LALENGOEN LALAKAW 44
RADIW 33 Patorod Han ko Roray ci Yihofaan
Tahalifa to Cowa ka Sadafdaf a Demak i, Samaanen ko Demak Hani?
‘Hamaan pakalowiden ko tatiihay, kao ngaˈayay ko sapilowid to tatiihay.’—LOMA 12:21.
KALIMLAAN NO LALAKAW
Ano tahalifa to cowa ka sadafdaf a demak, samaanen ko demak ho caka mangalef ko katatiih noniya demak hani? Oniya lalakaw wa pacaˈof toniya salicay.
1-2. Alatek masiˈayaw ita ko manan a cowa ka sadafdaf a demak?
MASOWALAY ni Yis ko cecay sapatinako, o cecay maponengay misaliyaliyaw a mingitangit to hankang pakayni to hasaka sadafdafaw no niyah. Oniya sapatinako mikidatay to pihayda no nisawawaan, samanen itiya adihayay ko masamsamay a finawlan. (Luka 18:1-5) Pakayni kitanan nohatini iraay ko sakaciepoc, samanen tahalifaayto kita to masakenakenaay cowa ka sadafdaf a demak.
2 Anini, misakakinihay, cowa ka sadafdaf ato miroeroay to tamdaw a pakayraan mifekaday icowacowa, tahalifaayho kita to cowa ka sadafdaf a demak. (Patnakay 5:8) Nolatekay, masamsamay kita alatek o itiniay i kasakopang a salikaka. Soˈlin, o salikaka cowa ka hecad toya misafelitay to soˈlinay kimad a tamdaw a mikariˈang, cowa aca ka lefot cangra. Haratengen misamaanay mihadidi ci Yis to misafelitay a tamdaw, iraay ko sapadama kitaanan. Ano pairaen ita ko mihadidiay to misafelitay to soˈlinay kimad a tamdaw, wa mangalef ko pihadidi ita to salikaka. Dotoc nengnengen ita, tahasiˈayaw kita to cowa ka sadafdaf i, samaanay ko harateng ni Yihofa. Soˈlinay ciharateng Cingra kitanan han?
3. Sasamaan mafanaˈ to ciharatengay ci Yihofa to malifaay no mita hani?
3 Ciharatengay ci Yihofa to malifaay ita. Sanay ko Fangcalay Cudad, ‘maolahay ci Yihofa to masadafdafay.’ (ˈOlic 37:28) Mikiˈokay ci Yis, maraod ko toki wa ‘tangsol . . . tano masadafdafay a misawkit’ ci Yihofa. (Luka 18:7, 8) Cowato ka halafin, papalahdawen Ningra ko polong cowa ka sadafdaf a demak, ato kadokaˈan ita!—ˈOlic 72:1, 2.
4. Samaanay ci Yihofa padama kitanan misiˈayaw to cowa ka sadafdaf a demak?
4 ˈAyaw no palahdaw to cowa ka sadafdaf i, pakafanaˈay ci Yihofa kitanan sasamaan misiˈayaw toniya demak. (2 Pitiro 3:13) Pasifanaˈayho Cingra kitanan, ano masamsam i, hamaan midemak to manan. Patirengayho ko Wawa Ningra to malefotay taˈarawan, pakafanaˈ kitanan to sasamaan misiˈayaw to cowa ka sadafdaf a demak. Roma i, pafeliayho Cingra kitanan to ciepocay a safalod.
SINANOTEN KO NIYAH A HARATENG
5. Ano tahalifa to cowa ka sadafdaf a demak, hano mamisinanot to harateng no niyah?
5 Ano tahalifa kita to cowa ka sadafdaf a demak, alatek madokaˈan ko falocoˈ. (Patnakay 7:7) Soˈlin, i nolitengan a madimadiay sikawdan, tinakoen ci Yopu aci Hapakuk, mahecaday ko harateng nangra. (Yopu 6:2, 3; Hapakuk 1:1-3) Soˈlin mahaen ko harateng o matatodongay, kawra kamayan sasinanoten ita, aka a midemak to sapirorohaw to niyah a demak.
6. Pakayni ci Apsalom mamananam ita ko manan? (Nengnengen ko coka.)
6 Ano tahalifa ko niyah ato i taliyokay a tamdaw to cowa ka sadafdaf a demak, alatek sapicoˈayaw kita, kawra ano mihaen i, wa matongal ko pasangar. Haratengen ko nalifetan no wawa ni Tafiti ci Apsalom, matengil ningra ko safa ci Tamar to miˈodangan no padek a kaka ci Amnon ikor, tada mangolaway cingra. Pakayni i Rikec ni Mosi, o papatayen ni Amnon. (Lifi 20:17) Soˈlin mangolaw ci Apsalom matatodongay ko lalangian, kawra cowa ka ngaˈay sano niyah sa a mipatay ci Amnonan, awaay ko fadangalan ningra a midemak.—2 Samuil 13:20-23, 28, 29.
Na ˈodangen ci Tamar ikor, padadotocay ci Apsalom ˈinteh ko falocoˈ (Nengnengen ko saka 6 fatac)
7. Miˈoningay to ˈOlic a tamdaw tahasiˈayaw to cowa ka sadafdaf a demak samaanay ko harateng ningra?
7 Maˈaraw ko mariˈangay tamdaw cowa ka sayfang i, alatek wa saan kita: Wa kamayan kako midemak to matatodongay han? Iraay ko mahecaday harateng no miˈoningay to ˈOlic. Maˈaraw ningra ko mariˈangay misamsam to tamdaw, kawra kamayan cangra cihafay rihaday ko kaˈorip, sanay miharateng: ‘Sahtoay o mariˈangay tamdaw cangra, dipayalay ko kaˈorip nangra.’ (ˈOlic 73:12) Mahaenay a cowa ka sadafdaf a demak pakalonayay to pakasoˈlinay falocoˈ ningra, midoko ci Yihofaan hato awaay ko kapo, sanay cingra: ‘Misaharaterateng kako, cowa ka cipinang, tada macariraway ko falocoˈ.’ (ˈOlic 73:14, 16) Sanayho cingra: ‘Sapiliyasaw ko ooˈ ako to moecelay a lalan, nimanayto matahoriyac a mapolin.’ (ˈOlic 73:2) Ci Apito a salikaka iraay ko mahecaday a harateng.
8. Tahalifa ci Apito to cowa ka sadafdaf ikor, samaanay ko harateng ningra hani?
8 O roma salikaka paorafay pakokot ci Apitoan, mitakaway to kiyaho no kasakopang sanay, ikor malahdawayto ko kihcod a ˈinorong i kasakopang. Matengil no ˈalomanay salikaka ikor, cowato ka pakasoˈlin cingranan. Mitikol cingra a pasowal: “Itiya maketeray a makesem kako.” Mahaenay a harateng mifiyoray to kalalaˈed ningra aci Yihofa, limaay a mihecaan, cowa ka mirienang cingra to saˈopo. O nalifetan ni Apito paihkalay, ano tahalifa kita to cowa ka sadafdaf a ˈintehen i, o katalawanto!
MITODONG CI YISAN A MINANAM
9. Tahasiˈayaway ci Yis to manan cowa ka sadafdaf a demak? (Nengnengen ko coka.)
9 Pakayni misiˈayaw to cowa ka sadafdaf, patirengan ni Yis ko malefotay a taˈarawan. I hakelong no ˈorip ningra masiˈayawayto ko adihayay cowa ka sadafdaf a demak, alatek naitiniay i paro no lomaˈ, anca i taliyokay a tamdaw. Mafolaay cingra sanay ko paro no lomaˈ, o kalacafayay cingra to kaloykoy sanay ko ˈaˈideman no pihakelongan, sofitay no Loma milikafay a misamsam cingranan, ikor mipatayanho cingra. (Marko 3:21, 22; 14:55; 15:16-20, 35-37) Soˈlin mahaen, kamayan ci Yis a mihadidi, cowa ka picoˈay. Mikitini ci Yisan o manan ko mamananam ita hani?
Pakayni misiˈayaw to cowa ka sadafdaf, patirengan ni Yis ko malefotay a taˈarawan (Nengnengen ko saka 9-10 fatac)
10. Samaanay ci Yis misiˈayaw to cowa ka sadafdaf a demak? (1 Pitiro 2:21-23)
10 ˈOsien ko 1 Pitiro 2:21-23.a Misiˈayaw to cowa ka sadafdaf i, mafanaˈay ci Yis to aihacowa a tomerep, ihacowa a somowal. (Matay 26:62-64) Nolatekay, mapaoraf no tao cingra i, cowa ka pacaˈof. (Matay 11:19) Ano pacaˈof cingra i, cowa ka mapoˈi anca mikariˈang toya misamsamay miroeroay cingranan a tamdaw, anca mikariˈang cangranan. O piˈimer ni Yis, pakayniay i ‘patoroden ko niyah i moecelay a misawkitay a Tatapangan.’ Pakasoˈlinay cingra, o malifaay ningra mafanaˈay ci Yihofa, aitini matatodongay a tatokian ci Yihofa a paihkal to moecelay a sasawkit.
11. I sasowalen i, sasamaan kita mitodong ci Yisan? (Nengnengen ko coka.)
11 Masiˈayaw ko cowa ka sadafdaf, wa todongen ita ci Yis a miˈimer, misinanot to sasowalen. Ano cowa ka samaan ko demak, anca ano pacaˈof wa mangalef ko katatiih, oha tatomerep kita ngaˈ. (Patnakay 3:7; Yakop 1:19, 20) O roma i, alatek tatalaˈayaw kita a paˈading to masamsamay a tamdaw anca paˈading to soˈlinay kimad, oha tatimolo kita a pasowal. (Dmak 6:1, 2) Kawra, ano somowal kita i, aka a maketer, paihkalen ko mikangodoay a waywayan.—1 Pitiro 3:15.b
Tahalifa to cowa ka sadafdaf a demak, todongen ita ci Yis, sinanoten ko sasowalen a pakayraan ato tatokian (Nengnengen ko saka 11-12 fatac)
12. Sasamaan ko demak ita ngaˈ, o ‘patoroden ko niyah i moecelay a misawkitay a Tatapangan’?
12 Oha mamitodong kita ci Yisan, ‘patoroden ko niyah i moecelay a misawkitay a Tatapangan.’ Ano mapakokot no tao anca misamsam kitanan, pakasoˈlinay kita to mafanaˈay ci Yihofa to kihcod, wa i matatodongay a tatokian Cingra misaysay to mahaenay a pasangar. Ano patoroden ita ko demak ci Yihofaan, wa cowato ka maketeren a ˈinteh i falocoˈ to tao. Mihaen wa maˈimer ko sapirorohaw to niyah a demak, caka lahdaw ko lipahak a miliyas ci Yihofaan.—ˈOlic 37:8.
13. Ano pasangaran kiso mihadidi to cowa ka sadafdaf, o manan ko papakasoˈlinen iso?
13 Ano masiˈayaw ko cowa ka sadafdaf, pasangaray pahecad kita ci Yisan, malefot ko pisaysay to masiˈayaway a demak. Nolatekay mararaway ko sasowalen ato pidemakan ita, ikor sato i, makesem ko falocoˈ. (Yakop 3:2) Hanaca, madokaˈan ko nafalocoˈan ato tireng, i faelohay a hekal ngaˈ malahdaw. Ano mahaenay kiso i, pakasoˈlinen to cipinangay ci Yihofa to masiˈayaway iso a kihcod, ano ci Yisto i, siniˈadaay tisowanan, samanen na tahalifaay cingra to cowa ka sadafdaf a demak. (Hipray 4:15, 16) Coko ni Yis aca ko taˈarawan, pafeliay ci Yihofa to matatodongay a sapaini, padama kitanan misiˈayaw to cowa ka sadafdaf a demak. Dotoc, folfolen ita ko tosa sinael i Loma.
‘PAIKENEN KO KAWAS A MICOˈAY’
14. ‘Paikenen ko Kawas a micoˈay’ o manan ko tatodong hani? (Loma 12:19)
14 ˈOsien ko Loma 12:19. Tarokos ci Pawlo mirikecay to salikaka, ‘paikenen ko Kawas a micoˈay’ sanay, tatodong i, paikenen ci Yihofa i matatodongay a tatokian, tano Ningra a harateng misaysay to cowa ka sadafdaf a demak. O faˈinayan salikaka ci Yohani na tahalifaay to cowa ka sadafdaf, sanay cingra: “Sapiˈimeraw kako to sapicoˈayaw, kawra pasangarayto! Itini Loma 12:19 patalipaˈelalay takowanan mihadidi mitala ci Yihofaan.”
15. Mihadidi mitala ci Yihofaan misaysay to pasangar, hano o sangaˈayay hani?
15 Mihadidi mitala ci Yihofaan o citanengay. Ano macerid kita sano niyah sa a misaysay to demak, wa kareteng ko ˈinorong no falocoˈ, makesemho ko niyah. Sapipadamaaw ci Yihofa kitanan, mikiˈokay Cingra, ‘Kako ko mamitefoc to mararaway,’ tatodong i, “patoroden Kako toniya demak, padamaen Ako kiso a misaysay.” Pakasoˈlin kita toni, wa mahepol ko karetengay a ˈinorong, samanen ci Yihofa wa tano sangaˈayay a pakayraan a misaysay. Masowalay isawni a Yohani mihaen ko demak, sanay cingra: “Mihadidiay kako mitala ci Yihofaan, patorod to masiˈayaway a demak, ikakaayto sano niyahay a harateng misaysay.”
“KAO NGAˈAYAY KO SAPILOWID TO TATIIHAY”
16-17. Mitolon hano papadama kitanan “kao ngaˈayay ko sapilowid to tatiihay”? (Loma 12:21)
16 ˈOsien ko Loma 12:21. Mirikecay ci Pawlo to salikaka “kao ngaˈayay ko sapilowid to tatiihay.” Sanay ci Yis i Pasifanaˈ i Lotok a Kimad: ‘Kaolahen ko ˈada namo, patadoen ko mikariˈangay tamowanan a tamdaw mitolon.’ (Matay 5:44) Mihaenay ko demak ni Yis. Pakidem a masamsam no tao cingra, paceken i hecek, pasangaray cipinang kita to samaanay ko piemem ato piroero cingranan.
17 Kawra cowa ka malowid no mararaway ci Yis. Cowa ka piˈekak to sofitay no Loma, i satolon sanay: ‘Wamaaw, sododen cangra, samanen cowa ka fanaˈ cangra to midemakan no niyah.’ (Luka 23:34) Wa ngaˈay kita patado toya misamsamay kitanan a tamdaw a mitolon, mihaen wa rihaday ko falocoˈ, ecato ka maketer, hanaca mafalicho ko pinengneng ita cangranan.
18. O satolon samaanay padama ci Apito aci Yohanian?
18 O satolon padamaay toya masowalay isawni a tosa faˈinayan salikaka. Sanay ci Apito: “Patadoen ako koya paorafay takowanan a salikaka a mitolon, misatikotikol micangacang ci Yihofaan padama takowanan misodod cangranan.” Ikor miliyaway mirienang to saˈopo ci Apito, malakangaˈayayto ko kalalaˈed ci Yihofaan. Sanay ci Yohani: “Kinapinapinaay, patadoen ako koya midokaˈay takowanan a salikaka a mitolon. I sapadama ni Yihofa, misododanto ako cingra, cowato ka pilongoc ko falocoˈ ako, rihadayayto ko falocoˈ ako.”
19. ˈAyaw no kairaan no faelohay hekal, wa padadotocho kita to manan a demakan? (1 Pitiro 3:8, 9)
19 ˈAyaw no kairaan no faelohay hekal, mamasiˈayaw ita ko masakenakenaay cowa ka sadafdaf a demak. Ano mananto i, tolonen a micangacang ci Yihofa, haratengenho ko taˈarawan ni Yis, halo misakadademak to safalod no Fangcalay Cudad. Mihaen i, wa malifok ko sapalemed ni Yihofa!—ˈOsien ko 1 Pitiro 3:8, 9.
RADIW 38 Paˈicelen Ningra Ho Tanoktok Kiso
a I saka 1 Pitiro saka 2 fedengan ato saka 3 fedengan, masowalay ni Pitiro i saka 1 hahekalan o roma Krisciyang misakoliay ko tayal, o tapang nangra mariˈangay. O roma fafahiyan salikaka cowa pidoko to Kawas ko faˈinay nangra, mikariˈangay cangranan.—1 Pitiro 2:18-20; 3:1-6, 8, 9.
b Nengnengen ko jw.org wangcan a ika, O Olah Pairaay to Soˈlinay a Rihaday.