Salicay No Miˈosiay Tamdaw

O misowalan no tarokos ci Pawlo i 1 Korinto 15:29, o tatodong i, itiya iraay ko Krisciyang papicadaay to paputisem to mapatayay a tamdaw han?

Cowa, itini Fangcalay Cudad anca likisi cowa ka somowal to iraay ko tamdaw mihaenay to demak.

Pihongyak no ˈalomanay to Fangcalay Cudad papiharatengay to tamdaw, itini lintad ni Pawlo, o roma tamdaw papicadaay to paputisem to mapatayay a tamdaw. Tinakoen, “Hehepen” a pihongyak: “Mankora, papicada to paputisem to mapatayay a tamdaw, samaan noikor hani?”

Kawra, sinanoten ko pilengo no tatosaay micekiway to Fangcalay Cudad. Ci Kelikeli Lokeote sanay: “Itini Fangcalay Cudad ato likisi awaay ko somowalay to paputisemay to mapatayay tamdaw.” Ci Keten Fii malecaday ko pilengo, itini mitilidan ningra a cudad sanay: “O Fangcalay Cudad ato likisi cowa pilengo to mahaenay a paputisem. Itini Sinyak cowa pilengo, awaay ko wacay to paihkalay, salakatay Krisciyang anca ikor no mapatay ko tarokos mapatireng a kiyokay awaay ko mahaenay a pipaputisem.”

Palimoˈotan ni Yis ko mikotoday cingranan a tamdaw: ‘Kalingad kamo, palanisawawaan no mako ko polong no kasafinawlan. . . , mipaputisem cangranan, o kihcod a limoˈot ako tamowanan, pasifanaˈen cangra a midofdof.’ (Matay 28:19, 20) ˈAyaw no micada ko tamdaw to paputisem malo Krisciyang i, wa isalakat mafanaˈ, pakasoˈlin ato midofdof ci Yihofaan aci Yisan. Oniya mapatayay tamdaw cowa ka ngaˈay midemak, o maˈoripay a Krisciyang cowa ka ngaˈay patado cingranan a midemak.—Patnakay 9:5, 10; Yohani 4:1; 1 Korinto 1:14-16.

Mihaenay, o manan ko tatodong no sowal ni Pawlo hani?

Piharateng no roma Korintoay tamdaw awaay ko patikolay maˈorip a mapatayay sanay. (1 Korinto 15:12) Micolian ni Pawlo ko harateng nangra. Sowal ningra soˈlin ‘misiˈayaway to patay to romiˈamiˈad’ koniyah, kawra pakasoˈlinay cingra to papatikol maˈorip noikor ko niyah, malecad ci Yisan malo taˈangayay ko ˈicel a ˈadingo tatirengan.—1 Korinto 15:30-32, 42-44.

O cacipinang ko Korintoay a Krisciyang, iraay ko tokel tayra kakarayan a Krisciyang o mamisiˈayaw to masakenaay sapalifet, wa tahalifa to patay, ikor patikol maˈorip. ‘Micada to paputisem malacecay ci Kristo Yisan’ mahawpay ‘micada to paputisem malecad to patay ningra.’ (Loma 6:3) Tatodong i, wa malecad cingra ci Yisan tahalifa to sapalifet ato patay, ikor patikol maˈorip tayra kakarayan.

Micada ci Yis to paputisem i nanom ikor no tosa miheca, pasowalan ningra ko tatosa tarokos: ‘O micadaan ako a paputisem, o mamicada kamo.’ (Marko 10:38, 39) Itiya cowa picada ci Yis to paputisem i nanom. Tatodong noniya sowal i, saikor wa pakayni ka madimadi to Kawas a kinafalah to ˈorip. Sowal ni Pawlo, iraay ko tokel tayra kakarayan a Krisciyang ‘wa malacafay ci Kristoan a micada to roray, ngaˈ malacafay milifok to ˈdil.’ (Loma 8:16, 17; 2 Korinto 4:17) Mihaenay, oha tatahalifa cangra to patay ngaˈ patikol maˈorip tayra i kakarayan.

Mihaenay, o laenoay a pihongyak matatodongay ko paihkal to harateng ni Pawlo: ‘Ano mahaenay i, malo mapatayay micada to paputisem no hatini, samaan noikor hani? Ano cowa ko papatikol maˈorip ko mapatayay, nimaan malo mapatayay tamdaw no hatini a micada to paputisem hani?’