Miakoˈiday to ‘Malo Sapatelong’ a Tamdaw

1. Hinapaladaˈay ni Yis pafeliay to manan a sapatelong hani?

CI YIS o sakakaay hinapaladaˈay a tamdaw, patelongan ningra kita to adihayay a dafong. I fafekangho no sera i, maceriday cingra midemak to kasapaan a padama to tao. (Luka 9:12-17) Pakayniayho kitaanan a kinafalah to ˈorip no niyah, o masakalimlaan a sapatelong ningra koni. (Yohani 15:13) Patikol a maˈorip ci Yis ikor, padadotocay a hinapaladaˈ. Midofdofay cingra to mikiˈokan, mingitangit ci Yihofaan to fangcalay saocor a pakafanaˈ mihinom kitaanan. (Yohani 14:16, 17 ato roma pihongyak; 16:13) Pakaynianho ningra i saˈopo no kasakopang padadotoc pahatatanam kitanan, ho ngaˈay kita i paro no kakarayan padama to tamdaw mala nisawawaan ningra.—Matay 28:18-20.

2. O cima ko masowalay no Ifiso 4:7, 8 ‘malo sapatelong’ a tamdaw hani?

² Saharateratengen ko sapafeli ni Yis a roma sapatelong. Sanay ko tarokos ci Pawlo, tayni i kakarayan ci Yis ikor ‘pafelian ningra ko tamdaw, malo sapatelong.’ (ˈOsien ko Ifiso 4:7, 8.) Sowal ni Pawlo, o araaw ni Yis i, oha aitini i kasasiroma a pakayraan padama to kasakopang. (Ifiso 1:22, 23; 4:11-13) Anini, oniya ‘malo sapatelong’ a tamdaw mahawpay ko dama sikawdan, malohemay malitengay ato kasakilac kantok.a Soˈlin, oniya salikaka sahtoay cowa ko malefotay, mararaway cangra. (Yakop 3:2) Kawra maocoray ni Yis cangra maemin a padama kitanan, o sapatelong ningra koni.

3. Tano sapatinako a mitadtad, polong a tamdaw sahtoay ngaˈayay midama to tayal no ‘malo sapatelong’ a tamdaw.

³ Miocoran ni Yis koniya ‘malo sapatelong’ a tamdaw matayal i kasakopang, patanoktok to salikaka. (Ifiso 4:12) Kawra o roma tamdaw ngaˈayay padama cangranan malaˈosi toniya kalimlaan a tayal. Tinakoen, patireng to Kasaˈopoan i, soˈlin o roma tamdaw cowa ka pirienang to patirengay a tayal, kawra ngaˈayay pakalic to matayalay, mipawsa to kakaenen ato romaroma a demak, tano mahaenay a pakayraan midama toniya patirengay a tayal. Mahecadayto, ngaˈayay pakayni sasowalen ita ato midemakan, midama to dama sikawdan, malohemay malitengay ato kasakilac kantok a tayal. Dotoc nengnengen ita, malalok matayal cangra samaanay ko sakaciepoc no mita. Wa milengoho to misamaan kita paihkal to miakoˈiday toya ‘malo sapatelong’ a tamdaw, atoya pafeliay to sapatelong a Yisan.

DAMA SIKAWDAN ‘MIHADAKAY TO SAPADAMA’

4. Itini saka 1 hahekalan, o dama sikawdan samaanay ‘mihadak to sapadama’?

⁴ Itini saka 1 hahekalan, o roma faˈinayan salikaka manilnilay malo dama sikawdan. (1 Timoti 3:8) Oniya tamdaw alatek oya masowalay ni Pawlo a ‘mihadakay to sapadama a tamdaw.’ (1 Korinto 12:28) Oniya dama sikawdan midimokosay to adihayay a tayal, ho misamacay ko malohemay malitengay pasifanaˈ ato pakaenay a milisoˈ to kasakopang. Tinakoen, o dama sikawdan alatek padama to mitodong a mitilid to Fangcalay Cudad anca miˈaca to sapitilid a lalosidan.

5. Anini, o dama sikawdan samaanay mihadak to sapadama?

⁵ Haratengen hena, i kasakopang iso a dama sikawdan samaanay mihadak to sapadama. (1 Pitiro 4:10) O tayal nangra mahawpay ko milosimetay to sapakiyaho, milimasmas to mitosilay a kilac, miciwmong to cudad ato casi, misakadademak to pangihaˈay a kikay, militemoh to tamdaw, mitomadaw to Kasaˈopoan. Masakalimlaan koniya tayal, ho ngaˈay ko lingad no tayal no kasakopang. (1 Korinto 14:40) O roma dama sikawdan wa misikay to kamok no saˈopo ato mihadak to pakapapotalay a kimad, o roma mamalo dama no kantok no mitosilay kapot. Nolatekay, mitahidang ko malohemay malitengay to citatodongay a dama sikawdan kalacafay pakaen a milisoˈ to salikaka.

6. Hano miakoˈid kita to dama sikawdan malalok matayal?

⁶ O tayal no dama sikawdan samaanay sakaciepoc no kasakopang hani? I Polifia a fafahiyan salikaka ci Pipielib sanay: “Iraay ko dama sikawdan, ho ngaˈay ko pirienang ako to saˈopo. Samanen iraay ko sapadama nangra, sakangaˈayaw ko pitengil ako to kimad, pacaˈof, moradiw, mikitini i coka ato ika a minanam. I saˈopo i, midipotay cangra to sakarihaday no mita, padamaho to cowa ka ngaˈay tayni i Kasaˈopoan a tamdaw tano wanglo a mirienang to saˈopo. Ikor no saˈopo, talaˈayaway cangra miasik to Kasaˈopoan, miˈosi to payci no kiyaho, pipalilamho to saali no salikaka a mitepangan. Tada miakoˈiday kako cangranan!” I Koronpiya a fafahiyan salikaka ci Laysli, o malohemay malitengay ko faˈinay ningra, sanay cingra: “Adihayay ko tayal no faˈinay ako misaaliay to sapadama no dama sikawdan. Ano awa cangra i, cowa ko mamalahci ko demak. Tada miakoˈiday kako to nika tawlik a matayal nangra, makahiay a midama.” Mahaenay ko harateng iso han?—1 Timoti 3:13.

7. Samaanen paihkal ko miakoˈiday kita to dama sikawdan hani? (Nengnengen ko coka.)

⁷ Alatek itini i falocoˈ ita miakoˈiday to dama sikawdan, kawra cowaho ka edeng. Pakalalokay ko Fangcalay Cudad kitanan: ‘Paihkalen ko miakoˈiday a falocoˈ.’ (Kolosay 3:15) Ci Kiristofo o malohemay malitengay i Fenlan, samaanay cingra paihkal to miakoˈiday falocoˈ hani? Sanay cingra: “Mitilidan ako ko kato anca palihaf to dama sikawdan, paladaˈ to cecay sinael, halo mifanaˈ cingranan samaanay cingra pakalalok takowanan, anoca hano miakoˈid kako to sapadama ningra.” Salikaka ci Paskal ato fafahi ci Yaayer itiraay i Sinkalitoniya ko kitiraan nangra, maceriday cangra patado to dama sikawdan a mitolon. Sanay ci Paskal: “Toniya ngata a tatokian, itiniay i satolon kami miakoˈid ci Yihofaan minilnil toniya faˈinayan salikaka, halo mingitangit ci Yihofaan padama cangranan.” Wa pacaˈofen ni Yihofa ko mahaenay a satolon, oha sakaciepoc no kasakopang.—2 Korinto 1:11.

‘ILALOMAˈ NAMO MALALOKAY MATAYAL’ KO MALOHEMAY MALITENGAY

8. ‘Malalokay matayal’ ko malohemay malitengay i kasakopang, hano mahaen ko sowal ni Pawlo? (1 Tisalonika 5:12, 13)

⁸ Itini saka 1 hahekalan, malalokay matayal ko malohemay malitengay i kasakopang. (ˈOsien ko 1 Tisalonika 5:12, 13; 1 Timoti 5:17) Ciˈinorongay cangra ‘mikayat’ to kasakopang, mahawpay misikay to kamok no saˈopo, halo malacafay misaˈosi to milingatay to kasakopang a demak. ‘Mirikecayho’ cangra to salikaka, tano olahan a mihadak to sarikec, padama to salikaka tanoktok i pihakelongan. (1 Tisalonika 2:11, 12; 2 Timoti 4:2) O roma i, misaˈicelay cangra midimokos to paro no lomaˈ, halo padadotoc patanoktok to kalalaˈed no niyah aci Yihofaan.—1 Timoti 3:2, 4; Titus 1:6-9.

9. Anini, o manamanan ko ˈinorong no malohemay malitengay hani?

⁹ Anini, ˈifowaay ko malohemay malitengay. Fanekfekay cangra mitenak to ngaˈayay lihaf. (2 Timoti 4:5) Palikakawa cangra to i kilacay a mitosilay tayal, talaˈayaw mikerid to mitosilay, halo pahatatanam kitanan ciepoc a pakafanaˈ to tamdaw. Malohemay malitengay ciˈinorongayho to misawkitay itini i kasakopang a demak. Ano pakidem ko raraw no cecay Krisciyang, misaˈicelay ko malohemay malitengay padama cingranan makalangaˈay to kalalaˈed aci Yihofaan, wa misaˈicelho mitawmec to sakakorac no kasakopang. Itini toniya demak i, wa misaˈicel ko malohemay malitengay sidaˈit a masadafdaf. (1 Korinto 5:12, 13; Kalatiya 6:1) O roma i, pakaen a milisoˈ ko malohemay malitengay to salikaka, o masakalimlaan a ˈinorong nangra i kasakopang konini. Misongilaˈay cangra misaday halo mihadak to misalalangiay to Fangcalay Cudad a kimad, misaˈicel mafanaˈ to kahacecay a tamdaw i kasakopang, halo pakaen a milisoˈ. (1 Pitiro 5:1-3) O roma malohemay malitengay ciˈinorongayho to roma dademaken, tinakoen milimasmas misaday to taykay, patirengay ato mitomadaway to Kasaˈopoan, hanaca itini Mirinnakay to Ising a Iing ato Milisoˈay to Adadaay a Kapot matayal. Soˈlin ilalomaˈ ita malalokay matayal ko malohemay malitengay!

10. Hano miakoˈid kita to malohemay malitengay malalokay a matayal i kasakopang hani?

¹⁰ Na pairasolay ci Yihofa, wa minilnil Cingra to pakaenay a tamdaw midimokos kitanan, ho ‘eca ka calemcem matalaw’ kita. (Yirimiya 23:4) O fafahiyan salikaka ci Yohana itiniay i Fenlan a kitiraan, itini pakidem ko adada no wina ningra a tatokian i, matinakoay ningra ko soˈlinay a sowal ni Yihofa. Sanay cingra: “Ciharatengay ko cecay malohemay malitengay takowanan, cowa ka mananam kako cingranan, pasangaran nanay kako mifohat to nafalocoˈan, pasowal to harateng no niyah. Kawra mihadidiay cingra mitengil to sowal ako, malacafay mitolon, padama cipinang to maolahay ci Yihofa takowanan. Cowa ka harateng ako to manan ko sowal ningra, kawra itiya cowato ka talaw kako. Pakasoˈlinay kako, itini karorayan ako a tatokian miocoran ni Yihofa cingra padama takowanan.” O kasakopang iso a malohemay malitengay misamaanay a padama tisowanan hani?

11. Misamaan kita paihkal to miakoˈiday falocoˈ to malohemay malitengay hani? (Nengnengen ko coka.)

¹¹ Makalimay ci Yihofa kitanan paihkal to miakoˈiday a falocoˈ, ho mafanaˈ ko malohemay malitengay to ‘pakayniay i tayal nangra’ a masemer kita. (1 Tisalonika 5:12, 13) Itini Fenlan a fafahiyan salikaka ci Henrieta sanay: “Mahemekay ko malohemay malitengay padama to salikaka, kawra ikakaay ko toki ato ˈicel nangra, hanaca awaay ko roray no kaˈorip nangra, cowa ka saan. Nolatekay, pasowalan ako cangra: ‘Mafanaˈay kiso han? Tada o ngaˈayay malohemay malitengay kiso!’” Itini i Tureky a fafahiyan salikaka ci Sila sanay: “Misaaliay ko malohemay malitengay to sapakalalok ita cangranan. Ngaˈayay tiliden ita ko kato, tahidangen cangra malacafay komaen, malacafay mitosil, mihaen i, wa ira ko ˈicel nangra padadotoc matayal.” Miakoˈiday kiso to tayal no malohemay malitengay i kasakopang han? Ano mahaenay i, kilimen ko hapakayraan a paihkal to miakoˈiday a falocoˈ no miso.—1 Korinto 16:18.

PATANOKTOKAY KO KASAKILAC KANTOK TO KASAKOPANG

12. Sapatanoktokaw to kasakopang, o mananho ko limasmas ni Yis? (1 Tisalonika 2:7, 8)

¹² Itini saka 1 hahekalan, pafelian ni Yis Kristo ko kasakopang to roma ‘malo sapatelong’ a tamdaw. Itini sakayat ningra, i Yirusalim a malohemay malitengay miocoray ci Pawlo, aci Parnapas ato roma faˈinayan salikaka a milisoˈ to kasakopang. (Dmak 11:22) O manan ko araaw hani? Mahecaday to minilnilan to dama sikawdan ato malohemay malitengay, oha sapatanoktokaw to kasakopang. (Dmak 15:40, 41) Sapakafanaˈaw ato pakalalok to salikaka, oniya milisoˈay to kasakopang a salikaka kinafalahay to adihayay a demak, nolatekay tahalifaay to sakalahdawaw no ˈorip a katalawan.—ˈOsien ko 1 Tisalonika 2:7, 8.

13. O manamanan ko ˈinorong no kasakilac kantok?

¹³ Anini, kasakilac kantok mahecad tayraay icowacowa a pala milisoˈ to kasakopang, nolatekay tayraay i mara:ayay a pala ngaˈ, tahira i roma kasakopang. Ano milisoˈ i, kasakilac kantok wa mihadak to pina a kimad, pakaen a milisoˈ to salikaka, misikay to misakafahay ato malohemay malitengay a saˈopo, halo ˈayaw no mitosilay a saˈopo. O roma i, milimasmas a misaday to taykay, misongilaˈ a misaday to kimad no taykay. Mala singsiho no mihatatanamay no misakafahay, mirienang to cecay miheca kinacecayay malacafay to misakafahay a mikiriwiˈay a saˈopo. Cowa konini aca, wa misaysayho cangra to nai fenpoay a tayal, nolatekay macalohay koniya demak.

14. Misamaanay hano miakoˈid kita to kasakilac kantok?

¹⁴ O demak no kasakilac kantok samaanay sakaciepoc no salikaka i kasakopang hani? Itini Tureky a faˈinayan salikaka sanay ko sowal: “Milisoˈto ko kasakilac kantok ikor, mapakalalokay kako, sapisaadihayaw to toki a padama to salikaka. Malitemohay ako ko ˈalomanay a kasakilac kantok, kawra sahtoay cangra o cisidaˈitay ngaˈayay ingiden, awaay ko romiˈad ako cowa ka saan.” Masowalay isawni ci Yohana, na malacafayay to kasakilac kantok a pakalomalomaˈay a mitosil. Soˈlin, toya romiˈad awaay ko malitemohay a cilomaˈay, kawra sanay cingra: “Cowa ka walawal kako toya romiˈad. ˈAyaw nonini i, malinahay ko tatosaay a kaka ako, maˈilolay kako cangranan. Adihayay ko dihkoay no kasakilac kantok a sowal pakalalok takowanan, padama takowanan mihapinang, nohatini cowa ka micerid kita kalacafay to salawina alatek, kawra itini faelohay a hekal i, wa awa ko tolas no toki ita a malacafay.” ˈAlomanay kasakilac kantok mahaenay a ciharateng to salikaka, mansa maolahay ko salikaka cangranan.—Dmak 20:37–21:1.

15. (1) Mikitini 3 Yohani 5-8, samaanen ita paihkal ko miakoˈiday to kasakilac kantok? (Nengnengen ko coka.) (2) Misamaanay hano akoˈiden ita ko fafahi no manilnilay a faˈinayan salikaka? Samaanen ita ko demak hani? (Nengnengen ko sapatongal lalakaw “Hamaan Walawalen ko Fafahi Nangra.”)

¹⁵ Tarokos ci Yohani pakalalokay ci Kayusan paihkal to hinalafangay to milisoˈay a salikaka, halo ‘tano kaolahan no Kawas a pakayraan patono cangranan.’ (ˈOsien ko 3 Yohani 5-8.) Pairaen ita ko hinalafangay to kasakilac kantok. O cecay pakayraan i tahidangen cangra a pakaen. O roma i, itini pilisoˈ no kasakilac kantok a lipay, ceriden mirienang to ˈayaw no mitosilay a saˈopo, midama toya lipay a mitosilay a demak. Ya masowalay isaˈayaw ci Laysli tano roma a pakayraan a paihkal to miakoˈiday, sanay cingra: “Mingitangitan ako ci Yihofa midimokos toniya salikaka, malacafay to faˈinay patikami, mifanaˈ to kasakilac kantok, mikitini pilisoˈ nangra milifok to adihayay a sapadama tamiyanan.” Haratengen, coko tadamaanay a tamdaw ko kasakilac kantok, nolatekay adadaay cangra, cariraway to romaroma a demak, mangalef matoledayho. Soˈlin cowa ka hakowa ko sapakalalok iso a sowal, anoca mimingay a sapatelong, wa ngaˈay masayar cangra. Alatek pakaynian ni Yihofa tisowanan pacaˈof to satolon nangra.—Taneng 12:25.

MISAALIAY KITA TOYA ‘MALO SAPATELONG’ A TAMDAW

16. Mikitini Taneng 3:27, saharateratengen no faˈinayan salikaka ko manan a salicay?

¹⁶ Itini paro no kakarayan, misaaliay kita to adihayay a ‘malo sapatelong’ a tamdaw. Ano o mipaputisemayto a faˈinayan salikaka kiso, iraay ko hainaneng iso malo mahaenay a tamdaw, padama to salikaka han? (ˈOsien ko Taneng 3:27.) Makahi kiso misaˈicel citatodong malo dama sikawdan han? Ngangaˈay kiso misaˈicel a mala malohemay malitengay, midimokos to salikaka i kasakopang han?c Ngangaˈay salofen iso ko kaˈorip, ho pangangan to SKE a mihatatanamay han? Wa macada iso ko ngaˈayay a sapahatatanam, ho ngaˈay adihay ko tayal iso pakayni to Hongti ci Yisan. Ano cangoˈotay ko ˈicel no mako, cowa ko mamadangar koniya demak sa kiso i, ka pitolon kiso ci Yihofaan. Cangacangen iso ko fangcalay saocor Ningra, ho ngaˈay malahci iso ko kihcod a demak.—Luka 11:13; Dmak 20:28.

17. I likakawa adihayay ko ‘malo sapatelong’ a tamdaw, oniya demak padamaay kitanan mihapinang to manan hani?

¹⁷ Itini likakawa ita i, adihayay ko manilnilay ni Yis ‘malo sapatelong’ a faˈinayan salikaka. O ciˈicelay a wacay koni, paihkal to itini salikoray a ˈawaled, o Hongti ci Yis kamayan a mikayat kitanan. (Matay 28:20) Cowa ko nika fanaˈ aca ni Yis to saali ita, pafelianho ningra ko ˈalomanay a faˈinayan salikaka a padama kitanan. Cisidaˈitay cingra a hinapaladaˈ, coko aakoˈiden iso cingra han? Hai, mansa kilimen ita ko hatoki miakoˈid toniya malalokay matayal a faˈinayan salikaka. O roma i, hamaan a matawal miakoˈid ci Yihofaan, samanen ‘masakenakenaay a ngaˈayay sapatelong, masakenakenaay malefotay a sapalifon’ sahtoay naitiniay Cingranan a sapafeli.—Yakop 1:17.