LALENGOEN LALAKAW 40
RADIW 111 Lalangian a Mahemek
Tiˈeren ci Yihofa, “Tada Lipahakay” Kita
‘Tatayra kako i kaˈayaw no palipahakay takowanan a Kawas.’—ˈOLIC 43:4.
KALIMLAAN NO LALAKAW
Nengnengen iraay ko masamaanay a demak mamiˈafas to lipahak no mita, ato sasamaan miliyaw a lipahak.
1-2. (1) Tahasiˈayaway ko ˈalomanay tamdaw to masamaanay a pasangar? (2) Oniya lalakaw mamilengo to manan hani?
MISAˈICELAY ko ˈalomanay tamdaw micangacang to lipahak, kawra o soˈlinay a lipahak miraay miraayay cangranan. O roma tamdaw masemsemay no tatiihay a harateng, awaay ko hanoikoran sanay ko harateng. Nolatekay, o midokoay ci Yihofaan a tamdaw mafiyoray no tatiihay a harateng, pasangaray padadotoc a lipahak, samanen itiniay i ‘salikorayto a romiˈad kita a maˈorip,’ mansa tatahasiˈayaw to ‘pasangaray remoen’ a demak.—2 Timoti 3:1.
2 Oniya lalakaw mamilengo, alatek wa pakayni kita to manan a lalangian malahdaw ko lipahak, ato sasamaan miliyaw a lipahak. Kawra isalakat oha mamikilim kita to pipowaran no soˈlinay a lipahak.
PIPOWARAN NO SOˈLINAY A LIPAHAK
3. Pakayni ci Yihofaan, mikitini misangaˈan Ningra a maamaan mahapinangay ita ko manan hani? (Nengnengen ko coka.)
3 O lipahakay ci Yihofa, makalimay kitanan mahecad Cingranan. Mikitini misangaˈan Ningra a maamaan mahapinangay ita konini a demak. Haratengen hena: O kaˈoripan ita a cikiw tada makapahay, maˈaraway ita ko masasiromaay a kodong, kasemeran a pinaˈorip, iraayho ko masakenakenaay kaesoˈay a kakaenen. Oniya kihcod paihkalay to tada maolahay ci Yihofa kitanan, makalimay lipahak ko kaˈorip no mita.
Baby elephant: Image © Romi Gamit/Shutterstock; penguin chicks: Vladimir Seliverstov/500px via Getty Images; baby goats: Rita Kochmarjova/stock.adobe.com; two dolphins: georgeclerk/E+ via Getty Images
Maˈaraw ko pinaˈorip misalama, maharateng ita o lipahakay a Kawas ci Yihofa (Nengnengen ko saka 3 fatac))
4. (1) Maˈaraw ni Yihofa ko masakenakenaay a pades no hekal, hano kamayanho a lipahak Cingra hani? (2) O manan ko sapatelong ni Yihofa kitanan hani? (ˈOlic 16:11)
4 Mafanaˈay ci Yihofa misemsemay to roray ko hekal a tamdaw, pakayni toniya demak mararomay Cingra. Kawra, sanay ko Fangcalay Cudad, o ‘lipahakay a Kawas’ ci Yihofa. (1 Timoti 1:11) Hano padadotoc ci Yihofa a lipahak hani? O cecay lalangian i, mafanaˈay Cingra onini a pedes cecayay aca a liyad, misaˈosianto Ningra ko toki wa misongilaˈ a palahdaw to kihcod a pades. Iˈayaw noniya romiˈad i, mihadidiay Cingra a mitala. Hanaca, tada ciharatengay Cingra to malifaay no mita, tahapades kita i, midimokosay kitanan, halo padama kitanan. Samaanay Cingra padama kitanan hani? O cecay a pakayraan i, pafeliay kitanan to lipahak. (ˈOsien ko ˈOlic 16:11.) Nengnengen ita ko tinakoan ni Yis, samaanay cingra tahacada to sapafeli ni Yihofa a lipahak.
5-6. Misamaanay hano lipahak ci Yis hani?
5 Ilalomaˈ no masangaˈay a maamaan, o salipahakay ci Yis, misamaanay hani? Tosaay ko lalangian (1) O ‘cowa ka ˈaraw no tamdaw a pinangan no Kawas’ cingra, i masakenakenaay a pakayraan malefotay mitodong to capeling no kakarayan Wama. (Kolosay 1:15) (2) O sahalafinay ci Yis kalacafay to pipowaran no lipahakay a Yihofa.
6 O roma i, ano o mananto ko sapalimoˈot ni Yihofa ci Yisan, makahiay ci Yis a midofdof, hanaca marenecay ko falocoˈ. (Taneng 8:30, 31; Yohani 8:29) Samanen madimadiay ci Yis ci Yihofaan, mansa milifokay cingra to pihayda ato olah no kakarayan Wama.—Matay 3:17.
7. Sasamaan kita milifok to soˈlinay a lipahak hani?
7 Mahecad ci Yisan, padadotoc kita miingid to pipowaran no lipahak a Yihofa i, mamilifok to soˈlinay a lipahak. Ano macerid kita mitongal mafanaˈ ci Yihofaan a misaˈicel mitodong Cingranan, wa matongal ko lipahak. Roma i, midofdof kita to araaw no Kawas, hanaca pakasoˈlin to mihaydaan Ningra kita, wa marenec ko falocoˈ.a (ˈOlic 33:12) Kawra, nolatekay kamayan mararomen kita, hanaca halafinay ko toki cowa ka lipahak, o malahdawayto ko pihayda ni Yihofa kitanan sanay han? Cowa ka hatira. Cowa ko malefotay kita, nolatekay, marorayan makesem anca matoleday ko falocoˈ a misemsem ko harateng. Tada cipinangay ci Yihofa kitanan. (ˈOlic 103:14) Dotoc nengnengen ita o manan a demakan mamiˈafas to lipahak ita, ato sasamaan kita miliyaw a lipahak.
HAMAAN A PAPIˈAFASEN KO MAAMAAN A DEMAK TO LIPAHAK ISO
8. O pasangar no kaˈorip alatek sasamaan mifiyor kitanan hani?
8 Adihayay ko pasangar i kaˈorip. Pakayni i pades, adada, manikaw anca liteng a marorayen ko kaˈorip iso han? Anca tahacadaay kiso to saroero hokira? Tahasiˈayaw toniya pasangar i, madoloay malahdaw ko lipahak ita. Ano awa ko hapakayraan ita a misalof to pasangar no niyah, alatek mamangalef ko nika tatiih no falocoˈ, mahecad to sowal no Fangcalay Cudad: ‘O mararomay a falocoˈ, makesemay ko pising.’ (Taneng 15:13) O malohemay malitengay ci Pawis, ilalomaˈ no sepat miheca, o kaka ningra ato wama wina matatooray mapatay, sanay cingra: “Matoˈolan nanay kako, awaay ko tatiˈeren ako. Ya iraho cangra i, ˈifowaay kako itiya, awaay ko romiˈad ako kalacafay cangranan. Maharateng koniya demak, tada adadaay ko falocoˈ ako a miroroh to niyah.” O pasangar no kaˈorip soˈlinay awaay ko saloˈingaw no mita misiˈayaw, malahdaway ko lipahak.
9. O manan ko papadama kitanan miliyaw a lipahak hani? (Yirimiya 29:4-7, 10)
9 O manan ko papadama kitanan miliyaw a lipahak? Misaˈicel misiˈayaw kita to kaˈorip nohatini, halo paihkal to miakoˈiday falocoˈ, mamiliyaw a lipahak. O harateng no hekal a tamdaw, malefot ko kaˈorip a rihaday ngaˈ, o lipahakay sanay. Kawra, mifanaˈay ko Fangcalay Cudad kitanan, soˈlin misiˈayaw to pasangar, kamayan kita lipahak ko nokaˈorip. Tinakoen, malaholiw ko Yutaya tamdaw i Papilon pasangaray ko nokaˈorip, kawra pakafanaˈan ni Yihofa cangra oha mamicada to faelohay saaroˈan no niyah, ngaˈay ko kaˈorip i Papilon. (ˈOsien ko Yirimiya 29:4-7, 10.) Pakayni toniya demak o manan ko mananamay ita hani? Wa misaˈicel kita mikilim to kangaˈayan no kaˈorip, halo paihkal to miakoˈiday falocoˈ. Haratengen, papadamaen ni Yihofa kiso miremo to pasangar no hakelong no ˈorip iso, cowa ko mamiliyas Cingra tisowanan. (ˈOlic 63:7; 146:5) Fafahiyan salikaka ci Ayfi pakayni i fahal sanay a pades a masamoˈ, kawra sanay cingra: “Ci Yihofa, paro no lomaˈ ato kasakopang a salikaka adihayay ko sapadama takowanan, sapiakoˈidaw kako cangranan. Mihaenay misetekay kako to falocoˈ misaˈicel a lipahak.”
10. Tahasiˈayaw kita to pasangar i, hano kamayan a lipahak hani?
10 Soˈlin cowa ka rihaday ko kaˈorip, ano kitato anca paro no lomaˈ mifekad ko tatiihay a demak, kamayan kita padadotoc a lipahak.b (ˈOlic 126:5) Misamaanay hani? Samanen o soˈlinay a lipahak cowa ka pilingat to samaanay ko kaˈorip no mita. O misakafahay ci Mariya fafahiyan salikaka, sanay cingra: “Tahalifa to pasangar i, padadotoc kiso a lipahak, cowa ko miˈemetay kiso to nafalocoˈan no niyah, ao maharatengay iso ko mikiˈokan ni Yihofa. Ano o masamaanayto a pasangar, mamidipot ci Yihofa to lipahak no mita.” Haratengen, ano samaanayto ko pasangar no kaˈorip, o kihcod a pasangar no mita o cecayay aca a liyad, wa kalikito a mapalahdaw no kakarayan Wama, mahecad to pasaripaˈan i tafotafokan, kalikito maˈalol no tapelik no riyar, wa awato a maˈaraw ko pasaripaˈan.
11. Mikitini nalifetan no tarokos ci Pawlo, o manan ko mananamay iso?
11 Nolatekay wa saan ko harateng ita: “Tahalifaay kako to adihayay a pasangar, cowato ka pihayda ci Yihofa takowanan han?” Ano ira ko mahaenay a salicay iso, saharateratengen koya nolitengan tahalifaay to pasangar a madimadiay sikawdan, tinakoen o tarokos ci Pawlo. O mipiliˈan ni Yis a tamdaw cingra, maocor ‘tayra i kasakitakit a tamdaw, hongti ato Israil tamdaw’ milasil to ngaˈayay lihaf. (Dmak 9:15) Tada o kalikoan konini! Kawra, tahalifaay ci Pawlo to masakenakenaay a pasangar a maroray. (2 Korinto 11:23-27) Paihkalay koni malahdawayto ko pihayda ni Yihofa ci Pawloan han? Cowa. Ngaˈay cingra padadotoc mihadidi, paihkalay to palemedan ni Yihofa cingra. (Loma 5:3-5) Nohatini tikolen miharateng ko pakayraan no niyah. Ngaˈay kiso mihadidi to masakenakenaay a sapalifet, padadotoc madimadi ci Yihofaan, paihkalay to mihaydaan ni Yihofa kiso.
12. Ano cowa ka malaˈosi ko sapitongalaw to tayal saki ci Yihofaan a patosokan i, hano malahdaw ko lipahak no mita hani?
12 Cowa ka malaˈosi ko patosokan iso a matayal saki ci Yihofaan. (Taneng 13:12) Maolahay kita ci Yihofaan, miakoˈidayho Cingranan, mitemeray koni kitanan patireng to patosokan mitongal to tayal saki ci Yihofaan. Kawra, o kaˈorip nohatini, eca ka malaˈosi ko patosokan no mita, alatek mamatoledto ko falocoˈ. (Taneng 17:22) Fafahiyan salikaka ci Holi o misakafahay, sanay cingra: “Sapirienganaw kako to SKE, sakatayraaw i roma kitakit a matayal saki ci Yihofaan, sapirienangawho to patirengay a tayal i Ramapo. Kawra mafalicayto ko pakayraan ako, oniya patosokan awaayto ko malaˈosiay. Itiya matoleday kako, mararomay ko falocoˈ.” ˈAlomanay a salikaka iraay ko mahaenay a nalifetan, mahecaday ko harateng nangra.
13. Ngangaˈay kita patireng to manan a matatodongay a patosokan hani?
13 O manan ko papadama kitanan miliyaw a lipahak? Haratengen, cowa ka pakidem ko saali ni Yihofa kitanan, cowa ka pakayni i midemakan ita Cingranan, misaˈosi to epoc no mita. Makalimay Cingra kitanan misamiming to falocoˈ madimadi Cingranan. (Mika 6:8; 1 Korinto 4:2) O misakaretengan Ningra i, o ikemoday a nafalocoˈan ita a capeling, cowa ko hakowaay ko nademakay ita i Cingranan. Ano hinatalaay kita to niyah ikaka to hinatalaan ni Yihofa kitanan i, o cowa ko matatodongay.c Mihaenay, o kaˈorip iso nohatini ano cowa ka dangar ko manan a demakan i, haratengen o manan ko mamadangar iso a demak. Tinakoen, ngaˈayay kiso pahatatanam to kaemangay salikaka, anca padama to matoˈasayto a salikaka han? Ngaˈayay patirengen iso ko patosokan a pakalalok to cima han? Ngaˈayay lisoˈen iso cingra, patinwangen, anca palihafen. Onini a patosokan tada matatodongay o ciepocay, misaˈicel kiso palaˈosi toniya patosokan, wa palemeden ni Yihofa a lipahaken kiso. O roma i, haratengen, itini faelohay hekal wa tahadaˈoc a matayal saki ci Yihofaan, itiyato i, o madangaray ita a demak wa mataˈlif to maharatengay no mita. I kaˈayaway masowalay a fafahiyan salikaka ci Holi sanay: “Ano matoled i, patalipaˈelalen ko niyah: ‘Iraay ko midaˈocay ˈorip no mako, cowa ko mamacaloh kako.’ Mitiˈer to sapadama ni Yihofa, o patosokan ako wa malaˈosi itini faelohay hekal.”
14. Iraayho ko manan a demakan palahdaway to lipahak ita hani?
14 O niyah aca ko pakahemeken. O roma a tamdaw i kacacawmaˈan a wangcan sanay, pakahemek to niyah o rahekeray lipahakay a pakayraan koni. Mihaenay ˈalomanay tamdaw misakaretengay to miˈacaay to dafong, miliwko, o kaolahan no niyah a demak. Sakangaˈayaw no kaˈorip cowa ko mararaway, samanen misangaˈan ni Yihofa ko adihayay makapahay a maamaan, oha sakasinowayaw no mita a maˈorip. Kawra, ˈalomanay sapipakahemekaw aca to niyah a tamdaw, ikor mahapinangay, cowa ka lipahak ko niyah, edengan malahorac ato matoled ko falocoˈ. Fafahiyan salikaka ci Ifa o misakafahay, sanay cingra: “Ano o niyah aca ko pakahemeken, cowa ko mamarenecen kiso tahadaˈoc.”
15. Mikitini i tinakoan ni Solomon o manan ko mananamay ita hani?
15 Mikitini i tinakoan ni Solomon mahapinang ita, o niyah aca ko pakahemeken a tamdaw cowa pilifok to soˈlinay a lipahak. Na mitanamay ci Solomon sapidemakaw to maamaan, tinakoen komaen to kaesoˈay kakaenen, mitengil to radiw, sakasinowayaw to miˈacaan a dafong. ˈArawhan o horacto maemin, sanay cingra: ‘Minengneng i, caay ko mamarenec, mitengil i, cangoˈotenho.’ (Patnakay 1:8; 2:1-11) O miowingan noniya hekal a rahekeray a nokaˈorip mahecaday to makaniway a payso, nengnengen hato ciepocay, kawra awaay ko kapo, ˈarawhan cowa ko soˈlinay lipahak.
16. O paladaˈay hano papadama kitanan miliyaw a lipahak hani? (Nengnengen ko coka.)
16 O manan ko papadama kitanan miliyaw a lipahak? Pakafanaˈay ci Yis kitanan: ‘O paladaˈay ikakaay ko hemek to milayapay.’ (Dmak 20:35) O malohemay malitengay ci Alekos, sowal ningra: “Adihayay demak hato madoloay nengnengen, kawra ngaˈayay padama to tao. Misaˈicelay kako mihaen to demak. Maceriday kako paladaˈ to tao, ho eca ka pakidem misakareteng to niyah, palipahakay konini takowanan.” Wa ngaˈay kiso midemak to manan i taowanan hani? Ano maˈaraw ko tao mararom ko falocoˈ i, ngaˈayay talaˈayaw ciharateng cingranan, masasowal cingranan. Alatek cowa ko mamasaysay iso ko pasangar ningra, kawra tatano siniˈada iso mitengil to nafalocoˈan ningra, cipinang to harateng ningra, hanaca patalipaˈelal cingranan patorod to roray no falocoˈ ci Yihofaan, mihaen o mihinomayto kiso cingranan. (ˈOlic 55:22; 68:19) Papadamaen iso cingra pakahapinang to cowa ka piliyas ci Yihofa cingranan. (ˈOlic 37:28; Isaya 59:1) Roma i, ngaˈayay kiso padama cingranan midemak, tinakoen padama cingranan mitangtang to kakaenen, anca kalacafay a mionto. Kalacafayho cingranan mitosil, mihaen papakalalok koni cingranan. Ano misinanot kiso to saali no tao, sakadademaken ni Yihofa kiso pakalalok cangranan, mamilifok to soˈlinay a lipahak.—Taneng 11:25.
Hamaan o niyah aca ko pakahemeken, ao kaciharateng to saali no tao (Nengnengen ko saka 16 fatac)d
17. Ano sapilifokaw kita to soˈlinay a lipahak i, sasamaan ko demak hani? (ˈOlic 43:4)
17 Ano padadotoc kita miingid to ciolahay a kakarayan Wama ci Yihofa, oha mamilifok to soˈlinay a lipahak, mahecad to sowal no Fangcalay Cudad, ‘palipahaken’ ni Yihofa kita. (ˈOsien ko ˈOlic 43:4.) Mihaenay, ano mananto ko malifaay a pasangar, aka a cariraw. Nanay padadotoc kita misamacay to midokoay ci Yihofaan a demak, samanen edengan Cingra aca ko pipowaran no soˈlinay a lipahak, cowa ko papatoleden Ningra kita.—ˈOlic 144:15 ato roma pihongyak.
RADIW 155 Lipahak Tahadaˈoc
a Nengnengen ko sapatongal lalakaw “Tiˈeren ci Yihofa Milifok to Soˈlinay a Lipahak.”
b Ci Tannis Kristensen ato fafahi ci Irina o ngaˈayay tinakoan. Nengnengen ko jw.org wangcan, Safanaˈ no Malohemay Malitengay i Congpo saka 5 a ika.
c Sakacipinangaw to adihayay, nengnengen ko Mikecolay 2008 Miheca 7 Folad 15 Romiˈad “Matatodongay ko saali, Wa Lipahak Kiso”
d TATODONG NO COKA: O cecay fafahiyan salikaka adihayay ko miˈacaan ningra a dafong. Ikor ciharatengay cingra to cecay matoˈasay fafahiyan salikaka, miˈaca to hana pafeli toniya salikaka i, mahemekay cingra.