CACEKIWEN LALAKAW 42
O Tanektekay Mitafo to Madimadi ci Yihofaan a Tamdaw Tada Lipahakay!
‘Tanektekay mitafo to madimadi, mitooray to rikec ni Yihofa maˈorip a tamdaw tada lipahakay.’—ˈOLIC 119:1 ato roma pihongyak.
RADIW 63 Madimadi
KALIMLAAN NO LALAKAWa
ˈAlomanay timoloay a salikaka samanen madimadiay midama to saˈakawangay sapikowan a fadangalan ni Yihofa, na mapalitay, anca mapalitayho i kapalitan nohatini. O sasing no papina a salikaka konini (Nengnengen ko saka 1-2 fatac)
1-2. (1) O roma sifo samaanay micada to finawlan ni Yihofa? Samaanay ko harateng no finawlan ni Yihofa hani? (2) O finawlan ni Yihofa micada to sapalak i, hano kamayan padotoc a lipahak? (Nengnengen ko papotalay coka.)
NOHATINI itini paro no kakarayan 30 ira ko pina kitakit ato kasakilac, makecengay ko mitosilay a tayal ita, o roma sifo mipalitay to salikaka ita. Mararaway ko demak no salikaka ita hokira? Itini pinengneng ni Yihofa, sahtoay awaay ko raraw nangra. Malepel cangra pakayniay picekiw to Fangcalay Cudad, paladaˈ to pihakelongan no niyah i tamdaw, malacafayay to romaroma salikaka a mirienang to saˈopo, ato mitafo to misatenokay a saaroˈan i no mirikecay. Soˈlin misiˈayaw to pakidemay pisafelit, oniya salikaka kamayan mitafo to madimadib, padadotoc a madimadi ci Yihofaan. Mihaen ko demak pairaay to lipahak nangra.
2 Tada timoloay konini a salikaka. Na maˈarawayto iso ko sasing no ilalomaˈay nangra alatek, hanaca mahapinangay to masediay ko pising nangra. Hatini ko kalipahak nangra samanen mafanaˈay to mitafoay ko niyah to madimadi, pakahemekay ci Yihofaan. (1 Rayray 29:17a) Sanay ko sowal ni Yis: ‘Pakayniay i moecelay micada to sapalak a tamdaw o mapalemeday . . . Ka lipahak, samanen itini kakarayan iraay ko kadofahay a lifon namo.’—Matay 5:10-12.
O NGAˈAYAY A TAˈARAWAN I SAKA 1 HAHEKALAN
Ci Pitiro aci Yohani patirengay to ngaˈayay taˈarawan, anini o papaˈading to pihakelongan i hoing a Krisciyang wa ngaˈay mitodong cangranan (Nengnengen ko saka 3-4 fatac)
3. Mikitini Dmak 4:19, 20, misiˈayaw ko tarokos to sapalak i samaanay ko harateng? Hano ira ko mahaenay a harateng nangra?
3 O malifaay no salikaka a demak itini saka 1 hahekalan na mifekadayto, itiya o tarokos pakayni pilasil to milingatay ci Yisan a demak tahacadaay to sapalak. Saˈakawangay a hoing no Yutaya saliyaliyaw sanay mirikec cangranan, ‘caay pihai cangranan pakayni i ngangan ni Yis milasil to maanan ato pasifanaˈ to maanan.’ (Dmak 4:18; 5:27, 28, 40) Samanay ko harateng no tarokos hani? (ˈOsien ko Dmak 4:19, 20.) Mafanaˈay cangra, iraay ko cecay mikikakaay ko taˈangay no fadangalan palimoˈotay cangranan pasayra i ˈalomanay a mitosil, misongilaˈ misawacay ci Kristoan. (Dmak 10:42) Mihaenay, ci Pitiro aci Yohani mitaypiyaway to tarokos timolo a pasowal, o Kawas ko dadofdofen nangra, cowa ko i hoingay a tamdaw, hanaca saan pasowal caay ko mamisawad cangra milasil to milingatay ci Yisan a demak. Malecaday o pasowalay cangra: “Mana ngaˈay kami midofdof tamowanan eca pidofdof to Kawas hani? Ikakaay ko fadangalan no niyah to Kawas saan kamo miharateng han?”
4. Mikitini Dmak 5:27-29, patirengay ko tarokos to maanan ngaˈayay a taˈarawan i polong a Krisciyang? Ngaˈay kita samaan mitodong cangranan?
4 Patirengay ko tarokos to ngaˈayay a taˈarawan, cangra ‘o pikowan no Kawas ko midofdofan, eca ko tamdaw ko midofdofan.’ Mikitiya misatapang, polong a Krisciyang padotocay a mitodong cangranan. (ˈOsien ko Dmak 5:27-29.) O tarokos samanen tanektekay mitafo to madimadi hato mapekpekay. Miliyas cangra to hoing i, ‘samanen pakayniay i ngangan no tapang mapakangodo ko niyah hato lipahakay ko falocoˈ.’ Ikor, padotocay cangra fanekfek a mitosil.—Dmak 5:40-42.
5. O taˈarawan no tarokos mikidatay to maanan a salicay?
5 O patirengan no tarokos a taˈarawan mikidatay to pina salicay, tinakoen: Ano misaˈosiay cangra midofdof to Kawas eca ko tamdaw ko dofdofen, sasamaan midofdof to limoˈot no Fangcalay Cudad, midofdof to ‘i fafekangay cifadangalay a tamdaw’ hani? (Loma 13:1) Sasamaan kita malecad misowalan no tarokos ci Pawlo ‘midofdof to sifo ato cifadangalay a tamdaw,’ ngaˈayho mitafo to madimadi to Kawas, mihai to saˈakawangay a Mikowanay Cingra hani?—Titus 3:1.
‘I FAFEKANGAY CIFADANGALAY A TAMDAW’
6. (1) O cima ko misowalan no Loma 13:1 ‘i fafekangay cifadangalay a tamdaw’ hani? Mamidemak kita cangranan to maanan a ˈinorong? (2) Pakayni i polong mikowanay no hekal a tamdaw, haharatengen ita ko maanan?
6 ˈOsien ko Loma 13:1. O ‘i fafekangay cifadangalay a tamdaw’ o mikowanay no hekal ko mitoroˈan, iraay ko fadangalan nangra mikowan to finawlan, o mamidofdof ko Krisciyang cangranan. Midamaay cangra to sakangaˈay no demak no ˈalomanay, midemak to rikec, latekay paˈadingay to sakangaˈay no finawlan no Kawas. (Paˈarawan 12:16) Mihaenay, palimoˈotay ko Fangcalay Cudad kitaanan mitoor to saali no mikowanay a pasata ato mihadak to dafong, mikangodoho cangranan. (Loma 13:7) Kawra, ira ko fadangalan no sifo no hekal misaali kitaanan, samanen mihayian ni Yihofa cangra ira ko mahaenay a fadangalan. Tiya sawkiten no tapang no Loma ci Pontius Pilato ci Yis i, ihkalay mitadtad tonini. Itiya, sowal ni Pilato iraay ko fadangalan no niyah paˈorip ci Yisan, iraayho ko fadangalan mipatay cingranan. Sanay ko caˈof ni Yis: ‘Ano cowa pihayi ko fafekangay, awaay ko fadangalan iso misawkit takowanan.’ (Yohani 19:11) Malecad ci Pilatoan, polong mikowanay no hekal anini ato fadangalan no mikowanay sahtoay iraay ko tolas.
7. Itini maanan a pakayraan, cowa ka ngaˈay kita midofdof to mikowanay no hekal? Mamiharateng cangra to maanan hani?
7 O sarikec no sifo ano cowa pisafelit to sarikec no Kawas, o mamidofdof ko Krisciyang to sifo. Kawra ano misaali ko sifo kitanan midemak to mikecengan no Kawas a demak, anca mikeceng kitanan midemak to misaalian no Kawas a demak, cowato ko mamidofdof kita. Tinakoen, misaali cangra to kapah a tamdaw mitatiw to sapilood a lalosidan midama to kitakit alatek.c Mikecengho cangra to Fangcalay Cudad ato mitepangan a cudad no mita alatek, hanaca miconged kitanan mitosil ato malacafay to salikaka masaˈopo midoko ci Yihofaan. O sifo no hekal ano patelas misaka dademak to fadangalan mipalak to nisawawaan ni Kristo, o mamisiˈayaw ci Yihofaan. O demak ato waywayan nangra, maˈaraway ni Yihofa maemin.—Patnakay 5:8.
8. Ci Yihofa ato sifo no hekal iraay ko maanan kasasiroma? Hano kalimlaan ko kafanaˈ ita tonini hani?
8 ‘I fafekangay’ mitoroˈay to ‘ˈakawangay ko saaroˈan ato taˈangayay ko fadangalan,’ kawra cowa pitoroˈ to ‘saˈakawangay ko saaroˈan ato sataˈangayay ko fadangalan.’ Soˈlin panganganen no Fangcalay Cudad ko sifo no hekal to ‘i fafekangay cifadangalay a tamdaw,’ kawra edengan ko Kawas ci Yihofa ko saˈakawangay ko saaroˈan, iraay ko saˈakawangay a fadangalan Ningra. Kinapinaay ko Fangcalay Cudad pangangan ci Yihofaan to ‘Satadamaanay ko Saaroˈan.’—Taniil 7:18, 22, 25, 27.
‘SATADAMAANAY KO SAAROˈAN’
9. Itini mapolosi maˈaraway no pairasolay ci Taniil ko maanan hani?
9 O maˈaraway no pairasolay ci Taniil a mapolosi patalahkalay, iraay ko saˈakawangay a fadangalan ni Yihofa. Salakat maˈaraway ni Taniil ko sepat taˈangayay a ˈaˈadopen, mitaypiyaway camira to pina ciˈicelay mikowanay no hekal, o Papilon, Mitiya-Pirsiya, Kirisiya, ato Loma ato mikitiniay i Loma masadak a Ikok ato Padaka Ciˈicelay Mikowanay to Hekal. (Taniil 7:1-3, 17) Ikor, maˈaraway ni Taniil maroˈay ci Yihofa itini kakarayan a misawkit. (Taniil 7:9, 10) Dotoc maˈaraway a demak nonini madimadiay a pairasolay, pakayni mikowanay no hekal anini o ngaˈayay a sapatalipaˈelal.
10. Mikitini Taniil 7:13, 14, 27, o cima ko pafelian ni Yihofa to sapikowan to cikiw a fadangalan hani? Pakayni ci Yihofaan, mikitini toniya demak mahapinangay ita ko maanan?
10 ˈOsien ko Taniil 7:13, 14, 27. Mialaan no Kawas ko sapikowan a fadangalan no polong a sifo, ikor pafelien ko roma citatodongay, ikakaay ko ˈicel a tamdaw. O cima ko pafelian ni Yihofa to sapikowan a fadangalan hani? Salakat i o ‘cecay malecaday o wawa no tamdaw,’ o ci Yis Kristo. Dotoc i o ‘fangcalay finawlan no Satadamaanay ko Saaroˈan,’ oyaan 144,000 tamdaw, wa tahadaˈoc cangra mala hongti, ‘tahadaˈoc cowa ko mamafalic.’ (Taniil 7:18) Mahapinangay o ‘Satadamaanay ko Saaroˈan’ ni Yihofa, edengan Cingra iraay ko fadangalan mihaen to demak.
11. Somowalay ci Taniil to maanan a sowal paihkalay to iraay ko saˈakawangay a fadangalan ni Yihofa?
11 O maˈaraway ni Taniil i mapolosi a demak misawacayay to nano sowal ningra i salakat. Sanay cingra ‘i kakarayanay a Kawas’ ngaˈayay ‘palasawad to hongti patireng to hongti,’ sanayho ko sowal ningra: ‘Saˈakawangay ko Saaroˈan iraay ko fadangalan no hongti mikowan to tamdaw, makahi pafeli cimaanan to fadangalan no hongti o cima ko pafelien.’ (Taniil 2:19-21; 4:17) Na mihaenay ko demak ni Yihofa han? Hayi, hanaca cowa ka kinacecay aca!
O hongti kitakit ni Pilsacar pafelian ni Yihofa ko Mitiya ato Pirsiya a tamdaw (Nengnengen ko saka 12 fatac)
12. Tinakoen mitadtad, na palasawadan ni Yihofa ko cifadangalay a mikowanay tamdaw. (Nengnengen ko coka.)
12 Paihkalay ci Yihofa to iraay ko saˈakawangay a fadangalan no Niyah, mataˈlifay ko polong ‘i fafekangay cifadangalay a tamdaw.’ Nengnengen ko tolo tinakoan. Ci Falaw no Icip palakoliay to finawlan ni Yihofa, caay kakahi mitedal cangranan. Kawra milidongan ni Yihofa cangra, hanaca mipatay ci Falawan i Kahngangay a Riyar. (Kasadakan 14:26-28; ˈOlic 136:15) Hongti no Papilon ci Pilsacar ‘misatakaraway, pakararaw to kakarayan a Tapang.’ Patangidafay cingra, ‘pakahemek to tano linkiman ato fodawan marad, kilang fakeloh misangaˈan a kawas,’ cowa pakahemek ci Yihofaan. (Taniil 5:22, 23) Mitefocan ni Yihofa konini a misatakaraway a tamdaw. ‘Toya dadaya,’ mipatayan ci Pilsacar, o kitakit ningra maˈafasay no Mitiya ato Pirsiya a tamdaw. (Taniil 5:28, 30, 31) Mikowanay to Palestan ci Hiroti Akripa ikor no mipatay to tarokos ci Yakopan, milepelayho to tarokos ci Pitiroan, hanaca sapipatayaw ci Pitiroan, kawra cowa ka palaˈosien ni Yihofa ci Hiroti. Ikor, mitefocan no coyoh ni Yihofa cingra, mapatayayto cingra.—Dmak 12:1-5, 21-23.
13. Tinakoen mitadtad na samaanay ci Yihofa mipadik to makomoday a mikowanay.
13 Na pakayniay i midemakan paihkal ci Yihofa, soˈlin makomod ko polong mikowanay, caay pakafilo Cingraanan. Na patadoay Cingra to Israil tamdaw milood. Itini Kanan a pala soˈlin 31 ko hongti milooday to Israil tamdaw, kawra itini sapadama ni Yihofa, mapadikay no Israil tamdaw cangra, hanaca milowid to adihayay mikiˈokan a pala. (Yosuwa 11:4-6, 20; 12:1, 7, 24) Hongti no Siriya ci Pinhatat mikeriday to 32 a hongti milood to Israil tamdaw i, masongilaˈay ni Yihofa mipadik cangra.—1 Hongti 20:1, 26-29.
14-15. (1) Pakayni saˈakawangay a sapikowan a fadangalan ni Yihofa, somowalay ko Hongti ci Nipukatnicar ato Hongti ci Taliyus to maanan hani? (2) Pakayni ci Yihofaan ato mikowanan Ningra a kitakit, samanay ko sowal no mitiliday to ˈOlic hani?
14 Misawacayay ko demak, edengan ci Yihofa iraay ko Saˈakawangay a Fadangalan. Hongti no Papilon ci Nipukatnicar cowa pisapoener ko falocoˈ mihayi to edengan ci Yihofa ko citodongay pakahemeken, malikoay a somowal: ‘Onini a Taˈangayay Papilon mitiˈeran ako ko taˈangayay inaneng ato ˈicel no niyah a mapatireng, tada kasemeran! Kasapaan!’ Telocto mitefocan ni Yihofa cingra, mipasingki cingranan. Patatikolto ko inaneng ni Nipukatnicar ikor ‘pakahemekay to Satadamaanay a Kawas,’ mihayi o sapikowan a fadangalan ni Yihofa o ‘midaˈocay a sapikowan a fadangalan,’ somowalayho ano cimato cowa ko papakaconged ci Yihofaan mitoor to araaw no Niyah a midemak. (Taniil 4:30, 33-35) Ci Taniil samanen madimadiay ci Yihofaan mafahkolay i ofang no layong. Milidongan ni Yihofa cingra ikor, hongti ci Taliyus milasilay to finawlan: ‘Itini ˈaˈayaw no Kawas ni Taniil ka ciˈangi ko kahacecay tamdaw. O soˈliˈlinay materek a Kawas Cingra, tahadaˈocay materek. O Hongti Kitakit Ningra tahadaˈoc cowa ko mamalaˈafo, o saˈakawangay a sapikowan a fadangalan Ningra tahadaˈoc awaay ko tolas.’—Taniil 6:7-10, 19-22, 26, 27 ato roma pihongyak.
15 Sowal no mitiliday to ˈOlic: ‘Palasawaden ni Yihofa ko nisahalakaan no kasakitakit ato nisafacoan no kasafinawlan.’ Sanayho ko sowal ningra: ‘Ira ci Yihofa malo Kawas, o mahaenay a kitakit tada lipahakay! O mipiliˈan no Kawas malo hafay, mahaenay a finacadan tada lipahakay!’ (ˈOlic 33:10, 12 ato roma pihongyak.) Mihaenay, iraay ko lalangian ita tanektek mitafo to madimadi ci Yihofaan.
SALIKORAYTO A LALOOD
O makomoday a kalo kitakit cowa ko papakafilo to kakarayanay a sofitay ni Yihofa (Nengnengen ko saka 16-17 fatac)
16. Wa pakasoˈlin kita itini taˈangayay padiing a tatokian wa samaan ko pidemak ni Yihofa? Misamaanay? (Nengnengen ko coka.)
16 Malengoayto ita ko midemakan ni Yihofa i nolitengan. Mihaenay, cato ka halafin noikor mamidemakho Cingra to maanan a demak hani? Wa ngaˈay pakasoˈlin kita, itini ‘taˈangayay padiing’ a tatokian, o mamilidong ci Yihofa to madimadiay sikawdan Ningra. (Matay 24:21; Taniil 12:1) O Makok a Kok, oya makomoday a kalo kitakit, itini cowacowa pala no hekal ano mifekad to pakidemay saˈodis to madimadiay sikawdan ni Yihofa i, o mamidipot ci Yihofa to sikawdan Ningra. O masalalomaˈay no Makomoday a Kitakit 193 a kasakitakit soˈlin mirienang tonini a sofitay, cowa ko papakafilo to Satadamaanay ko Saaroˈan ato kakarayanay a sofitay Ningra. Mikiˈokay ci Yihofa kitaanan: ‘O mamapatalahkal Kako i kaˈayaw no kalo kitakit, mapatalahkal to fangcalay, ho mafanaˈ cangra Takowanan, o mamafanaˈto cangra to ci Yihofa Kako.’—Icikil 38:14-16, 23; ˈOlic 46:10.
17. Paˈayaway ko Fangcalay Cudad, o hongti no hekal ato tanektekay mitafo to madimadi a tamdaw samanay masasiroma ko hatokel?
17 O piˈodis no Kok mamikidat to Armakiton a lalood, itiya wa eminen ni Yihofa palaˈafo ko ‘polong a hongti no hekal.’ (Paˈarawan 16:14, 16; 19:19-21) ‘Edengan o moecelay tamdaw ko rarihaday maˈorip i fafekang no sera, o tanektekay mitafo to madimadi a tamdaw ko tatahadaˈoc materek i fafekang no sera.’—Taneng 2:21 ato roma pihongyak.
O TATANEKTEK MITAFO TO MADIMADI KITA
18. ˈAlomanay soˈliˈlinay a Krisciyang makahiay samaan ko pidemak hani? Misamaanay? (Taniil 3:28)
18 Halafinay a tatokian, ˈalomanay soˈliˈlinay a Krisciyang tangongolay ko olah ci Yihofaan, o Saˈakawangay Mikowanay saan ko pinengneng Cingranan, mansa hayi saan cangra kinafalah to pasalat ato ˈorip no niyah, misetekho to falocoˈ tanektek mitafo to madimadi, malecad nolitengan tatoloay Hipray a kapah. Oya tatoloay kapah misetekay to falocoˈ madimadi to Satadamaanay ko Saaroˈan a Yihofa, telocto milidongan ni Yihofa pasadak cangranan mikitini i marenrengay ko namal a palod.—ˈOsien ko Taniil 3:28.
19. Wa misalalangi ci Yihofa to maanan misawkit to finawlan Ningra? Nohatini sasamaan ko pidemak ita hani?
19 Ci Tafiti itini ˈOlic no niyah milengoay tada kalimlaan ko tanektekay mitafo to madimadi ci Yihofaan, sanay cingra: ‘Wa pasayra ci Yihofa i kasafinacadan milasil to sasawkit. Yihofaaw, nanay tooren Iso ko moecelay waywayan ako, tooren ko madimadiay waywayan ako misawkit takowanan.’ (ˈOlic 7:8) Somowalayho ci Tafiti: ‘Nanay dipoten no madimadiay ato moecelay kako.’ (ˈOlic 25:21) Madimadi ci Yihofaan o sangaˈayay a pakayraan maˈorip, ano mifekadto ko maanan a demak, aka a misafelit kita ci Yihofaan. Mihaen, o mamatinako ita to matatodongay ko sowal no mitiliday to ˈOlic, sanay cingra: ‘Tanektekay mitafo to madimadi, mitooray to rikec ni Yihofa maˈorip a tamdaw tada lipahakay.’—ˈOlic 119:1 ato roma pihongyak.
RADIW 32 Tanoktoken!
a Palimoˈotay ko Fangcalay Cudad to Krisciyang midofdof to i fafekangay cifadangalay a tamdaw, o sifo no hekal. Kawra o roma sifo misafelitay ci Yihofaan ato finawlan Ningra, sasamaan kita midofdof to mikowanay no hekal, kamayanho a mitafo to madimadi ci Yihofaan hani?
b SAPITADTAD A SOWAL: Tanektek mitafo to madimadi ci Yihofaan tatodong i, soˈlin tahalifa to sapalifet, kamayan madimadi ci Yihofaan, misarocod ko falocoˈ midama to saˈakawangay fadangalan Ningra mikowan, caay ko mamapadik.
c Nengnengen ko lalakaw nonini a casi “Nolitengan a Israil Tamdaw Hano Mirienangay to Lalood, Kita Saan Cowa ka Pihaen?”