LALENGOEN LALAKAW 33
RADIW 130 Makahi a Misodod
Halamhamay ci Yihofa to Kasakopang Sasamaan Padama to Mararaway a Tamdaw
‘Ano cima ko mararaway, iraay ko cecay sapadama kitanan.’—1 YOHANI 2:1.
KALIMLAAN NO LALAKAW
Saka 1 hahekalan a Korinto kasakopang iraay ko pakidemay mararaw a tamdaw, samaanay misaysay ko kasakopang wa mananam ita ko manan kalimlaan a kimad.
1. Halamhamay ci Yihofa to kahacecay a tamdaw sasamaan ko demak, o manan ko mamalifok a sapalemed hani?
MISANGAˈ ci Yihofa to tamdaw i, pafeliay to pasalat, ho tano niyah a harateng misaˈosi. Tocerid no romiˈad, adihayay ko hasasaˈosien ita, i hakelong no ˈorip ita i, masakalimlaan a saˈosi, o patafangay to niyah ci Yihofaan, malo taˈangayay paro no lomaˈ Ningra. Halamhamay ci Yihofa to kahacecay a tamdaw mahaen ko saˈosi, misamaanay hani? Samanen maolahay Cingra kitanan, milifok to taˈangayay a epoc no mita. Makalimay Cingra kalawidang kitanan, midaˈocho a maˈorip.—Limoˈot 30:19, 20; Kalatiya 6:7, 8.
2. O mararaway cowa ka pasasiyor a tamdaw, samaanay ko pinengneng ni Yihofa? (1 Yohani 2:1)
2 Kawra, cowa pacieci ci Yihofa to tamdaw midoko Cingranan, pafeliay to tamdaw tano niyah a harateng a misaˈosi. Ano misafelit to rikec no Kawas ko mipaputisemayto a Krisciyang, pakidem ko raraw, wa samaan ko teloc hani? Ano cowa pasasiyor cingra, wa mapadengay ko ngangan ningra nai kasakopang. (1 Korinto 5:13) Kawra, ano mahaento i, kamayan makalim ci Yihofa patatikol ko mararaway tayni i tatihi Ningra. Mihaenay haw i, pafeli ci Yihofa to sapatefoc a masakalimlaan a lalangian, o sapisododaw to pasasiyoray a tamdaw. (ˈOsien ko 1 Yohani 2:1.) Matomesay ko olah ni Yihofa, mansa padadotocay mitahidang to mararaway tamdaw a pasasiyor.—Cikariya 1:3; Loma 2:4; Yakop 4:8.
3. Oniya lalakaw mamilengo to manan?
3 Samaan minengneng to raraw ato mararaway a tamdaw, makalimay ci Yihofa pahecad kita to pinengneng Ningra. Mihaenay, oniya lalakaw mamilengo: (1) Saka 1 hahekalan a Korinto kasakopang ira ko pakidemay ko raraw a tamdaw, pasowalay ko tarokos ci Pawlo to kasakopang to mamisamaan misaysay toniya demak? (2) Ikor no pasasiyoray koniya mararaway a tamdaw, pafelian ni Pawlo to manan sakayat? (3) Mikitini toniya maˈoningay, samaanay ko pinengneng ni Yihofa to pakidemay ko raraw a Krisciyang?
KORINTO A KASAKOPANG SAMAANAY MINENGNENG TO PAKIDEMAY KO RARAW A TAMDAW
4. Isaka 1 hahekalan ilalomaˈ no Korinto a kasakopang mifekaday ko manan a demak hani? (1 Korinto 5:1, 2)
4 ˈOsien ko 1 Korinto 5:1, 2. I sakatolo piliwko a mitosil ni Pawlo pakatengil to faelohay patirengan a Korinto a kasakopang, mifekaday ko pakidemay a demak. O cecay faˈinayan salikaka maˈodangay ato padek a wina, mahaenay a waywayan macekiday ko pakatengilay, ‘ano cowa pihakelong a tamdaw awaay ko mahaenay a demak.’ Pakonira hananay no kasakopang ko mahaenay waywayan, malikoanho minengneng. O roma salikaka alatek sanay, mitodongay cangra to Kawas sidaˈit micada to cowa ka lefot a tamdaw. Kawra cowa ko mamihayda ci Yihofa to pakidemay a raraw. Oya cowa cingodoen a mararaway tamdaw, papakadit to ngangan no kasakopang, wa madenga ko romaroma Krisciyang. Samaanay ko sapalimoˈot ni Pawlo to kasakopang hani?
5. Sapalimoˈot ni Pawlo to kasakopang no Korinto sasamaan ko demak? O manan ko tatodong no sowal ni Pawlo? (1 Korinto 5:13) (Nengnengen ko coka.)
5 ˈOsien ko 1 Korinto 5:13. Mikayatay ko Kawas ci Pawloan patikami to Korinto kasakopang, padengen ko ngangan noya cowa ka pasasiyor a tamdaw nai kasakopang. Sasamaanen no Korinto kasakopang minengneng koniya tamdaw hani? Sapalimoˈot ni Pawlo cangranan ‘akato cawmaˈen cingra,’ ano ‘kalacafay komaen, cowa ka ngaˈay,’ sanay. (1 Korinto 5:11) Hano mahaen ko sapalimoˈot ni Pawlo hani? Samanen ano kalacafay to tamdaw komaen, wa masasowal cingranan. Tatodong no sowal ni Pawlo, o Korinto kasakopang cowato ka ngaˈay macacawmaˈ toniya tamdaw. Cato ka micawmaˈ toniya tamdaw, wa madipot ko salikaka ho eca ka mafiyor noniya mararaway tamdaw. (1 Korinto 5:5-7) Roma i, mihaen alatek mahapinang noniya tamdaw to pakidemay ko raraw ningra, telocto wa mangodoen a sapipasasiyoraw cingra.
Papitiliden ni Yihofa ci Pawlo to sakayat, palimoˈot ko Korinto kasakopang padengen ko ngangan no cowa ka pasasiyor a mararaway tamdaw (Nengnengen ko saka 5 fatac)
6. O tikami ni Pawlo samaanay mifiyor to Korinto kasakopang atoya mararaway a tamdaw hani?
6 Patikami ci Pawlo to Korintoay kasakopang ikor, sakafanaˈaw to harateng no itiraay a salikaka. Ikor, iraay ko ngaˈayay lihaf ni Titus, ngaˈayay ko harateng picada no salikaka to tikami ni Pawlo. (2 Korinto 7:6, 7) Midofdofan nangra ko sapalimoˈot ni Pawlo a midemak, pairaay to makapahay minaroˈan. Oya mararaway a tamdaw pasasiyorayto, mafalicayto ko pinangan ato waywayan ningra, misatapang mitodong to moecelay palinian ni Yihofa a maˈorip. (2 Korinto 7:8-11) Mihaenay, palimoˈotan ni Pawlo ko Korinto kasakopang to sasamaan ko demak noikor hani?
KORINTO A KASAKOPANG SAMAANAY MINENGNENG TO PASASIYORAY A TAMDAW
7. Mipadengan no Korinto a kasakopang ko ngangan noya mararaway a tamdaw, pairaay to maanan ngaˈayay a minaroˈan? (2 Korinto 2:5-8)
7 ˈOsien ko 2 Korinto 2:5-8. Sowal ni Pawlo, ‘o mahaenay a tamdaw tahacadaayto to sarikec no ˈalomanay tamdaw, maedengayto.’ Tatodong i, malaˈosiayto ko pirikec, mikayatay to mararaway tamdaw a pasasiyor.—Hipray 12:11.
8. Palimoˈotayho ci Pawlo to Korinto a kasakopang sasamaan ko demak hani?
8 Mansa, palimoˈot ci Pawlo to Korinto kasakopang sanay: ‘Kamo mikifalocoˈ misodod cingranan, mihinom cingranan, ho mafanaˈ cingra to maolahay kamo cingranan.’ Sinanoten, makalimay ci Pawlo to kasakopang padama toniya mararaway tamdaw, minokay i finawlan ni Yihofa, makalimayho tano waywayan sasowalen cangra a micada cingranan, mikifalocoˈ misodod cingranan. Ano mihaen ko demak nangra, mamatemer ko falocoˈ noya pasasiyoray a tamdaw, sasoˈlinay ko falocoˈ no salikaka micada cingranan.
9. O roma tamdaw hano cowa ka kahi misodod toya pasasiyorayto a tamdaw?
9 Iraay ko cowa ka picada toniya pasasiyorayto a tamdaw ilalomaˈ no Korinto kasakopang han? Iraay alatek, kawra cowa ka sowal no sinael. Samanen mifiyoray ko waywayan noniya tamdaw to kasakopang, hanaca madokaˈay ko romaroma tamdaw. O roma sa, saka materek i kasakopang, misaˈicel ko niyah a mitawmec to makoracay ngaˈ, kawra o cecay maˈodangay a tamdaw, madoloay a minokay i kasakopang, hanaca mahemekay ko ˈalomanay mihamham cingranan, hato cowa ko masadafdafay. (Nengnengen ko Luka 15:28-30.) Mihaen i, paihkal to soˈlinay a olah ko kasakopang no Korinto toniya pasasiyorayto a tamdaw, hano o masakalimlaan hani?
10-11. Ano cowa pisodod to pasasiyorayto a tamdaw ko malohemay malitengay, alatek wa samaanto ko teloc hani?
10 Haratengen hena, ano cowa pihayi ko malohemay malitengay panokay i kasakopang tonini a mikifalocoˈay pasasiyor a tamdaw, anca patatikol cingra ikor, cowa ka paihkal to olah cingranan ko salikaka, masamaanto ko teloc hani? Alatek wa ‘madokaˈ mararom ko falocoˈ’ nonini a tamdaw. Alatek awaayto ko kapo no niyah sa, wa sapisawadawto to niyah, cowato ko sapisalofaw to kalalaˈed aci Yihofaan.
11 O roma i, o salikaka i kasakopang ano cowa pisodod to pasasiyorayto a tamdaw, wa mipalak to kalalaˈed no niyah aci Yihofa. Hano mahaen ko sowal hani? Samanen cowa pitodong cangra ci Yihofaan, paihkal to sidaˈit siniˈadaay to pasasiyoray tamdaw, ao mitodongay ci Satanan awaay ko olah. Ano mihaen, wa malo lalosidan ni Satan cangra, a midokaˈ torira a salikaka, mipalahdaw to pakasoˈlinay falocoˈ ningra.—2 Korinto 2:10, 11; Ifiso 4:27.
12. Sasamaan ko Korinto kasakopang mitodong ci Yihofaan hani?
12 Saka ecaaw ka mafiyor ni Satan, o Korinto a kasakopang sasamaan mitodong ci Yihofaan hani? Oha mamitodong ci Yihofaan micada to pasasiyoray a tamdaw. O masamaanay a Kawas ci Yihofa? Nengnengen ko sowal no mitiliday to Fangcalay Cudad. Sanay ci Tafiti: ‘O ngaˈayay ci Yihofa, makalimay misodod to tamdaw.’ (ˈOlic 86:5) Sanay ci Mika: ‘O cima a kawas ko papakadangar Tisowanan? Palahdaw Kiso to raraw, misodod Kiso to raraw no finawlan.’ (Mika 7:18) Sanay ci Isaya: ‘Mariˈangay a tamdaw ka piliyas to mararaway lalan, tatiihay tamdaw ka pifalah to mararaway harateng, patatikol i tatihi ni Yihofa, wa malifok ko siniˈada Ningra, ka pinokay i Kawas, wa milifok to sasodod Ningra.’—Isaya 55:7.
13. O Korinto a kasakopang hano miliyaw cadaen koya pasasiyoray a tamdaw, hamaan a mamanayar? (Nengnengen ko sapatongal lalakaw “Oya Mararaway i Kasakopang no Korinto Ihacowaay Tatokian Miliyaw a Cadaen?”)
13 Sapitodongaw ci Yihofaan i, Korinto kasakopang oha mamidofdof to sakayat ni Pawlo, mahemek micada to pasasiyoray a tamdaw patikol i kasakopang, halo paihkal to mikifalocoˈay a olah cingranan. Mihaen ko demak nangra misawacayay to ‘midofdofay i kalo a demakan’ ko niyah. (2 Korinto 2:9) Soˈlin oya mararaway tamdaw na mapadengay ko ngangan nai kasakopang to pina a folad, kawra macadaayto ningra ko sarikec a mikifalocoˈ a pasasiyor, mansa o malohemay malitengay no Korinto kasakopang, awaay ko lalangian misahalafin mitala, ngaˈ micada tonini a mararaway patatikol i kasakopang.
MITODONG CI YIHOFAAN, MASADAFDAFAY A SINIˈADA
14-15. Mikitini to Korinto kasakopang a maˈoningay mananamay ita ko manan hani? (2 Pitiro 3:9) (Nengnengen ko coka.)
14 Milingatay to Korinto kasakopang a miˈoningan, ‘oha sapipasifanaˈaw kitanan a tiliden.’ (Loma 15:4) Oniya maˈoningay wa mahapinang ita, cowa ko pasalaten ni Yihofa ko finawlan no Niyah midemak to mararaway. O roma sa, o siniˈadaay ci Yihofa, mansa ngaˈayay materek ko cowa ka pasasiyor a tamdaw i kasakopang. Kawra cowa ko harateng ni Yihofa konini, soˈlin mahemekay ci Yihofa misodod, kawra awaay ko tolas a misodod Cingra, cowa ka saan, cowa ko patelasay a mifalic to palinian Ningra. (Yuta 4) Soˈlin, ano mihayay ci Yihofa to cowa ka pasasiyor a mararaway tamdaw materek i kasakopang, o cowato ko siniˈadaay a Kawas, samanen wa midenga koni to kasakopang.—Taneng 13:20; 1 Korinto 15:33.
15 O roma i, mananamay ita cowa ka makalim ci Yihofa to kahacecay tamdaw a mapalaˈafo, ao micadaay ko kahacecay tamdaw to salidong. O cecay tamdaw ano mikifalocoˈ a pasasiyor, sapisalofaw to kalalaˈed no niyah aci Yihofa, wa makalim ci Yihofa paihkal to siniˈada cingranan. (Icikil 33:11; ˈosien ko 2 Pitiro 3:9.) Mihaenay, oya mararaway i Korinto kasakopang a tamdaw, na pasasiyor cingra miliyas to raraw i, pakaynian ni Yihofa ci Pawloan palimoˈot to Korinto kasakopang a misodod toya tamdaw, halo mahemek a micada cingranan.
Matomesay ko olah siniˈada ni Yihofa. Todongen no salikaka ko taˈarawan ni Yihofa, mahemek micada to pasasiyoray a tamdaw (Nengnengen ko saka 14-15 fatac)
16. Mananamto ko demak no Korinto kasakopang, samaanay ko harateng iso hani?
16 Oniya demak no Korinto kasakopang mahapinangay ita, o moecelay masadafdafay ci Yihofa, o matomesay ko olah. (ˈOlic 33:5) Mafanaˈ tonini, coko sapipakahemekaw kiso Cingranan han? Miakoˈiday kita ci Yihofaan paihkal to siniˈadaay, samanen kita kahacecay mararawayto, misaaliay to sasodod ni Yihofa. Miakoˈidayho kita milimasmas ci Yihofa to sapatefoc, ho macada ita ko sasodod Ningra. Maolahay ci Yihofa to finawlan Ningra, oha sapilifokaw no mita to sataˈangayay a epoc, mansa parihadayay kitanan!
17. Dotoc a tosa lalakaw wa milengo to manan hani?
17 Anini, ano ira ko pakidemay ko raraw a tamdaw i kasakopang, sasamaan ko malohemay malitengay mitodong ci Yihofaan, tano olah mikayat toniya tamdaw a pasasiyor hani? Ano misaˈosi ko malohemay malitengay mipadeng to ngangan no mararaway nai kasakopang, anca miliyaw micada to pasasiyoray a tamdaw, sasamaan ko demak no salikaka hani? Dotoc a tosa lalakaw wa milengo tonini a salicay.
RADIW 109 Faedeten ko Falocoˈ Masasiolah