LALENGOEN LALAKAW 34
RADIW 107 Taˈarawan a Olah no Kawas
Paihkalen ko Olah ato Siniˈadaay to Mararaway a Tamdaw
‘O sidaˈit ni Yihofa mamikayat tisowanan a pasasiyor.’—LOMA 2:4.
KALIMLAAN NO LALAKAW
Ilalomaˈ no kasakopang ano pakidem ko raraw no tamdaw i, sasamaan ko malohemay malitengay misaˈicel a padama cangranan.
1. Soˈlin pakidem ko raraw no cecay a tamdaw, alatek wa ira ko masamaanay a teloc hani?
ISAKA 33 lalengoen a lalakaw, maˈaraway ita, itini i Korinto a kasakopang ira ko pakidemay ko raraw a tamdaw, samaanan ni Pawlo misaysay koniya demak. Oya mararaway tamdaw cowa ka pasasiyor, wa mapadeng ko ngangan ningra nai kasakopang. Kawra, matiya ko lalangian a sinael noniya lalakaw, ano midemakay ko tamdaw to pakidemay a raraw i, wa keriden ni Yihofa cangra a pasasiyor. (Loma 2:4) Mihaenay i, sasamaan ci Yihofa pakayni i malohemay malitengay padama to mahaenay a tamdaw a pasasiyor hani?
2-3. Ano mafanaˈ kita ira ko tamdaw midemak to pakidemay a raraw i, sasamanen ko demak ita ngaˈ? Misamaanay?
2 Ano cowa ka fanaˈ ko malohemay malitengay to nidemakan no tamdaw, wa awa ko pakayraan a padama cingranan. Mihaenay i, ano mafanaˈ kita ira ko tamdaw midemakay to pakidemay a raraw i, sasamaanen ita ko demak hani? Ngaˈayay pakalaloken cingra misaali to sapadama no malohemay malitengay.—Isaya 1:18; Dmak 20:28; 1 Pitiro 5:2.
3 Oniya mararaway tamdaw ano caay ka kahi pasowal to malohemay malitengay i, wa fanaˈen ita ko malohemay malitengay to o manan ko mafekaday a demak. Mihaen to demak, o paihkalay to olah i mararaway a tamdaw, oha mamilifok cingra to sapadama. Ano padadotoc cingra a mararaw i, wa malahdaw ko kalawidang ningra aci Yihofa, hanaca pakadit to makapahay a ngangan no kasakopang. Soˈlin cowa ko madoloay a mifanaˈ to malohemay malitengay, kawra pakayni to olah ita ci Yihofaan atoniya tamdaw i, wa timolo kita mihaen to demak.—ˈOlic 27:14.
SASAMANEN NO MALOHEMAY MALITENGAY PADAMA TO PAKIDEMAY KO RARAW A TAMDAW
4. Ano pakidem ko raraw no cecay tamdaw i, wa misaˈicel ko malohemay malitengay midemak to maanan hani?
4 Ano pakidem ko raraw no cecay tamdaw i kasakopang i, polong a malohemay malitengay wa mipiliˈ to tatolo a citatodongay malo iing a kapot cangra.a Wa misapoener ato misamiming ko falocoˈ nangra. Mamisaˈicel cangra padama to mararaway tamdaw a pasasiyor, kawra, mafanaˈay cangra, cowa ka pacieci toniya tamdaw a mifalic to harateng. (Limoˈot 30:19) Mafanaˈay cangra, o cecacecay mararaway a tamdaw cowa ka hecad to hongti ci Tafitian, matengil ko sarikec i, tangsolay a pasasiyor. (2 Samuil 12:13) O roma tamdaw alatek caay ka kahi midofdof to sarikec ni Yihofa. (Satapangan 4:6-8) Kawra, wa misaˈicel ko malohemay malitengay mipadama to mahaenay a tamdaw a pasasiyor. Mihaenay i, ano padama cangra to mararaway a tamdaw i, wa misinanot to maanan safalod no Fangcalay Cudad hani?
5. Ano masasoˈaraw ko malohemay malitengay to mararaway tamdaw i, paihkal to masamaanay a waywayan ko ngaˈay hani? (2 Timoti 2:24-26) (Nengnengen ko coka.)
5 Mafanaˈay ko malohemay malitengay, oya mararaway a tamdaw mahecad o malafelay a siri, kamayan o masakalimlaan cangra. (Luka 15:4, 6) Mihaenay i, ano masasoˈaraw cangra to mararaway a tamdaw i, cowa ko kariˈangen cangra, cowa ka malikaf ko sasowalen. Cowa ko pitoor aca nangra to limasmas no likakawa a micihiˈ, anca cipinang aca to o manan ko mafekaday. Patosokan nangra i, wa paihkal to makapahay a capeling, matiya to sowal no 2 Timoti 2:24-26. (ˈOsien.) Wa salopayˈay ko malohemay malitengay, sidaˈit a masasowal, nanay matemer ko falocoˈ no mararaway tamdaw.
Mahecad to pakaenay to siri a tamdaw i lalitengan, misaˈicel ko malohemay malitengay mikilim to malafelay a siri (Nengnengen ko saka 5 fatac)
6. ˈAyaw masasoˈaraw to mararaway tamdaw i, samaanen no malohemay malitengay talaˈayaw a misaday to falocoˈ hani? (Loma 2:4)
6 Wa misaday ko malohemay malitengay to falocoˈ. Maharatengay nangra ko sowal ni Pawlo, ‘o sidaˈit ni Yihofa o mamikerid tisowanan a pasasiyor’, mihaenay i, wa misaˈicel cangra mitodong ci Yihofaan, sidaˈitay a mipadang to mararaway tamdaw. (ˈOsien ko Loma 2:4.) Maharatengayho nangra o pakaenay cangra, dofdofen ko sakayat ni Kristo, mitodong to taˈarawan ningra a misimaw pakaen to siri. (Isaya 11:3, 4; Matay 18:18-20) ˈAyaw masasoˈaraw to mararaway tamdaw i, wa misongilaˈ mitolon ko iing a kapot, misimsim to patosokan nangra, oha sapikeridaw to mararaway tamdaw a pasasiyor. Wa misongilaˈ cangra a mikinkiw to Fangcalay Cudad ato mitepangan a lalakaw, micangacangho cangra ci Yihofaan to pafafidaˈay a ˈicel. saliyaliyaw a misimsim cangra, cacipinangho to kalomahadan noniya tamdaw, mihaen i, wa mahapinang nangra, hano ira ko mararaway a harateng, sasowalen ato waywayan noniya tamdaw.—Taneng 20:5.
7-8. Sasamaanen no malohemay malitengay mitodong ci Yihofa, mihadidi a padama to mararaway a tamdaw hani?
7 Mamitodong ko malohemay malitengay ci Yihofaan a paihkal to mihadidiay. Mafanaˈay cangra i lalitengan samaanay ci Yihofa padama to mararaway a tamdaw. Tinakoen, na mihadidiay ci Yihofa a pasifanaˈ ci Kainan, ano mararaw cingra i, wa o manan ko teloc; ano midofdof i, wa milifok to maanan a sapalemed. (Satapangan 4:6, 7) Na miocoray ci Yihofa to pairasolay ci Natan mirikec ci Tafitian, tano sapatinako ci Natan a patemer to falocoˈ ni Tafiti. (2 Samuil 12:1-7) Roma i, ‘padadotocay’ ci Yihofa a miocor to pairasolay tayra i maliyangay a Israil, ‘saliyaliyaw’ sanay a mirikec cangranan. (Yirimiya 7:24, 25) Cowa ka tatala sa ci Yihofa to pasasiyor no Israil tamdaw ngaˈ, mipadama cangranan. Soˈlinay haw i, ya misatapangho cangra mararaw, talaˈayawaayto ci Yihofa mikerid cangranan a pasasiyor.
8 Padama to pakidemay ko raraw a tamdaw i, wa mitodong ko malohemay malitengay to taˈarawan ni Yihofa. Wa mitoor cangra to safalod no 2 Timoti 4:2 a midemak, oha tano ‘tada taˈangayay pihadidi’ a padama to mararaway a salikaka a pafafidaˈ to nidemakan ningra. Wa miˈimer cangra to niyah, mihadidi a pakalalok to mararaway a tamdaw, ho nai falocoˈay a midemak to matatodongay a demak. Ano marawraw cangra a mangolaw i, caayto ka kahi ko mararaway tamdaw a midofdof to saparikec nangra alatek, mangalef mapolin caay ka pasasiyor cingra.
9-10. Sasamaanen no malohemay malitengay a padama ko mararaway a tamdaw, misimsim to nidemakan no niyah?
9 Saˈicelen no malohemay malitengay cipinang to o manan a lalangian ko sakararaw noniya tamdaw. Tinakoen, misakahmaway cingra tono tekedan a noka pikingkiw ato mitosilay, palidlid sato a malonay han? Cowato ka pisaˈicel cingra a micoˈay to coos no harateng han? Anoca maˈesalayto ko pitolon ci Yihofaan, anca cowa ko nai falocoˈay a mitolon han? Maceriday cingra a macacawmaˈ to cimacima? Samaanay ko lawla ningra? O widang ato lawla ningra samaanay mifiyor to miharatengan ato falocoˈ ningra? Samaanay ko pinengneng ni Yihofa i waywayan ningra, mafanaˈay cingra han?
10 Sakadademaken no malohemay malitengay ko salicay, padama cingranan a miharateng to o manan ko mikidatay to sakararaw ningra. Malalengo cangra i, wa misinanot to harateng noya mararaway tamdaw, cowa ko sapikadkadaw tono tekedan a demak anca cowa ko kalimlaan a demak. (Taneng 20:5) Roma i, wa mitodong ko malohemay malitengay ci Natanan, misakadademak to sapatinako a mitadtad to o manan ko raraw ningra. Alatek sakina cecay masasoˈaraw to mararaway a tamdaw i, wa pakayni i raraw no niyah a pasasiyor cingra, o waywayan ato harateng ningra wa tangsol a mafalic alatek.
11. Sasamaanen no malohemay malitengay mitodong ci Yisan?
11 Misaˈicel ko malohemay malitengay mitodong ci Yisan. Patikolay maˈoripto a Yis padamaay to itiniayho i Tarsus a niyaroˈ ci Sawloan, milicayay cingranan: ‘Sawlo, Sawloaw, hano miroero kiso takowanan hani?’ Mihaen ci Yis to demak, padama ci Sawloan cipinang to raraw no niyah. (Dmak 9:3-6) Masowal koniya ‘pairasolay no Kawas a fafahiyanan ci Icipil’ i, sanay ci Yis: ‘Na pafelian ako cingra to toki a pasasiyor.’—Paˈarawan 2:20, 21.
12-13. Malohemay malitengay sasamaan paira to toki i mararaway a tamdaw a pasasiyor? (Nengnengen ko coka.)
12 Todongen no malohemay malitengay ci Yis, cowa ka kaliki a misaˈosi to o cowa ka pasasiyor ko mararaway a tamdaw. Nolatekay o roma tamdaw i sakina cecay a masasoˈaraw i, tangsolay a mihayi to raraw no niyah a pasasiyor, kawra o romaroma a tamdaw misaaliayho to toki. Mihaenay i, cowa ka kinacecay aca ko malohemay malitengay masasoˈaraw to mararaway tamdaw. Alatek sakina cecayho malalitemoh ikor, wa misongilaˈ cangra a miharateng to matengilay a sowal. Alatek wa paihkal to misapoeneray a waywayan, micangacang ci Yihofaan misodod to raraw no niyah. (ˈOlic 32:5; 38:18) Mihaenay i, i sakina tosa a masasoˈaraw i, alatek wa mafalic ko falocoˈ ato waywayan ningra, cowa ka hecad to isaˈayaway.
13 Palalimlimen no malohemay malitengay ko falocoˈ no mararaway tamdaw, sidaˈitay a mikayat cingranan a pasasiyor. Wa mitolon cangra, nanay o pidemakan no niyah mamilifok to sapalemed ni Yihofa, halo micangacang wa masasiyor ko falocoˈ no mararaway tamdaw.—2 Timoti 2:25, 26.
Sapairaaw to toki a pasasiyor ko mararaway tamdaw i, cowa ka kinacecay aca a masasoˈaraw no malohemay malitengay cingra (Nengnengen ko saka 12 fatac)
14. Cima ko padamaay to mararaway tamdaw a pasasiyor hani? Misamaanay?
14 Pasasiyor ko mararaway tamdaw i, wa mahemek kita maemin! (Luka 15:7, 10) Mihaenay, ono nima a minaroˈan hani? Ono malohemay malitengay a minaroˈan han? Saharateratengen ko sowal ni Pawlo: ‘Alatek papipasasiyoren no Kawas cangra.’ (2 Timoti 2:25) Mansa, o Kawas ko padamaay to mararaway tamdaw a pasasiyor, cowa ko cimacima. Sanayho ci Pawlo, pasasiyoray a tamdaw wa matongal ko kafanaˈ to soˈlinay kimad, wa mapalalto cingra, miliyas to talakal ni Satan. Tada o makapahay a minaroˈan koni!—2 Timoti 2:26.
15. Ano pasasiyorayto ko mararaway tamdaw i, sasamanen no malohemay malitengay padadotoc a padama cingranan?
15 Ano pasasiyorayto ko mararaway tamdaw, wa padadotoc ko iing a kapot no malohemay malitengay a milisoˈ cingranan, patongal to pakasoˈlinay falocoˈ ningra, padadotocho a padama cingranan micoˈay to sakayhid ni Satan, midemak to matatodongay a demak. (Hipray 12:12, 13) Soˈlin cowa ka pasowal ko malohemay malitengay to kasakopang to o manan ko midemakan noya mararaway a tamdaw. Kawra, nolatekay wa mifanaˈ ko malohemay malitengay to maanan i kasakopang hani?
ITINIAY I KAˈAYAW NO ˈALOMANAY A MIRIKEC
16. Pakayni i 1 Timoti 5:20, ‘i kaˈayaway a ˈalomanay tamdaw’, o cima ko mitoroˈan hani?
16 ˈOsien ko 1 Timoti 5:20. Patalipaˈelalay ci Pawlo to roma a malohemay malitengay ci Timoti, ano ira ko mararaway a tamdaw, patayraen i ‘kaˈayaw no ˈalomanay.’ O manan ko tatodong no sowal ni Pawlo? Itiniay i “kaˈayaw no ˈalomanay”, o emin a kasakopang a tamdaw han? Nolatekay cowa ka haen. Tatodong i, edengan oya maˈaraway mafanaˈay aca a tamdaw, cowa ka ˈaloman. Alatek maˈaraway nangra koniya demak, anca matengilay ko sowal noya mararaway a tamdaw. Mansa edengan koya mafanaˈay toniya demak a tamdaw ko mifanaˈan no malohemay malitengay, ‘maherekayto koniya demak a misaysay, marikecayto koniya mararaway a tamdaw’, sanay.
17. Ano mafanaˈayto ko ˈalomanay i kasakopang to midemakan noniya mararaway tamdaw, anca malosiyangayto icowacowa, sasamanen no malohemay malitengay a milasil hani? O manan ko araaw?
17 Nolatekay, o pidemakan no mararaway tamdaw mafanaˈayto ko ˈalomanay itini kasakopang, anca malosiyangayto icowacowa. Ano mahaen i, oya “i kaˈayaw no ˈalomanay tamdaw” mahawpay ko polong a kasakopang. Itiyato i, wa milasil i kasakopang ko malohemay malitengay to “marikecayto koniya tamdaw.” O manan ko araaw hani? Mahecad to sowal ni Pawlo, ho “matalaw ko romaroma a tamdaw”, aka pidemak to tatiihay.
18. Ano o mipaputisemayto a cowaho ka 18 ko mihecaan a kaemangay, midemakay to pakidemay a raraw i, samaanto a misaysay no malohemay malitengay hani? (Nengnengen ko coka.)
18 Ano midemakay ko cecay mipaputisemayto a tamdaw—cowaho ka 18 ko mihecaan—to pakidemay a raraw i, samaanto a misaysay hani? O kapot no malohemay malitengay wa miocor to tatosa a malohemay malitengay, masasoˈaraw toniya kaemangay ato Krisciyang a wama winab ningra. Pakayni padama to wawa a pasasiyor, cacipinang ko malohemay malitengay to o manamanan ko midemakan nangra. Ano macadaay koniya wawa to sapadama no wama wina a mifalic to waywayan i, cowato ka pisaali to iing a kapot a misaysay toniya demak, sanay ko harateng no tatosa malohemay malitengay alatek. Soˈlinayto, patorodan no Kawas ko ˈinorong i wama wina, tatano olah a misalof to wawa. (Limoˈot 6:6, 7; Taneng 6:20; 22:6; Ifiso 6:2-4) Ikor, saka padadotocaw a padama toniya kaemangay, wa macerid ko malohemay malitengay malalengo to wama wina ningra. Kawra, ano oniya mipaputisemayto a kaemangay caka pisikor to sarikec, caay ka kahi a pasasiyor i, samaanto hani? Ano mahaen i, o iing a kapot no malohemay malitengay, wa masasoˈaraw toniya kaemangay ato Krisciyang a wama wina ningra.
Ano pakidem ko raraw no kaemangay i, wa masasoˈaraw ko tatosa malohemay malitengay cingranan ato Krisciyang a wama wina ningra (Nengnengen ko saka 18 fatac)
DAMSAYAY, CISINIˈADAAY CI YIHOFA
19. Ano padama ko malohemay malitengay to mararaway a tamdaw i, sasamaanen mitodong ci Yihofa?
19 Misakaretengay ko iing a kapot to patorodan ni Yihofa ko malohemay malitengay to kalimlaan a ˈinorong, o mamipaˈading to kakorac no kasakopang. (1 Korinto 5:7) Hanaca, misaˈicelay cangra mikerid to mararaway tamdaw a pasasiyor. Cowa ko hahawaden nangra, wa fanekfek cangra padama toniya mararaway tamdaw, misamaanay hani? Samanen, makalimay cangra mitodong to ‘tada damsayay cisiniˈadaay to tamdaw’ a Kawas ci Yihofa. (Yakop 5:11) Matoˈasayto a tarokos ci Yohani paihkalayto to mahaenay a capeling. Damsayay cingra pasowal to salikaka: ‘Wawaaw ako, tiliden ako koniya sowal i tamowanan, ho eca ka raraw kamo. Ano soˈlin mararaw kamo i, itini i kakarayan a Wama ci Yihofa, wa ira ko hasapadama kitaanan, o moecelay a Kristo ci Yis.’—1 Yohani 2:1.
20. Dotoc a lalakaw mamilengo to manan?
20 Ka adayayan i, nolatekay o cecay mararaway a Krisciyang caay ka kahi a pasasiyor. ano mahaenay i, wa mapadeng ko ngangan ningra nai kasakopang. Itini toniya pakayraan i, sasamanen no malohemay malitengay ko demak hani? Dotoc a lalakaw wa milengo toniya demak.
RADIW 103 Sidaˈitay a Pakaenay O Sapafeli no Kawas
a I saˈayaw, oniya iing a kapot o “misawkitay a iing” sanay, kawra cowa ko pisawkit aca koniya kapot, mansa, wa cowato ka pisakadademak tonini a sowal. Wa mahaen ko sowal ita, onini o iing a kapot no malohemay malitengay.
b Oniya malaliting to malo wama winaay a limasmas, matatodongay ko pakayni i holic a mihimaw to kaemangay a tamdaw, ato romaroma ciˈinorong mihimaw toniya kaemangay a tamdaw.