Maharekayto Kiso Misaday ‘Milayap to Sera Malo Hafay’ Han?

MAHAREK MISADAY PAMATANG TONIYA SERA

Palimoˈotay ci Yihofa to sakacecay a tamdaw ka ‘malenak a miledef i polong no sera, pamatang toniya sera.’ (Satapangan 1:28) Mahapinangay, o araaw no Kawas o polong no cikiw salikor mamalo lakoing. Ikor, milayapay to sera malo hafay a tamdaw mamilahci toniya sapatorod no Kawas isalakat a ˈinorong. Kawra, awaayto ko Itin, mansa mamiliyaw cangra misatapang. Nohatini adihayay a kitiraan i cikiw mapalakayto, mihaenay adihayay ko lalosimeten nangra a tayal noikor. Maedeng o pasangaray a ˈinorong konini.

Onini papiharatengay kitaanan to hademak no mikitiniay Papilon patikol i nalacolan a Israil a tamdaw. O niyaroˈ nangra mahoracay to 70 mihecaan, kawra paˈayaway ci Isaya, o Israil tamdaw mamilifok to sapadama ni Yihofa, ngaˈay miliyaw patireng to lomaˈ. Sanay ci Isaya ci Yihofa wa ‘samatiyaen o Itin ko kohkohan a sera, o malo pahanaan ni Yihofa ko kohkoh.’ (Isaya 51:3) O Israil tamdaw soˈlinay malaˈosi a miliyaw patireng to lomaˈ. Malecaday, ira ko sadama ni Yihofa, o milayapay to sera malo hafay a tamdaw o ngangaˈay palo lakoing to polong no cikiw. Soˈlinay, nohatiniho ngaˈayto kiso paihkal to makalimay ko niyah mirienang toniya tayal noikor.

O ngangaˈay demaken iso a tayal misaˈicel mikorac to lomaˈ no niyah ato taliyokay a kitiraan. Ano samaanto ko demak no fiyaw iso, o ngangaˈay kiso misaˈicel midemak toniya tayal. Ngaˈayho kiso padama miasik ato mitomadaw to Hongti Kitakit Kasaˈopoan ato Pitaykayan. Ano ngaˈay ko pakayraan, ngaˈayho kiso pangangan to padamaay to tahapadesay a tayal. Mihaen, o paihkalayto kiso makahiay ko niyah itini pisaalian a tatokian mihadak to ˈicel. Ngaˈay kiso miharateng: Nohatini wa ngaˈay kako minanam to pina inaneng ngaˈay sakadademaken itini faelohay a hekal han?

MAHAREK MISADAY MIDIMOKOS TO PATIKOLAY MAˈORIP A TAMDAW

Patikolen ni Yis paˈorip ko fafahiyan wawa ni Yayrus ikor, tangsolay miocor to tamdaw miala to kakaenen pafeli cingranan. (Marko 5:42, 43) Midimokos to 12 ko mihecaan a wawa cowa ko pasangaray. Kawra haratengen hena, ano palaˈosi ci Yis to sakiˈok ningra i, ‘o mamatengil no matademay a tamdamdaw ko ngiha ningra, ta masadak.’ (Yohani 5:28, 29) Sapidimokosaw to saali no ˈalomanay a tamdaw, maedeng cowa ko madoloay. Soˈlin cowa pihacecay ko Fangcalay Cudad pasowal kitaanan to adihayay a demakan, kawra ngaˈay kita miharateng, o patikolay maˈorip a tamdaw misaaliay to sapadama ngaˈ ira ko kakaenen, pikilomaˈan ato rikoˈ. Nohatini, ngaˈayto kiso paihkal to makalimay ko niyah padama to patikolay maˈorip a tamdaw. Ngaˈay kiso samaan ko pidemak hani?

Ano milasilay ko kasakopang o kasakilac kantok tatayni milisoˈ, ngaˈay kiso talaˈayaw pangangan malacafay cingranan komaen han? O cecay matayalay i Pitil a salikaka ano manilnil patikol i kilac matayal, anca o cecay kasakilac kantok mafalicay ko katayalan, cowato ko milisoˈay ko tayal, ngaˈay kiso padama cingranan mahela ko matatodongay a lomaˈ han? O kilac iso ano mamisikay to kasapala taykay anca mikiriwiˈay kasapala taykay, itini ˈayaw anca ikor no taykay ngaˈay kiso pangangan matayal han? Anca ano mahicera ko taypiyaw no taykay i, ngaˈay kiso itini pitaykayan mihamham cangranan han?

MAHAREK MISADAY PASIFANAˈ TO PATIKOLAY MAˈORIP A TAMDAW

Mikitini Dmak 24:15 mahapinangay ita, masawalwalay masaemangay mapatayay a tamdaw papatikol maˈorip. Lalomaˈ nangra ˈalomanay tamdaw itini ˈayaw no mapatay awaay ko toki mafanaˈ ci Yihofaan, kawra patikol maˈorip cangra ikor wa ira ko mahaenay a toki.a Itiya i, oya mafanaˈayto to Kawas ato mikifalocoˈay midoko Cingranan a tamdaw papasifanaˈ cangranan. (Isaya 11:9) Na itiniay i Iwropa, Katimol a Amilika, Afrika mitosil ci Siyaroti, halamhamay cingra kaliki ira koniya romiˈad, sanay cingra: “Makalimay kako pasifanaˈ to patikolay maˈorip a tamdaw. Ano maˈosi ako ko nalifetan no mapatayayto a tamdaw i, sanay miharateng kako, ano iraay ko toki nonini a tamdaw mafanaˈ ci Yihofaan, o kaˈorip ningra cowato ko mamahaen. Soˈlinay makalim kako pasowal to patikolay maˈorip a tamdaw, ano midoko cangra ci Yihofaan, o mamakapah ko kaˈorip!”

Oya maˈoripay itini i ˈayaw no tayni ci Yis i hekal a madimadiay sikawdan adihayayho ko nananamen a demak. Haratengen hena, o mitilidan ni Taniil a pina sapairasol cowa ka cipinang cingra. Ngaˈay pasayra cingranan mitadtad toniya sapairasol o samaanay malaˈosi, maedeng o papakahemek tisowanan. (Taniil 12:8) Haratengen hena, ngaˈay padama ci Rucuan aci Naomian mafanaˈ to o lalitengan ni Misiya ko niyah, wa samaan ko harateng iso hani? Itiya i, ngaˈay mirienang toniya pasifanaˈay a tayal i polong no hekal, hanaca cowato ko mamisiˈayaw to pairaan no ciraraway a hekal a saroero ato sakayhid, maedeng o papalipahak kitaanan!

Nohatini ngaˈay kiso samaan maharek a misaday mirienang toniya pasifanaˈay a tayal hani? O cecay pakayraan o mamisarocod misalof to inaneng a pasifanaˈ, hanaca micerid mirienang to mitosilay a tayal. (Matay 24:14) Soˈlin pakayni kiso i mihecaan anca roma lalangian citolasay ko midemakan, misarocod kiso midemak wa ngaˈay paihkal to makalimay ko niyah pasifanaˈ toya patikolay maˈorip a tamdaw.

Ilaenoay kalimlaan a salicay ngaˈay kiso misongilaˈ miharateng: Soˈlinay makalim kiso milayap to sera malo hafay han? Ngaˈay pamatang toniya sera, midimokos to patikolay maˈorip a tamdaw, hanaca pasifanaˈ cangranan, lipahakay ko harateng iso han? Onini o kalimlaan a hatayal iso ano milayap to sera malo hafay noikor. Anini, mimetmet to toki kiso midemak to malecaday a demak, o paihkalay to maharekayto ko niyah misaday to hanoikor.