LALENGOEN LALAKAW 35
RADIW 123 Madimadi Midofdof to Limasmas no Kawas
Padamaen ko Mapadengay ko Ngangan Nai Kasakopang a Tamdaw
‘O cecay pasasiyoray a mararaway tamdaw, ikakaay toya moecelay cowa pisaali to papasasiyor a 99 tamdaw, paira to taˈangayay a hemek no ikakarayan.’—LUKA 15:7.
KALIMLAAN NO LALAKAW
Mamananam ita, hano mapadengay ko ngangan no romaroma tamdaw nai kasakopang, ato sasamaan ko malohemay malitengay padama cangranan pasasiyor halo miliyaw milifok to pihayda ni Yihofa.
1-2. (1) Samaanay ko pinengneng ni Yihofa to padetengay mararaw? (2) Halamhamay ci Yihofa to mararaway tamdaw sasamaan ko demak hani?
CIˈINTEHAY ci Yihofa to raraw, cowa pasalat to mararaway. (ˈOlic 5:4-6) Halamhamay ci Yihofa midofdof kita to maˈoningay i Fangcalay Cudad a moecelay palinian. Kawra, malefot ko demak ita, cowa ka saan ci Yihofa a misaali. (ˈOlic 130:3, 4) Ano ira ko ‘misakahmaway to Kawas a tamdaw, tano sidaˈit no Kawas ita a midemak to kaacekan mararaway demak,’ cowa ko mamihayi ci Yihofa. (Yuta 4) Sowal no Fangcalay Cudad, ‘oya misakahmaway to Kawas a tamdaw’ wa ‘mapalaˈafo’ i Armakiton.—2 Pitiro 3:7; Paˈarawan 16:16.
2 Kawra, cowa ka halamham ci Yihofa to sakalaˈafoaw no cecacecay a tamdaw. Mananamayto ita, ihkalay ko sowal no Fangcalay Cudad, ‘halamhamay to pasasiyor ko tamdamdaw maemin,’ sanay ci Yihofa. (2 Pitiro 3:9) O malohemay malitengay no kasakopang mamitodong ci Yihofaan, mihadidi padama to mararaway tamdaw a pasasiyor, misalof to kalalaˈed aci Yihofa. Kawra, o roma tamdaw cowa ko sapipasasiyoraw. (Isaya 6:9) Soˈlin misaliyaliyaw ko malohemay malitengay mikayat cangranan pasasiyor, kamayan cangra cowa ka falic, ano mahaen sasamaanto hani?
‘PADENGEN KO NGANGAN NO TATIIHAY A TAMDAW ILALOMAˈ NAMO’
3. (1) Mikitini i Fangcalay Cudad, o mararaway tamdaw ano caka kahi pasasiyor, sasamaan ko demak no malohemay malitengay hani? (2) Ano mapadeng ko ngangan no tamdaw nai kasakopang, hano o ningra a mipiliˈan konini hani?
3 O mararaway tamdaw ano caay ka kahi pasasiyor, mamitoor ko malohemay malitengay to sowal no 1 Korinto 5:13 a midemak, sanay ko sinael: ‘Padengen ko ngangan no tatiihay a tamdaw ilalomaˈ namo.’ Mapadeng ko ngangan nai kasakopang, o ningra a mipiliˈan konini. (Kalatiya 6:7) Misamaanay hani? Samanen misaˈicelay ko malohemay malitengay misaliyaliyaw mikayat cingranan pasasiyor, cowa picada cingra. (2 Hongti 17:12-15) O waywayan ningra paihkalay to cowa ko sapitooraw cingra to palinian ni Yihofa.—Limoˈot 30:19, 20.
4. Ano mapadeng ko ngangan no tamdaw nai kasakopang i, hano mamilasil ko malohemay malitengay i kasakopang hani?
4 Ya mapadeng ko ngangan no mararaway cowa ka pasasiyor a tamdaw nai kasakopang i, wa milasil ko malohemay malitengay i kasakopang, onini a tamdaw cowato ko Misawacayay Tamdaw ni Yihofa.a Oniya limasmas, cowa ko sapipakangodoaw to mararaway tamdaw, oha sapifanaˈaw to salikaka dofdofen ko sapalimoˈot no Fangcalay Cudad, cowato ko mamicawmaˈ toniya tamdaw, ano komaento i, cowa ka ngaˈay. (1 Korinto 5:9-11) Hano pafeli ci Yihofa kitanan toniya sapalimoˈot hani? Sowal no tarokos ci Pawlo: ‘O mimingay a tamod pakafowakay to emin a milonican a emi.’ (1 Korinto 5:6) Oya cowa pasasiyor a mararaway tamdaw ano materekayho i kasakopang, o roma tamdaw alatek wa sa miharateng, midofdof to palinian ni Yihofa cowa ko masakalimlaan.—Taneng 13:20; 1 Korinto 15:33.
5. Sasamaan kita minengneng to mapadengayto ko ngangan nai kasakopang a tamdaw hani? Misamaanay?
5 Sasamaan kita minengneng to mapadengayto ko ngangan nai kasakopang a tamdaw hani? Soˈlin cowa ko mamicawmaˈ kita cangranan, kawra wa iraho ko tokel nangra patatikol. Haratengen, na patafangay ci Yihofaan cangra, kawra cowa ka tooren ko miketonan a sowal nangra, telocto o katalawanto a pakayraan ko niyah. (Icikil 18:31) O malafelay a siri han no mita minengneng cangra. Soˈlin malafel ko siri, wa patikol minokay i pasirian alatek. Mansa, ano paihkalayho ci Yihofa to siniˈada to tamdaw, pafeliay to toki to tamdaw a pasasiyor, oniya tamdaw wa iraayho ko hatokel patatikol i kasakopang. O malohemay malitengay sasamaan padama to mapadengayto ko ngangan nai kasakopang a tamdaw hani?
SASAMAAN PADAMA KO MALOHEMAY MALITENGAY TO MAPADENGAYTO KO NGANGAN NAI KASAKOPANG A TAMDAW
6. Sasamaan ko malohemay malitengay palidlid padama to mapadengayto ko ngangan nai kasakopang a tamdaw hani?
6 Mapadengayto ko ngangan nai kasakopang a tamdaw, o mifalahanto han? Wa tano niyah sa cangra a miliyaw patatikol i tatihi ni Yihofa han? Cowa. Ano misaˈosi ko iing no malohemay malitengay mipadeng to ngangan no mararaway i, wa pakafanaˈ cingranan to sasamaan miliyaw patatikol i kasakopang. Cowa konini aca, i kalo a pakayraan, wa pakafanaˈho cingranan, ikor no pina folad wa masasoˈaraw cangra, cipinang to mafalicayto ko waywayan ningra hokira. Ano makahi ko mararaway tamdaw a masasoˈaraw i, wa sidaˈit ko malohemay malitengay pakalalok cingranan a pasasiyor. Soˈlin cowa ka tangsol a pasasiyor cingra, kamayan milimasmas ko malohemay malitengay a milisoˈ cingranan i misaˈosiay a romiˈad.
7. Pakayni i padama to mapadengayto ko ngangan nai kasakopang a tamdaw, samaanen no malohemay malitengay mitodong ci Yihofa, paihkal to siniˈadaay falocoˈ hani? (Yirimiya 3:12)
7 Padama ko malohemay malitengay to mapadengayto ko ngangan nai kasakopang a tamdaw i, wa misaˈicel mitodong ci Yihofaan paihkal to siniˈadaay a falocoˈ. I nolitengan, cowa pitala aca ci Yihofa to misafelitay a Israil tamdaw patatikol, ˈayaw no sapipasasiyoraw nangra i, talaˈayawayto padama cangranan. Mahecad to masowalay noniya Mikecolay saka 32 a lalengoen lalakaw, soˈlin mararawho ko fafahi ni Hosiya, kamayan palimoˈot ci Yihofa ci Hosiyaan malakangaˈay ato fafahi. Pakaynian ni Yihofa toniya demak, paihkal kitanan to o kadofahay ko siniˈada Ningra. (Hosiya 3:1; Malaki 3:7) Malohemay malitengay no Krisciyang mahecaday ci Yihofaan, mikifalocoˈ a mihalamham ko mararaway tamdaw a patatikol, cowa ko papakangodo cangranan.—ˈOsien ko Yirimiya 3:12.
8. Malafelay wawa a sapatinako samaanay padama kitanan, tangongol ko kacipinang to siniˈadaay ni Yihofa a harateng hani? (Luka 15:7)
8 Haratengen koya malafelay wawa a sapatinako. Maˈaraw no wama minokay koya wawa, ta ‘cikay sa koya wama a mitakec, mihangot.’ (Luka 15:20) Sinanoten, cowa ka tala sa ko wama toya wawa micangacang to sasodod, ao talaˈayaway comikay tayra i tatihi ningra. Mahaenay ci Yihofa micada to malafelay a siri. Misaˈicelay ko malohemay malitengay mitodong ci Yihofaan, mikifalocoˈay cangra hinatala toniya tamdaw a ‘minokay.’ (Luka 15:22-24, 32) Ano pasasiyor ko mararaway tamdaw i, o ikakarayan ato ifafekangay no sera malacecayay a mahemek!—ˈOsien ko Luka 15:7.
9. Samaanay pakalalok ci Yihofa to mararaway tamdaw patatikol i tatihi Ningra hani?
9 Tahini mananamay ita, cowa pihayda ci Yihofa materek koya padetengay mararaw cowa pasasiyor a tamdaw i kasakopang. Cowato pikihar ci Yihofa cangranan, cowa ka saan, halamhamay Cingra to patatikol a pasasiyor. Itini i Hosiya 14:4, paihkalay ci Yihofa to manonoˈ i mararaway tamdaw, sanay: ‘Adahen Ako cangra, wa madimadi cangra i Takowanan, mikifalocoˈ Kako maolah cangranan, samanen o mihadakan Ako a keter, malahdawayto.’ Wa misaˈicelay ko malohemay malitengay, minaˈeng i falocoˈ koniya mitemeray a sinael, misinanot to mararaway tamdaw iraay ko pasasiyoray harateng hokira. Ano mafanaˈ ko miliyasay ci Yihofaan a tamdaw to nonoˈ ni Yihofa, alatek wa matemeray ko falocoˈ, kaliki a patatikol i tatihi Ningra.
10-11.Sasamaanen no malohemay malitengay padama ko isaˈayaway mapadengayto ko ngangan nai kasakopang a tamdaw hani?
10 Ano o cecay halafinay mapadengayto ko ngangan nai kasakopang a tamdaw, samaanen no malohemay malitengay padama cingra hani? Alatek cowato ka pidemak to isaˈayaway a raraw cingra, matawalayto hano mapadeng ko ngangan no niyah nai kasakopang. Ano samaanto i, wa misaˈicel ko malohemay malitengay mikilim to mahaenay a tamdaw, milisoˈ cangranan. Malitemoh no malohemay malitengay ko mahaenay tamdaw i, wa ngaˈay mitolon cangra, paihkal to damsayay, pakalalok cingranan patatikol i kasakopang. Manaokaniw, ano halafinay miliyasayto ko cecay tamdaw, o kalalaˈed ningra aci Yihofa cowa ka ngaˈay. Ano sapinokayaw i kasakopang koniya tamdaw, soˈlin cowaho ka miliyaw cadaen no kasakopang, wa limasmasen no malohemay malitengay ko salikaka pasifanaˈ cingranan to Fangcalay Cudad. Ano samaanto i, haratengen, edengan o malohemay malitengay ko mamilimasmas to pasifanaˈ cingranan to Fangcalay Cudad.
11 O malohemay malitengay mahecaday ci Yihofaan siniˈadaay to mararaway a tamdaw, mihaenay wa misaˈicel cangra mikilim to miliyasay ci Yihofaan a tamdaw maemin, hanaca pakalalok cangranan patatikol i katihi ni Yihofa. O cecay mararaway tamdaw ano paihkalay to pasasiyorayto ko niyah, halo cowato pidemak to mararaway i, wa kaliki ko kasakopang micada cingranan.—2 Korinto 2:6-8.
12. (1) I masamaanay a pakayraan, wa mikiriwiˈ a misinanot ko malohemay malitengay a misaysay? (2) Hano caka ngaˈay kita misaˈosi to midemakay to romaroma a raraw a tamdaw, hato cowa ka ngaˈay micada to siniˈada ni Yihofa hani? (Nengnengen ko ilaenoay safanaˈ.)
12 Nolatekay, misaˈosi ko malohemay malitengay to patatikol ko cecay mararaway tamdaw i kasakopang, wa mikiriwiˈ a misinanot. Tinakoen, na misafelitay cingra to soˈlinay kimad, mikariˈang miˈodang to kaemangay, anca tano milipalaway a pakayraan padeteng sa sakalacinowas to raramod, mamisongilaˈ ko malohemay malitengay misinanot, ho cipinang to naifalocoˈay pasasiyor koniya tamdaw. (Malaki 2:14; 2 Timoti 3:6) Dadipoten no malohemay malitengay ko kasakopang, kawra cacipinangho cangra, ano o mananto ko midemakan ningra a raraw i, ano naifalocoˈay a pasasiyor, cowato pidemak to mararaway i, wa cadaen ni Yihofa cingra. Sasoˈlinen ko sowal i, ano o milipalawan ko pakayraan midokaˈ to tao i, wa misinanot ko malohemay malitengay misaysay to demak ningra. Kawra cowa ka misakakinih ko malohemay malitengay, misaˈosi to midemakay to romaroma a raraw a tamdaw, hato cowa ka ngaˈay micada to siniˈada ni Yihofa.b—1 Pitiro 2:10.
SASAMAANEN KO DEMAK NO SALIKAKA
13. Sasamaan ko pinengneng ita to marikecay a salikaka hani? Sasamaan ko pinengneng ita to mapadengay ko ngangan nai kasakopang a tamdaw hani?
13 Ano milasil ko kasakopang marikecayto ko cecay salikaka i, kamayan kita padadotoc micawmaˈ cingranan, samanen mafanaˈayto kita to pasasiyorayto cingra, cowato ka pidemak to mararaway. (1 Timoti 5:20) Masalalomaˈayho cingra i kasakopang, misaaliay to sapakalalok no salikaka, ho ngaˈay cingra padadotoc midemak to matatodongay a demak. (Hipray 10:24, 25) Kawra, ano o cecay tamdaw mapadengay ko ngangan nai kasakopang, cowato ka hecad ko pakayraan. Cato ka macacawmaˈ kita cingranan, cato ka malacafay cingranan a komaen.—1 Korinto 5:11.
14. Ano o cecay mapadengay ko ngangan nai kasakopang a tamdaw mirienang to saˈopo i, o Krisciyang sasamaan mitoor to safalod no Fangcalay Cudad, ato makapahay falocoˈ a misaˈosi hani? (Nengnengen ko coka.)
14 O tatodong no 1 Korinto 5:11 i, ano mapadengay ko ngangan no cecay tamdaw nai kasakopang, cowa ka hangangaˈay sikolen ita cingra, cowa ka ngaˈay mitahidang cingra misaˈopo anca masasowal a milicay han? Cowa. Soˈlin, i kalo a romiˈad cowa ka macacawmaˈ cingranan kita. Kawra o kahacecay Krisciyang wa ngaˈay mitoor to safalod no Fangcalay Cudad, ato makapahay falocoˈ no niyah a mitahidang cingranan mirienang to saˈopo. Alatek o salawina ita cingra, hanaca o widang ita isaˈayaw. Ano mirienang cingra to saˈopo, isaˈayaw cowa ka masasowal milicay kita cingranan, kawra, nohatini mamitoor kita to safalod no Fangcalay Cudad ato makapahay falocoˈ a misaˈosi. O harateng no roma tamdaw ngaˈayay masasowal a milicay to mahaenay a tamdaw, anca mahemek militemoh cingranan mirienang to saˈopo. Kawra oha sasinanoten i, cowa ka adihayen ko kasasowal ita cingranan, cowaho ka ngaˈay malacafay midemak.
O salikaka wa ngaˈay mitoor to safalod no Fangcalay Cudad ato makapahay falocoˈ a misaˈosi, mitahidang to mapadengay ko ngangan nai kasakopang a tamdaw mirienang to saˈopo, o niyah harateng a misaˈosi, masasowal milicay tora tamdaw hokira (Nengnengen ko saka 14 fatac)
15. Masowalay itini 2 Yohani 9-11, o manan ko midemakan a raraw ko mitoroˈan hani? (Nengnengen ko sapatongal lalakaw “Mahecaday a Raraw ko Misowalan ni Yohani aci Pawlo Han?”)
15 O roma tamdaw sanay ko harateng: “Sowal no Fangcalay Cudad, ano masasowal milicay ko Krisciyang to mahaenay a tamdaw, coko mamiladaˈ to raraw ningra ko niyah han?” (ˈOsien ko 2 Yohani 9-11.) ˈArawhan, oniya maˈoningay no sinael, o misafelitay to soˈlinay kimad, ato miowing to tao midemak to tatiihay a tamdaw ko mitoroˈan. (Paˈarawan 2:20) Mihaenay, ano palosiyang ko cecay tamdaw to misafelitay to soˈlinay kimad, anca miowing to tao midemak to tatiihay, cato ka pilisoˈ ko malohemay malitengay cingranan. Soˈlinay haw i, oniya tamdaw iraayho ko hatoki a talipaˈelal. Kawra ˈayaw nonini i, cowa ka masasowal kita milicay cingranan, cowaho ka ngaˈay mitahidang cingranan mirienang to saˈopo.
TODONGEN CI YIHOFA PAIHKAL TO SINIˈADAAY A FALOCOˈ
16-17. (1) Hinatalaay ci Yihofa to mararaway tamdaw misamaan ko demak hani? (Icikil 18:32) (2) Sasamaanen no malohemay malitengay ko demak?
16 Mikitini toniya folad a Mikecolay mananamay ita ko manan hani? Cowa ka kahi ci Yihofa mapalaˈafo ko cecacecay a tamdaw! (ˈOsien ko Icikil 18:32.) Hinatalaay Cingra malakangaˈay ko mararaway tamdaw Cingranan. (2 Korinto 5:20) Mihaenay, mikitiyaho tahanini padadotocay ci Yihofa mitahidang to miliyasay Cingranan a tamdaw, patikol tayni i katihi Ningra. Wa ngaˈay ko malohemay malitengay malacafay ci Yihofa a matayal, mikayat to mararaway tamdaw a pasasiyor, tada o kalikoan koni!—Loma 2:4; 1 Korinto 3:9.
17 Haratengen hena, pasasiyor ko mararaway a tamdaw i, hakowaay ko hemek no ikakarayan hani? Ikakarayan a Wama ci Yihofa maˈaraway ko malafelay a siri patikol i kasakopang i, malifetay Ningra ko hatiniay a hemek. Saharateratengen ita ko mikiriwiˈay a sidaˈit ato siniˈada ni Yihofa, mihaenay i, wa matongal matongal ko olah ita ci Yihofaan.—Luka 1:78.
RADIW 111 Lalangian a Mahemek
a Cowato ko papasowal to “mafalahay” ko tamdaw. Misalalangian to sowal ni Pawlo itini 1 Korinto 5:13, nohatini wa saanto ko sowal—mapadengayto ko ngangan—no cecay tamdaw nai kasakopang.
b Saan ko Fangcalay Cudad, o roma mararaway tamdaw cowato ko mamicada to sasodod tahadaˈoc. Hano mahaen ko sowal? Samanen, cowa ko midemakay to manamanan a raraw, ao misaˈosiay cingra padeteng mitowakang to Kawas, misaˈatekak ko falocoˈ caay ka kahi pasasiyor. Kawra, edengan ci Yihofa aci Yis ira ko fadangalan misawkit to tamdaw cowa ko mamilifok to sasodod tahadaˈoc.—Marko 3:29; Hipray 10:26, 27.