Masiˈayaw ko Cowa ka Sadafdaf, Samaan ko Demak o Sangaˈayay Hani?

1-2. Tahasiˈayaw to cowa ka sadafdaf, samaanay ko harateng no ˈalomanay tamdaw hani? Alatek wa miharateng kita to manan a salicay hani?

O KAˈORIPAN ita a hekal matomesay ko cowa ka sadafdaf. ˈAlomanay tamdaw pakayniay i finacadan, faˈinayan fafahiyan, ato manikaw ko kaˈorip a masakakinih masamsam no tao. O maˈanofay a misasingdiay ato makatilosay a mirikecay sapietanaw to adihayay a payci a mipalak to cikiw, ˈarawahan o masamsamay sahto o kalo a tamdaw. Cowa ka sadafdaf a demak mifekadayto icowacowa, mafiyoray ko tamdamdaw.

² Mihaenay, ˈalomanay tamdaw pakayni toniya cowa ka sadafdaf a demak a maketer. Makalimay kita tahacada to masadafdafay, eca ka masakakinih no tamdaw a masamsam. O roma tamdaw sapifalicaw to pakayraan noniya hekal, mansa mirienangay to sapitowakangaw to sifo a demak, anca midamaay to misingkiwan nangra a mirikecay, halamhamay toniya mirikecay palaˈosi to mikiˈokan nangra, palahdaw to cowa ka sadafdaf. Malo Krisciyang, mapakafanaˈay to ‘cowa kono hekal’ kita, mamitala to Kitakit no Kawas a palahdaw to kihcod cowa ka sadafdaf a demak. (Yohani 17:16) Soˈlin mahaen, ano maˈaraw ita ko tamdaw tahacada to cowa ka sadafdaf a demak i, kamayan makesemen, hanaca maketeray. Alatek saan ko harateng ita: “Sasamaan kako misiˈayaw hani? O manan ko dademaken ako nohatini?” ˈAyaw no pacaˈof toniya salicay i, nengnengen ita samaanay ko pinengneng ni Yihofa aci Yis to cowa ka sadafdaf.

ˈINTEHAY CI YIHOFA ACI YIS TO COWA KA SADAFDAF

3. Misiˈayaw kita to cowa ka sadafdaf a demak a maketeren, hano o matatodongay han hani? (Isaya 5:7)

³ Misiˈayaw kita to cowa ka sadafdaf i, hano mamararom ko falocoˈ hani? Mitadtaday ko Fangcalay Cudad to lalangian. Sowal no Fangcalay Cudad, pahecadan ni Yihofa ko pinangan no Niyah a misangaˈ kitanan, ‘maolahay Cingra to moecelay ato masadafdafay.’ (ˈOlic 33:5; Satapangan 1:26) O midemakan Ningra sahtoay masadafdafay, makalimayho mihaen ko demak no tamdamdaw. (Limoˈot 32:3, 4; Mika 6:8; Cikariya 7:9) I lintad no pairasolay ni Isaya, matengilay ni Yihofa ko ‘laling a tangic’ no ˈalomanay Israil. (ˈOsien ko Isaya 5:7.) Mahaen cangra mararom, samanen masamsamay no ngangasaw no niyah. Oniya mariˈangay a tamdaw misaliyaliyaway misakahmaw to Rikec no Kawas, tano cowa ka sadafdaf a pakayraan a pisamsam to tamdaw. Salikor, mitefocan ni Yihofa ko mariˈangay a tamdaw.—Isaya 5:5, 13.

4. Samaanay ko pinengneng ni Yis to cowa ka sadafdaf a demak hani? (Nengnengen ko coka.)

⁴ Mahecad ci Yihofaan, maolahay ci Yis to masadafdafay, ˈintehay to cowa ka sadafdaf. Kinacecayay, i Paselaˈan Romiˈad maˈaraway ni Yis ko masamoˈay ko kamay a tamdaw. Siniˈadaay ci Yis cingranan, sapiadahaw cingranan, kawra oya i taliyokay awaay ko sidaˈit a ˈaˈideman no kalodoyongan, mapiliˈay ko hamamidemak ci Yis. Pakayni midofdof to Paselaˈan Romiˈad, oya ˈaˈideman no kalodoyongan iraay ko pakidemay a sarikec. O kaciharatengan nangra oya aca mitooray ko tamdaw to sarikec hokira, kawra cowa ka ciharateng toya kasiniˈadaan a tamdaw. Pakayni toniya demak, samaanay ko harateng ni Yis hani? Ci Yis ‘maˈaraw cangra cowa ka pikihar ko falocoˈ, tada mararomay.’—Marko 3:1-6.

5. Ano pakayni to cowa ka sadafdaf a demak a maketer kita i, haharatengen ko manan hani?

⁵ Ano ci Yihofa aci Yis pakayniay i cowa ka sadafdaf a maketer, ira ko mahecaday a harateng ita o matatodongayto. (Ifiso 4:26) Kawra haratengen, soˈlin ira ko lalangian ita a maketer, cowa ka ngaˈay palahdaw to cowa ka sadafdaf. Roma i, ano padadotoc sa maketer wa madokaˈ ko tireng ato falocoˈ ita. (ˈOlic 37:1, 8; Yakop 1:20) Mihaenay haw i, tahasiˈayaw kita to cowa ka sadafdaf i, sasamaan ko demak hani? Nengnengen ita ko taˈarawan ni Yis.

SAMAANAY CI YIS MISIˈAYAW TO COWA KA SADAFDAF

6. I fafekangho no sera ci Yis i, maˈaraway ko masamaanay cowa ka sadafdaf a demak hani? (Nengnengen ko coka.)

⁶ I fafekangho no sera ci Yis i, maˈaraway ko adihayay cowa ka sadafdaf a demak. Maˈaraway ningra ko ˈaˈideman no kalodoyongan miroero to finawlan. (Matay 23:2-4) Maˈarawayho ningra ko Yutaya tamdaw maroeroay no sifo no Loma. ˈAlomanay Yutaya tamdaw sapiliyasaw to pikowan no sifo no Loma, o roma pakinaliay ko ˈinteh a tamdaw mitowakangay to sifo no Loma. Kawra, cowa ka pihaen ko demak ni Yis, cowa ka midama to mahaenay a demak. Kinacecayay, mafanaˈay cingra iraay ko tamdaw sapidamaaw cingranan mala hongti, oranto i teked sanay tayra i lotok.—Yohani 6:15.

7-8. I fafekangho no sera ci Yis i, hano cowa ka pisarocod a palahdaw to cowa ka sadafdaf hani? (Yohani 18:36)

⁷ I fafekangho no sera ci Yis i, cowa ka sapipalahadawaw to cowa ka sadafdaf a mirienang tono sifo a demak, misamaanay hani? Samanen mafanaˈay cingra awaay ko fadangalan ato ˈicel ko tamdaw mikowan to niyah. (ˈOlic 146:3; Yirimiya 10:23) Awaay ko hapakayraan no tamdaw misongilaˈ a misaysay to pipowaran no pasangar. Mikowanay ci Akoma Satan toniya hekal, mansa ˈalomanay tamdaw mahecaday cingranan awaay ko siniˈada, midemakay to adihayay cowa ka sadafdaf a demak. (Yohani 8:44; Ifiso 2:2) Roma i, soˈlin isalakat ngaˈayay ko araaw, kawra cowa ka lefot a tamdaw cowa ka masadafdaf ko kahacecay a midemakan.—Patnakay 7:20.

⁸ Mafanaˈay ci Yis edengan o Kitakit no Kawas ngaˈ, misongilaˈ a palahdaw to cowa ka sadafdaf, mihaenay i fafekangho no sera cingra i, misarocoday ‘milasil to ngaˈayay lihaf no Kitakit no Kawas.’ (Luka 8:1) Mihinomay ci Yis to ‘misaaliay to moecelay a tamdaw,’ mikiˈokay cangranan papalahdawen ko manaholay ato cowa ka sadafdaf a demak. (Matay 5:6 ato 《精讀本》注釋; Luka 18:7, 8) Kawra, o sifo noniya hekal cowa ko papaira to mahaenay a kafalic, edengan o Kitakit no Kawas ngaˈ papalaˈosi, oniya Kitakit no Kawas ‘cowa ko noniya hekal.’—ˈOsien ko Yohani 18:36.

TODONGEN CI YIS, MISIˈAYAW TO COWA KA SADAFDAF

9. Hano pakasoˈlinay kiso edengan o Kitakit no Kawas ngaˈ, masongilaˈ palahdaw to cowa ka sadafdaf a demak hani?

⁹ Anini maˈoripay kita i ‘salikoray a romiˈad,’ cowa ka sadafdaf a demak ikakaay to lintad ni Yis ko nika adihay. Kawra pairaay to cowa ka sadafdaf a lalangian kamayan o ci Satan ato cowa ka lefot a tamdaw. (2 Timoti 3:1-5, 13; Paˈarawan 12:12) Mahecad ci Yisan, mafanaˈay kita edengan o Kitakit no Kawas ngaˈ masongilaˈ a palahdaw ko cowa ka sadafdaf. Misarocoday kita midama to Kitakit no Kawas, mansa cowa ka mirienang to mitowakangay to sifo a demak, sapisalofaw to mararaway noniya hekal. Nengnengen ko nalifetan no fafahiyan salikaka ci Taysi.a ˈAyaw no mafanaˈ cingra to soˈlinay kimad i, maceriday mirienang to sapisalofaw to sifo a demak, kawra palidlid sanayto cingra cisasa to matatodongay ko midemakan no niyah hokira. Sowal ningra: “Isaˈayaw mirienangay kako toniya mitowakangay a demak i, maceriday miharateng, oniya midamaan ako soˈlinay masaysay ko pasangar han? Nohatini, midamaan ako ko Kitakit no Kawas, mafanaˈay kako toniya Hongti Kitakit oha mamisaysay to kihcod a pasangar. Mafanaˈayho kako ano samaanto ko pisaˈicel i, cowa ko mamalahdaw ita ko cowa ka sadafdaf a demak, kawra pakayni to kahacecay maroeroay a tamdaw papalahdawen ni Yihofa ko kihcod cowa ka sadafdaf a demak.”—ˈOlic 72:1, 4.

10. Mikitini i Matay 5:43-48, hano cowa pirienang kita to sapisalofaw tono sifo a demak hani? (Nengnengen ko coka.)

¹⁰ Oniya hekal sapisalofaw tono sifo a demak, maceriday matomesay ko sano niyahay, ciˈintehay a waywayan. (Ifiso 4:31) O cecay ci Cifoli a faˈinayan salikaka mahapinang ko hatiniay a pakayraan, sanay cingra: “Hato dipayalay ko pitowakang a demak, ngaˈay tangsol sa mafalic malo mariˈangay a masasifod a demak.” Nikawrira, mahaenay a demak cowa ka hecad to taˈarawan ni Yis, misafelitay to sapakafanaˈ ni Yis kitanan a kimad. Pakafanaˈay cingra kitanan paihkal to olah i tamdamdaw, mahawpay koya cowa ka hecad ko harateng ita, hanaca miroeroay kitanan a tamdaw. (ˈOsien ko Matay 5:43-48.) Malo nisawawaan ni Yis, mamisaˈicel kita mitodong to taˈarawan ningra, miliyas to misafelitay to sapakafanaˈ ningra a demak.

11. Hano i roma a pakayraan, sapitodongaw ci Yisan cowa ko madoloay?

¹¹ Soˈlin mafanaˈay kita edengan ko Kitakit no Kawas ngaˈ, masongilaˈ palahdaw ko cowa ka sadafdaf a demak, kawra tahalifa ko niyah to cowa ka sadafdaf i, todongen ci Yis alatek cowa ko madoloay. Nengnengen ko nalifetan no fafahiyan salikaka ci Ceniya. Na pakayniay tora fanges ningra a masakakinih no tao, sanay cingra: “Madokaˈay ko falocoˈ ako itiya, mangolawayho, nanay matefoc kora midokaˈay takowanan a tamdaw sanay kako. Sapidamaaw kako to misafelitay to misakakinihay to finacadan a demak. Ngaˈay paihkalay koni to ngolaw ako, ciepocho ko hekal sanay ko harateng ako.” Kawra ikor mahapinangay ni Ceniya ko mamisalof to niyah, sanay cingra: “Mahapinangay ako o maˈimeray no tao kako, o pakasoˈlinay to tamdaw, cowa ko ci Yihofa, mansa misaˈosiay kako cowato ko mirienang toniya demak.” Tahasiˈayaw to cowa ka sadafdaf, ano mangolaw i, o matatodongay koni, kawra hamaan pakayni i ngolaw ecato ka padadotoc to misatenokay ko saaroˈan.—Yohani 15:19.

12. Hano mamisinanot kita mipiliˈ to macadaay a lihaf hani?

¹² Misiˈayaw to cowa ka sadafdaf i, sasamaan ko demak ita ngaˈ maˈimer ko mangolaway harateng hani? O cecay a pakayraan i, o misinanot mipiliˈ to miˈosian, mitengilan ato minengnengan. Anini, ˈalomanay ko tamdaw itini kacacawmaˈan no wangcan, patelas sanay a mitenak to cowa ka sadafdaf a demak, mitongangan to sifo, ho manengneng no ˈalomanay tamdaw. Roma i, adihayay ko sinfon mifanaˈay koniya demak i, sahtoay misakakinihay cowa ka sadafdaf. Soˈlin maˈaraway ita a sinfon hato soˈlinay a nengnengen, kawra nanengneng sa toniya sinfon wa ciepoc kita han? Alatek mamatoled ko falocoˈ ita. (Taneng 24:10) Mangalefay i, alatek mamapawan ita, edengan ko Kitakit no Kawas ngaˈ masongilaˈ palahdaw ko cowa ka sadafdaf a demak.

13. To romiˈamiˈad miˈosi to Fangcalay Cudad, hano papadama kitanan tahasiˈayaw to cowa ka sadafdaf i, kamayan rihaday ko falocoˈ hani?

¹³ To romiˈamiˈad miˈosi to Fangcalay Cudad halo midotim, wa padama kitanan tahasiˈayaw to cowa ka sadafdaf i, kamayan rihaday ko falocoˈ. Fafahiyan salikaka ci Aliya na pakaˈaraway to itatihiay a tamdaw masamsam no tao, oya mariˈangay tamdaw cowa ka masayfang, pakararomay koni cingranan. Sanay cingra: “Oha mamisongilaˈ kako miharateng: ‘Pakasoˈlinay kako to mamisaysay ci Yihofa to mahaenay a pasangar han?’ Itiya i, maˈosi ako ko Yopu 34:22-29. Oniya sinael patalipaˈelalay takowanan, midemakan no mariˈangay a tamdaw maˈaraway ni Yihofa maemin, edengan Cingra aca ko malefotay ko sasawkit, patalahkalay to moecelay.” Kawra, ˈayaw no paira to soˈlinay a moecel ko Kitakit no Kawas, sasamaan ko demak ita hani?

NOHATINI SASAMAAN KO DEMAK?

14. Matomesay ko cowa ka sadafdaf toniya hekal, kawra sasamaan ko demak ita? (Kolosay 3:10, 11)

¹⁴ Awaay ko pakayraan ita miˈimer to tao masadafdafay ko pidemak, kawra ngaˈayay kita miˈimer to waywayan no niyah. I ˈayaway a fatac masowalay, mamitodong kita ci Yisan paihkal to olah. O hatiniay a olah pakalalokay kitanan siniˈada to tao, mahawpay ko mikariˈangay kitanan a tamdaw. (Matay 7:12; Loma 12:17) Ano tano siniˈadaay masadafdafay a pakayraan no mita micada to kahacecay a tamdaw, wa mahemek ci Yihofa.—ˈOsien ko Kolosay 3:10, 11.

15. Paladaˈ to soˈlinay kimad no Fangcalay Cudad papaira to manan a epoc hani?

¹⁵ Misiˈayaw to cowa ka sadafdaf a demak sangaˈayay a pakayraan, o mipaladaˈay to soˈlinay kimad no Fangcalay Cudad i tamdaw. Hano haenen ko sowal hani? Samanen ‘pakayni i sifanaˈ ni Yihofa’ ngangaˈay misongilaˈ mafalic ko tamdaw, o mariˈangay a tamdaw ngaˈay mafalic malo sidaˈitay a tamdaw. (Isaya 11:6, 7, 9) Nengnengen ko tinakoan no faˈinayan salikaka ci Cimayer. ˈAyaw no minanam to Fangcalay Cudad, na mirienangay cingra to misafelitay to sifo a cikowangay lekakawa, samanen miroeroay ko sifo to finawlan sanay ko harateng ningra. Mitikol miharateng to nalifetan no niyah, sanay cingra: “Mahapinangay ako cowa ka tano mariˈangay a pakayraan mifalic to tamdaw, kawra wa ngaˈay mafalic no soˈlinay kimad ko tamdaw. O pakayraan ako mahaenay.” Minanam ci Cimayer to soˈlinay kimad ikor, cowato ka pirienang to mitowakangay to sifo a demak. Soˈlinay mafalic ko soˈlinay kimad no Fangcalay Cudad ko tamdaw! Oniya hekal ano matongal ko mafalicay no soˈlinay kimad no Fangcalay Cudad ko cecay a tamdaw, wa maˈesalto ko cecay cowa ka sadafdaf a tamdaw.

16. Sapipaladaˈaw kiso to hatokel no Fangcalay Cudad i tamdaw han? Misamaanay?

¹⁶ Mahecad ci Yisan, makalimay kita mifanaˈ to tamdaw wa masongilaˈ no Kitakit no Kawas a palahdaw ko cowa ka sadafdaf. Oniya hatokel tada masakalimlaan, ngaˈayay mihinom toya tahasiˈayaway to cowa ka sadafdaf a tamdaw. (Yirimiya 29:11) Isaˈayaway fatac a Taysi sanay cingra: “Mananamay ako salikor papatalahkal ko Kawas to moecelay, padamaay konini takowanan tahasiˈayaw to cowa ka sadafdaf anca maˈaraw ko tao masamsam i, parihaday to falocoˈ no mako. Soˈlinay pakaynian ni Yihofa i Fangcalay Cudad mihinom takowanan.” Ano sakadademakaw to hatokel no Fangcalay Cudad a mihinom to tao i, papakasoˈlin to masowalay tonini a lalakaw a soˈlinay kimad no Fangcalay Cudad. Mihaen ngangaˈay misongilaˈ kita a misaday, ano i picudadan anca i katayalan i, wa ciˈicelto a mitadtad i tamdaw hano ira ko cowa ka sadafdaf a demak itini toniya hekal, ato sasamaan ci Yihofa palahdaw to cowa ka sadafdaf.b

17. Sasamaan ci Yihofa padama kitanan misiˈayaw to cowa ka sadafdaf?

¹⁷ Mafanaˈay kita, ‘o mikowanay toniya hekal a hongti’ ano kamayanho ci Satan i, matomesay ko cowa ka sadafdaf a demak toniya hekal. Kawra cowa ko awaay ko hapakayraan, awaay ko hatokel no mita. ‘Wa malaplap’ ci Satan! (Yohani 12:31) Pakayni i Fangcalay Cudad, pasowalan ni Yihofa kita oniya hekal hano adihay ko cowa ka sadafdaf a demak, pasowalayho kitanan maˈaraw Ningra kita tahalifa to cowa ka sadafdaf i, samaanay ko harateng Ningra. (ˈOlic 34:17-19) Pakayni ci Yisan, pakafanaˈan ni Yihofa kita sasamaan misiˈayaw to cowa ka sadafdaf, pakafanaˈayho kitanan o Hongti Kitakit Ningra wa kaliki a mipalahdaw to cowa ka sadafdaf a demak. (2 Pitiro 3:13) Nanay padadotoc kita fanekfek a mitenak to ngaˈayay lihaf no Kitakit no Kawas, hinatala to makapahay hanoikoran. Itiyato i, ‘masadafdafay ato moecelay’ wa maˈedefto i cikiw maemin.—Isaya 9:7.