Padama to Tao Miemem to Pasangaray

1. Marariday ci Yihofa samaan pacaˈof to satolon no sikawdan Ningra hani?

MAFANAˈAY kiso sakadademakan ni Yihofa kiso pacaˈof to satolon no tao han? Ano hakowaayto ko mihecaan iso, o faˈinayan anca fafahiyan salikaka, ano malohemay malitengay kiso, dama sikawdan anca miceriday misakafahay, ngaˈayay pakaynien ni Yihofa tisowanan mihaen to demak. O cecay maolahay ci Yihofaan a tamdaw pasayra Cingranan micangacang i, marariday ci Yihofa misaka dademak to malohemay malitengay ato roma madimadiay a sikawdan, pafeli tora tamdaw to ‘sahinom.’ (Kolosay 4:11) Tano mahaenay a pakayraan matayal ci Yihofaan ato salikaka, tada kalikoan no mita. Ano mifekad ko lifong i, anca tahalifa ko salikaka to pades anca sapalak i, ngaˈayay kita mihaen to demak.

ITINI KALIFONGAN A TATOKIAN PADAMA TO TAO

2. Itini kalifongan a tatokian padama to tao hano cowa ko madoloay alatek?

² Ano ira ko lifong mifekad, cowato ka madolo kita masasipadama alatek. Tinakoen, sapilisoˈaw kita to widang alatek, kawra cowa ka rihaked mihaen to demak. Ciharatengay kita sapitahidangaw toya pasangaray ko kaˈorip a salikaka malacafay kitaanan komaen, kawra awaay ko hapakayraan mihaen to demak. O paro no lomaˈ ano macalohay misaali to sadimokos no mita, soˈlin sapipadamaaw kita to tao, alatek cangoˈotay ko ˈicel. Soˈlin mahaen, ciharatengayho kita sapadamaaw to salikaka. Haratengen, ano misaˈicelay kita mihaen, o mamahemek ci Yihofa. (Taneng 3:27; 19:17) Ngaˈay kita misamaan ko pidemak hani?

3. Mikitini malohemay malitengay i kasakopang no salikaka ci Tesi mananamay ita ko maanan? (Yirimiya 23:4)

³ O malohemay malitengay ngaˈayay midemak to maanan? Ano o malohemay malitengay kiso, mamafanaˈ to i kasakopangay a salikaka. (ˈOsien ko Yirimiya 23:4.) Fafekangay a lalakaw masowalay fafahiyan salikaka ci Tesib sanay: “Isaˈayaw, kasakapot ako mitosilay a malohemay malitengay marariday ato kako ato roma tamdaw malacafay mitosil, mipalakay to toki malacafay tamiyanan midemak to sinowayay a demak.” 2019 miheca midengaay adada mifekad ikor, o roma paro no lomaˈ ni Tesi madengaay no adada ko sakapatay, kawra pakayni mihadakan no malohemay malitengay isalakat a ˈicel, hato madoloayto ci Tesi micada to sapadama nangra.

4. O malohemay malitengay hano ngaˈay padama ci Tesian? Ngaˈay kita minanam to maanan hani?

⁴ Sanay ko sowal ni Tesi: “Kako ato malohemay malitengay o ngaˈayay a widang, mansa madoloay pasowal cangranan to nafalocoˈan ato kacalemceman no niyah.” O malohemay malitengay ngaˈay mananam ko maanan hani? ˈAyaw no mifekad ko katalawan songilaˈen a midimokos ko salikaka, wa malo widang nangra. Itini kalifongan a tatokian ano awaay ko pakayraan iso tayra milisoˈ cangranan, mamisaˈicel tano roma pakayraan milinnak cangranan. Sanay ci Tesi: “Nolatek papina cowa ka lecad a malohemay malitengay itini malecaday romiˈad patinwa anca palay takowanan. Soˈlin o sapaladaˈ nangra a sinael o kafanaˈanto ako, kawra kamayan a mitemer takowanan.”

5. Sasamaan ko malohemay malitengay mafanaˈ to saali no salikaka ato padama cangranan?

⁵ Sasamaan mafanaˈ to o manan ko saali no salikaka hani? Cecay pakayraan sakadademaken ko salicay mikayat cangranan pasowal to soˈlinay a harateng. (Taneng 20:5) Maedengay ko kakaenen nangra, o sapaiyo ato roma saali han? Wa awato ko katayalan nangra, anca awato ko sapateli to saesoy no lomaˈ han? Misaaliay cangra to papadamaen misinsi i sifo to sadama han? Macadaayto ni Tesi itini i nodafongan ko sapadama no salikaka, kawra sataˈangayay sapadama cingranan o maanan hani? O kaciharateng no malohemay malitengay cingranan, padama cingranan tanektek ko pakasoˈlin no falocoˈ. Sanay cingra: “Malacafayay ko malohemay malitengay takowanan a mitolon. Soˈlin cowato ka harateng ako o manan ko misowalan nangra, kawra maharatengay ako itiya samaanay ko nafalocoˈan no niyah. Hato matengilay ako ci Yihofa ko pasowalay takowanan: ‘Cowa ka toˈol kiso!’”—Isaya 41:10, 13.

6. O salikaka ngangaˈay midemak to maanan padama to kasakopangay romaroma a tamdaw? (Nengnengen ko coka.)

⁶ O roma tamdaw ngaˈayay midemak to maanan? Mafanaˈay kita to malohemay malitengay iraay ko ˈinorong midimokos to salikaka, kawra misaaliay ci Yihofa kitaanan polong a tamdaw masasipakalalok, madadama. (Kalatiya 6:10) Soˈlin mimingay a demak, wa ngaˈay pakalalok to adadaay a tamdaw. Tinakoen, o wawa ngaˈayay misangaˈ to kato anca mikonis to coka pafeli to faˈinayan salikaka pakalalok cingranan, o kapah a tamdaw ngaˈayay padama to cecay fafahiyan salikaka micakay to dafong, o roma tamdaw ngaˈayayho patado to adadaay tamdaw mitangtang to kakaenen, patayra i fawahang no lomaˈ ningra. Manaokaniw, misiˈayaw to pakidemay a lifong i, kasakopangay kahacecay tamdaw misaaliay to sapakalalok. Ano itinito i kasaˈopoan anca itini i tingnaw a masaˈopo, mahererek ko saˈopo ngaˈay kita materekho masasowal to salikaka. Roma i, malohemay malitengay misaaliay to sapakalalok. Cangra itini kalifongan a tatokian mikikaka to isalakat ko kaˈifowa, mansa o roma salikaka mikiriwiˈay mitilid to kato pasayra cangranan patahkal to miakoˈiday. Kita kahacecay tamdaw makamihadak to ˈicel ‘padadotoc masasihinom, masasipakalalok,’ tada makapahay mihaen to demak!—1 Tisalonika 5:11.

PADAMA TO TAO MISIˈAYAW TO PADES

7. O pades pairaay to maanan a teloc alatek?

⁷ O pades kalikiay mifalic to kaˈorip no cecay tamdaw. Tahalifaay to pades a tamdaw malahdawayto ko dafong alatek, lomaˈ, anca salawina widang. Mahaenay a kaadayayan mifekaday itini i salikaka no mita alatek. Sasamaan kita padama hani?

8. ˈAyaw no mifekad ko pades, malohemay malitengay ato tawki no lomaˈ ngaˈay midemak to maanan?

⁸ O malohemay malitengay ngaˈayay midemak to maanan? Malohemay malitengay maemin, papadama to salikaka iˈayaw no mifekad ko pades maherekto a misaday. Saˈosien ko kasakopangay kahacecay tamdaw mafanaˈay to samaan midemak to sakarihaked, ato sasamaan malalinnak to malohemay malitengay. Fafekangay lalakaw masowalay no fafahiyan salikaka ci Makelite: “O malohemay malitengay itini i cecay saali no kasakopang patalipaˈelalay tamiyanan, marariday mifekad ko matodohay a romiˈad cowaho ka hererek. Sanay cangra, ano misaali ko sifo to tamdaw mamiliyas, anca katalawanto ko pakayraan, wa tatangsol kita milaliw tayra i rihakeday a kitiraan.” Onini a sapatalipaˈelal tada matatodongay, samanen ikor no lima lipay o cecay pakidemay a katodoh mifekadayto. Itini pakalomaˈay pidoko i, o tawki no lomaˈ ngaˈayay malalicay to paro no lomaˈ, mifekad ko pades i mamidemak to maanan ko kahacecay tamdaw, soˈlin mifekadto ko pades, kiso ato wawa wa madoloto mitafo to rihaday.

9. ˈAyaw ato ikor mifekad ko pades i, o malohemay malitengay sasamaan malacecay ko demak hani?

⁹ Ano o kantok no kasakapot kiso, ˈayawho no mifekad ko pades i, saˈosien ko kahacecay kapot no niyah iraay ko sapilinnak a pakayraan. Pairaen ko cecay pitilidan to ngangan hanaca saˈosien a mikinsa, misaˈosi to matatodongay konini a lalakaw. Mihaen, ano mifekadto ko pades i, kaliki kiso milinnak to cecacecay tamdaw no kasakapot, hanaca cipinang to saali nangra. Mafanaˈto kiso to pakayraan no ˈalomanay ikor, onini a lalakaw kalikien mifanaˈ ko o misatenokay no malohemay malitengay, ikor wa linnaken no misatenokay tamdaw ko kasakilac kantok. Malacecay ko demak no malohemay malitengay, mihaen wa taˈangay ko sapadama to salikaka. Mifekad ko matodohay ikor, o kasakilac kantok ni Makelite 36 a tatokian cowa ka fotiˈ cowa ka pahanhan, malacafay to romaroma malohemay malitengay milinnak ato midimokos to maedeng 450 a malahdaway ko lomaˈ a salikaka. (2 Korinto 11:27) Telocto, polong awaay ko pinokayan a lomaˈ a tamdaw mahelaayto ko cecay liyad a pikilomaˈan.

10. O malohemay malitengay hano mamisaareteng to pakaenay a tayal hani? (Yohani 21:15)

¹⁰ O malohemay malitengay iraay ko ˈinorong itini no haratengan ato nofalocoˈan a pakayraan midimokos to salikaka. (1 Pitiro 5:2) Mifekad ko pades ikor, wa tangsol ko malohemay malitengay cipinang to rihakeday ko salikaka hokira, iraay ko kakaenen, iraay ko rikoˈ, iraay ko kitiraan hokira. Kawra, soˈlin halafinayto mataˈlif ko pades, o salikaka kamayan misaali to padadotoc no malohemay malitengay a ciharateng cangranan alatek, hanaca tano Fangcalay Cudad pakalalok cangranan. (ˈOsien ko Yohani 21:15.) Ci Halote o Iing no Fenpo, na milisoˈay to adihayay tahacadaay to pades a salikaka, sanay cingra: “Mikitini kapadesan milifok to sasayar misaaliay to toki. O kaˈorip no salikaka palidlid sanay patatikol ko ngaˈayay kaˈorip alatek, kawra milaliw to katalawan a nalifetan kamayan macerid a maharateng alatek, maˈilolayho cangra ko mapatayay a salawina widang alatek, ato roma pakayni cangranan mikiriwiˈay iraay ko epoc a dafong. Onini a nalifetan saliyaliyaw sanay mikidat to sakasomad no harateng nangra alatek. Onini cowa ko paihkalay to cangoˈotay ko pakasoˈlin, ao matatodongay a pinangan konini.”

11. O paro no lomaˈ no kasakopang padadotoc misaali to maanan a sapadama alatek?

¹¹ Sowal no Fangcalay Cudad ‘malacafay tomangic to tomangicay a tamdaw,’ o malohemay malitengay misaˈicelay mitoor tonini a sapalimoˈot midemak. (Loma 12:15) Tahalifaay to pades a salikaka misaaliay to sahinom, pakasoˈlin ci Yihofaan ato salikaka kamayan a maolah cangranan. O malohemay malitengay papadama to kasakopangay a paro no lomaˈ micerid mirienang to masakenaay midokoay a demak, mahawpay ko mitolon, micekiw, masaˈopo ato mitosil. Soˈlin adihayay ko mipalakan no pades a dafong, kawra o roma dafong ano mananto a pades cowa ko papakapalak, o malohemay malitengay wa pakalalok to wama wina padama to wawa no niyah miharateng tonini a demak. Wa patalipaˈelalen no wama wina ko wawa, wa padadotoc ci Yihofa malo widang nangra, itini tihi midama cangranan, pasowalenho ko wawa, o paro no taˈangayay lomaˈ no Krisciyang i paro no kakarayan cangra, ano hacowato makalimay ko salikaka pasayra cangranan mihadak to sapadama.—1 Pitiro 2:17.

12. O roma tamdaw ngaˈay samaan padama to tahapadesay a tayal hani? (Nengnengen ko coka.)

¹² O roma tamdaw ngaˈayay midemak to maanan? Itini i cowa ka raay no lomaˈ iso a kitiraan ano iraay ko pades mifekad, ngaˈayay licayen iso ko malohemay malitengay sasamaan kiso misadak to ˈicel. Ngaˈay kiso pakilomaˈ to awaay ko lomaˈ a salikaka anca mirienang to padamaay to tahapadesay matayal a tamdaw mihadak to cecay liyad a hapikilomaˈan, anca pafeli to kakaenen ato roma dafong i misaaliay a salikaka. Ano miraayay to lomaˈ iso ko mapadesay a kitiraan, wa ngaˈay kiso mihadak to sapadama. Samaan ko demak hani? Ngaˈayay kiso patado to tahapadesay a tamdaw mitolon. (2 Korinto 1:8-11) Ngaˈayay kiso pakiyaho midama to tayal i paro no cikiw, padama to tahapadesay a tayal mihadak to payci midama. (2 Korinto 8:2-5) Ano ngangaˈay kiso tayra i tahapadesay a kitiraan, ngaˈayay licayen ko malohemay malitengay sasamaan mirienang to padamaay to tahapadesay a tayal. Ano macada iso ko satahidang midama to tahapadesay, wa macada ko pina sapahatatanam alatek, mihaen wa ngaˈayto kiso itini iraay ko saali a kitiraan, ato itini misaaliay a tatokian misadak to sapadama.

PADAMA TO TAO MIEMEM TO SAPALAK

13. Itini makecengay ko mitosilay tayal a kilac, tahalifaay ko salikaka to maanan a pasangar hani?

¹³ Itini makecengay ko mitosilay tayal a kilac, o salikaka samanen tahacadaay to sapalak, pakidemay pasangar ko kaˈorip. Malecaday to roma tamdaw, wa tahalifa cangra to cangoˈotay to payci alatek, tahalifaho to pisemsem no adada ato kapatay no salawina, mansa misaaliay to sapakalalok. Kawra samanen makecengay ko tayal ita, o malohemay malitengay awaay ko hapakayraan milinnak anca milisoˈ cangranan alatek. I fafekangay lalakaw masowalay ko faˈinayan salikaka ci Anteli na misiˈayaway to mahaenay a pakayraan, ilalomaˈ no mitosilay kasakapot ningra o cecay fafahiyan salikaka iraay ko pasangar no sakaˈorip, ikor masongtolayho no citosiya. Wa kinapinapina cingra mitokad, cowato kangaˈay matayal. Ihkalay mafanaˈ ci Yihofa to saali nonini fafahiyan salikaka, cowa ka pawan cingranan. Soˈlin makeceng no sifo ato mafiyor no lifong, kamayan ko salikaka misaˈicel padama tonini a fafahiyan salikaka.

14. O malohemay malitengay sasamaan mitadiˈec ci Yihofaan, itini toniya pakayraan patireng to ngaˈayay a taˈarawan?

¹⁴ O malohemay malitengay ngaˈayay midemak to maanan? Mitolon ci Anteli ikor, midemakay to mamadangar no niyah a demak. Samaanay pacaˈof ci Yihofa cingranan hani? Pakalalokan ni Yihofa ko kasakopangay adihayay ko pasalat a tamdaw malacafay padama tonini a fafahiyan salikaka. O roma tamdaw miseraay to salikaka tayra i paisingan, iraayho ko roma tamdaw pafeliay cingranan to pina payci. Tada timoloay cangra, misaˈicel a midemak, telocto palemedan ni Yihofa cangra, o misadakan nangra maedeng parenecay to saali no salikaka. (Hipray 13:16) O malohemay malitengay, ano makeceng ko tayal ita, aka o niyah saan ko mitamorong to kihcod a ˈinorong, tahidangen ko tao padama. (Yirimiya 36:5, 6) Sakakaay kalimlaan i, tadiˈecen ci Yihofa, wa ngaˈay Cingra padama tisowanan midimokos to salikaka.

15. Ano micada to sapalak i, sasamaan padadotoc a makedec a malacecay hani?

¹⁵ O roma tamdaw ngaˈayay midemak to maanan? Itini makecengay a pakayraan, cowa ka ˈaloman ko micawmaˈan ita a salikaka alatek. Mihaenay, aniniho madadipayal to polong a salikaka, tada kalimlaan konini. Haratengen, o cacoˈayen ita i o ci Satan, cowa ko salikaka. Ano iraay ko caka ngaˈay a demak nangra, aka pakidem ko harateng. I kalalaˈed ano iraay ko manan a pasangaray, kalikien a misaysay. (Taneng 19:11; Ifiso 4:26) Ka talaˈayaw a padama to tao. (Titus 3:14) I fafekangay masowalay a nalifetan, malacafayay ko ˈalomanay padama toya misaaliay a fafahiyan salikaka, telocto polong a kapot no mitosilay milifokay to taˈangayay a epoc. Matongalay ko kalangaˈay nangra, malecaday o cecay paro no lomaˈ.—ˈOlic 133:1.

16. Mikitini Kolosay 4:3, 18, sasamaan kita padama to micadaay to sapalak a salikaka hani?

¹⁶ O masacaˈol masaemangay a salikaka soˈlin itini makecengay no sifo ko mitosilay a tayal a kilac maˈorip, kamayan tanektek midoko ci Yihofaan, ilalomaˈay nangra a roma tamdaw pakayni pihakelongan a mapalit i kapalitan. Ngaˈayay kita patado cangranan ato paro no lomaˈ nangra mitolon. O roma salikaka misiˈayaway to sakalahdaw no pasalat a katalawan mipakalalok toniya mapalitay a tamdaw, pafeli to dafong cangranan, tayra i hoing patado cangranan paˈading. Ngaˈayay kita patado toniya timoloay a salikaka mitolon.c (ˈOsien ko Kolosay 4:3, 18.) Aka pisakahmaw to sapadama no satolon iso.—2 Tisalonika 3:1, 2; 1 Timoti 2:1, 2.

17. Nohatini sasamaan kiso talaˈayaw misaday misiˈayaw to sapalak?

¹⁷ Kiso ato paro no lomaˈ aniniho ngaˈayto misaday misiˈayaw to sapalak. (Dmak 14:22) Aka hacecay han miharateng ko mamalifa no niyah katalawan a demak, ao mamisaˈicel mitongal to kalawidang ci Yihofaan, hanaca padama to wawa mihaen to demak. Ano calemcemay kiso, fowahen pasowal to nafalocoˈan i Kawas. (ˈOlic 62:7, 8) Paro no lomaˈ ngaˈay malacafay malalengo hano ngangaˈay kamo mitadiˈec ci Yihofaan.d Malecad o talaˈayaw misaday to pades, talaˈayaw kiso misaday to sapalak nohatini, wa ngaˈay padama to wawa milifok to epoc. Pasifanaˈen iso cangra mitadiˈec ci Yihofaan, ano ira sato ko sapalak i, o rarihaday cangra caka marawraw, eca ka ciˈangi.

18. Iraay ko maanan ˈodingaray a hatokel no mita hani?

¹⁸ O sapafeli no Kawas a rihaday pairaay to rihaked no mita. (Filipi 4:6, 7) Soˈlin tahalifa to lifong, pades ato sapalak, onini a rihaday ngaˈayay midipot to falocoˈ ita. Pakaynian ni Yihofa i malalokay matayal a malohemay malitengay pakaen kitaanan, paira to toki ita masasipadama. Malifokay ita rihaday nohatini wa ngaˈay padama kitaanan talaˈayaw misaday to taˈangayay sapalifet noikor. Ano mifekad ko ‘taˈangayay padiing’ noikor i, cowa ko pidipot aca ita to sakarihaday no niyah, papadamaho to roma tamdaw mihaen to demak. (Matay 24:21) Kawra ikor caayto ko mamisiˈayaw kita to masakenaay micariraway to tamdaw a demak. Malecad o mikiˈokan ni Yihofa isaˈayaw, wa ira ko soˈliˈlinay a rihaday no mita, tahira i daˈoc.—Isaya 26:3, 4.