Pinengnengan to lalakaw no Mitosilay ato Nikaˈorip Rayray no Saˈopo
SAKA 12 FOLAD 2-8 ROMIˈAD
O ODOˈ KO KIMAD NO KAWAS | PAˈARAWAN 7-9 FEDENGAN
“Caay ko Mamafilo a Saˈosien a Taˈangayay ˈOpo a Tamdaw Mapalemeday ni Yihofa”
(Paˈarawan 7:9) Nanoya, nengneng sa kako i, maˈaraw ako ko caay ko mamafilo a saˈosien a ˈalomanay a finawlan. O kasakitakit, o kasangasaw, o kasafinacadan, o masasiromaromaay ko sowal nangra. Cirikoˈ cangra to kohcalay. Mitatoy cangra to caˈang no sarengad a tomireng i kaˈayaw noya tadamaanay a ˈanengang i kaˈayaw no Tofor a Siri.
it-1 304 fiedac 6 fatac
Taˈangayay ˈOpo a Tamdaw
Iraay ko cecay salicay: Ora “taˈangayay ˈopo a tamdaw” ano o aitiniay i sera a tamdaw, hano “tomireng i kaˈayaw noya tadamaanay a ˈanengang i kaˈayaw no Tofor a Siri,” sa hani? (Paˈarawan 7:9) Somowal ko Fangcalay Cudad to “tomireng” ko tamdaw i kaˈayaw no cima tadamaanay tamdaw ano sa i, tatodong nora o kahemekan nora tadamaanay tamdaw cingra o sanay. (ˈOlic 1:5; 5:5; Taneng 22:29; Luka 1:19) ˈArawhan, saka 6 fedengan no Paˈarawan somowalay, “hongtingti no hekal ato mikowanay ato tapatapang no sufitay ato cidafongay ato ciˈicelay a tamdaw, halo kulikuli ato caay ko kuli a tamdamdaw a maemin,” milimekay a milekal a somowal: “Ta malimek niyam ko maroˈay i tadamaanay a ˈanengang ato keter noya Tofor a Siri. Nawhani maraodto ko kaketeran Nangra i tamiyanan a tadamaanay a romiˈad. Cima ko papakahadidi tonini?” Saan. (Paˈarawan 6:15-17; nengnengen ko Luka 21:36.) Mahapinangay itini, mitoroˈan toya: Taˈangayay ˈopo tamdaw” hananay i, oya milifokay to hemek no Kawas atoya Tofor Siri a tamdaw, pakahadidiay cangra a “tomireng” a matafo ko ˈorip i kaketeran a romiˈad.
(Paˈarawan 7:14) Caay ka fanaˈ kako. Kiso ko mafanaˈay,” han ako a somowal. Sowal sa cingra i takowanan, “Nano milifetay to tataˈangay a pades konini a tamdaw. O nano remes no Tofor a Siri ko sapifacaˈ nangra to rikoˈ nangra a misakohcal.
it-1 609 fiedac 1 fatac
Pades; Padiing; Pasangar
Ikor no matekop ko Yirusalim maedeng 30 miheca i, maˈaraway no tarokos ci Yohani ko mapulusi, iraay ko naitiniay i kasakitakit, kasangasaw, kasafinawlan a ˈalomanay tamdaw, ‘masadakay nai taˈangayay padiing’ cangra sanay. (Paˈarawan 7:13, 14) ˈAyaw noni maˈaraway ni Yohani ko “sepatay coyoh” miˈimeray toya patekopay a fali miiyof i sera, tona aisaˈayawenho a mitopa koya 144,000 a tamdaw sanay, cangra i, oya papalisopsopen a “nipiliˈan tamdaw.” (Matay 24:31) Awaay ko sasa, mapolong a malisopsop koya nipiliˈan tamdaw ngaˈ, malahecito koni mitopaay a demak, ikorto i, oya ‘taˈangayay padiing’ o airato a mitekop, itiya oya sasepat coyoh hawadento nangra a mitaker koya fali, mitekop a miiyof toniya sera, riyar ato kilakilang. (Paˈarawan 7:1-4) Masadakay nai ‘taˈangayay padiing’ ko taˈangayay ˈopo a tamdaw, milakowit to padiing a matafo ko ˈorip nangra. Itini i Dmak 7:9, 10 iraay ko malecaday a kasomowal, misawacay toni. Saan kora sinael: “Mikapot ko Kawas [ci Yosifan]. Mapadama no Kawas cingra [masadak nai] masamaamaanay a pades.” Mapaˈoripay ci Yosif miliyas to masamaamaanay a pades, tatodong nora, pakahadidiay cingra a miemem, mitaˈlif to pasangar, matafo ko ˈorip.
(Paˈarawan 7:15-17) “Orasaka, matayal cangra to romiˈad to dadaya to saki Kawas i kaˈayaw no tadamaanay a ˈanengang Ningra i pitaˈongan Cingraan. Saka, o mamararid cangra a madipot noya maroˈay i tadamaanay a ˈanengang. 16 Caayto ko mamacahiw, caayto ko mamasoˈaw cangra. Caayto ko mamatarang no cidal ato masamaamaanay a faedet cangra. 17 Nawhani oya i kaˈayaway no tadamaanay a ˈanengang a Tofor a Siri ko mamidipot i cangraan. O kakeriden Ningra cangra a patayra i nemnem no sakaciˈorip a nanom. O sasisiten no Kawas a miemin ko losaˈ no mata nangra,” saan.
it-1 304-305 fiedac
Taˈangayay ˈOpo a Tamdaw
Mihapinang to Taˈangayay ˈOpo a Tamdaw. Cima kora ‘Taˈangayay ˈOpo a Tamdaw’ hani? Itini i Paˈarawan saka 7 fedengan a mikilim to sapacaˈof. Paˈarawan 7:15-17 somowalay, o Kawas ‘micelakay to pakopangan a mitahpo cangranan’, keriden cangra patayra i “nemnem no sakaciˈorip a nanom”, “o sasisiten no Kawas a miemin ko losaˈ no mata nangra,” sanay. Paˈarawan 21:2-4 saan ko sowal: “Ira i titaanan o tamdamdaw ko lomaˈ no Kawas”, “o sasisiten no Kawas a miemin ko losaˈ no mata nangra.” Saka 21 fedengan a mapulusi somowalay toya faelohay Yirusalim “matefaday nai kakarayan”, dotoc maˈaraway i, o itiniay i seraay a tamdaw, ao cowa ko i kakarayan a demak.
Kadkaden ko Odoˈ no Sinael
(Paˈarawan 7:1) Nanoya, maˈaraw ako ko tomirengay a sasepatay a coyoh i sepatay a tadimocokan no hekal. Takeren nangra ko naicowacowaay a fali to sakaecaaw pifiyok to hekal ato riyar ato masamaamaanay a kilang.
re 113-115 fiedac 3-4 fatac
Mitopa to Israil no Kawas
3 ˈAyaw no mamafetas ko keter ni Yihofa, mamidemak ko coyoh to cecay mikiriwiˈay a tayal. Maˈaraway ni Yohani i mapulusi kora ilaenoay a demak: “Nanoya, maˈaraw ako ko tomirengay a sasepatay a coyoh i sepatay a tadimocokan no hekal. Takeren nangra ko naicowacowaay a fali to sakaecaaw pifiyok to hekal ato riyar ato masamaamaanay a kilang.” (Paˈarawan 7:1) Oniniya sinael iraay ko maanan a tatodong to aniniay a tamdaw hani? Ora “naicowacowaay a fali” mitaypiyaway to mipalaˈafoay a sasawkit ni Yihofa, mangataayto a lahecien koni sasawkit. Ora mipalaˈafoay a fali o mamifiyok to “hekal”, oni mariˈangay a hekal, mamifiyok to “riyar”, oni cariraway masasifoday a tamdamdaw; mamifiyok to “kilang”, oni misaˈakawangay a mikowanay no kitakit, cangra i, mitiˈeray to tamdaw mipawsa a pakaen cangraanan.—Isaya 57:20; ˈOlic 37:35, 36.
4 Oniniya sasepat coyoh mitaypiyaway to sepat komi a coyoh. Ano awaho ko sapalimoˈot ni Yihofa i, miemetayho cangra to sasawkit. Ano hokaento no coyoh ko kamay i, wa misatapangto naicowacowa tadimocokan no hekal a mifiyok toni sera, tada taˈangayay ko pitekop nira, matiya nolitengan tano falien ni Yihofa mifiyok ko Ilam, sano ponpon sato cangra a maliwasak, kawra ora aniniay a fali mamikikaka ko nika taˈangay, mikikaka ko kaciˈicel. (Yirimiya 49:36-38) Tada ciˈicelay koni fali, mikikakaay toya palaˈafoay to Amon a “faliyos”. (Amos 1:13-15) Itini i kaketeran ni Yihofa a romiˈad, cowa ko tatomeseng ko maamaan a lekakawa ni Satan, misawacayay koni to sakakaay a noka pikowan ni Yihofa, tahadaˈoc cowa ko mamafalic.—ˈOlic 83:15, 18; Isaya 29:5, 6.
(Paˈarawan 9:11) Malahongti naira ko citodongay a coyoh toya awaay ko paraˈ a ofang. Ano sano Hiprayen ko ngangan noya coyoh i, ci Apaton han. Ano sano Krisiyaen i, ci Apoliyon han. (O tatodong no Apoliyon i, “O Mitekopay” sanay.)
it-2 655 fiedac
Apaton
Cima koya ci “Apaton” hananay a coyoh no awaay ko paraˈ a ofang?
Paˈarawan 9:11, ci “Apaton” hananay koya “coyoh no awaay ko paraˈ a ofang” sanay, ono Krisiya a sowal ci “Apoliyon” hananay, tatodong i, “o mitekopay” sanay. Itini i saka 19 hahekalan, o cifadangalay tamdaw ko nisowalan toni sanay ko romaroma tamdaw, matira o hongti ci Wispasiyan, Muhammote, Napolon, anca o coyoh ni Satan cangra sanay. Nikawrira, sinanoten ko Paˈarawan 20:1-3, ora sowal i, o naitiniay i kakarayan koya mitatoyay to “safawah to awaay ko paraˈ a ofang” sanay, o mitaypiyaway to coyoh no Kawas, cowa koni Satan a coyoh, ao mamipalit ci Satanan, mifahkol cingranan i awaay ko paraˈ a ofang. O cecay mitadtaday to Fangcalay Cudad a cudad somowal to Paˈarawan 9:11: “Ci Apaton i, o coyoh no Kawas cowa koni Satan, o mitooray to limoˈot no Kawas a milaheci to mitekopay a ˈinorong,” sanay.
Ono Hipray sowal a Fangcalay Cudad, o ʼavad·dohnʹ hananay, tatodong i, malecaday to tadem ato patay. Itini i Paˈarawan 1:18 mitiliday to nano sowal ni Yis: “O maˈoripay kako. Nao mapatayay kako. Nikawrira, nengnengen, maˈoripay kako a midaˈoc. O citodongay kako a mikowan to patay ato kaitiraan no mapatayay.” Luka 8:31 paihkalay to iraay ko ˈicel ni Yis Kristo mifahkol to ˈada tayra i awaay ko paraˈ a ofang. Hipray 2:14 paihkalay to iraay ko ˈicel ni Yis a mitekop, palaˈafo ci Satanan; sowal nora sinael, malo tamdaway ko tireng ni Yis, “ngaˈay pakayni i nika patay ningra ko pitekop ningra toya ciˈicelay a mipatay a [Akomaan]. Itini i Paˈarawan 19:11-16 somowalay ci Yisan to o minilnilan ni Yihofa a misawkitay a tapang, palaˈafo to kihcod micoliay to Kawas a ˈada.—Nengnengen ko APOLIYON.
Miˈosi to Sinael
(Paˈarawan 7:1-12) Nanoya, maˈaraw ako ko tomirengay a sasepatay a coyoh i sepatay a tadimocokan no hekal. Takeren nangra ko naicowacowaay a fali to sakaecaaw pifiyok to hekal ato riyar ato masamaamaanay a kilang. 2 O romasato, maˈaraw ako ko roma a cecay a coyoh. Masadak cingra nai wali a mitatoy to satopa no maˈoripay a Kawas. Lekal sa cingra a somowal toya mapatoroday to ˈicel a papikariˈang to hekal ato riyar a sasepatay a coyoh. 3 “Akaho pikariˈang to hekal ato riyar ato kilang tangasa i kaherekan niyam a mitopa to pising no matayalay no Kawas ita,” saan. 4 Itiyasato, o matengilay ako a sowal to saˈosi no nitopaan no Kawas a tamdaw i, sepat ko safaw a ˈofad ira ko sepat a patek (144,000) no nitopaan a tamdaw saan. O kasangasaw no Israil cangra. 5 O ni Yuta a ngasaw i, cecay a ˈofad ira ko tosa a patek (12,000) ko matopaay. O ni Riupin a ngasaw i, cecay a ˈofad ira ko tosa a patek (12,000) ko matopaay. O ni Kat a ngasaw i, cecay a ˈofad ira ko tosa a patek (12,000) ko matopaay. 6 O ni Asir a ngasaw i, cecay a ˈofad ira ko tosa a patek (12,000) ko matopaay. O ni Naftali a ngasaw i, cecay a ˈofad ira ko tosa a patek (12,000) ko matopaay. O ni Manasi a ngasaw i, cecay a ˈofad ira ko tosa a patek (12,000) ko matopaay. 7 O ni Simiyon a ngasaw i, cecay a ˈofad ira ko tosa a patek (12,000) ko matopaay. O ni Lifi a ngasaw i, cecay a ˈofad ira ko tosa a patek (12,000) ko matopaay. O ni Isakar a ngasaw i, cecay a ˈofad ira ko tosa a patek (12,000) ko matopaay. 8 O ni Cipulun a ngasaw i, cecay a ˈofad ira ko tosa a patek (12,000) ko matopaay. O ni Yosif a ngasaw i, cecay a ˈofad ira ko tosa a patek (12,000) ko matopaay. O ni Pinyamin a ngasaw i, cecay a ˈofad ira ko tosa a patek (12,000) ko matopaay. 9 Nanoya, nengneng sa kako i, maˈaraw ako ko caay ko mamafilo a saˈosien a ˈalomanay a finawlan. O kasakitakit, o kasangasaw, o kasafinacadan, o masasiromaromaay ko sowal nangra. Cirikoˈ cangra to kohcalay. Mitatoy cangra to caˈang no sarengad a tomireng i kaˈayaw noya tadamaanay a ˈanengang i kaˈayaw no Tofor a Siri. 10 Lekal sa cangra a somowal, “O Paˈoripay titaanan ko maroˈay i tadamaanay a ˈanengang a Kawas ita ato Tofor a Siri!” saan. 11 Tomireng i taliyok noya tadamaanay a ˈanengang atoya [malohemay malitengay] atoya sasepatay a maˈoripay ko coyoh a maemin. Ta hinokop sa cangra i kaˈayaw noya tadamaanay a kamaroˈan a mitaˈong to Kawas. 12 Sowal sa, “Amin! Nanay, o hemek, ˈdil, taneng, kansiya, tadamaamay a ngangan ato ˈicel malono Kawas ita a tahadaˈoc! Amin!” Saan.”
SAKA 12 FOLAD 9-15 ROMIˈAD
O ODOˈ KO KIMAD NO KAWAS | PAˈARAWAN 10-12 FEDENGAN
“Mipatayan a Tatosaay a Misawacayay Patikolay Maˈorip nai Patay”
(Paˈarawan 11:3) “O aocoren ako ko tatosaay cirikoˈay to pawti a pawacayay i takowanan a tamdaw. O cacirikoˈ cangra to pawti. Cecay a patek tosa a soˈot ira ko enem a poloˈ (1,260) a romiˈad cangra a mipatenak to sowal no Kawas,” saan.
w14 11/15 30 fiedac
Salicay no Miˈosiay Tamdaw
Cima koya nisowalan i Paˈarawan saka 11 fedengan a tatosa misawacayay tamdaw?
Paˈarawan 11:3 somowalay to “tatosa misawacayay tamdaw” mipatenak to lihaf to 1,260 romiˈad sanay. Dotoc a sowal, “malowid no ˈaˈadopen cangra a mipatay”, nikawrira “ikor no tolo a romiˈad ira ko pangkiw no romiˈad”, patikolay maˈorip koni tatosaay a misawacayay, safahkaˈ sa ko minengnengay cangraan a tamdaw a matalaw.—Paˈarawan 11:7, 11.
Cima koni tatosaay a misawacayay tamdaw hani? Misongilaˈay somowal ko Fangcalay Cudad, sakafanaˈ ita to cima cangra. Salakat, “tosaay a olif a kilang ato tosaay a padawdawan,” sanay ko Fangcalay Cudad. (Paˈarawan 11:4) Maharatengay ita koya nisowalan ni Cikariya a padawdawan ato tosa a olif kilang. Oni tosa a olif kilang, mitaypiyaway toya “tatosa nipiliˈan”, oiyanan ci Cirupapil a tapang aci Yosuwa ya sakakaay saysi ko mitoroˈan, “o nipiliˈan a patireng to mamatayal i tatihi no Tapang no tahaf no kakarayan.” (Cikariya 4:1-3, 14) O roma i, itiniay i Paˈarawan a sinael somowalay to mafanaˈay midemak to kafahkaˈan a demak cangra, matira ci Mosian aci Iliyaan sanay.—Nengnengen ko Paˈarawan 11:5, 6 ato Saˈosi 16:1-7, 28-35 ato 1 Hongti 17:1; 18:41-45.
O sinael i Paˈarawan ato sinael i Cikariya iraay ko masamaanay noka lalecad? Orira sinael milingatay to nipiliˈan a mapasimalay tamdaw, mitamorongay cangra to ˈinorong itini kapasangaran a lintad. Mankora, oya tatosa misawacayay i Paˈarawan oiya mikeriday to demak a mapasimalay a salikaka. Ta malaˈosi koniya sinael i, mapatirengay ko Hongti Kitakit no Kawas isaka 1914 a miheca. Toniya lintad cirikoˈay to sano pawtiay carekahay a rikoˈ cangra a mitosil to tolo ira ko pangkiw a miheca.
Micaˈedongay to sano pawtiay a carekahay a rikoˈ cangra mitosil to tolo ira ko pangkiw a miheca, ikor i, micepetan cangra a mipalit, malecaday o mapatayay itiya. Maketonayto ko pitosil nangra saan ko ˈada, mahemeken cangra. Kawra, ˈapotoay koni toki, toloay aca ira ko pangkiw no romiˈad.—Paˈarawan 11:8-11.
Mahaen o sapairasol no Paˈarawan, mahererekto ko tolo ira ko pangkiw a romiˈad, patikolay maˈorip koya tatosa misawacayay. Cowa ka halafin orira manilnilay a nipiliˈan a faˈinayan salikaka masadakayto nai tapalitan. O roma i, ilalomaˈ nangra a madimadiay tamdaw, itini isaka 1919 miheca pakaynian no Kawas ci Yis Kristoan a minilnil cangra malo “madimadiay citanengay a kuli”, itini toni salikoray a lintad midimokos tono falocoˈan a saali no tamdaw no Kawas.—Matay 24:45-47; Paˈarawan 11:11, 12.
Sasinanoten ita i, Paˈarawan 11:1, 2 somowalay to pifakeciw to noˈadingoan a fangcalay sefi. Malaki saka 3 fedengan somowalay tora demak, tayraay ko Kawas a mikinsa to noˈadingoan a sefi, ikorto i, mipalifetay to finawlan Ningra to cecay a liyad, mikorac cangranan sanay. (Malaki 3:1-4) Hakowaay ko kakoedaw noni liyad hani? Naitini isaka 1914 tangasa 1919 a miheca, oniya liyad mahawpay ko 1,260 a romiˈad (42 a fafoladan), atoya nisowalan no Paˈarawan saka 11 fedengan a “tolo ira ko pangkiw a romiˈad”.
Palifetan ni Yihofa ko finawlan Ningra a mikorac cangranan, “palacidek a palafinawlan Ningra a pakalalok to ngaˈayay a demak.” (Titus 2:14) Coko aakoˈiden ita ci Yihofa saw? Tada o ngaˈayay a taˈarawan ita kora madimadiay a mapasimalay a salikaka. Oiyaan tatosa a misawacayay to nisowalan no saka 11 fedengan no Paˈarawan, itiniay cangra i mapalifetay a laliyadan a mitamorong to mikeriday a demak.
(Paˈarawan 11:7) Ano maherek koya tatosaay a mipatenak i, o mamasadak nai awaay ko paraˈ a ofang ko cecay a ˈaˈadopen a milood cangraan. Ta malowid noya ˈaˈadopen cangra a mipatay.
(Paˈarawan 11:11) Nikawrira, i ikor no tolo a romiˈad ira ko pangkiw no romiˈad i, micomod to tireng noya tatosaay ko nai Kawasay a sapaˈorip a saselaˈan. Ta tireng sato cangra. Saka, safahkaˈ sa ko minengnengay cangraan a tamdaw a matalaw.
Kadkaden ko Odoˈ no Sinael
(Paˈarawan 10:9, 10) Saka, tayra sa kako toya coyoh. “Pafelien kako tora mamangay a nano maloloday a cudad,” han ako i, sowal sa cingra, “Alaen a komaen. ˈAngrer i tiyad iso konini. Nikawrira, yo i ngoyosho iso i, matiya o waneng no ˈodal a koesan,” saan. 10 Saka, ala han ako i kamay noya coyoh koya mamangay a nano maloloday a cudad a komaen i, matiya o waneng no ˈodal a koesan i ngoyos ako. Nikawrira, maherek kako a komaen i, ˈangrer i tiyad ako.
it-2 290-291 fiedac
Maloloday Cudad
Sapatinako a Sowal. Maloloday cudad hananay i, o Fangcalay Cudad ko mitoroˈan. Maˈaraway ni Icikil aci Cikariya ko maloloday cudad, ilalomaˈ ato papotal maˈoningay ko tilid. Edef han mitilid ilalomaˈ ato papotal patahkalay tada karetengay kora misawkitay a lihaf, tangongolay ko pifiyor nira. (Icikil 2:9–3:3; Cikariya 5:1-4) Itini mapulusi i Paˈarawan, oya maroˈay i tadamaanay a ˈanengan a Tofor a Siri mitatoyay ko kawanan kamay tora maloloday cudad, tano pitoay a satopa a micipat. O tatodong i, ˈayaw no micelak ko Tofor a Siri no Kawas, awaay ko cimacima to ngangaˈay pakaˈaraw to lalomaˈay a lalakaw. (Paˈarawan 5:1, 12; 6:1, 12-14) Ikor i, pafelian no coyoh to roma a maloloday cudad ci Yohani, palimoˈoten cingra a papikaen. Kaenento ni Yohani i, matiya o waneng no ˈodal a koesan i ngoyos, kawra ˈanengeray i tiyad. Oniniya maloloday cudad cowa ka pacipaten, patahkalay o lalasilen i tamdaw kora lalakaw. Pakayni ci Yohanian ko sowal, koesanay kora lihaf, kawra ora paliˈayawan a demak o ˈanengeray. (Paˈarawan 10:1-11) Ci Icikil iraay ko malecaday nalifetan, oya macelakay i ˈaˈayaw ningra a maloloday cudad sahtoay o “pakayniay i kararom ato picedaah ato pisemsem a sowal.”—Icikil 2:10.
(Paˈarawan 12:1-5) Ira a maˈaraw i kakarayan ko tadamaanay a kafahkaˈan a demak. Cirikoˈ to cidal ko cecay a fafahiyan. Ripaˈen ningra ko fulad. Citamohong cingra to tosa ko safaw a fuˈis. 2 O cipuyapuyay konini a fafahiyan. Maˈatˈat cingra to sakahofocaw saka, lekal sa cingra. 3 Ira haca a maˈaraw ko roma a kafahkaˈan a demak i kakarayan. Ira ko tataˈangay a kahngangay a kangic. Pito ko fongoh, moetep ko pohong nira. Malarocek koya pitoay a fongoh nira a citamohong tono hongti. 4 Asik han no wikol nira ko cecay no kalitolo (1/3) no fuˈis i kakarayan a mifahkol i hekal. Tomireng koya kangic i kaˈayaw noya mamahofoc a fafahiyan. Mitala cira itira to sakakomaenaw nira to nihofocan noya fafahiyan a wawa. 5 Mahofoc koya fafahiyan to cecay a faˈinayan a wawa. O mamitatoy koya wawa to marad a cokor a mikowan to finawlan no kasakitakit. Nikawrira, makakoy koya wawa a mapacakat i Kawas i tadamaanay a kamaroˈan Ningra.
it-1 209 fiedac 8-10 fatac
Maˈatˈat to sakahofocaw
O cecay mapulusi i Paˈarawan, maˈaraway ni Yohani ko cecay fafahiyan i kakarayan, “Maˈatˈat cingra to sakahofocaw saka, lekal sa cingra.” “Mahofoc koya fafahiyan to cecay a faˈinayan a wawa. O mamitatoy koya wawa to marad a cokor a mikowan to finawlan no kasakitakit.” Sapitaemodaw koya kangic toya wawa, kawra “makakoy koya wawa a mapacakat i Kawas i tadamaanay a kamaroˈan Ningra.” (Paˈarawan 12:1, 2, 4-6) Makakoy tayra i Kawasan sa i, patahkalay koni to mihaiyan no Kawas koni Wawa, matira nolitengan, ano mapatayra i wamaan ko wawa i, mihaiyan no wama to wawa ningra koni. (Nengnengen ko PIHOFOC.) O “fafahi” no Kawas koni “fafahiyan”, oiyaan “ikakarayanay a Yirusalim”, o “wina” ni Kristo ato mapasimalay a salikaka ningra koni fafahiyan.—Kalatiya 4:26; Hipray 2:11, 12, 17.
Oya “ikakarayanay a fafahiyan” o malefotay, cowa ko mamaˈatˈat. Mihaenay, ora ˈatˈat ningra o sapatinako aca, to mafanaˈay cingra to mamahofoc cingra to wawa.—Paˈarawan 12:2.
Cima koniya “faˈinayan wawa” hani? O “mamitatoy koya wawa to marad a cokor a mikowan to finawlan no kasakitakit.” Paliˈayaway pasowal ko ˈOlic 2:6-9, ci Misiya hongti no Kawas o papalaˈosi toni demak sanay. Nikawrira, nihofocan i sera ci Yis, nipatayan cingra, ikor patikolay a maˈorip, halafinto ngaˈ maˈaraway ni Yohani koni mapulusi. Mihaenay haw i, oni mapulusi o paliˈayaway to nika mapatireng no Hongti Kitakit. O wawa no Kawas ci Yis Kristo ko mamikowan toni Hongti Kitakit, patikol a maˈorip nai patay cingra i, ‘maroˈay i kawanan no Kawas tangasa i pihinokopan no ˈada i pasaripaˈan ningra.’—Hipray 10:12, 13; ˈOlic 110:1; Paˈarawan 12:10.
Miˈosi to Sinael
(Paˈarawan 10:1-11) Maˈaraw ako ko cecay a ciˈicelay a coyoh a maepod nai kakarayan. Matafo no toˈem cingra. Ira i fafaed no fongoh ningra ko talakal ni Idek. Matiya o cidal ko pising ningra. Matiya o miciroˈay a namal ko waˈay ningra. 2 Mitatoy cingra to nicelakan a mamangay a nano maloloday a cudad. Miripaˈ to riyar ko kawanan a waˈay ningra. Miripaˈ to sra ko kawili a waˈay ningra. 3 Matiya o nipiletoh no layong ko nipilekal ningra. Yo milekal cingra i, harengheng sa ko rodiheng no pitoay a kakeleng. 4 Yo maherek a pasowal koya pitoay a kakeleng i, sapitilidan kako to sowal nangra. Nikawrira, ira a matengil ako ko ngihaˈ nai kakarayan. Sowal sa, “Aka patalahkalen ko sowal noya pitoay a kakeleng! Aka tiliden!” saan. 5 Oya maˈaraway ako a miripaˈay to riyar ato sera a tomirengay a coyoh i, paciroˈ saan to kawanan a kamay a pasikakarayan. 6 Toroˈ sa cingra toya midaˈocay ko ˈorip a Kawas o misangaˈay to kakarayan ato ilalomaˈay nonini, o misangaˈay to riyar ato ilalomaˈay nonini. Keton sa cingra to falocoˈ a somowal, “Caayto ko mamanayar ko romiˈad! 7 Ano milaepato ko saka papito a coyoh i, itiya a doedoen no Kawas ko nano nisowalan Ningra i matayalay Ningra a paliˈayaway to sowal no Kawas a tamdaw a milaheci to pakakemoday a demak Ningra,” saan. 8 Itiya i, pasowal haca i takowanan koya namatengilay ako ihoni a ikakarayanay a ngihaˈ. Sowal sa, “Olili, katayra a miala toya nicelakan a nano maloloday a cudad oya nitatoyan no miripaˈay to riyar ato sera a tomirengay a coyoh,” saan. 9 Saka, tayra sa kako toya coyoh. “Pafelien kako tora mamangay a nano maloloday a cudad,” han ako i, sowal sa cingra, “Alaen a komaen. ˈAngrer i tiyad iso konini. Nikawrira, yo i ngoyosho iso i, matiya o waneng no ˈodal a koesan,” saan. 10 Saka, ala han ako i kamay noya coyoh koya mamangay a nano maloloday a cudad a komaen i, matiya o waneng no ˈodal a koesan i ngoyos ako. Nikawrira, maherek kako a komaen i, ˈangrer i tiyad ako. 11 Itiya i, pasowal sa ko coyoh i takowanan, “O mamiliyaw haca kiso a pasowal to nano sowal no Kawas to pakayniay i kasafinawlan, kasafinacadan ato kasasiromaroma no sowal ato hongtingti,” saan.
SAKA 12 FOLAD 16-22 ROMIˈAD
O ODOˈ KO KIMAD NO KAWAS | PAˈARAWAN 13-16 FEDENGAN
“Aka Makokiˈ to Katalawan a ˈAˈadopen”
(Paˈarawan 13:1, 2) Maˈaraw ako ko cecay a macakatay nai riyar a ˈaˈadopen. Moetep ko pohong, pito ko fongoh nira. Malarocek a citamohong tono hongti koya moetepay a pohong nira. Matilid i kahacecacecay no fongoh nira ko milokesay to Kawas a sowal. 2 Matiya o lokedaw koya ˈaˈadopen a nengnengen. Matiya o waˈay no tomay ko waˈay nira. Matiya o ngoyos no layong ko ngoyos nira. Pafelien noya kangic koya ˈaˈadopen to ˈicel ato kamaroˈan ato tadamaanay a sakowan nira.
w12 6/15 8 fiedac 6 fatac
Ci Yihofa Kawas O Patalasekalay to Mahimiday a Demak
6 Patikolayto maˈorip a Yisan itiniay pihererekan no saka cecay hahekalan paˈaraw ci Yohanian to kafahkaˈan a mapulusi. (Paˈarawan 1:1) Ilalomaˈ no cecay a mapulusi, maˈaraway ni Yohani koya kangic ci Akoma tomirengay i lawac no riyar. (ˈOsien ko Paˈarawan 13:1, 2.) Dotoc i, maˈaraway haca ni Yohani ko kafahkaˈan a ˈaˈadopen masadak nai riyar, naitiniay ci Akomaan a milayap to fadangalan. Ikor maˈaraway ko cecay kahngangay a ˈaˈadopen, pitoay ko fongoh, moetepay ko pohong, oiyaan nisowalan no Paˈarawan 13:1 a ˈaˈadopen. Pasowalan no coyoh ci Yohani, ora kahngangay pitoay ko fongoh a ˈaˈadopen mitaypiyaway to “pito a hongti.” (Paˈarawan 13:14, 15; 17:3, 9, 10) Tiya mitilid ci Yohani to Paˈarawan i, lalima a “hongti” matapiayto, o cecay mikowanayho, o cecay “awaayho a talahkal.” Oniya tadaciˈicelay a kitakit no hekal o cimacima hani? O hahacecayen ita mifolfol koni papito a fongoh, nengnengenho ita ko Taniil cudad padama kitanan mihapinang tora kakitakitan. Oya nisowalan ni Taniil a kitakit, tahira pi:na a hahekalan ngaˈ masadakay.
(Paˈarawan 13:11) Maˈaraw ako ko roma a cecay a masadakay nai sera a ˈaˈadopen. Tosa ko pohong nira. Matiya o pohong no tofor a siri ko pohong nira. Matiya o caciyaw no kangic ko caciyaw nira.
(Paˈarawan 13:15) O romasato, mahayda ko nipiiyof nira a pafeli to saselaˈan toya faco noya saˈayaway a ˈaˈadopen to sakafanaˈaw noya faco a caciyaw ato sakaciˈicelaw noya faco a mipatay to caay pitaˈong i ciiraan.
re 193 fiedac 26 fatac
Micoˈay to Tatosa Mariˈangay ˈAˈadopen
26 Cima ko mitoroˈan toni ˈaˈadopen hani? O Ikok ato Padaka Tadaciˈicelay a Kitakit no Hekal, oya saka pito fongoh noya saˈayaway a ˈaˈadopen. Oniya ˈaˈadopen tosaay ko sano toforay siri ko pohong sanay, itiniay kita mihapinang to samaanay ko demak noni tadaciˈicelay a kitakit no hekal. Tosaay ko pohong nira sa i, patinakoay to nika kakapot nangra a dademak. Sano toforay ko pohong sa i, paihkalay to damsayay nengnengen, cowa ko mamiˈodis, kaepeday ko pikowan, tatooren no polong no hekal, ˈarawhan caciyaw cangra “matiyaay o kangic”, ano caka picada to sakowan ningra i, miroeroay anca milooday cangranan. Cowa ka papidofdof to pikowan no Hongti Kitakit no Kawas, ao miowingay papitoor to nafalocoˈan ni Satan. Miowingay to kakaˈinteh no kasakitakit, papitaˈong toya saka cecay a ˈaˈadopen.
re 194-195 fiedac 30-31 fatac
Micoˈay to Tatosa Mariˈangay ˈAˈadopen
30 O faco noya ˈaˈadopen o Koksay Lianmong hananay, oyanan Ikok ato Padaka ko patirengay a midama toni lekakawa. Itini i Paˈarawan saka 17 fedengan, oya kahngangay ˈaˈadopen ko mitaypiyaway, ciˈoripay cisaselaˈan nanay, oniya Koksay Lianmong mafanaˈay caciyaw, malitaˈangay to edengan ko niyah to papaira to rihaday no hekal sanay, ˈarawhan i, itiraay ko kasakitakit nira macacaculi a malapoiˈ. Ano iraay ko cowa pidofdof to fadangalan nira i, mipatalaway a mikeceng cangranan. Na soˈlinay a mihaen a milaplap to cowa pitoor to nafalacoˈan nira a kitakit. Ano misatapangto mafekad ko taˈangayay padiing i, o lalooden no hina looday a kitakit kora Koksay Lianmong.—Paˈarawan 7:14; 17:8, 16.
31 Ikor no Saka Tosa Lalood no Hekal, o faco noya ˈaˈadopen i, o Makomoday Kitakit hananay, adihayay ko mipatayan nira. Patinakoen, isaka 1935 miheca, o sofitay no Makomoday Kitakit micapiday to lalood no kaˈamis ato katimol a Koriya. Saˈosien i, o mapatayay no sofitay no Makomoday Kitakit ato katimol a Koriya, 142 a ˈofad ko kaˈaloman no kaˈamis Koriya ato Ciwkoku a tamdaw. Isaka 1960 tangasa 1964 a miheca, ˈifowaay a milood ko sofitay no Makomoday Kitakit i Kangko (Kinsasa). O ˈaˈideman no hekal, mahawpay ko ˈaˈideman no Tingsokiw ci Pawlo saka enem ato Yohani Pawlo saka tosa, misaliyaliyaway milasil tora faco no ˈaˈadopen o papaira to rihaday no hekal sanay, hanaca pasowal ano caka pidopo to Makomoday Kitakit i, o mamatekop ko tamdamdaw sanay. Mihaenay haw i, tatodong nora, hato mipatayay toya caay pihakelong a mitaˈong tora faco a tamdaw.—Limoˈot 5:8, 9.
(Paˈarawan 13:16, 17) Ano o tadancaayto, ano o tadamaanayto, ano o cidafongayto, ano o pakoyocayto, ano o kulito, ano caayto ko kuli a tamdaw i, paciecien nira cangra a papipatopa to kawanan a kamay ano eca i, i pising nangra. 17 O caay ka topa, oya caay ka citilid to ngangan noya ˈaˈadopen ano eca i, o saˈosi no ngangan noya ˈaˈadopen i, caay ka ngaˈay a micakay, caay ka ngaˈay a pacakay to maamaan.
w09 2/15 4 fiedac 2 fatac
Kalimlaan no Paˈarawan Cudad—II
13:16, 17. Itini i “micakayay ato pacakayay to maamaan” a kalo romiˈad a demak no tamdaw, soˈlinto tahalifa to pasangar, cowa ko mamapadik kita a makowan nora ˈaˈadopen to kaˈorip ita. Ano matopa to kamay anca o pising ita i, mahecaday to maˈimeray no ˈaˈadopen ko waywayan ato harateng no mita.
Kadkaden ko Odoˈ no Sinael
(Paˈarawan 16:13, 14) Maˈaraw ako ko tatoloay a matiyaay o takoraˈ a tatiihay a kawas a masadak nai ngoyos noya kangic ato nai ngoyos noya ˈaˈadopen ato nai ngoyos noya mangah a paliˈayaway to sowal no Kawas a tamdaw. 14 O midemakay to kafahkaˈan a demak a palafoay konini a tatiihay a kawakawas. Tayra caira i hongtingti nonini a hekal a misaˈopo i cangraan a maemin to sakalalooloodaw no tamdamdaw i tadamaanay a romiˈad no ciˈicelay a Kawas.
w12 2/1 6 fiedac 2 fatac
Pakayniay i Saikoray Romiˈad a Demak
Paliˈayaway pasowal ko Paˈarawan to mamafekad a demak, ci Satan ato mariˈangay a coyoh ningra o mamiowing to kalo hongtingti no hekal, palisopsop to sufitay nangra, mitowakang to Kawas. O papacoˈay ko Kawas, mipelal tora miculiay a tamdaw, o ˈaˈaloman ko mamapatay toniya lalaood.—Paˈarawan 19:11-18.
w12 2/1 6 fiedac 4 fatac
Cowa ko Kawas ko mikidatay to Armakiton. O sapidipotaw ko Kawas to moecelay tamdaw saka picoˈay Cingra, ho caka mapalaˈafo ko moecelay tamdaw. O “hongtingti no hekal” ko mikidatay toni lalood, hano milood cangra hani? Samanen miˈimeran ni Satan cangra, miowing to mikowanay no hekal ato sufitay nangra milood to midokoay ci Yihofaan a tamdaw.—Paˈarawan 16:13, 14; 19:17, 18.
(Paˈarawan 16:21) Matefad i tamdamdaw ko naikakarayanay a tataˈangay a kasaˈikaˈikay no soeda. Maedeng siwa a poloˈ ko tingting no kareteng no cecay a ˈikay noya soeda. Tona makariˈang no soeda ko tamdamdaw saka, milokes cangra to Kawas. Nawhani tada tataˈang ko nika kariˈang nangra.
w15 7/15 16 fiedac 9 fatac
Mangatato Malidong ko ˈOrip Namo!
9 Ano misatapangto ko taˈangayay padiing i, cowato ko mamitenak kita to “ngaˈayay lihaf no Hongti Kitakit”, mataˈlifayto koni toki, aairato ko saikoray romiˈad! (Matay 24:14) Itiyato i, o tamdaw no Kawas o tatimolo a milasil to cecay karetengay a lihaf, mifiyoray to polong no hekal tamdaw a sasawkit, alatek i: Mamalaˈafoto ko mariˈangay a hekal ni Satan wa saan. O ˈikay no soeda hananay no Fangcalay Cudad kora lihaf, sowal sa: “Matefad i tamdamdaw ko naikakarayanay a tataˈangay a kasaˈikaˈikay no soeda. Maedeng siwa a poloˈ ko tingting no kareteng no cecay a ˈikay noya soeda. Tona makariˈang no soeda ko tamdamdaw saka, milokes cangra to Kawas. Nawhani tada tataˈang ko nika kariˈang nangra.”—Paˈarawan 16:21.
Miˈosi to Sinael
(Paˈarawan 16:1-16) Matengil ako ko tataˈangay a ngihaˈ i pitaˈongan to Kawas a lomaˈ. Sowal sa toya papitoay a coyoh, “Olili, taktaken i hekal koya maparoay i pitoay a wakong a keter no Kawas!” han ningra. 2 Saka, sadak sa ko saka cecay a coyoh a mitaktak i hekal to nitatoyan ningra a wakong. Ta cilifawa to tatiihay a dokaˈ koya citopaay to ngangan noya ˈaˈadopen atoya mitaˈongay to faco noya ˈaˈadopen. 3 Doedo sa i, ira ko saka tatosa a coyoh a mitaktak i riyar to nitatoyan ningra a wakong. Ta matiya o remes no mapatayay a tamdaw ko riyar. Saka, mapatay a maemin ko maˈoripay i riyar. 4 Doedo sa i, ira ko saka tatolo a coyoh a mitaktak i ˈaloˈalo ato nemnem a maemin to nitatoyan ningra a wakong. Ta malaremes konini a maemin. 5 Matengil ako ko nipipasowal no citodongay to nanom a coyoh. Sowal sa, “Kiso o iraay anini, o iraay naniti:ya aca a Fangcalay a Kawas, o moecelay ko falocoˈ Iso. Nawhani hatiniay ko pisawkit Iso. 6 O mipatayay cangra to finawlan Iso ato paliˈayaway to sowal Iso. Saka, coˈayen Iso cangra a mipatay. Matatodongay ko nipihaen Iso a misawkit i cangraan,” saan. 7 Matengil ako ko ngihaˈ i pipatoˈayaan. Sowal sa, “Hai, Tapang, o ciˈicelay a Kawas Kiso! O soˈlinay ato moecelay ko nipisawkit Iso!” saan. 8 Doedo sa i, ira ko saka saspat a coyoh a mitaktak i cidal to nitatoyan ningra a wakong. Saka, mahayda ko nipitarang no cidal to tamdamdaw a mitodoh. 9 Mahaen ko nika todoh no tamdamdaw to nika tataˈang no faedet. Lokes sato cangra to citodongay tonini a sariˈang a Kawas. Caay pasasiyor cangra to falocoˈ a mipasayra i Kawas a mipahemek to nika tadamaan Ningra.” 10 Doedo sa i, ira ko saka lalima a coyoh a mitaktak i kamaroˈan noya ˈaˈadopen to nitatoyan ningra a wakong. Ta satoˈman sa ko nikowanan noya ˈaˈadopen a kitakit. Kalat sa to sema ko tamdamdaw to nano pisemsem nangra. 11 Tona misemsem, cilifawa cangra a madokaˈ saka, milokes cangra to Kawas i kakarayan. Caay pifalic cangra to falocoˈ a miliyas to tatiihay a demak nangra. 12 Doedo sa i, ira ko saka aenem a coyoh a mitaktak i Iufratis hananay a tataˈangay a ˈalo to nitatoyan ningra a wakong. Ta maˈicang koya ˈalo. O mamalolalan no i waliay a hongti a tayni koya ˈalo. 13 Maˈaraw ako ko tatoloay a matiyaay o takoraˈ a tatiihay a kawas a masadak nai ngoyos noya kangic ato nai ngoyos noya ˈaˈadopen ato nai ngoyos noya mangah a paliˈayaway to sowal no Kawas a tamdaw. 14 O midemakay to kafahkaˈan a demak a palafoay konini a tatiihay a kawakawas. Tayra caira i hongtingti nonini a hekal a misaˈopo i cangraan a maemin to sakalalooloodaw no tamdamdaw i tadamaanay a romiˈad no ciˈicelay a Kawas. 15-16 Orasaka, sowal sa ci Yis, “Matiya ono mitakaway ko nika tayni Ako. O mapalalay a tamdaw, o masongilaˈay ko nika cirikoˈ to sakaecaaw ka wacay ningra a mangodo i, o malemeday,” saan. Saˈopoen noya tatoloay a palafoay ko hongtingti i Armakiton hananay no Hipray a pala.
SAKA 12 FOLAD 23-29 ROMIˈAD
O ODOˈ KO KIMAD NO KAWAS | PAˈARAWAN 17-19 FEDENGAN
“O Lood no Kawas Mamihererek to Kihcod a Lalood”
(Paˈarawan 19:11) Nanoya, manengneng ako ko mafawahay a kakarayan. Nengneng sa kako i, ira ko kohcalay a efa. O Tatiˈeren, o Soˈlinay han a mitahidang ko midakaway toya efa. O moecelay ko demak ningra a misawkit. Moecelay ko demak ningra a milood.
(Paˈarawan 19:14-16) Cirikoˈ to kohcalay, tomeliˈay a fangcalay a rikoˈ ko i kakarayanay a sufitay a midakaw to kohcalay a efa a mitoor i cingraan. 15 Masadak i ngoyos ningra ko matalemay a funus to sapipatay to finawlan no kasakitakit. O mamitatoy cingra to marad a cokor a mikowan i cangraan. O mamisakasak cingra to fadisosoˈ a mihetec, ta masadak ko fadisosoˈ a epah. O todong no tataˈangay a keter ningra o ciˈicelay a Kawas koya epah. 16 Matilid i rikoˈ ningra ato cepiˈ ningra ko Hongti no hongtingti, Tapang no tapatapang sanay a ngangan.
w08 4/1 8 fiedac 3-4 fatac
Armakiton—O Lood no Kawas to Papahererek to Kihcod a Lalood
Ano cifadangalho ko mariˈangay tamdaw i, cowa ko rarihaday ko moecelay tamdaw. (Taneng 29:2; Patnakay 8:9) Soˈlinay haw i, cowa ko tatomerep a mariˈang ko tatiihay tamdaw, mankora ano sakarihadayaw i, waniken ko tatiihay tamdaw ato tatiihay a demak wangaˈ. Mahaen o sowal ni Solomon: ‘O sapatefoc no moecelay tamdaw ko mariˈangay tamdaw,’ sanay.–Taneng 21:18.
Tona o sakakaay a misawkitay a Tatapangan ko Kawas, ngaˈayay pasoˈlinen ita, o pisawkit no Kawas to cecacecay a mariˈangay tamdaw i, sahtoay o moecelay. Sanay milicay ci Apraham to Kawas: ‘O misawkitay to polong no hekal a Tatapangan coko mamoecel ko demak Ningra saw?’ O sasawkit ni Yihofa midaˈocay a matatodong, sanayto mahapinang ni Apraham! (Satapangan 18:25) Cowa ka olah ci Yihofa palaˈafo to tatiihay tamdaw sanay ko Fangcalay cudad, edeng ano awaayto ko romaroma pakayraan ngaˈ, palaˈafoay Cingra.—Icikil 18:32; 2 Pitiro 3:9.
it-1 1022 fiedac 3 fatac
Efa
Itini i sapaliˈayaw to noikoran a mapulusi ni Yohani, oya mapaˈodingarayto a Yis Kristoan midakaway to kohcalay efa, oya mikotoday cingranan a sofitay midakaway to kohcalay a efa. O kohcalay efa patinakoay toya mitaypiyaway ci Yihofaan a Kristoan, o pilood ningra sahtoay o moecelay. (Paˈarawan 19:11, 14) ˈAˈayaway a mapulusi, tano masasiromaay a efa ato midakaway tora efa, somowal to mala hongtito ci Kristo i, milowiday a comikay ko efa ato matatootooray a pades.—Paˈarawan 6:2-8.
(Paˈarawan 19:19, 20) Itiya i, maˈaraw ako koya ˈaˈadopen ato hongtingti nonini a hkal ato nika saˈopo no sufitay nangra. O mamilood cangra toya midakaway to efa ato sufitay ningra. 20 Mapalitto koya ˈaˈadopen atoya midemakay to kafahkaˈan a demak i kaˈayaw noya ˈaˈadopen a kapot nira a mangah a paliˈayaway to sowal no Kawas a tamdaw. Oya kafahkaˈan a demak ko sapisawi ningra to citopaay to ngangan no ˈaˈadopen ato mitaˈongay to faco noya ˈaˈadopen. Palimangtaˈ han koya tatosaay a mifahkol i miwarakay ko ˈacfel a namanamalan.
re 286 fiedac 24 fatac
Hongti no Lalood Milowiday Itini i Armakiton
Oya ˈaˈadopen a mikowanay a lekakawa ni Satan, ya naitiniay i riyar masadak a pitoay ko fongoh moetepay ko pohong a ˈaˈadopen, mitaypiyaway to saka pito a tadaciˈicelay a kitakit no hekal, awaayto a materek. (Paˈarawan 13:1, 11-13; 16:13) Maˈoripho cangra i, mafahkolay i “namanamalan” sanay, tatodong nora ˈifowaho a makakapot cangra a miˈodis to tamdaw no Kawas i, itiya a mapalaˈafo cangra. Kawra oniya “namanamalan” o soˈlinay a namal han? Cowa ko soˈlinay. Mahaen ora ˈaˈadopen ato makaniway a pairasolay cowa ko soˈlinay a pinaˈorip, ora “namanamalan” hananay o sapatinako kora, mitaypiyaway to masaheciay a noka laˈafo, midaˈocay a malaˈafo. Ikor nora o patay ato tadem aci Akoma Satan o mamapolong a mafahkol tayra i namanamalan. (Paˈarawan 20:10, 14) Ora “namanamalan” hananay i, cowa ko pisemseman no mariˈangay tamdaw, samanen cowa ka piharaterateng aca ci Yihofa to papasemsemen tahadaˈoc ko mariˈangay tamdaw, cowa ko niharatengan Ningra ko hatiniay a demak.—Yirimiya 19:5; 32:35; 1 Yohani 4:8, 16.
(Paˈarawan 19:21) Oya masadakay i ngoyos noya midakaway to efa a funus ko sakapatay no sufitay nangra a maemin. Mafecol a maemin ko ˈayam a komaen to heci nangra.
re 286 fiedac 25 fatac
Hongti no Lalood Milowiday Itini i Armakiton
25 Oya romaroma cowa ko mikowanay, kawra mikihatiyaay toni manaholay a hekal a tamdaw, o ‘mamatekop noya masadakay i ngoyos ko funus a midakaway to efa a tamdaw.’ O sasawkiten ni Yis mipatay cangra. Nikawrira, cowa ko fafahkolen i namanamalan cangra sa i, paihkalay koni to iraay ko tokel nangra patikol a maˈorip han? Cowa ka pasowal ko Fangcalay Cudad, to papatikol maˈorip koya masawkitay no hankang ni Yihofa a tamdaw. O sowal ni Yis i, polong o cowa ko ‘lopayˈay siri’ a tamdw o fafahkolen toya ‘sapatala ci Akomaan ato coyoh ningra a namal, midaˈoc a matetop,’ sanay. (Matay 25:33, 41, 46) Itiyato i, ‘cowa ka pidoko to Kawas a tamdaw mamasawkit a malaˈafo.’—2 Pitiro 3:7; Nahum 1:2, 7-9; Malaki 4:1.
Kadkaden ko Odoˈ no Sinael
(Paˈarawan 17:8) O maˈaraway iso a ˈaˈadopen i, namaˈoripay iti:yaho, awaay anini. Nikawrira, o mamacakat cira a masadak nai awaay ko paraˈ a ofang. Ta matekop cira. Oya maroˈay itini i hekal a tamdamdaw to caay ka tilid ko ngangan i pitilidan to ngangan no maˈoripay iˈayaw no nika sangaˈ no hekal i, o fafahkaˈ cangra a minengneng toya ˈaˈadopen. Nawhani namaˈoripay cira iti:yaho, awaay anini. Nikawrira, o mamiliyaw haca cira a talahekal.
re 247-248 fiedac 5-6 fatac
O Cecay Kafahkaˈan a Mahimeday Demak Talahkalayto
5 ‘Ya ˈaˈadopen, iti:yaho iraay a maˈorip’ sa i, o manan ko tatodong nora sowal hani? Naitini saka 1920 miheca ka Cecayan folad 10 romiˈad misatapang, oya kahngangay ˈaˈadopen sano Koksay Lianmong a masadak, 63 ko masalalomaˈay a kakitakitan. Kawra o Dipong, Towic ato Itali misawaday a miliyas toni lekakawa, Suwiay mipalasawadan ko tatodong nira. Isaka 1939 miheca 9 folad, mifekaday to Saka Tosa Lalood no Hekal ko Naci no Towic. Itiya awaayto ko ˈicel no Koksay Lianmong mitafo to rihaday no hekal, mato matefaday tayra i awaay ko paraˈ a ofang, caayto ka tatemik. Tangasa 1942 miheca, malakisawayto. Itiraay tora toki, ci Yihofa patalasekal to tamdaw Ningra to tatodong no Paˈarawan 17:8! Itiya toya “Faelohay Hekal” a taykay, mikitiniay tora sapairasol ko salikaka ci Nasen Nolo a pasowal: “Oya ˈaˈadopen . . . awaay nohatini,” sanay. Dotoc milicayay cingra: “Oya Koksay Lianmong o aaitini saan i awaay ko paraˈ a ofang materek han?” Paˈarawan 17:8 sanay mitadtad: “Makakapotay no kasakitakit o papatikol a maˈorip.” Sanay. Soˈlinay mahaen ko demak, miwacayay to matepiˈay ko sapairasol ni Yihofa!
Masadakay Nai Awaay ko Paraˈ a Ofang
6 Soˈlinay oya kahngangay a ˈaˈadopen masadakay nai awaay ko paraˈ a ofang! Isaka 1945/6/26, o taypiyaw no 50 a kitakit itiniay i San Fransisko no Padaka mitopaay a patireng to Makomoday Kitakit. Patosokan i, “o sapitafoaw to rihaday no kasakitakit.” Nohekal Cudad a Citing (no Padaka) sanay ko sowal: “Malecaday to patosokan no Koksay Lianmong.” Mihaenay haw i, ora Makomoday Kitakit oyaan patikolay maˈorip a kahngangay ˈaˈadopen, o masalalomaˈay a kitakit 190 ko kaˈaloman, ikakaay to 63 to Koksay Lianmong. O roma i, o mahawpay no Makomoday Kitakit a ˈinorong ikakaay ko nika kakahad to Koksay Lianmong.
(Paˈarawan 17:16, 17) Oya maˈaraway iso a moetepay a pohong atoya ˈaˈadopen i, o mamiˈintel toya tasalamaan a fafahiyan. O ˈaˈafasen naira ko rikoˈ ningra ato maamaan ningra a miwacay. O kakaenen naira ko heci ningra. O tatodohen naira cingra to namal a milanto. 17 Nawhani papilahecien no Kawas caira to nafalocoˈan Ningra. Saka, lacecay sa ko falocoˈ naira a mipatorod toya ˈaˈadopen to sakowan naira tangasa i kalahecian no sowal no Kawas.
w12 6/15 18 fiedac 17 fatac
Patalasekalay ci Yihofa to Mamafekad a Demak
17 Nikawrira, o makaniway pihakelongan cowaho ko mamalahdaw. Iraayho ko pifiyor noya tasalamaan a fafahiyan, miˈimer to hongtingti papitengil to sowal ningra. Kawra, kakaliki ko Kawas pacomod i falocoˈ no cifadangalay tamdaw to cecay harateng. (ˈOsien ko Paˈarawan 17:16, 17.) O cacorohen ni Yihofa ko kalo mikowanay no lekakawa ni Satan papiˈodis to makaniway pihakelongan, o Makomoday Kitakit ko mamitaypiyaw to kalo kitakit a mihaen to demak. Cowa ito ko mamaˈimer noya tasalamaan fafahiyan ko kalo kitakit, o mamalahdawto ko dafong ningra. ˈAyaw no pina moetep a miheca, hato cowa ko mamafekad ko hatiniay a demak, kawra oya midakaway i fafekang noya kahngangay ˈaˈadopen a tasalamaan a fafahiyan mamatefadto. Kawra, cowa ko papalidlid sa a mapoliloc a matefad, ao fahal saan a mapasetaˈ noya ˈaˈadopen cingra!—Paˈarawan 18:7, 8, 15-19.
Miˈosi to Sinael
(Paˈarawan 17:1-11) Nanoya, raod sa i takowanan ko cecay noya mitatoyay to pitoay a wakong a papitoay a coyoh. Sowal sa, “Katayni. Paˈarawen ako kiso to nika o mamasamaan ko pitefoc toya cinganganay a tasalamaan a fafahiyan. O todong no mapatirengay i tatihi no ˈaloˈalo a tataˈangay a niyaroˈ konini a fafahiyan. 2 Maˈodang tonini a fafahiyan ko hongtingti nonini a hekal. Halo maroˈay itini i hekal a tamdamdaw a malasang no fadisosoˈ a epah nonini a fafahiyan to nano nika ˈodang nangra,” saan. 3 Makakoy no [ˈicel no fangcalay saocor] kako saka, patayraen no coyoh kako i kohkohan. Maˈaraw ako itira ko cecay a midakaway a fafahiyan to kahngangay a ˈaˈadopen. Maledef no milokesay to Kawas a tilid ko tireng noya ˈaˈadopen. Pito ko fongoh, moetep ko pohong nira. 4 Cirikoˈ to maloloay ato kahngangay koya fafahiyan. Mapaeres to tadaekim ato tadamaanay a odoˈ ato cincu ko tireng ningra. Mitatoy cingra to tadaekim a takid. O matomesay no kasimelangan ato kaacekan a demak no nika ˈodang ningra koya takid. 5 Matilid i pising ningra ko ngangan, “O ina no polong no tasalamaan a fafahiyan ato kasimelangan ko demak a tamdaw nonini a hekal a tataˈangay a Papilon,” sanay a pakakemoday ko tatodong a sowal. 6 Maˈaraw ako ko nika lasang noya fafahiyan to remes no finawlan no Kawas ato remes no mapatayay to nano nipipatalahkal nangra to nipitoor nangra ci Yisan. Safahekaˈ sa kako a minengneng toya fafahiyan. 7 Sowal sa i takowanan koya coyoh, “Nawiro fahkaˈ kiso saw? Pasowalen ako kiso to pakakemoday a tatodong noya fafahiyan ato pakakemoday a tatodong no pidakawan noya fafahiyan a pitoay ko fongoh, moetepay ko pohong a ˈaˈadopen. 8 O maˈaraway iso a ˈaˈadopen i, namaˈoripay iti:yaho, awaay anini. Nikawrira, o mamacakat cira a masadak nai awaay ko paraˈ a ofang. Ta matekop cira. Oya maroˈay itini i hekal a tamdamdaw to caay ka tilid ko ngangan i pitilidan to ngangan no maˈoripay iˈayaw no nika sangaˈ no hekal i, o fafahkaˈ cangra a minengneng toya ˈaˈadopen. Nawhani namaˈoripay cira iti:yaho, awaay anini. Nikawrira, o mamiliyaw haca cira a talahekal. 9 “Orasaka, o kakadkaden no citanengay ato mafanaˈay a tamdaw konini a demak. O pitoay a fongoh hananay i, o todong no pitoay a niaroˈan noya fafahiyan a lotok. O romasato, o todong no papitoay a hongti koya fongoh. 10 Onini a papitoay a hongti i, matefadayto ko lalima. Tomirengho anini ko cecay. Awaayho a talahekal ko cecay. Nikawrira, ano irato cira i, caay ko hahalafin ko nika tomireng nira. 11 Oya namaˈoripay iti:yaho, awaay anini a ˈaˈadopen hananay i, o sakafafalo a hongti cira. Nikawrira, o cecay noya iˈa:yaway a papitoay cira. Ta o mamatekop cira.
SAKA 12 FOLAD 30 –1 FOLAD 5 ROMIˈAD
O ODOˈ KO KIMAD NO KAWAS | PAˈARAWAN 20-22 FEDENGAN
“Nengnengen! Sasafaelohen Ako ko Kihcod a Maamaan!”
(Paˈarawan 21:1) Maˈaraw ako ko faelohay a kakarayan ato faelohay a hekal. Malahdawto ko iˈayaway a kakarayan ato hekal. Malahdawto ko riyar.
re 301 fiedac 2 fatac
Faelohay a Kakarayan Faelohay a Hekal
2 ˈAyaw no lintad ni Yohani to pina soˈot a miheca, sanay ci Yihofa pasowal ci Isayaan: “O mamisangaˈ Kako to faelohay a kakarayan ato sera. O mamatawalto ko iˈaya:way a demak a maemin.” (Isaya 65:17; 66:22) Oniniya sapairasol itiniay isaka 537 miheca a malaˈosi to sakina cecay. Ta malaholiw i Papilon to ikor no 70 miheca, o madimadiay a Yutaya tamdaw minokayay tayni i Yirusalim. Itiniay toni noka mapatatikol ko soˈlinay pidoyongan, iraay ko faelohay a mikowanay (faelohay a kakarayan) to Yutaya, patirengay cangra to faelohay a hekal (faelohay sera). Nikawrira, iraayho ko sakina tosa a noka laˈosi noni sapairasol sanay ci Pitiro, sowal sa: “Nikawrira, mitala kita to nano nisowalan no Kawas a faelohay a kakarayan ato faelohay a sera. O moecelay ko demak itira.” (2 Pitiro 3:13) O aitini i romiˈad no Tapang a malaˈosi koni sanay ci Yohani, “iˈayaway a kakarayan ato hekal” mitoroˈan oya lekakawa ni Satan, ato limasmas no pikowan nangra, o mamidaˈoc a malahdaw. Oya micoliay mafawfaway a sano “riyaray” a tamdaw, cowa ito ko mamaterek. O mitisoday i, oyaanto “faelohay a kakarayan faelohay a hekal”, oyaan mikowanan no Hongti Kitakit no Kawas a hekal.—Nengnengen ko Paˈarawan 20:11.
(Paˈarawan 21:3, 4) Itiya i, matengil ako ko tataˈangay a ngihaˈ itira toya tadamaanay a ˈanengang. Sowal sa, “Ira i titaanan o tamdamdaw ko lomaˈ no Kawas! O mamikapot ko Kawas to tamdaw a maroˈ. O mamala finawlanto no Kawas ko tamdaw. O Kawas ko toeto sanay a mikapot i cangraan. O mamala Kawasto nangra Cingra. 4 O sasisiten no Kawas a miemin ko losaˈ no mata nangra. Caayto ko mamapatay, caayto ko mamararom, caayto ko tatomangic, caayto ko mamisemsem ko tamdaw a maemin. Malasawadto ko iˈayaway a demak,” saan.
w13 12/1 11 fiedac 2-4 fatac
Nengnengen! Sasafaelohen Ako ko Kihcod a Maamaan Nohatini
“O sasisiten no Kawas a miemin ko losaˈ no mata nangra.” (Paˈarawan 21:4) O masamaanay a losaˈ ko sasasisiten no Kawas hani? Cowa ko mahemekay a losaˈ, cowa ko micepaˈay to mata a losaˈ, ao losaˈ to nika somad ato nika roray. O sasasisiten no Kawas a miˈicang ko matiraay a losaˈ, halo palahdaw to maamaan mirorayay to tamdaw a losaˈ.
“Caayto ko mamapatay.” (Paˈarawan 21:4) Itini i hekal o kasomadan a demak i, o patay. O tatedalen ni Yihofa ko midofdofay Cingranan nai patay. O manan kora pakayraan hani? O papalahdawen ko mirocokan ita nai ci Ataman a raraw, o lalangian no patay koni, hato cato ka malefot ko ˈorip ita. (Loma 5:12) O papakaynien ni Yihofa i sapatefoc ni Yis, palahdaw to raraw no midofdofay i Cingranan a tamdaw, patikol a malefot ko ˈorip nangra. Itiyato i, “o saikoray a mamalowid a ˈada i, o patay.” (1 Korinto 15:26) O madimadiay to Kawas a tamdaw o mamatiya to nafalocoˈan no Kawas a midaˈoc a tanektek a maˈorip.
“Caayto ko mamisemsem.” (Paˈarawan 21:4) O masamaanay a semsem hani? O pisemsem to pairaan no raraw, itiniay ino tatirengan, ino falocoˈan, ino haratengan. Itini i paro no kakarayan caay ka maˈosi ko nika ˈaloman a tamdaw marorayay to nika pisemsem, kawra o kakalikito a mataˈlif.
(Paˈarawan 21:5) Itiya i, sowal sa koya maroˈay i tadamaanay a ˈanengang, “Nengnengen, sasafaelohen Ako ko [kihcod] a maamaan! Tiliden nawhani o soˈlinay a tatiˈeren konini a sowal.
w03 8/1 12 fiedac 14 fatac
Ci Yihofa, O Mitafoay to Soˈlinay Kimad a Kawas
14 O Kimad no Kawas matiliday i Fangcalay Cudad, o sasongilaˈen ita micekiw, samanen matooray Ningra ko nano sowal Ningra, ano mamisamaan Cingra, o mamalaˈosi, tatiˈeren no mita Cingra. Sowal sa ci Yihofa, “itiya a matefoc no Tapang ko caay ka fanaˈ to Kawas ato caay pidoedo to Ngaˈayay a Ratoh to pakayniay i Tapang ita ci Yisan,” sanay, o papasoˈlinen ita to mamihaen Cingra to demak. (2 Tisalonika 1:8) Mikiˈokay ci Yihofa: Micangacangay to moecelay a tamdaw, o kakaolahen Ningra; pakasoˈlinay toya Wawa a tamdaw, o mamidaˈoc a maˈorip; papalahdawen Ningra ko roray, tangic ato patay. Papasoˈlinen ita to mamilaheci Cingra toni demak. Mankora palimoˈoten Ningra ci Yohani: “Tiliden nawhani o soˈlinay a tatiˈeren konini a sowal.”—Paˈarawan 21:4, 5; Taneng 15:9; Yohani 3:36.
Kadkaden ko Odoˈ no Sinael
(Paˈarawan 20:5) O saka cecay a nika lomowad a maˈorip nai patay konini. (O romaroma a mapatayay a tamdaw i, caay ka lomowad a maˈorip nai patay tangasa i kaleponan no cecay a patek a mihecaan.)
it-2 169 fiedac 3 fatac
ˈOrip
Naitira tora sapalimoˈot no Kawas ci Ataman mahapinangay ita, ano midofdof ci Atam to Kawas i, cowa ko mamapatay cingra. (Satapangan 2:17) Ano ikorto i, midofdofay to Kawas a tamdaw o mamahaen, mapalaˈafoto ko “patay” ya saikoray a ˈada ngaˈ, cowa ito ko mamapaekel no raraw ato patay cangra, oraanto i, tatahadaˈoc maˈorip cangra. (1 Korinto 15:26) Oniniya demak o aitini i pihererekan no pikowan ni Kristo to cecay patek a miheca a mafekad. O sowal i Paˈarawan, oya mikapotay ci Kristoan mala hongti ato mala saysiay a tamdaw, o ‘mamaˈorip mikapot ci Kristoan a mala hongti to cecay a patek a mihecaan a mikowan.’ “O romaroma mapatayay” i, cowaho ka maˈorip sanay, tangasa i “kaleponan no cecay a patek a mihecaan”, tatodong nora i, oya patikolay maˈorip i lalomaˈ no cecay patek a miheca, kawra cowaho ka mapalifet a tamdaw ko mitoroˈan, cowaho ka matedal nai awaay ko paraˈ a ofang ci Satan. Mahererekto ko cecay patek a miheca i, o polong iseraay a tamdaw patikolto a malefot ko ˈorip. Dotoc ngaˈ, matedal to cecay liyad ci Satan, polong pakataˈlifay to sapalifet a tamdaw ko ngangaˈay midaˈoc a malefot ko ˈorip.—Paˈarawan 20:4-10.
(Paˈarawan 20:14, 15) Ta halo patay ato kaitiraan no mapatayay a mafahkol i namanamalan. (Itira toya namanamalan a mapatay ko tamdaw to sakinatosa a patay.) 15 O caay ka tilid ko ngangan i pitilidan to ngangan no maˈoripay i, mafahkol a maemin i namanamalan.
it-1 635-636 fiedac
Namanamalan
“Namanamalan” hananay tilid kina cecayay aca masadak i Paˈarawan, o sapatinako a sowal. Somowalay ko Fangcalay Cudad o manan ko sapatinako nora “namanamalan”: “O sakinatosa a patay,” sanay.—Paˈarawan 20:14; 21:8.
Ano palalinien iso kora fafekangay ato laenoay a sowal nora sinael i, o mamafanaˈ to o sapatinako kora namanamalan hananay. Ano o patayto mafahkolay tayra tora namanamalan sanay ko Fangcalay Cudad. (Paˈarawan 19:20; 20:14) Mahapinangay, cowa ko mamatodoh ko patay. O roma i, ano oya caay ka ˈaraw no mata a Akomaan o mamafahkol tora namanamalan, o noˈadingoan a tireng mamisamaan a matodoh saw.—Paˈarawan 20:10; nengnengen ko Kasadakan 3:2 ato Kakitaan 13:20.
Hay ano o sapatinako to “sakinatosa a patay” kora namanamalan, “o patayto ato tadem” o mamafahkol tayra saan ko Paˈarawan 20:14 i, cowa koya marocokay nai ci Ataman a patay kora kira (Loma 5:12), cowa ko tadem ko mitoroˈan. O sowal no Fangcalay Cudad i, oya naitiraay ci Ataman a patay ato tadem saikor o papasadak to ilalomaˈay a mapatayay sanay, kawra awaay ko sinael pasowal to papasadak ko “namanamalan” to tamdaw, mankora o cowato ko lalomowad a noka patay koranan. (Paˈarawan 20:13) Mihaenay, polong cowa piliwkay a miculiay to saˈakawangay a pikowan no Kawas a tamdaw, oya cowa ka matilid ko ngangan i “Pitilidan” cudad a tamdaw, o mamafahkol tayra i namanamalan, tahacada to midaˈocay a noka laˈafo, o sakinatosa patay kora.—Paˈarawan 20:15.
Miˈosi to Sinael
(Paˈarawan 20:1-15) Maˈaraw ako ko nika lokelon no cecay a coyoh nai kakarayan. Mitatoy cingra to safawah to awaay ko paraˈ a ofang ato cecay a tataˈangay a lonayiˈ. 2-3 Repeten ningra koya kangic, o katelang a ˈoner, o kakeridan no palafoay ci Satan a mipalit a mifahkol i awaay ko paraˈ a ofang. Ta tahafen ningra koya ofang a mitopa. Cecay a patek a mihecaan ko nika palit noya kangic. Onini i, o sakaecaaw pisawi nira to finawlan no kasakitakit tangasa i kaleponan no cecay a patek a mihecaan. Iikor nonini i, o mamapacenaˈ cira a matedal. 4 Maˈaraw ako ko pinapina a ˈanengang no mikowanay ato maroˈay itira. Mapatorod i cangraan ko ˈicel a misawkit. O romasato, maˈaraw ako ko [ˈorip] no nipatayan a tamdaw to nano nipipatalahkal nangra to nipahapinangan ni Yis a sowal ato nipipatenak nangra to sowal no Kawas. O caay pitaˈong cangra toya ˈaˈadopen ato faco noya ˈaˈadopen. O caay ka citopa to ngangan noya ˈaˈadopen ko pising ano eca i, o kamay nangra. Miliyaw cangra a maˈorip a mikapot ci Kristoan to cecay a patek a mihecaan a mikowan. 5 O saka cecay a nika lomowad a maˈorip nai patay konini. (O romaroma a mapatayay a tamdaw i, caay ka lomowad a maˈorip nai patay tangasa i kaleponan no cecay a patek a mihecaan.) 6 O mikapotay tonini a saka cecay a nika lomowad a maˈorip nai patay i, o malemeday, o makoracay a tamdaw. Caayto ko mamapatay cangra to sakinatosa a patay. O mamalacitodongay to taˈong cangra a matayal tono Kawas ato ni Kristo. O mamikapot cangra ci Kristoan to cecay a patek a mihecaan a mikowan. 7 Iikor no cecay a patek a mihecaan i, o mamatedal ci Satan nai pirofoan. 8 O tatayra cingra icowacowa a misawi to finawlan no kasakitakit, oya Kok ato Makok hananay. O mamisaˈopo ci Satan cangraan a papilood. O mamatiya o nika adihay no tafok no riyar ko nika ˈaloman nangra. 9 Ledef sa cangra to hekal. Likoten nangra ko masaniyaroˈay a kamaroˈan no finawlan no Kawas ato kaolahan no Kawas a niyaroˈ. Nikawrira, matefad nai kakarayan ko namal a milanto i cangraan. 10 Ta mafahkol i miwarakay ko ˈacefel a namanamalan koya misawiay i cangraan a kakeridan no palafoay. O nano pifahkolan konini toya ˈaˈadopen ato mangah a paliˈayaway to sowal no Kawas. O mamidaˈoc caira a mapasemsem to romiˈamiˈad to dadayadaya. 11 Maˈaraw ako ko tataˈangay, kohcalay a tadamaanay a ˈanengang ato maroˈay itira. Lahdaw sai kaˈayaw Ningra ko hekal ato kakarayan. Awaayto a maˈaraˈaraw konini. 12 Itiya i, maˈaraw ako ko mapatayay a tamdamdaw. Ano o tadamaanayto, ano o tadancaayto i, ira a maemin a tomireng i kaˈayaw noya tadamaanay a ˈanengang. Macelak ko pinapina a cudad itira. Ira ko roma a cecay a nicelakan a cudad, o pitilidan to ngangan no maˈoripay. O matiliday toya pinapina a cudad a sowal ko piˈarawan a misawkit to mapatayay a tamdamdaw to nano demak nangra. 13 Pasadaken no riyar ko i lalomaˈay nira a mapatayay. Pasadaken no patay ato kaitiraan no mapatayay ko ilalomaˈay naira a mapatayay a tamdaw. Ta pakayni i nano demak no kahacecacecay nangra ko sakapisawkit i cangraan. 14 Ta halo patay ato kaitiraan no mapatayay a mafahkol i namanamalan. (Itira toya namanamalan a mapatay ko tamdaw to sakinatosa a patay.) 15 O caay ka tilid ko ngangan i pitilidan to ngangan no maˈoripay i, mafahkol a maemin i namanamalan.