Pinengnengan to lalakaw no Mitosilay ato Nikaˈorip Rayray no Saˈopo
SAKA 11 FOLAD 4-10 ROMIˈAD
O ODOˈ KO KIMAD NO KAWAS | 1 YOHANI 1-5 FEDENGAN
“Aka ka Olah to Demak no Hekal ato Maamaan no Hekal”
(1 Yohani 2:15, 16) Aka ka olah to demak no hekal ato maamaan no hekal. Ano maolah ko tamdaw to demak no hekal i, awaay i falocoˈ ningra ko olah ci Wamaan. 16 Nawhani o paˈanofay to tireng, o paˈinalay to mata a misolot ato palitaˈangay to falocoˈ no tamdaw kono hekalan a demak a maemin. Caay ko nai ci Wamaananay, ono hekalan aca konini.
w05 1/1 10 fiedac 13 fatac
Tooren ko Taˈarawan ni Yis a Misaˈosi to Demak
13 O romaroma tamdaw miharateng alatek, cowa ka sahto saan tatiih ko demak no hekal sanay. Hatiraayto, kawra o demak no hekal mamikalisangaˈ to pisamacay no falocoˈ ita, cato ka pisarocod a midoko to Kawas. Maamaan a demak no hekal awaay ko cecacecay to papadama kitanan miingid to Kawas. Mankora, ano maolah to demak no hekal kita, soˈlin cowa ka raraw kora demak, kawra masiwala kita alatek. (1 Timoti 6:9, 10) Hanaca, o demak no hekal adihayay ko tatiihay, maminahol kitanan. Ano mararid a minengneng kita to malaˈodotay, makakalonaay, maˈanofay to hafay a ika ato kamok no tilifi i, palidlid sato kita miharateng to cowa ko maan ko matiraay a falocoˈ ato waywayan wa saan, hato masolotto to sapitanamaw tora demak. Ano makedec ko picawmaˈ ita to saka cihafayaw a tamdaw anca mitengil to sowal nangra i, ora milepelan nangra o papalidlid saanto a malo kalimlaan a demak i kaˈorip no mita.—Matay 6:24; 1 Korinto 15:33.
(1 Yohani 2:17) Manornorto a malasawad ko hekal ato itiniay i hekal a kangalayan no tamdaw a maemin. Nikawrira, midaˈoc a maˈorip ko midoedoay a tamdaw to nafalocoˈan no Kawas.
w13 8/15 27 fiedac 18 fatac
O Mamala Masamaanay a Tamdaw Kiso Hani?
18 Toha sapicoˈayaw to “demak no hekal”, mamisamaan to demak kita hani? Pakifalocoˈen ko sapatemer no Kawas ci Yohanian a sowal: “Manornorto a malasawad ko hekal ato itiniay i hekal a kangalayan no tamdaw a maemin. Nikawrira, midaˈoc a maˈorip ko midoedoay a tamdaw to nafalocoˈan no Kawas.” (1 Yohani 2:17) Oniya lekakawa ni Satan nengnengen hato cowa ko mamalasawad. Kawra pasowalay ko Fangcalay Cudad kitanan, o mamalasawad koni lekakawa sanay! O maamaan no hekal ni Satan, kakaliki a malasawad. Haratengen koni, ho caka masaˈfit ni Akoma.
Kadkaden ko Noˈadingoan Odoˈ
(1 Yohani 2:7, 8) Kaolahan ako a salikaka, caay ko faelohay a limoˈot ko sasowalen ako a patilid i tamowanan. Oya kafanaˈan namo nai satapangan a mitoor a nai ti:yaayho a limoˈot ko sasowalen ako. O nano nitengilanto namo a sowal koya nai ti:yaayho hananay ako a limoˈot. 8 Nikawrira, ano liyawen a miharateng i, o faelohayto a limoˈot ko sasowalen ako a patilid i tamowanan. Mahapinang i ci Kristoan, mahapinang i tamowanan ko nika o soˈlinay ko sasowalen ako a limoˈot. Nawhani malasawad malasawad ko toˈmanay. Matedi matedi ko soˈlinay a likat.
w13 9/15 10 fiedac 14 fatac
Sapatalipaˈelal ni Yihofa O Ciepocay
14 Krisiya a Fangcalay Cudad misaliyaliyaway patalipaˈelal to mamasasiolah kita. Sowal ni Yis, ora saka tosa a limoˈot i, ‘maolah to tao haenen o kaolah to niyah’ sanay. (Matay 22:39) Padek a safa ni Yis ci Yakop somowal toniya ‘maolah to tao haenen o kaolah to niyah’ sanay i, o ‘tadamaanay a rikec’ hananay ningra. (Yakop 2:8) Tarokos ci Yohani sanay a mitilid: “Kaolahan ako a salikaka, caay ko faelohay a limoˈot ko sasowalen ako a patilid i tamowanan. Oya kafanaˈan namo nai satapangan a mitoor a nai ti:yaayho a limoˈot ko sasowalen ako. O nano nitengilanto namo a sowal koya nai ti:yaayho hananay ako a limoˈot.” (1 Yohani 2:7, 8) Ora nisowalan ni Yohani a “nai ti:yaayho” a limoˈot hananay, o manan kora hani? Oyanan maolah to tao sanay a limoˈot. O ‘matelangay’ a limoˈot sa i, samanen ˈayaw no pina poloˈ a miheca pasowalayto ci Yis to Krisciyang, o “nai ti:yaayho” iraayto o sanay. Oniya limoˈot o “faelohay” hananay, samanen o tatahalifa ko nisawawaan to faelohay a sapalifet, pakayni to nika olah to salikaka, latek mamikinafalah to ˈorip ko niyah. Anini, likakawa no Kawas marariday parikec kitanan, papicoˈay to misatekeday a pinangan noni hekal, ho caka mafasaw ko olah ita to tao. Miakoˈiday kita to sapatalipaˈelal no likakawa no Kawas han?
(1 Yohani 5:16, 17) Ano maˈaraw no nima ko nika ciraraw no salikaka to caay ko sakapatay ningra a raraw i, pingitangit i Kawas to saki cingraan ta pafelien no Kawas cingra to ˈorip. O ciraraway to caay ko sakapatay a raraw ko nisowalan ako. Ira ko sakapatay a raraw. Nikawrira, pingitangit kamo to pakayniay toya raraw, caay ka saan kako. 17 O tatiihay a demak a maemin i, o raraw. Nikawrira, ira ko caay ko sakapatay a raraw.
it-1 862 fiedac 10 fatac
Misodod
Ngaˈayay mitolon to saki tao, anoca mitolon to saki polong a kasakopang mingitangit to sasodod no Kawas, o ngaˈayay demak koni. Ci Mosi na mitaypiyaway to Israil tamdaw mihayi to raraw i kaˈayaw ni Yihofa, mingitangit to pisodod to raraw no polong a finawlan, telocto i, mitengilan ni Yihofa. (Saˈosi 14:19, 20) O roma i, tiya patafang ci Solomon to fangcalay sefi i, patadoay to Israil a mingitangit to sidaˈit no Kawas. (1 Hongti 8:30, 33-40, 46-52) Ci Icra mitaypiyaway to minokayay i niyaroˈ a Yutaya tamdaw a mihayi to raraw; matengil no finawlan ko pitolon ningra masemeray ko falocoˈ, mitatoy to demak, mingitangit to sasodod ni Yihofa. (Icra 9:13–10:4, 10-19, 44) Palimoˈotay ci Yakop to ciadadaay i noˈadingoan a tamdaw, papisaali to malohemay malitengay, patado cangranan mitolon, ‘ano mararaway cingra, o mamasododto.’ (Yakop 5:14-16) Nikawrira, o “milokesay to [fangcalay saocor] i, “o sakapatay a raraw” kora, ato padeteng sanay a mararaw, caay ka kahi pasasiyor a tamdaw cowa ko mamasodod, mansa cowa ka ngaˈay patado ko Krisciyang mitolon to matiraay a tamdaw.—1 Yohani 5:16; Matay 12:31; Hipray 10:26, 27; nengnengen ko RARAW; ˈADINGO TIRENG, FANGCALAY SAOCOR.
Miˈosi to Sinael
(1 Yohani 1:1–2:6) Patilid kami i tamowanan to pakayniay i Sakaciˈorip a Sowal. Onini a Sakaciˈorip a Sowal hananay i, o iraayto iˈayaw no nika sangaˈ no hekal. Yo talahkal konini a Sakaciˈorip a Sowal i, matengilayto no niyam. 2 Maˈarawayto no mata no niyam. Manengnengayto no niyam. Nikapaanto no kamay niyam Cingra. Saka, pawacay kami a paratoh i tamowanan to pakayniay i midaˈocay a ˈorip. Onini a midaˈocay a ˈorip i, o nano mikapotay ci Wamaan. Tayni Cingra a pahapinang i tamiyanan. 3 O sakapiparatoh niyam i tamowanan to nano maˈaraway ato nano matengilay no niyam i, o sakalacecayaw ita. O nika lacecay ita hananay i, o nika lacecay ita ato Wama ato Wawa Ningra ci Yis Kristo. 4 O sakapipatilid niyam i tamowanan tonini i, o sakatataˈang no lipahak ita. 5 O likat ko Kawas. Awaay i Cingraan ko mamamamang aca a toˈman. O nano nitengilan niyam ci Kristoan konini. Saka, paratoh kami i tamowanan. 6 Malacecayay kako ato Kawas ano saan kita a somowal, nikawrira, ano i toˈmanay ko demak ita i, o misamangahay kita a pasowal to pakayniay i demak ita. 7 Nikawrira, ano matiya o nika i likat no Kawas ko nika i taengaday ko demak ita i, o malacecayay kita. Ta o remes no Wawa Ningra ci Yis ko mikoracay titaanan a mipalasawad to polong no raraw ita. 8 Awaay ko raraw ako ano saan kita a somowal i, o misamangahay kita to tireng. Awaay i falocoˈ ita ko sowal no Kawas. 9 Ano patalahkal kita to raraw no tireng i kaˈayaw no Kawas i, hepolen Ningra ko raraw ita a mikorac titaanan nai polong no tatiihay a demak. Nawhani o moecelay ko demak no Kawas. Doedoen Ningra ko nisowalan Ningra a milaheci. 10 Awaay ko raraw ako ano saan kita i, o pakomangahay kita to Kawas. Awaay i falocoˈ ita ko sowal no Kawas.
2 O sakapipatilid ako i tamowanan o wawa tonini i, o sakaecaaw ka ciraraw namo. Nikawrira, ano ciraraw ko cima namo i, ira ko papaˈading titaanan i kaˈayaw no Kawas, oya moecelay ko falocoˈ a tamdaw ci Yis Kristo. 2 Cingra ko sakahepol no raraw ita. Caay ko raraw ita a cecay, halo raraw no polong no tamdamdaw a hepolen Ningra. 3 Ano midoedo kita to limoˈot no Kawas i, itini a mahapinang ita ko nika fanaˈ ita to Kawas. 4 O mafanaˈay kako to Kawas ano saan ko tamdaw, ano caay pidoedo cingra to limoˈot no Kawas i, o misamangahay ko matiraay a tamdaw a somowal. Awaay i falocoˈ ningra ko sowal no Kawas. 5 Nikawrira, o midoedoay to sowal no Kawas a tamdaw i, soˈlinay masongilaˈ ko olah ningra to Kawas. Itini a mahapinang ita ko nika o malacecayay kita ato Kawas. 6 O malacecayay ato Kawas kako sanay a tamdaw i, o tatodongen ningra ko demak ni Yis Kristo.
SAKA 11 FOLAD 11-17 ROMIˈAD
O ODOˈ KO KIMAD NO KAWAS | 2 YOHANI 1 FEDENGAN–YUTA
“Samaan Kita Misaˈicel Milood a Paˈading to Kimad no Kawas”
(Yuta 3) Kaolahan ako a salikaka, nao misaharateratengay kako to sapatilidaw i tamowanan to pakayniay i nitinakoan ita a pipaˈorip no Kawas titaanan. Nikawrira, o papaˈadingen namo koya nipatorodanto no Kawas i finawlan Ningra a pitooran saan ko harateng ako imatini. Saka, o paˈicelay ko pipatilid ako i tamowanan to sapipaˈadingaw namo.
w04 9/15 11-12 fiedac 8-9 fatac
“Tiˈeren ko Tapang, Padotoc a Patanoktok to ˈIcel no Niyah”
8 Tona paliˈayawayto patalahkal ko Fangcalay Cudad to kananaman ni Satan a sapisaˈfit, cowa ka eca kafanaˈ kita to nisahalakaan ningra. (2 Korinto 2:11) Tiya miˈodis ci Akoma ci Yopuan i, kalasaka dademakan ko masakenakenaay a mariˈangay a pakayraan, mahawpay ko nika pipatay to polong a wawa ningra, palahdaw to hafay, ciadada ko tireng, maculi no paro no lomaˈ, mapakararaw ko pirikec no makaniway widang. Itiya ci Yopu i, tada matoleday ko falocoˈ a miharateng to miliyasanto no Kawas ko niyah. (Yopu 10:1, 2) Anini, ˈalomanay Krisciyang tahalifaay to malecaday a pasangar a misemsem ko falocoˈ. Soˈliˈlin cowa ka sahto saan o naitiniay ci Satanan ko pades ita, kawra mafanaˈay cingra mikifahfah a mitongal to pasangar ita.
9 Itini toni saikoray a ˈawaled, icowacowa iraay ko satalakal to noˈadingoan no mita. O hekal a tamdaw kinapatay sanay a micangacang to hafay, caka pikihar to noˈadingoan a demak. O maˈodangay a demak o pipowaran no hemek sanay ko ˈalomanay, ˈarawhan o pisatapangan no fangafang kora. O ˈalomanay tamdaw “o aikaka no nika olah nangra to Kawas ko nika olah nangra tono hekalan a lipahak.” (2 Timoti 3:1-5) O mahaenay a pinangan no hekal a tamdaw, alatek mamifiyor kitanan, mankora o ‘mamisaˈicel kita paˈading to pitooran ita’ wangaˈ.—Yuta 3.
Kadkaden ko Noˈadingoan Odoˈ
(Yuta 20, 21) Nikawrira, saˈicelen ko namo o kaolahan ako a salikaka a patanektek to fangcalay a pitiˈer namo to Kawas. Pakaynien i ˈicel no [fangcalay saocor] ko nipitolon namo. 21 Madipotay no olah no Kawas kamo. Saka, ˈimeren koya olah. Halamhamen a mitala ko pipafeli no adayayay a Tapang ita tamowanan to midaˈocay a ˈorip.
w08 12/15 29 fiedac 9 fatac
“Kalimlaan no 1-3 Yohani ato Yuta Cudad”
20, 21—Misamaan kita materek i olah no Kawas hani? Toloay kora hapakayraan: (1) Pakaynien malalok a micekiw to Fangcalay Cudad ato ˈifowa to mitosilay demak, hongaˈ “patanektek to fangcalay a pitiˈer”; (2) Tooren ko fangcalay saocor a mitolon, anca o waywayan mipalecad to sakayat no fangcalay saocor; (3) Paihkalen ko nika pakasoˈlin to sapatefoc ni Yis Kristo, ho ira ko midaˈocay a ˈorip.—Yohani 3:16, 36.
(Yuta 14, 15) O saka aenem a kadadoedo no teloc ni Atam ci Inok ko paliˈayaway a pasowal to pakayniay i cangraan. O sowal ningra i, “Nengnengen, o kakeriden no Tapang ko pinapi:na a ˈofad a fangcalay a coyoh Ningra a tayni 15 a misawkit to tamdamdaw a maemin. O papaseteken Ningra i raraw a maemin ko caay ka ngodo to Kawas a ciraraway a tamdaw to nika tatiih no demak nangra ato nika eca ka talaw nangra a pasowal to tatiihay a sowal a paculi i Kawas,” saan.
wp17.1 12 fiedac 1 fatac
“Ci Inok Milifokay to Hemek no Kawas”
Paliˈayaway somowal ci Inok to maanan a demak hani? Sanay cingra: “Nengnengen, o kakeriden [ni Yihofa] ko pinapi:na a ˈofad a fangcalay a coyoh Ningra a tayni a misawkit to tamdamdaw a maemin. O papaseteken Ningra i raraw a maemin ko caay ka ngodo to Kawas a ciraraway a tamdaw to nika tatiih no demak nangra ato nika eca ka talaw nangra a pasowal to tatiihay a sowal a paculi i Kawas.” (Yuta 14, 15) Sinanoten o sowal ni Inok “iraayto” ci Yihofa sanay, hato mafekadayto kora demak. O romaroma a ˈalomanay pairasolay mihaenay ko pakayraan a somowal, samanen itini pinengneng no pairasolay tamdaw, ora mipaliˈayawan nangra a demak mahecaday o mafekadayto, o mamalaˈosi ko sapairasol no Kawas!—Isaya 46:10.
wp17.1 12 fiedac 3 fatac
“Ci Inok Milifokay to Hemek no Kawas”
Maˈaraw ko matiniay a noka pakasoˈlin ni Inok, ngaˈayay licayen ita ko niyah: “Matiraay kako ci Inokan, tano pinengneng no Kawas a minengneng toniya hekal han?” Matira tora sapaliˈayaw ni Inok, soˈlinayto a palenlenen ni Yihofa ko hekal i lintad ni Nowa, mitekop toya cowa ka ngodo to Kawas a tamdaw, oniniya demak, paliˈayaway to aaira ko taˈangayay a noka laˈafo noni hekal ano ikor. (Matay 24:38, 39; 2 Pitiro 2:4-6) Anini, o Kawas ato coyoh Ningra misahalakaayto malingad, misawkit toni cowa ka ngodo to Kawas a hahekalan. Kita kahacecay tamdaw o tatengilen ita ko saparikec ni Inok halo pasowalen ko tamdaw toniya lihaf. Alatek o salawina anca widang ita cowa ka pilecad to saaroˈan ita, manaokaniw mamatoˈolen kita. Kawra pakifalocoˈen, cowa ka liyasen ni Yihofa ci Inok, ano aninito, cowa ko laliyasen Ningra ko madimadiay a sikawdan Ningra!
Miˈosi to Sinael
(2 Yohani 1-13) Patilid kako o [malohemay malitengay] i tisowanan o nipiliˈan no Kawas a fafahiyan ato wawa iso. Soˈlinay o kaolahan ako kamo. Caay ka ako a cecay, halo polong no mafanaˈay to sowal no Kawas a tamdaw a maolah i tamowanan. 2 O sakaolah niyam i tamowanan i, o nano tayal no sowal no Kawas i falocoˈ niyam. O mamidaˈoc a [mikapot] i titaanan konini a sowal no Kawas. 3 Nanay, palemeden, adayayen, parihadayen no Wama a Kawas ato Wawa Ningra ci Yis Kristo kita. Nanay, maˈorip i sowal ato i olah no Kawas kita. 4 Tadalipahak kako a mitengil to nika soˈlin no demak no romaroma a wawa iso a midoedo to nano limoˈot no Wama i titaanan. 5 Milongoc kako i tisowanan o tadamaanay a fafahiyan. Nanay, masasiolaolah kita. Caay ko nipipatilid ako i tisowanan to faelohay a limoˈot konini. Kafanaˈanto ita nai satapangan no pitoor ita a limoˈot konini. 6 O nipidoedo to limoˈot no Wama ko todong no nisowalan ako a olah. Kasasiolaolah kamo sanay ko todong no limoˈot hananay. Matiyaay o nitengilan namo nai satapangan no pitoor namo konini. 7 O sakasaan ako i, masadak a talacowacowa ko ˈalomanay a misaˈfitay a tamdaw. O malatamdaway ci Yis Kristo a tayni i hekal, caay ka saan ko sowal nangra. O misaˈfitay ko matiniay a tamdaw, o misaˈadaay ci Kristoan. 8 Pinaˈon kamo to sakaecaaw ka lasawad no nitayalan namo, ta maeminto a maala namo ko sapakaolah tamowanan. 9 O caay ka rahker to sifanaˈ ni Kristo a miliyasay to sowal no Kawas a tamdaw i, o mafukilay to Kawas. O marariday a maˈimer to sifanaˈ ni Kristo i, o mafanaˈay to Wama ato Wawa. 10 Orasaka, ano ira ko tayraay i tamowanan, ano caay ko sifanaˈ ni Kristo ko sapasifanaˈ ningra i, aka hamhamen cingra a pacomod i lomaˈ namo. Ngaˈayho, aka haenen a milicay. 11 Nawhani o mihaenay a milicay toya tamdaw i, o mikihatiyaay to tatiihay a demak ningra. 12 Adihayho ko sasowalen ako i tamowanan. Nikawrira, caay ka olah kako ao ingki ato tiplok ko sapasowal ako i tamowanan. O harateng ako i, tayra sa kako i tamowanan a milisoˈ a masasowasowal. Ta tataˈang ko lipahak ita sa kako. 13 Ngaˈayho saan i tisowanan ko wawa no nipiliˈan no Kawas a salikaka iso to fafahiyan.
SAKA 11 FOLAD 18-24 ROMIˈAD
O ODOˈ KO KIMAD NO KAWAS | PAˈARAWAN 1-3 FEDENGAN
“Mafanaˈay Kako to Maamaan Demak Iso”
(Paˈarawan 1:20) O tatodong no maˈaraway iso a nitatoyan no kawanan a kamay ako a pitoay a fuˈis atoya pitoay a tadaekim a padawdawan i, o coyoh no pitoay a saˈopo koya pitoay a fuˈis. O pitoay a saˈopo no mitooray koya pitoay a padawdawan. O pakakemoday a demak konini.
w12 10/15 14 fiedac 8 fatac
Paihkalay Kiso to Masamaanay a Pinangan?
8 Sowal no Fangcalay Cudad, ci Yis “nitatoyan no kawanan a kamay [ningra ko] pitoay a fuˈis” sanay, ano pakifalocoˈen ita koni o papadama kitanan a miliyas to pinangan no hekal. “Fuˈis” hananay i, mitaypiyaway to mapasimalay a kantok, kawra ngaˈayay mitoroˈ to polong a kantok no kasakopang kora. Ano matatodongay a haratengen ni Yis i, o tatano masakenakenaay a pakayraan a mikayat tora ikamayay ningra a “fuˈis”. (Paˈarawan 1:16, 20) Ano falicen ko somowal, o kakeridan no kasakopang no Krisciyang ci Yis, maˈimeray itini i kamay ningra ko kasakapot no malohemay malitengay maemin o sanay. Ci Yis i, “marengrengay a namal ko mata ningra,” mihaenay ano ira ko sasalofen a cima malohemay malitengay, o aitini i misaˈosian a toki ni Yis, tano niyahan pakayraan a misalof tora demak. (Paˈarawan 1:14) Mihaenay haw i, sasakaretengen ita ko minilnilan no fangcalay saocor a faˈinayan salikaka. Sowal sa ci Pawlo: “Tengilen, hakelongen ko sowal no mikeriday tamowanan a tamdaw. O marariday cangra a miharateng to sakangaˈay no [ˈorip] namo. Nawhani o papasowal cangra i Kawas to demak nangra. Ano hakelongen namo ko sowal nangra i, lipahak cangra a matayal. Ano caay haenen namo i, mararom cangra a matayal i tamowanan. Ano hatira i, awaay ko epoc namo.”—Hipray 13:17.
(Paˈarawan 2:1, 2) Haenen ko pipatilid to coyoh no i Ifisoay a saˈopo no mitooray. “O mitatoyay ko kawanan a kamay to pitoay a fuˈis. O romakatay i laˈed no pitoay a tadaekim a padawdawan kako. 2 Sowalen ako kiso, mafanaˈ kako to demak iso ato roray iso a matayal ato nika kodait iso. Mafanaˈ kako to nika caay pakahadidi kiso to tatiihay ko demak a tamdaw. Mafanaˈ kako to nipilifet iso to caay ko tarokos i, o tarokos kako sanay a tamdaw a mihapinang to nika o misamangahay cangra.
w12 4/15 29 fiedac 11 fatac
Paˈadingay ci Yihofa Kitanan, Paˈorip Kitanan
11 Itini i Paˈarawan saka 2 ato saka 3 fedengan a mapulusi, oya ciˈodingarayto a Kristo Yisan mikinsaay toya pito a kasakopang. Patalahkalay kora mapulusi, maˈaraway ni Kristo ko kalo pakayraan nora kasakopang, hanaca cipinangay to maamaan a demak nangra. Ano pasowal ci Kristo to cima a kasakopang i, panganganan cangra. Mankora mitooray to saali no kahacecay a kasakopang, pafeli to matatodongay a sapakahemek anca sapalimoˈot. Patalahkalay to maanan koni mapulusi hani? Oya pitoay kasakopang mitaypiyaway toya ikor no 1914 miheca a mapasimalay Krisciyang. Ora sapalimoˈot soˈliˈlin o mapasimalay a Krisciyang ko misowalan, kawra aniniay tamdaw no Kawas itini i paro no kakarayan a kasakopang o mamalifok ko epoc naitira. Mankora, tawlikay ci Yihofa pakayni ci Kristoan a mikayat to tamdaw Ningra. Wa misamaan kita milifok to epoc nai sakayat ni Yihofa hani?
w01 1/15 20 fiedac 20 fatac
Pahecaden ko Hawang to Likakawa ni Yihofa a Talaˈayaw
20 Ano pahecad to hawang to likakawa ni Yihofa talaˈayaw i, hayien ita to niocoran no Kawas ci Yis Kristo a malo ‘fongoh no kasakopang.’ (Ifiso 5:22, 23) Sinanoten ko sowal i Isaya 55:4: “O nano nipatirengan Ako (Yihofa) cingra a palakakeridan no kasakitakit.” Mafanaˈay ci Yis to sasamaan a mikerid. Mafanaˈay cingra to siri no niyah, mafanaˈay to waywayan nangra. Soˈlinay haw i, tiya mikinsa cingra to Aciyaay a pito kasakopang i, kina limaay pasowal to: “[Mafanaˈay] kako to demak iso,” sanay. (Paˈarawan 2:2, 19; 3:1, 8, 15) Matira to Wama ikakarayan, tangongolay ko nika fanaˈ ni Yis to saali no mita. Tiya misadak cingra to taˈarawan a satolon i, sanay ko sowal: “Iˈayaw no pilongoc namo i, mafanaˈayto ko Wama namo to kacangoˈotan namo.”—Matay 6:8-13.
Kadkaden ko Noˈadingoan Odoˈ
(Paˈarawan 1:7) Nengnengen, pakatoˈem cingra a tayni. O mamaˈaraw no tamdamdaw cingra. Halo micocokay a tamdaw a pakaˈaraw cingraan. O tatomangic ko polong no tamdaw no hekal to pakayniay cingraan. Nanay madoedo konini a sowal! Amin.
kr 226 fiedac 8 fatac
Papalaˈafo to ˈAda ko Hongti Kitakit no Kawas
8 Ya sapairasol ni Yis to pakayniay saikoray romiˈad patalahkalay, ˈayaw no aira ko Armakiton i, mamafekad ko pinapina taˈangayay a demak. Sowalen ita ko saˈayaw a tosa demak, matiliday i Matay, Marko ato Luka.—ˈOsien ko Matay 24:29-31; Marko 13:23-27; Luka 21:25-28.
kr 226 fiedac 10 fatac
Papalaˈafo to ˈAda ko Hongti Kitakit no Kawas
10 Milasil to sasawkit. Ikor i, polong a ˈada no Hongti Kitkait no Kawas o mamisiˈayaw cangra to cowa ko sakaˈarawaw nangra a demak, pakayni toni demak tada maketeray cangra. sowal sa ci Yis: “Itiya i, o mamaˈaraw no tamdamdaw ko nika o tadaciˈicelay, o ciˈdilay koya Tamdaw a pakatoˈem a tayni.” (Marko 13:26) Mihaenay ci Yis tano kasapaan a pakayraan a paihkal to ˈicel, patiriˈ to iraayto cingra, mamilasil to sasawkit. Milasil to maanan a sawkit hani? Itira tora sapairasol ningra, somowalay to lopayˈay a siri ato nolotok a siri a sapatinako, itiraay misongilaˈ a mitadtad cingra. (ˈOsien ko Matay 25:31-33, 46.) O madimadiay a midopo to Hongti Kitakit no Kawas a tamdaw sasawkiten malo ‘lopayˈay a siri’, o tatimolo cangra a mihalamham, tona mafanaˈay to mangataayto malidong ko ˈorip nangra. (Matay 21:28) Miculiay to Hongti Kitakit a tamdaw sasawkiten malo ‘nolotok a siri’, o “tatomangic” cangra, tona mafanaˈay to ‘mamidaˈoc a matekop’ cangra.—Matay 24:30; Paˈarawan 1:7.
(Paˈarawan 2:7) O pakatengilay ko tangila a tamdaw i, pitengil to pipasowal no [fangcalay saocor] i kalo saˈopo no mitooray! “O pakalowiday a tamdaw i, o hahaydaen Ako ko nika komaen nangra to heci no sakaciˈorip a kilang oya itiraay i palosayan no Kawas.”
w09 1/15 31 fiedac 1 fatac
Kalimlaan no Paˈarawan Cudad—Saka 1
2:7—Oya “palosayan no Kawas” hananay o manan kora? O mapasimalay Krisciyang ko nisowalan noni sinael, oiya kaitiraan ni Yihofa. Madimadiay a mapasimalay Krisciyang o mamilayap to sapalifon, ngaˈay a komaen to “heci no sakaciˈorip a kilang.” O mamilifok cangra to caay ko mamanahol a ˈorip.—1 Korinto 15:53.
Miˈosi to Sinael
(Paˈarawan 1:1-11) O nitilidan to pakayniay i nipaˈarawan ni Yis Kristo a demak konini. O nano nipahapinangan no Kawas i ci Kristoan konini to sapatiriˈ Ningra i ˈalomanay a matayalay Ningra to mangataayto a ira a demak. Saka, ocoren ni Kristo ko coyoh a papipakafanaˈ i matayalay Ningra ci Yohanian tonini a demak. 2 Saka, pasowal ci Yohani to polong no maˈaraway ningra a paratoh to nano sowal no Kawas ato nipahapinangan ni Yis Kristo cingraan. 3 O miasipay, o mitengilay tonini a nipaliˈayawan a sowal, o maˈimeray tonini a matiliday i, o malemeday. Nawhani mangatato ko kalahecian nonini a demak. 4 Kako ci Yohani ko patiliday i tamowanan o i Aciyaay a pitoay a saˈopo no mitooray. O iraay anini, o iraay naniti:ya aca, o aira iikor nonini ko Kawas. Iraay i kaˈayaw no kamaroˈan no Kawas ko papitoay a [saocor no Kawas]. 5 O soˈlinay a tatiˈeren a pawacayay, o saˈayaway a lomowad a maˈorip nai patay, o mikowanay to hongtingti no hekal ci Yis Kristo. Nanay, mapalemed, maparihaday ningra kamo. O maolahay titaanan ci Yis Kristo. Mapatay cingra to saki titaanan to sapitedal titaanan nai sapalit no raraw. 6 Mapalafinawlan ningra kita. O citodongay to taˈong han ningra kita a pakatayal to saki Wama ningra a Kawas. Nanay tahadaˈoc a mapahemek, ciˈicel ci Kristo! Amin. 7 Nengnengen, pakatoˈem cingra a tayni. O mamaˈaraw no tamdamdaw cingra. Halo micocokay a tamdaw a pakaˈaraw cingraan. O tatomangic ko polong no tamdaw no hekal to pakayniay cingraan. Nanay madoedo konini a sowal! Amin. 8 Pasowal ko iraay anini, o iraay naniti:ya aca, o aira iikor a Ciˈicelay a Tapang a Kawas, “O Alfa Kako, o Satapangan. O Omika Kako, o Paherekan,” saan. 9 O salikaka namo kako ci Yohani, o kapot namo a mihadidi to pades. O romasato, o kapot namo kako a mikowan. O mipatenakay kako to sowal no Kawas ato nipahapinangan ni Yis a sowal. Saka, mapatayni kako i Patmos hananay a kanatal. 10 Yo cecay a pitaˈongan to Tapang a romiˈad i, mapacekil no [fangcalay saocor] kako. Matengil ako i aikor ako ko matiyaay o soni no laepa a tataˈangay a ngihaˈ. 11 Sowal sa, “Tiliden i cudad ko maˈaraway iso. Patayraen ko nitilidan iso a cudad i pitoay a saˈopo no mitooray, oya itiraay i Ifiso, i Smirna, i Pirkamum, i Tiyatira, i Sartis, i Filatilfia ato i Laotikiyaay a saˈopo,” saan.
SAKA 11 FOLAD 25 –12 FOLAD 1 ROMIˈAD
O ODOˈ KO KIMAD NO KAWAS | PAˈARAWAN 4-6 FEDENGAN
“Oyanan Sasepat Midakaway to Efa”
(Paˈarawan 6:2) Nengneng sa kako i, ira ko cecay a kohcalay a efa. Mitatoy to panaˈ ko midakaway toya efa. Mapatamohong cingra. O pakalowiday cingra saka, o mamilowilowid aca ko nika lomowad ningra.
wp17.3 4 fiedac 3 fatac
Oya Sasepat Midakaway to Efa—Cima Cangra?
Cima koya midakaway to kohcalay a efa hani? Paˈarawan 19:11-13, “O Sowal no Kawas” hananay cingra, ci Yis Kristo ko mitoroˈan, o mitaypiyaway to Kawas cingra. (Yohani 1:1, 14) Pakayni toniniya midakaway to kohcalay efa, o “Hongti no hongtingti, o Tapang no tapatapang” cingra sanay, o ‘Madimadiay ato Soˈlinay’ hananay no Fangcalay Cudad cingra. (Paˈarawan 19:11, 16) Paihkalay koni to mamicada cingra to fadangalan no hongti, milood a milowid; hanaca paihkalay to cowa ko mikasimaan to fadangalan, midokaˈ to tamdaw. Dotoc i, pacaˈofen ita ko pina a salicay.
wp17.3 4 fiedac 5 fatac
Oya Sasepat Midakaway to Efa—Cima Cangra?
Orira sasepat midakaway ihacowaay a comikay hani? Sinanoten, oya saka cecay midakaway a Yisan itiniay tiya tahacada to tamohong no hongti a misatapang a milood cingra. (Paˈarawan 6:2) Ihacowaay a micada ci Yis to tamohong no hongti, mala hongti i kakarayan hani? O sowal no Fangcalay Cudad, lomowad nai patay tala kakarayan ci Yis i, cowa ka tangsol saan a mala hongti, ao mitalaayho cingra. (Hipray 10:12, 13) Pasowalan ni Yis ko nisawawaan, mahererek ko pitala ningra, misatapang a mala hongti i kakarayan i, o mamafekad ko maanan a demak. Itiya o mamasikelol ko pakayraan no hekal, malaloolood ko tamdaw, makedal ato malifong icowacowa. (Matay 24:3, 7; Luka 21:10, 11) Mahapinangay ita, isaka 1914 miheca satapang saho ko Saka Cecay Lalood no Hekal i, misatapangayto koya nisowalan ni Yis a lintad, o ‘saikoray ˈawaled’ hananay no Fangcalay Cudad koni adihayay ko pades a lintad.—2 Timoti 3:1-5.
(Paˈarawan 6:4-6) Itiya i, ira a masadak ko cecay a kahngangay a efa. Mapatorod ko midakaway toya efa to ˈicel a mipalowad to sakalaloolood no tamdaw itini i hekal. Ta masasipatapatay ko tamdaw. Mapafeli cingra to tataˈangay a funus. 5 Yo midohkit ko Tofor a Siri to saka tolo a nitopaan i, matengil ako ko sowal noya saka tatolo a maˈoripay. “Katayni!” saan cingra. Nengneng sa kako i, ira ko cecay a kohtingay a efa. Mitatoy to satingting ko midakaway toya efa. 6 Matengil ako ko ngihaˈ. Matiya o nanitiraay toya sasepatay a maˈoripay koya ngihaˈ. Sowal sa, “O ˈaca no cecay a kongsen no tadaemi i, o lifon to naromiˈadan no cecay a tamdaw. O ˈaca no tolo a kongsen no kalo emi i, o lifon to naromiˈadan no cecay a tamdaw. Aka pisakasak to olif a kilang ato fadisosoˈ a kilang,” saan.
wp17.3 5 fiedac 2 fatac
Oya Sasepat Midakaway to Efa —Cima Cangra?
Oya midakaway to kahngangay efa mitaypiyaway to lalood. O mamiˈafas to rihaday no polong a hekal, ao cowa ko pinapina aca a kitakit sanay. Isaka 1914 miheca, mafekaday ko saka cecay sataˈangayay a lalood no polong no cikiw. Ikor i, o Saka Tosa a Lalood no Hekal, tada ˈalomanay ko mapatayay. Naitini saka 1914 miheca, o mapatayay a tamdaw mataˈlifay ko 1 walwalan, o madokaˈay aca tamdaw cowa ka masaˈosi.
wp17.3 5 fiedac 4-5 fatac
Oya Sasepat Midakaway to Efa —Cima Cangra?
“Nengneng sa kako i, ira ko cecay a kohetingay a efa. Mitatoy to satingting ko midakaway toya efa. Matengil ako ko . . . nanitiraay toya sasepatay a maˈoripay koya ngihaˈ. Sowal sa, ‘O ˈaca no cecay a kongsen no tadaemi i, o lifon to naromiˈadan no cecay a tamdaw. O ˈaca no tolo a kongsen no kalo emi i, o lifon to naromiˈadan no cecay a tamdaw. Aka pisakasak to olif a kilang ato fadisosoˈ a kilang,’ saan.”—Paˈarawan 6:5, 6.
Oya kohtingay a midakaway mitaypiyaway to kedal. Sanay patalahkal ko sinael: Tada pakidemay ko nika cangoˈot no kakaenen, haykiw hananay. Isaka cecay hahekalan, o lifon to naromiˈadan no cecay tamdaw i, cecayay a linkim, orira miming a payci cecay aca a kongsen ko macakayay a tadaemi. (Matay 20:2) Sasamanan a paliliˈ to paro no lomaˈ koni hani? Mankora saan ko sinael: Aka pisaloyaˈ to kakaenen, aka pisakasak to simal ato epah satomaan ko sowal.
(Paˈarawan 6:8) Nengneng sa kako i, ira ko cecay a ariyahay a efa. O ngangan no midakaway i, ci Patay saan. Mitoor i aikor ningra ci Hatis. Mapafeli cangra to sakacitodong a mipatay to tamdaw no cecay no kalisepat no hekal. O kalalood, o kedal, o adada ato ˈaˈadopen ko sapipatay nangra.
wp17.3 5 fiedac 8-10 fatac
Oya Sasepat Midakaway to Efa—Cima Cangra?
Oya saka sepat a midakaway mitaypiyaway to lifong ato romaroma sakapatay a lalangian. Ikor no saka 1914 miheca, tangsolay mafekad ko lifong no Sipanya, pinaay patek a ˈofad ko mapatayay tamdaw. Ano hikingen tatolo a tamdaw cecayay ko mapatayay, komoden a misaˈosi i, tangasaay 5 a walwalan ko mapatayay.
ˈArawhan i, o satapangan aca kora lifong no Sipanya. Itini saka 20 hahekalan, mataˈlifay ko 3 a walwalan a tamdaw to mapatayay no Tian-Hua adada. Misaˈicelay ko ising, kawra tahanini i, pinapinaay patek a ˈofad ko mapatayay no haykikak, malaria ato aicepin.
Ano o lalood, kedal anca lifong, mahecaday ko teloc, o patay. Polong a macapiday a tamdaw tayniay i “tadem” cangra, awaay ko maamaan a hatokel nangra.
Kadkaden ko Noˈadingoan Odoˈ
(Paˈarawan 4:4) Ira i taliyok noya tadamaanay a ˈanengang ko tosa a poloˈ ira ko sepat a ˈanengang. Ira a maroˈ itira ko cirikoˈay to kohcalay, cikafongay to tadaekim a tamohong a tosa a poloˈ ira ko sepat a [malohemay malitengay].
(Paˈarawan 4:6) O romasato, ira i kaˈayaw noya tadamaanay a ˈanengang ko matiyaay o nika rayas no riyar a tingalaway a dadingoan. Ira i taliyok noya tadamaanay a ˈanengang ko maledefay no mata ko kaˈayaw ato aikor a sasepatay a maˈoripay.
re 76-77 fiedac 8 fatac
Maˈdilay ko Tadamaanay Kamaroˈan ni Yihofa i Kakarayan
8 Mafanaˈay ci Yohani, o saysi hananay itiniay i fangcalay taloˈan a matayal. Mansa, tiya maˈaraw ningra kora ilaenoay i, fahkaˈan nanay cingra: “Ira i taliyok noya tadamaanay a ˈanengang ko tosa a poloˈ ira ko sepat a ˈanengang. Ira a maroˈ itira ko cirikoˈay to kohcalay, cikafongay to tadaekim a tamohong a tosa a poloˈ ira ko sepat a [malohemay malitengay].” (Paˈarawan 4:4) Awaay maˈaraw ni Yohani ko saysi itira, ao 24 a malohemay malitengay maroˈay i tadamaanay kamaroˈan, mato hongti a citamohong. O cima kora malohemay malitengay hani? Oyanan mapasimalay a kasakopang no Krisciyang, patikolayto maˈorip cangra nohatini, matiya mikiˈokan ni Yihofa a tayra i kakarayan cangra. Hano mafanaˈ kita hani?
re 80 fiedac 19 fatac
Maˈdilay ko Tadamaanay Kamaroˈan ni Yihofa i Kakarayan
19 Orira maˈoripay mitaypiyaway to manan hani? Nengnengen ita ko mapulusi ni Icikil, mamahela ko caˈof. Maˈaraway ni Icikil ko ikakarayanay a sapilood paliding ni Yihofa, maroˈay Cingra itira, italiyok no sapilood a paliding iraay ko papina maˈoripay, o tatirengan nora maˈoripay malecaday toya maˈaraway ni Yohani. (Icikil 1:5-11, 22-28) Ikor, maˈaraway haca ni Icikil ko papina maˈoripay, kawra o “kirupim” hananay ningra. (Icikil 10:9-15) Oya maˈaraway ni Yohani a sasepat maˈoripay, mitaypiyaway to ˈalomanay a ilaenoay no Kawas a kirupim. Itini ikakarayanay a likakawa no Kawas—o coyoh ko palaˈosiay, ˈakawangay ko saaroˈan nangra. Ora maˈaraway ni Yohani a kirupim a coyoh tada miingiday ci Yihofaan a tomireng, cowa ka fahkaˈen cingra toninian, samanen i nolitengan a fangcalay taloˈan, i kafekang no satahaf no katatelekan lipa iraay ko tosa tadaekim a faco no kirupim, ora satahaf no katatelekan a lipa mitaypiwayay to tadamaanay a kamaroˈan ni Yihofa. Mankora ano palimoˈot ci Yihofa to Israil kitakit i, naitiniay i kalalaˈed noya tosa kirupim a pahadak to ngihaˈ ci Yihofa.—Kasadakan 25:22; ˈOlic 80:1.
(Paˈarawan 5:5) Itiya i, pasowal sa i takowanan ko cecay noya [malohemay malitengay], “Akato ka tomangic. Nengnengen, pakalowidayto ko Layong hananay a Yuta a ngasaw o teloc ni Tafiti. Saka, maedeng cingra a midohkit toya nipacipatan to pitoay a satopa a micelak toya maloloday a cudad,” saan.
cf 36 fiedac 5-6 fatac
“Nengnengen! O Layong no Yuta a Ngasaw”
5 O layong hananay marariday mitaypiyaw to timolo. Na tomirengay kiso i kaˈayaw no lomahadayto a layong a pamotek a minengneng han? Ano mihaenay kiso, maedeng o miˈadipelan a mirofo cingra, cowa ka talaw kiso to mamisamaan tisowanan. Ano hatiratiraay i, makokiˈen ko falocoˈ iso alatek. Samoteken iso minengneng koni ˈaˈadopen, misamotek cingra a minengneng tisowanan, o manan ko papakokiˈ toniya layong wa saan miharateng kiso itiya alatek. O sowal no Fangcalay Cudad, o layong hananay i, “o sakiemelay i polong no ˈaˈadopen, o awaay ko katalawan” ningra sanay. (Taneng 30:30) Ci Kristo matiraay tora kiemelay a layong.
6 Nohatini sowalen ita, ci Yis misamaanay matira ora layong paihkal to timolo i tolo pakayraan: Itini i pidama to kimad, micowat to moecelay, caka talaw to saconged. Mamaˈaraw ita, ano o timoloay a tamdaw kita ha, anca cowa, o ngangaˈay kita mitodong ci Yisan, paihkal to timolo.
Miˈosi to Sinael
(Paˈarawan 4:1-11) Nanoya, maˈaraw ako i mapulusi ko mafawahay a fawahan i kakarayan. Itiya i, pasowal i takowanan ko nano matengilay ako iˈayaw a matiyaay o soni no laepa a ngihaˈ. Sowal sa, “Katayni a macakat. Ta patiriˈen Ako kiso to aira a demak iikor nonini,” saan. 2 Tangsol a makerid no [fangcalay saocor] kako. Saka, maˈaraw ako i kakarayan ko cecay a tadamaanay a ˈanengang ato maroˈay itira. 3 Matiya o tingalaway a [maliemiay] a odoˈ ato kahngangay a [maliemiay] a fokloh ko tedi no pising noya maroˈay itira. Ira i taliyok noya tadamaanay a ˈanengang ko talakal ni Idek. Matiya o kangdaway a [maliemiay] a fokloh ko nika tedi noya talakal ni Idek. 4 Ira i taliyok noya tadamaanay a ˈanengang ko tosa a poloˈ ira ko sepat a ˈanengang. Ira a maroˈ itira ko cirikoˈay to kohcalay, cikafongay to tadaekim a tamohong a tosa a poloˈ ira ko sepat a ciwlo [malohemay malitengay]. 5 Ira a masadak nai tadamaanay a ˈanengang ko kalapiyat ato harengheng ato kakeleng. Ira i kaˈayaw noya tadamaanay a ˈanengang ko pitoay a malikatay a namal. O todong no tireng no Kawas a pitoay a [saocor no Kawas] konini. 6 O romasato, ira i kaˈayaw noya tadamaanay a ˈanengang ko matiyaay o nika rayas no riyar a tingalaway a dadingoan. Ira i taliyok noya tadamaanay a ˈanengang ko maledefay no mata ko kaˈayaw ato aikor a sasepatay a maˈoripay. 7 O saka cecay noya maˈoripay i, matiya o layong ko tireng ningra. O saka tatosa noya maˈoripay i, matiya o okangan a kolong. O saka tatolo noya maˈoripay i, matiya o pising no tamdaw ko pising ningra. O saka sasepat noya maˈoripay i, matiya o maeferay a lidep. 8 Alaenem to sapikpik konini a sasepatay a maˈoripay. Maledef no mata ko lalomaˈ ato paputal no sapikpik nangra. Rarid sa cangra to romiˈad to dadaya a paˈolic a romadiw, “Fangcalay, fangcalay, fangcalay ko Ciˈicelay a [Kawas ci Yihofa]. O iraay naniti:ya aca, o iraay anini, o aira iikor nonini Cingra,” saan. 9 Yo mihaen a mipahemek a mikansiya koya sasepatay a maˈoripay a mipacakat to ngangan noya maroˈay i tadamaanay a ˈanengang a midaˈocay a maˈorip a Kawas i, 10 hinokop sa i kaˈayaw noya maroˈay i tadamaanay a ˈanengang koya tosa a poloˈ ira ko sepat a [malohemay malitengay] a mitaˈong Cingraan o midaˈocay ko ˈorip a Kawas. Helongen nangra i kaˈayaw noya tadamaanay a ˈanengang ko tamohong nangra a somowal, 11 “Tapangaw, Kawasaw niyam, matatodongay Kiso a mapahemek a mapacakat ko ngangan a mapafeli to ˈicel. Nawhani o misangaˈay Kiso to maamaan. O nafalocoˈan Iso ko sakasangaˈ nonini ato sakaira nonini a maemin,” saan.