midama to minilnilan ni Yihofa a hongti. (1 Hongti 11:31, 32; 12:19, 21) Anini, mipiliˈan ni Yihofa ko roma a tamdaw, mikerid to finawlan no Niyah, nanay todongen ita ko makapahay taˈarawan no ngangasaw no Pinyamin, madimadi a midama cangranan.—1 Tisalonika 5:12.

19. Mikitini i ˈayaw no patay ni Yakop a sapairasol, mamilifok kita to manan a epoc hani?

¹⁹ Mananamayto ita, ˈayaw no patay ni Yakop a sapairasol samaanay malaˈosi, padamaay konini kitanan pakasoˈlin to o sapairasol ni Yihofa wa malaˈosi a memin, padamaayho kitanan a mafanaˈ to sasamaan milifok to pihayda ni Yihofa. ˈAyaw no patay ni Yakop a sapairasol tada o ciepocay!