Pinengnengan to lalakaw no Mitosilay ato Nikaˈorip Rayray no Saˈopo
SAKA 3 FOLAD 2-8 ROMIˈAD
O ODOˈ KO KIMAD NO KAWAS | SATAPANGAN 22-23
“Palifetan no Kawas ci Apraham”
(Satapangan 22:1, 2) Nanoya halafinto i, lifeten no Kawas ci Apraham. Tahidangen no Kawas cingra, “Aprahamaw,” han Ningra. Pacaˈof sa cingra, “Ini kako,” han ningra. 2 Pasowal sa ko Kawas, “Keriden ko wawa iso, oya kaolahan iso a edengan a wawa iso ci Isak a tayra i Moriya a pala, itira toya tatoroˈen Ako tisowanan a lotok, pacakaten a palanisakimoodan a mitodoh a sapatoˈaya i Takowanan cingra,” han Ningra.
w12 1/1 23 fiedac 4-6 fatac
Hano Palimoˈoten no Kawas ci Apraham Papipatoˈaya to Wawa ci Isakan?
Sinanoten kora sowal ni Yihofa ci Aprahaman. Sowal sa ci Yihofa: “Keriden ko wawa iso, oya kaolahan iso a edengan a wawa iso ci Isak . . . sapatoˈaya i Takowanan cingra.” (Satapangan 22:2) “Oya kaolahan” a wawa iso, sanay ci Yihofa ci Aprahaman, mahapinangay to mafanaˈay Cingra to o kalimlaan a wawa ni Apraham ci Isak. Mahaenay ko Kawas a tangongol ko nika olah to Wawa ci Yisan, mankora kina tosaay a nai kakarayan a pasowal, “o kakaolahan Ako a Wawa kiso. O kakahemekan Ako kiso,” satomaan.—Marko 1:11; 9:7.
Haratengen ita hena, maˈaraw ni Yihofa ko pisemsem a mapatay ko kaolahan a Wawa, samaanay ko falocoˈ Ningra. Pakayni ci Yihofaan, maedeng o tada kasomadan a demak koni.
Papihaenen ni Yihofa ci Apraham a midemak, hato cowa ko madoloay a demak, nikawrira, saikor micongedan a patoˈaya tora wawa. Cowa ka tomeseng ci Yihofa mapatay ko wawa ni Apraham, ˈarawhan Cingra sa i, makahiyay a mitamorong to adada no falocoˈ, “caay ka ˈidi ko Kawas a pafeli i titaanan to Wawa Ningra. Kinafalah Cingra tonini to saki titaanan.” (Loma 8:32) Misamaanay hano makalim Cingra a miemem toniya adada no falocoˈ hani? Mihaen Cingra o “sakaciˈorip ita to midaˈocay a ˈorip.” (1 Yohani 4:9) Tada maolahay ko Kawas kitaanan! Coko mamihaen a patiko kita to olah Ningra han?
(Satapangan 22:9-12) Tahirato cangra i nitoroˈan no Kawas ci Aprahaman a pala, misangaˈto ci Apraham to pipatoˈayaan, taringen ningra ko kasoy i fafaed no pipatoˈayaan, ta soˈot han ningra ko wawa ningra, teli han ningra i fafaed no nitaringan a kasoy i pipatoˈayaan, 10 ta tatoy sa ci Apraham to poˈot a sapipacokan to wawa ningra. 11 Nikawrira, itiya i, lekal sa ko coyoh [ni Yihofa] nai kakarayan a mitahidang cingraan, “Aprahamaw! Aprahamaw!” Han ningra. Pacaˈof sa ci Apraham, “Nimaan? Ini kako,” han ningra. 12 Pasowal sa koya coyoh, “Aka pilaheci, aka piriˈang tora wawa. Mafanaˈto kako imatini to nika ngodo iso to Kawas, nawhani, caay ka ˈidi kiso a pafeli Cingraan to edengan a wawa iso,” han ningra.
(Satapangan 22:15-18) Ira haca nai kakarayan ko coyoh [ni Yihofa] a mitahidang cingraan, 16 “O sowal [ni Yihofa] i, ‘Tona matini ko demak iso a caay ka ˈidi a pafeli i Takowanan to edengan a wawa iso, saka, mitoroˈ Kako to ngangan Ako a miketon to sowal, 17 o papalemeden Ako kiso, saˈalomanen Ako a palenak ko teloc iso, o mamatiya o adihay no fuˈifuˈis i kakarayan ato nika adihay no tafok i riyar ko nika ˈaloman nangra, o mamalowid no teloc iso ko ˈada nangra. 18 O tatayni i Takowanan ko polong no kasakitakit a milongoc to pipalemed Ako cangraan, matiya o pipalemed Ako to teloc iso. Nawhani, midoedo kiso to limoˈot Ako,’ saan [ci Yihofa],” han noya coyoh.
w12 10/15 23 fiedac 6 fatac
Midofdof to Kawas, Mikitira i Miketonan ato Mikiˈokan a Sowal Ningra Milifok to Epoc
6 Ci Yihofa pakayni to sapasoˈlinaw no ciraraway tamdaw, to mamalaˈosi ko mikiˈokan Ningra, miketonay to sowal Cingra, matira itini i Icikil 17:16: “O sowal no Isatakaraway a Tapang [ci Yihofa] i, “Pakaynien Ako i midaˈocay a ˈorip Ako ko piketon to sowal,” sanay. Kina 40 a miketon to sowal ci Yihofa sanay ko Fangcalay Cudad. Miketonay to sowal ko Kawas ci Aprahaman, matatelek i cingranan. Pakayni tonini katatelekan, kina pinapinaay a mikiˈok to sowal. Mihaenay a mafanaˈ ci Apraham ora mikiˈokan a wawa, nao teloteloc ni Isak. (Satapangan 12:1-3, 7; 13:14-17; 15:5, 18; 21:12) Oraanto i, palifetan ni Yihofa ci Apraham, papipatoˈaya to kaolahan wawa ci Isakan malo misakimoodan a mitodoh a sapatoˈaya. Tada o pakidemay a sapalifet ci Aprahaman koni, kawra cowa ka pisatayotayo a mitoor tora sowal cingra. Tiya mamipacok ci Apraham to wawa i, iraay ko coyoh a miconged, saanto a milasil to sakiˈok no Kawas: “O sowal [ni Yihofa] i, . . . ‘saka, mitoroˈ Kako to ngangan Ako a miketon to sowal, o papalemeden Ako kiso, saˈalomanen Ako a palenak ko teloc iso, o mamatiya o adihay no fuˈifuˈis i kakarayan ato nika adihay no tafok i riyar ko nika ˈaloman nangra, o mamalowid no teloc iso ko ˈada nangra. Nawhani, midoedo kiso to limoˈot Ako,’ saan [ci Yihofa].”—Satapangan 22:1-3, 9-12, 15-18.
Kadkaden ko Odoˈ no Sinael
(Satapangan 22:5) Itiya i, pasowal sa ci Apraham toya matayalay ningra, “Kaitiniho kamo ato lofa, tayraho kako aci Isak itiraw a mitaˈong to Kawas, ta patikolto kami itini tamowanan,” han ningra.
w16.02 11 fiedac 13 fatac
O Widang ni Yihofa Cingra
13 ˈAyaw a macokacok to lotok, pasowalan ni Apraham ko matayalay: “Kaitiniho kamo ato lofa, tayraho kako aci Isak itiraw a mitaˈong to Kawas, ta patikolto kami itini tamowanan.” (Satapangan 22:5) O manan ko tatodong nora sowal ningra hani? Mafanaˈay cingra to papatoˈayaen ci Isak kiya, misakaniway to matayalay to papatikol cangra minokay han? Cowa. Pasowalay ko Fangcalay Cudad to harateng ni Apraham. (ˈOsien ko Hipray 11:19.) Nawhani o falocoˈ ni Apraham i, “maedeng ko Kawas a palowad a paˈorip ci Isakan nai patay,” sanay. Mafanaˈay cingra to nika malitengayto ko niyah aci Sara, ˈarawhan patikolan ni Yihofa ko saka ciwawaaw nangra, saka irato ci Isak. (Hipray 11:11, 12, 18) Mahapinangay ni Apraham, awaay ko manan to kafokilan ni Yihofa. Mihaenay haw i, ano mananto ko mamafekad a demak, o papatikol maˈorip ko wawa, hongaˈ malaˈosi ko mikiˈokan ni Yihofa. Mankora, o wama no ‘mitiˈeray ko falocoˈ a tamdaw,’ hanto cingra!
(Satapangan 22:12) Pasowal sa koya coyoh, “Aka pilaheci, aka piriˈang tora wawa. Mafanaˈto kako imatini to nika ngodo iso to Kawas, nawhani, caay ka ˈidi kiso a pafeli Cingraan to edengan a wawa iso,” han ningra.
it-2 1027 fiedac 1-2 fatac
Paliˈayaw a Mafanaˈ, Paliˈayaw a Misaˈosi
Mipiliˈay a kalasaka dademak to paliˈayaway mafanaˈ a ˈicel. Masasiromaay koni to paliˈayaway misaˈosi hananay, tatodong i, mipiliˈay ko Kawas kalasaka dademak to paliˈayaway mafanaˈ a ˈicel Ningra; o matiniay a ˈicel Ningra mitooray to moecelay palinian ato kimad Ningra i Fangcalay Cudad. Cowa ka hecad to paliˈayaway a misaˈosi hananay, o maˈoningay i Fangcalay Cudad patahkalay, ˈayaw no mamisaˈosi to demak ko Kawas isaˈayawayho a mitiyawca tora demak.
Patinakoen itini i Satapangan 11:5-8, isaˈayawayho minengneng ko Kawas to pakayraan no Papil ikor ngaˈ, misaˈosiay to sasamaanen ko demak a mipalak to misahalakaan nora tatiihay tamdaw. Tona tada tatiihay ko waywayan no Sotom ato Komora, pasowalan ni Yihofa ci Apraham aocoren Ningra ko tatosaay a coyoh, “tayra a minengneng to nika o soˈlinay caay hakiya koya matengilay Ako a nipakokotan nangra a sowal.” (Satapangan 18:20-22; 19:1) O roma i, ‘mafanaˈayto Kako’ to o masamaanay tamdaw ci Apraham, sanay ko Kawas; tiya mitatoy to poˈot ci Apraham sapipatoˈayaaw ci Isakan i, sanayto ko sowal nora coyoh: “Mafanaˈto kako imatini to nika ngodo iso to Kawas, nawhani, caay ka ˈidi kiso a pafeli [ci Yihofaan] to edengan a wawa iso.”—Satapangan 18:19; 22:11, 12; nengnengen ko Nihimiya 9:7, 8; Kalatiya 4:9.
Miˈosi to Sinael
(Satapangan 22:1-18) Nanoya halafinto i, lifeten no Kawas ci Apraham. Tahidangen no Kawas cingra, “Aprahamaw,” han Ningra. Pacaˈof sa cingra, “Ini kako,” han ningra. 2 Pasowal sa ko Kawas, “Keriden ko wawa iso, oya kaolahan iso a edengan a wawa iso ci Isak a tayra i Moriya a pala, itira toya tatoroˈen Ako tisowanan a lotok, pacakaten a palanisakimoodan a mitodoh a sapatoˈaya i Takowanan cingra,” han Ningra. 3 Cila sato a romiˈad to dafak maratar ci Apraham a mipelaˈ to kasoy to malo sapitodoh to sapatoˈaya, ta paˈorongen ningra i koror no lofa, keriden ningra ci Isak ato tatosa a matayalay ningra, malahakelong cangra a tayra i nitoroˈan no Tapang a pala. 4 Saka tolo a romiˈad i, maˈarawto ni Apraham i ra:ay koya pala. 5 Itiya i, pasowal sa ci Apraham toya matayalay ningra, “Kaitiniho kamo ato lofa, tayraho kako aci Isak itiraw a mitaˈong to Kawas, ta patikolto kami itini tamowanan,” han ningra. 6 Papiˈorongen ni Apraham ci Isak to kasoy to sapitodoh to sapatoˈaya, mitatoy cingra to poˈot ato latoc no namal. Lahakelong sa a malowama a tatosa a romakat. 7 Sowal sa ci Isak, “Amaaw,” han ningra. Pacaˈof han ni Apraham, “O wayaw, nimaan?” Han ningra. Licay sa ci Isak, “Ira ko latoc no namal ato kasoy i, icowaay ko sapatoˈaya a tofor a siri saw?” Han ningra. 8 Pacaˈof han ni Apraham, “O wayaw, irato ko nipatalaan no Kawas a sapatoˈaya a tofor a siri,” han ningra. Ta pararidho cangra a tatosa a talaˈayaw a romakat. 9 Tahirato cangra i nitoroˈan no Kawas ci Aprahaman a pala, misangaˈto ci Apraham to pipatoˈayaan, taringen ningra ko kasoy i fafaed no pipatoˈayaan, ta soˈot han ningra ko wawa ningra, teli han ningra i fafaed no nitaringan a kasoy i pipatoˈayaan, 10 ta tatoy sa ci Apraham to poˈot a sapipacokan to wawa ningra. 11 Nikawrira, itiya i, lekal sa ko coyoh [ni Yihofa] nai kakarayan a mitahidang cingraan, “Aprahamaw! Aprahamaw!” Han ningra. Pacaˈof sa ci Apraham, “Nimaan? Ini kako,” han ningra. 12 Pasowal sa koya coyoh, “Aka pilaheci, aka piriˈang tora wawa. Mafanaˈto kako imatini to nika ngodo iso to Kawas, nawhani, caay ka ˈidi kiso a pafeli Cingraan to edengan a wawa iso,” han ningra. 13 Sanengnengneng sa ci Apraham to taliyok i, maˈaraw ningra ko cecay a okang a siri, tahasifed i demedemetan ko tosa a waˈa noya siri. Tayra sato cingra a mitadtad a miala toya siri, oninito a siri ko sapatidos ningra to wawa ningra to malo sasakimooden a mitodoh a sapatoˈaya. 14 Saka, “Yihofa yiri” han ni Apraham koya pala. Tahanini a masowal no tamdamdaw koya, “Itira i lotok [ni Yihofa,] mapatalato Ningra,” sanay. 15 Ira haca nai kakarayan ko coyoh [ni Yihofa] a mitahidang cingraan, 16 “O sowal [ni Yihofa] i, ‘Tona matini ko demak iso a caay ka ˈidi a pafeli i Takowanan to edengan a wawa iso, saka, mitoroˈ Kako to ngangan Ako a miketon to sowal, 17 o papalemeden Ako kiso, saˈalomanen Ako a palenak ko teloc iso, o mamatiya o adihay no fuˈifuˈis i kakarayan ato nika adihay no tafok i riyar ko nika ˈaloman nangra, o mamalowid no teloc iso ko ˈada nangra. 18 O tatayni i Takowanan ko polong no kasakitakit a milongoc to pipalemed Ako cangraan, matiya o pipalemed Ako to teloc iso. Nawhani, midoedo kiso to limoˈot Ako,’ saan [ci Yihofa],” han noya coyoh.
SAKA 3 FOLAD 9-15 ROMIˈAD
O ODOˈ KO KIMAD NO KAWAS | SATAPANGAN 24
“Fafahi ni Isak”
(Satapangan 24:2-4) Sowal sa cingra toya satoˈasay a misimaway to dafong ningra a matayalay a tamdaw, “Telien ko kamay iso i ˈawaled ako a miketon to sowal. 3 Papitoroˈen ako kiso to Tapang a Kawas no kakarayan ato sera a papiketon to sowal i takowanan, aka ka ilalomaˈ no Kanan a fafahiyan a mikilim kiso to malo kadafo ako, 4 katayra kiso i niyaroˈ ako, i malininaay ako a mikilim to malo fafahi no wawa ako ci Isak,” han ningra.
wp16.3 14 fiedac 3 fatac
“Hai, Makahi Kako”
Papiketonan ni Apraham ci Iliicir to sowal, aka itini i Kanan a mikilim to hafafahi ni Isak, samanen cowa ka ngodo cowa ka pidoko cangra ci Yihofaan. Mafanaˈay ci Apraham to nika tatiih no Kanan tamdaw, o tatefocen ni Yihofa cangra, caka ciharateng cingra to wawa minaol to tatiihay ko waywayan a tamdaw, mafiyor nangra. Hanaca ihekalay mafanaˈ ci Apraham, itini i araaw no Kawas tada masaka limlaan ko saaroˈan ni Isak.—Satapangan 15:16; 17:19; 24:2-4.
(Satapangan 24:11-15) Yo tahirato cingra toya pala i, papipitosoren ningra ko lakuta i tatihi no tefon i paputal no niyaroˈ. Itiya i, o picelemanto no cidal, o piradoman no fafahiyan itiya. 12 Sowal sa cingra a mitolon, “[Yihofaaw], o Kawas no tapang ako ci Apraham Kiso. Nanay, sangaˈayen Iso ko demak ako anini, nanay doedoen Iso ko niketonan Iso a sowal i tapang ako ci Aprahaman. 13 Tomireng kako imatini i tatihi no tefon, o tatayni a maemin ko kaying no niyaroˈ a miradom. 14 O papasowal kako to cecay nangra, ‘Telienho ko ˈatomo iso, pananomenho kako,’ ano han ako, ano pasowal sa cingra, ‘Dada pinanom, miradomho kako to sapananom to lakuta iso,’ ano saan cingra i, mafanaˈto kako to nika onini a kaying ko nipiliˈan Iso to malo fafahi no matayalay iso ci Isak. Ano mahaen i, mafanaˈto kako to nipidoedo Iso to niketonan Iso a sowal i tapang ako,” saan cingra a mitolon. 15 Yo caho ka harek cingra a mitolon i, irato a tahira i tefon ci Ripika, pakiˈafala han ningra ko ˈatomo a miˈorong, o wawa ni Pituil cingra. Ci Pituil i, o wawa ni Nahor ato fafahi ningra ci Mileka. O safa ni Apraham ci Nahor.
wp16.3 14 fiedac 4 fatac
“Hai, Makahi Kako”
Dotoc sanay ko sowal ni Iliicir, tahira cingra i tatihi no tefon mitolonay to Kawas, mingitangit ci Yihofaan mikilim to hafafahi ni Isak. Haenen ni Iliicir mitolon ci Yihofa, o sasaalien ningra koya tayraay miradom a fafahiyan to nanom, ano makahi pananom cingra, halo pananom to lakuta i, o cingra ko mipiliˈan no Kawas to mamalo fafahi ni Isak. (Satapangan 24:12-14) Cima kora tayraay i tefon halo matoor ko nitolonan ni Iliicir hani? Ci Ripika! Ano matengilay ni Ripika ko pilomal ni Iliicir tora sowal to paro no lomaˈ ningra i, maedeng fahkaˈen cingra!
(Satapangan 24:58) Saka, tahidang hanto nangra ci Ripika a milicay cingraan, “Makahi kiso a mihakelong tonini a tamdaw haw?” Han nangra. Pacaˈof sa cingra, “Hai, makahi kako,” han ningra.
(Satapangan 24:67) Ta kerid hanto ni Isak ci Ripika a pacomod i nao kamaroˈan no wina ningra a kopang a taloˈan, raramod sato cangra. Maolah ci Isak ci Ripikaan, naitiya i kapatayan no wina ningra tahanini, aninito a mahinom ko falocoˈ ningra.
wp16.3 14 fiedac 6-7 fatac
“Hai, Makahi Kako”
Soˈlinay haw i, ˈayaw no pina lipay milicayanto ni Iliicir ci Apraham: “Ano caay ka kahi koya kaying a mihakelong i takowanan i, samaan hanto saw?” Pacaˈof ci Apraham: “Awaay ko kihar iso toya niketonan iso a sowal.” (Satapangan 24:39, 41) Pakayni to paro no lomaˈ ni Pituil, o haharatengen ko falocoˈ ni Ripika. Nanay malaˈosi koni saka raramodaw sanay ci Iliicir, mansa to cila papacem sapinokayawto mikerid ci Ripikaan a minokay i Kanan. Kawra, paro no lomaˈ ni Pituil sapifootawho ci Ripikaan to moetep a romiˈad. Hato, haen han nangra pasowal ci Iliicir: “Tahidangenho niyam koya wawa, ano maan sa ko sowal ningra.”—Satapangan 24:57.
Nohatini mamipiliˈ ci Ripika, sasamaan ko caˈof ningra hani? Wa ngitangiten ningra ko wama ato kaka hamaan papiliyasen cingra, tayra i cowa ko kafanaˈan a maraayay a pala han? Oniniya sakararamodaw o sakayat ni Yihofa, tada o tadamaanay a fadangalan koni wa saan a micada ci Ripika han? Talifahal saan a misiˈayaw to mahaenay a noka falic, sasamaan ko pisaˈosi ningra hani? Sowal sa cingra: “Hai, makahi kako.”—Satapangan 24:58.
Kadkaden ko Odoˈ no Sinael
(Satapangan 24:19, 20) Maharek a minanom koya matayalay i, sowal sa ci Ripika, “Miradomho kako to saki lakuta iso, ta maadah ko soˈaw nanira,” han ningra. 20 Ta tangsol han ningra a mitaktak ko paro noya ˈatomo a nanom i toptop, ta cumikay haca cingra a tayra i tefon a miradom, haen han ningra tangasa i kaadahan no soˈaw noya lakuta a maemin.
wp16.3 12-13 fiedac
“Hai, Makahi Kako”
To cecay romiˈad to picoleman no cidal, maharekto ci Ripika miradom i, iraay ko cecay matoˈasay miraod i cingranan, saan a misaali: “Pananomenho kako to miming.” Maˈaraw ni Ripika to naitiniay i raayay a tayni cingra, tangsol miepod to miˈafalaan ningra a ˈatomo, palayap to lietecay nanom i cingranan. Itiya, maˈaraway ni Ripika ko mamoetep a lakuta mipitolosay i raringid no toptop, cowaho ka pananomen. Mahapinangay ningra to pasayraay ko mata nora matoˈasay minengneng cingranan, ira sako falocoˈ mipadang tora matoˈasay, sato ko sowal ningra: “Miradomho kako to saki lakuta iso, ta maadah ko soˈaw nanira.”—Satapangan 24:17-19.
Cowa ko mimingay aca ko sapananom to lakuta, tahira i karenecan nangra wangaˈ. Ano masoˈaw ko lakuta i, 95 kongsen a nanom ngaˈ maedengay, ano lahecien a pananom kora mamoetep a lakuta i, maedeng pi:na a tatokian pisaliyaliyaw a miradom, ngaˈay aca cowa ka tada masoˈaw kora lakuta. Soˈlin cowa ka fanaˈ ci Ripika to hahakowa ko raradomen a nanom, kawra makalimay cingra patahkal to hinapaladaˈay a waywayan toniya matoˈasay. Hayi han nora matoˈasay ko harateng ni Ripika, maˈaraw cingra misatikotikol, misafilofilo a mitomes to ˈatomo, mitaktak i toptop tora nanom.—Satapangan 24:20, 21.
wp16.3 13 fiedac, ilaenoay safanaˈ.
“Hai, Makahi Kako”
Hekakeremayto ko romiˈad, halafinayto i tefon ci Ripika anca tahalomaˈ ci Ripika i, mafotiˈayto ko paro no lomaˈ cowa ka saan ko sowal no sinael. Hanaca, cowa ka calemcemen ko paro no lomaˈ a mikilim cingranan.
(Satapangan 24:65) Licay sa toya matayalay ni Apraham, “Cima kora nai omahay a pasayniay i titaanan a romakat a tamdaw?” Han ningra. Pacaˈof sa koya matayalay, “O wawa no tapang ako,” han ningra. Saka, tahepo hanto ni Ripika to tapodo ko pising ningra.
wp16.3 15 fiedac 3 fatac
“Hai, Makahi Kako”
Taynito kita pisatapangan noni lalakaw. O ˈdil no micelemay a cidal mitahepoayto to sera, tangasato koya masakapotay i katimol no Kanan. Maˈaraw ni Ripika ko cecay faˈinayan romakat i omaomahan, hato midotimay a nengnengen cingra. Tangsol maepod ci Ripika nai lakuta saan ko Fangcalay Cudad, alatek caho ka pipitolos ko lakuta i, maepodayto cingra, milicay ci Iliiciran: “Cima kora nai omahay a pasayniay i titaanan a romakat a tamdaw?” Matengil to ci Isak cingra, tangsol a citapodo mitahepo to pising ningra. (Satapangan 24:62-65) Hano mihaen to demak cingra hani? O patalahkalay to nika ngodo to hafaˈinay ningra. Pakayni to aniniay a tamdaw, matiniay a noka patalahkal to pikangodo hato o matelangayto a pakayraan, kawra kita maemin ngaˈayay minanam ci Ripikaan, palahad to misapoeneray a capeling.
Miˈosi to Sinael
(Satapangan 24:1-21) Itiya i, tadamatoˈasto ci Apraham, mapalemed [ni Yihofa] a tahadaˈoc no ˈorip ningra ko nidemakan ningra a maemin. 2 Sowal sa cingra toya satoˈasay a misimaway to dafong ningra a matayalay a tamdaw, “Telien ko kamay iso i ˈawaled ako a miketon to sowal. 3 Papitoroˈen ako kiso to Tapang a Kawas [ci Yihofa] no kakarayan ato sera a papiketon to sowal i takowanan, aka ka ilalomaˈ no Kanan a fafahiyan a mikilim kiso to malo kadafo ako, 4 katayra kiso i niyaroˈ ako, i malininaay ako a mikilim to malo fafahi no wawa ako ci Isak,” han ningra. 5 Nikawrira, sowal sa koya matayalay ningra, “Ano caay ka sapiliyasan koya fafahiyan to lomaˈ ningra a mihakelong takowanan a tayni tonini a pala i, samaan hanto saw? O kakeriden ako ko wawa iso a tayra i niyaroˈ iso haw?” Han ningra. 6 Pacaˈof sa ci Apraham, “Aka pacieci kiso a mikerid to wawa ako a patayra toya pala. 7 Nawhani, o nikeridan no Tapang a Kawas [ci Yihofa] no kakarayan kako a paliyas to niyaroˈ ako, ora pala no malininaay ako, miketonto Cingra to sowal i takowanan, o papafelien Ako ko teloc iso tonini a sera saan. Saka, o aocoren Ningra ko coyoh Ningra a paiˈayaw a mipatala to sakangaˈayaw iso a miala itira to malo fafahi no wawa ako. 8 Ano caay ka kahi koya fafahiyan a mihakelong tisowanan a tayni i, awaay ko kihar iso toya niketonan iso a sowal. Nikawrira, aka pacieci kiso a mikerid to wawa ako a tayra toya pala,” han ningra. 9 Saka, teli hanto noya matayalay ningra ko kamay i ˈawaled no tapang ningra ci Apraham, miketon cingra to sowal to sapidoedoaw to nipatorodan ni Apraham cingraan a demak. 10 Itiya i, piliˈ hanto noya matayalay ningra nai lalomaˈ no lakuta no tapang ningra ko moetep a lakuta ato masamaamaanay a dafong ningra, ta tayra cingra i kamaroˈan ni Nahor a niyaroˈ i kaˈamis no Misopotamiya. 11 Yo tahirato cingra toya pala i, papipitosoren ningra ko lakuta i tatihi no tefon i paputal no niyaroˈ. Itiya i, o picelemanto no cidal, o piradoman no fafahiyan itiya. 12 Sowal sa cingra a mitolon, “[Yihofaaw,] o Kawas no tapang ako ci Apraham Kiso. Nanay, sangaˈayen Iso ko demak ako anini, nanay doedoen Iso ko niketonan Iso a sowal i tapang ako ci Aprahaman. 13 Tomireng kako imatini i tatihi no tefon, o tatayni a maemin ko kaying no niyaroˈ a miradom. 14 O papasowal kako to cecay nangra, ‘Telienho ko ˈatomo iso, pananomenho kako,’ ano han ako, ano pasowal sa cingra, ‘Dada pinanom, miradomho kako to sapananom to lakuta iso,’ ano saan cingra i, mafanaˈto kako to nika onini a kaying ko nipiliˈan iso to malo fafahi no matayalay iso ci Isak. Ano mahaen i, mafanaˈto kako to nipidoedo Iso to niketonan Iso a sowal i tapang ako,” saan cingra a mitolon. 15 Yo caho ka harek cingra a mitolon i, irato a tahira i tefon ci Ripika, pakiˈafala han ningra ko ˈatomo a miˈorong, o wawa ni Pituil cingra. Ci Pituil i, o wawa ni Nahor ato fafahi ningra ci Milka. O safa ni Apraham ci Nahor. 16 O makapahay a kaying ci Ripika, o limcedanho cingra, awaayho ko mitefingay a faˈinayan cingraan. Malikelon cingra i tefon a miradom, tomesen ningra ko ˈatomo to nanom ta macakat cingra. 17 Litemohen noya matayalay cingra, sowal sa cingraan, “Pananomenho kako to miming,” han ningra. 18 Sowal sa ci Ripika, “Singsiaw, dada pinanomho,” han ningra. Ta tangsol han ningra a miepod i ˈafala ningra koya ˈatomo, kakoy han ningra to kamay a pananom koya matayalay. 19 Maharek a minanom koya matayalay i, sowal sa ci Ripika, “Miradomho kako to saki lakuta iso, ta maadah ko soˈaw nanira,” han ningra. 20 Ta tangsol han ningra a mitaktak ko paro noya ˈatomo a nanom i toptop, ta cumikay haca cingra a tayra i tefon a miradom, haen han ningra tangasa i kaadahan no soˈaw noya lakuta a maemin. 21 Itiya i, terep sa koya tamdaw a minengneng cingraan, mangalay cingra a mafanaˈ to palaheci [ni Yihofa] to katayni ningra.
SAKA 3 FOLAD 16-22 ROMIˈAD
O ODOˈ KO KIMAD NO KAWAS | SATAPANGAN 25-26
“Pacakayan ni Isau ko Tatodong no Fisac Ningra”
(Satapangan 25:27, 28) Yo taˈangayto konini a tatosaay i, malamafanaˈayto a miˈadopay a tamdaw ci Isau, maolah cingra i palapalaan a miˈadop, nikawrira, masinanot ci Yakop, mararid cingra i lomaˈ to romiˈamiˈad. 28 Pakaka ko olah ni Isak ci Isauan, nawhani, maolah cingra a komaen to ˈaredetay a niˈadopan ningra. Nikawrira, pakaka ko olah ni Ripika ci Yakopan.
it-2 640-641 fiedac
Yakop
O pinangan ni Isau maolahay a miˈadop i palapalaan, o kaolahan a wawa no wama. Ci Yakop i, “o masinanotay [Hipray sowal, tam hananay. No Kowaping a pihongyak: O moecelay, o awaay ko patelac no waywayan sanay ko tatodong] marariday cingra i lomaˈ,” maolahay cingra to rihaday a nokaˈorip, misaˈicelay a midimokos to tayal no lomaˈ, mansa o kaolahan a wawa no wina. (Satapangan 25:27, 28) Itini i roma a sinael, ora “tam” hananay a Hipray sowal, mitoroˈay to kahemekan no Kawas a tamdaw sanay. Patinakoen, “o mananamay a mipatay to tamdaw i, miˈintel to moecelay a tamdaw,” sanay ko Fangcalay Cudad, nikawrira, mikiˈokay ci Yihofa, ‘o awaay ko patelac a tamdaw, o rarihaday ko ˈorip.’ (Taneng 29:10; ˈOlic 37:37) Ci Yopu o madimadiay a tamdaw, ‘awaay ko patelac [Hipray sowal o tam sanay], moecelay ko waywayan.’—Yopu 1:1, 8; 2:3.
(Satapangan 25:29, 30) Yo cecay a romiˈad mitangtang ci Yakop to kahngangay a raˈraˈ, ira a minokay ci Isau na miˈadop, macahiw cingra, 30 sowal sa cingra ci Yakopan,
(Satapangan 25:31-34) Pacaˈof sa ci Yakop, “Ano pafeli kiso takowanan to nika citodong iso to fisac i, pafelien ako kiso to kahngangay a raˈarˈ,” han ningra. 32 Pasowal sa ci Isau, “Haida! Haida! Sakapatayanto kako i, malimaanho ko nika citodong to fisac,” han ningra. 33 Pacaˈof sa ci Yakop, “Iˈayawho kiso a miketon to sowal, pafelien kako to nika citodong iso to fisac,” han ningra. Saka, keton sato ci Isau to sowal, “Pafelien ako ci Yakop to nika citodong ako to fisac,” saan. 34 Saka, ala hanto ni Yakop ko miming a epang ato kahngangay a raˈraˈ a pafeli ci Isauan, maharek ci Isau a komaen minanom i, lowad sato cingra a miliyas. Mahaenay ko pisakahmaw ni Isau to nika citodong ningra to fisac.
Hano Paihkalen ko Miakoˈiday?
11 Itini Fangcalay Cudad iraay ko tinakoan to cangoˈotay ko nai falocoˈay a miakoˈid. Ci Isau, o wama wina ningra maolahay ci Yihofaan, halo pasifanaˈ cangra to wawa ka mangodo ato miakoˈid to palinian no Kawas. Kawra cowa pisaareteng cingra to fangcalay dafong. (ˈOsien ko Hipray 12:16.) Samaan mahapinang ita to cangoˈotay ci Isau to nai falocoˈay a miakoˈid hani? Pakayni cecay kaysing a raˈraˈ, pacakay hananay ningra ko fadangalan no fisac i safa ci Yakopan. (Satapangan 25:30-34) Ikorto, masomaday ci Isau to misaˈosian no niyah. Samanen cowa pisaareteng cingra to fadangalan no fisac, awaay ko tatodong ningra a ngaliwngiw.
it-2 1129 fiedac
Fisac, Sakakaay Wawa
Nano litengho, o sakakaay wawa no paro no lomaˈ iraay ko tadamaanay a saaroˈan, citodongay cingra midotoc a mala tawki no lomaˈ. Ano milayap to hafay no lomaˈ i, o aikaka to kalitosa ko lilam ningra. (Limoˈot 21:17) Kina cecayay, midoedoan ni Yosif to kadadoedo no salikaka a misilsil a pakamaroˈ cangranan, sakakaay a wawa ci Riupin itiniay raringid ningra a maroˈ a mitahka. (Satapangan 43:33) Kawra o Fangcalay Cudad cowa ka sahto saan tano kasasilsil no malikakaay a misaˈosi to ˈakawangay saaroˈan. Tohati:niay o citanengay anca o samadimadiay a wawa paisaka cecayan, nolatek cowa ko fisac a wawa.—Satapangan 6:10; 1 Rayray 1:28; palalinien to Satapangan 11:26, 32; 12:4; nengnengen ko TODONG NO FISAC WAWA; MIDOTOC TO HAFAY.
Kadkaden ko Odoˈ no Sinael
(Satapangan 25:31-34) Pacaˈof sa ci Yakop, “Ano pafeli kiso takowanan to nika citodong iso to fisac i, pafelien ako kiso to kahngangay a raˈarˈ,” han ningra. 32 Pasowal sa ci Isau, “Haida! Haida! Sakapatayanto kako i, malimaanho ko nika citodong to fisac,” han ningra. 33 Pacaˈof sa ci Yakop, “Iˈayawho kiso a miketon to sowal, pafelien kako to nika citodong iso to fisac,” han ningra. Saka, keton sato ci Isau to sowal, “Pafelien ako ci Yakop to nika citodong ako to fisac,” saan. 34 Saka, ala hanto ni Yakop ko miming a epang ato kahngangay a raˈraˈ a pafeli ci Isauan, maharek ci Isau a komaen minanom i, lowad sato cingra a miliyas. Mahaenay ko pisakahemaw ni Isau to nika citodong ningra to fisac.
(Hipray 12:16) Pinaˈon kamo. Latek malamaˈodangay ano eca i, malamitodongay [ci Isauan] a caay ka ngodo to Kawas ko cima namo. Falic han [ni Isau] to cecay a kaen ko todong no sapirocok ningra a fisac a ngangan.
Salicay no Miˈosiay Tamdaw
Nengnengen ko Hipray 12:16: “Latek malamaˈodangay ano eca i, malamitodongay [ci Isauan] a caay ka ngodo to Kawas ko cima namo. Falic han [ni Isau] to cecay a kaen ko todong no sapirocok ningra a fisac a ngangan.” O manan ko kalimlaan noni sinael hani?
Tarokos ci Pawlo cowa ko mamilengo to silsil no rayray ni Misiya itini, ao sapatalipaˈelalaw to Krisciyang ‘kararid a pakayra i moecelay a lalan a romakat.’ Ano maˈodang cangra i, “misiikoray to siniˈada no Kawas.” O ka adayayan ko teloc. (Hipray 12:12-16) Ci Isau pakayniay i coos no tireng a mifalah to ‘fangcalay dafong’, o Krisciyang ano maˈodang cangra o mamatira ci Isauan.
Itiniay i kakitaan a lintad maˈorip ci Isau, iraay ko fadangalan ningra pacakat to sapatoˈaya ci Yihofaan. (Satapangan 8:20, 21; 12:7, 8; Yopu 1:4, 5) Tona mitooray to coos no tireng, pakayniay i cecay kaysing a raˈraˈ, falah hananay ni Isau konini sapalemed. O roma i, na paliˈayaway pasowal ci Yihofa o kakariˈangen no tao ko teloc ni Apraham sanay, alatek cowa ka saka marorayaw ci Isau, hato falah han ningra ko todong no fisac. (Satapangan 15:13) Hanaca cifafahiyay ci Isau to tatosa cowa ko midokoay to Kawas a fafahiyan, pararom to falocoˈ no wama wina, patahkalay koni to maolah maolahay tono hekal a demak cingra, cowa ka olah tono Kawas a demak. (Satapangan 26:34, 35) ˈArawhan i, ci Yakop taˈangayay ko kasasiroma, cifafahiyay cingra to midokoay to Kawas a fafahiyan!—Satapangan 28:6, 7; 29:10-12, 18.
(Satapangan 26:7) O tadamakapahay ci Ripika. Saka, ano milicay ko itiraay a tamdaw cingraan to pakayniay i fafahi ningra i, sowal sa cingra, “O safa ako ci Ripika,” han ningra. Nawhani matalaw cingra to pipatayan no itiraay a tamdaw cingraan a miˈafas ci Ripikaan.
it-1 612 fiedac 5 fatac
Mangah a Sowal
Manaokaniw, mirikecay ko Fangcalay Cudad to tatiihay a mangah a sowal, kawra ngaˈayay pasowalen ko awaay ko tatodong to sakafanaˈaw a tamdaw to soˈlinay demak cowa ka saan. Sanay ci Yis: “Aka pafelien ko waco to fangcalay. Ano haenen namo i, latek pasayra i tamowanan a mikalat. Aka fahkolen i fafoy ko cincu. Ano haenen namo i, latek sakasaken naira.” (Matay 7:6) Pakayniay tonini a lalangian, ci Yis kina pinapinaay cowa ka patodicek a pacaˈof to pilicay no tao, anca cowa ka haemin saan mifanaˈ to demak, toha sapiliyasaw to katalawan. (Matay 15:1-6; 21:23-27; Yohani 7:3-10) Ci Apraham, Isak, Rahap, Ilisa, cangra i, na mikilifay to ˈada, anca cowa pisaheci a pasowal to caay pidoko ci Yihofaan a tamdaw, hatiraay ko lalangian nangra.—Satapangan 12:10-19; saka 20 fedengan; 26:1-10; Yosuwa 2:1-6; Yakop 2:25; 2 Hongti 6:11-23.
Miˈosi to Sinael
(Satapangan 26:1-18) Yo maˈoripho ci Apraham i, iraayto ko cecay a kedal toya pala, anini sa i, ira haca ko roma a kedal saka, tayra ci Isak i Kirar a mitiˈer to hongti no Filistin ci Apimilikan. 2 Paˈaraw [ci Yihofa] ci Isakan, pasowal sa cingraan, “Aka ka tayra kiso i Icip, kaitirato a maroˈ i pakamaroˈan Ako tisowanan a pala, 3 ano itira kiso a maroˈ i, mikapot Kako tisowanan, o romasato, palemeden Ako kiso. O papafelien Ako kiso ato teloc iso tonini a sera, o dadoedoen Ako ko nika tatelekan Ako aci wama iso ci Apraham. 4 O papalenaken Ako a misaˈaloman ko teloc iso a matiya o fuˈifuˈis no kakarayan ko nika ˈaloman nangra, o papafelien Ako cangra tonini a sera. O tatayni i Takowanan ko polong no kasakitakit a mingitangit to sapalemed Ako cangraan, matiya o pipalemed Ako to teloc iso. 5 Nawhani, mihakelong ci Apraham Takowanan, midoedo cingra to polong no rikec ato limoˈot Ako, saka, pakalemeden Ako kiso,” han Ningra. 6 Saka, itira sato ci Isak i Kirar a maroˈ. 7 O tadamakapahay ci Ripika. Saka, ano milicay ko itiraay a tamdaw cingraan to pakayniay i fafahi ningra i, sowal sa cingra, “O safa ako ci Ripika,” han ningra. Nawhani matalaw cingra to pipatayan no itiraay a tamdaw cingraan a miˈafas ci Ripikaan. 8 Halafin ci Isak a maroˈ toya pala. Yo cecay a romiˈad, minengneng a pasipaputal nai sasingaran ningra ci Apimilik a hongti no Filistin, maˈaraw ningra ko nika makakalona ci Isak aci Ripika. 9 Tahidang hanto ni Apimilik ci Isak a milicay cingraan, “O fafahito iso cingra, nawiro o safa ako saan kiso saw?” han ningra. Pacaˈof sa cingra, “Hai, o fafahi ako cingra, ano han ako i, latek pakayni cingraan ko sakapatay ako saan kako,” han ningra. 10 Pasowal sa ci Apimilik, “Nawiro haenen iso ko demak i tamiyanan saw? Ano ira sanay ko cima a finawlan ako to midiˈiyay to fafahi iso i, kiso ko cacitodong a miˈorong to raraw niyam,” han ningra. 11 Saka, palimoˈot hanto ni Apimilik a somowal ko finawlan, “Ano cima ko mitefingay tonini a tamdaw ato fafahi ningra i, o papatayen cingra,” han ningra. 12 Maomah ci Isak toya pala, mifolsak cingra to sapaloma, toya mihecaan kadofah to kinaira citongal to semoˈot, nawhani, mapalemed no Tapang cingra. 13 Caayto ka pitolas a matongal a matongal ko dafong ningra, malatadacidafongayto a tamdaw cingra. 14 Maˈaraw no Filistin a tamdaw ko nika ˈaloman no masaflaway a kolong ato siri ato kuli ningra saka, tadamaˈinap cingraan, 15 selenen nangra to sera ko tefon ni Isak a maemin, onini a tefon i, yo maˈoripho ci wama ningra ci Apraham o nikarkaran no matayalay ningra. 16 Nanoya, pasowal sa ci Apimilik ci Isakan, “Piliyas kiso i tamiyanan, nawhani, ikakato niyam ko nika ciˈicel iso,” han ningra. 17 Saka, liyas sato ci Isak toya pala a tayra i Kirar a saˈowac, itira cingra a pataloˈan a pacarcar a maroˈ. 18 Yo maˈoripho ci Apraham i, ira ko nikarkaran ningra a pinapina a tefon, nikawrira, mapatayto cingra i, selenen no Filistin a tamdaw to sera koya tefon a maemin. Liyawen haca ni Isak a misafaeloh a mikarkar koya tefon, panganganen ningra toyananto a nipanganganan no wama ningra i saˈayaw koya tefon.
SAKA 3 FOLAD 23-29 ROMIˈAD
O ODOˈ KO KIMAD NO KAWAS | SATAPANGAN 27-28
“Malifokay ni Yakop ko Todong a Sapalemed Cingranan”
(Satapangan 27:6-10) Sowalen ni Ripika ci Yakop, “Matengil ako i honi ko sowal ni wama iso ci kakaan iso ci Isauan, 7 ‘Katayra kiso a miˈadop, tangtangen koya kaolahan ako a ˈaredetay a kakaenen a pakaen takowanan, ta iˈayaw no nika patay ako i, pakalemeden ako kiso i kaˈayaw no Tapang,’ saan. 8 O wayaw ako, pitengil kiso, doedoen ko sowal ako a midemak. 9 Katayra kiso i masafelaway a siri a mikilim to tosa a masoesoay koengelayho a tofor a siri a patayni, ta doedoen ako a mitangtang koya kaolahan ni wama iso ko ˈaredet a kakaenen. 10 Ta patayraen iso i cingraan a pakaen, ta iˈayaw no nika patay ningra i, pakalemeden ningra kiso,” han ningra.
w04 4/15 11 fiedac 3-4 fatac
Ci Ripika—O Midokoay to Kawas, Talifakay ko Demak a Fafahiyan
Awaay ko sowal no Fangcalay Cudad, to mafanaˈay ci Isak to ailaeno ni Yakap ci Isau hokira. Kawra mafanaˈay ci Ripika to ci Yakop ko mamilayap to sapalemed, ano ci Yakopto mafanaˈay cingra. To cecay a romiˈad, mitahidangan ni Isak ci Isau papiala to niˈadopan, mitangtang a pakaen cingranan, hongaˈ ˈayaw no patay palemeden ci Isau. Matengilay ni Ripika, sapicongedaw cingra. Talifakay ko demak ni Ripika, matira kaemangho, o nika faedet no falocoˈ a midoko ci Yihofaan cowa ka mafasaw to iti:yaayho. Tangsolay palimoˈot ci Yakopan papiala to tosa tofor a siri, tangtangen ningra ko kaolahan no faˈinay a pakaen. Toha sapilayapaw to sapalemed, pasowalan ci Yakop misao ci Isauan a tayra i wamaan. Cowa ka kahi ci Yakop, matalaw ano mafanaˈ ko wama i, wa awato ko sapalemed, masafelit sa a maˈkak. Cowa ka yoyang ci Ripika a midemak. Saan pasowal ci Yakopan: “O wayaw, kako sato ko cacitodong to nika ˈkak iso.” Maharek cingra mitangtang to ˈaredetay kakaenen i, papisao ci Isauan ci Yakop a patayra i wamaan.—Satapangan 27:1-17.
Cowa ka somowal ko Fangcalay Cudad hano mihaen ci Ripika. Soˈliˈlin ˈalomanay ko milikafay tora waywayan ningra, kawra cowa pirikec ko Fangcalay Cudad. Ta mafanaˈto ci Isak to o ci Yakop ko milayapay to sapalemed, ao cowa ci Isau i, cowa ka pikapoˈi ci Ripikaan, ˈarawhan miliyaw haca palemed ci Yakopan. (Satapangan 27:29; 28:3, 4) Pakayni tora maˈapiay wawa o isaˈayaway a sapairasol ni Yihofa, paifalocoˈan ni Ripika, mansa misaˈicelay cingra micangacang tora sapalemed ci Yakopan. Mihaen cingra to demak, mitooray to nisaˈosian ni Yihofa a araaw.—Loma 9:6-13.
(Satapangan 27:18, 19) Tayra sato ci Yakop ci wamaan ningra a mitahidang, “Amaaw,” han ningra. Licay sa koya wama, “O wayaw, cima a wawa ako kiso?” Han ningra. 19 Pacaˈof sa ci Yakop, “O fisac a wawa iso ci Isau. Oya nisowalan iso i takowanan a demak i, malaheciayto ako. Kalomowadho a maroˈ, kakomaenho to niˈadopan ako a tamaˈ, ta mangaˈay ko pipalemed iso i takowanan,” han ningra.
w07 10/1 31 fiedac 2-3 fatac
Salicay no Miˈosiay Tamdaw
Cowa pisaheci pasowal ko Fangcalay Cudad hano mihaen ci Ripika aci Yakop, ora demak hato talifahal sanay a mafekad. Kawra, cowa ka pirikec, cowa ka pihayi ko Fangcalay Cudad tora pakayraan ni Ripika aci Yakop. Mihaenay, mihaiay ko Fangcalay Cudad to misamangahay anca misafanaˈay a demak, cowa ko hahaenen ko sowal. Nikawrira, o romaroma a maˈoningay i Fangcalay Cudad papadama kitanan cipinang toniya demak.
Isalakat, ihekalay pasowal ko Fangcalay Cudad, o citatodongay to mamilayap to sapalemed ni Isak i, o ci Yakop cowa ko ci Isau, maharekayto ci Yakop micakay nai kakaan ci Isau tora todong no fisac. Ci Isau i, cowa pisalimla tora fisac, o sakafecolaw aca no niyah a pacakay ci Yakopan. Sowal no Fangcalay Cudad i, ora “pisakahmaw ni Isau to nika citodong ningra to fisac,” pacakayan ci Yakop sanay. (Satapangan 25:29-34) Mihaenay haw i, tayni i kaˈayaw no wama ci Yakop milayap to sapalemed nao citatodongay cingra mihaen.
(Satapangan 27:27-29) Cupa han ni Yakop a micucup cingra, masanek ningra ko fangsis noya nisarikoˈan ni Yakop a rikoˈ, saka, palemeden ningra ci Yakop, sowal sa, “O masadakay i tireng no wawa ako a fangsis i, matiya o fangsis no nipalmedan no Tapang a sera ko fangsis nira. 28 Nanay, pafelien no Kawas kiso to nai kakarayananay a ˈoˈol, ta mamatang ko sera iso. Nanay pakadofahen Ningra kiso to panay ato faelohay a fadisosoˈ a epah. 29 Nanay, mihakelong tisowanan ko polong no kasakitakit, nanay mitaˈong tisowanan ko polong no kasafinacadan. Nanay makowan iso ko polong no salikaka iso, nanay mitaˈong tisowanan ko wawa no wina iso a maemin. O miˈkakay tisowanan a tamdaw i, o mamaˈkak cangra, o palemeday tisowanan a tamdaw i, o mamapalemed cangra,” han ningra.
it-1 275 fiedac 4 fatac
Sapalemed
Itini i kakitaan a lintad, o wama a tamdaw ˈayaw no mamapatay mipalemeday to wawawawa. Tada o masaka limlaan koni demak, misakaretengan no itiyaay a tamdaw. Matoˈasto ci Isak, mafodadto ko mata, cowa pakaˈaraw, ci Isau ya sakakaay wawa ako ci Yakop na saan cingra, paisaˈayaw a mipalemed ci Yakopan, somowal to mamarenak ko teloc ningra, halo misaali ci Yihofaan palaˈosi toni demak. (Satapangan 27:1-4, 23-29; 28:1, 6; Hipray 11:20; 12:16, 17) Ikor mafanaˈto ci Isak tora demak i, miliyaway haca pasowal tora sapalemed cingranan, hanaca mitongalayho a palemed ci Yakopan. (Satapangan 28:1-4) ˈAyaw no mamapatay ci Yakop i, saˈayaw palemeday to tatosa wawa ni Yosif, ikor ngaˈ o wawa no niyah. (Satapangan 48:9, 20; 49:1-28; Hipray 11:21) Malecaday ci Mosian, ˈayaw no mamapatay cingra palemeday to polong a Israil tamdaw. (Limoˈot 33:1) Itira tora pina a tinakoan, o teloc nora demak paihkalay, oranan sapalemed o sapairasol a sowal. Ano latekay, o mipalemeday a tamdaw mikamaay to fongoh nora mamilayap to sapalemed a tamdaw.—Satapangan 48:13, 14.
Kadkaden ko Odoˈ no Sinael
(Satapangan 27:46–28:2) Sowal sa ci Ripika ci Isakan, “Maˈosi kako tora tatosa a roma a finacadan a fafahi ni Isau. Ano cifafahi ci Yakop to Hiti a fafahiyan i, o nika patayto ako ko ngaˈay,” han ningra.
28 Saka, tahidangen ni Isak ci Yakop a patayni i kaˈayaw ningra, palemeden ningra cingra, o romasato palimoˈoten ningra a somowal, “Aka ka raramod kiso to Kanan a afahiyan. 2 Katayra kiso i Misopotamiya, i lomaˈ no akong iso ci Pituilan, itira cifakian iso ci Lapanan a cifafahi to cecay a fafahiyan a wawa ningra.
w06 4/15 6 fiedac 2-3 fatac
Mifohat to Falocoˈ a Masasowal ko Mararamoday
Ci Isak aci Ripika ikor no mararamod cangra, iraay ko ngaˈayay noka sasowal nangra han? Nengnengen ita. Wawa nangra ci Isau cifafahiyay to tatosa Hiti a fafahiyan, irato ko pasangaray demak i lomaˈ. Sowal sa ci Ripika ci Isakan, “maˈosi kako tora tatosa a roma a finacadan a fafahi ni Isau. Ano cifafahi ci Yakop to Hiti a fafahiyan i, o nika patayto ako ko ngaˈay,” han ningra. (Satapangan 26:34; 27:46) Mahapinangay itini, misongilaˈay ci Ripika misadak to cariraw no niyah. Patodicekay ko sowal ningra.
Oraanto i, palimoˈotan ni Isak ko ˈapi a safa ni Isau ci Yakop, aka a cifafahi to Kanan a fafahiyan hananay. (Satapangan 28:1, 2) Misahecian ni Ripika mifanaˈ ci Isak to harateng no niyah. Ci Isak aci Ripika itini pisaysay to pakidemay a demak no lomaˈ i, mifohatay to falocoˈ a masasowal cangra, o ngaˈayay a taˈarawan no mita. Nikawrira, ano caka lecad ko harateng i, wa misamaanto hani? O mamisamaan cangra hani?
(Satapangan 28:12, 13) Maˈaraw ningra i lemed ko cecay a nai sera tangasaay i kakarayan a kayakay, ira i kayakay ko coyoh no Kawas a romakat, ira ko macokacokay, ira ko malokelonay. 13 Maˈaraw ningra ko nika tomireng no Kawas i tatihi ningra, pasowal sa cingraan, “O Tapang Kako, o Kawas ni Apraham, o Kawas ni Isak Kako, o papafelien Ako kiso ato teloc iso tora katokinilan iso imatini a sera.
w04 1/15 28 fiedac 6 fatac
Kalimlaan no Satapangan—II
28:12, 13—Itini i nitiih ni Yakop a “kayakay”, o manan ko tatodong hani? Oniniya “kayakay” ano nengnengen o sakacokacok talafafekang a fakeloh, paihkalay koni to iraay ko nika laliting no kakarayan ato iseraay. O coyoh no Kawas itiraay tora kayakay a macokacok malokelon, paihkalay to matayalay cangra to demak ni Yihofa ato kahemekan no Kawas a tamdaw.—Yohani 1:51.
Miˈosi to Sinael
(Satapangan 27:1-23) Malitengto ci Isak itiya, mapohawto ko mata ningra. Tahidangen ningra ko fisac a wawa ningra ci Isau, pasowal sa cingraan, “O wayaw ako,” han ningra. Pacaˈof sa ci Isau, “O:y, ini kako,” han ningra. 2 Pasowal sa ci Isak, “Nengnengen iso, malitengto kako, caayto ka piraay kako to patay. 3 Alaen ko panaˈ iso a talapala a mivadop, 4 tangtangen koya kaolahan ako a ˈaredetay a kakaenen a pakaen takowanan, ta iˈayaw no nika patay ako i, pakalemedenho ako kiso,” han ningra. 5 Matengil ni Ripika ko sowal ni Isak ci Isauan, saka, yo masadak ci Isau a miˈadop i, 6 sowalen ni Ripika ci Yakop, “Matengil ako i honi ko sowal ni wama iso ci kakaan iso ci Isauan, 7 ‘Katayra kiso a miˈadop, tangtangen koya kaolahan ako a ˈaredetay a kakaenen a pakaen takowanan, ta iˈayaw no nika patay ako i, pakalemeden ako kiso i kaˈayaw no Tapang,’ saan. 8 O wayaw ako, pitengil kiso, doedoen ko sowal ako a midemak. 9 Katayra kiso i masafelaway a siri a mikilim to tosa a masoesoay koengelayho a tofor a siri a patayni, ta doedoen ako a mitangtang koya kaolahan ni wama iso ko ˈaredet a kakaenen. 10 Ta patayraen iso i cingraan a pakaen, ta iˈayaw no nika patay ningra i, pakalemeden ningra kiso,” han ningra. 11 Nikawrira, sowal sa ci Yakop ci inaan ningra, “Mafanaˈ kiso to nika cifanoh ko tireng ni Isau a maemin, sakohenac sa kono mako a fanges. 12 Ano misapsap sato ci wama ako i takowanan, ano mahapinang ningra ko nipisafanaˈ ako cingraan i, caay ko mamapakalemed kako, o sakaˈkak aca ako konini,” han ningra. 13 Pacaˈof sa ko wina ningra, “O wayaw, kako sato ko cacitodong to nika ˈkak iso, doedo han ko sowal ako a midemak, olili, alaen a patayni ko siri,” han ningra. 14 Saka, ala hanto ni Yakop ko siri a patorod ci inaan ningra, doedo hanto no wina ningra a mitangtang ko kaolahan no wama ningra ko ˈaredet a kakaenen. 15 Ta alaen ningra ko nisidayan ni Isau i lomaˈ a sakapahay a rikoˈ a parikoˈ ci Yakopan. 16 Tafoen ningra to cifanohay a fanges no siri ko tosa a kamay ato ˈaˈiloc ni Yakop. 17 Ta patoroden ningra ci Yakop toya nitangtangan ningra a titi ato nihodhodan ningra a epang. 18 Tayra sato ci Yakop ci wamaan ningra a mitahidang, “Amaaw,” han ningra. Licay sa koya wama, “O wayaw, cima a wawa ako kiso?” han ningra. 19 Pacaˈof sa ci Yakop, “O fisac a wawa iso ci Isau. Oya nisowalan iso i takowanan a demak i, malahciayto ako. Kalomowadho a maroˈ, kakomaenho to niˈadopan ako a tamaˈ, ta mangaˈay ko pipalemed iso i takowanan,” han ningra. 20 Pasowal sa ci Isak, “O wayaw, nimana kaliki kiso a citamaˈ saw?” han ningra. Pacaˈof sa ci Yakop, “Hai, o nipafelian no Tapang a Kawas iso kako to ngaˈayay lemed,” han ningra. 21 Pasowal sa ci Isak ci Yakopan, “O wayaw, cupaen kako, papisapsapen kako to tireng iso, soˈlinay ci Isau kiso haw?” Han ningra. 22 Cupa hanto ni Yakop cingra, sapsap han ni Isak cingra, sowal sa, “O ngihaˈ i, o ni Yakop a ngihaˈ, o kamay i, o ni Isau a kamay,” saan. 23 Caay ka pakahapinang cingra to nika ci Yakop konini, nawhani matiya o kamay ni Isau a cifanoh ko kamay ni Yakop. Yo mamipalmed cingra ci Yakopan i.
SAKA 3 FOLAD 30 –4 FOLAD 5 ROMIˈAD
O ODOˈ KO KIMAD NO KAWAS | SATAPANGAN 29-30
“O Raramod ni Yakop”
(Satapangan 29:18-20) Tadamaolah ci Yakop ci Rakilan saka, sowal sa cingra, “Ano mihai kiso to nika raramod ako aci Rakil i, mangaˈayto a matayal kako i tisowanan to pito a mihcaan,” han ningra. 19 Pacaˈof sa ci Lapan, “Mihai kako a pafafahi tisowanan, kao kiso ko ngaˈay to pipafeli i taowanan, kaitinito kiso a maroˈ i takowanan,” han ningra. 20 To sakacifafaiyaw ni Yakop ci Rakilan saka, matayal cingra to pito a mihcaan a mitapiˈ, nikawrira, mato caay ka pina a romiˈad a haratengen ningra, nawhani tadamaolah cingra ci Rakilan.
w03 10/15 29 fiedac 6 fatac
Ci Yakop Misalimlaay to Noˈadigoan a Sapalemed
Itini i nolitenganho, o fafahiyan ano micada to sapakotiya i, todongto o mararamodayto. O Rikec ni Mosi, ano miˈodang ko tamdaw to limocedan i, o papatefoc to 50 a rimood a linkim (570 g). O micacudaday tamdaw ci Korten Wenamu, o “saˈakawangay a sapakotiya a payci koni sanay”, kawraan “isafaay noni” ko sapakotiya no kalo tamdaw sanay cingra. (Limoˈot 22:28, 29) Cowa pakafilo ci Yakop pafeli toranan, saka makalim cingra matayal saki Lapanan to pito a miheca. Sowal ni Wiham: “Nolitengan a Papilon, o lifon no matayalay to folafolad i, maedeng 42 tahira 84 a rimood a linkim (5.7 g tahira 11.4 g linkim), sanay (o lifon no pito a miheca i, 478.8 g linkim tahira 957.6 g linkim). Mihaenay haw i, to saka cifafahiyaw ci Rakilan, o nipafelian ni Yakop ci Lapanan a sapakotiya tada ˈakawangay.” Mankora, hayi sa ci Lapan!—Satapangan 29:19.
(Satapangan 29:21-26) Sowal sa ci Yakop ci Lapanan, “Malponto ko romiˈad, pararamodento kako ato wawa iso,” han ningra. 22 Saka, mipatalato ci Lapan to sapararamod a tahka, tahidangen ningra ko itiraayto a tamdaw a papikapot a mitahka. 23 Nikawrira, toya dadaya, falicen ni Lapan ci Rakil ci Liyaan a patorod ci Yakopan. Saka, madadiˈi ci Yakop aci Liya a mafotiˈ toya dadaya. 24 (Pafelien ni Lapan ci Liya to fafahiyan a kuli ci Cilpah to malo mamatayal ningra.) 25 Cila sato a romiˈad to papacem i, mahapinangto ni Yakop ko nika ci Liya konini, saka, tayra sato ci Yakop ci Lapanan a somowal, “Nawiro haenen iso ko demak i takowanan saw? Ci Rakil ko nihaenan ako a matayal i tisowanan i, nawiro misafanaˈ kiso i takowanan saw?” han ningra. 26 Pacaˈof sa ci Lapan, “O pinangan niyam o itiniay i, ano caayho ka cifaˈinay ko kaka i, caay ka ngaˈay a mikiˈayaw a cifaˈinay ko safa.
w07 10/1 8-9 fiedac
O Cecay Maaˈidesay a Malikakaay Fafahiyan “Patirengay to Lalomaˈan no Israil”
Ci Liya misafanaˈay ci Yakopan han? Anca o mapacieciay cingra a mitoor to limasmas no wama han? Ci Rakil i, icowaay cingra? Mafanaˈay cingra to mafekaday ko maanan a demak han? Ano mafanaˈay cingra i, samaanay ko falocoˈ ningra hani? O mamiculi cingra toya mariˈangay a wama han? Cowa pasowal ko Fangcalay Cudad. Ano samaanayto ko nika pinengneng ni Rakil aci Liya toniya demak, mafanaˈto ci Yakop to nipisaˈfit cingranan, tada maketeray cingra. Kawra cowa ka pikapoˈi tora tatosaay wawa ni Lapan, ao ci Lapan ko sakalacongis ningra: “Ci Rakil ko nihaenan ako a matayal i tisowanan i, nawiro misafanaˈ kiso i takowanan saw?” Pacaˈof ci Lapan: “O pinangan niyam o itiniay i, ano caayho ka cifaˈinay ko kaka i, caay ka ngaˈay a mikiˈayaw a cifaˈinay ko safa. Ano mangalay kiso a matayal i takowanan to pito haca a mihcaan i, ano mapaherek konini a pararamodan a romiˈad to cecay a lipay, pafelien ako kiso ci Rakilan,” han ningra.” (Satapangan 29:25-27) Mihaenayto ci Yakop mapacieci a ciraramod to tosa a fafahi, o matiniay noka raramod tada pairaay to adihayay a roray ato maˈinapay a demak.
it-1 630 fiedac 2 fatac
Pakaetimayto Raramod
Pakaetimay. Itini i Israil, ano mararamod i, cowa ka adihay ko lisin, kawra o kaacangan a toki. Toya romiˈad, mieresan ko fafahiyan. Saˈayaw, mainoˈay cingra, tano fangsisay a simalan a misipasip ko tireng. (Palalinien ko Rucu 3:3; Icikil 23:40) O romaroma paro no lomaˈ no fafahiyan ano cihafayay, iraay ko misatofangay fafahiyan mipadang, parikoˈ to kohcalay ato miteselan a telec. (Yirimiya 2:32; Paˈarawan 19:7, 8; ˈOlic 45:13, 14) O mamicaedong to sakaeres a dafong ato odoˈ (Isaya 49:18; 61:10; Paˈarawan 21:2), ikor mitahepoan to matiraay to tapodo, nai fongoh tahira i ooˈ a pacaedong. (Isaya 3:19, 23) Mahaenay alatek madolo a masafanaˈ ni Lapan ci Yakop, hato cowato ka fanaˈ to ci Liya kora fafahiyan. (Satapangan 29:23, 25) Tiya masasoˈaraw ci Ripika aci Isak i, mitahepoan ko fongoh ningra. (Satapangan 24:65) Patahkalay koni to pidofdof no fafahi to fadangalan no faˈinay.—1 Korinto 11:5, 10.
(Satapangan 29:27, 28) Ano mangalay kiso a matayal i takowanan to pito haca a mihecaan i, ano mapaherek konini a pararamodan a romiˈad to cecay a lipay, pafelien ako kiso ci Rakilan,” han ningra. 28 Mihai ci Yakop saka, mataˈlif ko pararamodan a romiˈad to cecay a lipay i, pafelien ni Lapan ci Yakop ci Rakilan a pafafahi.
Kadkaden ko Odoˈ no Sinael
(Satapangan 30:3) Sowal sa ci Rakil, “Ini ko fafahiyan a kuli ako ci Pilha, diˈi han cingra, ngaˈay patado cingra a mahofoc to malo wawa ako, ta malawinato kako,” han ningra.
it-2 273 fiedac
Midipot to Wawa
Ci Rakil aci Liya midipotan ko mihofocan wawa no misatofangay aci Yakop malo wawa no niyah. (Satapangan 30:3-8, 12, 13, 24) O wawa no misatofangay aci Yakop, malecaday o wawa no tadafafahi, o ngangaˈay micada to hafay, samanen o wawa no wama cangra. Tona o mitooray ko misatofangay ci Rakilan aci Liyaan, o mihofocan nangra a wawa itiniay i laeno no ngangan ni Rakil aci Liya.
(Satapangan 30:14, 15) Yo pilitodan to tadaemi i, makra ni Riupin i omah ko sapakalim a dateng, alaen ningra a pafeli ci wina ningra ci Liya. Sowal sa ci Rakil ci Liyaan, “Paˈisalen kako tora nialaan no wawa iso a sapakalim a dateng,” han ningra. 15 Pacaˈof sa ci Liya, “Niˈafasanto iso kako to faˈinay ako i, caayho ka edeng kiso saw? Iro sapiˈafasan haca kiso imatini to nialaan no wawa ako a sapakalim a dateng,” han ningra. Sowal sa ci Rakil, “Ano pafeli kiso i takowanan tora nialaan no wawa iso a sapakalim a dateng i, ngaˈayto a madadiˈi kiso aci Yakop anini a dadaya,” han ningra.
w04 1/15 28 fiedac 7 fatac
Kalimlaan no Satapangan—II
30:14, 15—Ci Rakil hano sawaden ningra ko sapidiˈiaw ta faˈinay to saki sapakalim a dateng hani? Tolitengan, o heci no sapakalim a dateng hananay ngaˈayay malo sapipaˈel a sapaiyo, misayar to maficekotay. Pakasoˈlinay ko tamdaw, o sapaˈetol to sakaciwawaaw kora. (Radiw ni Solomon 7:13) Cowa ka somowal ko Fangcalay Cudad to araaw ni Rakil a mihaen to demak, kawra ano nengnengen hato pakasoˈlinay cingra to papadama cingranan a cipuyapuy, mipalasawad to nika eca ka ciwawa a ngodo. ˈArawhan i, ikor no pina a miheca ngaˈ, pawawaan ni Yihofa cingra.—Satapangan 30:22-24.
Miˈosi to Sinael
(Satapangan 30:1-21) Caay ka ciwawa ci Rakil to wawa ni Yakop saka, maˈinap cingra to kaka ningra, sowal sa ci Yakopan, “Pawawaen kako, ano caay i, kinapatay kako,” han ningra. 2 Keter sato ci Yakop ci Rakilan, sowal sa, “O Kawas kako a mimaan, o sakaeca ka ciwawa iso i, Ningra a saˈosi,” han ningra. 3 Sowal sa ci Rakil, “Ini ko fafahiyan a kuli ako ci Pilha, diˈi han cingra, ngaˈay patado cingra a mahofoc to malo wawa ako, ta malawinato kako,” han ningra. 4 Saka, pafafahi han ni Rakil ko faˈinay ningra toya kuli ningra ci Pilhaan, saka, dadiˈi sato ci Yakop aci Pilha. 5 Cipuyapuy ci Pilha, mahofoc cingra to cecay a faˈinayan a wawa ni Yakop. 6 Sowal sa ci Rakil, “Mipaˈading ko Kawas i takowanan, mitengil Cingra to pitolon ako saka, pafeli i takowanan to cecay a faˈinayan a wawa,” saan. Saka, ci Tan han ningra a pangangan koya wawa. 7 Cipuyapuy haca ci Pilha, mahofoc cingra to saka tosa a wawa ni Yakop. 8 Sowal sa ci Rakil, “Maˈaˈised kako ato kaka ako, malowidto ako cingra,” saan. Saka, ci Naftali han ningra a pangangan koya wawa. 9 Mahapinangto ni Liya ko nika caayto ka ciwawa cingra, saka, papidiˈien ningra ci Yakopan ko fafahiyan a kuli ningra ci Cilpa, 10 mahofoc ci Cilpa to cecay a faˈinayan a wawa ni Yakop. 11 Sowal sa ci Liya, “O tadamalemeday kako,” saan. Saka, ci Kat han ningra a pangangan koya wawa. 12 Mahofoc haca ci Cilpa to saka tosa a faˈinayan a wawa ni Yakop. 13 Sowal sa ci Liya, “O tadamalemeday kako, o sasomowal ko fafahiyan a maemin, o malemeday kiso wa saan,” saan cingra. Saka, ci Asir han ningra a pangangan koya wawa. 14 Yo pilitodan to tadaemi i, makera ni Riupin i omah ko sapakalim a dateng, alaen ningra a pafeli ci wina ningra ci Liya. Sowal sa ci Rakil ci Liyaan, “Paˈisalen kako tora nialaan no wawa iso a sapakalim a dateng,” han ningra. 15 Pacaˈof sa ci Liya, “Niˈafasanto iso kako to faˈinay ako i, caayho ka edeng kiso saw? Iro sapiˈafasan haca kiso imatini to nialaan no wawa ako a sapakalim a dateng,” han ningra. Sowal sa ci Rakil, “Ano pafeli kiso i takowanan tora nialaan no wawa iso a sapakalim a dateng i, ngaˈayto a madadiˈi kiso aci Yakop anini a dadaya,” han ningra. 16 Yo picelemanto no cidal i, irato a minokay ci Yakop nai omah, sadak sato ci Liya a militmoh, sowal sa cingraan, “Anini a dadaya aka eca ka pidiˈi kiso i takowanan, nawhani, mapaˈacato ako kiso ci Rakilan to nialaan no wawa ako a sapakalim a dateng,” han ningra. Saka, toya dadaya madadiˈi ci Yakop aci Liya. 17 Tengilen no Kawas ko pitolon ni Liya, saka, cipuyapuy cingra, mahofoc cingra to saka lima a faˈinayan a wawa ni Yakop. 18 Sowal sa ci Liya, “Mipakaolah ko Kawas i takowanan, nawhani, papidiˈien ako ko faˈinay ako to fafahiyan a kuli ako,” saan cingra. Saka, ci Isakar han ningra a pangangan koya wawa. 19 Cipuyapuy haca ci Liya, mahofoc cingra to saka enem a faˈinayan a wawa ni Yakop. 20 Sowal sa cingra, “Pafeli ko Kawas i takowanan to tadamaanay a sapakaolah, oninito ko sakangaˈay no faˈinay ako i takowanan, nawhani, aenemto ko nihofocan ako a wawa ningra,” saan cingra. Saka, ci Cipulun han ningra a pangangan koya wawa. 21 Nanoya, mahofoc cingra to cecay a fafahiyan a wawa, ci Tina han ningra a pangangan koya wawa.