Padama to Pakingkiwan Misetek to Falocoˈ, Mihodop ci Yihofaan

1-2. (1) Misamaanay o roma pakingkiwan hano cowa ka picada to paputisem hani? (2) Oniya lalakaw mamilengo to manan hani?

ˈAYAW no malo Misawacayay Tamdaw ni Yihofa iraay ko kacarirawan iso han? Alatek calemcemay kiso to cafay matayal, widang anca paro no lomaˈ misafelit tisowanan, anoca calemcemay to o saali no Kawas tahadaˈoc cowa ko mamadangar no niyah. Ano na iraay ko mahaenay a harateng iso i, maedeng wa sidaˈit kiso to pakingkiwan, cipinangto kiso hano caka picada cangra to paputisem.

² Mafanaˈay ci Yis tonini a cariraw wa micona kitanan mihodop ci Yihofaan. (Matay 13:20-22) Kawra cowa ka sawaden ningra pakafanaˈ kora cicariraway a tamdaw, ao padama cangranan (1) mihapinang to pasangar no niyah, (2) matongal ko olah ci Yihofaan, (3) misalof to kalimlaan i nokaˈorip, (4) miremo to misafelitay. Misakadademak kita to Layapen ko Midaˈocay ˈOrip! a pakafanaˈ to pakingkiwan i, ngaˈayay todongen ko taˈarawan ni Yis, padama to pakingkiwan misetek to falocoˈ mihodop ci Yihofaan. Sasamaan ko demak hani?

PADAMA TO PAKINGKIWAN MIHAPINANG TO PASANGAR NO NIYAH

3. Hano matalaw ci Nikotimus malo nisawawaan ni Yis hani?

³ Ci Nikotimus o ˈaˈideman no Yutaya a tamdaw, ˈakawangay ko saaroˈan ningra, kawra matalaway cingra malo nisawawaan ni Yis. Soˈlinay i, misatapang mitosil ci Yis maedeng 6 folad ikor, mahapinangayto ni Nikotimus to o miocoran no Kawas ci Yis. (Yohani 3:1, 2) Kawra, ci Nikotimus o dadaya aca masasoˈaraw ci Yisan, samanen matalaway cingra to kapiliˈan no Yutaya tamdaw cingranan. (Yohani 7:13; 12:42) Calemcemay cingra ano malo nisawawaan ni Yis, wa malahdaw ko fadangalan ato hafay.a

4. Samaanay ci Yis padama ci Nikotimusan?

⁴ Tada mafanaˈay ci Nikotimus to Rikec ni Mosi, kawra misaaliay cingra to sapadama no tao, ngaˈ mafanaˈ to saali ni Yihofa cingranan. Mihaenay, samaanay ci Yis padama cingranan hani? Makahiay ci Yis to dadaya masasoˈaraw cingranan, mipalakayho to adihayay a toki pakafanaˈ cingranan. O roma i, mitadtadan ni Yis cingra to sasamaan ko demak ngaˈ malo nisawawaan ningra, oha pakayni to raraw no niyah a pasasiyor, micada to paputisem, pakasoˈlinho a mikotod to Wawa no Kawas ci Yisan.—Yohani 3:5, 14-21.

5. Sasamaan kita padama to pakingkiwan pakahapinang to pasangar no niyah hani?

⁵ Soˈlin adihayto ko sifanaˈ to Fangcalay Cudad no pakingkiwan, alatek cisaaliayho to sapadama no tao cingranan, ngaˈ mahapinang ningra to o manan a demakan ko miconaay cingranan a macakat. Tinakoen, ˈifowaay ko tayal ningra han? Micongeday ko paro no lomaˈ ningra malo Misawacayay Tamdaw ni Yihofa han? Sapipadamaaw to pakingkiwan, ngaˈayay todongen iso ci Yis, mipalak to toki kalacafay to pakingkiwan, tinakoen kalacafayen cingra minanom to kafi anca kalacafayen a mionto. Mihaen wa sinoway cingra alatek, mamadoloto a mifanaˈ to pasangar no niyah. Dotoc, ngaˈay pakalaloken iso ko pakingkiwan a misalof, patalipaˈelalenho cingra, mihaen to demak cowa ko papakahemek aca tisowanan, ao paihkalay ko niyah to olah ci Yihofaan.

6. Sasamaan kiso padama to pakingkiwan timolo a midoedo to mananamay ningra a midemak? (1 Korinto 16:13)

⁶ Ano pakasoˈlin ko pakingkiwan to papadamaen ni Yihofa cingra palaˈosi to palinian no Fangcalay Cudad, wa irato ko timolo midoedo to mananamay ningra a midemak. (ˈOsien ko 1 Korinto 16:13.) Saharateratengen, itini picudadan, o ngaˈayay a singsi cowa ko pakafanaˈ aca to sifanaˈ, padamaho to mitakciay pakasoˈlin to niyah. Mahecaday toni, o ngaˈayay a mipakingkiway cowa ko pakafanaˈ aca to pakingkiwan to saali no Kawas, padamaho cingranan palahad to pakasoˈlinay falocoˈ, pakasoˈlin to papadamaen ni Yihofa cingra a misalof. Mihaen i, sasamaan ko demak hani?

PADAMA TO PAKINGKIWAN MATONGAL KO OLAH CI YIHOFAAN

7. Samaanay ci Yis padama to tao matongal ko olah ci Yihofaan hani?

⁷ Mafanaˈay ci Yis, maolah to Kawas o taˈangayay a ˈicel, mamikowad to nisawawaan misakadademak to mananamay, mansa mipakafanaˈ to nisawawaan i, wa mikiriwiˈ a padama cangranan matongal ko olah to kakarayan a Wama. Tinakoen sanay ci Yis, o sidaˈitay a Wama ci Yihofa, makalimay pafeli to sangaˈayay a dafong to wawa. (Matay 7:9-11) Kinacecayay, masowalay ni Yis ko mitemeray to falocoˈ a sapatinako, i sapatinako maolahay ko wama to wawa, soˈliˈlin adihayay ko tatiihay a demak noniya wawa, kawra pasasiyor cingra ikor, makahiay ko wama misodod cingranan, papinokay cingranan. Ilalomaˈ no mitengilay to sowal ni Yis, o roma tamdaw alatek cisaaliay to olah no wama. Oniya sapatinako ni Yis maedeng mitemeray to falocoˈ nangra, pakahapinang to kakarayan a Wama ci Yihofa o matomesay to siniˈada, tangongolay ko olah cangranan.—Luka 15:20-24.

8. Sasamaan kiso padama to pakingkiwan matongal ko olah ci Yihofaan hani?

⁸ Ngaˈayay todongen iso ci Yis, macerid malalengo to pakingkiwan to masakenakenaay makapahay capeling ni Yihofa, padama cingranan matongal ko olah ci Yihofaan. Tinakoen ano mikingkiw i, papiharatengen iso ko pakingkiwan, mikitini mananamay a lalakaw sasamaan mahapinang to maolahay ci Yihofa cingranan. O roma i, ano milengo to sapatefoc i, padamaen ko pakingkiwan mihapinang, mihadakan ni Yihofa ko sapatefoc, cowa ko kaolah aca to polong a tamdaw, ao maolahayho cingranan. (Loma 5:8; 1 Yohani 4:10) Ano pakahapinang ko pakingkiwan to tada maolahay ci Yihofa cingranan, alatek mamitemer to falocoˈ ningra, makalim tano olah a patikol to olah no Kawas.—Kalatiya 2:20.

9. Hano misalof ci Mayke to kaˈorip no niyah hani?

⁹ I Intonisiya ci Mayke, i kaemangho minanamayto to Fangcalay Cudad, kawra cowa picada cingra to paputisem. 18 ko mihecaan i, tayra i roma kitakit cingra makilimay ko parakatay to tolako a tayal. Ikor, minokayay cingra i Intonisiya a ciraramod, kawra ikor miliyaway cingra miliyas to paro no lomaˈ, tayra i roma kitakit a matayal. Itiya tora tatokian i, o fafahi ato fafahiyan wawa ningra misatapangay minanam to Fangcalay Cudad, hanaca ngaˈayay ko kacakat. O wina ni Mayke mapatay ikor, misaˈosiay ci Mayke minokay a midimokos to wama, hanaca miliyaway misatapang minanam to Fangcalay Cudad. Itini i Layapen ko Midaˈocay ˈOrip! saka 27 fedengan “Calepen Mikadkad” a lalakaw, maharatengay ningra manengnengay ni Yihofa ko kanonoˈan a Wawa miemem to sapasemsem i, hakowaay ko ka adada no falocoˈ, tangic sanayto cingra. Mikitini sapatefoc mahapinangay ningra, tada maolahay ci Yihofa cingranan, mansa matomesay ko miakoˈiday no falocoˈ ningra. Oranto i, misalofan ningra ko kaˈorip, hanaca micadaay to paputisem.

PADAMA TO PAKINGKIWAN MISALOF TO KALIMLAAN I NOKAˈORIP

10. Samaanay ci Yis padama to nisawawaan misalof to kalimlaan i nokaˈorip hani? (Luka 5:5-11) (Nengnengen ko coka.)

¹⁰ O roma a tamdaw kalikiay pakahapinang to o ci Misiya ci Yis, kawra misaaliayho cangra to sapadama, ngaˈ ngaˈay paisalakaten ko mitosilay a tayal i nokaˈorip. O mahaenay a tamdaw ci Pitiro aci Antiri, malo nisawawaan ni Yis cangra to cecay a liyad, kawra kamayan cangra padadotoc kalacafay ci Yakop aci Yohani a mifoting, hanaca ngaˈayay ko singdi nangra. Ikor, mitahidangan ni Yis ci Pitiro aci Antiri miemin to toki mikotod cingranan, sawad hananayto nangra ko mifotingay a tayal. (Matay 4:18, 19; Marko 1:16-20) Itiya maedeng misongilaˈay a mihalaka cangra, ho ngaˈay a mikotod ci Yisan ko niyah, ngaˈayho midimokos to saali no paro no lomaˈ. Hano makahi cangra misalof to kalimlaan i nokaˈorip hani? Pakayni maˈoningay ni Luka, midemakay ci Yis to cecay kafahkaˈan, padama cangranan cipinang to iraay ko ˈicel ni Yihofa a midimokos cangranan.—ˈOsien ko Luka 5:5-11.

11. Sasamaan kita tano nalifetan no niyah padama to pakingkiwan paˈicel to pakasoˈlinay falocoˈ hani?

¹¹ Soˈlin cowa ka hecad kita ci Yisan a midemak to kafahkaˈan, kawra ngaˈayay paladaˈen ita ko pakingkiwan to nalifetan no niyah, mitadtad to paisalakaten ita ko Kawas i nokaˈorip ikor, samaanay ko Kawas midimokos kitanan. Tinakoen, ngaˈayay paladaˈen iso ko pakingkiwan, isalakat mirienang kiso to saˈopo i, oha mamifanaˈ to tawki, i pisaˈopoan a romiˈad cowa ko mamiciyapan kiso. Mihaen kiso misalof i, milifok to sapalemed ni Yihofa. Pasowal kiso to mahaenay a nalifetan to pakingkiwan i, mamitadtad toniya nalifetan samaanay paˈicel to pakasoˈlinay falocoˈ no miso.

12. (1) Hano oha mamitahidang kita to kasasiroma a salikaka mirienang to mipakingkiwan no mita hani? (2) Sapipadamaaw to pakingkiwan misalof to kalimlaan i nokaˈorip, misamaanho kita to manan a demak hani? Patinakoen hena.

¹² O roma nalifetan no Krisciyang papadama to pakingkiwan no miso. Wa ngaˈay tahidangen iso ko cowa ka hecad ko kalomahadan a salikaka mirienang to mipakingkiwan iso, papipaladaˈen cangra to samaanay mafanaˈ to soˈlinay kimad ko niyah, ato samaanay cangra misalof to kalimlaan i nokaˈorip. Roma i, ilalomaˈ no Layapen ko Midaˈocay ˈOrip! a “Calepen Mikadkad” ato “Malalitingay a Lalakaw” adihayay ko ika, ngaˈayay kalacafayen iso ko pakingkiwan a minengneng toniya ika, ikor lengoen ko o manan ko mananamay ningra. Tinakoen, maherek minengneng to saka 37 fedengan “O Dadimokosen ni Yihofa Kita” a ika ikor, malalengo ato pakakingkiwan, o manan a safalod no Fangcalay Cudad papadama cingra a misakareteng ko midokoay ci Yihofaan a demak i nokaˈorip.

PADAMA TO PAKINGKIWAN MIREMO TO MISAFELITAY

13. Samaanay ci Yis padama to nisawawaan miremo to misafelitay hani?

¹³ Kinapinapinaay ci Yis mifanaˈ to nisawawaan to mamasiˈayaw nangra ko misafelitay, mahawpay ko salawina no niyah. (Matay 5:11; 10:22, 36) ˈAyaw no mamapatay caka halafin, patalipaˈelalay ci Yis to nisawawaan, alatek wa pakayni i pihodop ci Yihofaan aira ko sapipatayaw cangranan a tamdaw. (Matay 24:9; Yohani 15:20; 16:2) Patalipaˈelalay ci Yis to nisawawaan hamaan a malacongis to misafelitay a tamdaw, ao pairaen ko misinanotay, mihaen ngaˈ padadotoc cangra a mitosil.

14. Sasamaan kita padama to pakingkiwan misongilaˈ a misaday hani? (2 Timoti 3:12)

¹⁴ Mahecad ci Yisan, ngaˈayay pasowalen ita ko pakingkiwan, o cafay matayal ningra, widang anca salawina mafanaˈ to minanamay cingra to Fangcalay Cudad ikor, alatek wa samaan ko harateng nangra. (ˈOsien ko 2 Timoti 3:12.) Tinakoen, mahapinang no cafay matayal cingra to tano palinian no Fangcalay Cudad maˈorip cingra i, alatek mamilikaf cingranan. O paro no lomaˈ anca romaroma tamdaw, alatek cowa ka pihayi to kimad no Fangcalay Cudad, o mararaway ko mananamay ningra wa saan. Kalikien ita a milengo ko pakingkiwan toniya demak, mihaen ano tahalifa cingra to misafelitay i, cowato ko mamacekid, wa mafanaˈho sasamaan ko demak.

15. Sasamaan kiso padama to pakingkiwan misiˈayaw to misafelitay no paro no lomaˈ hani?

¹⁵ Ano safeliten no paro no lomaˈ ko pakingkiwan, ngaˈayay fanaˈen iso cingra to cowa ko kafahalan koniya demak, samanen ano ci Yisto i, misafelitan no paro no lomaˈ cingra. (Marko 3:21; Yohani 7:5) Papakalaloken iso ko pakingkiwan a misaharaterateng, hano cowa ka olah ko paro no lomaˈ cingranan minanam to Fangcalay Cudad. Alatek cacalemcem cangra misakaniwan no tao cingra han? Anca misakakinihay cangra to Misawacayay Tamdaw ni Yihofa han? Ngaˈayay patalipaˈelalen iso ko pakingkiwan, paira to mihadidiay to paro no lomaˈ ato romaroma a tamdaw, sidaˈit ko sasowalen.

16. Sasamaan kita padama to pakingkiwan tano matatodongay a pakayraan, paladaˈ to soˈlinay kimad to paro no lomaˈ hani?

¹⁶ Ano sakafanaˈaw ko paro no lomaˈ to o manan ko mananamay no pakingkiwan, hamaan sa adihay han no pakingkiwan a pasowal, ano mihaen i, alatek cowa ko tatomeseng ko paro no lomaˈ, ikorto i, cowato ko sapitengilaw. Mansa, pakalaloken ko pakingkiwan tano madoloay a pakayraan paladaˈ to soˈlinay kimad i paro no lomaˈ, alatek sapitengilawto ko paro no lomaˈ anoikor. (Kolosay 4:6) Tinakoen, sapipadamaaw ko pakingkiwan to paro no lomaˈ, matongal ko kacipinang to Misawacayay Tamdaw ni Yihofa, ngaˈayay papinengnengen cangra to jw.org wangcan, mihaen wa ngaˈay cangra i kaolahan a tatokian, misolap to kaolahan no niyah a lalakaw.

17. Sasamaan kiso padama to pakingkiwan mafanaˈ mitadtad to pihakelongan no niyah hani? (Nengnengen ko coka.)

¹⁷ O paro no lomaˈ anca cafay matayal ano ira ko salicay i, sasamaan ko pakingkiwan a pacaˈof hani? Ngaˈayay sakadademaken iso ko jw.org wangcan “關於耶和華見證人的常見問題” a padama to pakingkiwan misongilaˈ a misaday, tano madoloay a pakayraan a pacaˈof. (2 Timoti 2:24, 25) O roma i, tano Layapen ko Midaˈocay ˈOrip! a pakafanaˈ kiso to pakingkiwan i, caceriden tano “Ano Ira ko Somowalay” anca “Ano Ira ko Milicayay” onini a lalakaw. Papakalaloken iso ko pakingkiwan kalacafay tisowanan a mihatatanam tano niyah a sowal a pacaˈof. Ano iraay ko sasalofen iso a sapaini, wa patodicek a pasowal. Tano mahaenay a mihatatanam, o pakingkiwan mamafanaˈ to tanektek a matatodong ko pitadtad to pihakelongan no niyah.

18. Sasamaan kiso pakalalok to pakingkiwan mirienang to mitosilay tayal no kasakopang hani? (Matay 10:27)

¹⁸ Pakalalokay ci Yis to nisawawaan mitenak to ngaˈayay lihaf, papakalaloken iso ko pakingkiwan mihaen to demak. (ˈOsien ko Matay 10:27.) Ano kaliki ko pakingkiwan mirienang to mitosilay tayal no kasakopang, wa kaliki a mafanaˈ pakasoˈlin a mitiˈer ci Yihofaan. Sasamaan kiso padama to pakingkiwan patireng to hatiniay a patosokan hani? Ano i kilac iso, aira ko mikiriwiˈay a mitosilay tayal, ngaˈayay fanaˈen ko pakingkiwan, itini toniya mikiriwiˈay mitosilay a tatokian misatapang mitosil, hano o madoloay sa ko ˈalomanay, ikor pakalaloken cingra a miharateng, sakacitatodongaw malo mitosilay, o manan ko sasalofen ningra. Roma i, papakalaloken iso cingra pangangan to mitosilay ato nikaˈorip a saˈopo a pihatatanam, mihaen wa mafanaˈ cingra tano pakasoˈlinay falocoˈ paladaˈ to soˈlinay kimad i tao.

PAIHKAL TO PAKASOˈLINAY TO PAKINGKIWAN

19. Samaanay ci Yis paihkal to pakasoˈlinay to nisawawaan hani? Sasamaan kita mitodong cingranan hani?

¹⁹ ˈAyaw no papatikol ci Yis tayra i kakarayan i, fanaˈen ningra ko nisawawaan, anoikor mamiliyaw cangra malalitemoh. O misowalan ni Yis o hanoikor wa tayra cangra i kakarayan, kawra itiya cowa ka fanaˈ ko nisawawaan, nikawrira cowa pakayni ci Yis toniya demak a sapisawadaw cangranan. Pakasoˈlinay ci Yis to nisawawaan maedeng sakadademakaw to kaolahan ni Yihofa a demak. (Yohani 14:1-5, 8) Mafanaˈay cingra misaaliay to toki cangra, ngaˈ cipinang to roma a demak, mahawpay ira ko hatokel tayra i kakarayan. (Yohani 16:12) Mahecad ci Yisan, pakafanaˈen ita ko pakingkiwan, pakasoˈlinay kita cangranan sakadademakaw to kaolahan ni Yihofa.

20. I Malawiay a fafahiyan salikaka, samaanay cingra mitokel ciharateng a padama to pakingkiwan hani?

²⁰ Papakasoˈlinen ita ko pakingkiwan to sakadademakaw to matatodongay a demak. Nengnengen ko nalifetan no fafahiyan salikaka ci Cifangto, itiraay i Malawi ko kitiraan ningra, iraay ko pakingkiwan ningra o tingsokiw ko pihakelongan ci Alaynafa. To cecay romiˈad, maherek nangra milengo ko Layapen ko Midaˈocay ˈOrip! saka 14 fedengan i, licayan ni Cifangto ci Alaynafa pakayni pidoko misakadademak to samiyay samaanay ko pinengneng ningra. Fahal sanay makelkel ko sowal ni Alaynafa: “O mako a demak koni, o mako a harateng a mitaˈong.” Alatek wa paterep mikingkiw ci Alaynafa sanay ko harateng ni Cifangto, kawra kamayan mihadidi ci Cifangto a pakafanaˈ cingranan, pakasoˈlin to mamafalic cingra anoikor. Ikor milengo cangra to Layapen ko Midaˈocay ˈOrip saka 34 fedengan i, licayan ni Cifangto ci Alaynafa to salicay no lalakaw: “Minanam kiso to Fangcalay Cudad, mafanaˈ to Kawas ci Yihofaan to cecay a liyad, macadaay iso ko manan a epoc hani?” Samaanay ko caˈof ni Alaynafa hani? Sanay ci Cifangto: “Pasowalay cingra to adihayay ko malifokay, pasowalayho to masemeray cingra to Misawacayay Tamdaw ni Yihofa, cowa pidemak to mirikecan no Fangcalay Cudad a demak.” Ikor cowa ka halafin, cowato pitaˈong to samiyay ci Alaynafa, hanaca mipaputisemayto malo Misawacayay Tamdaw ni Yihofa.

21. Sasamaan kita padama to pakingkiwan matongal ko misetekay a falocoˈ, ho ira ko timolo ningra mihodop ci Yihofaan hani?

²¹ Soˈlin ‘o palahaday’ ci Yihofa, kawra ngangaˈay kita misaˈicel a padama to pakingkiwan macakat i soˈlinay a kimad. (1 Korinto 3:7) Cowa ko pipakafanaˈ aca ita to pakingkiwan to saali no Kawas, papadamaenho ita cingra matongal ko olah ningra ci Yihofaan, pakalalok cingranan a misalof to kaˈorip, paisalakaten ci Yihofa i nokaˈorip, halo padama cingranan tahalifa to sapalifet i, mitadiˈec ci Yihofaan. O roma i, paihkalen ita ko pakasoˈlinay to pakingkiwan. Mihaen, oha ngangaˈay padama cingranan matongal ko misetekay a falocoˈ, ho ira ko timolo ningra mihodop ci Yihofaan.