Pinengnengan to lalakaw no Mitosilay ato Nikaˈorip Rayray no Saˈopo
SAKA 2 FOLAD 3-9 ROMIˈAD
O ODOˈ KO KIMAD NO KAWAS | SATAPANGAN 12-14
“O Cecay Milingatay Tisowanan a Katatelekan”
(Satapangan 12:1, 2) Pasowal ko Tapang ci Apraman, “Liyasen ko niyaroˈ iso ato salawinawina iso ato lomaˈ ni wama iso, katayra i nitoroˈan Ako a pala. 2 O papalemeden Ako kiso a misaˈaloman ko wawa ato teloc iso, o mamalatadamaanay a kitakit cangra. Palemeden Ako kiso a palatadamaan to ngangan iso, ta pakayni tisowanan ko sakalemed no tamdaw.
it-2 1038 fiedac 4 fatac
Katatelekan
Katatelekan aci Apraham. Tiya milakowit to Iufratis ˈAlo ci Apram tayra i Kanan i, itiyaay misatapang malaˈosi ko katatelekan ningra ato Kawas. Oyato a Rikec a katatelekan i, itiniay i ikor to 430 miheca a mipatireng. (Kalatiya 3:17) Ta maroˈto ci Apraham i Misopotamiya, i Ur a niyaroˈ no Papilon i, palimoˈotan ni Yihofa cingra tayra i roma a pala, tangasato ngaˈ saheciento a pasowalen tora demak cingra. (Dmak 7:2, 3; Satapangan 11:31; 12:1-3) Kasadakan 12:40, 41 somowalay, o Israil tamdaw maroˈ i Icip ato Kanan, marepon ko 430 a miheca (toya romiˈad), miliyas cangra to nika lakuli i Icip. Itiniay i ˈayaw ni Yis to 1513 miheca Nisan folad 14 a romiˈad, toya romiˈad no Pitaˈlifan a Lisin. (Kasadakan 12:2, 6, 7) Mihaenay haw i, maedeng itiniay i ˈayaw ni Yis to 1943 miheca to Nisan folad 14 romiˈad a milakowit to Iufratis a ˈAlo ci Apraham tayra i Kanan, itiyaay misatapang malaˈosi ko katatelek ningra ato Kawas. Ta micomodto i Sikim no Kanan ci Apraham ikor, miliyaw haca patalahkal ko Kawas cingranan, misaheci pasowal toya sakiˈok Ningra. Sowal sa ko Kawas: “O papafelien Ako ko teloc iso tonini a sera”, mahapinangay itini oni katatelek milingatay toya sakiˈok no Kawas i Itin, halo paihkalay to mamalo tamdaw koniya teloc. (Satapangan 12:4-7) Ikor palidlid hananay ni Yihofa patalasekal koniya demak, matiliday i Satapangan 13:14-17; 15:18; 17:2-8, 19; 22:15-18.
(Satapangan 12:3) O palemeday tisowanan i, palemeden Ako cingra, o miˈkakay tisowanan i, o aˈkaken Ako cingra. Pakaynien Ako tisowanan ko sapalemed to kasafinacadan.”
w89 10/1 3 fiedac 4 fatac
Hano o Mamafanaˈ Kiso to Pakayniay ci Aprahamam a Demak
Tada masaka sapaan koniya sakiˈok, kina tosaay pakatengil ci Apraham toniya sakiˈok. (Satapangan 18:18; 22:18) Toha sakalaˈosiaw koniya sakiˈok, o papatikolen no Kawas a paˈorip ko tatoˈasan no “kasafinacadan”. Lomowadto cangra i, oniya sera o mamalecadto toya malahdaway a lakoing isaˈayaw, itiyato lalipahak ko kaˈorip nangra. Ikor i, o papasifanaˈen cangra, mafanaˈ to sasamaan a milifok to midaˈocay a sapalemed.—Satapangan 2:8, 9, 15-17; 3:17-23.
(Satapangan 13:14-17) Na miliyas ci Loto i, pasowal ko Tapang ci Apraman, “Nengnengen nai katomirengan iso a pasiwali, pasietip, pasitimol, pasiˈamis ko taliyok iso a pala. 15 Onini a minengnengan iso a pala a maemin i, pafelien Ako kiso ato teloc iso, o hanamoto konini a sera a tahadaˈoc. 16 Saˈalomanen Ako ko teloc iso a caayto ko mamafilo no tamdaw a misaˈosi, ano maedeng ko tamdaw a misaˈosi to alafoh no sera i, maedeng a misaˈosi to teloc iso. 17 Kalomowad! Katayra a romakat to polong nonini a sera, o papafelien Ako kiso tonini a sera,” han Ningra.
it-1 995 fiedac 11 fatac
Rikec, Holic
Mikitini i matiliday a likisi, iraay ko sowal, ano maˈaˈaca ko Israil tamdaw i, oya mamiˈaca a tamdaw itiniay i sangaˈayay kitiraan a mitapal tora sera, mitoroˈ to icowaay ko kalanganganan nora sera. Ano cisowal kora miˈacaay tamdaw to “maˈarawayto” ano sa i, masaˈosiayto kora kaˈaˈaca. Tiya kiˈoken ni Yihofa ci Apraham to papafelien cingra to Kanan i, papitapalan ci Apraham tora pala. Itiya cowa pasowal ci Apraham to “maˈarawayto” saan, ora lalangian i, wa ikorto a pafelien ko teloc ni Apraham tora pala alatek. (Satapangan 13:14, 15) Ano o soˈlinay koniya sowal i, o ci Mosi ko citatodongay a mitaypiyaw to Israil, ta palimoˈoten cingra “minengneng” toya mikiˈokan a pala i, o cacitatodongto ko Israil tamdaw a miala tora sera, o aitini i pikerid ni Yosuwa a miala tora sera. (Limoˈot 3:27, 28; 34:4; nengnengen ko Matay 4:8, tiya paˈarawen ni Satan ci Yis to kasakitakit.) Ora roma a demak i: Mirakatan a mitaliyok kora pala, mihaen a misaˈosi to aalaen kora pala. (Satapangan 13:17; 28:13) O roma no kalitengan a maˈaˈacaay a demak i, matiliday ko hakowaay ko kilang itira tora sera.—Palalinien to Satapangan 23:17, 18.
Kadkaden ko Odoˈ no Sinael
(Satapangan 13:8, 9) Saka, sowal sa ci Apram ci Lotoan, “O malawinawinaay kita, caay ka ngaˈay a macaculi kita, caay haca ka ngaˈay a macaculi ko pakaenay iso ato pakaenay ako. 9 Malacinowas kita. Nengnengen konini a kakahaday a pala i kaˈayaw iso, ano ikawanan kiso i, ikawili sa kako, ano ikawili kiso i, ikawanan sa kako,” han ningra.
w16.05 5 fiedac 12 fatac
Tano Olahen a Misalof to Nika Lacongis
12 Maˈoningay i Fangcalay Cudad, o sikawdan no Kawas tahalifaay to sakalacinowasaw a pakayraan, kawra masalofay nangra ko demak, makakangaˈayto a malacecay cangra. Patinakoen, ci Apraham ato wawawaen ningra ci Loto maka adihayay ko pinaˈorip. Kina cecayay, o pakaenay nangra malacongisay to pakaenan a pala. Ci Apraham sapisaysayaw tora tatiihay kalalaˈed, malangaˈay cangra, oraanto, papipiliˈen ningra isaˈayaw ci Loto. (Satapangan 13:1, 2, 5-9) Ikaˈayaway a miharateng ci Apraham to tao, paira to rihaday, tada o ngaˈayay a taˈarawan no mita! Kawra mihaen cingra masiponay cingra han? ˈArawhan cowa. Ikor noni, matatelekay ci Yihofa aci Apraham halo palemed cingranan. (Satapangan 13:14-17) Ano makahi kita midoedo to safalod no Fangcalay Cudad tano olah a misalof to lacongis i, o paparocoken no Kawas kita.
(Satapangan 14:18-20) Itiya i, masadak ci Milkicitik a hongti no Salim o citodongay to taˈong no Isatakaraway a Kawas cingra, mihawikid cingra to epang ato fadisosoˈ a epah a militemoh ci Apraman, 19 sowal sa a mipalemed ci Apraman, “Nanay, mapalemed no misangaˈay to kakarayan ato sera a isatakaraway a Kawas kiso Apram. 20 Nanay, mapahemek koya papipakalowiday tisowanan to ˈada a Isatakaraway a Kawas,” saan a palemed. Saka, ala hanto ni Apram nai niˈafasan ningra i kalaloodan a maamaan ko cecay no moetepay a pafeli ci Milkicitikan.
(Hipray 7:4-10) Haratengen, hakowa ko nika tadamaan ningra. Halo ci Apraham o tatoˈasan ita a pafeli i cingraan to cecay no moetepay no nialaan ningra i kalaloodan a safangcalay a dafong. 5 O teloc ni Lifi ko mamalacitodongay to taˈong. Doedoen nangra ko matiliday i Rikec a limoˈot a miala i finawlan no Israil to cecay no moetepay. Talacowa o malecaday cangra o teloc ni Apraham, nikawrira, alaen nangra i finawlan no tireng ko cecay no moetepay. 6 Caay ko tatoˈasan ni Lifi ci Milkicitik. Nikawrira, miala cingra i ci Aprahaman to cecay no moetepay. Ta palemeden ningra ci Apraham, o milayapay to nano nisowalan no Kawas a sapalemed. 7 O papalemed a tamdaw i, caay ka eca ikaka no mamilayap to sapalemed a tamdaw ko nika tadamaan ningra. 8 Ano pakayniay i citodongay to taˈong i, ano mialaala cangra to cecay no moetepay i, o mamapatay cangra. Nikawrira, ano pakayniay ci Milkicitikan i, o midaˈocay a maˈorip cingra o mialaay to cecay no moetepay saan ko sowal a matilid i Fangcalay Cudad. 9-10 O romasato, yo litemohen ni Milkicitik ci Apraham i, i tirengho no tatoˈasan ningra ci Aprahaman ci Lifi. Caayho ka hofocen cingra itiya. O tatoˈasan no mamisorot to cecay no moetepay ci Lifi. Saka, yo mipafeli ci Apraham to cecay no moetepay i, o iraayto ci Lifi a mikapot a pafeli to cecay no moetepay.
it-1 694 fiedac 11 fatac
Citodongay to Taˈong (Saysi)
O hongti no Salim ci Milkicitik, cowa ka lecad to kalo a saysi (ko·henʹ). Cowa pasowal ko Fangcalay Cudad to cima ko tatoˈasan ningra, cowa pasowal to ihacowaay a hofocen cingra ato hacowaay a mapatay. Ora saysi a saaroˈan ningra cowa ko mirocokan, awaay ko kaˈayaw ato midotocay i lalikor ningra. O hongti halo o saysi cingra. O saysi a saaroˈan ikakaayho to saaroˈan no Lifi, samanen tiya tahacada ci Apraham to sapalemed ningra i, mialaay to cecay no moetepay no nialaan ningra i kalaloodan a safangcalay a dafong pafeli i cingranan. Itiya i tirengayho ni Apraham a Lifian, hato pakayniay ci Aprahaman a mipafeli ci Milkicitikan to cecay no moetepay. (Satapangan 14:18-20; Hipray 7:4-10) Itini toniya pina a pakayraan mitaypiyaway ci Yis Kristoan ci Milkicitik. Ci Yis Kristo i, “o mamidoedo ci Milkicitikan a midaˈoc a malacitodongay to taˈong.”—Hipray 7:17.
Miˈosi to Sinael
(Satapangan 12:1-20) Pasowal ko Tapang ci Apraman, “Liyasen ko niyaroˈ iso ato salawinawina iso ato lomaˈ ni wama iso, katayra i nitoroˈan Ako a pala. 2 O papalemeden Ako kiso a misaˈaloman ko wawa ato teloc iso, o mamalatadamaanay a kitakit cangra. Palemeden Ako kiso a palatadamaan to ngangan iso, ta pakayni tisowanan ko sakalemed no tamdaw. 3 O palemeday tisowanan i, palemeden Ako cingra, o miˈkakay tisowanan i, o aˈkaken Ako cingra. Pakaynien Ako tisowanan ko sapalemed to kasafinacadan,” han no Tapang. 4 Saka, doedo hanto ni Apram ko sowal no Tapang a miliyas to Haran, mihakelong ci Loto i cingraan. Itiya i, pito a poloˈ ira ko lima ko mihecaan ni Apram. 5 Kriden ni Apram ko fafahi ningra ci Saray ato wawawaen ningra ci Loto ato dafong nangra i Haran ato polong no kuli ningra a tayra i Kanan. Na micomod cangra i Kanan i, 6 pararidho a romakat ca Apram a tayra i Sikim o fangcalay a pala, i ngata no cidek a kilang no Morih a niyaroˈ. (Itiya i, iraho a maro’ itira ko Kanan a tamdaw.) 7 Itiya i, paˈaraw ko Tapang ci Apraman, pasowal sa, “O papafelien Ako ko teloc iso tonini a sera,” han Ningra. Saka, mipatireng ci Apram itira to cecay a pipatoˈayaan to saki paˈaraway cingraan a Tapang. 8 Nanoya, malinah cingra a talatimol, tayra cangra i kawali no Pitil a niyaroˈ i lotolotokan, i kaetip i fiyaw no lotok ko Pitil, i kawali i ngata ko Ai a niyaroˈ, mipatireng cingra itira to taloˈan a maroˈ, mipatireng haca cingra itira to cecay a pipatoˈayaan a mitaˈong to Tapang. 9 Nanoya, panirnir sato cingra a talatimol a malinah, tayrato cingra i katimol no Kanan. 10 Itiya i, makedal ko Kanan, tada tataˈang ko kedal. Saka, talatimol sa a malinah ci Apram a tayra i Icip a pacarcar a maroˈ itira. 11 Yo tahirato cangra i salawacan no Icip, yo mamicomod cangra i, sowal sa ci Apram to fafahi ningra ci Sarayan, “O makapahay a fafahiyan kiso, 12 ano maˈaraw no Icip a tamdaw kiso i, o fafahi ningra asa tisowanan saka, o papatayen nangra kako, o papaˈoripen nangra kiso. 13 Saka, ano pasowal kiso i cangraan i, o safa ningra kako, han. Ta pakaynito i tisowanan ko saka caayto pipatay cangra i takowanan, o mamisangaˈayto cangra i takowanan,” han ningra. 14 Yo micomodto cingra i Icip i, soˈlinay maˈaraw no Icip a tamdaw ko nika kapah no fafahi ni Apram. 15 Maˈaraw no i lalomaˈay no lomaˈ no hongti a tapatapang ci Saray i, pasowalen nangra ko hongti a mahemek to nika kapah ningra, saka, mapacomodto cingra i lomaˈ no hongti. 16 Pakaynito ci Sarayan ko saka sangaˈayen no hongti ci Apram, pafelien noya hongti cingra to ˈalomanay a kolong ato lalifanohen a siri ato lofa ato lakuta ato kuli. 17 Nikawrira, tona alaen noya hongti ko fafahi ni Apram ci Saray saka, tefaden no Tapang ko sapades a misetiˈ toya hongti ato i lalomaˈay no lomaˈ no hongti a tamdaw, ciadadato cangra a maemin to katalawan a adada. 18 Saka, tahidangento no hongti ci Apram a milicay cingraan, “Nawiro haenen iso ko demak takowanan? Nawiro caay pasowal kiso takowanan to nika o fafahi iso cingra? 19 Nawiro o safa ako cingra saan kiso a mihai a malafafahi ako cingra? Ini ko fafahi iso, alaento cingra a minokay,” han ningra. 20 Itiya i, palimoˈot hanto no hongti ko itatihiay ningra a tapatapang a papilaplap ci Apraman a pasadak to kitakit ningra, saka, laplap hanto nangra cingra ato fafahi ningra ato polong no maamaan ningra a mapasadak.
SAKA 2 FOLAD 10-16 ROMIˈAD
O ODOˈ KO KIMAD NO KAWAS | SATAPANGAN 15-17
“Falican ni Yihofa ko Ngangan ni Apram aci Saray—Misamaanay Hani?”
(Satapangan 17:1) Yo siwa a poloˈ ira ko siwa ko mihecaan ni Apram i, paˈaraw ko Tapang cingraan, pasowal sa, “O ciˈicelay a Kawas Kako. Pihakelong kiso Takowanan, kao soˈlinay moecelay a tamdaw kiso.
it-1 277 fiedac 2 fatac
O Raraw, Mikimkimay to Raraw
O nidemakan ato nisangaˈan a dafong no tamdaw adihayay ko dangoc. Mikitiniay ci Ataman mirocok to raraw kita. (Loma 5:12; ˈOlic 51:5) Ci Yihofa o malefotay awaay ko dangoc, kawra “mafanaˈ Cingra to tireng ita, maharateng Ningra ko nika o nano sera kita,” siniˈada to tamdaw. (ˈOlic 103:13, 14) Itini pinengneng no Kawas, makalimay ci Nowa a midofdof, madimadi ko waywayan, itira i lintad ningra “awaay ko patelac” ningra. (Satapangan 6:9) O roma i, palimoˈotan no Kawas ci Apraham: “Kao soˈlinay moecelay a tamdaw kiso.” (Satapangan 17:1) Soˈliˈlin o ciraraway a cowa ko malefotay tamdaw ci Nowa aci Apraham, kawra o moecelay awaay ko patelac hananay minengneng ni Yihofa cangra, samanen “o falocoˈ ko ninengnengan” ni Yihofa. (1 Samuil 16:7; palalinien to 2 Hongti 20:3; 2 Rayray 16:9) Sanay ko Kawas palimoˈot to Israil tamdaw: “Kao soˈlinay ko falocoˈ namo i kaˈayaw Ako.” (Limoˈot 18:13; 2 Samuil 22:24) Pakaynien toya mipacakatan a sapatefoc no awaay ko dangoc a wawa no Kawas (Hipray 7:26), o ngangaˈay ko Kawas palo “moecelay tamdaw” han koya pasoˈlinay ato midofdofay a tamdaw, awaay ko patelac han cangra, miwacay to Niyahan o malefotay moecelay a misawkitay.—Loma 3:25, 26; nengnengen ko MADIMADIAY; MALEFOTAY.
(Satapangan 17:3-5) Hinokop sa ci Apram i sera, pasowal haca ko Kawas cingraan, 4 “O nitelekan Ako tisowanan i, o mamalatatoˈasan no ˈalomanay a finacadan kiso. 5 Nai anini a misatapang caayto ko ci Apram ko ngangan iso, ci Apraham hanto ko pitahidang tisowanan, nawhani patirengen Ako kiso a palawama no ˈalomanay a finacadan.
it-2 670 fiedac 5 fatac
Apraham
Ci Apraham ato paro no lomaˈ maedeng moetepayto miheca i Kanan, caayho ka ciwawa ci Sara. Saka, sapafeliaw to fafahiyan a matayalay ningra malo kapi fafahi no faˈinay, patado cingranan ciwawa. Makahiyay ci Apraham. Oranto i, itini ˈayaw ni Yis to 1932 miheca, tiya 86 ko mihcaan ni Apraham mihofocan ci Ismail. (Satapangan 16:3, 15, 16) Ikor noni demak, isaka 1919 miheca, ta 99 ko mihecaan ni Apraham i, palimoˈotan ni Yihofa ci Apraham papikerit to polong a faˈinayan i paro no lomaˈ, todong to wacay koni, iraay ko mikiriwiˈay matatelekay a kalalaˈed ni Apraham aci Yihofa. Itiyaay pasowalan ni Yihofa ci Apraham, o ngangan ningra caayto “ci Apram”, falicen palo “ci Apraham”, samanen o papatirengen kiso malo “wama no ˈalomanay” han Ningra. (Satapangan 17:5, 9-27; Loma 4:11) Caho ka halafin, o tatolo coyoh malo tamdaway a ira, pakaynian i ngangan ni Yihofa mihamham ci Apraham cangranan. Mikiˈok a pasowal ko coyoh, ilalomaˈ no cecay miheca, caciwawa ci Sara to faˈinayan!—Satapangan 18:1-15.
(Satapangan 17:15, 16) Pasowal haca ko Kawas ci Aprahaman, “Akato paka ci Sarayen ko fafahi iso, falicento ko ngangan ningra a paka ci Sara. 16 O papalemeden Ako cingra, ta mahofoc cingra to cecay a faˈinayan a wawa iso. O papalemeden Ako cingra, ta malawina no polong no kasakitakit cingra, o mamasadak i teloc ningra ko hongtingti,” han Ningra.
w09 2/1 13 fiedac
O Manan ko Mitaypiyawan no Ngangan?
To sapairasolaw to noikoran, mifalican no Kawas ko ngangan no tamdaw. Patinakoen, ci Apram tatodong nira i, “misaˈakawangan a wama” sanay. Falican no Kawas koni ngangan palo Apraham, tatodong i, “wama no ˈalomanay” sanay. (Satapangan 17:5, 6) Tatodong no Saray “halipacoliay” sanay, falican no Kawas paci Sara, tatodong i, “fafahiyan wawa no hongti” sanay. Maedeng mahemekay cingra, samanen pairasolay koni to mamalo tatoˈasan no hongti cingra.—Satapangan 17:15, 16.
Kadkaden ko Odoˈ no Sinael
(Satapangan 15:13, 14) Pasowal ko Tapang cingraan, “Kafanaˈ kiso, o mamirarakat i roma a kitakit ko teloc iso, o mamalakuli a masafayaˈ no tao cangra to sepat a soˈot a mihecaan. 14 Nikawrira, oya palakuliay cangraan a kitakit i, o tatefocen Ako, ano miliyas cangra naitira i, o mamihawikid cangra to adihayay a dafong a miliyas.
it-1 1204 fiedac
Karayaray no Likisi
Pasowalan ni Yihofa ci Apram (Apraham): “Kafanaˈ kiso, o mamirarakat i roma a kitakit ko teloc iso, o mamalakuli a masafayaˈ no tao cangra to sepat a soˈot (400) a mihecaan.” (Satapangan 15:13; nengnengen ko Dmak 7:6, 7.) Oniniya sowal itiyaay ˈayaw no pihofoc toya mikiˈokan a “teloc” ci Isakan. ˈAyaw ni Yis to 1932 miheca, itiya oya Icip a fafahiyan kuli ci Hakar mihofocay ci Ismailan, tangasato saka 1918 miheca, hofocan ci Isak. (Satapangan 16:16; 21:5) Miliyasto ko Israil to Icip i, mahererekayto a “masafayaˈ” no tao. (Satapangan 15:14) Ano patatikoren a misaˈosi koni 400 miheca i, tayniay isaka 1913 miheca to ˈayaw ni Yis, itiya maedeng 5 ko mihecaan ni Isak, sawad sanayho micoco ci Isak, tona itiniayho i roma kitakit ko aroˈ ningra, hato malifaay ningra koya “misafayaˈan no tao” a sapairasol a sowal, samanen tiya 19 ko mihecaan ni Ismail misamsamay ci Isakan. (Satapangan 21:8, 9) Ano nengnengen anini, pisamsam ni Ismail to teloc ni Apraham cowa ko maan, kawra itini i lintad no kakitaan o tada pakidemay a demak kora. O nika keter ni Sara ato mihayda ko Kawas a papilaplap ci Hakaran ato wawa ningra ci Ismailan, mamaˈaraw to karetengay kora demak. (Satapangan 21:10-13) Misongilaˈan no Fangcalay Cudad mitilid koni demak, patalahkalay to itiyaay misatapang koya 400 miheca a pisaloyaˈ no tao to Israil, tangasa masadak cangra nai Icip.—Kalatiya 4:29.
(Satapangan 15:16) Mataˈlif ko sepat a kasarayray no teloc iso, ta minokay itini ko teloc iso, nawhani, mitalaho Kako to nika tomes no raraw no Amori a tamdaw, ano o tatefocento ko raraw nangra, ta itiya Kako a milaplap i cangraan.”
it-1 233 fiedac 6 fatac
Masadak nai Icip
“Mataˈlif ko sepat a kasarayray no teloc.” Haratengen ita, na mipasowalan ni Yihofa ci Apraham, mataˈlif ko sepat a kasarayray no teloc ningra ngaˈ minokay cangra i Kanan. (Satapangan 15:16) Ya misatapang a malaˈosi ko katatelekan ni Apraham, tahira piliyasan no Israil to Icip, komoden 430 a mamihecaan. O maˈoningay i Fangcalay Cudad, koedaway ko ˈorip no tamdaw itiya, soˈliˈlin hatira, ora lintad cowa ko sepatay aca a kasarayaray, samanen kaitinian i Icip a tatokian i, 215 aca mihecaan. Ano tano Lifi ngasaw ko sowal, micomod cangra to Icip i, ora “sepat a kasarayray no teloc” i: (1) Ci Lifi, (2) ci Kohat, (3) ci Amram, (4) ci Mosi.—Kasadakan 6:16, 18, 20.
Miˈosi to Sinael
(Satapangan 15:1-21) Ikor nonini a demak i, matengil ni Apram i mapulusi ko sowal no Tapang, sowal sa cingraan, “Apramaw, aka ka talaw! Midipotay Kako tisowanan, pafelien Ako kiso to tadamaanay a sapakaolah,” han Ningra. 2 Nikawrira, pacaˈof sa ci Apram, “O Isatakaraway a Tapang! Tona awaay ko wawa ako i, ano pafelifeli Kiso to tadamaanay a sapakaolah i, o maan ko epoc saw? Edeng ci Iliicir o Tamaskus a tamdaw ko mamirocok i takowanan. 3 Caay pafeli Kiso to wawa i takowanan, saka, o nihofocanto i lomaˈ ako a kuli ko mamirocok to dafong ako,” han ningra. 4 Itiya i, matengil haca ni Apram ko sowal no Tapang cingraan, “Caay ko ci Iliicir a kuli iso ko mamirocok i tisowanan, deng o nihofocan iso a wawa ko mamirocok i tisowanan,” han Ningra. 5 Ta keriden no Kawas cingra a talapaputal, pasowal sa cingraan, “Picaˈa kiso to kakarayan, saˈosien ko fuˈis, o mamatiya tonini a fuˈis ko nika ˈaloman no teloc iso,” han Ningra. 6 Pasoˈlin ci Apram to Tapang, saka, o moecelay a tamdaw han no Tapang cingra. 7 Pasowal haca ko Tapang ci Apraman, “O Tapang Kako, Kako koya mikeriday tisowanan a papiliyas to Ur no Papilon. Pafelien Ako kiso tonini a sera to malo omah iso,” han Ningra. 8 Nikawrira, licayen ni Apram, “O Isatakaraway a Tapang, maanen ako ko nika fanaˈ to nika o mamaala ako konini a sera saw?” han ningra. 9 Pacaˈof sa ko Tapang, “Pataynien ko cecay a toloayho ko mihecaan a tawinaan a kolong ato cecay a toloayho ko mihecaan a tawinaan a siri ato cecay a toloayho ko mihecaan a okang a lalifanohen a siri, iraho ko cecay a topi ato cecay a topi no lotok,” han Ningra. 10 Saka, patayraen ni Apram konini a pinaˈorip i kaˈayaw no Tapang, tokaden ningra a milatosa a mipelaˈ konini, ta pasasiˈayawen ningra a parayaray a miteli, nikawrira, caay ka pelaˈen ningra koya ˈayam. 11 Ira ko lidep a patefo toya titi i, laplapen ni Apram a mipatalaw. 12 Yo picelemanto no cidal i, maredaˈ ko fotiˈ ni Apram, itiya i, matahpo no katalawan a rawdengan a toˈman cingra. 13 Pasowal ko Tapang cingraan, “Kafanaˈ kiso, o mamirarakat i roma a kitakit ko teloc iso, o mamalakuli a masafayaˈ no tao cangra to sepat a soˈot a mihecaan. 14 Nikawrira, oya palakuliay cangraan a kitakit i, o tatefocen Ako, ano miliyas cangra naitira i, o mamihawikid cangra to adihayay a dafong a miliyas. 15 Kiso tono miso i, wa kakayaˈ ko ˈorip iso, wa sarihaday sa kiso a miliyas to hekal a matadem i sera. 16 Mataˈlif ko sepat a kasarayray no teloc iso, ta minokay itini ko teloc iso, nawhani, mitalaho Kako to nika tomes no raraw no Amori a tamdaw, ano o tatefocento ko raraw nangra, ta itiya Kako a milaplap i cangraan,” han Ningra. 17 Yo micelemto ko cidal a toˈman i, fahal sa ira ko ciˈacefelay a parod ato marengrengay a namal a masadak, pakayra i laˈed noya niparayarayan a titi. 18 Saka, itiya i, itira toya pala a matatelek ko Tapang aci Apram. Pasowal sa Cingra, “O papafelien Ako ko teloc iso tonini a sera, onini a sera i, naitira i salawacan no Icip tangasa i Iufratis a tataˈngay a ˈalo, 19 [mahawpay] ko sera no Kini, Kinici, Katemoni, 20 Hiti, Pirici, Rifaim, 21 Amori, Kanan, Kirkas ato sera no Yipus a tamdaw,” han Ningra.
SAKA 2 FOLAD 17-23 ROMIˈAD
O ODOˈ KO KIMAD NO KAWAS | SATAPANGAN 18-19
“‘Misawkitay to Polong no Hekal’ a Kawas Mitekopay to Sotom ato Komora”
(Satapangan 18:23-25) Copa han ni Apraham ko Tapang a somowal, “Soˈlin palecad han Iso a mitekop ko awaay ko raraw ato ciraraway a tamdaw haw? 24 Ano ira i lalomaˈ no niyaroˈ ko lima a poloˈ a tamdaw to awaay ko raraw i, tekopen Iso kora niyaroˈ a maemin haw? Ano eca i, o sapaˈoripaw Iso toya lima a poloˈ a tamdaw, solol han Iso kora niyaroˈ haw? 25 Caay palecad Kiso a mipatay to awaay ko raraw ato ciraraway a tamdaw, caay sa kako. Ano haenen Iso i, malecad a matefoc ko awaay ko raraw ato ciraraway a tamdaw, caay sa kako. O mamoecel ko demak no misawkitay to hekal,” han ningra.
w17.04 18 fiedac 1 fatac
“Misawkitay to Polong no Hekal” a Tapang Moecelay ko Demak”
“O mamoecel ko demak no misawkitay to hekal” cowa saw? (Satapangan 18:25) Mihaen a milicay ci Apraham, paihkalay cingra to pakasoˈlinay ci Yihofaan to cowa masakakinih ko demak Ningra, ‘mipatay to awaay ko raraw ato ciraraway a tamdaw.’ Maedeng ikor no 400 a miheca, o sowal ni Yihofa to Niyahan “o ciˈicelay a paˈadingay, o masongilaˈay ko demak, o soˈlinay tatiˈeren, o moecelay, o caay pisakakinih,” sanay.—Limoˈot 31:19; 32:4.
(Satapangan 18:32) Saikorayto i, pasowal haca ci Apraham, “Tapangaw ako, nanay caay ka keter Kiso, haydaenho ko saikorayto a pisaliyaliyaw ako a mingitangit. Ano mamoetep ko matamaay i?” han ningra. Pacaˈof sa ko Tapang, “Ano mamoeteetep i, caay pitekop Kako tora niyaroˈ,” han Ningra.
Kodait—Pairaen ko Tokel a Miemem
Pakayni kodaitay o malefotay a taˈarawan ci Yihofa. (2 Pitiro 3:15) Adihayay a tinako i Fangcalay Cudad, ci Yihofa paihkal to tada taˈangayay a mihadidiay. (Nihimiya 9:30; Isaya 30:18) Tinakoen, tiya misaˈosi ci Yihofa palaˈafo to Sotom i, cisasaay ci Apraham to sasawkit no Kawas. Samaanan no Kawas pacaˈof ci Apraham hani? Mihadidiay ko Kawas mitengil to sowal ni Apraham, cowa ka ketonen ko sowal ningra, mihadidiay a milomal to cecacecay a saali ato sasa ningra, halo mikiˈok cingraanan, ano ira ko mamoetep a moecelay tamdaw i Sotom, cowato ko papalaˈafoen no Kawas koniya niyaroˈ. (Satapangan 18:22-33) Itini i paihkalay to miememay, patirengay ci Yihofa to mikiriwiˈay a taˈarawan!
(Satapangan 19:24, 25) Itiya i, talifahal han no Tapang a mitefad nai kakarayan ko marengrengay a miwarakay ko ˈacefel a namal i Sotom ato Komora a niyaroˈ. 25 Tekopen Ningra konini a tosaay a niyaroˈ ato polong no dafdaf ato polong no tamdaw ato molengaway i sera a pinaloma a maemin.
w10 11/15 26 fiedac 12 fatac
O Satadamaanay a Tatapangan Ita ci Yihofa!
12 Tona cowa tahacelem sa a pakihater ci Yihofa to tatiihay a demak, hanaca itiniayto kita i salikoray a ˈawaled, papasoˈlinen ita to kakalikito a paihkal ci Yihofa to satadamaanay a noka pikowan Ningra. Na mitefaday ci Yihofa to lenlen palaˈafo to mariˈangay tamdaw, palaˈafo to Sotom ato Komora, palaˈafo ci Falawan ato sofitay ningra, ci Sisira ato sofitay ningra, ci Sinakirip ato sofitay no Assiriya, awaay ko pakalowiday to satadamaanay a Kawas. (Satapangan 7:1, 23; 19:24, 25; Kasadakan 14:30, 31; Kakitaan 4:15, 16; 2 Hongti 19:35, 36) Mankora pakasoˈlinay kita, ci Yihofa cowa ko mamidaˈoc a pakihater to mariˈangay tamdaw a misakahemaw to fangcalay ngangan Ningra, cowa ko papakihater saan masamsam ko Misawacayay Tamdaw Ningra. O roma i, o nika ira ni Yis ato tahapinangan to isaikorayto koni mariˈangay a lekakawa ihekalayto a maˈaraw ita.—Matay 24:3.
Kadkaden ko Odoˈ no Sinael
(Satapangan 18:1) Paˈaraw ko Tapang ci Aprahaman i tatihi no cidek a kilang ni Mamri. Itiya i, o kafaedetan no romiˈad, maroˈ ci Apraham i fawahan no kopang a taloˈan ningra.
(Satapangan 18:22) Liyas sato koya tatosaay a tayra i Sotom, nikawrira, itira sa ko Tapang aci Apraham.
w88 8/15 23 fiedac 3-4 fatac
Iraay ko Pakaˈaraway a Tamdaw to Kawas Han?
Mafanaˈay kita nohatini hano pasowal ci Apraham toya mitaypiyaway to Kawas a coyoh i, hato o ci Yihofa ko sakasasowal ningra. Tona mitaypiyaway to Kawas koni coyoh, misongilaˈay a patorod to sowal no Kawas ci Aprahaman, mansa o matiliday i Fangcalay Cudad “paˈaraw ko Tapng [ci Yihofa] ci Aprahaman” saan.”—Satapangan 18:1.
Haratengen, o coyoh ngaˈayay a misongilaˈ patorod to lihaf no Kawas, matira anini kita pakayni i tingwa masongilaˈ a pafesel to sowal i roma a tamdaw. Mihaenay haw i, ci Apraham, Mosi, Manowa ato romaroma a tamdaw masasowal to coyoh i, hato o Kawas ko sakasasowal. Soˈlin pakaynian ni Yihofa tora coyoh a paihkal ko ˈodingar Ningra, kawra maˈaraway nangra ko Kawas cowa ka saan. Mankora cowa ka pisafelit to sowal ni Yohani koni: “Awaayho ko pakaˈaraway a tamdaw to Kawas.” (Yohani 1:18) O maˈaraway nangra nao mitaypiyaway to Kawas a coyoh aca.
(Satapangan 19:26) Misikol a minengneng ko fafahi ni Loto saka, malacilah a hecek cingra.
Padama to Tao Misiˈayaw to Saroero
3 Mipiliˈay ci Loto kalacafay to malafoay ko waywayan a Sotom tamdaw, tada mafolaay a saˈosi konini. (ˈOsien ko 2 Pitiro 2:7, 8.) Soˈlin cihafayay ko Sotom, kawra ˈakawangay ko mihadakan ni Loto a teloc. (Satapangan 13:8-13; 14:12) Tiya tefaden no Kawas ko namal i, o fafahi ni Loto tangoˈolay to Sotom a niyaroˈ ato itiraay a tamdaw, cowa ka pidoedo to sowal ni Yihofa, malahdaway ko ˈorip. O tatosaay fafahiyan wawa ni Loto samanay hani? O hafaˈinay nangra mapatayay i Sotom. Cowa ko omah ato hafay aca ko malahdaway ni Loto, ka adayayan i, malahdaway ko fafahi ningra. (Satapangan 19:12-14, 17, 26) Tahalifa ci Loto toniya pasangaray i, mihadidiay ci Yihofa a micada cingranan.
Miˈosi to Sinael
(Satapangan 18:1-19) Paˈaraw ko Tapang ci Aprahaman i tatihi no cidek a kilang ni Mamri. Itiya i, o kafaedetan no romiˈad, maroˈ ci Apraham i fawahan no kopang a taloˈan ningra. 2 Caˈngaw sa cingra a minengneng i, maˈaraw ningra ko tatolo a tomirengay a tamdaw itira, saka, talaˈayaw sa cingra a mihamham cangraan, hinokop sa cingra i sera, 3 Sowal sa cangraan, “Kamaroˈho a pahanhan itini, patahekaenho ako kamo ta pasaliyad a romakat. 4 Mialaho kako to nanom to kamonanawan namo to waˈay, pahanhanho i kalaeno no kilang. 5 Mialaho kako to miming a kakaenen namo, komaenho kamo ta ciˈicel a pararid a romakat. Tayni kamo i lomaˈ ako i, tada mahemek kako, nanay, papipatahekaenho kako tamowanan,” han ningra. Pacaˈof sa cangra, “Miahoid tisowanan, mapakaroray kiso,” han nangra. 6 Tamor sato ci Apraham a micomod i taloˈan, sowal sa ci Saraan, “Kalamkamen a miala to sangaˈayay a aped no emi, sangaˈen ko epang a mihodhod,” han ningra. 7 Ta, cikay sato cingra a tayra i masafelaway a kolong a mipiliˈ to cecay a koengelay masoesoay a tofor a kolong, patorod hanto ningra ko matayalay ningra tonini, kalamkamen a mipatala han ningra cangra. 8 Alaen ningra ko simal no hacol ato hacol no kolong ato titi no kolong a pataheka i cangraan. Cingra ko toeto sanay a pataheka i cangraan i kalaeno no kilang, ta komaento cangra. 9 Licayen nangra ci Apraham, “Icowa ko fafahi iso ci Sara?” han nangra. Pacaˈof sa cingra, “Ira i taloˈan,” han ningra. 10 Pasowal sa ko cecay nangra, “I masamatini no roma a miheca i, o mamiliyawho kako a tayni, itiya i, o mamahofoc ko fafahi iso ci Sara to cecay a faˈinayan a wawa,” han ningra. Itiya i, itira i fawahan no taloˈan ci Sara, i aikor noya tamdaw a mitengil tonini. 11 Itiya i, matoˈasto ci Apraham aci Sara, halafinto a caayto ka lalaˈ ci Sara. 12 Saka, dokdok sa ci Sara a matawa, sowal sa to tireng ningra, “Matoˈasto kako, matoˈasto ko faˈinay ako i, o caciwawaho kako saw?” saan cingra. 13 Saka, kapoiˈ han no Tapang ci Apraham a milicay, “Nawiro dokdok sa ci Sara a matawa, sowal sa to tireng ningra, ‘Matoˈasto kako i, maedengho a ciwawa saw?’ saan. 14 Ano hatira i, iraay ko caay ka laheci a demak no Tapang saw? O masamatini no roma a miheca miliyawho Kako a tayni, itiya i, o mamahofoc ci Sara to cecay a faˈinayan a wawa,” han Ningra. 15 Matalaw ci Sara saka, “Caay ka tawa kako,” saan. Pasowal sa Cingra, “Matawaay kiso i, soˈlinay matawaay kiso,” han Ningra. 16 Nanoya, liyas sato itira konini a tamdaw, tayra cangra i takaraway a mikecor to Sotom a niyaroˈ. Mihakelong ci Apraham i cangraan a mipatono. 17 Itiya i, harateng sa ko Tapang, “Caay ka ngaˈay a kilifen Ako ci Apraham to dademaken Ako. 18 O mamalatadamaanay a ciˈicelay a kitakit ko teloc ningra, pakaynien Ako cingraan ko pipalemed to polong no kasakitakit. 19 O sakapipiliˈ Ako cingraan i, ngaˈay palimoˈoten ningra ko wawa ato teloteloc ningra a papihakelong Takowanan, ta midoedo cangra to sowal Ako a patalahkal to moecelay a demak. Ano mahaen i, lahecien Ako ko niketonan Ako a sowal ci Aprahaman,” saan Cingra.
SAKA 2 FOLAD 24 –3 FOLAD 1 ROMIˈAD
O ODOˈ KO KIMAD NO KAWAS | SATAPANGAN 20-21
“Matooray ni Yihofa ko Nikiˈokan a Sowal Ningra”
(Satapangan 21:1-3) Doedoen no Tapang ko niketonan Ningra a sowal a palemed ci Saraan, 2 cipuyapuy cingra, yo matoˈasto ci Apraham i, mahofoc cingra to cecay a faˈinayan a wawa ni Apraham, madoedo ko nipatonekan no Kawas a romiˈad a mahofoc koya wawa. 3 Ci Isak han ni Apraham a pangangan koya wawa.
wp17.5 14-15 fiedac
O “Fafahiyan Wawa no Hongti” Hananay no Kawas Cingra
Matawaay ci Sara itiya, cowa pakasoˈlin cingra o sanay han? Cowa! Sowal no Fangcalay Cudad: “O mitiˈeray to Kawas ci Sara. Talacowa mataˈlifto ko kaciwawaan ningra, nikawrira, mapafeli no Kawas cingra to sakaciwawa ningra. Nawhani, “O soˈlinay a tatiˈeren koya miketonay to sowal i tamiyanan,” saan cingra.” (Hipray 11:11) Mafanaˈay ci Sara ci Yihofaan, pakasoˈlinay cingra to iraay ko ˈicel no Kawas a mitoor to mihayan Ningra. Cima ita cowa ko papalahad to matiniay noka pakasoˈlin hani? Tongalen ita ko nika fanaˈ to Kawas, mihaen i, mamahapinang o ˈosi ko nika pakasoˈlin ni Sara. Soˈlin o pakayraan ni Yihofa a palaˈosi to mikiˈokan Ningra i, nolatekay tada kafahkaˈan ita, latek matira ci Saraan a matawaen, kawra soˈlinay o tatiˈeren a Kawas ci Yihofa, o tatooren Ningra palaˈosi ko cecacecay a sowal Ningra.
“Tengilen ko Sowal ni Sara”
90 ko mihecaan, irato ko mitalaan ni Sara a demak, mihofoc to wawa no kanonoˈan a faˈinay. Itiya ci Apraham 100 ko mihecaan, mitooran ningra ko sowal no Kawas ci Isak han a pangangan ko wawa, tatodong nora, “mapakatawa” sanay. Sowal sa ci Sara, “mapakatawa no Kawas kako, o pakatengilay a tamdaw tonini a demak i, o mamikihatiya takowanan a matawa.” (Satapangan 21:6) Itiya maedeng marorayay ko tireng ni Sara, kawra mahapinangay ko lipahak no pising ningra. Oniniya wawa soˈlinay o kasapaan a sapakaolah no Kawas, ikor pairaay to adihayay a lipahak ni Sara. Nikawrira, onini sapakaolah iraay ko karetengay a ˈinorong.
Lima ko mihecaan ni Isak misawaday micoco, mipataheka ci Apraham to lafang a malawla. Kawra toni a kalawlaan a romiˈad, iraay ko kacalemceman a demak. Maˈaraway ni Sara, oya 19 ko mihecaan a wawa ni Hakar ci Ismail cowa ka tomerep a misamsam toya mimingay a Isakan. Ora waywayan ni Ismail cowa kono kaemangay a noka makakalona. Ikor somowalay ci Pawlo itini i sapatemer no Kawas, soˈlinay o miroeroay ci Ismail ci Isakan sanay. Mafanaˈay ci Sara, ci Isak cowa aca ko wawa no niyah, o mamitamorongho cingra to masaka limlaan a ˈinorong itini i araaw no Kawas. Nohatini tahasiˈayaway ci Isak to katalawan a demak, saka satimolo saan ci Sara, patodicek pasowal ci Aprahaman papilaplap ci Hakaran aci Isakan.—Satapangan 21:8-10; Kalatiya 4:22, 23, 29.
Samaanayto ci Apraham hani? Sowal sa ko Fangcalay Cudad: ‘Ci Apraham pakayni i demak no wawa, tada maketer cingra’ sanay. Tada maolahay ci Apraham ci Ismailan, oninian ko sakapohaw no mata ningra, caka pakaˈaraw tora pakayraan itiya. Kawra pafeselay cipinang to kihcod ci Yihofa, haen hanto Ningra pasowal ci Apraham: “Aka ka roray a miharateng tora wawa atora fafahiyan a kuli ci Hakaran. Doedo han ko sowal ni Sara a midemak, nawhani nai ci Isakan a masadak koya niketonan Ako a sowal to sakaciteloc iso.” Kawra mihaiyay ko Kawas to dadipoten ci Hakar aci Ismail. Ya madimadiay a Aprahaman doedo hanto ningra ko sowal no Kawas a midemak.—Satapangan 21:11-14.
(Satapangan 21:5-7) Yo mahofoc ci Isak i, semoˈot ko mihecaan ni Apraham. 6 Sowal sa ci Sara, “Mapakatawa no Kawas kako, o pakatengilay a tamdaw tonini a demak i, o mamikihatiya takowanan a matawa,” saan cingra. 7 Pasowal haca cingra, “Cima ko mafanaˈay a paliˈayaw ta somowal ci Aprahaman to nika o mamicocoho ci Sara to wawa sanay saw? Nikawrira, matoˈasto cingra i, mahofoc kako to cecay a faˈinayan a wawa ningra,” saan ci Sara.
(Satapangan 21:10-12) Maˈaraw ni Sara cangra i, sowal sa ci Aprahaman, “Laplapen a pasadak kora kuli a fafahiyan ato wawa ningra. Caay ka ngaˈay a mikapot to wawa ako ci Isakan ko wawa nora fafahiyan a mirocok to dafong iso,” han ningra. 11 Tada maroray ci Apraham a miharateng tonini a demak, nawhani, o wawato ningra ci Ismail. 12 Nikawrira, pasowal sa ko Kawas ci Aprahaman, “Aka ka roray a miharateng tora wawa atora fafahiyan a kuli ci Hakaran. Doedo han ko sowal ni Sara a midemak, nawhani nai ci Isakan a masadak koya niketonan Ako a sowal to sakaciteloc iso.
(Satapangan 21:14) Cila sato a romiˈad to dafak i, alaen ni Apraham ko kakaenen ato cecay a falako a nanom a pafeli ci Hakaran, pafafaen ningra ci Hakar toya wawa, ta ocoren ningra ci Hakar a papiliyas. Saka, liyas sato ci Hakar itira, tayra cingra i Pirsipa a kohkohan, moraraw cingra to lalan itira toya pala.
Kadkaden ko Odoˈ no Sinael
(Satapangan 20:12) Soˈlinay, o safa ako cingra. O malecaday ko wama niyam o roma ko wina a malikakaay kami, ikorto i, mararamoday kami.
wp17.3 12 fiedac
“Makapahay a Fafahiyan Kiso”
Ci Sara o malecaday ko wama o roma ko wina a safa ni Apraham. (Satapangan 20:12) O mahaenay noka raramod cowa ka tatodong to aniniay lintad, kawra cowa ka lecad ko itiyaay a pakayraan. O tamdaw itiya talifakayho ko tireng, mingataayho to malefotay tireng na Atam aci Ifa to ˈayaw no mararaw cangra, mararamod ko mangangataay a salawina cowaho ciadada to mirocokan a adada. Nikawrira, mataˈlifto ko 400 a miheca i, o ˈorip no tamdaw mahecaday to aniniay a ˈapoto, itiya o Rikec ni Mosi mikecengayto to mangangataay a salawina a mararamod.—Lifi 18:6.
(Satapangan 21:33) Ta paloma ci Apraham i Pirsipa to cecay a salofal a kilang, itira cingra a mitaˈong to Tapang o midaˈocay a maˈorip a Kawas.
w89 10/1 20 fiedac 9 fatac
Ci Apraham—O Taˈarawan no Miharatengay Malawidang ato Kawas a Tamdaw
9 Patalahkalay ci Apraham to roma a pasoˈlinay a waywayan. Sanay mitilid ko Fangcalay Cudad: ‘Mipatireng ci Apram itira to cecay a cadada saki Yihofa.’ (Satapangan 12:7) Alatek mahawpay to pipatoˈayaan to pinaˈorip, samanen ono Hipray sowal to “cadada” hananay, o “pipatoˈayaan a kitiraan” sanay. Ikor itini i roma a tolo a demakan, patalahkalay ci Apraham to pasoˈlinay falocoˈ. O roma i, ‘micangacangay to ngangan ni Yihofa.’ (Satapangan 12:8; 13:18; 21:33) Itini no Hipray sowal, ‘micangacang—to ngangan’ hananay mahawpay ko “milasil—to ngangan’, o sanay. O paro no lomaˈ ni Apraham ato itiraay a Kanan tamdaw maedeng pakatengilay to nika timolo ningra milasil to ngangan ni Yihofa. (Satapangan 14:22-24) Mahecaday, anini o ciharatengayho to sakala widangaw to Kawas a tamdaw papasoˈlinen ko falocoˈ a micangacang to ngangan ni Yihofa. Mirienang to mitosilay demak, “pakaynien ita i ci Yisan ko nika rarid ita a pahemek to Kawas to todong no sapatoˈaya ita. O sapatoˈaya no patalahkalay to nika fanaˈ ita Cingraan a ngoyos ita konini.”—Hipray 13:15; Loma 10:10.
Miˈosi to Sinael
(Satapangan 20:1-18) Malinah ci Apraham nai Mamri a tayra i katimol no Kanan, itira cingra i kalalaˈed no Katis ato Sur a maroˈ. Yo itiraho cingra i Kirar a maroˈ i, 2 sowal sa to tao, “O safa ako,” saan to fafahi ningra ci Saraan, saka, ocoren ni Apimilik o hongti no Kirar ko tamdaw a papiala ci Saraan. 3 Yo cecay a dadaya, paˈaraw ko Kawas ci Apimilikan i lemed, pasowal sa, “O papatayen kiso! Ora niˈafasan iso a fafahiyan i, o fafahi no tao!” han Ningra. 4 Itiya i, caho piraod ci Apimilik ci Saraan, sowal sa cingra, “Tapangaw! Awaay ko raraw ako! Tekopen Iso kako ato finawlan ako haw? 5 O sowal ni Apraham i, o safa ako konini a fafahiyan saan cingra, o romasato, haloya fafahiyan a mihai. O pidemak ako tonini i, o makoracay ko falocoˈ ako, awaay ko patelac no demak ako!” han ningra. 6 Pacaˈof sa ko Kawas i lemed cingraan, “Hai, mafanaˈayto Kako o makoracay ko falocoˈ iso a midemak tonini, saka, ˈmeten Ako kiso to sakaecaaw ka ciraraw iso Takowanan, ta caay pitefing kiso cingraan. 7 Patikolen imatini kora fafahiyan i faˈinay ningra, o paliˈayaway to sowal cingra, o papatadoen ningra kiso a mitolon, ta caay ka patay kiso. Nikawrira, pasowalen Ako kiso, ano caay patikolen iso kora fafahiyan i faˈinay ningra i, o mamapatay kiso ato polong no finawlan iso,” han Ningra. 8 Cilasato a romiˈad to papacem i, saˈopoen ni Apimilik ko polong no tapatapang a matayalay ningra, pasowalen ningra tonini a demak cangra, saka, tadamatalaw cangra. 9 Tahidang hanto ni Apimilik ci Apraham, licayen ningra a mikapoiˈ cingra, “Nawiro haenen iso ko demak takowanan? O maan ko raraw ako tisowanan iro pakapadesen iso kako ato kitakit ako? Midemak kiso to caay ko dademaken a demak, 10 nawiro haenen iso ko demak saw?” han ningra. 11 Pacaˈof sa ci Apraham, “O harateng ako i, o caay ka ngodo to Kawas ko itiniay a tamdaw a maemin, saka, o sapiˈafasaw nangra to fafahi ako, latek patayen nangra kako saan kako. 12 Soˈlinay, o safa ako cingra. O malecaday ko wama niyam o roma ko wina a malikakaay kami, ikorto i, mararamoday kami. 13 Saka, yo papiliyas ko Kawas takowanan to niyaroˈ a patayra i roma a kitakit a misarakarakat i, sowal han ako cingra, ‘Ano talacowacowa kita i, o kaka ako cingra han ko sowal, onini ko tadaolah iso i takowanan,’ han ako cingra.” han ningra. 14 Itiya i, patikol hanto ni Apimilik ci Sara ci Aprahaman, o romasato, pafelien ningra ci Apraham to masafelaway a siri ato masafelaway a kolong ato kuli. 15 Pasowal sa cingra ci Aprahaman, “Nengnengen, o sera ako konini, ano icowaay ko kaolahan iso i, aroˈ han itira,” han ningra. 16 Pasowal sa cingra ci Saraan, “Pafelien ako to cecay a patek a rimood no ekim ko kaka iso, onini i, o wacay to nika o makoracay kiso, ta mafanaˈ ko tamdamdaw to nika caay pidemak kiso to kangodoan a demak,” han ningra. 17-18 Pakayni tonini a demak ni Sara o fafahi ni Apraham saka, caayto ka pawawaen no Tapang ko fafahifahi ni Apimilik i lomaˈ no hongti. Patadoen ni Apraham ci Apimilik a mitolon, saka, adahen no Tapang koya ilalomaˈay no lomaˈ ningra a fafahiyan, ta ciwawato cangra.