Maharekayto Kiso a Misaday Micada to Paputisem Han?

Na minanam kiso to Fangcalay Cudad tahanini, maedeng adihayay ko kafanaˈan to pakayniay ci Yihofaan a demak. Sapitooraw to sapasifanaˈ no Fangcalay Cudad, adihayay ko mifalican iso i kaˈorip alatek. Kawra pakayniay i maanan a lalangian, talotatoday kiso to sapatafangaw to tireng ci Yihofaan ato micada to paputisem alatek. Onini a fedengan mamilengo to pina a lalangian, hanaca minengneng to sasamaan kiso miremo tonini a saconged.

1. Hakowa ko sifanaˈ iso ngaˈ, ngaˈay a micada to paputisem?

Sapicadaaw kiso to paputisem i, ‘matatodong ko nika fanaˈ to soˈlinay kimad.’ (1 Timoti 2:4) Mafanaˈ kiso pacaˈof to polong pakayniay Fangcalay Cudad a salicay, wangaˈ micada to paputisem cowa ka saan. Soˈlinto o halafinay micada to paputisem a Krisciyang oha papadadotocho a minanam. (Kolosay 1:9, 10) Nikawrira, iraayto ko kafanaˈan iso to taˈeneran a kimad no Fangcalay Cudad. O malohemay malitengay no kasakopang papadama tisowanan mafanaˈ to madangarayto no miso konini hokira.

2. Oha mamidemak kiso to maanan a demakan ngaˈ, ngaˈay micada to paputisem?

ˈAyaw no micada to paputisem, oha ‘pasasiyor,’ ato ‘patatikol’ kiso. (ˈOsien ko Dmak 3:19.) Tatodong nonini i, pakayni to iˈayaway a mararaway demak iso masomaden ko falocoˈ, hanaca micangacang to sasodod ni Yihofa tisowanan. O mamisetekho kiso to falocoˈ caayto ko mamidemak to misafelitay to Fangcalay Cudad a demak, misetek to falocoˈ midoedo to kaolahan no Kawas a nokaˈorip. Roma i, mamirienangho kiso to saˈopo no kasakopang ato malacafay to kasakopang a mitosil.

3. Hano cowa ko mamatalaw kiso micada to paputisem hani?

O romaroma tamdaw matalaway to cowa ko papakatoor ko niyah to miketonan a sowal ci Yihofaan. Soˈlinay haw i, kahacecay tamdaw alatek iraay ko raraw, ano o madimadiayto midoko to Kawas a tamdaw mahaenayto. Nikawrira, cowa pisaali ci Yihofa to mamalefot ko midokoay Cingranan a tamdaw. (ˈOsien ko ˈOlic 103:13, 14.) Ano misaˈicelayto kiso i, o mamahemek Cingra, halo papadama tisowanan. Soˈlinay haw i, mikiˈokay ci Yihofa kitanan, awaay ko maamaan papakaliyas to olah no Kawas kitaanan.​—ˈOsien ko Loma 8:38, 39.

CALEPEN MIKADKAD

4. Mitongal to kafanaˈ ci Yihofaan

O hahakowa ko kafanaˈ iso ci Yihofaan ngaˈ, ngaˈay micada to paputisem hani? O noka fanaˈ iso Cingranan nohatini, maedengayto maolah kiso Cingranan, makalim pakahemek Cingranan. Tengilen ko nafalocoˈan no minanamay to Fangcalay Cudad icowacowa a pala. Nengnengen ko IKA, ikor lengoen ko ilaenoay a salicay:

IKA: O Lalan no Mamicada to Paputisem (3:56)

• Sasamaan pakatoor ko minanamay to Fangcalay Cudad to patosokan micada to paputisem?

ˈOsien ko Loma 12:2, ikor lengoen ko ilaenoay a salicay:

• Iraay ko sasa no falocoˈ iso to maanan a kimad no Fangcalay Cudad han? O sapasifanaˈ no Misawacayay Tamdaw ni Yihofa o soˈlinay a kimad sanay kiso miharateng han?

• Ano iraay ko sasa no falocoˈ iso, sasamaan a palahdaw hani?

5. Remoen ko mamiconged tisowanan micada to paputisem a pasangaray

Ano misetekay kita to falocoˈ patafang ci Yihofaan halo micada to paputisem i, o mamisiˈayaw to sapalifet. Nengnengen ko cecay nalifetan no tamdaw. Nengnengen ko IKA, ikor lengoen ko ilaenoay a salicay:

IKA: O Olah ci Yihofaan Papakadangar to Pasangar (5:22)

• Itiniay i ika ci Narankerel, sapidokoaw ci Yihofaan mamiremo to maanan a pasangaray?

• O olah ningra ci Yihofaan samaanay padama cingranan miremo to pasangaray?

ˈOsien ko Taneng 29:25 ato 2 Timoti 1:7, ikor lengoen ko ilaenoay a salicay:

• O manan ko papaira to timolo ita miremo to pasangaray?

6. Tadiˈecen ko sapadama ni Yihofa

Papadama ci Yihofa tisowanan midemak to kahemekan Ningra a demak. Nengnengen ko IKA, ikor lengoen ko ilaenoay a salicay:

IKA: Papadamaen ni Yihofa Kiso (2:50)

• I ikaay a minanamay to Fangcalay Cudad, hano nanayal sa caay kakahi micada to paputisem?

• Mafanaˈto cingra to maanan, hato matongalay ko pitadiˈec ci Yihofaan?

ˈOsien ko Isaya 41:10, 13, ikor lengoen ko ilaenoay a salicay:

• Hano pakasoˈlinen iso, o mamadangar no niyah ko patafangay to tireng a misetekan a sowal ci Yihofaan?

7. Simsimen miharateng ko olah ni Yihofa, mitongal to miakoˈiday falocoˈ

Ano simsimen iso miharateng to hakowaay ko olah ni Yihofa i tisowanan i, o mamatongal ko piakoˈid Cingranan, makalim a midoko Cingranan tahadaˈoc. ˈOsien ko ˈOlic 40:5, ikor lengoen ko ilaenoay a salicay:

• Mikiriwiˈay kiso miakoˈid ci Yihofaan to maanan a sapalemed Ningra tisowanan?

Itini nolitengan, o cecay pairasolay ci Yirimiya. Tada maolahay cingra ci Yihofaan ato kimad Ningra. Malikoay ci Yirimiya malo mitaypiyaway ci Yihofaan, mansa matomes ko miakoˈiday a falocoˈ. Sanay ko sowal ningra ci Yihofaan: ‘O sowal Iso palipahakay to falocoˈ ako, samanen malo ilaenoay no ngangan Iso a tamdaw kako.’ (Yirimiya 15:16) Pacaˈofen ko ilaenoay a salicay:

• Malo Misawacayay Tamdaw ni Yihofa hano o kalikoan hani?

• Makalimay kiso micada to paputisem malo Misawacayay Tamdaw ni Yihofa han?

• O maanan a lalangian ko mamiconged tisowanan micada to paputisem?

• Miharateng kiso i, o mamidemak ko niyah to maanan a demakan ngaˈ, malaˈosi ko patosokan micada to paputisem hani?

KALIMLAAN

Pakayni i sapadama ni Yihofa, ngangaˈay kiso pakaremo to masamaamaanay a pasangar, matoor ko patosokan a micada to paputisem.

Lomalen

• Hakowa ko kafanaˈ iso to sifanaˈ no Fangcalay Cudad ngaˈ micada to paputisem hani?

• Alatek hamamifalic kiso to maanan ngaˈ micada to paputisem hani?

• Hano cowa ko mamatalaw kiso micada to paputisem hani?

MALALITINGAY A LALAKAW

O maanan ko lalangian iso sapicadaaw to paputisem hani?

“Maharekayto Kiso Misaday Micada to Paputisem Han?” (Mikecolay, Saka 3 Folad 2020)

Iraay ko maamaanan a demak alatek miconged tisowanan micada to paputisem? Nengnengen sasamaan kiso miremo.

“O Maanan ko Mamilalang Tisowanan Micada to Inoˈ?” (Mikecolay, Saka 3 Folad 2019)

Samaanay cingra malaˈosi miremo to pasangaray, matoor ko patosokan micada to paputisem?

Hano Nanayal sa Caka Picada to Paputisem? (1:10)

O cecay tamdaw ci Ataa hananay, talotatoday isalakat micada to paputisem. O maanan ko micikelohay cingranan misaˈosi a micada tonini a masakalimlaan a demak hani?

Soˈlinay Citatodong Kako Milayap Tonini a Sapalemed Han? (7:21)