LALENGOEN LALAKAW 46
RADIW 49 Palipahak to Falocoˈ ni Yihofa
Faˈinayan Salikaka—Misaˈicelay Kiso Citatodong Malo Dama Sikawdan Han?
‘O paladaˈay ikakaay ko hemek to milayapay.’—DMAK 20:35.
KALIMLAAN NO LALAKAW
Pakalalok ko mipaputisemayto a faˈinayan salikaka citatodong malo dama sikawdan.
1. Samaanay ko pinengneng no tarokos ci Pawlo to dama sikawdan hani?
ITINI kasakopang, kalimlaan ko dama sikawdan. Misemeray ko tarokos ci Pawlo toniya madimadiay a faˈinayan salikaka. Tinakoen, patikami cingra to kasakopang no Filipi i, mikiriwiˈay a ciharateng to dama sikawdan ato malohemay malitengay.—Filipi 1:1.
2. Malo dama sikawdan ci Lois ikor, samaanay ko harateng ningra?
2 ˈAlomanay mipaputisemayto a faˈinayan salikaka, ano kaemangayto malitengayto, mahemekay malo dama sikawdan matayal i kasakopang. Tinakoen, ci Cawan 18 ko mihecaan malo dama sikawdan, ci Lois 50 ko mihecaan malo dama sikawdan. Masowalay ni Lois ko nafalocoˈan no ˈalomanay dama sikawdan sanay: “Malikoay kako malo dama sikawdan, matayal to ˈalomanay salikaka. Adihayay ko sapadama no salikaka takowanan isaˈayaw, nohatini oha sapipatikolaw ako cangranan!”
3. Oniya lalakaw mamilengo to manan a salicay?
3 Ano o mipaputisemayto a faˈinayan salikaka kiso, cowaho ka malo dama sikawdan, ngaˈay patirengen iso koniya patosokan han? O manan ko pakalalok tisowanan mihaen ko demak hani? Cacitatodong kiso to manan a saali no Fangcalay Cudad hani? Oniya lalakaw papacaˈof toniya salicay. Salakat wa lengoen ita, o manan ko tayal no dama sikawdan.
O MANAN KO TAYAL NO DAMA SIKAWDAN
4. O manan ko tayal no dama sikawdan hani? (Nengnengen ko coka.)
4 O mipaputisemayto a faˈinayan salikaka ko dama sikawdan, o manilnilay no fangcalay saocor. O ngaˈayay a dama no malohemay malitengay, adihayay ko sapadama to kasakopang. O roma dama sikawdan milimasmasay to kilac no mitosilay ato mitepangan no Fangcalay Cudad, o roma milimasmasay to micingkiyatay ato misafaelohay to kasakopang, o roma malo militemohay to tamdaw anca misakadademakay to pangihaˈay a kikay, o saali no kasakopang ko hatiniay a tayal. Kawra o kalimlaan i, o dama sikawdan maolahay ci Yihofaan, mitoor to palinian Ningra a maˈorip, maolahayho to salikaka. (Matay 22:37-39) Mihaen, mipaputisemayto a faˈinayan salikaka sasamaan citatodong malo dama sikawdan hani?
Dama sikawdan malecaday ci Yisan makalim matayal to tao (Nengnengen ko saka 4 fatac)
5. Ano ciharatengay kiso malo dama sikawdan, sasamaan ko demak hani?
5 Masowalay no Fangcalay Cudad ko hatatodong no dama sikawdan. (1 Timoti 3:8-10, 12, 13) Ano makalimay kiso malo dama sikawdan, kingkiwen konini a sinael, ikor tooren ko saali a midemak. Kawra saharateratengen, hano ciharateng kiso malo dama sikawdan hani?
O MAANAN KO ARAAW NO FALOCOˈ
6. O manan ko pakalalokay tisowanan makalim a matayal i salikaka? (Matay 20:28; nengnengen ko coka.)
6 O sangaˈayay a taˈarawan ita ci Yis! Maolahay cingra to kakarayan a Wama, maolahayho to tao, mansa makalimay kinafalah i tamdamdawan, ano o karorayanto a demak kamayan a midemak. (ˈOsien ko Matay 20:28; Yohani 13:5, 14, 15) Ano tano olah kiso malo dama sikawdan, wa palemeden ni Yihofa kiso, padama tisowanan malaˈosi ko patosokan.—1 Korinto 16:14; 1 Pitiro 5:5.
Patirengay ci Yis to taˈarawan, pakafanaˈ to tarokos misapoener a matayal i tamdaw, hamaan a micangacang to sakacinganganaw ato saaroˈan (Nengnengen ko saka 6 fatac)
7. O cecay faˈinayan salikaka sakacitatodongaw malo dama sikawdan, hano cowa ko sakacisaaroˈan ko harateng?
7 ˈAlomanay tamdaw sanay ko harateng, misaˈicel sakacinganganaw ngaˈay ko saaroˈan, o malalokay a tamdaw sanay. Kawra i likakawa ni Yihofa cowa ka mahaen. O faˈinayan salikaka ano mahecad ci Yisan tano olah a matayal to salikaka, cowa ko mamicangacang to fadangalan ato saaroˈan. Ano micangacang toniya demak, soˈlin manilnilay cingra, alatek cowa ko mamakahi micada to marorayay a tayal, samanen o mahaenay a tayal mapalakay ko saaroˈan ningra sanay miharateng. (Yohani 10:12) Cowa ko papalemeden ni Yihofa ko masatakaraway ko falocoˈ a tamdaw.—1 Korinto 10:24, 33; 13:4, 5.
8. Pafelian ni Yis ko tarokos to manan a sarikec?
8 Ya maceriday mingata ci Yisan a nisawawaan, nolatekay iraay ko mararaway a harateng micangacang to sakaciˈinorongaw. Ci Yakop aci Yohani ko mahaenay. Kinacecayay, cangacangan nangra ci Yis ira ko sangaˈayay a katayalan i kakarayan a Kitakit. Cowa pakahemeken ni Yis cangra to o malalokay, ao pasowalan ningra ko tarokos maemin: ‘O cima ko sakacisaaroˈan namo i, oha mamalo sikawdan namo; o cima ko ciharatengay malo kakeridan namo, oha mamalo koli no ˈalomanay.’ (Marko 10:35-37, 43, 44) Ano o matatodongay a araaw no falocoˈ ko faˈinayan salikaka, mikifalocoˈ a matayal to tao, wa kadofah ko malaˈosiay nangra a tayal i kasakopang.—1 Tisalonika 2:8.
ANO COWA KA MAKALIM, SASAMAAN HANI
9. Ano cowa ka makalim kiso malo dama sikawdan, sasamaan hani?
9 Maedeng maolahay ci Yihofaan kiso, makalim a matayal i salikaka, kawra cowa ka kahi malo dama sikawdan. Sasamaan hani? Saharateratengen iso, matayal i salikaka o kahemekanto. Sowal ni Yis: ‘O paladaˈay ikakaay ko hemek to milayapay.’ (Dmak 20:35) Malalok cingra matayal i tamdaw, adihayay ko kahemekan, wa ngaˈay kiso mahecad cingranan!
10. O manan tinakoan to makalimay ci Yis makahi a matayal i tamdaw? (Marko 6:31-34)
10 Nengnengen ita ko cecay tinakoan to makalimay ci Yis makahi a matayal i tamdaw. (ˈOsien ko Marko 6:31-34.) Kinacecayay, marorayayto cingra ato tarokos, sakatayraaw i awaay ko adeses a kitiraan paselaˈ. Kawra iraay ko ˈalomanay sapitengilaw to sapasifanaˈ ni Yis, mikiˈayaway tayra to hapipaselaˈan ni Yis. Ngaˈayay lalangen ni Yis cangra, anca tosa tolo ko sasowalen ni Yis ikor liyasento, samanen ‘awato ko toki a komaen’ cingra ato tarokos. Kawra cowa ka mihaen ko demak ningra. Nai olah, ci Yis ‘pakafanaˈay cangranan to adihayay a demak,’ tahira i piceleman no cidal. (Marko 6:35) Mihaen ko demak ningra i, cowa ko mipaciecian, ao ‘sidaˈitay’ a falocoˈ cangranan, makalimay pakafanaˈ cangranan. Soˈlin marorayayto, kawra mahemekay ko falocoˈ ningra!
11. Pafelian ni Yis ko ˈalomanay to manan a hasaali nangra? (Nengnengen ko coka.)
11 Cowa ko pipakafanaˈ ni Yis to tao, pafeliayho to hasaali nangra. Tano kasapaan cingra paira to kakaenen, palilam ko tarokos cangranan. (Marko 6:41) O taˈarawan ningra pakafanaˈay to tarokos sasamaan matayal i tamdaw, mahapinang nangra, mihadak to hasaali no tao o masakalimlaan. Soˈlin o tayal tono dama sikawdan o mahaenay. Saharateratengen, malacafay ko tarokos aci Yis a matayal, maˈaraw ko ‘ˈalomanay komaen a mafecol,’ maedeng mahemekay ko falocoˈ! (Marko 6:42) Cowa ko cecay aca ko kaciharateng ni Yis to saali no tao, i fafekangho no sera cingra i, padadotocay mihaen ko demak. (Matay 4:23; 8:16) Kodaitay cingra pakafanaˈ to tamdaw, misapoener ko falocoˈ matayal i tamdaw, milifok to kadofahay a lipahak a marenec. Ano makalimay kiso malo dama sikawdan, makahi matayal to tao, wa mahecad kiso a mahemek.
Ano maolahay kiso ci Yihofaan, makalim malo matayalay no salikaka, wa mahemek midemak to kihcod a tayal (Nengnengen ko saka 11 fatac)a
12. Ngaˈayay malawa ko niyah i kasakopang, hano cowa ka ngaˈay ira ko mahaenay a harateng?
12 Ano cowa ka samaan ko niyah, awaay ko manan a inaneng sa i, aka a matoleden. Iraay ko makapahay a capeling iso, sakaciepoc no kasakopang. ˈOsien iso ko sowal ni Pawlo i 1 Korinto 12:12-30, cangacangen ci Yihofa papihapinang to makapahay capeling no niyah. Tatodong noniya sinael, o masakalimlaan kiso i kasakopang, cowa ka ngaˈay malawa kiso! Soˈlin cowa ka citatodong kiso malo dama sikawdan, aka a sapisawadaw. Oya madangaray iso ko demaken, misaˈicel matayal i ci Yihofaan ato salikaka. Aka calemcem, paiken ko malohemay malitengay to tayal tisowanan, o madangaray iso ko miharatengan nangra.—Loma 12:4-8.
13. Pasangaray tooren ko saali no dama sikawdan han? Tadtaden hena.
13 O roma haharatengen: O masowalay no Fangcalay Cudad ko saali i dama sikawdan, soˈlin oniya saali o pakayniay i emin a Krisciyang a rikec. Tinakoen, miingid to Kawas, makahi padama to tamdaw, midofdof to palinian no Kawas a maˈorip. Mansa, oniya saali maedeng matoorayto iso maemin. Ano makalimay kiso malo dama sikawdan, sasamaan ko demak no miso hani?
SASAˈICELEN ISO A PAKAYRAAN
14. ‘Malalokay to ˈinorong’ o manan ko tatodong hani? (1 Timoti 3:8-10, 12)
14 Folfolen ita ko masowalay i 1 Timoti 3:8-10, 12 a hasaali. (ˈOsien.) Salakat, dama sikawdan o ‘malalokay to ˈinorong,’ tatodong i, “oha kakangodoen.” Ano mahaenay i, wa matalaw a mipakatawa kiso cowa ka saan, ao misakaretengay to ˈinorong ko falocoˈ, milahci to sapaiken no tao a demak. (Patnakay 3:1, 4) Ano ira ko mahaenay makapahay a ngangan no miso, i kasakopang o kakangodoen no tao kiso.
15. ‘O soˈlinay ko sasowalen’ ato ‘cowa ka maˈanof to mararaway a hafay’ o manan ko tatodong hani?
15 ‘O soˈlinay ko sasowalen’ tatodong i, mikifalocoˈ micada to tamdaw, ngaˈayay tiˈeren, matoor ko misowalan, cowa ka pisakaniw to tao. (Taneng 3:32) ‘Cowa ka maˈanof to mararaway a hafay’ tatodong i, misasingdiay kiso ato milimasmas to hafay i, cowa ka pisakaniw, cowa ko tatiˈeren iso ko ngaˈayay kalalaˈed no salikaka sapietanaw to mararaway a hafay.
16. (1) ‘Cowa ka haliepah’ o manan ko tatodong? (2) ‘Tano tingalaway a falocoˈ’ o manan ko tatodong?
16 ‘Cowa ka haliepah’ tatodong i, cowa pakidem a miˈowak to epah, cowa ka haliepah kiso sanay ko tao. ‘Tano tingalaway a falocoˈ’ tatodong i, misaˈicel kiso mitoor to palinian ni Yihofa a maˈorip, soˈlin cowa ka lefot ko midemakan, kawra mafanaˈay kiso to mihaydaan ni Yihofa ko niyah, mansa tingalaway ko falocoˈ iso.
17. Ano ‘micada to sapitanam’ ko cecay faˈinayan salikaka i, sasamaan misawacay to o ngaˈayay pakasoˈlinen a tamdaw ko niyah hani? (1 Timoti 3:10; nengnengen ko coka.)
17 ‘Micada to sapitanam, to o mamatatodong hokira’ tatodong i, wa misawacay ko niyah to malohemay malitengay to o ciˈinorongay, o ngaˈayay pakasoˈlinen a tamdaw kiso. Ano patorod to tayal ko malohemay malitengay tisowanan i, sinanoten mitoor to sakayat nangra ato no likakawa a midemak. Cipinang to o manan ko papalaˈosien a tayal, aka a minayar. Malalok kiso ciˈinorong, milaˈosi to kahacecay a tayal, wa mahapinang no kasakopang ko kacakat iso. O malohemay malitengay, laloken pahatatanam koya mipaputisemayto a faˈinayan salikaka. (ˈOsien ko 1 Timoti 3:10.) Ilalomaˈ no kasakopang iso a mipaputisemayto a faˈinayan salikaka, iraay ko moetepay pina miheca anca kaemangayho han? Iraay ko notekedan mikingkiw nangra a nanaman han? Talaˈayaway misaday to lalakaw no saˈopo han? Maceriday pacaˈof i kasaˈopoan, ato mitosilay a demak han? Ano iraay i, wa ngaˈay tano mihecaan ato inaneng nangra, paiken to madangaray nangra a tayal, ho ‘macada nangra ko sapitanam.’ Mihaen, alatek cowaho ka 20 mihecaan cangra, wa ngaˈayto a malo dama sikawdan.
O malohemay malitengay ngaˈayay patorod to tayal i mipaputisemayto a faˈinayan salikaka, ho ‘macada nangra ko sapitanam, to o mamatatodong hokira’ (Nengnengen ko saka 17 fatac)
18. ‘Awaay ko halarikecen’ o manan ko tatodong hani?
18 ‘Awaay ko halarikecen’ tatodong i, awaay ko halalangian no tao a mirikec to pakidemay ko raraw iso. Manaokaniw, alatek mapaorafay no tao ko Krisciyang. Ano ci Yisto mahaenay ko milifetan ningra, ano o nisawawaanto wa tahacadaay to mahaenay a pakayraan. (Yohani 15:20) Kawra, ano pahecad kiso ci Yisan padadotoc paihkal to makapahay waywayan, i kasakopang wa makapah ko ngangan iso.—Matay 11:19.
19. O ciraramodayto a faˈinayan salikaka, ‘malo cecayay aca ko fafahi a faˈinay’ o manan ko tatodong hani?
19 ‘Malo cecayay aca ko fafahi a faˈinay.’ Ano o ciraramodayto kiso, dofdofen ko misaˈosian ni Yihofa a palinian no mararamoday, o cecayay ko faˈinay cecayay ko fafahi. (Matay 19:3-9) Cowa ka ngaˈay maˈodang ko Krisciyang. (Hipray 13:4) Kawra cowa konini aca, oha madimadi kiso to fafahi, cowa ka ngaˈay ira ko mararaway harateng to roma fafahiyan.—Yopu 31:1.
20. ‘Songilaˈen a mikayat ko wawa ato paro no lomaˈ’ o manan ko tatodong hani?
20 ‘Songilaˈen a mikayat ko wawa ato paro no lomaˈ.’ Ano o tawki no lomaˈ kiso, songilaˈen a minengneng ko ˈinorong iso. Ceriden misikay ko pakalomaˈay noka pidoko, misaˈicel malacafay to paro no lomaˈ mitosil, padamaenho ko wawa patongal to sakalawidangaw ci Yihofaan. (Ifiso 6:4) O tawki no lomaˈ ano misinanot midimokos to paro no lomaˈ no niyah, paihkalay koni wa misongilaˈ cingra midimokos to kasakopang.—Nengnengen ko 1 Timoti 3:5.
21. Ano cowaho ko dama sikawdan kiso, nohatiniho sasamaan ko demak hani?
21 Faˈinayan salikaka, ano cowaho ko dama sikawdan kiso, songilaˈen mikingkiw koniya lalakaw, tolonenho ci Yihofa. Palaken ko toki, cipinang to samaanay malo dama sikawdan, ikor pasayra toniya patosokan a malingad. Tongalen ko olah ci Yihofaan ato salikaka, mihaen wa makalim kiso matayal to salikaka. (1 Pitiro 4:8, 10) Ano pasayra kiso to patosokan a misaˈicel, wa matinako iso ko hemek a matayal to salikaka. Nanay palemeden ni Yihofa kiso, padama tisowanan citatodong malo dama sikawdan!—Filipi 2:13.
RADIW 17 Makalimay Kako
a TATODONG NO COKA: I kawili a coka, misapoeneray ci Yis malo matayalay no nisawawaan; i kawanan a coka, o dama sikawdan padamaay to cecay malitengay faˈinayan salikaka.