Pinengnengan to lalakaw no Mitosilay ato Nikaˈorip Rayray no Saˈopo
SAKA 1 FOLAD 6-12 ROMIˈAD
O ODOˈ KO KIMAD NO KAWAS | SATAPANGAN 1-2
“Misangaˈay ci Yihofa to ˈOrip Itini i Cikiw”
(Satapangan 1:3, 4) Palimoˈot sa ko Kawas, “Ka ira ko likat” han Ningra i, sadak sato ko likat. 4 Minengneng ko Kawas to likat i, ngaˈayen Cingra, saka, palaliyasen Ningra ko likat ato toˈman.
(Satapangan 1:6) Palimoˈot haca ko Kawas, “Kaira ko palaˈeday to nanom, kalaliyas ko kafekang ato kalaeno a nanom,” han Ningra i, madoedo a malaheci a maemin ko limoˈot Ningra. Saka, masangaˈ no Kawas ko palaˈeday to ifafaeday ato ikalaenoay a nanom a palaliyas.
(Satapangan 1:9) Palimoˈot haca ko Kawas, “Kalacecay a masaˈopo ko ikalaenoay no dohaw no kakarayan a nanom, ta talahkal ko sera,” han Ningra i, madoedo a malaheci a maemin ko limoˈot Ningra.
(Satapangan 1:11) Doedo sa i, palimoˈot haca ko Kawas, “Ka molengaw ko kahirahira no kasasiroma no pinaloma i sera, o panay, o ciheciay a losay,” han Ningra i, madoedo a malaheci a maemin ko limoˈot Ningra.
it-1 259-260 fiedac
O Pisangaˈ no Kawas
Itini i saka cecay “romiˈad” i, sanay ko Kawas: “Ka ira ko likat”, sadak sato ko likat, kawra naitini i cikiw minengneng cowaho ka tadamahapinang. J.W. Wat sanay a mihongyak “palidlid saan masadak ko likat.” (Satapangan 1:3) Ikorto i, “palaliyasen no [Kawas] ko likat ato toˈman”, o “likat” i, o “romiˈad”, o toˈman i, o “dadaya” han, malilengay ko cikiw a mikoniyol to cidal, ano cikiwto malilengay cira, saka makakotay ira ko romiˈad ato dadaya ko kawali no cikiw ato kaˈtip no cikiw.—Satapangan 1:3, 4.
Itini i saka tosa “romiˈad”, “kaira ko palaˈeday to nanom, kalaliyas ko kafekang ato kalaeno a nanom”, hato iraayto ko kakarayan. Ikalaeno no kakarayan iraay ko nanom, kafekang no kakarayan iraay ko nanom, kalalaˈed no nanom ato nanom iraay ko dohaw. O “kakarayan” hananay no Kawas. Kawra cowa ko fafaed no kakarayan koni, samanen iraay ko nanom a mitahepo to fuˈifuˈis cowa ka saan ko sowal no Fangcalay Cudad.—Satapangan 1:6-8; nengnengen ko DOHAW.
Itini i saka tolo “romiˈad”, tano ˈicelan no Kawas midemak to kafahkaˈan a demak, palisopsopan ko polong a nanom, masadak ko hadhad, o “sera” hananay no Kawas. Tora romiˈad, misangaˈay ko Kawas to maˈoripay maamaan, pairaen ko rengorengos, dateng ato kilang no losay; oniniya kihcod cowa ko fahal sanay a ira. Malengaw i sera ko kahirahira no kasasiroma no pinaloma.—Satapangan 1:9-13.
(Satapangan 1:14) Palimoˈot haca ko Kawas, “Kaira ko likat i dohaw no kakarayan to kacipinangan to kasasiroma no romiˈad ato dadaya ato kacipinangan haca to kasasiroma no pifulafulad ato romiˈad ato mihecaan.
(Satapangan 1:20) Palimoˈot haca ko Kawas, “Kalenak i nanom ko kahirahira no maˈoripay a fao ato kahirahira no maeferay a ˈayam i dohaw no kakarayan,” han Ningra.
(Satapangan 1:24) Palimoˈot haca ko Kawas, “Kalenak i sera ko kahirahira no maˈoripay a fao, o pinaˈorip, o ˈaˈadopen, o manafoyay i sera a fao,” han Ningra i, madoedo a malaheci a maemin ko limoˈot Ningra.
(Satapangan 1:27) Saka, palecaden no Kawas to tireng Ningra ko tamdaw a misangaˈ. Sangaˈen Ningra ko faˈinayan ato fafahiyan.
it-1 260 fiedac 8 fatac-261 fiedac 2 fatac
O Pisangaˈ no Kawas
Itini i Satapangan 1:16 a Hipray tilid o ba·raʼʹ (tatodong pisangaˈ o sanay), ao cowa ko ʽa·sahʹ (tatodong patelien o sanay). Mihaenay haw i, itini i Satapangan 1:1 a kakarayan hananay, mahawpay ko cidal folad ato fuˈis, ˈayaw no saka 4 a “romiˈad” i, iraayto matating i fafekang no cikiw. Nikawrira, tangasa i saka 4 a “romiˈad” ngaˈ mahapinangay nai cikiw a minengneng. Satapangan 1:17 sanay ko sowal: “Patelien Ningra i dohaw no kakarayan ko likat, ta mipaˈdil to hekal.” “Kaira ko likat i dohaw no kakarayan to kacipinangan to kasasiroma no romiˈad ato dadaya ato kacipinangan haca to kasasiroma no pifulafulad ato romiˈad ato mihecaan.” Tada o kalimlaan a tahapinangan no tamdaw koni.—Satapangan 1:14.
Itini i saka lima a “romiˈad” i, misangaˈay ko Kawas to kasasi romaroma no pinaˈorip, tano ˈicel ko Kawas a paira to masaferengay a pinaˈorip, misangaˈ ko Kawas i, cowa ko cecayay aca pinaˈorip, ikor palidlid saan a mafalic a malo romaromaay a pinaˈorip. Sowal no Fangcalay Cudad: “Saka, masangaˈ no Kawas ko tataˈangay a ˈaˈadopen i riyar ato kahirahira no maˈoripay a fao i nanom ato kahirahira no maeferay a ˈayam i dohaw no kakarayan.” Maˈaraw no Kawas ko nisangaˈan Ningra a kihcod, mangaˈayay ko harateng, saka palemed hanto ko kahirahira a maˈoripay, palenak a misaadihay. Pafelian no Kawas cangra ciˈicel a malenak.—Satapangan 1:20-23.
Itini i saka enem “romiˈad”, misangaˈ ko Kawas to “kahirahira no maˈoripay a fao, o pinaˈorip, o ˈaˈadopen, o manafoyay i sera a fao.” Matira o pisangaˈ to romaroma pinaˈorip, oniya kihcod ngaˈayay sanay ko Kawas.—Satapangan 1:24, 25.
ˈAyaw no mahererek ko saka enem romiˈad i, misangaˈay ko Kawas to mikiriwiˈay a maˈoripay, mikikakaay to ˈaˈadopen isafaay no coyoh, o tamdaw kora, o mipalecadan no Kawas to tireng Ningra a sangaˈen ko tamdaw, Satapangan 1:27 saan ko sowal: “Sangaˈen Ningra ko faˈinayan ato fafahiyan.” Itini i Satapangan 2:7-9 mitongalay a somowal tora demak, tano seraen ko Kawas a misangaˈ ko tamdaw, iyofen Ningra a pacomod i ngosoˈ ningra ko sakaˈorip a saselaˈan, ta mala maˈoripayto a tamdaw cingra. Pakamaroˈen Ningra itira i makapahay a palosayan, adihay ko kakaenen itira. Tano seraen no Kawas misangaˈ ko faˈinayan, ikor tano cecay fadowac ni Atam misangaˈ ko fafahiyan. (Satapangan 2:18-25) Misangaˈ ko Kawas to fafahiyan ato faˈinayan ikor malacecayayto cangra, o tamdaw hananay.—Satapangan 5:1, 2.
Kadkaden ko Odoˈ no Sinael
(Satapangan 1:1) I saˈayaw i, misangaˈ ko Kawas to kakarayan ato sera.
w15 6/1 5 fiedac
O Kakaku Misamaanay Milingat to Kaˈorip Iso
O cikiw ato dohaw hakowaayto ko kahalafin
O pisaˈosi no kakakusiya i, oni cikiw 40 a walwalan miheca ko kahalafin sanay, oniya dohaw i, 130 tangasa 140 a walwalan miheca sanay. Cowa ka somowal ko Fangcalay Cudad to ihacowaay misatapang ira koni dohaw, cowa ka somowal to pinaay patek a mihecaan ko likisi no cikiw. Salakatay a sowal no Fangcalay Cudad i: “I saˈayaw i, misangaˈ ko Kawas to kakarayan ato sera,” sanay yaca. (Satapangan 1:1) Tona cowa ka somowal to patodicekay a toki koniya sinael, ano hakowaayto mihecaan ano saan ko malalatay no kakakusiya i, cowa ka masasongtol to sowal no Fangcalay Cudad.
(Satapangan 1:26) Sowal sa ko Kawas, “Sangaˈaw ita ko milecaday, miringiay titaanan a tamdaw, ta papikowanen ita cangra to kahirahira no futing ato kahirahira no maeferay a ˈayam ato pinaˈorip a maemin ato ˈaˈadopen ato manafoyay a fao,” saan.
it-2 830-831 fiedac
Yis Kristo
Cowa ko misangaˈay a Tatapangan. Soˈlin pacafayay koya Wawa misangaˈ to maamaan, kawra cowa ka lecad to Wamaan ao misangaˈay a Tatapangan cingra. O naitiniay i Kawas ko ˈicel ningra a misangaˈ to maamaan, o fangcalay a ˈicel no Kawas ko palaˈosiay tora demak. (Satapangan 1:2; ˈOlic 33:6) Tona o pipowaran no ˈorip ci Yihofa, kihcod a masangaˈay a maˈoripay, ano o maˈarawayto anca caka ˈaraw a maamaan, o pakayniay i Cingranan ko sakaira. (ˈOlic 36:9) Oya Wawa cowa ko misangaˈay a Tatapangan, kawra kalasaka dademakan no Kawas cingra, malo taypiyaw Ningra a milaheci to misangaˈay a kasapaan a demak. O Fangcalay Cudad nai satapangan tangsa i salikor, panokayan ko ˈdil i Kawasan, ano ci Yisto mahaenay a paˈdil to Kawas.—Matay 19:4-6; nengnengen ko PISANGAˈ NO KAWAS.
Miˈosi to Sinael
(Satapangan 1:1-19) I saˈayaw i, misangaˈ ko Kawas to kakarayan ato sera. 2 Itiya i, awaayho ko faco no sera, awaayho ko maamaan. Matahepo no toˈman koya kakahaday a nanom, matayal ko [fangcalay saocor] no Kawas i fafaed no nanom. 3 Palimoˈot sa ko Kawas, “Ka ira ko likat” han Ningra i, sadak sato ko likat. 4 Minengneng ko Kawas to likat i, ngaˈayen Cingra, saka, palaliyasen Ningra ko likat ato toˈman, 5 o likat i, o “Romiˈad” han Ningra, o toˈman i, o “Dadaya” han Ningra. Saka, mataˈlif ko dadaya i, ira ko dafak, o saka cecay a romiˈad konini. 6-7 Palimoˈot haca ko Kawas, “Kaira ko palaˈeday to nanom, kalaliyas ko kafekang ato kalaeno a nanom,” han Ningra i, madoedo a malaheci a maemin ko limoˈot Ningra. Saka, masangaˈ no Kawas ko palaˈeday to ifafaeday ato ikalaenoay a nanom a palaliyas. 8 O “Dohaw no kakarayan” han Ningra ko kalalaˈed. Saka, mataˈlif ko dadaya i, ira ko dafak, o saka tosa a romiˈad konini. 9 Palimoˈot haca ko Kawas, “Kalacecay a masaˈopo ko ikalaenoay no dohaw no kakarayan a nanom, ta talahkal ko sera,” han Ningra i, madoedo a malaheci a maemin ko limoˈot Ningra. 10 O “Hadhad” han no Kawas ko sera, o “Riyar” han Ningra ko masaˈopoay a nanom. Minengneng ko Kawas to hadhad ato riyar i, ngaˈayen Cingra. 11 Doedo sa i, palimoˈot haca ko Kawas, “Ka molengaw ko kahirahira no kasasiroma no pinaloma i sera, o panay, o ciheciay a losay,” han Ningra i, madoedo a malaheci a maemin ko limoˈot Ningra. 12 Saka, molengaw i sera ko kahirahira no kasasiroma no pinaloma, ira ko panay, ira ko ciheciay a losay. Minengneng ko Kawas tonini a pinaloma i, ngaˈayen Cingra. 13 Saka, mataˈlif ko dadaya i, ira ko dafak, o saka tolo a romiˈad konini. 14 Palimoˈot haca ko Kawas, “Kaira ko likat i dohaw no kakarayan to kacipinangan to kasasiroma no romiˈad ato dadaya ato kacipinangan haca to kasasiroma no pifulafulad ato romiˈad ato mihecaan, 15 o romasato, pipaˈdil ko likat i dohaw no kakarayan to hekal,” han Ningra i, madoedo a malaheci a maemin ko limoˈot Ningra. 16 Saka, masangaˈ no Kawas ko tosa a tataˈangay a likat, o cidal i, mikowan to romiˈad, o fulad i, mikowan to dadaya. Masangaˈ Ningra ko fuˈifuˈis. 17 Patelien Ningra i dohaw no kakarayan ko likat, ta mipaˈdil to hekal, 18 o mamikowan konini to romiˈad ato dadaya a palalaˈed to taengad ato toˈman. Minengneng ko Kawas to likat i, ngaˈayen Cingra. 19 Saka, mataˈlif ko dadaya i, ira ko dafak, o saka sepat a romiˈad konini.
SAKA 1 FOLAD 13-19 ROMIˈAD
O ODOˈ KO KIMAD NO KAWAS | SATAPANGAN 3-5
“Ya Sakacecay Mangah Pairaay to Adayayay a Teloc”
(Satapangan 3:1-5) I lalomaˈ no nisangaˈan no Tapang a Kawas a maˈoripay a fao a maemin i, o ˈoner ko samafanaˈay a misaˈfit. Licayen noya ˈoner koya fafahiyan, “Soˈlinay a milalang ko Kawas i tamowanan a komaen to heci no masamaamaanay a losay i lalomaˈ no palosayan haw?” han nira. 2 Pacaˈof sa koya fafahiyan, “Mangaˈayto a komaen kami to heci no masamaamaanay a losay i lalomaˈ no palosayan, 3 deng o heci noya isifoˈay no palosayan a kilang ko nilalangan no Kawas a komaen. Milalang ko Kawas tamiyanan a komaen to heci noya losay, milalang haca to pitefing niyam tonini, ano caay pitengil kami a mihakelong i, caay ka eca ka patay kami,” han ningra. 4 Pacaˈof sa koya ˈoner, “Man ca kira! Caay ka patay kamo. 5 O sakasaan no Kawas i, mafanaˈ Cingra nawhani ano komaen kamo to heci noya kilang i, mafawahto ko mata namo, o mamatiyato o Kawas kamo, maedeng kamo a mihapinang to ngaˈayay ato tatiihay,” han nira.
w17.02 5 fiedac 9 fatac
O Mamalaˈosi ko Araaw ni Yihofa!
9 Ikor, kalasaka dademakan ni Akoma Satan ko cecay ˈoner a misaˈfit ci Ifaan, papiculi to limoˈot no Wama i kakarayan. (ˈOsien ko Satapangan 3:1-5; Paˈarawan 12:9) Padeteng sanay ci Satan misangaˈ to sakalacongisaw, milicay ci Ifaan: “Soˈlinay a milalang ko Kawas i tamowanan a komaen to heci no masamaamaanay a losay i lalomaˈ no palosayan haw?” Mahecaday o mihaenay ko sowal: “Cowa ko ngangaˈay misaˈosi ko niyah to sasamaan ko demak,” hato hatiraay ko tatodong nora sowal hakiya. O roma i, misamangahay cingra: “Caay ka patay kamo.” Sanay. Hanaca, hamaan mitengil to sowal no Kawas hananay ni Satan ci Ifa, saan ko sowal: “Mafanaˈ Cingra nawhani ano komaen kamo to heci noya kilang i, mafawahto ko mata namo.” Cowa ka olah ci Yihofa tamowanan a komaen toya sapihapinang to ngaˈayay ato tatiihay a heci noya kilang, samanen mafanaˈay ko Kawas, ano komaen kamo i, o mamafawah ko mata nangra, mafanaˈto misaˈosi to ngaˈayay ato tatiihay. Saˈfiten ni Satan cangra: “O mamatiyato o Kawas kamo, maedeng kamo a mihapinang to ngaˈayay ato tatiihay.”
(Satapangan 3:6) Minengneng koya fafahiyan to heci noya kilang i, makapahen, pangaˈayan a kaenen, hato cacitaneng ko tamdaw, saka, maˈinal cingra. Litod han ningra koya heci a komaen, pafelien ningra ko faˈinay ningra a pakaen, saka, halo faˈinayto ningra a komaen.
w00 11/15 25-26 fiedac
Naitini Toya Sakacecay a Mararamoday Minanam to Sapasifanaˈ
O ngangaˈay ci Ifa miliyas a eca ka raraw han? Hay, o ngangaˈay! Haratengen hena, ano o kiso cingra. Oya sowal noya ˈoner tada miwiletay to nano sowal no Kawas ci Ataman. Ano ira ko cowa ko kafanaˈan tamdaw pakokot to kaolahan ato mitiˈeran iso a tamdaw to misamangahay sa i, sasamaan ko harateng iso hani? O mamaketer a minaay ci Ifa, caka tengilen ningra. Cima koni ˈoner, timolo a cisasa to nika moecel no Kawas ato sowal no faˈinay ningra saw? Ci Ifa ano misakaretengay to ˈaˈideman a safalod i, o aisalakaten misalalicay ko faˈinay ngaˈ misaˈosi to demak. Ano ira ko tamdaw pasowal to misafelitay to sarikec no Kawas a sowal i, kalikien ita milalang. ˈArawhan, pakasoˈlin saan ci Ifa, sapisatekedaw a misaˈosi to manan ko ngaˈayay manan ko tatiihay. Ano haharateng han ningra koni sowal, pasangaˈayan hani wa saan ko falocoˈ ningra. Cowa ka falahen ningra nai ponoˈ kora mararaway a ˈanof, cowa ka pisalalicay to tawki no lomaˈ; tada taˈangayay ko kararaw ningra!—1 Korinto 11:3; Yakop 1:14, 15.
Mitengilay ci Atam to Sowal ni Ifa
Caho ka halafin, mikayhidan ni Ifa ci Atam a mararaw. Hano tada malonay ci Atam, hayi sa pasalat to fafahi a misafelit to limoˈot no Kawas aki? (Satapangan 3:6, 17) O papiliˈen ni Atam, mamadimadi cingra to Kawas hokira. O nika ira a kihcod ningra, mahawpay kora kanonoˈan a fafahi ci Ifa, sahtoay o sapafeli no Misangaˈay a Tatapangan i cingranan. O dadadofdofen ningra ko Kawas han? ˈAyaw no mamisaˈosi ci Atam, o aisalakat a mikilim to sakayat no Kawas han? Anoca hakelong sa to fafahi a misafelit to Kawas han? Mafanaˈay ci Atam, makaen ako kora losay i, o mamatama ako ko kaolahan a dafong sa ci Ifa, o pacefaay a harateng kora. Sanay ci Pawlo a mitilid to sapatemer no Kawas a sowal: “Caay ka ci Atam ko masafanaˈay. Oya fafahiyan ko masafanaˈay. Masaheci a masafanaˈ, a micicih to rikec no Kawas.” (1 Timoti 2:14) Orasaka, padetengay miculi ci Atam to limoˈot no Kawas. Matalaway miliyas to fafahi cingra. Soˈlinay haw i, o papasoˈlinen to iraay ko ˈicel no Kawas a mifikel to demak, ˈarawhan matapiˈay no talaw cato pakasoˈlin to Kawas.
(Satapangan 3:15-19) O mamasasiˈada kiso atoya fafahiyan, o mamasasiˈada ko teloc ningra ato teloc iso. O sastiˈen ningra a mipsiˈ ko fongoh iso, o kakalaten iso a midokaˈ ko satenok no waˈay ningra,” han Ningra. 16 Pasowal ko Tapang a Kawas toya fafahiyan, “O tatongalen Ako ko pisemsem iso a cipuyapuy, o mamaˈatˈat kiso a mahofoc. Talacowa mahaen ko nipisemsem iso, nikawrira, oyananto a mangalay kiso to faˈinay iso, o mamakowan ningra kiso,” han Ningra. 17 Pasowal ko Tapang a Kawas toya faˈinayan, “Tona mitengil kiso to sowal no fafahi iso, komaen kiso to nilalangan Ako tisowanan a heci no kilang, saka, o mamaˈkak ko sera to nano piliyang iso to limoˈot Ako. O tatahadaˈoc a maroray a matayal kiso ta ira ko kinaira to sakaedeng iso a kakaenen. 18 O papalengawen no sera ko ceka a semot ato talod, o lifal a dateng i omaomahan ko kakaenen iso. 19 Talasinootto kiso a matayal ta ira ko sakafecol iso. Matayal kiso tangasa i kapatayan iso a minokay i sera, nawhani o nano nisangaˈan kiso to sera, saka, o maminokay kiso i tatapangan iso a sera,” han Ningra.
w12 9/1 4 fiedac 2 fatac
Soˈlinay a Ciharateng to Fafahiyan ko Kawas Han?
Mapaekakay no Kawas ko fafahiyan han?
Cowa. Miekakan no Kawas i, oyaan “katelang a ˈoner, ci Satan” ko ngangan. (Paˈarawan 12:9; Satapangan 3:14) O “mamakowan” ni Atam ko fafahi sa ko sowal no Kawas, tatodong nora, cowa pihayi ko Kawas miˈimer a mipaekel ko faˈinayan to fafahiyan. (Satapangan 3:16) Soˈlinay haw i, pasowalay tora mararamoday, ano mararaw cangra i, o papaira to manan tatiihay a teloc.
w04 1/1 29 fiedac 2 fatac
Kalimlaan no Satapangan Cudad—I
3:17—Samaanay a mapaˈkak ko sera, hakowaay ko kahalafin? Ta lasilen no Kawas ko piˈkak to sera ikor, pasangarayto mipamatang to sera o sanay. O mamalengaw ko sera to ceka a semot ato talod. Teloteloc ni Atam tada malifetay ko teloc nora piˈkak to sera, sanay ko sowal no wama ni Nowa ci Lamik: “O niˈkakan no Tapang ko sera, saka maroray kita a matayal.” (Satapangan 5:29) Ikor no Lenlen, palemedan ni Yihofa ci Nowa ato wawa ningra, miliyaw palimoˈot to araaw Ningra, papiledef a milenak to sera. (Satapangan 9:1) Ano nengnengen, itiyaayto ko Kawas palasawad to piˈkak to sera.— Satapangan 13:10.
it-1 208 fiedac
Maˈatˈat ko Pihofoc
Maˈatˈat ko pihofoc. Mararawto ci Ifa i, lasilan no Kawas to mamaˈatˈat ko pihofoc ningra. Ano cowa ka pisafelit ci Ifa i, padadotocen no Kawas a palemed cingra, o kalipahakan ko pihofoc to wawa, samanen ‘o sapalemed ni Yihofa kadofahay, awaay ko roray.’ (Taneng 10:22) Kawra mararawto ko tamdaw ikor, o nika dangoc no tireng pairaay to adada no tireng. Mankora, sa ko sowal no Kawas (marariday cisowal ko Fangcalay Cudad to mipasalatan no Kawas a demak mao mihaydaan no Kawas a demak): “O tatongalen Ako ko pisemsem iso a cipuyapuy, o mamaˈatˈat kiso a mahofoc.”—Satapangan 3:16.
Kadkaden ko Odoˈ no Sinael
(Satapangan 4:23, 24) Pasowal ci Lamik toya tatosa a fafahi ningra, “Ata aci Cila, pitengil to sowal ako, fafahiyaw ni Lamik, pinaˈon a mitengil, oya midokaˈay takowanan a tamdaw i, patayen ako, oya miriˈangay takowanan a kapah i, patayen ako. 24 O mipatayay ci Kainan i, pito ko ˈorip to sapatefoc, o mipatayay takowanan i, pito a poloˈ ira ko pito ko ˈorip to sapatefoc,” han ningra.
it-1 874 fiedac 3 fatac
Lamik
Mitiliday ci Lamik to ˈolic saki fafahi ningra (Satapangan 4:23, 24) ora ˈolic patahkalay to nika tomes no mariˈangay demak i hekal. Sanay kora ˈolic ni Lamik: “Fafahiyaw ni Lamik, pinaˈon a mitengil, oya midokaˈay takowanan a tamdaw i, patayen ako, oya miriˈangay takowanan a kapah i, patayen ako. O mipatayay ci Kainan i, pito ko ˈorip to sapatefoc, o mipatayay takowanan i, pito a poloˈ ira ko pito ko ˈorip to sapatefoc.” Ano nengnengen hato mipaˈadingay to niyahan ci Lamik, somowal cowa ka hatira ci Kainan ko niyah a padeteng a mipatay to tamdaw. Ano kariˈangen no tao cingra i, o papatayen ningra cingra, o sapidipotaw cingra to ˈorip no niyah aca. Mankora, ora ˈolic ningra o parikecay to tamdaw, aka a patayen cingra ano mipatay cingra to tao to sapatefoc to ˈorip ningra.
(Satapangan 4:26) Ciwawa ci Sit to cecay a faˈinayan a wawa, ci Inos han ningra ko pipangangan. Nanitiya a misatapang ko tamdamdaw a mitahidang to Fangcalay a ngangan no Tapang a mitaˈong to Kawas.
it-2 600 fiedac 8 fatac
Pakaditay to ngangan no Kawas
O sowal no Fangcalay Cudad itini i lintad ni Inos, ˈayaw no Lenlen i, ‘misatapangay ko tamdaw a milekal to ngangan ni Yihofa’ sanay. “Misatapangay” ko tamdaw tano mangodoay a falocoˈ a micangacang to Kawas cowa ka saan, samanen ˈayaw noni, ci Apil mararidayto micangacang to ngangan no Kawas ci Yihofaan, miingid i Cingranan. (Satapangan 4:26; Hipray 11:4) O tamdaw itiya, ‘milekal to ngangan ni Yihofa’ o mikasimaanay to ngangan no Kawas a miowaw to cima tamdaw anca samiyay, ano mihaen cangra tada o pakaditay to ngangan no Kawas.—Nengnengen ko INOS.
Miˈosi to Sinael
(Satapangan 4:17–5:8) Tona malacecay a madadiiˈ ci Kain ato fafahi ningra saka, cipuyapuy ko fafahi ningra, mahofoc to cecay a faˈinayan a wawa, ci Inok han ningra a pangangan. Mipatireng ci Kain to cecay a niyaroˈ, panganganen ningra to ngangan no wawa ningra ci Inok han ningra koya niyaroˈ. 18 O wawa ni Inok ci Irat, o wawa ni Irat ci Mihuyail, o wawa ni Mihuyail ci Mitusail, o wawa ni Mitusail ci Lamik. 19 Tatosa ko fafahi ni Lamik, ci Ata aci Cila. 20 Mahofoc ci Ata ci Yapalan, ci Yapal ko tatoˈasan no misalinalinahay ko ˈorip a pakaenay to siri. 21 O safa ningra i, ci Yupal, ci Yupal ko tatoˈasan no midatokay ato mitipoloay a tamdaw. 22 Mahofoc ci Cila ci Tupal Kainan, ci Tupal Kain ko tatoˈasan no misangaˈay to marad ato fudawan a lalosidan. O safa ni Tupal Kain to fafahiyan i, ci Naamah. 23 Pasowal ci Lamik toya tatosa a fafahi ningra, “Ata aci Cila, pitengil to sowal ako, fafahiyaw ni Lamik, pinaˈon a mitengil, oya midokaˈay takowanan a tamdaw i, patayen ako, oya miriˈangay takowanan a kapah i, patayen ako. 24 O mipatayay ci Kainan i, pito ko ˈorip to sapatfoc, o mipatayay takowanan i, pito a poloˈ ira ko pito ko ˈorip to sapatefoc,” han ningra. 25 Tona malacecay a madadiiˈ haca ci Atam ato fafahi ningra, saka, mahofoc to cecay a faˈinayan a wawa, ci Sit han ningra ko pipangangan, sowal sa ci Ifa, “Pafeli ko Kawas takowanan to cecay a faˈinayan a wawa, o sapatidos ci Apilan oya nipatayan ni Kain,” saan. 26 Ciwawa ci Sit to cecay a faˈinayan a wawa, ci Inos han ningra ko pipangangan. Nanitiya a misatapang ko tamdamdaw a mitahidang to Fangcalay a ngangan no Tapang a mitaˈong to Kawas.
5 O teloc ni Atam konini a matiliday. (Yo misangaˈ ko Kawas to tamdamdaw i, palecaden Ningra to faco Ningra ko pisangaˈ cangraan. 2 Sangaˈen no Kawas ko faˈinayan ato fafahiyan, ta palemeden Ningra cangra, o romasato, o “Tamdaw” han Ningra cangra.) 3 Yo semoˈot ira ko tolo a poloˈ ko mihecaan ni Atam i, ciwawa cingra to cecay a faˈinayan, milecaday cingraan ko ceret ningra, ci Sit han ningra a pangangan. 4 Na ciwawa ci Atam ci Sitan i, maˈoripho cingra to falo a soˈot a mihecaan, o romasato, ciwawaho cingra to faˈinayan ato fafahiyan. 5 Yo mapatay ci Atam i, siwa a soˈot ira ko tolo a poloˈ ko mihcaan ningra. 6 Yo semoˈot ira ko lima ko mihecaan ni Sit i, ciwawa cingra to cecay a faˈinayan, ci Inos han ningra a pangangan. 7 Nanoya maˈoripho cingra to falo a soˈot ira ko pito a mihecaan, o romasato, ciwawaho cingra to faˈinayan ato fafahiyan. 8 Yo mapatay ci Sit i, siwa a soˈot moetep ira ko tosa ko mihecaan ningra.
SAKA 1 FOLAD 20-26 ROMIˈAD
O ODOˈ KO KIMAD NO KAWAS | SATAPANGAN 6-8
“Mitooran Ningra a Midemak”
(Satapangan 6:9) O kimad to pakayniay ci Nowaan konini, Awaay ko patelac ni Nowa, o dengan a ngaˈayay a tamdaw cingra itiya, mangaˈay ko kakafit ningra ato Kawas.
(Satapangan 6:13) Saka, pasowal ko Kawas ci Nowaan, “Miketonto Kako to falocoˈ to sapalasawadaw to tamdamdaw. Nawhani, maledef no mifurifuray a demak nangra ko hekal, o papahakelongen Ako to hekal a mitekop cangra.
Mitodong ci Nowaan, ci Taniilan aci Yopuan, Patahkal to Pasoˈlinay ato Midofdofay
4 Misiˈayawan ni Nowa a sapalifet. Itini i lintad ni Inok fofo ni Nowa i, cowa ka ngodo ko tamdaw to Kawas, ‘tano kahirahiraay a kacekokan a sowal mitowakang to Kawas.’ (Yuta 14, 15) Matongal matogal ko mariˈangay a demak. Tahirato i lintad ni Nowa i, “ira icowacowa ko mariˈangay a mifurifur.” Tatiihay coyoh malo tamdaway ko tireng, cifafahi tono hekal a fafahiyan, ciwawa cangra to mariˈangay a teloc. (Satapangan 6:2-4, 11, 12) ˈArawhan tada masasiromaay ci Nowa, sowal no Fangcalay Cudad: “Nikawrira, maolah ko Tapang ci Nowaan. . . o dengan a ngaˈayay a tamdaw cingra itiya, mangaˈay ko kakafit ningra ato Kawas.” Sanay.—Satapangan 6:8, 9.
(Satapangan 6:14-16) Pipiliˈ kiso to ngaˈayay a kilang to malo sapisangaˈ iso to cecay a tamina, sangaˈen ko kasarawang i lalomaˈ no tamina, saditen a maemin to tangiiw ko lalomaˈ ato paputal no tamina. 15 O kakayaˈ no tamina i, cecay a soˈot tolo a poloˈ ira ko tolo a kongce, o kakahad i, tosa a poloˈ ira ko tosa a kongce, o takaraw i, moetep ira ko tolo a kongce. 16 Sangaˈen ko sasingaran no tamina, pakafiten i fadahong no tamina ko sasingaran, o takaraw i, sepat a poloˈ ira ko sepat a kongfen. Toloen a tingroh ko lalomaˈ no tamina, o pakafekang, o sifoˈ, o pakalaeno han a misangaˈ, sangaˈen ko fawahan i fatiˈiyan no tamina.
w13 4/1 14 fiedac 1 fatac
Mangaˈay ko Kakafit Ningra Ato Kawas
Onini noka pisangaˈ to tamina 40, 50 a mihecaan a malaheci. Mapolong ko paro no lomaˈ ni Nowa miletek to kilang, micoloˈ, mipelaˈ to kilang, mipakafit tora sapad. Toloay ko tingloh nora tamina, i fatiˈiyan iraay ko fawahan. Pakafafekang no tamina iraay ko sasingaran, masiwit pasalaeno to miming ko fadahong, ho ngaˈay a malikelon ko nanom no ˈorad.—Satapangan 6:14-16.
(Satapangan 6:22) Saka, doedo hanto ni Nowa ko sowal no Kawas a milaheci a midemak.
w11 9/15 18 fiedac 13 fatac
Miemem a Mihadidi Comikay to Midaˈocay ˈOrip
13 Orira madimadiay a sikawdan ni Yihofa hano pakaemem a mihadidi, milaheci a comikay to midaˈocay ˈorip hani? Sinanoten ita to samaanay somowal ci Pawlo pakayni ci Nowaan. (ˈOsien ko Hipray 11:7.) Mafanaˈay ci Nowa to “caayho ka ˈaraw ningra a demak”, oyaan papalenlenen no Kawas ko sera, mitekop to maamaan maˈoripay. (Satapangan 6:17) Pakaynien ko sowal toya i lintaday ni Nowa a tamdaw, cowaho pakatengil cowaho pakaˈaraw to lenlen hananay. Kawra caay ko mamafekad ko matiniay a demak cowa ka saan ci Nowa. Misamaanay hani? Samanen pakasoˈlinay to mamatoor ni Yihofa ko sowal Ningra. Saka, kihcod a sapalimoˈot no Kawas i cingranan, “doedo hanto ningra milaheci.” Tada pasangarayto cowa ka saan cingra. (Satapangan 6:22) Ora dadademaken ni Nowa mahawpay misangaˈ to tamina, palisopsop to ˈaˈadopen, misaday to kakaenen, palasil to saparikec i tamdaw, patanoktokho to falocoˈ no paro no lomaˈ a midoko to Kawas. Haratengen hena, lahecien ni Nowa koni maemin a demak cowa ko madoloay, ˈarawhan “doedo hanto ningra a milaheci.” Tona pakasoˈlinay ci Nowa, miemem a mihadidi, teloc i, matafoay ko ˈorip ningra ato paro no lomaˈ, mapalemed no Kawas.
Kadkaden ko Odoˈ no Sinael
(Satapangan 7:2) Alaen a pacomod i tamina ko pinaˈorip, o nisaˈosian no lisin no pakayraan to makoracay i, alapito a kasaramod ko kahirahira no pinaˈorip, o caay ka korac i, alacecay a kasaramod ko kahirahira no pinaˈorip,
w04 1/1 29 fiedac 7 fatac
Kalimlaan no Satapangan Cudad—I
7:2—O manan ko taˈeneran a pafafidaˈ to “makoracay” ato “caay ka korac” a pinaˈorip hani? O taˈeneran a pafafidaˈ i, pakayni to ngaˈayay a sapatoˈaya a pinaˈorip hokira, ao cowa ko ngaˈayay a kaenen ha. ˈAyaw no lenlen, cowa ka komaen to titi ko tamdaw. Itini ilaeno no Rikec ni Mosi ngaˈ, misaˈosiay ko Kawas to manan ko ngangaˈay a kaenen a “makoracay” a pinaˈorip, cowa ka ngaˈay komaen to “caay ka korac” a pinaˈorip. Ikorto i, mapalasawad ko Rikec ni Mosi, mapalasawadayto koni sarikec. (Dmak 10:9-16; Ifiso 2:15) Ikor, mafanaˈay ci Nowa to manan pinaˈorip ko ngaˈayay sapatoˈaya, patafang ci Yihofaan. Masadak cingra nai tamina i, tangsolay “mipatireng ci Nowa to saki [Yihofa] a pipacakatan a patoˈaya, piliˈen ningra nai nisaˈosian no lisin a makoracay a kahirahira no pinaˈorip ato maeferay a ˈayam ko alacecay nira, ta telien ningra i pipatoˈayaan to malo nisakimoodan a mitodoh a sapatoˈaya.”—Satapangan 8:20.
(Satapangan 7:11) Yo saka enem a soˈot no mihecaan ni Nowa, toya mihecaan i saka tosa a folad no saka pito ko safaw a romiˈad i, mapelaˈ ko talolongay a [nanom] a mapowar ko tatapangan no nemnem, mafawah a maemin ko tatapangan no nanom i kakarayan.
w04 1/1 30 fiedac 1 fatac
Kalimlaan no Satapangan Cudad—I
7:11—Naicowaay masadak kora nanom no lenlen hani? Itini “sakatosa romiˈad”, no pisangaˈan, sangaˈan no Kawas ko “kakarayan”, to mitahpoay to cikiw a dohaw; mihaenay i, ‘ilaeno no dohaw iraay ko nanom, fafekang no dohaw iraay ko nanom.’ (Satapangan 1:6, 7) Ora ‘ilaenoay no dohaw a nanom’ o rira i seraay a nanom, ora ‘fafekang no dohaw a nanom’ oyaan matatingay i kakarayan a ˈoˈol, malo “tatapangan no nanom i kakarayan.” Itinito i lintad ni Nowa, mapowaray a matefad.
Miˈosi to Sinael
(Satapangan 6:1-16) Misatapangto a malenak a matongal ko tamdaw, miledefto i polong no hekal, o romasato, ciwawa cangra to fafahiyan. 2 Itiya i, ira ko papinapina a “Wawa no Kawas” pakaˈaraw to nika kapah no fafahiyan no tamdaw i, toor han nangra ko kaolahan ningra a cifafahi cangra. 3 Onini ko saka, sowal sa ko Tapang, “Tona ono hecian ko tamdaw, caay ko mamidaˈoc a maroˈ i cangraan ko [saocor] Ako, orasaka, caayto ko mamitaˈlif to cecay a soˈot ira ko tosa a poloˈ ko mihecaan nangra,” saan. 4 Nanitiya a masadak ko tataˈangay a tamdaw itini i hekal. O teloc no “wawa no kawas” ato fafahiyan no tamdaw cangra, o cicediay ato cinganganay a tamdaw no iti:yaayho cangra. 5 Maˈaraw no Tapang ko nika tatiih no kahacecay a tamdaw, sahto o tatiihay ko harateng nangra, 6 saka, mararom Cingra to nipisangaˈ Ningra to tamdaw i hekal. Tada masemer ko falocoˈ Ningra, sowal sa, 7 “O papalasawaden Ako ko nisangaˈan Ako a tamdaw ato halo ˈaˈadopen ato manafoyay i sera ato maeferay a ˈayam, nawhani, mararom Kako to nipisangaˈ Ako tonini a maˈoripay a fao,” saan. 8 Nikawrira, maolah ko Tapang ci Nowaan. 9-10 O kimad to pakayniay ci Nowaan konini, tatolo ko faˈinayan a wawa ni Nowa, ci Sim, ci Ham, aci Yafit. Awaay ko patelac ni Nowa, o dengan a ngaˈayay a tamdaw cingra itiya, mangaˈay ko kakafit ningra ato Kawas. 11 O romaromaho a tamdaw i, o tatiihay a maemin a nengnengen no Kawas, ira icowacowa ko mariˈangay a mifurifur. 12 Mikecor ko Kawas to hekal i, manengneng Ningra ko nika tada o kaacekan ko hekal, sahto o tatiihay ko demak no tamdaw a maemin. 13 Saka, pasowal ko Kawas ci Nowaan, “Miketonto Kako to falocoˈ to sapalasawadaw to tamdamdaw. Nawhani, maledef no mifurifuray a demak nangra ko hekal, o papahakelongen Ako to hekal a mitekop cangra. 14 Pipiliˈ kiso to ngaˈayay a kilang to malo sapisangaˈ iso to cecay a tamina, sangaˈen ko kasarawang i lalomaˈ no tamina, saditen a maemin to tangiiw ko lalomaˈ ato paputal no tamina. 15 O kakayaˈ no tamina i, cecay a soˈot tolo a poloˈ ira ko tolo a kongce, o kakahad i, tosa a poloˈ ira ko tosa a kongce, o takaraw i, moetep ira ko tolo a kongce. 16 Sangaˈen ko sasingaran no tamina, pakafiten i fadahong no tamina ko sasingaran, o takaraw i, sepat a poloˈ ira ko sepat a kongfen. Toloen a tingroh ko lalomaˈ no tamina, o pakafekang, o sifoˈ, o pakalaeno han a misangaˈ, sangaˈen ko fawahan i fatiˈiyan no tamina.
SAKA 1 FOLAD 27 –2 FOLAD 2 ROMIˈAD
O ODOˈ KO KIMAD NO KAWAS | SATAPANGAN 9-11
“Cecayho ko Sowal i Tahaf no Kakarayan”
(Satapangan 11:1-4) I saˈayaw i, cecayho ko sowal i tahaf no kakarayan, cecay ko sowal no tamdamdaw. 2 Yo misarakarakat cangra i kawali i, tayra cangra i dafdaf no Papilon, itira cangra a maroˈ. 3 Sasowasowal sa cangra, “Ati! sangaˈen ita ko lingka, todohen ita a misaˈatekak,” saan cangra. Saka, o lingka ko sapatireng nangra a misanga’, o tangiiw ko saparingat nangra. 4 Sowal sa cangra, “Ati! patirengen ita a misangaˈ ko cecay a niyaroˈ, sangaˈen ita i lalomaˈ no niyaroˈ ko pikacawan, tangasaen ita i kakarayan ko takaraw nira, ta malosiyang ko ngangan ita, ta caay ka liwasak kita a tayra i cowacowa no hekal,” saan cangra.
it-1 282 fiedac
Taˈangayay Papilon
Nolitengan a Papilon. Ora niyaroˈ itiniay i dafdaf no Papilon a patirengen, milingatay toya sapipatirengaw no tamdaw to Papil a pikacawan. (Satapangan 11:2-9) Patireng cangra to pikacawan no niyaroˈ, cowa ko sapipaˈdilaw to ngangan no Kawas, ao sapipalosiyangaw to ngangan no niyah. Itini tora kaitiraan no Papilon niyaroˈ makorkoray no tamdaw ko kitiraan no pikacawan. Ano nengnengen ora pikacawan hananay, maedeng o pidoyongan no tamdaw, mankora tangsol mikeceng ci Yihofa tora mipatirengay a demak, tona milingatay to mararaway a pidoyongan koni. O sowal no Hipray tora Papil hananay, o “rawraw” sanay. Ono Sumerian a sowal o Ka-dingir-ra hananay, ono Akatian a sowal i, o Bab-ilu hananay, tatodong o “fawahan no kawas” sanay. Haenen no finawlan mifalic kora ngangan hato awaay ko tatiihay a tatodong, kawra ora mifalican a ngangan patahkalayho to milingatay to pidoyongan kora.
it-2 1016 fiedac 6 fatac
Sasowalan
O safanaˈ no Satapangan, ikor no Lenlen i, sapitayalaw ko tamdaw a mipatireng, miculi to sapalimoˈot no Kawas ci Nowaan ato tatolo a wawa ningra. (Satapangan 9:1) Cowa kakahi cangra malaliyas ko aroˈ, “miledef a malenak”, sapipalisopsopaw to tamdaw, cecay ko aroˈ. Oniniya pala o dafdaf i Sinar itiniay i Misopotamiya. O pisatenokan no pidoyongan nangra, iraay ko pikacawan itira.—Satapangan 11:2-4.
(Satapangan 11:6-8) Sowal sa Cingra, “Malacecay cangra a masafinacadan, malecad a cecay ko sowal nangra, talacowa, o pisatapangho nangra konini, nikawrira, ikorto i, o mamidoedo cangra a midemak to kangalayan nangra. 7 Ata! maloklon kita a miparawraw to sowal nangra, ta caayto ka fanaˈ cangra a masasowal to niharatengan nangra,” saan. 8 Saka, paliwasaken no Tapang cangra a patayra i polong no hekal, sawad sato cangra a patireng toya niyaroˈ.
it-2 1016 fiedac 7 fatac
Sasowalan
Mifurifuran no ciˈicelay Kawas ko kalacecayan a sowal nangra, mipalak to nisahalakaan nangra, mitapiˈ to miculiay a demak nangra. Mihaen ko Kawas, cowato malacecay ko demak nangra, saikor maliwasakto talacowacowa cangra. Cato ka ngaˈay masasowal cangra, awato ko pakayraan nangra padadotoc mararaw a miculi to Kawas. Masasifodto ko sasowalan no tamdaw i, cato ka misacecay to falocoˈ a milaheci to maˈanofay a halaka nangra. Hanaca ora matalingay no tamdaw a sifanaˈ, cowa ito ko ngangaˈay kalasaka dademaken nangra. (Nengnengen ko Patnakay 7:29; Limoˈot 32:5.) Mihaenay haw i, mafurifur ko sasowalan no tamdaw o cecay a sakapelal no hekal, soˈlinay haw i, o sakangaˈay to hekal, samanen cato ka laˈosi ko tatiihay a nisahalakaan nangra. (Satapangan 11:5-9; nengnengen ko Isaya 8:9, 10.) Haratengen hena, o aniniay tamdaw kalasaka dademakan nangra ko matalingay a sifanaˈ nangra a midemak to tatiihay, mamahapinang to nika citaneng no Kawas a talaˈayaw ko pinengneng. Mafanaˈay Cingra ano pakihater han ko nisahalakaan no Papil tamdaw i, wa sasamaanto koniya hekal saw.
(Satapangan 11:9) Onini ko saka, Papil han konini a niyaroˈ, nawhani itira ko Tapang toya pala a parawraw to sowal no tamdamdaw, paliwasaken Ningra cangra a patayra i cowacowa no hekal.
it-1 521 fiedac
Kasakitakit
Tona mafurifurayto ko sasowalan no tamdaw, awaayto ko pinang nangra a masasowal, hato saniyaniyah sato cangra micowat tono niyah a serangawan, pinangan ato pidoyongan nangra. (Lifi 18:3) Tona miraayayto to Kawas, kasafinacadan a tamdaw misangaˈay to kawas no niyah, masasiromaromaay a misakawasan.—Limoˈot 12:30; 2 Hongti 17:29, 33.
Kadkaden ko Odoˈ no Sinael
(Satapangan 9:20-22) O maomahay ci Nowa, o saˈayaway a misangaˈ to safadisosoˈan cingra. 21 Yo cecay a romiˈad malasang cingra a komaen to fadisosoˈ a epah, kakawangan sa cingra a matiˈnang i lalomaˈ no taloˈan. 22 Maˈaraw ni Ham ko nika kakawang no wama ningra i, sadak sa cingra a pasowal toya tatosa a salikaka ningra.
(Satapangan 9:24, 25) Yo talipaˈlalto ci Nowa i, mafanaˈto cingra to nano demak no sasafaay a wawa ningra, 25 pasowal sa cingra, “O mamaˈkak ci Kanan! O mamalakuli no salikaka ningra cingra.
it-1 567 fiedac 6 fatac
Ham
Ci Kanan ko milingatay toni demak alatek, ˈarawhan o wama ningra ci Ham cowa ka pirikec cingranan. Alatek ci Nowa itini i sapatemer no Kawas paliˈayaway tono ikoran a noka lingad no demak. Paliˈayaw a pakaˈaraw to tatiihay pinangan ni Ham (latek mapatahkalay i wawa ni Ham ci Kananan), o paparocok to teloc ni Kanan. Tiya looden no Sam finacadan a Israil tamdaw ko Kanan i, oya sapaˈkak a sowal ci Kananan malaˈosiayto. O romaroma a Kanan tamdaw (patinakoen itini i Yosuwa saka 9 fedengan a Kipiyon a tamdaw) cowa ka mapalaˈafo, malakuliay no Israil tamdaw. Ikor to pina a hahekalan, o teloc ni Kanan wawa ni Ham tiya mapalaˈafo no Mitiya ato Pirsiya, Krik ato Loma i, malaˈosiayto itiya koya sapaˈkak ci Kananan a sowal.
(Satapangan 10:9, 10) Tona mapadama no Kawas cingra saka, malacicediay a miˈadopay a tamdaw cingra, orasaka, sowal sa ko tamdamdaw, “Nanay palecaden no Tapang kiso a matiya ci Nimrotan a malacicediay a miˈadopay a tamdaw,” saan. 10 O satapangan no kitakit ningra i, mahaop ko Papilon, o Irik ato Akat, onini a tolo a pala i, itira i Sinar a maemin.
it-1 1213-1214 fiedac
Nimrot
Mipatirengan ni Nimrot a kitakit, mahawpay ko Papilon, Irik, Akat ato Kalni, itiniay i dafdaf no Sinar kora niyaroˈ. (Satapangan 10:10) Mihaenay haw i, ora mipatirengay to Papil atora pikacawan a demak, latekay o ci Nimrot ko mikeriday. O mahaenay a sowal matepiˈay to sowal no Yutaya. Sanay ci Yosifos: “Mariˈang mariˈangay ci Nimrot, tatiitatiihay ko pikowan ningra. O harateng ningra i, toha sakaecaaw pidoko ko tamdaw to Kawas i, edengan a cecay pakayraan i, padadotoc ko tamdaw a mitiˈer to fadangalan ningra wangaˈ. Ano liyawen no Kawas a palenlen ko hekal i, o aˈodisen ako Cingra sanay, patireng to takaraway a pikacawan cowa ko mamatolem no nanom, mihaen a paˈodis toya mapatayay i lenlen a lalitengan sanay. Maolahay mitengil ko tamdaw tora sowal ni Nimrot, miharateng cangra ano midofdof to Kawas i, o makuliay no Kawas sanay. Hato misatapangto patireng cangra tora takaraway a pikacawan . . . Tada kalikiay kora demak, mitaˈlifay to niharatengan nangra.”—Likisi no Yutaya, saka 1 lolod, 114, 115 sinael (4 fedengan 2, 3 fatac).
Miˈosi to Sinael
(Satapangan 10:6-32) O wawa ni Ham i, ci Kus, ci Icip, ci Lipiya aci Kanan. 7 O teloc ni Kus i, o Sipa, o Hafila, o Sapta, o Raamah ato Saptika a tamdaw. O teloc ni Raamah i, o Sipa ato Titan a tamdaw. 8 Ira ko cecay a faˈinayan a wawa ni Kus ci Nimrot ko ngangan ningra, o saˈayaway a ciˈicelay a tamdaw cingra i rayray no ˈorip no tamdaw. 9 Tona mapadama no Kawas cingra saka, malacicediay a miˈadopay a tamdaw cingra, orasaka, sowal sa ko tamdamdaw, “Nanay palecaden no Tapang kiso a matiya ci Nimrotan a malacicediay a miˈadopay a tamdaw,” saan. 10 O satapangan no kitakit ningra i, mahaop ko Papilon, o Irik ato Akat, onini a tolo a pala i, itira i [Sinar] a maemin. 11 Naitini cingra a pasayra i Asiriya a micowat to kitakit ningra, patirengen ningra ko Ninifi ato Rihopot Ir ato Kalah a niyaroˈ. 12 Ato Risin a niyraoˈ i kalalaˈed no Ninifi ato Kalah a niyaroˈ. 13 O teloc ni Icip i, o Litiya, o Anam, o Lihap, o Naftoh, 14 o Patrus, o Kasluh ato Kriti a tamdaw, o teloc no Kriti a tamdaw ko Filistin a tamdaw. 15 O wawa ni Kanan i, ci Siton aci Hit. 16 Ona ci Kanan i, o tatoˈasan no Yipus, Amori, Kirkas, 17 Hifi, Arki, Sini, 18 Arfati, Cimari ato Hamati a tamdaw. Kakahad ko kalaklak no kasalalomaˈan no Kanan a tamdaw. 19 O kalangangan no sera nangra i, nai Siton talatimol tahira i Kirar i ngata no Kaca, ta pasiwali a tahira i Sotom, Komora, Atma ato Cipoim i ngata no Lasa. 20 Onini a teloc ni Ham i, paytemek sa a maroˈ i kasaniyroˈ no kitakit nangra, o sowal no paytemek ko sowal no kasafinacadan. 21 O sakakaay na Yafit ci Sim, o tatoˈasan no teloc no Hipray cingra. 22 O wawa ni Sim i, ci Ilam, ci Assur, ci Arpaksat, ci Lut aci Aram. 23 O teloc ni Aram i, o Uc, o Hul, o Kitir ato Misik a tamdaw. 24 O wawa ni Arpaksat ci Silah, o wawa ni Silah ci Ipir. 25 Tatosa ko wawa ni Ipir to faˈinayan, ci Pilik ko ngangan no cecay, nawhani, itiya i ˈorip ningra a misatapang a malicinowas ko tamdamdaw, o cecay i, ci Yoktan. 26 O teloc ni Yoktan i, o Almotat, o Silif, o Hacarmafit, o Yirah, 27 o Hatoram, o Ucal, o Tiklah, 28 o Opal, o Apimail, o Sipa, 29 o Ofir, o Hafilah ato Yopap a tamdaw. O teloc ni Yoktan konini a tamdaw a maemin. 30 Itira cangra a maroˈ i kawali a lotolotokan, nai Misa tangasa i Sifar. 31 O teloc ni Sim i, paytemek sa a maroˈ i kasaniyaroˈ no kitakit nangra, o sowal no paytemek ko sowal no kasafinacadan. 32 O lalomaˈan no tatoloay a wawa ni Nowa konini, madoedo a matilid ko rayray no kasalalomaˈan nangra. I ikor no lenlen i, nai wawa ni Nowa a masadak ko polong no kasafinacadan no hekal.