‘Wa Kalacafay Kiso Takowanan i Lakoing’

1. ˈAyaw no mamapatay ci Yis pasayraay i tatihiay a ciraraway somowal to maanan hani? (Luka 23:39-43)

CI YIS ato tatihiay tatosa ciraraway tamdaw itiniay pisemseman hecek a misemsem, mafanaˈay cangra to mamalaˈeto ko ˈorip nangra. (Luka 23:32, 33) Mahapinangay, oniya tatosaay ciraraway cowa ko nisawawaan ni Yis, samanen na milokesay cangra ci Yisan. (Matay 27:44; Marko 15:32) Kawra o cecay ciraraway mafalicay ko waywayan, sanay cingra: ‘Yisaw, micada kiso to fadangalan no Hongti ikor, nanay haratengen iso kako.’ Sanay ci Yis cingranan: ‘Pasowalen ako kiso anini, wa kalacafay kiso takowanan i Lakoing.’ (ˈOsien ko Luka 23:39-43.) Na milasilay ci Yis i tamdaw to ‘kakarayan Hongti Kitakit,’ kawra awaay ko wacay to paihkalay to micadaay koniya ciraraway to milasilan ni Yis a lihaf, na cowa ka somowal ci Yis to mamicomod koniya tamdaw i kakarayan a Hongti Kitakit. (Matay 4:17) O misowalan ni Yis ono ikoran i fafekangay no sera a Lakoing. Hano mafanaˈ kita hani?

2. Onini a pasasiyoray a ciraraway tamdaw hano o Yutaya tamdaw han ko sowal hani?

² Oniya pasasiyoray a ciraraway o Yutaya tamdaw alatek. Pasowalan ningra koya roma ciraraway: ‘Malecaday kiso micada to sasawkit, cowa ka talaw kiso to Kawas han?’ (Luka 23:40) O Yutaya tamdaw o Kawas aca ko midokoan, kawra adihayay ko midokoan no ˈalafang tamdaw a kawakawas. (Kasadakan 20:2, 3; 1 Korinto 8:5, 6) Oniya tatosaay ano o ˈalafang tamdaw, onini a ciraraway wa saan ko sowal alatek: ‘Cowa ka talaw kiso to kawakawas han?’ Roma i, miocoran ci Yis tayni fafekang no sera, mamitosil to ‘moraraway a siri finawlan no Israil,’ ao cowa ko ˈalafang tamdaw. (Matay 15:24) Roma i, na patahkalan no Kawas ko Israil tamdaw, noikor papatikolen Ningra paˈorip ko mapatayay tamdaw. Onini pasasiyoray a ciraraway mafanaˈay tonini alatek, mikitini i sowal ningra mahapinangay ita, pakasoˈlinay cingra papatikolen ni Yihofa paˈorip ci Yis hanaca itini Hongti Kitakit no Kawas a mikowan. Mahapinangay, makalimay konini a tamdaw patikolen no Kawas paˈorip cingra.

3. Somowal ci Yis to Lakoing i, oya pasasiyoray a ciraraway maharatengay ko maanan alatek? (Satapangan 2:15)

³ Onini pasasiyoray a ciraraway, ano o Yutaya tamdaw, o mamafanaˈ ci Ataman aci Ifaan, mafanaˈho to pakamaroˈan ni Yihofa cangra i Lakoing a mikilomaˈ. Mihaenay, tiya somowal ci Yis to Lakoing i, maedeng cipinangay cingra o itiniay fafekang no sera a Lakoing ko misowalan ni Yis.—ˈOsien ko Satapangan 2:15.

4. O nano sowal ni Yis to itihiay a ciraraway, papisatapangay kitaanan misimsim to maanan alatek?

⁴ O sowal ni Yis to itihiay ciraraway, papiharatengay kitaanan to samaanay ko kaˈorip i Lakoing alatek. Nengnengen ita ko ka dipayal no pikowan ni Solomon, o mamafanaˈ to pina pakayraan no Lakoing. Ci Yis o mikikakaay ci Solomonan a kalimlaan a tamdaw, pakasoˈlinay kita cingra ato kalacafayay cingranan tayra i kakarayan mala hongti a tamdaw o mamisalof toniya cikiw malo makapahay a Lakoing. (Matay 12:42) O ‘roma lopayˈay siri’ maedeng sakafanaˈaw to sasamaan ko demak no niyah, ho ira ko tatodong tahadaˈoc maˈorip i Lakoing.—Yohani 10:16.

O MASAMAANAY KO KAˈORIP I LAKOING HANI?

5. Halamhamay kiso o masamaanay ko kaˈorip i Lakoing hani?

⁵ Masowal ko kaˈorip i Lakoing, salakatay maharatengay iso o maanan hani? Maharatengay iso ko malecaday Itin makapahay a kitiraan alatek. (Satapangan 2:7-9) Maharatengayho iso ko sowal no pairasolay ci Mika alatek, o finawlan no Kawas ‘wa maroˈ i laeno no fadisosoˈ ato sokon a kilang.’ (Mika 4:3, 4) Maharatengayho iso alatek, paˈayaway ko Fangcalay Cudad wa kadofah ko kakaenen. (ˈOlic 72:16; Isaya 65:21, 22) Haratengen hena, itiniayto kiso i Lakoing. Maroˈay kiso i kaˈayaw no adihayay ko ˈaredetay kakaenen a cokowi, mahanekay ko fangsisay a hanek no hana. Matengilayho iso ko paro no lomaˈ ato widang malacafay lipahak matawa a masasowal, ilalomaˈ nangra roma tamdaw o patikolayto maˈorip. Cowa ko talatiihay kiso, onini a kihcod wa malaˈosi itini i fafekang no sera. Cowa ka hatira aca, itini i Lakoing wa iraho ko kalipahakan ita a tayal.

6. Itini i Lakoing mamidemak kita to manan a tayal hani? (Nengnengen ko coka.)

⁶ Misangaˈ ci Yihofa kitaanan ngangaˈay rihaked a lipahak to tayal. (Patnakay 2:24) Itini Pikowan ni Kristo to Comaˈol Miheca a tatokian, wa mikiriwiˈ kita ˈifowa ko tayal. Itiya, o milakowitay to taˈangayay padiing a tamdaw ato masawalwalay patikolay maˈorip a tamdaw, misaaliay to rikoˈ, kakaenen ato lomaˈ. Soˈlin adihayay ko dademaken ita a tayal mirenec tonini a saali, kawra o kalipahakan konini. Isalakat midimokosay ci Atam aci Ifa to makapahay a palosayan, ano ikor iraay ko tatodong ita midimokos tonini a sera, palo Lakoing to cikiw. Roma i, masawalwalay patikolay maˈorip a tamdaw misaaliay to papasifanaˈen, samanen pakayni ci Yihofaan ato araaw Ningra awaay ko kafanaˈan nangra. Papadamaen ita ko ˈalomanay madimadiay sikawdan no Kawas, samanen ˈayaw no tayni ci Yis i hekal i, mapatayayto cangra, adihayayho ko cowa ko kafanaˈan nangra a demak. Haratengen hena, mirienang kita tonini pasifanaˈay a tayal wa hakowa ko lipahak aki!

7. Ngaˈay kita pakasoˈlin to maanan? Misamaanay hani?

⁷ Itini noikoran a Lakoing, kadofah kita to rikoˈ ato kakaenen, milayap kita to dipayal ato rihaday, hanaca o kihcod wa ngaˈay ko pilimasmas. Hano ngaˈay kita pakasoˈlin tonini hani? Samanen ci Yihofa pakayniay i cecay tinakoan pahapinang kitaanan, itini i pikowan ni Yis o masamaanay ko kaˈorip. Dotoc, nengnengen ita ko Fangcalay Cudad pakayni i pikowan ni Solomon a maˈoningay.

O PIKOWAN NO HONGTI CI SOLOMON —O TAˈARAWAN TO NOIKORAN A LAKOING

8. ˈOlic 37:10, 11, 29 samaanay malaˈosi itini nolitengan hani? (Nengnengen ko lalakaw nonini a casi “Salicay no Miˈosiay Tamdaw.”)

⁸ Itini sakayat no Kawas mitilidan no Hongti ci Tafiti a ˈOlic paihkalay, ano mikowan ko madimadiay citanengay a hongti i, samaanay ko kaˈorip no finawlan. (ˈOsien ko ˈOlic 37:10, 11, 29.) Ano masowal ko Lakoing i, marariday kita paˈaraw to tamdaw to ˈOlic 37:11. Misaka dademak toniya sinael o matatodongay, samanen itini Sapasifanaˈ i Lotok misaka dademakan ni Yis koniya sinael, paihkalay o mamalaˈosi konini a sinael noikor. (Matay 5:5) Kawra o sowal ni Tafiti paliˈayaway to pikowan ni Solomon. Itini pikowan ni Solomon to Israil i, o finawlan no Kawas itiniay i ‘cihacolay ciˈodalay a kitiraan,’ dipayalay ato rihadayay, kadofahay ko kaˈorip. Na mikiˈokay ko Kawas: ‘Ano midofdof kamo to sarikec Ako . . . , wa padipayalen Ako ko kitakit. Mafotiˈ kamo, cowa ko mamacekid matalaw.’ (Lifi 20:24; 26:3, 6) Onini a sakiˈok itini pikowan ni Solomon a laliyadan malaˈosiay maemin. (1 Rayray 22:9; 29:26-28) Mikiˈokayho ci Yihofa, noikor tatiihay tamdaw wa ‘caayto ko mamaterek.’ (ˈOlic 37:10) Mahapinangay, o sowal no ˈOlic 37:10, 11, 29 cowa ka itini aca i nolitengan a malaˈosi, hanaca wa miliyaw malaˈosi noikor.

9. Pakayni pikowan no Hongti ci Solomon, samaanay ko sowal no fafahiyan hongti no Sipa?

⁹ Matengilay no fafahiyan hongti no Sipa itini pikowan ni Solomon, lipahakay ko kaˈorip no Israil, mikitini maraayay tayni i Yirusalim, makalimay sapinengnengaw to soˈlinay a pakayraan. (1 Hongti 10:1) Maˈaraw ikor, sanay cingra: ‘O sowal no tao takowanan cowaho pakaala to kalitosa! . . . Tada malemeday ko finawlan iso! Miceriday tomireng i kaˈayaw no miso a sikawdan tada malemeday! Pakatengilay cangra to citanengay a sowal iso!’ (1 Hongti 10:6-8) Nikawrira, o dipayalay pikowan ni Solomon o taˈarawan aca noikoran konini. O pakaynian ni Yihofa i wawa ci Yisan pikowan to tamdaw i, o papaira to adihayay a sapalemed.

10. Ci Yis hano ikakaay ci Solomonan ko kangaˈay?

¹⁰ Ci Yis itini i masakenakenaay a demak ikakaay ci Solomonan ko kangaˈay. Ci Solomon cowa ko malefotay a tamdaw, na midemakay cingra to tada tatiihay a saˈosi, telocto pairaay to pades no finawlan no Kawas. Cowa ka lecad ci Solomonan, ci Yis o malefotay a Mikowanay, cowa ko mamararaw cingra. (Luka 1:32; Hipray 4:14, 15) Soˈlin palifeten ni Satan ci Yis to adihayay pakidemay sapalifet, kawra padadotocay madimadi to Kawas. Misawacayay cingra to o sangaˈayay a Hongti ko niyah, cowa ko mamararaw cingra, cowa ko mamidemak to maamaan mikariˈangay to finawlan a demak. Ano cingra ko mikowanay, tada malemed kita!

11. O cima ko mamalacafay ci Yisan mikowan hani?

¹¹ Iraayho ko 144,000 a tamdaw mamikalacafay ci Yisan itini i kakarayan mala hongti midimokos to i fafekangay no sera a tamdaw, hanaca palaˈosi to araaw ni Yihofa to cikiw. (Paˈarawan 14:1-3) Onini a tamdaw itiniho i fafekang no sera i tahalifaay to adihayay a sapalifet ato pasangaray, mansa siniˈadaay cangra to micadaay to pikowan nangra a tamdaw. Ihkalen ko sowal i, mamidemak cangra to maanan hani?

O MANILNILAY NO FANGCALAY SAOCOR A KRISCIYANG ANO IKOR MAMIDEMAK TO MAANAN?

12. Pafelian ni Yihofa ko 144,000 a tamdaw to maanan a ˈinorong?

¹² Pafelian ni Yihofa ci Yis ato 144,000 a tamdaw to ˈinorong, mikikakaay to ni Solomon midemakan a tayal. Haratengen hena, o Israil aca ko mikowanan ni Solomon, midimokos to cecay kitakit a tamdaw, kawra o hongti no Hongti Kitakit no Kawas mamikowan to polong a cikiw, midimokos to polong i hekalay a tamdaw. Soˈlinay, pafelian ni Yihofa ko 144,000 a tamdaw to tadamaanay a fadangalan!

13. Malacafayay ci Yisan mala hongti a tamdaw mamitamorong to maanan a mikiriwiˈay a ˈinorong?

¹³ Malecad ci Yisan, o 144,000 a tamdaw mamala hongti ato saysi. (Paˈarawan 5:10) Itini Rikec ni Mosi, o saysi ciˈinorongay padama to tamdaw padadotoc tanektek ko tireng, ato padama cangranan ngaˈay ko kalalaˈed ato Kawas. Sowal no Fangcalay Cudad, o Rikec ni Mosi ‘o ˈadingo no makapahay limasmas noikor,’ mansa tatodong i, malacafayay ci Yisan mikowan a tamdaw mamitamorong tonini mikiriwiˈay a ˈinorong, o papadama to finawlan no Kawas mirenec to notirengan ato nofalocoˈan a saali. (Hipray 10:1) Nohatini cowa ka fanaˈ kita, onini a hongti ato saysi sasamaan masasowal to i fafekangay no sera a tamdaw. Kawra ngaˈayay kita pakasoˈlin, ano masamaanayto ko midemakan ni Yihofa a limasmas, itini i Lakoing o tamdaw mamilifok to sakayat.—Paˈarawan 21:3, 4.

O ‘ROMA LOPAYˈAY SIRI’ SASAMAAN MIDEMAK NGAˈ NGAˈAY I LAKOING MAˈORIP?

14. Samaanay mitadtad ci Yis to kalalaˈed no ‘mimingay ˈopo siri’ ato ‘roma lopayˈay siri’ hani?

¹⁴ O ‘mimingay ˈopo siri’ hananay ni Yis pangangan kora mamikalacafay cingranan itini i kakarayan mikowan a tamdaw. (Luka 12:32) Masowalayho ningra ko roma ˈopo a tamdaw, panganganan cangra to ‘roma lopayˈay siri.’ Oniya tosa ˈopo a tamdaw makakedecay, malacecayayto a ˈopo. (Yohani 10:16) Nohatini malacafayayto cangra a matayal, ano ikor mala Lakoing ko cikiw i, wa padadotoc cangra mihaen to demak. Manaokaniw, itiya o mimingay ˈopo a siri wa itini i kakarayan, o roma lopayˈay siri wa ira ko toki tahadaˈoc itini i fafekang no sera milayap to ˈorip. Mihaenay, ‘roma lopayˈay siri’ anini mamidemak to maanan, ngaˈ ira ko tatodong itini i Lakoing maˈorip noikor hani?

15. (1) O ‘roma lopayˈay siri’ sasamaan midama to salikaka ni Kristo hani? (2) Nengnengen ko i cokaay micakayay to sapaiyo a faˈinayan salikaka, sasamaan kiso minanam to ngaˈayay taˈarawan ningra?

¹⁵ Itihiay ni Yis a ciraraway ˈayaw no mapatay awaay ko adihayay toki ningra paihkal to piakoˈid ci Yisan. ˈArawhan, kita o malo ‘roma lopayˈay siri,’ adihayay ko toki ita mihaen to demak. Tinakoen, ngaˈayay kita midama to salikaka ni Kristo, mikitini paihkal to tangongolay ko nafalocoˈan ita i cingranan, sanay ci Yis onini o palinian ningra misaˈosi to o cima ko lopayˈay siri. (Matay 25:31-40) O midamaay to salikaka ni Kristo a cecay pakayraan i, fanekfek mirienang to mitosilay tayal, padama to tamdaw malo nisawawaan ni Kristo. (Matay 28:18-20) Mansa, maminanam kita misaka dademak to mihadakan no salikaka ni Kristo a sapasifanaˈ a lalosidan, tinakoen Layapen ko Midaˈocay ˈOrip! oniya cudad. Nohatini ano cowaho pisikay kiso to pacekiwan, ngaˈayay kiso patireng to patosokan, mitahidang to ˈalomanay tamdaw malacafay tisowanan minanam to Fangcalay Cudad?

16. Sasamaan kita a misaday nohatini, malo finawlan no Hongti Kitakit no Kawas?

¹⁶ Halamhamay ci Yihofa to kanonoˈan Ningra a tamdaw itini i Lakoing a maˈorip, cowa ko mamitala kita irato ko Lakoing ngaˈ misaˈicel malo mahaenay a tamdaw. Nohatini, itini sasowalen ato waywayan caay pisamangah kita, maˈimer ko kaˈorip, madimadiho ci Yihofaan, to raramod ato salikaka. Itini toniya tatiihay a hekal, mamisaˈicel kita midoedo to palinian no Kawas, ikor itini i Lakoing mamadoloto mihaen to demak. Roma i, toha sapisadayaw maˈorip i noikoran a Lakoing, nohatiniho palahad kita to adihayay fangcalay capeling ato ciepocay a ˈinaneng. Nengnengen konini a casi “Maharekayto Kiso Misaday ‘Milayap to Sera Malo Hafay’ Han?” tonini a lalakaw.

17. Wa pakayni kita to isalakatay a raraw padotoc a caniis ko falocoˈ a makesem han? Tadtaden.

¹⁷ Ano pakayniay kita i pakidemay a raraw isalakat, padotoc a caniis ko falocoˈ a makesem, saˈicelen micoˈay ko hatiniay a harateng. Manaokaniw, cowa ko mamisalalangi kita to sapatefoc, ‘padeteng sa mararid mararaw.’ (Hipray 10:26-31) Ano maharekayto kita pasasiyor, micangacang to sapadama ni Yihofa, mifalic to waywayan no niyah i, o ngangaˈay pakasoˈlin kita milifokayto to sasodod ni Yihofa. (Isaya 55:7; Dmak 3:19) Haratengen ko nano sowal ni Yis: ‘Tayni kako cowa ko mamitahidang to moecelay a tamdaw, ao mamitahidang to ciraraway a tamdaw’ sanay. (Matay 9:13) Tada taˈangayay ko epoc no sapatefoc ni Yis, o mamatahepo maemin ko raraw no mita.

WA NGAˈAY KISO TAHADAˈOC MAˈORIP I LAKOING

18. Itihiay ni Yis pasasiyoray a ciraraway ano patikolto maˈorip i, makalimay kiso masasowal cingranan to maanan?

¹⁸ Haratengen hena, itiniayto kiso i Lakoing nohatini, misacaciyaw toya pasasiyoray a ciraraway tamdaw. Maedeng masowalay namo tada miakoˈiday ko niyah to kinafalah ni Yis to ˈorip. Alatek papisowalen iso cingra itini ˈayaw no mapatay ci Yis to pina tatokian mafekaday a demak, ato matengil ningra ko sakiˈok ni Yis to aitini cingra i Lakoing i, samaanay ko harateng ningra. Mamilicay cingra tisowanan alatek, maˈorip itini salikoray ˈawaled no hekal ni Satan o masamaanay. Ngaˈay pasifanaˈ to mahaenay tamdaw minanam to Kimad no Kawas i, hahakowa ko lipahak ita saw!—Ifiso 4:22-24.

19. O kaˈorip i Lakoing hano cowa ko mamaˈisang hani? (Nengnengen ko papotalay coka.)

¹⁹ O kaˈorip i Lakoing cowa ko mamaˈisang, wa adihay ko kafanaˈan ita faelohay a widang, wa adihayho ko ciepocay a tayal. Sangaˈayay i, to romiˈamiˈad wa ngaˈay kita mitongal to kafanaˈ to i kakarayanay a Wama, milayap to sapafeli Ningra kitaanan a kihcod. Pakayni ci Yihofaan ato misangaˈan Ningra a maamaan, adihayayho ko nananamen ita, tahadaˈocto cowa ko mamaemin minanam. Ano halafin ko kaˈorip ita, o mamatongal ko olah ci Yihofaan. Mikiˈokay ci Yihofa aci Yis tahadaˈoc kita maˈorip i Lakoing, tada miakoˈiday kita Cangranan!