Pinengnengan to Lalakaw no Mitosilay ato Nikaˈorip Rayray no Saˈopo
SAKA 10 FOLAD 7-13 ROMIˈAD
O ODOˈ KO KIMAD NO KAWAS | YAKOP 3-5 FEDENGAN
“O Sasowalan ato Waywayan Paihkal to Taneng no Kawas”
(Yakop 3:17) Nikawrira, o fangcalay ko pinangan no naikakarayanay a taneng. O romasato, o parihadayay, o damsayay, o halipaˈayaway [mafanaˈay pacaˈi], o karasiniˈadaay, o ngaˈayay ko demak, o caay pisakakinih, o caay pisamangah ko citanengay to matiniay.
cl 221-222 fiedac 9-10 fatac
“Taneng no Kawas” Kalasaka Dademakan Iso i Nokaˈorip Han?
9 ‘Salakatay o makoracay.’ Tatodong no makoracay hananay i, o waywayan ato kemod no falocoˈ makoracay ko harateng. Itini i Fangcalay Cudad palecadan ko taneng ato falocoˈ a pasowal. Ano matomes ko kaacekan harateng i falocoˈ no tamdaw i, caay ka picomod ko taneng no Kawas itira tora tamdaw. (Taneng 2:10; Matay 15:19, 20) Soˈlin cowa ko malefotay tamdaw kita, deng ano mikiemel a mitafo ko falocoˈ to makoracay, o “mamaliyas ko tatiihay.” (ˈOlic 37:27; Taneng 3:7) Mankora, ta misilsil ko Fangcalay Cudad to kahacecay a capeling i, salakatay o makoracay ko nisowalan. Soˈlinay haw i, ano caka korac kita i waywayan ato noˈadingoan, wa misamaan a paihkal to romaroma a capeling to naitiniay i Kawas a taneng hani?
10 ‘Saka tosa o parihadayay.’ O naitiraay i Kawas a taneng i, parihadayay to tamdaw, micangacang to dipayalay, nawhani, o cecay a heci no fangcalay saocor koni. (Kalatiya 5:22) O rihaday hananay, mikedecay to kalalaˈed no tamdaw ni Yihofa, mihaenay aka repaten ko hatiniay a rihaday. (Ifiso 4:3) Ano malacongis ko Krisciyang i, saˈicelen a malaliˈay a makakangaˈay. Mihaen to demak tada masaka limlaan, misamaanay hani? Sanay ko sowal no Fangcalay Cudad: “Kalacecay ko falocoˈ namo. Kararihaday kamo. Ta mikapot i tamowanan ko ciolahay ato parihadayay a Kawas.” (2 Korinto 13:11) Ano mararihaday kita ato tamdaw i, o mamikapot ko Kawas i kitaanan. Hayi, ano samaanay ko picada ita to romaroma Krisciyang, o mamifiyor to nika lalaˈed ita aci Yihofa. Wa misamaan kita pararihaday hani? Haratengen kora ilaenoay tinakoan.
(Yakop 3:17) Nikawrira, o fangcalay ko pinangan no naikakarayanay a taneng. O romasato, o parihadayay, o damsayay, o halipaˈayaway, o karasiniˈadaay, o ngaˈayay ko dmak, o caay pisakakinih, o caay pisamangah ko citanengay to matiniay.
cl 223 fiedac 12 fatac
“Taneng no Kawas” Kalasaka Dademakan Iso i Nokaˈorip Han?
12 ‘Mafanaˈay pacaˈi.’ O manan ko tatodong noni hani? Mikingkiway to Fangcalay Cudad tamdaw pakayni to Yakop 3:17, ora ‘mafanaˈay pacaˈi’ hananay a Krisiya sowal, tada pasangaray hongyaken sanay. O romaroma mihongyakay “damsayay”, “lopayˈay”, “misapoeneray”, hananay nangra a mihongyak, ˈarawhan tatodong noni “mafanaˈay pacaˈi” o sanay. Sasamaanen ita paihkal koni nai Kawasay a capeling hani?
cl 224-225 fiedac 14-15 fatac
“Taneng no Kawas” Kalasaka Dademakan Iso i Nokaˈorip Han?
14 “Makahiyay a midofdof.” “Makahiyay a midofdof “sanay a Krisiya tilid edengan itini i Yakop 3:17 a masadak. O cecay mikakingkiway, o “itiniay nosofitay a sowal” koni sanay, o “madololay a marikec” ato “midofdofay” sanay ko tatodong. O tamdaw ano midoedoay to nai Kawasay a taneng a dademak i, o mamakahi midofdof to sapalimoˈot no Fangcalay Cudad. Cingra i, cowa ka pisilikor to demak, cowa ka koesit tono niyah a harateng, wa saan ko mafanaˈay i cingranan a tamdaw; ano mahapinangay ningra to mararaway cingra, wa kakaliki a misalof cingra pahecad to Fangcalay Cudad. O mahaenay tamdaw kiso han?
“O Karasiniˈadaay, O Ngaˈayay ko Demak”
15 “O karasiniˈadaay, o ngaˈayay ko demak.” Sowal no Fangcalay Cudad o nai Kawasay a taneng “o karasiniˈadaay” sanay. Mihaenay haw i, o kalimlaan a capeling to nai Kawasay a taneng ko karasiniˈadaay. Itira tora sinael pahecadan a somowal ko “karasiniˈadaay” ato “o ngaˈayay ko demak”. Matatodongay koni, samanen kinapinapinaay ko Fangcalay Cudad patalahkal, o karasiniˈadaay tamdaw talaˈayaway a mikihar to tao, siniˈada to nika roray no tamdaw. O cecay taˈarawan cudad somowal to tatodong nora “siniˈadaay” i, “masomaday to nika roray no tao, halo misaˈicelay sapisayaraw tora pasangar” sanay. Mihaenay haw i, o naitiniay i Kawas a taneng, cowa ka lietec ko falocoˈ, ao dihekoay, cowa ko kafanaˈ aca no ponoˈ. O paihkalay to matiniay taneng a tamdaw karasiniˈadaay, soˈlinay ko falocoˈ, halo minengnengay to kangaˈayan no tao. Wa misamaan kita paihkal to karasiniˈadaay ko niyah hani?
(Yakop 3:17) Nikawrira, o fangcalay ko pinangan no naikakarayanay a taneng. O romasato, o parihadayay, o damsayay, o halipaˈayaway, o karasiniˈadaay, o ngaˈayay ko dmak, o caay pisakakinih, o caay pisamangah ko citanengay to matiniay.
cl 226-227 fiedac 18-19 fatac
“Taneng no Kawas” Kalasaka Dademakan Iso i Nokaˈorip Han?
18 “Caay pisakakinih.” O naitiniay i Kawas a taneng pakalowiday to misakakinihay falocoˈ ita. Micadaay cangra to sakayat no taneng, misalof to misakakinihay a pinangan. (Yakop 2:9) Ano ono cihafayay ko tamdaw ha, o ˈakawangay ko picudadan ha, o ciˈinorongay i kasakopang ha, cowa ko sakakinihen ita a maolah cangra. Romaroma Krisciyang ano tadancaay ko lalengawan, cowa ko lalikafen ita cangra. Hay ano mikaolahan ni Yihofa kora hato tadancaay a Krisciyang i, mana eca to kakaolahen ita cangra saw.
19 “Caay pisamangah.” Ora misamangahay hananay a Krisiya tilid mitoroˈan o misahayoay o sanay. Nolitengan a Krisiya ato Loma, o misahayoay tamdaw mitahpoay to pising cangra. Mihaenay, ikor a sowal no Krisiya, o misamangahay hananay matoya mitahpoay to pising a tamdaw cangra. O naitiraay i Kawas a taneng, ano o cowa ka pimangah, oha sasinanoten ita ko niyah to samaanay micada to roma Krisciyang, hanaca sasinanoten ita samaanay ko harateng i kemod no falocoˈ ita to roma Krisciyang.
Kadkaden ko Noˈadingoan Odoˈ
(Yakop 4:5) O sowal a matilid i Fangcalay Cudad i, “Oya nipaaroˈan no Kawas i falocoˈ ita a [fangcalay saocor] i, wata: ko nika limla Ningra titaanan saka, maˈinap cingra,” saan. Awaay ko epoc tonini a sowal sa kamo saw?
w08 11/15 20 fiedac 6 fatac
Kalimlaan no Yakop ato Pitiro a Cudad
4:5—O manan a sinael ko nisowalan ni Yakop hani? Cowa piala ci Yakop to maanan a sinael. Kawra, oniya mipatemeran no Kawas a sowal, o misalalangiay to kalimlaan no pina a sinael alatek, patinakoen, itini i Satapangan 6:5; 8:21; Taneng 21:10 ato Kalatiya 5:17.
(Yakop 4:11, 12) Salikakaaw, aka ka lalikalikaf kamo. O milikafay, o misatatiihay to mitooray ci Kristoan a salikaka i, o milikafay, o miepecay to Rikec. Ano miepec kiso to Rikec i, caayto ko midoedoay kiso to Rikec. O misawkitay kiso to Rikec. 12 O Kawas a cecay ko patirengay to rikec ato misawkitay to tamdaw. Cingra a cecay ko pakapaˈoripay ato pakatekopay to tamdaw. Ano hatira i, o maan kiso iro misatatiih kiso to tao a mipastek i raraw saw?
w97 11/15 20 fiedac 8 fatac
Pasoˈlinay Falocoˈ Padamaay Kitanan Mihadidi, Mitolon
8 Ano milikaf kita to salikaka i, o mararaway kora. (Yakop 4:11, 12) ˈArawhan, o romaroma tamdaw hinalikafay to salikaka, alatek cangra pakinaliay miharateng to moecelay ko niyah, anca misalaenoay to tao a misatakaraw to niyahan. (ˈOlic 50:20; Taneng 3:29) O “milikafay” hananay a Krisiya sowal o misaˈadaay sanay ko tatodong, o pakinaliay kora sowal anca awaay ko lalangian a mihaen a mirikec cangranan o sanay. Mahecaday to misawkitay to mararaway ko salikaka. Mihaen to demak hano mahecaday to “miepecay ato misawkitay to rikec no Kawas” han hani? Nolitengan a mitatiliday to Fangcalay Cudad ato Farisay tamdaw “mifalahay to limoˈot no Kawas”, mipatireng to palinian no niyah a misawkit to tao. (Marko 7:1-13) Ano cowa ka rikecen no Kawas ko cima salikaka, kiˈayaw sa kita mirikec cangranan i, coko malecaday to “misawkitay to rikec no Kawas”, cangoˈotay ko rikec no Kawas hato sanay han? Ano awaay ko lalangian padeteng saan mirikec to salikaka i, cowa ito pidoedo kita to rikec no olah.—Loma 13:8-10.
Miˈosi to Sinael
(Yakop 3:1-18) Salikakaaw ako, aka ka ˈaloman kamo a malasingsi. Nawhani mafanaˈ kita to nika caay ka kahmaw ko piliclic titaanan o malasingsiay. 2 Soˈlinay adihay ko patlac no mita a maemin. O caay ka patlac ko sowal a tamdaw i, o masongilaˈay a tamdaw, o pakaˈmetay to tireng ningra a maemin. 3 Papitooren ako to falocoˈ ako ko efa ano saan kita i, pakadangen ita ko ngoyos nira. Ta maedeng kita a misasiwasiwar to tireng nira. 4 Haratengen ko lonan. Wata: ko nika tataˈang no tireng nira. Ano macekerokeroh no tataˈangay a fali i, maedeng a masiwar no mamangay a sawihawih a papihakelong to falocoˈ no miwihawihay a tamdaw. 5 Malecad tonini ko sema. Talacowa miming cinira i, tataˈang ko demak nira. Haratengen ko namal. Talacowa miming cinira i, mailoh nira ko tataˈangay a kilakilangan. 6 Malecad to namal ko sema, o kasadakan no tatiihay a demak. O cecay no itirengay ita cinira. Nikawrira, paˈoningen nira ko tireng ita a maemin. O namal no [Hinnom] ko milikatay ciniraan. O miilohay cingra to ˈorip ita a maemin. 7 Ano masamaamaanayto a ˈaˈadopen ato ˈayam ato manafoyay i sera ato maˈoripay i riyar i, mafilo no tamdaw a papinanam. Soˈlinay, mapananamayto no tamdaw konini a maemin. 8 Nikawrira, awaay ko pakafiloay a tamdaw a papinanam to sema. Nawhani caay ko mamafoˈot a tatiihay cinira. Matomes no mipatayay to tamdaw a sawarak cinira. 9 O sema ko sapiahowid ita to Tapang a Wama ita i kakarayan. O romasato, o sema ita ko sapiˈkak ita to niparingian no Kawas to tireng Ningra a misangaˈ a tamdaw. 10 Oyananto a ngoyos ita ko sapiahowid ato sapiˈkak ita. Salikakaaw ako, caay ka ngaˈay a matira ko demak ita. 11 Caay ka sadak ko koesanay a nanom ato ˈangreray a nanom toyanan a nemnem. 12 Salikakaaw ako, caay ko caciheci ko sokon a kilang to heci no olif. O romasato, caay ko caciheci ko fadisosoˈ to heci no sokon. Malecad tonini, caay ko mamasadak ko koesanay a nanom i kaheciday a nemnem. 13 Ira i tamowanan ko citanengay ato mafanaˈay a tamdaw haw? Ano ira i, o pipatiriˈ ningra tonini i ngaˈayay a demak pakayni i nika damsay no falocoˈ ningra ato nika citaneng ningra ko ngaˈay. 14 Ano ciˈinap, ciˈintel, misateked kamo i, aka ka lataˈang kamo to nika citaneng namo. Ano haenen namo i, o misamangahay, o mipaculiay kamo to sowal no Kawas. 15 Caay ko naikakarayanay ko hatiraay a taneng. Ono hekalan, ono tamdawan, ono palafoay korira. 16 Nawhani ano ira ko maˈinapay ato misatekeday a falocoˈ i, ira ko rawraw ato masamaamaanay a tatiihay a demak. 17 Nikawrira, o fangcalay ko pinangan no naikakarayanay a taneng. O romasato, o parihadayay, o damsayay, o halipaˈayaway, o karasiniˈadaay, o ngaˈayay ko demak, o caay pisakakinih, o caay pisamangah ko citanengay to matiniay. 18 O moecelay a demak ko heci no demak no pararihadayay a tamdaw.
SAKA 10 FOLAD 14-20 ROMIˈAD
O ODOˈ KO KIMAD NO KAWAS | 1 PITIRO 1-2 FEDENGAN
“Kao Fangcalay Kamo”
(1 Pitiro 1:14, 15) Kao mitengilay to sowal kamo. Akato pihakelong to masamaamaanay a ˈanof namo a matiya o demak namo yo mafokilho kamo to Kawas. 15 Kamatiya o nika fangcal no mitahidangay tamowanan a Kawas ko nika fangcal namo i polong no demak namo.
w17.02 9 fiedac 5 fatac
O Sapatefoc—Malefotay a Sapatelong Nai Wamaay
5 Wa samaan kita patalahkal to maolahay to ngangan ni Yihofa hani? Doedoen ko saali ni Yihofa, makorac itini i kihcod a waywayan. (ˈOsien ko 1 Pitiro 1:15, 16.) Edeng ci Yihofa ko sasarocoden ita a midoko. Soˈlito maroero kita, kamayan misaˈicel a midoedo to moecelay palinian no Kawas a maˈorp. O waywayan ita ano matoor ko moecelay palinian no Kawas i, o papaˈdil to ngangan ni Yihofa. (Matay 5:14-16) Dofdofen ita ko limoˈot no Kawas a malo makoracay tamdaw i, o paihkalay ko niyah to mihayay to ciepocay to tamdaw ko patirengan ni Yihofa a palinian, halo misawacay to patelacay ko pipakokot ni Satan. Soˈliˈlin mamararaw ko tamdaw, kawra ano misasoˈlinay a pasasiyor kita i, cowa ito ko mamidemak to pakangodoay ci Yihofaan a demak.—ˈOlic 79:9.
(1 Pitiro 1:16) Nawhani o sowal a matilid i Fangcalay Cudad i, “O fangcalay Kako. Saka, kao fangcalay kamo,” saan.
lvs 77 fiedac 6 fatac
Samaan a Mipiliˈ to Lawla Ita
6 Pasowalay ci Yihofa kitanan: “O fangcalay Kako. Saka, kao fangcalay kamo.” (1 Pitiro 1:14-16; 2 Pitiro 3:11) Edeng ano fangcal kita, anca makorc kita i, ngaˈ micada ci Yihofa to pidoko ita. (Limoˈot 15:21) Ano midemak kita to kaˈintehan ni Yihofa, mahaenay o maˈodangay, mikariˈangay ato milingatay ci Akomaan a demak i, cowa ko mamakorac ko pidoko ita to Kawas. (Loma 6:12-14; 8:13) Hanaca ano sakalawla han ita ko matiniay demak cowa ko mamahemek ci Yihofa. Cikaditayto ko pidoko ato caay ko cacadaen ni Yihofa, o mamirepat to kalalaˈed ita i Cingranan.
Kadkaden ko Noˈadingoan Odoˈ
(1 Pitiro 1:10-12) Pakayniay tonini a pipaˈorip no Kawas i, maherekto ko iti:yaayho a paliˈayaway to sowal no Kawas a tamdaw a misongilaˈ a mikadkad to pakayniay i malosapafeli no Kawas tamowanan a sapalemed. 11 Oya iraay i cangraan a todong no tireng ni Kristo a [fangcaly saocor] ko paliˈayaway a pahapinang i cangraan to pakayniay i nipisemsem ni Kristo ato nika ciˈdil Ningra iikor nonini. Saka, “Ano hakowa a ira konini? O mamasamaan ko demak hakiya?” Saan cangra a misaˈicel a mikadkad. 12 Mapahapinang no Kawas i cangraan o iti:yaayho a paliˈayaway to sowal no Kawas ko nika caay ko saki cangraan ko tayal nangra. O saki tamowanan ko tayal nangra. Pakaynien no naikakarayanay a [fangcalay saocor] i patenakay to Ngaˈayay a Ratoh ko nipipatengil i tamowanan tonini a demak. Halo coyoh a mangalay a mihapinang tonini.
w08 11/15 21 fiedac 8 fatac
Kalimlaan no Yakop ato Pitiro a Cudad
1:10-12. Itini nolitenganho, pairasolay no Kawas paliˈayaway a mitilid to milingatay to kasakopang no mapasimalay a Krisciyang a demak. Tangasa mapatirengto ko kasakopang no Krisciyang ngaˈ, pakaynian no Kawas toni kasakopang a patahkal koni kimad. Soˈliˈli hatira, o coyoh kamayanay misongilaˈ a misinanot toni ikemoday a noˈadingoan a kimad. (Ifiso 3:10) Tatodongen ita ko coyoh a misaˈicel a misinanot to ‘tangongolay a demak no Kawas,’ cowa saw?—1 Korinto 2:10.
(1 Pitiro 2:25) Matiya o moraraway a siri kamo. Nikawrira, mapanokayto kamo anini i midipotay misimaway to [ˈorip namo ato kantok.]
it-1 761 fiedac 3 fatac
Kantok
Satadamaanay a Kantok. Itiniay i Isaya 53:6 miala ci Pitiro to sowal, somowal to “o moraraway a siri” ko romaroma a tamdaw, ikor somowalay to “minokayayto i midipotay misimaway to [ˈorip ato kantok]” cangra. Ora misowalan a “kantok” maedeng o ci Yihofa a Kawas, samanen oya mipatikamian ni Pitiro a tamdaw na cowa piliyas ci Yis Kristoan, nawhani, pakayniay cangra ci Yisan minokay tayra toya Satadamaanay a Pakaenay to Siri a Yihofaan. (ˈOlic 23:1; 80:1; Yirimiya 23:3; Icikil 34:12) O kantok ci Yihofa, oyaan a mikingsaay. (ˈOlic 17:3) Maharekto ko Kawas a mikingsa (Krisiya sowal, e·pi·sko·peʹ) i, tangsolay a mitefoc, patinakoen, isaka 1 hahekalan, cowa ka hapinang no Yirusalim ko “pikingsa no Kawas” (Krisiya sowal, e·pi·sko·pesʹ), teloc i, matefocay no Kawas cangra. (Luka 19:44) Ikor no pikingsa, iraay ko ngaˈayay a teloc ato sakaraheker, mahaen toya ‘pikingsaan (Krisiya sowal, e·pi·sko·pesʹ) a romiˈad no Kawas’ i, oya paˈdilay to Kawas a tamdaw o mamilifok to sakaraheker.—1 Pitiro 2:12.
Miˈosi to Sinael
(1 Pitiro 1:1-16) O Tarokos ni Yis Kristo kako ci Pitiro. Patilid kako tamowanan o maliwasakay a maroˈ itira i Pontus, i Kalatiya, i Kapatokiya, i Aciya ato Pitiniyaay a nipiliˈan no Kawas a salikaka. 2 O nano nafalocoˈan no Wama a Kawas a nipiliˈan Ningra kamo, o mapalafangcalay no [fangcalay saocor] a papitoor i ci Yis Kristoan a nikoracan no remes Ningra kamo. Nanay tadamaan ko nika lemed ato nika rihaday namo. 3 O aahowiden ita ko Kawas o Wama no Tapang ita. Nawhani tadamaan ko adayay Ningra. Saka, palowaden Ningra ci Yis Kristo a paˈorip nai patay. Ta pakayni tonini a mapafeli Ningra kita to faelohay a ˈorip. Ta mapafalocoˈ Ningra kita to caay ko mamalasawad a pafalocoˈan. 4 Onini ko sakahalamham ita to ninaˈangan no Kawas i kakarayan a caay ko mamapohed, caay ko mamaˈoning, caay ko mamalasawad a malosapafeli no Kawas i tamowanan. 5 Pakayni i nipitiˈer namo ci Kristoan a mararid a madipot no ˈicel no Kawas kamo tangasa i pipatalahkalan Ningra to nipatalaan Ningra a sapaˈorip i saikoray a romiˈad. 6 Orasaka, kalipahak kamo tonini. Ano mapakaroraroray kamo anini to masamaamaanay a pades i, caay ko halafinay konini. 7 O patosokan no nika pades namo i, o pilifet to pitiˈer namo ci Kristoan. Ta mahapinang ko soˈlinay a pitiˈer namo. Matiya o piˈolac to tadaekim a mitodoh ko pilifet tamowanan. Tada ikakaay no tadaekim no nika o kakalimlaan ko nipitiˈer namo ci Kristoan. Saka, o lalifelifeten aca ko pitiˈer namo. Ta caay ka lasawad konini. Ta ano talahkalto ci Yis Kristo i, makahemek, ciˈdil, tadamaan kamo. 8 Talacowa caayho pakaˈaraw kamo Cingraan, nikawrira, maolah kamo i Cingraan. Talacowa caay ka ˈaraw namo Cingra anini, nikawrira, pasoˈlin kamo i Cingraan. Saka, ira i falocoˈ namo ko caay ko mamafilo a patalahkalen i ngoyos a tadamaanay a lipahak namo. 9 Nawhani o milayapay kamo anini to heci no pitiˈer namo to Kawas, oya pipaˈorip to saloˈafang [ˈorip] namo. 10 Pakayniay tonini a pipaˈorip no Kawas i, maherekto ko iti:yaayho a paliˈayaway to sowal no Kawas a tamdaw a misongilaˈ a mikadkad to pakayniay i malosapafeli no Kawas tamowanan a sapalemed. 11 Oya iraay i cangraan a todong no tireng ni Kristo a [fangcalay saocor] ko paliˈayaway a pahapinang i cangraan to pakayniay i nipisemsem ni Kristo ato nika ciˈdil Ningra iikor nonini. Saka, “Ano hakowa a ira konini? O mamasamaan ko demak hakiya?” saan cangra a misaˈicel a mikadkad. 12 Mapahapinang no Kawas i cangraan o iti:yaayho a paliˈayaway to sowal no Kawas ko nika caay ko saki cangraan ko tayal nangra. O saki tamowanan ko tayal nangra. Pakaynien no naikakarayanay a [fangcalay saocor] i patenakay to Ngaˈayay a Ratoh ko nipipatengil i tamowanan tonini a demak. Halo coyoh a mangalay a mihapinang tonini. 13 Orasaka, pipatala kamo to falocoˈ namo. Sinanoten ko demak namo. Nawhani i katalahkalan ni Yis Kristo a romiˈad i, o mamilayap kamo to sapalmed no Kawas. Saka, sarocoden ko falocoˈ namo a pasayra toya sapalmed. 14 Kao mitengilay to sowal kamo. Akato pihakelong to masamaamaanay a ˈanof namo a matiya o demak namo yo mafokilho kamo to Kawas. 15 Kamatiya o nika fangcal no mitahidangay tamowanan a Kawas ko nika fangcal namo i polong no demak namo. 16 Nawhani o sowal a matilid i Fangcalay Cudad i, “O fangcalay Kako. Saka, kao fangcalay kamo,” saan.
SAKA 10 FOLAD 21-27 ROMIˈAD
O ODOˈ KO KIMAD NO KAWAS | 1 PITIRO 3-5 FEDENGAN
“Mangatato ko Paherekan no Hekal”
(1 Pitiro 4:7) Mangatato ko paherekan no hekal. Saka, sinanoten ko falocoˈ namo. Kapalal a mitolon.
w13 11/15 3 fiedac 1 fatac
Katalipaˈelal, Micerid a Mitolon
O cecay misalafiiyay matayal a tamdaw, sanay ko sowal: “Ano tahirato i kamoniharan i, cowato pakafilo ko tamdaw to tokatok.” Romaroma misalafiiyay ko tayal a tamdaw maedeng iraay ko malecaday a harateng. Itiniay i mariˈangay lekakawa ni Satan kita, mahecaday i toˈmanay a dadaya nohatini. Mamangatato mataˈlif koni dadaya, itiniayto i satoˈmanay a likisi no tamdaw kita. (Loma 13:12) Itini toni salikorayto a tatokian, ano matokatok tada o masaka talawan! Mankora, “sinanoten ita ko falocoˈ”, halo tengilen ko sapalmoˈot no Fangcalay Cudad, “kapalal a mitolon.”—1 Pitiro 4:7.
(1 Pitiro 4:8) O kakalimlaan a demak namo i, o nika soˈlin no kasasiolaolah namo. Nawhani pakayni i nika sasiolaolah namo ko sakapadeng no adihayay a raraw.
w99 4/15 22 fiedac 3 fatac
Misamaan a Mihapinang ato Miremo to Kalonayan i Noˈadingoan
Saikor, pakifalocoˈen ita ko sidaˈitay a saparikec ni Pitiro: “Mangatato ko paherekan no hekal. Saka, sinanoten ko falocoˈ namo. Kapalal a mitolon. O kakalimlaan a demak namo i, o nika soˈlin no kasasiolaolah namo. Nawhani pakayni i nika sasiolaolah namo ko sakapadeng no adihayay a raraw.” (1 Pitiro 4:7, 8) Cowa ka lefot no tamdaw, ano o niyahto anca no taoto, o mamikickic to falocoˈ ato ponoˈ ita, malo sakapolin ita. Mafanaˈay ci Satan toniya kalonayan no tamdaw. O cecay a misafakofakoay a sapilood ningra i: Salakat mipelalay, ikor milowiday. Mankora, kalikien ita tano olah a mipadeng to rarraw, ho caka ‘ira ko ngalaˈ ni Akoma.’—Ifiso 4:25-27.
(1 Pitiro 4:9) Kasasihamham kamo. Aka ka ngaliwngiw.
O Mihamhamay a Demak—Masaka Limelaan Kahemekan!
2 Pakalalokay ci Pitiro to salikaka a “kasasihamham kamo,” sanay. (1 Pitiro 4:9) “Mihamham” sanay a Krisiya sowal, tatodong i, “mahemekay anca sidaˈitay a micada to kafahalan a tamdaw,” o sanay. Ora sasinanoten i, o salikaka ko pakalalokan ni Pitiro a “kasasi” mihamham, mankora oyaan kafanaˈanto a tamdaw no mita ko hahamhamen. Mihaen to demak iraay ko maanan a epocan hani?
3 Ano paihkal to mihamhamay o papaingid to kalalaˈed ita ato salikaka. Tikolen iso miharateng hena. Na tayraayto kiso i lomaˈ no tao a palafang, rihakeday tora kahemekan a toki han? Coko dihekoay nanay ko falocoˈ iso a miharateng a nimaan? Ano mihamham kiso to salikaka i kasakopang i, coko macakatay ko kalawidang namo han? Ano paihkal kita to mihamhamay a micada to salikaka i, edengan ko matiniay a toki to mamitongal to kafanaˈ i cangranan. Itini i lintad ni Pitiro, o pakayraan no hekal itiya tatiitatiihay, o Krisciyang oha papakedec to nika lalaˈed nangra wangaˈ. Anini, itiniay i “saikoikoray nonini a hekal” a maˈorip kita, oha mamihaen to demak.—2 Timoti 3:1.
Kadkaden ko Noˈadingoan Odoˈ
(1 Pitiro 3:19, 20) “Ta tayra cingra i marofoay a [tatiihay coyoh] a mipatenak to sowal. 20 Onini a marofoay a [tatiihay coyoh] hananay i, o mitoroˈay to na Nowaanho a ˈorip. Yo misangaˈ ci Nowa to lonan i, hadidi han no Kawas ko tamdaw a mitala to nika falic no falocoˈ nangra. Nikawrira, caay pitoor cangra to sowal no Kawas. Caay ka papina ko micomoday to lonan. Fafalo aca ko mapaˈoripay pakayni i nanom.”
w13 6/15 23 fiedac
Salicay no Miˈosiay Tamdaw
Sowal no Fangcalay Cudad, ci Yis “tayra cingra i marofoay a [tatiihay coyoh] a patenak to sowal.” (1 Pitiro 3:19) Sa i, o manan ko tatodong noni sowal hani?
▪ Sowal sa ko tarokos ci Pitiro, oya “marofoay a tatiihay coyoh”, “yo misangaˈ ci Nowa to lonan i, hadidi han no Kawas ko tamdaw a mitala” itiya, oyanan micoliay a tatiihay a coyoh ko mitoroˈan. (1 Pitiro 3:20) Oya mipiliˈay mikotod ci Satanan a misafelitay a coyoh. Somowalay ci Yuta, ora “macangalay to kamaroˈan no tireng a sapiˈafasananay to kamaroˈan no Kawas a coyoh. Sawad han nangra ko kamaroˈan nangra. Saka, paliten no Kawas cangra to lonayiˈ a mirofo i toˈmanay tangasa i tadamaanay a pisawkitan no Kawas a romiˈad.”—Yuta 6.
Itini i lintad ni Nowa, orira coyoh samaanay a misafelit to Kawas hani? ˈAyaw no lenlen, mifalicay cangra malo tatirengan no tamdaw, o matiniay demak cowa pitoor to araaw no Kawas i cangranan. (Satapangan 6:2, 4) O roma i, misangaˈ ko Kawas cangranan cowa ko ngangaˈay a madadiˈi to fafahiyan, nawhani misafelitay cangra to nisahalakaan no Kawas a masaka acekaan ko demak, madadiˈi to fafahiyan. (Satapangan 5:2) Oniniya mariˈangay misafelitay a coyoh, o mamalaˈafo itini i misaˈosian a toki no Kawas. Mahaen to sowal ni Yuta, nohatini cangra “marofoay i toˈmanay”, marefongay i noˈadingoan a toˈman, mahecaday o marofoay i tapalitan ˈimeren no Kawas cangra.
Ihacowaay, samaanay ci Yis “patenak to sowal toya marofoay a tatiihay coyoh” hani? Sanay ci Pitiro, ci Yis i, ‘maˈorip cingra o noˈadingoan a tireng, ikor, tayraay mipatenak to sowal i marofoay coyoh.’ (1 Pitiro 3:18, 19) Sasinanoten ita, tiya patenak ci Yis to sowal i, ora kalasaka dademakan a tilid patalahkalay to malaheciayto kora demak, oiniya demak itiraay i ˈayaw no pitilid to saka 1 Pitiro a cudad. Ano nengnengen, ikor no patikol maˈorip ci Yis, na tayraay toya tatiihay coyoh a milasil to sasawkit nangra. O masadafdafay a sasawkit lihaf koni, awaay ko maamaan a hatokel nangra. (Yona 1:1, 2) Tanoktokay ko pasoˈlinay falocoˈ ni Yis, madimadiay tangasa i patay cingra, ikorto mapatikolay a maˈorip, misawacayay koni to awaay ko ˈicel ni Satan i cingranan. Mihaenay haw i, iraay ko tatodong ni Yis a milasil to sasawkit nora tatiihay coyoh.—Yohani 14:30; 16:8-11.
Ikor i, o papaliten ni Yis ci Satan ato coyoh ningra, mifahkol tayra i awaay ko paraˈ a ofang. (Luka 8:30, 31; Paˈarawan 20:1-3) ˈAyaw no aira kora romiˈad, orira tatiihay coyoh marofoay itini i toˈmanay. Salikor o mamalaˈafo cangra.—Paˈarawan 20:7-10.
(1 Pitiro 4:6) Onini ko saka halomapatayay a tamdaw a mapatenak to Ngaˈayay a Ratoh. Talacowa o masawkitayto cangra yo maˈoripho cangra itini i hekal a matiya o kalotamdaw, nikawrira, mapatenak ko Ngaˈayay a Ratoh i cangraan to sakaˈoripaw nangra a milecad to Kawas a maˈorip.
w08 11/15 21 fiedac 8 fatac
Kalimlaan no Yakop ato Pitiro a Cudad
4:6—Ngaˈayay Ratoh papatenaken i ‘mapatay tamdaw’ sa i, cima kora hani? “Mapatayay tamdaw” mitoroˈan i, oya ‘ciraraway ato paculiay to Kawas ko nika patay’ a tamdaw, mapatayay ko noˈadingoan nangra, iˈayaw no pakatengil to ngaˈayay ratoh. (Ifiso 2:1) Pakatengilto cangra to ngaˈayay ratoh ikor, mapaˈoripayto ko noˈadingoan nangra.
Miˈosi to Sinael:
(1 Pitiro 3:8-22) 8“Saikoray a sowal ako i, palacecayen ko falocoˈ namo a masasipaˈayaw. Kasasiolah kamo o salikaka. Kasasiniˈadaˈada kamo. Kasasingodongodo ko falocoˈ namo. 9 Aka kao tatiihay ko sapacoˈay to tatiihay. Aka kao pisamsam ko sapacoˈay to misamsamay tamowanan. Kao pipalmed ko sapacoˈay namo. Nawhani o sapalmedaw tamowanan ko patosokan no nipitahidang no Kawas tamowanan. 10 Mato sowal a matilid i Fangcalay Cudad, “Ano cima ko mangalayay a malemed ko ˈorip i, aka pasowal to tatiihay ato misamangahay a sowal. 11 O fafalahen ningra ko tatiihay ta midemak to ngaˈayay. O sasarocoden ningra ko falocoˈ a misaˈicel to sakararihaday. 12 Nawhani midipot [ci Yihofa] to moecelay ko falocoˈ a tamdaw. Mitengil Cingra to pitolon nangra. Nikawrira, maketer [ci Yihofa] to tatiihay ko demak a tamdaw,” saan. 13 Ano malalokay kamo to ngaˈayay a demak i, cima ko mamikariˈang tamowanan? 14 Nikawrira, ano mapadepades kamo to nano nika moecel no demak namo i, o malemeday kamo. Aka ka talaw kamo to pipatalaw no nimanima. Aka ka rawraw ko falocoˈ namo. 15 O Tapang ako ci Kristo han ko falocoˈ a mangodo cingraan. Kararid kamo a mipatala ta ano cimacimato ko milongocay i tamowanan to sapisaheciaw namo a pasowal to pakayniay i pafalocoˈan namo i, ira ko sapacaˈof namo. 16 Nikawrira, kao damsayay ato mangodoay a falocoˈ ko sapacaˈof namo. ˈImeren ko ngaˈayay a falocoˈ namo. Ta ano iraira ko misamsamay tamowanan to nika ngaˈay no demak namo a mitoor ci Kristoan i, mapakangodo cangra to nipisamsam nangra. 17 Ano o nafalocoˈan no Kawas ko sakapades namo to nano nika ngaˈay no demak namo i, orira ko ngaˈay to nika pades namo to nano nika tatiihan no demak namo. 18 O moecelay ko falocoˈ a tamdaw ci Kristo. Nikawrira, patado cingra to ciraraway a tamdamdaw a mapatay to kinacecay aca to sakahepol no raraw. Onini i, o sapikeridaw ningra tamowanan a papiraod to Kawas. Talacowa o nipatayan ko tireng ningra, nikawrira, maˈoripay cingra. 19 Ta tayra cingra i marofoay a [tatiihay coyoh] a mipatenak to sowal. 20 Onini a marofoay a [tatiihay coyoh] hananay i, o mitoroˈay to na Nowaanho a ˈorip. Yo misangaˈ ci Nowa to lonan i, hadidi han no Kawas ko tamdaw a mitala to nika falic no falocoˈ nangra. Nikawrira, caay pitoor cangra to sowal no Kawas. Caay ka papina ko micomoday to lonan. Fafalo aca ko mapaˈoripay pakayni i nanom. 21 Onini a nanom i, o todongto no paˈoripay tamowanan a inoˈ. Pakayni i nika lomowad ni Yis Kristo a maˈorip nai patay ko nipipaˈorip no inoˈ tamowanan. Caay ko misawsaway to ˈoning no tireng ita konini a inoˈ. O todongto no pikorac to falocoˈ ita konini ta mangaˈay kita a milongoc i Kawas. 22 Talakakarayanto ci Kristo a maroˈ i kawanan no Kawas. Kowanen ningra ko coyocoyoh ato mikowanay i kakarayan a maemin.
SAKA 10 FOLAD 28 –SAKA 11 FOLAD 3 ROMIˈAD
O ODOˈ KO KIMAD NO KAWAS | 2 PITIRO 1-3 FEDENGAN
“Pakifalocoˈen ko Nika Ngata no Romiˈad ni Yihofa”
(2 Pitiro 3:9, 10) O harateng no roma a tamdaw i, “Maosoy ko Tapang [ci Yihofa] a milahci to demak Ningra,” saan cangra. Nikawrira, caay ko nika osoy no Tapang [ci Yihofa] a milahci to nano sowal Ningra. O mihadidiay Cingra tamowanan a mitala. Nawhani mangalay Cingra to sakasasiyoraw no falocoˈ no tamdaw a maemin a miliyas to raraw. Caay ka ngalay Cingra to nika tekop no cecacecay aca a tamdaw. 10 Nikawrira, o mamatiya o nika tayni no mitakaway a tamdaw ko nika caay ka fanaˈen ko nika ira no romiˈad no Tapang [ci Yihofa]. Itiya a romiˈad i, tataˈang asa ko harengheng no kakarayan a malahdaw. Itiya i, o mamatodoh a maperar ko ilalomaˈay no kakarayan. O mamalasawad a maemin ko sera ato maamaan i sera.
w06 12/15 27 fiedac 11 fatac
O Sasadafdafen ni Yihofa Misawkit ko Demak
11 Misawacayay ci Yis, “mamangatato” a misadafdaf misawkit ci Yihofa to demak. O manan ko tatodong nora sowal ningra hani? Paihkalay ko Fangcalay Cudad, soˈliˈlin halafinay ko pihadidi ni Yihofa, kawra, ano maraod ko toki, o kakaliki Cingra misadafdaf a misawkit to demak. (Luka 18:7, 8; 2 Pitiro 3:9, 10) I lintad ni Nowa, maraod ko lenlen i, tangsolay matekop ko mariˈangay tamdaw. Itini i lintad ni Loto, matefad ko namal nai kakarayan i, malaˈafoayto ko mariˈangay tamdaw. Sowal ni Yis: “O mamalecad tonini a demak ko nika talahkal noya Tamdaw toya romiˈad.” (Luka 17:27-30) Tahirato i, o mariˈangay tamdaw wa “talifahal sa a ira ko latiih nangra.” (1 Tisalonika 5:2, 3) Hay soˈlinay, papasoˈlinen ita: O masadafdafay ci Yihofa, cowa ko papasalaten to cecacecay romiˈad a materek ko hekal ni Satan.
(2 Pitiro 3:11, 12) Tona mahaen ao mamalasawad konini a maamaan saka, kao fangcalay ko demak namo a masarocod i Kawas. 12 Halamhamen a mitala ko nika ira noya romiˈad no Kawas. Saˈicelen ko falocoˈ namo to sakaranikayaw noya romiˈad a ira. Itiya i, o mamatodoh a maperar ko kakarayan. O mamatodoh a malasoˈor ko ilalomaˈay no kakarayan a maamaan.
w06 12/15 19 fiedac 18 fatac
“Mangataayto Koya Tadaromiˈad ni Yihofa”
18 Palimoˈotay ci Pitiro a pakifalocoˈ to mangataayto ko tadaromiˈad ni Yihofa. Sasamaan kita ngaˈ ngaˈay hani? O cecay hapakayraan i, misaˈicel palahad to ‘makoracay waywayan’ ato ‘mangodoay to Kawas a waywayan’. (2 Pitiro 3:11, 12) Ano matayal kita a mihaen i, o aˈifowa a mitala to kaira noya “tadaromiˈad ni Yihofa”. Itini i no Krisiya sowal, ‘pakifalocoˈen ko nika ngata nora romiˈad’ sanay a tilid, tatodong i, “pakalikien” a ira kora romiˈad sanay. Manaokaniw, cowa ko ngangaˈay kita misapoto tora romiˈad, misakaliki ko kaira no romiˈad ni Yihofa. Kawra, ano matayal to demak kita tona pitala tora romiˈad i, hato sahosaho iraayto kora romiˈad.—1 Korinto 15:58.
Kadkaden ko Noˈadingoan Odoˈ
(2 Pitiro 1:19) O nano tadamaanay a remes ni Kristo, o matiyaay o remes no caay ka cisamoˈ a tadasiri ko sapitedal tamowanan.
w08 11/15 22 fiedac 2 fatac
Kalimlaan no Yakop ato Pitiro a Cudad
1:19—Cima koya “fuˈis” hananay? Ihacowaay a masadak? Hano mafanaˈ kita to masadakayto cingra? Oniya “fuˈis” i, oya malahongtiayto a Yis Kristoan. (Paˈarawan 22:16) Isaka 1914 miheca, ci Yis itiniay i kaˈayaw no ˈalomanay a mapacakat malo hongti no Misiya Hongti Kitakit, patalahkalay to iraayto ko saka cecay romiˈad no monihar. Ya pifalic ni Yis to pising a mapolosi, paihkal to ˈdil ato fadangalan no kala hongti ningra, hanaca patahkalay to soˈlinay ko sapairasol no Kawas. Ano misinanot kita to sapairasol i, orira sapairasol o papalikat to falocoˈ ita, toha saka fanaˈawto ita to masadakayto koya Fuˈis.
(2 Pitiro 2:4) Caay sololen no Kawas ko ciraraway a coyoh. Saka, fahkol han ningra cangra i [Tartarus] a mirofo i toˈmanay tangasa i pisawkitan a romiˈad.
w08 11/15 22 fiedac 3 fatac
Kalimlaan no Yakop ato Pitiro a Cudad
2:4—O manan kora “Tartarus” hananay a kitiraan? Ihacowaay mafahkol tayra koya misafelitay a coyoh? O “Tartarus” hananay a kitiraan, malecaday o pirofoan a kitiraan, edengan o no ˈadingoan a tireng ko mamarofo itira, cowa ko tamdaw. Itiniay i toˈmanay no noˈadingoan kora tatiihay a coyoh, caka pakaˈaraw to ˈdil no araaw no Kawas, awaay ko maamaan a tokel. Itini i lintad ni Nowa, fahkolan no Kawas ko tatiihay coyoh tayra tora “Tartarus” a kitiraan, misalaenoanto cangra tahira i katekopan nangra.
Miˈosi to Sinael
(2 Pitiro 1:1-15) O kuli ato tarokos ni Yis Kristo kako ci Simon Pitiro. Patilid kako i tamowanan o milecaday tamiyanan a mitiˈer to Kawas. O nano nika moecel no pinangan no Kawas ita ato pinangan no paˈoripay a Tapang ci Yis Kristo ko sakatadamaan no nipitiˈer ita. 2 Nanay, matongal a matongal a maparihaday mapalemed kamo pakayni i nika fanaˈ namo to Kawas ato tapang ita ci Yisan. 3 O nano ˈicel no Kawas ko saka mapafeli i titaanan ko polong no sakangaˈay ita a mitoor to Kawas. Mafanaˈ kita tonini a mitahidangay titaanan a Kawas. Mangalay Cingra a papikapot titaanan i ˈdil Ningra ato nika tadamaan Ningra. 4 Pakayni tonini a ˈdil ato nika tadamaan Ningra a mapafeli i titaanan ko tadamaanay a nisowalan Ningra a sapalemed. Ta pakayni tonini a maliyas namo ko mitekopay to tamdaw a ˈanof itini i hekal. Ta milecad kamo to pinangan no Kawas. 5 Orasaka, saˈicelen ko namo. Tongalen to tadamaanay a demak ko pitiˈer namo to Kawas. Tongalen to fanaˈ ko tadamaanay a demak namo. 6 Tongalen to pakaˈmetay a falocoˈ ko fanaˈ namo. Tongalen to kodaitay a falocoˈ ko pakaˈmetay a falocoˈ namo. Tongalen to miringiay to Kawas a pinangan ko nika kodait no falocoˈ namo. 7 Tongalen to kasasiolah namo to salikaka ko miringiay to Kawas a pinangan namo. Tongalen tono Kawas a olah ko kasasiolah namo to salikaka. 8 Onini ko kakalimlaan namo. Ano matongal matongal konini a demak namo i, ciepocay ko demak namo a mafanaˈ to tapang ita ci Yis Kristoan. 9 O awaay ko matiniay a demak i, o mapohaway, o ingataay a cecay ko maˈaraway ningra. O matawalay ningra ko nika sawsawto no iˈa:yaway a raraw ningra a makorac. 10 Orasaka, salikakaaw, saˈicelen a pahapinang i demak namo ko nika o nitahidanganto, o nipiliˈanto no Kawas kamo. Nawhani ano haenen namo i, caay ko mamisawad kamo a mitoor. 11 Pakayni tonini ko sakangaˈay namo a micomod i midaˈocay a kitakit no tapang ita o paˈoripay ci Yis Kristo. 12 Orasaka, ano mafanafanaˈ kamo tonini a demak, ano ciˈiceˈicel kamo a mitoor to nipatorodan tamowanan a sowal no Kawas i, o mamararid kako a papiharateng tamowanan tonini a demak. 13 Yo maˈoripho kako anini i, o tayal ako konini a mipalal to falocoˈ namo saan kako. 14 Mapakafanaˈto no tapang ita ci Yis Kristo kako to nika mangatato kako a mapatay. Mahapinangto ako konini. 15 Orasaka, o mamisaˈicel kako a misangaˈ to sakacaaw ka tawal namo a miharateng tonini a demak iikor no patay ako.