‘Tahidangen ko Malohemay Malitengay no Kasakopang Tayni’

1. Samaanay ci Yihofa paihkal to misalimlaay to finawlan no Niyah hani?

MAOLAHAY ci Yihofa to finawlan Ningra, o kalimlaan a siri sanay ko pinengneng Ningra. Tano remesan no kaolahan Ningra a wawa ci Yis a miˈaca cangra, hanaca minilnilay to malohemay malitengay no kasakopang midimokos cangranan. (Dmak 20:28) Makalimay ci Yihofa to siri Ningra tahacada to lopayˈay a noka pidimokos. Mihaenay, wa tooren no malohemay malitengay ko sakayat ni Yis a pakalalok to salikaka, padama cangranan padadotoc madimadi ci Yihofaan.—Isaya 32:1, 2.

2. Mikiriwiˈay misinanot ci Yihofa padama to masamaanay a tamdaw hani? (Icikil 34:15, 16)

² Tangongolay ko olah ni Yihofa ciharateng to emin a finawlan Ningra. Ano ira ko miraayay Cingranan a tamdaw, wa mikiriwiˈ a misinanot Cingra padama to mahaenay a tamdaw. Pakaynien Ningra i malohemay malitengay no kasakopang padama cangranan patanoktok to pakasoˈlinay falocoˈ. (ˈOsien ko Icikil 34:15, 16.) Kawra, makalimay Cingra kitanan ano ira ko saali i, talaˈayaw a micangacang to sapadama. Ngaˈayay kita pasayni ci Yihofaan micangacang a mitolon, ngangaˈayho micangacang to sapadama no malohemay malitengay no kasakopang, samanen o minilnilan ni Yihofa cangra ‘pakaen ato pakafanaˈ’ kitanan.—Ifiso 4:11, 12.

3. Misamaanay hano kita maemin a tamdaw wa ngaˈay mikitini toniya lalakaw milifok to epoc hani?

³ Oniya lalakaw mamilengo samaanay ci Yihofa pakayni i malohemay malitengay padama kitanan patanoktok to pakasoˈlinay falocoˈ. Mamilengoho koniya lalakaw to tolo a salicay: Wa ihacowa micangacang to sapadama no malohemay malitengay hani? Hano mihaen ko demak hani? Sasamaan padama ko malohemay malitengay kitanan? Soˈlin nohatini kita cowa ka tahasiˈayaw to pasangar, kawra ano cipinang to sapacaˈof noniya salicay, wa matongal ko piakoˈid ita ci Yihofaan mihaen ko limasmas. Ano ikor i, tahalifa kita to pasangar, mamafanaˈto to sasamaan ko demak, alatek pakayni tonini mamadipot ko ˈorip no niyah.

WA IHACOWA MICANGACANG TO SAPADAMA NO MALOHEMAY MALITENGAY HANI?

4. Sasamaan kita mafanaˈ to sowal no Yakop 5:14-16, 19, 20, cowa ko soˈlinay adada ko cecay tamdaw hani? (Nengnengen ko coka.)

⁴ Samaanen no Kawas misakadademak ko malohemay malitengay mipadama kitanan, nisawawaan ci Yakop sanay: ‘Ilalomaˈ namo cima ko adadaay han? Tahidangen ningra ko malohemay malitengay no kasakopang tayni.’ (ˈOsien ko Yakop 5:14-16, 19, 20.) Ngangaˈay kita mikitini i saˈayaway ato lalikoray a sinael mahapinang, o tatodong ni Yakop cowa ko soˈlinay adada ko cecay tamdaw. Tinakoen, onini a tamdaw cowa ko soˈlinay mamikilim to ising, ao mamikilim to malohemay malitengay. Roma i, o misaalian noniya tamdaw to sapiadah milingatay to sapisododaw to raraw. Mihaenay i, o misowalan itini, o miraayay ci Yihofaan konini a tamdaw. Tatodong i, misalof malakangaˈay ci Yihofaan mahecadayto mipaisingay to adada no tireng. Ano soˈlinay adada kita i, wa paising kita, mifanaˈ to adada no niyah, ikor mitoor to sapaini no ising a midemak. Mahecadayto, ano maraay ko kalalaˈed ita aci Yihofa i, mamikilim to malohemay malitengay, mifanaˈ to pakayraan no niyah, ikor mitoor to mikitiniay i Fangcalay Cudad a sapaini no malohemay malitengay a midemak.

5. Sasamaan kita mafanaˈ to maraayayto ko kalalaˈed ita aci Yihofa hani?

⁵ Itini Yakop saka 5 fedengan pakalalokay kitanan, ano mahapinang tatiihto ko kalalaˈed ita aci Yihofa i, kilimen ko malohemay malitengay. Ano ˈayaw no pakidem ko pasangar i, milifok kita to sapadama, o tada ngaˈayayto! Sapihaenaw to demak, oha mamisasoˈlin mikinsa ko niyah. Patalipaˈelalay ko Fangcalay Cudad kitanan, alatek wa misakaniw kita to niyah, malahdawayto ko pihayda ni Yihofa, kawra ngaˈayay ko kalalaˈed ako aci Yihofaan sanay. (Yakop 1:22) Saka 1 hahekalan, o roma Krisciyang no Sati kasakopang, iraay ko mahaenay a raraw, mansa pakidemay a palimoˈotan ni Yis a mirikec. (Paˈarawan 3:1, 2) Ano kita i, sasamaan mikinsa to niyah hani? O cecay pakayraan i, palalinien ko isaˈayaway ato nohatini pakayni pidokoan demak a waywayan. (Paˈarawan 2:4, 5) Ngaˈayay licayen ita ko niyah: “Mahecaday kako to isaˈayway maolah mikingkiw ato midotim han? Matokaay kako misaday to lalakaw no saˈopo, cowa ka macerid mirienang to saˈopo? Mahecaday kako to isaˈayaway fanekfek a mitosil han? Misarocoday kako tano adihayay a toki ato harateng a sapietanaw to payci ato sapilawla han?” Ano iraay ko mahaenay a demak no niyah i, alatek paihkalay to miraayayto ko kalalaˈed ita aci Yihofa. Ano cowa ka pisinanot kita a misalof i, alatek wa tatiih tatiihto ko pakayraan. Ano awaay ko pakayraan no niyah misalof to kalalaˈed aci Yihofa i, anca midemakayto to misafelitay to palinian ni Yihofa a demak, oha mamikilim to sapadama no malohemay malitengay.

6. Pakidemay ko raraw a tamdaw sasamaan ko demak hani?

⁶ O roma a raraw tada pakidemayto, alatek wa mapadengay ko ngangan nai kasakopang. Ano mahaen ko raraw ita i, o mamikilim to malohemay malitengay. (1 Korinto 5:11-13) Misamaanay hani? O cecay lalangian, pakidemay ko raraw a tamdaw cowa ko tano ˈicel no niyah a misalof to kalangaˈay aci Yihofa. O roma lalangian i, sapilifokaw to sasodod ni Yihofa, oha mamisaˈosi ko niyah ‘o waywayan ato pasasiyoray a falocoˈ wa pahecaden,’ mahaenay a waywayan mahawpay ko mikilim to sapadama no malohemay malitengay.—Dmak 26:20.

7. Ihacowa kita mikilim to sapadama no malohemay malitengay hani?

⁷ Cowa ko pakidem ko raraw no mita ngaˈ mikilim to malohemay malitengay, ano malonay kita i, ngaˈayay kilimen ko sapadama no malohemay malitengay. (Dmak 20:35) Tinakoen, alatek malaˈodotay kiso to mararaway coos nohatini, kawra calemcemay kiso cowato ka pakafilo a micoˈay ko niyah. Ano ˈayaw no mala Krisciyang kiso i, na miselipay to etok, minengneng to kaacekan a lalakaw anca maˈodangay ko kaˈorip, alatek wa pasangaren miremo to mararaway coos no niyah. Kawra, cowa ka cecay aca kiso a misiˈayaw. Ano cariraw kiso i, ngaˈayay fanaˈen ko pakasoˈlinan iso a malohemay malitengay, mamihadidi cingra mitengil, papafeli tisowanan to matatodongay a sapaini. Padamaho tisowanan pakasoˈlin, ano misetek kiso a micoˈay to mararaway coos, wa tahacada to pihayda ni Yihofa. (Patnakay 4:12) Ano pakayniay kiso eca ka pakaremo to mararaway a coos a matoleden ko falocoˈ i, papatalipaˈelal koniya malohemay malitengay tisowanan, ano ira ko mahaenay a harateng, paihkalay to misalimlaay kiso to kalalaˈed no niyah aci Yihofa, paihkalayho to misapoeneray kiso, cipinangay to citolasay ko ˈicel no niyah.—1 Korinto 10:12.

8. O kahacecay ita a raraw mamikilim to malohemay malitengay han? Tadtaden hena.

⁸ O kahacecay ita a raraw i, o mamikilim to malohemay malitengay han? Cowa. Ano midokaˈay ko sowal iso to salikaka, mangolawayho, ano mahaenay i, nolatekay cowa ko mamikilim to malohemay malitengay. Ngaˈayay todongen iso ko sapaini ni Yis a midemak, talaˈayaw a miliˈay cingranan. (Matay 5:23, 24) Ngaˈayay kilimen iso ko milingatay to damsayay, mihadidiay, miˈimeray a capeling a lalakaw, haratengen ko sasamaan misalof itini toniya pakayraan. Manaokaniw, ano cowaho ka misaysay to pasangar i, kilimen ko malohemay malitengay. Tarokos ci Pawlo na patikamiay to Filipi a kasakopang, miocor to cecay faˈinayan salikaka padama ci Yoatian aci Sintoci misaysay to kalacongis. O malohemay malitengay i kasakopang iso, wa ngaˈay mihaen padama tisowanan.—Filipi 4:2, 3.

HANO MAMIKILIM TO SAPADAMA NO MALOHEMAY MALITENGAY?

9. Hano aka pakayni matalaw to mangodoen eca ka picangacang to sapadama hani? (Taneng 28:13)

⁹ Ano pakidem ko raraw ita, anca pasangaray micoˈay to mararaway a coos, mikilim to sapadama no malohemay malitengay misaaliay to pakasoˈlinay falocoˈ ato timolo. Kawra, aka pakayni matalaw to mangodoen eca ka picangacang to sapadama. Misamaanay hani? Milimasmasayto ci Yihofa, papipadama ko malohemay malitengay kitanan patanoktok to pakasoˈlinay falocoˈ. Ano mikilim kita to malohemay malitengay, paihklay to pakasoˈlinay kita a mitiˈer ci Yihofaan, makahi midofdof Cingranan, paihkalayho mihayiay kita to misaaliay to sapadama ni Yihofa ngaˈ padadotoc midemak to matatodongay. (ˈOlic 94:18) Ngaˈayay pakasoˈlin kita, ano mihayiay kita to raraw no niyah i malohemay malitengay, hanaca cowato ko mamidemak to mararaway, tatahacada to sasodod ni Yihofa.—ˈOsien ko Taneng 28:13.

10. Misamaanay hano aka mihimed to raraw no niyah hani?

¹⁰ Ano mihayiay kita to raraw no niyah i malohemay malitengay, wa tahacada to sasodod ni Yihofa alatek, malakangaˈay Cingranan. Kawra ano mihimed kita to raraw no niyah, alatek tatiih tatiihto ko pakayraan. Na mihimed ci Tafiti to raraw no niyah i, makesemay ko falocoˈ ato harateng ningra, samanen mafanaˈay cingra malahdawayto ko pihayda ni Yihofa to niyah. (ˈOlic 32:3-5) Ano adada kita i, ano caka tangsol paising, wa pakidemto ko adada. Mahecaday, ano pakidem ko raraw ita ikor, caka tangsolen mikilim ko malohemay malitengay, wa tatiihto ko pakayraan. Cowa ka hemek ci Yihofa manengneng ko mahaenay a demak, mansa palimoˈotay kitanan, mamikilim to sapadama no malohemay malitengay, mihaen mamalakangaˈay ko kalalaˈed ita Cingranan.—Isaya 1:5, 6, 18.

11. Mihimed to raraw, sasamaan mifiyor to romaroma tamdaw hani?

¹¹ Ano mihimed kita to pakidemay a raraw no niyah i, mamifiyorho to romaroma a tamdaw. Alatek mamaconged ko lingad no fangcalay saocor no Kawas i kasakopang, mamafiyorho ko dipayal ato rihaday no salikaka. (Ifiso 4:30) O roma i, ano mafanaˈ kita ira ko pakidem ko raraw a tamdaw i kasakopang, kawra cowa ka pasowal a mihimed i, mamafiyor ko kalalaˈed ita aci Yihofa. (Lifi 5:1) Pakalaloken ita ko mararaway a tamdaw kaliki a mifanaˈ to malohemay malitengay, mihayi to raraw no niyah. Kawra ano cecayto a liyad ikor i, kamayan cingra cowa ka pifanaˈ to tamdaw, tatalaˈayawen ita pasowal ko malohemay malitengay, samanen maolahay kita ci Yihofaan, sakamadimadiaw Cingranan. Mihaen ko demak ita, o misaˈicelay mitawmec to sakakorac no kasakopang, hanaca o papadama to mararaway a tamdaw patatikol to kalangaˈay ci Yihofaan.

SASAMAAN KO MALOHEMAY MALITENGAY PADAMA KITANAN?

12. Sasamaan ko malohemay malitengay padama to malonayay a tamdaw?

¹² Palimoˈotay ko Fangcalay Cudad to malohemay malitengay mamidama to malonayay a tamdaw, padama cangranan patatikol ko kalangaˈay aci Yihofaan. (1 Tisalonika 5:14) Ano mararaw kiso i, alatek mamilicay cangra tisowanan to pina a salicay, cipinang to harateng ato nafalocoˈan iso. (Taneng 20:5) Alatek pakayni mangodoen kiso a pasangar pacaˈof, kawra mamisongilaˈ kiso a pasowal cangranan to masiˈayaway iso a pasangar, ano mihaen wa cipinangto cangra sasamaan padama tisowanan. Aka a calemcemen ko ‘mafolaay a macalohay’ ko sowal iso. (Yopu 6:3) O malohemay malitengay cowa ka tangsol a misaˈosi, ao misongilaˈ a mitengil, cipinang to kihcod a demak ikor, ngaˈ pasowal to sapaini. (Taneng 18:13) Cipinangay cangra padama to salikaka misaaliay to toki. Ano pasangar ko demak i, cowa ka hinatala cangra kinacecay sa masaysayto ko demak maemin.

13. O malohemay malitengay sasamaan pakayni i satolon ato Fangcalay Cudad a padama kitanan hani? (Nengnengen ko coka.)

¹³ Cowa ko sapitongalaw ko malohemay malitengay to macariraway masemsemay a falocoˈ iso, makalimay cangra tahacada kiso to sahinom. Sasamaan ko demak nangra hani? Wa pakayni cangra tisowanan a mitolon. O satolon nangra o ‘ciepocay,’ pakayni pilingat tisowanan alatek mataˈlif to hinatalaan no miso. O roma i, wa ‘pakaynien i ngangan ni Yihofa a pasimal [kiso].’ (Yakop 5:14-16) Masowalay itini a ‘simal’ o mitoroˈan i, o soˈlinay kimad. Tatano sinaelen nangra a mihinom kiso, padama tisowanan patatikol ko kalangaˈay aci Yihofa. (Isaya 57:18) Misalalangian nangra ko Fangcalay Cudad a sapaini, papaˈicel to misetekay a falocoˈ iso, ho ciˈicel kiso midemak to matatodongay. Wa mahecad to matengilay iso ko sowal ni Yihofa: ‘O moecelay a lalan koni, ka romakat kamo toniya lalan o matatodongay.’—Isaya 30:21.

14. Mikitini Kalatiya 6:1, sasamaan ko malohemay malitengay padama to mapolinay a tamdaw hani?

¹⁴ ˈOsien ko Kalatiya 6:1. O Krisciyang ano misafelit to moecelay palinian no Kawas i, o ‘mapolinayto.’ Alatek midemakay cingra to cowa ka citaneng a saˈosi, hanaca pakidemay ko pisafelit to rikec no Kawas. O malohemay malitengay samanen maolahay toniya tamdaw, wa ‘tano damsayay a waywayan a misalof cingranan.’ O pihongyak itini to ‘pisalof’ no Krisiya a sowal, ngaˈayay mitoroˈan i, patatikol ko ising to malaliyasay a ˈokak no adadaay, eca ka masamoˈ ko adadaay. O ciinanengay a ising mihaen ko demak i, mamisaˈicel miesal to semsem no adadaay. Mahecadayto, ano padama ko malohemay malitengay to salikaka patatikol ko kalangaˈay ato Kawas i, mamisinanot eca ka pitongal ko semsem ningra. Patalipaˈelalayho ko sinael to malohemay malitengay ‘maminaˈon ko niyah,’ mahawpay ko mamisinanot to waywayan no niyah. Ano misalof ko malohemay malitengay to tao i, wa maharateng to cowa ka lefot ko niyah, mamapolin alatek, mihaenay caka misao moecelay ko niyah saan miharateng cangra, paihkal to misatakaraway, awaay ko macacaˈiay a waywayan, ao misaˈicel siniˈada to mararaway a tamdaw.—1 Pitiro 3:8.

15. Ano ira ko pasangar ita i, sasamaan ko demak hani?

¹⁵ Ngaˈay kita pakasoˈlin to malohemay malitengay. Macadaayto nangra ko sapahatatanam, mafanaˈayto hamaan pasowal to notekedan a demak no mita. Mananamay nangra hamaan doedoen ko harateng no niyah, ao mamisalalangian to Fangcalay Cudad a paini kitanan, padadotoc miesal to karetengay ˈinorong no mita. (Taneng 11:13; Kalatiya 6:2) Soˈlin cowa ka hecahecad ko pinangan ato nalifetan nangra, kawra ano ira ko pasangar ita i, kilimen ilalomaˈ nangra ko cecay malohemay malitengay. Kawra haratengen, aka pakayni sapitengilaw to kaolahan no niyah a sapaini, milicay to cecacecay a malohemay malitengay. Ano mihaen to demak, paihkalay to sapitengilaw aca to ‘kaolahan a sowal’ kita, cowa ko sakacipinangaw to Kimad no Kawas a ‘ciepocay sapasifanaˈ.’ (2 Timoti 4:3) Padamaay ko malohemay malitengay kita i, alatek mamilicay kitanan na milengoanto ita ko roma malohemay malitengay, ato o manan ko sapaini nangra. Roma i, ira ko misamimingay a waywayan no malohemay malitengay, alatek mamilengo to roma malohemay malitengay.—Taneng 13:10.

MITAMORONG TO ˈINORONG NO NIYAH

16. Kahacecay a tamdaw oha mamitamorong to manan a ˈinorong hani?

¹⁶ Soˈlin mamihimaw ko malohemay malitengay kitanan, mahecad mihimaw ko pakaenay to siri, kawra cowa ko patado cangra kitanan a misaˈosi, ao papadama kitanan misinanot to harateng no Kawas. Ano misongilaˈ kita a misimsim ato misakadademak to pakayniay i Fangcalay Cudad a sapaini nangra, oha mapahatatanam ko ‘pafafidaˈay a inaneng’ no niyah, mafanaˈ citaneng ko pisaˈosi. (Hipray 5:14) Kahacecay a tamdaw kita mamitamorong to ˈinorong no niyah, tano sasowalen ato waywayan paihkal to tangongolay ko olah ita ci Yihofaan, sapilifokaw to pihayda Ningra. Mitadiˈec to sapadama ni Yihofa, wa pakaremo kita to saconged, madimadi Cingranan!—Loma 14:12.

17. Makalimay ci Yihofa sasamaan ko demak ita hani?

¹⁷ Malo lopayˈay siri ni Yihofa, tada karahekeran ita! Miocoran Ningra ko kanonoˈan a Wawa ci Yis Kristo malo ‘ngaˈayay pakaenay’ kitanan, pakayni kitanan kinafalah to ˈorip, ho ira ko hatokel ita tahadaˈoc maˈorip. (Yohani 10:11) Palaˈosiayho ci Yihofa to mikiˈokan no niyah, pakayniay i malohemay malitengay padama kitanan. Sanay Cingra: ‘Pafelien Ako kamo to matatodongay ko falocoˈ Ako a pakaenay, wa tano sifanaˈ ato cipinangay a inaneng cangra a pakaen tamowanan.’ (Yirimiya 3:15) Oniya makapahay limasmas ni Yihofa, hamaan misaloyaˈ kita to makapahay araaw Ningra. Ano malonayay ko pakasoˈlinay falocoˈ ita, hanaca pakidemay ko raraw, kalikien a mikilim ko sapadama no malohemay malitengay, aka a cisasa, mihaen ko demak ita, wa matinako ko olah ni Yihofa a midimokos.