Iraay ko Matatodongay Waywayan a Tamdaw wa Micada to Ngaˈayay Lihaf

1. Pakayni i ngaˈayay lihaf alatek iraay ko masamaanay cowa ka hecad a harateng no tamdaw hani? (Dmak 13:47, 48; 16:14, 15)

SAKA 1 hahekalan, tahatengil ko ˈalomanay tamdaw to soˈlinay kimad tangsolay a micada. (ˈOsien ko Dmak 13:47, 48; 16:14, 15.) Anini, tahatengil ko roma tamdaw to ngaˈayay lihaf no Hongti Kitakit iraay ko ngaˈayay a harateng. Roma i, o roma tamdaw satapang cowa ka olah, kawra ikor makalimay a minanam. Mihaenay, sasamaan kita padama koniya iraay ko matatodongay waywayan a tamdaw hani?

2. Mitosil kita pakafanaˈ to tamdaw mahecaday to maomahay midimokos to palosayan, hano saan ko sowal hani?

² Mitosil kita pakafanaˈ to tamdaw mahecaday to maomahay midimokos to palosayan. I palosayan iraay ko roma heci kalikiay a malohem to roma a heci. Maˈaraw no maomahay malohemayto ko heci, tangsolay a mipitin. Kawra, padadotocay cingra a midimokos toya cowaho ka lohem a heci. Mahecadayto, ano mitosil kita i, malitemohay ko maolahay to soˈlinay kimad a tamdaw, wa kaliki a padama cangranan malo nisawawaan ni Kristo. Cowa konini aca, wa padadotoc kita ciharateng toya satapang cowa ka olah to Fangcalay Cudad a tamdaw, padama cangranan palidlid sa cipinang to epoc no soˈlinay kimad. (Yohani 4:35, 36) Sakadademaken ita ko pafafidaˈay a inaneng, wa cipinangto tano masamaanay a pakayraan padama cangranan o sangaˈayay. Oniya lalakaw mamilengo, sakinacecay a masasowal i, ano mahapinang ita cingra maolah to Fangcalay Cudad i, sasamaan ko demak ita. Oniya lalakaw mamilengoho, sasamaan kita padama toniya tamdaw padadotoc a macakat.

MAHELA KO MAOLAHAY TO FANGCALAY CUDAD A TAMDAW I

3. Ano mahela ko maolahay to Fangcalay Cudad a tamdaw i, sasamaan ko demak ita hani? (1 Korinto 9:26)

³ Ano mahela ko maolahay to Fangcalay Cudad a tamdaw i, sapipadamaaw kita cangranan kaliki a romakat to midaˈocay ˈorip a lalan. Soˈlin o sakinacecay a masasowal, ngaˈay tangsolen ita mitahidang cangra minanam to Fangcalay Cudad ato mirienang to saˈopo, mihaen ko demak cowa ko tatiihay.—ˈOsien ko 1 Korinto 9:26.

4. Tano sapatinakoen a mitadtad, o roma tamdaw sakinacecay tahatengil to soˈlinay kimad i, makahiayto a minanam.

⁴ Mitahidang to tamdaw minanam to Fangcalay Cudad. O roma tamdaw sakinacecay tahatengil to soˈlinay kimad i, makahiayto a minanam. Nengnengen ko nalifetan itini i Kanata, to pisepatan a romiˈad, o cecay kaemangay fafahiyan manengnengay ningra ko sapisawacay a paliding no mita, miraoday a miala to Layapen ko Midaˈocay ˈOrip! kihpicay a casi. Hananay no i katihiay fafahiyan salikaka a pasowal cingra, ngaˈayay tanonini a kihpicay a casi minanam to Fangcalay Cudad. Maolahay cingra, mafafalicay to sapirinnak cangra. Toya romiˈad, palihafay ningra koniya fafahiyan salikaka, milicay to hacowa kako a minanam. Mitahidangan no fafahiyan salikaka to pieneman a malalitemoh, kawra sanay cingra: “Anocila ngaˈay han? Ciromiˈaday kako tocila.” Saka tosato ko romiˈad i, o pilimaan, misatapangayto cangra malalengo to Fangcalay Cudad. Hanaca itira tora pieneman, sakinacecay ningra mirienang to saˈopo no mita. Ikor, padadotocay cingra minanam, kalikiay ko nika cakat.

5. Misaˈosi to ihacowa mitahidang to tamdaw minanam to Fangcalay Cudad i, sasamaan misakadademak to pafafidaˈay a inaneng hani? (Nengnengen ko coka.)

⁵ Manaokaniw, cowa ka hinatala kita to polong a tamdaw mahecad toniya fafahiyan, i sakinacecay pakatengil to soˈlinay kimad no Fangcalay Cudad a sapinanamawto. O roma tamdaw alatek misaaliay to halafinay a toki. Ano mahaenay i, ngaˈayay malalengo kita to kaciharatengan nangra a demak, padama cangranan palahad to olah to soˈlinay kimad. Ano padadotoc kita tawlik, ciharateng cangranan, alatek cowato ka halafin ikor, mamakalimto cangra minanam. Mihaenay haw i, ano mitahidang to tamdaw minanam to Fangcalay Cudad i, sasamaan kita pasowal ngaˈ makalim ko tao micada hani? O roma salikaka mafanaˈay patireng to pakingkiwan, tengilen ita ko sapaini nangra.

6. Sapipadadotocaw to tao a malalengo, sasamaan kita a pasowal hani?

⁶ Sanay konini a salikaka, i roma a pala, mitahidang to tamdaw minanam to Fangcalay Cudad i, hamaan pasowalen to “minanam,” “mikingkiw” anca “pakingkiway to Fangcalay Cudad” mahaenay a sowal. Mahapinangay nangra, o sangaˈayay a sowal i, “masasowal,” “malalengo” anca “cipinang to Fangcalay Cudad.” Sapipadadotocaw to tao a malalengo tisowanan, alatek ngaˈayay haenen iso a pasowal: “Mafanaˈay kiso han? I hakelong no ˈorip adihayay ko masakalimlaan a sapacaˈof no salicay, sahtoay ngaˈayay i Fangcalay Cudad makilim!” Anca “o Fangcalay Cudad cowa aca kono pihakelongan a cudad, ilalomaˈ adihayayho ko ciepocay sapaini.” Ngaˈayayho pasowal kiso: “Cowa ka hakowa ko toki, wa cipinangto kiso to ciepocay i sakaˈorip a lalakaw.” Roma i, aka pasowal “to lipalipayan” anca “o masaˈosiay a tatokian” mahaenay a sowal a miroero to tao.

7. O roma tamdaw ihacowaay sakinacecay pakahapinang to soˈlinay kimad ko matengilay no niyah? (1 Korinto 14:23-25)

⁷ Mitahidang to tamdaw mirienang to saˈopo. Isaka 1 hahekalan, o roma tamdaw mirienang to saˈopo no Krisciyang i, sakinacecay pakahapinang to soˈlinay kimad ko matengilay no niyah. (ˈOsien 1 Korinto 14:23-25.) Aninito i, mahecadayto, ˈalomanay tamdaw mirienang to saˈopo ikor, kalikiayto a macakat. Mihaenay, wa ihacowa kiso mitahidang to tamdaw mirienang to saˈopo hani? Soˈlin Layapen ko Midaˈocay ˈOrip! itini saka 10 fedengan ngaˈ pakalalokay to tamdaw mirienang to saˈopo, kawra aka tahira tora fedengan ngaˈ mitahidang cangranan. Soˈlin, i sakinacecay masasowal i, tahidangen cangra mirienang to pilipayan a saˈopo. Ngaˈayay pasowalen iso to pilipayan a lalangian no pakapapotalay kimad anca o lalakaw no lalengoen no Mikecolay.

8. Mitahidang to tamdaw mirienang to saˈopo i, ngaˈayay fanaˈen iso ko tao to manan hani? (Isaya 54:13)

⁸ Maolahay to Fangcalay Cudad a tamdaw alatek na mirienangay tono roma pihakelongan a demak, mansa ngaˈayay tadtaden iso kono mita a saˈopo o manan ko kasasiroma. O cecay mipakingkiwan sakinacecay mirienang to lalengoen no Mikecolay i, mahapinang ko misikayay tamdaw mafanaˈay to ngangan no polong a tamdaw, fahkaˈay a milicay to pakafanaˈay cingranan to Fangcalay Cudad a fafahiyan salikaka: “Mafanaˈay cingra to nganang no polong a tamdaw han?” Pacaˈof no salikaka, mahecaday to paro no lomaˈ ko kasakopang, mansa misaˈicelay kami mafanaˈ to ngangan no polong a tamdaw. Pacaˈof ko pakingkiwan cowa ka hecad konini to kiyokay nangra. Roma i, ngaˈayayho pasowalen ita, o araaw ita a masaˈopo cowa ka hecad to roma pihakelongan. (ˈOsien ko Isaya 54:13.) Masaˈopo kita o sapidokoaw ci Yihofaan, micada to sapakafanaˈ Ningra, hanaca malapakalalok to salikaka. (Hipray 2:12; 10:24, 25) Mihaenay, masieroday ko limasmas no saˈopo no mita, awaay kono roma pihakelongan a lisin. (1 Korinto 14:40) Tadengalay ko Kasaˈopoan, ngaˈayay misarocod ko tamdaw a minanam. Samanen misatenokay kita itini ino sifoan, mansa cowa ka milengo kita tono mirikecay a demak. O roma i, dipayal a rihaday ko saˈopo no mita, awaay ko pakidemay a lacongis. Sakapaˈayawaw pakacipinang to tao to pakayraan no saˈopo, kalacafayen iso cingra a minengneng to Samaanay ko Saˈopo Itini i Hongti Kitakit Kasaˈopoan onini a ika.

9-10. Mitahidang to tamdaw mirienang to saˈopo i, sasamaan padama cingranan palahdaw to sasa no falocoˈ hani? (Nengnengen ko coka.)

⁹ Calemcemay ko roma tamdaw, ano mirienang to saˈopo i, “mamalo pihakelongayto.” Fanaˈen iso cingra, awaay ko pacieciay cingranan malo Misawacayay Tamdaw ni Yihofa, mihamhamay kita to polong a tamdaw mirienang to saˈopo. Pasowalenho cingra, o pitengil aca ngaˈayto, cowa ko mamipacaˈof anca mimaan. Roma i, mihamhamay kami to paro no lomaˈ tayni. I saˈopo, o wama wina ato wawa kalacafay maroˈ, cowa ka malaliyas a minanam. Mahaen i, cowa ka calemcem ko wama wina to dipayal no wawa, mamafanaˈ to o manan ko mananamay nangra. (Limoˈot 31:12) Cowa papipakiyaho kita to tamdaw, cowa ka pafeli to sapakiyaho a ˈalofo, samanen midofdofay kita to sapalimoˈot ni Yis: ‘Cowa ka cipayci kamo tahacada, haenen a pipafeli i cimacimaan.’ (Matay 10:8) Pasowalenho iso ko tao, mirienang to saˈopo cowa ko micaˈedong to pasangaray ˈaca a rikoˈ, samanen o minengnengan no Kawas cowa ko papotalay ao i kemoday no falocoˈ.—1 Samuil 16:7.

¹⁰ Ano mitahidangan iso a tamdaw mirienang to saˈopo, pasowalen cingra to mahemekay kita to kaira ningra. Mamisiwkay kiso to malohemay malitengay ato roma salikaka a mafanaˈ cingranan. Ano matinako ningra ko dihko no kasakopang, alatek wa makalimto miliyaw tayni. Roma i, ano awaay ko Fangcalay Cudad ningra i, kalacafayen iso cingra a minengneng, pahecad to lingad no saˈopo.

MISATAPANG PAKINGKIW TO FANGCALAY CUDAD IKOR

11. Sasamaan ko demak a paihkal to cipinangay kiso to kalimlaan ko toki no pakingkiwan hani?

¹¹ Pakafanaˈ to tamdaw minanam to Fangcalay Cudad i, o manan ko hasasinanoten ita hani? Haratengen ko masakalimlaan ko toki no pakingkiwan. Tinakoen, ano maherekayto kiso misaˈosi cingranan to pinanaman a toki i, oha doedoen ko toki. Ano i kaˈoripan iso a kitiraan ngaˈayayto matayo sanay ko ˈalomanay tamdaw, oha mamisaˈicel kiso midoedo to misaˈosian a toki. O roma i, saˈapotoen ko sakinacecay minanam a toki. O roma cinalifetan a mitosilay sanay, sakinacecay minanam, ano sapipadadotocaw ko pakingkiwan a milengo i, sangaˈayay kalikien a milahci. O roma i, haratengen, aka sa caciyaw sa ko niyah, ao papipasowalen ko pakingkiwan to harateng ato nafalocoˈan ningra.—Taneng 10:19.

12. Misatapang malalengo to tamdaw to Fangcalay Cudad i, pairaen ko manan a patosokan hani?

¹² Misatapang malalengo to tamdaw to Fangcalay Cudad i, haratengen ko patosokan ita, o papadama cingranan mafanaˈ ci Yihofaan aci Yisan, halo palahad to olah cangranan. Sapipalaˈosiaw toniya patosokan, wa kayaten ko pakingkiwan papisamacay to Kimad no Kawas, cowa kono mita. (Dmak 10:25, 26) Pakayni toninian, patirengay ko tarokos ci Pawlo to ngaˈayay taˈarawan. Mafanaˈay ci Pawlo, sapipadamaaw ci Yihofa to tamdaw mafanaˈ a maolah Cingranan, miocoran Ningra ci Yis tayni i fafekang no sera, mansa maceriday ci Pawlo pakafanaˈay to tamdaw to pakayni ci Yisan a demak. (1 Korinto 2:1, 2) Roma i, patinakoan ni Pawlo ko makapahay capeling to ekim, linkim ato kalimlaan a fakeloh mahaenay a sangaˈayay sapipatireng a cayliyaw, o araaw i, o pakacipinang to salikaka, padama to faelohay nisawawaan palahad to makapahay capeling o masakalimlaan. (1 Korinto 3:11-15) Papalahaden no faelohay nisawawaan a capeling mahawpay ko pakasoˈlinay falocoˈ, taneng, pafafidaˈay a inaneng ato mikangodoay ci Yihofaan a falocoˈ. (ˈOlic 19:9, 10; Taneng 3:13-15; 1 Pitiro 1:7) Ano pakafanaˈ kiso to tao i, todongen ko taˈarawan ni Pawlo, padama to pakingkiwan o ciolahay a kakarayan Wama ci Yihofa sanay ko pinengneng a misarocod mitiˈer Cingranan.—2 Korinto 1:24.

13. Sasamaan ko demak ita o mihadidiay to pakingkiwan, makahi a pacaˈi hani? (2 Korinto 10:4, 5) (Nengnengen ko coka.)

¹³ Pakafanaˈay to tamdaw to Fangcalay Cudad i, ngaˈayay todongen ita ci Yis, mihadidi to tamdaw, makahiay a pacaˈi. Mamisinanot to mihadakan no niyah a salicay, aka pakangodoen cingra ho eca ka mahemek. Ano pasangaran nanay ko pakingkiwan a micada to pinengneng no Fangcalay Cudad nohatini, aka lalengo sa toniya salicay, pacieci cingranan a micada. O sangaˈayay a pakayraan i, lengoen ko roma a lalakaw, cecay liyad ikor ngaˈ liyawen a milengo toniya salicay. Pairaen ko pakingkiwan to matatodongay a toki, ho palamiten ko soˈlinay kimad i falocoˈ ningra. (Yohani 16:12; Kolosay 2:6, 7) Sanay ko Fangcalay Cudad, o mararaway a kimad o ‘pasangaray falicen a demak,’ onini a sowal ino Krisiya a sowal a tatodong i, o pikidihingan a kitiraan. (ˈOsien ko 2 Korinto 10:4, 5.) Aka caloh sa kita sapifalicaw to pikidihingan a kitiraan no pakingkiwan. Padamaen cingra patireng to pakasoˈlinay falocoˈ ci Yihofaan, pao ci Yihofa ko pikidihingan a kitiraan, mihaen mamadolo cingra mifalah to mararaway kimad.—ˈOlic 91:9 ato roma pihongyak.

ANO IRA KO SAKINACECAY MIRIENANG TO SAˈOPO A TAMDAW

14. Sasamaan kita militemoh toya sakinacecay mirienang to saˈopo a tamdaw hani?

¹⁴ Makalimay ci Yihofa kitanan eca ka misakakinih micada to tamdaw. Ano o mananto ko finacadan ko sakinacecay mirienang to saˈopo a tamdaw, ano o mananto ko kalomahadan anca saaroˈan ningra, tatano olah kita a micada cangranan. (Yakop 2:1-4, 9) Mihaenay, sasamaan ko demak ita ngaˈ matinako nangra ko olah hani?

15-16. Sapihamhamaw to sakinacecay mirienang to saˈopo a tamdaw, sasamaan ko demak ita hani?

¹⁵ Nolatekay, maˈaraway ita ko kafahalan a tamdaw sano niyah sanay mirienang to saˈopo. O roma i, micadaay to satahidang no tao, kawra o mitahidangay cangranan a tamdaw i romaay a kitiraan, o roma sano niyah sanay tayni sakafanaˈaw to manan. Ano maˈaraw ita konini a tamdaw i, talaˈayawen ita a mihamham cangra. Kawra patatodongen a militemoh aka pakidem, ho eca ka maroeroen cangra. Ngaˈayay taawen iso cangra malacafay maroˈ, kalacafay cangranan minengneng to Fangcalay Cudad iso ato lalakaw no saˈopo, anca alaen ko faelohay pafeli cangra. Roma i, haratengen ko nafalocoˈan nangra. Nengnengen ko cecay nalifetan. Talaˈayaway ko faˈinayan salikaka mihamham to sakinacecay mirienang to saˈopo a faˈinayan, oniya faˈinayan pasowal to faˈinayan salikaka, mahapinangay ningra makapahay ko lafa no ˈalomanay, kasimaan sanay ko niyah, mansa kangodoanto. Damsayay ko faˈinayan salikaka pasowal cingranan, aka a calemcem sanay, o Misawacayay Tamdaw ni Yihofa mahecaday to romaroma tamdaw, awaay ko mikiriwiˈay. Matengil noniya faˈinayan ikor sarihaday sanayto ko falocoˈ. O sapacaˈof no faˈinayan salikaka tada mitemeray to falocoˈ ningra, ikor padadotocay minanam to Fangcalay Cudad cingra. Salikor, mipaputisemayto. Roma i, haratengen, ciharateng to sakinacecay mirienang to saˈopo a tamdaw i, aka pilicay to notekedan nangra a demak.—1 Pitiro 4:15.

¹⁶ Sapipakahemekaw mihamham to sakinacecay mirienang to saˈopo a tamdaw, mamisinanotho kita to manan hani? Masasowal to cowa ko Misawacayay Tamdaw ni Yihofa ato pihakelongan nangra i, paihkalen ko mikangodoay. Ano o misikayay to kamok, pacaˈofay to salicay, anca masasowal to tamdaw, oha mamisinanot tonini. Aka tano misakahmaway to tamdaw ko sowal, pakararaw to sakinacecay mirienang to saˈopo a tamdaw, aka tano cowa ka mikangodo a sasowalen milengo to roma a pihakelongan. (Titus 2:8; 3:2; 2 Korinto 6:3) Ano mikimad ko faˈinayan salikaka to pakapapotalay kimad i, oha mamisinanot tonini a patalipaˈelal. Ano mikimad i, pasowal to cowa ka dolo cipinang a sowal anca soˈlinay kimad, ngaˈayay tongalen a mitadtad.

17. Ano mahela ko iraay ko matatodongay waywayan a tamdaw, wa padamaen cangra sasamaan ko demak hani?

¹⁷ Mataˈlif ko cecacecay romiˈad, o mitosilay pakafanaˈ ita to tamdaw a tayal macaloh macalohayto, mansa papadadotoc kita mikilim toya ‘iraay ko matatodongay waywayan ngaˈayay milifok to midaˈocay ˈorip a tamdaw.’ (Dmak 13:48) Ano mahela ita ko mahaenay a tamdaw i, aka a cisasa, ao tawlik a mitahidang cangranan minanam to Fangcalay Cudad ato mirienang to saˈopo, mihaen ko demak ita, o padamaay cangranan kaliki romakat i sakaˈoripaw a lalan.—Matay 7:14.