Faˈinayan Salikaka—Misaˈicelay Kiso Citatodong Malo Malohemay Malitengay Han?

1-2. Midemakay ko malohemay malitengay to manan ‘makapahay a tayal’?

ANO cecayayto a liyad mala dama sikawdan kiso, palahadanto ko adihayay makapahay capeling, ciinanengto malo malohemay malitengay. Ngaˈay kiso pakayni toniya patosokan a macakat, midemak to ‘makapahay a tayal’ han?—1 Timoti 3:1.

² O manan ko tayal no malohemay malitengay hani? Wa mikerid cingra to mitosilay, misaˈicel to pakaenay ato pakafanaˈ to salikaka, tano sasowalen ato waywayan a pakalalok, patongal to pakasoˈlinay falocoˈ nangra. Mansa patinakoan no Fangcalay Cudad ko malalokay matayal a malohemay malitengay to o ‘sapatelong’ i kasakopang.—Ifiso 4:8.

3. Ano makalimay ko faˈinayan salikaka malo malohemay malitengay, cacitatodong to manan a saali hani? (1 Timoti 3:1-7; Titus 1:5-9)

³ O cecay faˈinayan salikaka misamaan ngaˈ malo malohemay malitengay hani? Citatodong malo malohemay malitengay, cowa ka hecad to mikilimay to katayalan. Mikilim kiso to katayalan i, edengan misaalian no tawki a inaneng no miso, wa ngaˈay kiso itira matayal. Kawra, ano makalimay kiso malo malohemay malitengay, mafanaˈ kiso mitosil pakafanaˈ to tamdaw cowaho ka edeng, citatodongho to 1 Timoti 3:1-7 ato Titus 1:5-9 a saali. (ˈOsien.) Oniya lalakaw misalalangiay toniya sinael, mikitini toloay a pakayraan milengo to sasamaan malo malohemay malitengay: ira ko makapahay ngangan i kasakopang, misongilaˈ ciˈinorong to mala tawkiay no lomaˈ, ato makahi matayal i kasakopang.

IRA KO MAKAPAHAY NGANGAN

4. ‘Awaay ko halarikecen’ sa i, o manan ko tatodong hani?

⁴ Malo malohemay malitengay, ‘awaay ko halarikecen’ iso, oha mamakapah ko waywayan, ira ko makapahay ngangan i kasakopang. Roma i, ‘cowa itini aca i kasakopang ira ko makapahay ngangan’ iso. Cowa ka pidoko ci Yihofaan a tamdaw alatek wa milikaf to pihakelongan iso, kawra awaay ko lalangian nangra mirikec to waywayan iso. (Taniil 6:4, 5) Salalicayen ko niyah: “Ano icowato i, iraay ko makapahay ngangan no mako han?”

5. ‘Maolah to ngaˈayay’ o manan ko tatodong hani?

⁵ ‘Maolah to ngaˈayay’ kiso, wa misaˈicel mikilim to kangaˈayan no tao, masemer cangranan. Makahiayho kiso padama to tamdaw, talaˈayaw pakayni to tao a midemak. (1 Tisalonika 2:8) O hatiniay a capeling pakayni to malohemay malitengay hano o masakalimlaan hani? Samanen pakaenay milisoˈ to salikaka, midemak to tayal no kasakopang misaaliay to adihayay a toki. (1 Pitiro 5:1-3) Ira ko hatiniay a capeling nangra, mansa kinafalahay to niyah dademak saki tao o kahemekan koni.—Dmak 20:35.

6. ‘Hinalafangay’ o manan ko tatodong hani? (Hipray 13:2, 16; nengnengen ko coka.)

⁶ ‘Hinalafangay’ hananay o makalimay kiso damsayay militemoh to tao, mahawpay ko cowa ka macerid macacawmaˈ a tamdaw. (1 Pitiro 4:9) O citing no Fangcalay Cudad sanay to hinalafangay a tamdaw: “Mafohatay ko saedef no lomaˈ ningra pakayni to kafahalan a tamdaw, mahecaday ko falocoˈ ningra.” Salalicayen ko niyah: “Hinalafangay sanay ko tao takowanan han?” (ˈOsien ko Hipray 13:2, 16.) Hinalafangay a tamdaw makahiay micada to masakenakenaay a tamdaw, tinakoen o manikaway a salikaka, nai romaay a kasakopang tayni mikimad a faˈinayan salikaka, ato malalokay matayal a kasakilac kantok.—Satapangan 18:2-8; Taneng 3:27; Luka 14:13, 14; Dmak 16:15; Loma 12:13.

7. ‘Hamaan maˈanof to hafay’ o manan ko tatodong hani?

⁷ ‘Hamaan maˈanof to hafay’ tatodong i, cowa ka pakidem kiso minengneng to dafong, ano manikaw mahafayto ko kaˈorip no miso, isalakaten iso micangacang ko Kitakit no Kawas. (Matay 6:33) Mafanaˈ kiso misakadademak to toki, ˈicel ato romaroma pakayraan a midoko ci Yihofaan, midimokos to paro no lomaˈ, mala dademakayho no kasakopang. (Matay 6:24; 1 Yohani 2:15-17) Licayen ko niyah: “Samaanen ako a minengneng ko payci hani? Iraho ko dafong no sakaˈorip ako i, cinarenecanto han? Anoca ciharatengay kako mietan to payci, miˈaca to adihayay a dafong han?”—1 Timoti 6:6, 17-19.

8. Samaanen iso ko demak, paihkalay to ‘miˈimeray ko niyah,’ ‘ira ko miˈimeray no kaˈorip’ hani?

⁸ ‘Miˈimeray to niyah’ kiso, hanaca ‘ira ko miˈimeray no kaˈorip,’ oha ngangaˈay to matatodong ko pinengneng to nokaˈorip. Mahawpay ko cowa ko mamaˈanof to kakaenen, cowa ka pakidem ko lawla ato pilafa, cowa ko sapitodongaw to nanaman noniya hekal. (Luka 21:34; Yakop 4:4) Soˈlin mapakangolaw no tao kiso, kamayan a rihaday ko falocoˈ iso. ‘Cowa ka malasang’ kiso, cowa ka haliepah kiso sanay ko tao. Haratengen hena: “O kaˈorip no mako paihkalay to o miˈimeray a tamdaw kako han?”

9. ‘Marocekay ko harateng’ ato ‘malosimet ko demak’ o manan ko tatodong hani?

⁹ ‘Marocekay ko harateng’ iso, wa tano safalod no Fangcalay Cudad a midotim. Tahalifa to demak i, wa misaharaterateng kiso to milingatay a safalod no Fangcalay Cudad, ˈayaw no sakacipinangaw to emin a pakayraan i, cowa ko kasimaan sa ko pisaˈosi. (Taneng 18:13) Mihaen i, wa masongilaˈ a cipinang to demak, citaneng ko pisaˈosi, paihkalen ko pinengneng ni Yihofa. ‘Malosimet ko demak’ tatodong i, o mananto a demak pairaen ko mihalakaay no miso, o midoedoay to toki a tamdaw. Ngaˈayay tiˈeren kiso sa ko tao, hanaca midofdofay to sakayat a midemak. Oniya milengoan a makapahay capeling oha ngangaˈay ira ko makapahay ngangan no miso. Dotoc i, wa milengo to sasamaan ciˈinorong to mala tawkiay no lomaˈ.

CIˈINORONG TO MALA TAWKIAY NO LOMAˈ

10. Misamaan ko demak ngaˈ, ‘masongilaˈ ko pikayat to paro no lomaˈ no niyah’ hani?

¹⁰ Ano ciraramodayto kiso, o makapahay ngangan no paro no lomaˈ, milingatay to hatatodong no malo malohemay malitengay a saali. Saan ko Fangcalay Cudad, ‘songilaˈen a mikayat ko paro no lomaˈ no niyah,’ mala o ciolahay, o ciˈinorongay a tawki no lomaˈ, songilaˈen a mikerid ko paro no lomaˈ mirienang to masakenakenaay a midokoay a demak. Misamaanay hano masakalimlaan koniya demak hani? Sanay ko tarokos ci Pawlo: ‘Ano caka fanaˈ ko tamdaw mikayat to paro no lomaˈ, sasamaan a midimokos to kasakopang no Kawas hani?’—1 Timoti 3:5.

11-12. O waywayan no wawa samaanay milingat to sakacitatodongaw no wama malo malohemay malitengay hani? (Nengnengen ko coka.)

¹¹ Ano cowaho ka matataos ko 18 mihecaan no wawa iso, oha ‘mamitengil a midofdof, halo mafanaˈ a ciˈinorong’ cangra wangaˈ. Manaokaniw, maolah mihalama matawa o pinangan no wawa konini. Kawra, ano tano olahen iso a pakafanaˈ, pahatatanam cangranan, wa mananam nangra mitengil ko sowal, midofdof to sapalimoˈot, mikangodo to tao. Masakalimlaan i, saˈicelen padama ko wawa mala widang ni Yihofa, pakafanaˈ cangranan midoedo to safalod no Fangcalay Cudad a maˈorip, misaˈicel pasayra to sapicadaaw to paputisem a patosokan.

¹² ‘O wawa pakasoˈlinayho to Tatapangan, awaay ko mikokotay to wawa ningra pakidemay ko pasalat anca mitowakangay.’ Ano iraay ko mihakelongay to Tatapangan a wawa pakidem ko raraw, sasamaan milingat to wama hani? Ano misakahmaw mirikec ko wama to wawa, alatek awa ko tatodong ningra malo malohemay malitengay.—Nengnengen ko Mikecolay Saka 10 Folad 15, 1996, saka 21 fiedac, 6-7 fatac.

MALA DADEMAKAY NO KASAKOPANG

13. Misamaan ko demak iso ngaˈ, o ‘makahiay pacaˈi’ ato ‘caka pisamacay to niyah a harateng’ hani?

¹³ Paihkal ko faˈinayan salikaka to makapahay capeling, taˈangayay ko sapadama no kasakopang. ‘Makahiay pacaˈi’ ngaˈayay midama to sakakedecaw no kasakopang. Makahiay kiso mitengil, misaˈicel cipinang to harateng ato nafalocoˈan no tao, wa mahapinang no ˈalomanay to o makahiay pacaˈi a tamdaw kiso. Ano o malohemay malitengay kiso, masaˈopo malalengo kamo i, cowa ka pihai kiso to harateng no roma malohemay malitengay, kawra ano cowa ka pisafelit to safalod no Fangcalay Cudad, makahi kiso midama tono ˈalomanay a saˈosi han? ‘Caka pisamacay to niyah a harateng’ tatodong i, mafanaˈay kiso ‘saˈopoen ko ciepocay a harateng no tao’ masakalimlaan koni, o mako aca ko tatengilen cowa ka saan. (Satapangan 13:8, 9; Taneng 15:22) Ano ‘cowa ka olah to malacongisay’ kiso, ‘cowa ka narikay a mangolaw,’ wa cowato ka misakahmaw a minengneng to tao, anoca nalikay a malacongis. Wa damsay ko pilitemoh iso to tao, micowat to dipayalay, ano mafekad ko lacongis i, talaˈayaw a miliˈay. (Yakop 3:17, 18) Damsayay ko sapacaˈof iso wa masayar ko harateng no tao, ya pakidemay ko piroero tisowanan a tamdaw alatek wa mafalic ko waywayan nangra.—Kakitaan 8:1-3; Taneng 20:3; 25:15; Matay 5:23, 24.

14. ‘Cowa ko faelohay mala Krisciyang’ ato ‘madimadiay’ o manan ko tatodong hani?

¹⁴ Citatodongay malo malohemay malitengay a faˈinayan salikaka, ‘cowa ko faelohay mala Krisciyang.’ O halafinayto miheca micada to paputisem wangaˈ cowa ka saan, kawra sakatenesaw i, misaaliayto to toki. ˈAyaw no malo malohemay malitengay i, pahecaden ci Yisan a misapoener, makahi dademak to kihcod a tayal, mihadidi a mitala ci Yihofaan pafelien kiso to adihayay a dademaken. (Matay 20:23; Filipi 2:5-8) Ano madimadi kiso ci Yihofaan, midofdof to palinian Ningra a maˈorip, mitengil to sakayat no likakawa Ningra, mamisawacay to o‘madimadiay’ a tamdaw kiso.—1 Timoti 4:15.

15. Wa mafanaˈ mikimad ko malohemay malitengay sanay han? Tadtaden hena.

¹⁵ Ihkalay ko sowal no Fangcalay Cudad, o kantok misaaliay to ‘ira ko pakafanaˈay a inaneng.’ Sakora sowal i, wa mafanaˈ kiso a mikimad han? Cowa. Soˈlin adihayay ko inanengay malohemay malitengay cowa ka sahto sa mafanaˈay a mikimad, kawra itini i pitosilan ato pakaenay a milisoˈ i, ngaˈayay tano Fangcalay Cudad pakafanaˈ ato pakalalok to tao. (Nengnengen 1 Korinto 12:28, 29; Ifiso 4:11.) Ano sapacakataw kiso to pakafanaˈay a inaneng, samaanen ko demak hani?

16. Ano sapacakataw to pakafanaˈay a inaneng, sasamaan ko demak hani? (Nengnengen ko coka.)

¹⁶ ‘Kodaitay misakadademak to papakasoˈlinen a sowal.’ Ano sapacakataw kiso to pakafanaˈay a inaneng, o misikayay to kamok no saˈopo anca tekedan mihadak to sapirikec, o sowal iso mamisalalangian to Fangcalay Cudad. Songilaˈen a mikingkiw ko Fangcalay Cudad ato mitepangan no likakawa, mangalef ko pisinanot to mitepangan a cudad samaanay mitadtad to sinael, ikor tano mitepangan a noka pitadtad pakafanaˈ to tamdaw. (Taneng 15:28; 16:23) Saˈicelen patemer ko falocoˈ no mitengilay, pasayraho i cinalifetan a malohemay malitengay a misaali to sapakafanaˈ. (1 Timoti 5:17) Sanay ko Fangcalay Cudad, o malohemay malitengay ‘pakalaloken’ ko salikaka, ano misaali i, hadaken ko sapaini mangalefay ko ‘mirikecay.’ Ano masamaanayto a pakayraan, sidaˈiten ko waywayan iso. Ano misalalangian to Fangcalay Cudad ko sowal iso, hanaca macada no tao ko olah no miso, o mitodongayto koni to tadamaanay pakafanaˈay a Yisan.—Matay 11:28-30; 2 Timoti 2:24.

PADADOTOC A MACAKAT

17. (1) Wa ngaˈay kiso sasamaan padadotoc a macakat hani? (2) Mihapinangay ko malohemay malitengay to faˈinayan salikaka i, o manan ko haharatengen hani? (Nengnengen ko sapatongal lalakaw “Mihapinang to Tao i, Pairaen ko Misamimingay a Falocoˈ.”)

¹⁷ Mafanaˈ to saali i, o roma dama sikawdan alatek cowa ko mamala malohemay malitengay kako sanay ko harateng. Ano mahaenay ko harateng iso i, haratengen, ci Yihofa ato likakawa Ningra malefot ko midemakan iso cowa ka saan. (1 Pitiro 2:21) Iraay ko sapadama no fangcalay saocor, wa malaˈosi ko demak iso! (Filipi 2:13) Icowaay ko mikiriwiˈay to hasakacakataw iso hani? Ngaˈayay cangacangen ci Yihofa padama tisowanan, ngaˈayho mikingkiw to milingatay a lalakaw, anca saalien ko malohemay malitengay to sapaini tisowanan.

18. Polong dama sikawdan wa ngaˈay patireng to manan patosokan hani?

¹⁸ Nanay kita maemin, mahawpay ko malo malohemay malitengay a faˈinayan salikaka, midofdof to masowalay noniya lalakaw a saali padadotoc a macakat. (Filipi 3:16) O dama sikawdan kiso han? Ka padadotoc a macakat, cangacangen ci Yihofa pahatatanam palatamdaw tisowanan, ho matayal kiso to adihayay tayal no kasakopang aci Yihofaan. (Isaya 64:8) Padadotoc kiso misaˈicel, palemeden ni Yihofa kiso!